Fachas de finals de setiembre

En zagueras no he escrito guaire en lo blog asinas que pensé en reprener ixo que feba habe anyos de “Lo millor d’a semana”, una serie d’articlos que publicaba charrutiando sobre las noticias semanals. Ubrié la mía libreta y empecipié a apuntar l’actualidat mas comentable. En tres días ya no adubo. Lo facherío va varrenau, argüelloso y arramplando con tot. Y no sé quan les aturaremos, quánto nos costará ni quánto tiempo tardaremos a reconstruyir lo mas basico. Agora que tenemos lo gubierno-mas-progre-d’o-cosmos, tanto en Aragón como en Espanya, ye precisament quan la extrema dreita ye marcando la suya achenda de manera mas fura.

Diz Casado que totz los espanyols votoron a lo rei. Cuento que la sola sincusa pa ixa sanselada ye que lo referendum constitucional. Ixe que lo mesmo Adolfo Suárez reconoixió que i heban feito trampa, que yera pa unatro rei, pai de l’actual, que ha espipau d’o suyo reino con los nuestros diners, y que buena cosa d’a chent que lo votó ya ha muerto. No ye que no se permita un referendum sobre la monarquía, ye que sisquiá se permite preguntar por lo tema en las enqüestas d’o CIS. ¿Qué mena de problema tien Espanya con conoixer la opinión d’os suyos ciudadans? Ni con la monarquía, ni con la organización territorial de Catalunya y ni sisquiá con lo nombre d’a mascota d’a Expo.

Mas cerqueta, en la mía ciudat, PP y Cs, encantaus de tener a V0X como companyers de viache pa que esgramaquen lo que ells no s’atrivirían, le niegan estar fillo predilecto a Fernando Simón entre que le dan lo mesmo titol a un bispe y a la policía local. V0X ye veniu a fer petar mesmo consensos tant firmes - y de vez fatos - como lo nombramiento d’os fillos predilectos que siempre s’heba feito por unanimidat se proposase a qui se proposase. Y lo fan con un scientifico que teneba meritos muito antes d’estar portavoz de no cosa. Ya dició Millán-Astray, un d’os referents d’ista chent, ixo de “muera la intelectualidat” y mesmo en qüestions inocents como ista aplican la suya ideolochía.

A Rodrigo Lanza le repiten lo chuicio dica que salgan lo que ells quieren. Los medios siguen dando ferrete con los estirants que nunca no amaneixioron. La que no i amaneixe nunca, en los medios, ye la navalla que diz que fació servir. La suya ideolochía, que califican de “anti-sistema”, pareixe ya parte d’o suyo nombre. La de Víctor Laínez nunca no la sabremos por ixos mesmos medios. ¿Por qué ye important en un caso pero no pas en l’atro? Tanimientres, los de Bankia libres, a un abusador de menors de l’Opus los suyos companyers de secta le rebaixan la condena de 11 a 2 anyos y chovens d’Altsasu siguen en la garchola, dimpués de 1400 días, por una zaragata en un bar.

No i hai mas fachas que antes mas. Ni s’han radicalizau, me pienso. Son los de siempre y con las ideyas de siempre. Pero s’han sacau la mascareta - en tot los sentius -, las vergüenyas y los complexos y agora nos marcan l’achenda. Incluyiu iste mesmo post.

No tiengo la solución a isto, ni sé cómo fer pa que la izquierda organice una respuesta que nos permita cambiar la nuestra realidat cutiana y ganar la batalla cultural. Que las nuestras valors tornen a estar presents y que se charre menos d’okupacions inexistents y mas d’os inexistents dreitos laborals. Yo no lo sé, pero regular que i hai chent leyendo isto que sí. Aspero las vuestras aportacions.

Cadret, 2023

Cadret, Aragón. Chunyo 2023.  Nuevo gubierno d'izquierdas pa Cadret

Dimpués d'un embolicau proceso de negociación lo gubierno d'a ciudat tornará a estar d'izquierdas. PSOE y IU han accediu a votar a lo candidato d'a lista de compleganza Podemos Ganar Unidas Cadrete En Común - Los Verdes (PGUCEC-LV), fruito d'un largo proceso d'integración de partius politicos, organizacions socials, ecolochistas y personas individuals. "Las chents d'o lugar tornarán a sentir-se representadas por los suyos politicos y por lo gubierno municipal", ha declarau la nueva alcaldesa, una independient,  bien conoixida en lo mundo d'a cultura, que nunca no heba militau en garra organización politica dica agora. 

"La dignidat y la convivencia de todas las culturas serán eixes d'o nuestro gubierno" - ha seguiu en la suya primer intervención debant d'os medios - "por ixo imos a ubrir un proceso participativo pa conoixer la opinión d'as ciudadanas y ciudadanos de Cadret sobre lo busto d'Abderramán III. La nuestra intención ye que torne t'o puesto d'a on que nunca no habioron de sacar-lo, pero queremos empecipiar un nuevo tiempo a on que s'ascuiten todas las voces. Imos a gubernar pa todas. Mesmo pa la chicota comunidat faixista d'o lugar." Lo portavoz de Vox, partiu que dimpués d'os suyos escandalos por los vinclos con la prostitución y lo trafico de drogas, s'ha quedau sin representación en lo concello, ha empecipiau una campanya de replega de firmas que a escape s'ha tornau noticia en los principals medios estatals. En declaracions a Aragón TV iste maitín ha dito que "lo nuevo concello d'o pacto estalinista no conseguirá imposar-nos unatra vegada la suya islamofilia. Cadret ye y será un lugar catolico. Respectuoso con atras confesions que se manifiesten en la intimidat. Pero catolico".

Cadret, Aragón. Abril, 2027. Lo busto d'Abderramán III torna t'a Plaza "Región de Aragón"

Quatre anyos dimpués, l'alcaldesa de Cadret ha dau la orden hue pa que lo busto d'Abderramán III torne t'o puesto que ocupó en l'antiga Plaza Aragón. La figura s'ha habiu de tornar a fer, dimpués de que dispareixese en l'asalto a l'almazén municipal que protagonizoron en 2024 militants de dreita moderada. Ixas mesmas personas, que habioron de abonar 200 euros cada úna por "danyos contra lo patrimonio", configuran hue la lista "Cadret Tradicional" a la que las enqüestas pa las eleccions d'o mes de mayo, dan entre tres y quatre concellers. Lo referendum celebrau iste hibierno dio la victoria por un 55% a la tornada d'Abderramán, pero provocó de vez a-saber-las tensions en lo gubierno municipal y la menaza d'o PSOE d'una moción de censura. Probablement iste estió un d'os feitos que trencó la candidatura d'o partiu de l'alcaldesa que se presienta en istas nuevas eleccions dividiu en tres listas diferents.

Historiadors, actors y mosicos se chuntarán a l'atro viernes en un acto por "la convivencia y la multiculturalidat" que lo portavoz de Cadret Tradicional ha denominau "agresivo, violento y excluyent" en diversas entrevistas a los diferents medios que han charrau con ell ista semana. "La escultura d'Abderramán ye clarament inconstitucional y un atentau contra la LFE (Lei de Fomento d'a Espanyolidat) de 2025", ha dito en una rueda de prensa a on que tamién ha anunciau que, de conchunta con lo Partiu Ciudadanista, surtiu d'a unión d'os antigos PP y Ciudadanos, presentarán una denuncia contra lo concello por prevaricación y "pa aconseguir que no s'instale la figura musulmanista".

Cadret, Aragón. Chulio 2027. La ex-alcaldesa, imputada. Abderraman III se'n va

En una decisión que ha sorprendiu a pocos, lo Tribunal Superior de Chusticia d'Aragón ha imputau a la ex-alcadesa de Cadret por prevaricación y ha ordenau que se saque de camín lo busto d'Abderramán III de l'antiga plaza Región de Aragón, que chusto hue s'ha rebaltizau como Plaza Antonio Luis Baena Tocón, en honor a un insigne militar y funcionario. La figura d'o califa ha durau tasament bell mes en una d'as mas polemicas decisions d'o gubierno d'o lugar, que ya s'ha despediu, dimpués d'os resultaus electoral d'o pasau mayo.

Quanto a la ex-alcaldesa, lo suyo futuro ye incierto, ya i hai churisprudencia d'o mesmo tribunal que la chuzga. Se tracta d'o caso d'o ex-conceller Alberto Cubero, hue en prisión dimpués de l'aplicación d'o clamau "articlo monarquico" d'a LFE / 2025. 

Suscribi-te a Cadret Noticias y gana un pase gratis a Nievelandia, lo parque d'atraccions de nieu en Castanesa.

Modos exquisitos

Mire-se, en ista casa siempre hemos teniu unos modos exquisitos. Quan vienen visitas a cenar, metemos cadaúna d’as piezas d’a cubertería en lo suyo orden. Las forquetas y los cutiellos van perfectament arringleraus y brilan como si fuesen estrelas. Siempre femos servir las formulas de cortesía. “Por favor” y “gracias” son parolas que han d’estar presents de cutio en lo nuestro parlar. Nunca no se puya, en ista casa, la voz por dencima d’o nivel que s’aprecisa pa poder mantener una conversa educada y convenient. ¿Lo vestuache? Siempre elegant, poliu, sin una sola taca y bien planchau. S’ha de notar lo respecto por la persona que tiens debant. Pero sobre tot, lo que nunca, nunca, nunca, s’ha permitiu en ista casa ye que un faixista pase d’o branquil. Asinas que, si me permite, habré de puyar un momentet t’alto a por la escopeta pa coser-le a tiros. Cuento que lo comprenderá. ¿No ye asinas?

Prou que sí. No le importe a vusté fer-me asperar. Tiengo tiempo.

Agora mesmo torno. Prebaré de no fer-le asperar. Muitas gracias por la suya comprensión.

(...)

Disculpe que haiga tardau. Feba tiempo que no la cargaba y heba perdiu lo costumbre. Bueno, pues no sé cómo querrá vusté que faigamos isto. ¿Prefiere correr bell poco? Si le agana, puet suplicar por la suya vida, encara que entenderá que bell tiro le habré de foter.

No sé cómo lo habrán feito atras vegadas. Levo poco tiempo vivindo aquí y encara desconoixco los costumbres locals.

La verdat ye que no bi ha guaire ceremonial. Por aquí, de faixistas, feba tiempo que no en veniba. Puet fer lo que quiera que faigan en la suya tierra.

Alavez creigo que correré bell poco. Deixe-me uns metros, si no le importa. En zagueras me he enreciau y no soi guaire en forma. La vida d’un faixista no deixa tiempo pa ir t’o chimnasio tot lo que me caldría.

Por favor. ¡Faltaría! Ixo sí, si podese no pisar-me las flors en la suya fuyida, le’n agradeixería prou.

Ni se me ocurriría pisar-las, caballero.

Muit bien. No se charre mas alavez. Corra, por favor.

PUM! PUM!

Exercendo lo pasquinismo 011: Cebrián, Gonzalez, Podemos militarra y os comunistas nazis

Ya fa tiempo que a SER fa pampurria. Muita pampurria. Por diferents razons, en o treballo mio ye a cadena que ye enchegada tot lo dia, asinas que me sé la suya programación de punta ta coda. As primers horas d'o maitin son as d'as noticias y as editorials. Asinas que ye an que más se nota a ideolochía d'a cadena de Cebrián. Precisament, os abucheos a ixe hombraz y a lo suyo "compinche" Felipe González en una Universidat espanyola, han centrau una d'as pachinas más penibles d'o suyo "periodismo". Tot un exercicio de pasquinismo.

Prencipiaba, bien luego, Jose María Izquierdo en a suya sección "O uello cucho". Tot lo mierques heban estau dando ferrete con a noticia, pero contaba que no continarían o chueves, ya que no daba pa más. Prou entivocau yera.

"Acotolar o faixismo d'a violencia", titolaba Izquierdo a la suya columna.Yo, que encara debo d'estar sin esmaliciar, me pensaba que charraría d'a puyada d'a extrema dreita en bell cabo d'Europa u de bella movida d'o futbol. No me fació lo morro clo. Prencipiaba charrando d'ETA. Ya soi feito a ixa relación d'ideyas y a ixe discurso, asinas que tampoco no me trucó guaire. Se feban cinco anyos dende que deixoron as armas y yera lochico que en charrasen. L'articlo contina remerando os factors que levoron ta ixe cese de l'actividat armada y reivindica a figura de belun d'o PSOE. Dica astí, sin novedat. Aqui prencipia lo cachondeo.

Es obligado mencionar hoy a Francisco Tomás y Valiente, asesinado a tiros en la Universidad Autónoma de Madrid hace ahora veinte años, porque hemos visto, desgraciadamente, cómo el fascismo no ha desaparecido de ese ámbito de inteligencia y libertad que es la Universidad, y hemos asistido, atónitos, al deplorable espectáculo de ver cómo unos descerebrados impedían dar una conferencia a Felipe González y Juan Luis Cebrián. ¡Una conferencia, una charla, una exposición de ideas, qué atrevido insulto y qué terrible provocación!

Diz Izquierdo. Veiga-se como, quasi por arte de machia, asocia a ETA con una colla d'estudiants que protestoron porque dos personaches como Gonzalez y Cebrián isen t'a Universidat a repetir a mesma vasuera que levan repetindo totz os medios de comunicación -propios y allenos - dica l'escamallo. Si yo estase d'o PSOE, u familiar de Tomás y Valiente, talment me ofendería una mica que iste sinyor contimparase una protesta con un asesinato. Ixo sí que ye una "gosada faltada y terrible provocación".

Deciba no se qué feminista a qui le dicioron feminazi "Claro, porque estar a favor d'as cuotas en as listas electorals ye como invadir Polonia". Aplicable tamién a isto. Soi o primer que fa servir masiau a soben as contimparacions con o faixismo y o nazismo, pero Izquierdo, en ista se ha saliu.

No remata aquí. Ya hemos estableixiu que os que protestoron en a Universidat yeran etarras y faixistas. Qué más les falta?. Sí, quiesta lectora.... podemitas...

¿De dónde salen estos cafres? ¿Quién los anima, los alimenta, los azuza?

Asinas remata o suyo articlo, continando con l'argumento que desfendió o PSOE dende o primer minuto de que a movilización yera cosa d'o "codetas".ETA-faixismo-Podemos en tasament dos parrafos. Plas, plas, plas, Izquierdo.

Con tot y con ixo, Izquierdo ye un chulo de laminaculs d'o chefe Cebrián, si lo contimparamos con Pepa Bueno. Poco rato dimpués d'a enciclica de Izquierdo, continaba Bueno con a noticia d'o día. ¿Gürtel? ¿Siria? ¿o motín en o CIE? ¿o montache policial d'Altsasu? No. Que heban chilau a lo suyo caporal.

que se impida físicamente en la Universidad la celebración de un acto en el que se va a utilizar como única herramienta la palabra es una muy mala noticia y un síntoma inquietante de intolerancia.

Prencipia un articlo que titula "Encapuchaus en a Universidat". No charra de quan os nazis no deixoron charrar sobre o proceso de paz en Euskal Herria, sino de que bi ha habiu una protesta contra dos millonarios, con medios de comunicación propios.

Felipe González y Juan Luis Cebrián no pudieron hablar ayer con los estudiantes de la Universidad Autónoma de Madrid que sí querían escucharlos. Y no pudieron porque un grupo de doscientos decidió por todos y reventó el acto. Por muy gastadas que parezcan las palabras, las que sirven para lamentar este episodio son las mismas de siempre: que unos pocos impongan su voluntad a muchos tiene un nombre muy feo se llama fascismo,

Os pobrichons que no podioron ascuitar-los ahiere lo podeban haber feito mientres os meses y meses que levan desfendendo o suyo modelo d'estau. U ixe mesmo dia, quan movilizoron a tot lo suyo exercito d'opinadoras. U hue, quan han feito portalada en totz os periodicos. ¿Tos alcordatz de quan nomás ABC y La Razón compartiban portaladas absurdas? A El País le pasa cada vegada más a soben. A la fin, tot pa tornar a decir que yeran faixistas. A lo menos no ha tirau d'ETA. Encara.

y no se puede banalizar de ninguna manera que unos pocos impongan su voluntad a muchos porque se vulneraron dos derechos: el derecho a expresarse libremente de unos y el derecho a recibir libremente información de los alumnos.

Parrafo glorioso. Charra de no banalizar una persona que acaba de contimparar una protesta universitaria con un rechimen que exterminó a millons de personas. Que "uns pocos imposen a suya voluntat a muitos" ye precisament lo que Gonzalez, Cebrián y lo gubierno que s'han encerrinau que tienga l'Estau espanyol ha feito, fa y quieren que contine fendo. Que una persona diga que s'ha vulnerau o dreito de Cebrián y González a expresar-se librement, fería meter-se royo como un ababol a qualsiquier que i piense tres segundos. Por favor, ¿de verdat me yes decindo que un ex-president y o suyo quiesto amigo, duenyo de o grupo de comunicación más gran de l'estau espanyol y d'os mas grans de Latinoamerica tienen en periglo o suyo dreito a expresar-se librement?

Actuar encapuchado, meter en el mismo saco a los presos de ETA, el Gal, y hasta el debate actual en el PSOE es una ensalada tal que, si efectivamente son estudiantes, alguien debería repasar el Plan de estudios.

Mezclar ETA con o GAL? Qué loquería, e? Son cosas que no tienen mica relación. Bien se vale que en a suya cadena no han mezclau, meya hora antes por eixemplo, una protesta estudiantil, con o faixismo y Podemos.

Como as universitarias son una comunidat que tien bell prestichio social, siempre que bi ha qualsiquier protesta en a universidat, se mete en dubda que qui la faiga siga universitario. Pasa en cada piquete de vaga, en cada protesta meyo fura y, prou que sí, aqui. ¿Conoixe la periodista, u qui l'ha serviu a información, a los millars d'estudiants d'a universidat? Si iban encapuchaus, ¿cómo sabe si son u no universitarios? Belun habría de repasar o plan d'estudios, sí, pero lo prencipiando por o de Pepa Bueno.

Remata Bueno con un:

La memoria histórica sirve también para explicarles a los más jóvenes que en las sociedades democráticas la razón está siempre del lado de los que no cruzan la raya de los derechos de los otros.

Y isto lo diz charrando de Felipe González, que se pasó por l'arco los dreitos d'un fascal de chent. Pa forro de bota, lo fa con ixa bamba parternalista que tanto odio, pretendendo "explicar a os más chovens" a suya envista historica.

Yo, y muita chent más choven que yo que nian han viviu baixo lo gubierno de González, recordamos perfectament la cal viva. No nos cal que vaiga Iglesias ta siede parlamentaria a explicar-nos-lo, por muito que asinas lo creiga en a radio de Cebrián. Recordamos tamién como tractó a los insemisos, recordamos os GAL, a lei Corcuera, a OTAN d'entrada no, as ETT's, y tantas y tantas atras cosas.

Bueno y Izquierdo, González y Cebrián preban de que ixuplidemos y de fer-se pasar por un pobres a qui les ha crebau a libertat d'expresión. Lo hodiu ye que cuela... Con totz os medios de masas alineaus más que no nunca en a dreita u ultradreita, se permiten o luxo de prebar de decir-nos lo que ye libertat d'expresión. Bueno, ya lo parodioron lo Simpsons, con aquell mitico "nos atacan comunistas nazis". A SER nomás lo ha espanyolizau, barrachando ETA y Podemos tamién.