Asignatura de cochos y gatos

Quan yera chiquet me feba miedo os cans. Nunca no en heba teniu y cuento que a mia chirmana ye a que me transmitió ixe miedo. A ella le mordió un, y a yo unatro. Poquet a poquet fue perdendo ixa cerina. Aprofitaba que un amigo y vecin se feba la gambadeta con o cocho, pa fer-me un fumarro con ell d'amagatons. Aquella canya estió a primera que la querié una miqueta. 

Ya de mozo, prencipié a interactuar con cans y gatos. A moniquet y con firme cudiau. Naixiu y creixiu de Zaragoza, os primers contactos mios con os lugars m'aduyoron a fer-lo. Tamién toda la chent que arredol de yo, teneba gatos y cans. Quan m'independicé ya heba superau aquells miedos y agora vivo con un gatet bien particular y carinyoso, naixiu de Banariés y que nos conoixiemos gracias a Florencio. Kurt ye parte muit important d'a mia vida y no quiero nian esmachinar a casa sin ell.

Ixos miedos que teneba de chiquet, en buena mida, son porque dengún no m'heba amostrau a "charrar" con a resta d'animals. Agora, amanau a los quaranta y dimpués de ueito anyos convivindo con Kurt, conoixco lo suyo lenguache perfectament. Igual como, si fa u no fa, me pasa con os cans. Sobre tot con os conoixius. Pocas cosas me fan mas goyo que chugardiar con bell cocho, correr, esbolotar-nos, ...Tot ixo me lo he estau perdendo durant muito tiempo.

A respuesta pa tot no ye una asignatura escolar. Ye claro. Pero agora de gran, me pienso que si en bell momento m'hesen trayiu ta clase una clica de cans y atra de gatos y nos hesen explicau quatre cosetas, m'hese escusau muitos problemas y hese ganau un tiempo maravelloso que pasar rodiau d'animals. No cal guaire tiempo. Con bell par de sesions cuento que se podrían fer muitas cosas.

Sé que o mio caso de "urbanitismo extremo" no ye guaire común en Aragón. Pero desgraciadament, cuento que cada vegada en seremos más. Asinas que no privemos a las venients cheneracions de urbanitas d'o disfrute de poder entender-te con os animals no humanos que tenemos más cerqueta. 

Lenguas y actitutz

Como muitas sabretz levo tres anyos aprendendo formalment catalán y bells quince aprendendo aragonés. A situación de l'aragonés, sin estandar, normativa, ni estudios oficials, ha feito que tienga una competencia pareixida en as dos lenguas, encara que quiero pensar que charro millor aragonés que catalán. Sino, me doi por hodiu...

L'atro dia, un companyer me preguntó por a reacción d'a chent catalanofona debant d'o mio catalán. Ye evident que lo que pueda yo charrar de catalán por agora no ye guaire correcto, que m'entivoco, y que a mia prenuncia no ye precisament la idonea. Manimenos, nunca m'han feito garra cenyo de no entender-me, ni m'han criticau as errors que haiga puesto fer, ni m'han correchiu. Quan han parau cuenta de que o catalán no yera la mia lengua materna, bella vez m'han preguntau que cómo que charraba. Con sorpresa, curiosidat y mesmo con goyo. Nunca con refús, ni fendo-se a risa, ni con bamba. Les n'he explicau y siempre han reaccionau positivament. Me han animau a continar aprendendo y m'han felicitau por l'intrés por a suya lengua. Chent de diferents puestos de Catalunya, País Valencià y d'a nuestra quiesta Franja.

En os quince anyos que levo aprendendo aragonés, m'he trobau con bella persona que m'ha amostrau ixa mesma actitut. Bell par de goletz d'o Pirineu y bell estudioso de l'aragonés. Pero tamién m'he trobau, y muito, con chent que pareixeba que le estases chitando sal en lo sembrau. Que malas que dices una parola en atra variedat, blinca, que te corriche terne que terne, que se fa a mofla d'o que desconoixes, que dubda d'as tuyas motivacions pa aprender,... ...

Prou que bi ha de tot, en todas dos comunidatz lingüisticas. Regular que bell dia me trobaré bella ababola catalanofona que me faiga burro falso. Pero dica que prencipié a aprender catalán, no heba viviu lo que ye estudiar una lengua minorizada y que a inmensa mayoría d'a comunidat de fablants te veiga como un aliau. Que facil ye tot, quan una lengua ye normalizada y a suya comunidat lingüistica concienciada!

Por si m'entivoco

Bi ha dias que pierdo muito a fe en a humanidat. Que me veigo tant rodiau de'ababols, carnuces, sanselos y desustanciaus que pienso que no tien mica sentiu todas as batallas que libro de contino. Que me qüestiono tot por lo que luito, y si realment mereixe la pena fer-lo. Sino m´iría millor pasando de to y adedicando lo que me quede de vida a leyer y viyer series. Ixos diyas pienso en deixar l'activismo, as asociacions y organizacions, as clases d'aragonés, o blog, a radio, ... tot. Pero de vez, pienso que me he entivocau tantismas vegadas en o pasau, que m'enticovo cada dia y que regular que continaré entivocando-me en o futuro. Asinas que, por si m'entivocase y a humanidat sí que tenese solución, nomás por ixa chiqueta posibilidat, caldrá continar treballando.

Y Lucy s'estozó

Sin estar un ecolatra ni un hippie abrazaarbols, pienso que a humanidat hemos perdiu masiau o contacto con a millor parte d'a nuestra naturaleza animal: l'aprofitamiento d'os recursos, as astrucias fisicas, a confianza en a intuición y en os nuestros sentius, ... A evolución nos ha feito una especie prou intelichent, sí, pero de vez somos zampos, malfurriadors y plens de miedos inchustificaus.

Se gosa de charrar metaforicament de "baixar d'as brancas pa definir, en un petén y con pocas parolas, os millons d'anyos que nos costó plegar a estar Homo Sapiens Sapiens. Ixe proceso con que os nuestros antepasaus decidioron - u talment les calió - de fer-se o pre por tierra.

Ahiere m'entere de que Lucy, ixe eixemplar d'Australopithecus Afarensis que tant parient nuestra ye, morió en baixando d'un arbol. A evolución ye poetica, mesmo en os chiquetz detalles.

microbarrenaus de bancos

Iste maitin m'ha tocau "ir de bancos" a fer mandaus: ingresar un cheque, pagar uns recibos y cosas asinas. Chusto en dentrar en un d'ells con o MP3 enchegau ha sonau ista canta.... Casualidatz d'a vida...

microbarrenaus: l'aragonés antigo

¿Prechuicios, ignorancia u nacionalismo lingüistico? Como no sé qui lo escribió no puedo decir-lo con seguridat. En o museu de Sos adedicau a Fernando II, o catolico, i charra breument d'as luengas, fablando d'o castellano, o catalán, o portugués l'arabe y "l'aragonés antigo" que, adhibe, quedó en os Pirineus. Primer de tot, remerar que, en empecipiando o sieglo XVI, l'aragonés se charraba muito a o Sur de Guara. Pero ye que, antimás, l'aragonés ye a unica luenga de toda a lista con adchetivo. O catalán, castellano, portugués y arabe no yeran antigos alavez. Talment charremos o mesmo castellano que en o sieglo XVI y no'n he parau cuenta. Pero l'aragonés sí que ye "antigo". Hibo! Siempre amostrando l'aragonés como qualcosa muerta, d'antismas, folclorica y toda ixa ripa de prechudicios. U simpla ignorancia.

microbarrenaus: zarrau por Pilars

Istos Pilars me toca de treballar, como muitas sabretz, asinas que poca fiesta podré tener. Prebaré d'ir ta Comando Cucaracha o miercols y ta Barricada o viernes, pero ixo ye tot. A lo menos podré estar en os Pilars d'A Flama y en as barras d'o BIC, que estianyo se meterán en a Plaza d'a Madalena... Asinas que astí nos viyeremos. Tierra de barrenaus cuento que remanirá zarrau dica o 18 u más. Que tos faigan buen prebo as fiestas y fetz-me una visiteta!

...y o 18, baixa por borina.

microbarraneaus: Maldita

Pues sí... A yo me molesta, y muito, que suene o Bendita y alabada, que se ascuita perfectament dende casa mía, mientres soi escribindo ta iste blog.... Y no, no tiengo twitter. Por ixo invente la fatera ista de microbarrenaus.

microbarrenaus: just shoot me

Unatra vegada demando l'aduya d'as lectoras d'iste blog. En iste caso ye sobre una serie que feban antismas (en Cuatro u en Canal Plus, creigo remerar) que se diz orichinalment Just shoot me y que tradución en castellano como Dame un respiro. He prebau de trobar-la por seriesyonkis y atras pachinas que s'adedican a compartir cultura mientres Sinde, a SGAE y toda ixa crica d'inquisidoras nos dixen, pero no la he trobada por garra cabo. Si bell una la trobatz, u sabetz bell puesto an que mirar, dezitz-me-lo, que me feba a saber-lo de goi. Si no la remeratz tos pencho un troz d'un capitol que he trobau en Youtube. Ye en inglés porque tampoco no en he trobau guaire en castellano...

microbarrenaus: que marcho bells diyas

Una mica canso por diferents cosas, me cal iste puent ta pensar, escansar-me y trobar nuevas ideyas y camins que encetar... un microbarrenaus simplament ta decir que contino vivo, que contino escribindo en Aragón ateo (lo dixan tan facil...) y que fa muito bien, por una Semana Santa, poder fuyir d'as fanaticas y gamberras que invaden o nuestro país en istos diyas. Que pasetz unas buenas vacancietas! Tornaré plen de rasmia!

microbarrenaus 2º en a Launch Party

BIEEEEENNN! Dimpués de muito tiempo sin poder chugar a Magic, a mía tornada ye estada gloriosa. Un segundo puesto en a Launch Party de Worldwake feita hue en Freakland. O mazo ha funcionau muito bien conseguindo ganar tres rondas y mesmo he conseguiu ganar una d'as partidas d'a zaguer ronda. O listau lo dixo contino y tos convido a visitar a nueva web de Freakland que la han dixada bien pincha.

Buscacaminos tritón x 1
Carga nacida del viento x 1
Draco de Ruina Celeste x 1
Ruina del invocador x 1
Santificadores kor x 1
Zendikon del viento x 1
Lince de la estepa x 1
Grifo novato x 2
Desterrador surrakar x 2
Juicio de Iona x 3
Ascenso del luminarca x 1
Duelista kor x 1
Draco viajero x 1
Velacometa x 1
Misionero de Kabira x 1
Maestro de filo de Kazandu x 1
Expedición a las ruinas de Ior x 1
Red de seda de araña x 1
Anguila jinete del viento x 1
Aprendiz de velacometa x 1
Maestra de ganchos kor x 1
Abismos de Halimar x 2
Isla x 5
Llanura x 9

microbarrenaus: un flumen... u dos

“Un flumen(1) de lugars s’ufren ta aloixar o cementerio nucleyar” diz a noticia d’Antena 3. Ixorrontau, aspero bel poquet más y a noticia contina. O numer de lugars que se ufren a ixo ye de 12. Y dicen un flumen. Nomás en Aragón bi ha más de 700 lugars, creigo remerar, y en l’Estau espanyol bi ha 8112 municipios (y cadagún puet tener más d’un lugar) asinas que, en reyalidat, nomás un 0,15 % d’os municipios de l’Estau espanyol luitan por tener o debandito cementerio nucleyar. Y ixo ye un flumen!. Ta contimparar con bella cosa, Iniciativa Internacionalista tenió un 0,20% de votos en 2009 y garra periodista dició que hese teniu un flumen de votos.

(1) (Traducción libre de “aluvión” en a noticia en castellano)

microbarrenaus: comentando a grafía

Por si beluna no en heba parau cuenta, en l'anterior post ye habendo un debat sobre a custión grafica de l'aragonés. Como en iste blog no ye guaire cutiano que bi haiga tantos comentarios, tos lo digo, por si tos queretz sumar-ie. Que tos faiga buen prebo y asperemos plegar en bel cabo.

microbarrenaus, fendo pellas

Güe cuasi charran en aragonés en Aragón Radio. Han dau una notizia dezindo que os ninos de "Slumdog millionaire" feban pellas. Pero be-te-me que no yeran charrando d'ortals!. O que pasaba yera que os ninos no iban t'a clase, ye dizir que feban fuina...Fa tiempos que nian aspero sentir cosas en aragonés en os meyos que as aragonesas bosamos. Pero ye que agora mesmo se pasan t'o castellano de Madrid. Primer estió botellón en cuenta de botellada. Dimpués os ninos fan pellas, en cuenta de pirola u fuina (parola que ye biba mesmo en Andorra, an que se diz fuchina). Que será dimpués? "La dije?" Aragón enta l'asimilazión total....

microbarrenaus: no puedo aturar

- Sincusa, ¿tiens un inte?

- No puedo aturar-me - me respondió - y me la esmaixiné andando y andando, terne que terne, sin dreito a aturar-se. Con os pietz fendo fumo y a luenga penchada d'a boca igual como una cocha de berano. Pobrichona! No podeba aturar-se...

microbarrenaus: qué difizil ye estar espanjol

O DNI m'ha caducau. Almenistratibament soi una mica menos espanjol. Pero guarda si ye difizil tornar a fer-se-ne! Dica Nobiembre no he conseguiu calendata. Dica ixe diya a cartera me pesará un poquet menos. O DNI aragonés s'imprentaba en 2 minutos en a HP y au. Ai, istos espanjols.... Y dimpués se'n queixan...

microbarrenaus: rebistas zientificas

Miro una rebista zientifica. La teneba la chirmana mía pero se la lebó y m'aganaba de leyer un d'os articlos. Manimenos no la trobo en a papelería. Bi ha dos rebistas sobrer torturar toros, una sobre components electronicos, cualques repalmars adedicaus a alparzeyos u bideochuegos, milenta de superstizions, pero de zienzia ni brenca ni meya...

microbarrenaus: periodistas chandros

Qué chandros son bels periodistas! Ayere de tardis estié sentindo a SER en o treballo igual como güe de maitins. As notizias son as mesmas parola por parola. O Gran Chirmán me dicta a berdat.