Remero ixa canta de GEN que deziba hoy te ha tocado madrugar / para ir a la oficina del INEM / te han dicho que aquí no queda nada / no hay ningún trabajo que ofrecer / lo siento, vuelva usted mañana. Iste maitín la teneba apegada igual como una mosca mientres leyeba as ufiertas laborals de l'INAEM. He teniu muita suerte en a bida mía y, dica güe, no me eba caliu mirar guaire treballos. U me los he trobaus, u m'han surtiu, u dimpués d'una semana mirando-ne me han clamau. Pero en istos tiempos de crisis, a cosa parix más difizil. Y en ye. A ofizina de l'INAEM yera a rebutir de chen. A morfuga que bi eba yera un mezclallo de tristura y desespero con un siñalín de complizidat entre toz os que bi yeranos. Atros serbizios que he feito serbir dan zita d'aquí a un mes. Me i he trobau con un primo de yo que lo han forachitau dimpués de cuatro años treballando en a mesma interpresa. Unatra bictima d'un ERE. Como deziba una amiga que tamién me i he trobau: caldría que fese ringlera o fillo de **** que ha imbentaui isto d'a crisis...
Aspero que toz os que he bisto iste maitín siamos treballando en poquet tiempo. A! Y si belún amenista os serbizios d'un inchenier tecnico electronico, con experienzia de cambrero, cozinero, almenistratibo, mayestro, informatico y que aprende rapedo lo que calga, ya sabe ta do endrezar-se ... A! Y mientres escribiba isto he remerau unatra canta. Ixa de Reincidentes, d'os primers tiempos suyos, que deziba: si el INEM te quema / quema el INEM...
1 comentario:
Muito buena la imachen de Marx, que sepas que en istos tiempos de crisis en Alemania o libro 'O capital' ha puyau muitismo as suyas bentas abituals, curioso sobre tot porque tamién puedes trobar-lo por interrete, asinas que entre una cosa y atra soi seguro de que Karlitos torna á estar "de moda".
Publicar un comentario