TimOrange V. Como ganar un arbitrache de consumo

A privatización d'o sector d'as telecomunicacions ha transformau de tot ista mena de servicios, convertindo as interpresas tecnolochicas en una masa de teleoperadoras comercials sin garra tecnica dezaga con a sola intención de vender y timar. Iste sector ye un d'os que más ha sufriu con o modelo economico y de consumo hechemonico, plegando a estar un zancocho de proporcions cosmicas.

Orange en ye un eixemplo, encara que cuento que atras companyías funcionarán, si fa u no fa, igual. Ya tos he recontau as mias vivencias con ista chentucia, en quatro partes (1, 2, 3 y 4). Podría fer-ne mesmo más, pero lo que quiero ye contar-tos como ganar-les tres arbitraches de consumo y que te tornen parte d'os diners que te son furtando. No ye a solución, que ixa plegará quan as telecomunicacions tornen a estar en mans d'o pueblo, pero a lo menos no nos furtarán tantos diners.

Que ye y como funciona un arbitrache de consumo?
L'arbitrache de consumo ye un proceso que se da entre as consumidoras y as interpresas que sigan adheridas a l'arbitrache quan bi ha un conflicto entre as partes. En o caso d'as telecomunicacions, todas as grans, que yo sepa. No costa garra perra y as "sentencias" (clamadas "laudos arbitrals") son d'obligau cumplir t'as partes. Ye como un chuicio pero sin tanta historia.

O procedimiento prencipia emplindo o formulario que bi ha en ista pachina. A nusatras se nos gosa de quedar chicot, asinas que adhibimos tamién un documento explicando-lo tot con totz os detalles. Antimás se puede adhibir (y ye recomendable) la documentación que calga (facturas, transcripcions d'as charradas, fotos, mails  ...). Con toda ixa documentación por duplicau cal ir ta una siede d'a DChA y presentar-lo. Como ya mete que ye ta consumo importa igual que siede trigues, que as funcionarias ya s'encargan de dar-ne treslada. Nusatras gosamos presentar-lo en a que bi ha en a Plaza San Pedro Nolasco de Zaragoza.

En bells diyas t'arribará una carta decindo que si a interpresa ye adherida u no pas y, en o primer caso, avisando de que prencipia lo proceso. A interpresa presentará alegacions que mesmo pueden estar dreitament mentira, como estió en o zaguer caso nuestro. U que sigan interpretacions "divertidas" d'a realidat. A lo menos en o caso nuestro, no facioron guaires poders y simplament dicioron que mentibanos.

Te plegará unatra carta con as alegacions d'a interpresa y dando-te diya y hora ta ir ta l'arbitrache. Isto puede tardar bell mes. Nusatros la presentemos en chulio, plegó ista carta ent'o cabo de setiembre y teniemos l'arbitrache en os Pilars. Puetz aprofitar ta presentar nuevas prebas, si ye que en tiens. Nusatros no tenebanos que adhibir que as nuevas facturas cheneradas malament, pero las levemos dreitament ta l'arbitrache.

A Orange le sobran os chanfles y as teleoperadoras, pero le manca tecnicas y advogadas, pues nunca gosa de presentar-se en os arbitraches. Nusatras en hemos teniu tres y nunca no se i han presentau. Isto significa que a unica voz que sentirá o tribunal será la tuya, por lo que, en primeras, creyerán a tuya parola. L'arbitrache se fa en un edificio oficial que bi ha en "Las esquinas del psiquiatrico". Te posas en una silla debant de dos funcionarios que te dicen de recontar o caso. Les ne recuentas, te fan bella pregunta si les queda dubdas y poco más. Quince minutos como muito. Dimpués te dicen d'aguardar difuera entre que fan l'acta y te la dan a sinyar. En meya hora ye tot presto. A la semana u poco más, te plega en casa la carta d'a D.Ch.A. con o Laudo, por un regular, ganau.

Antiparte d'as demandas de que nos tornasen os diners timaus, siempre hemos demandau "perchuicios" por tot lo tiempo malmeso en gritar a os servicios d'atención a lo client y tal, pero ixo nunca no nos lo dan, porque se vei que legalment no pueden.

O zaguer caso nuestro
En ista ocasión, tot prencipió quan nos gritoron de Orange ta cambiar-nos o decodificador d'a TV. Levabanos dende 2008 con o mesmo. A TV la pillemos quan achustemos a linia de telefono, porque yera o mesmo pre con TV que sin ella. O mozo que me charró nos dició que caleba cambiar o decoder por qüestions tecnicas. Como me los conoixco, a primer cosa que le pregunté estió por posibles sobrecostes. A charrada estió la siguient, en un tono bien cordial:

- Sincusa "¿Va a puyar a factura que pago cada mes?
- No, de feito tos baixará bell poquet.
- ¿Ah si? ¡Qué bien! ¿Quanto?
- Entre uno y dos euros
- Bueno, tampoco no'n ye guaire, eh?
- Bella cosa ye... hehehe.

Sí que me dició que tendría una remanencia d'una anyada y que si en marchaba antes habríanos de pagar 50 euros. "Bueno. un anyet no ye guaire" pensé y accepté. Tampoco no nos dioron a opción de no acceptar, tot cal decir-lo.

Asinas que bell diya dimpués nos plegó lo nuevo decoder y apareixioron canals nuevas. Me pensé que sería una promoción d'ixas que te meten de baldes as canals de pago ta que te faigan goi mientres un mes, y dimpués te claman ta viyer si te i apuntas. Pero quan nos plegó la factura, nos quedemos sin sangre en a pocha en viyer que nos heban puyau a parte fixa d'a conduta que pagabanos 5 euros y que antimás nos ne cobraban atros 10 por as canals de pago que nian heban apareixiu en a charrada con o comercial.

Prou que en gritar-les ta queixar-me, dimpués d'un fascal de minutos charrando con comercials, no m'apanyoron cosa. Ni por mail, ni sisquiá por Twitter, dimpués de que se me fesen amigos os d'Orange quan les clamé timadors.

Ta forro de bota, en revisar as facturas paremos cuenta de que yeran incumplindo un laudo anterior y nos yeran cobrando un euro de más en todas as facturas dende 2010. Asinas que en total, demandemos quasi 100 euros que nos heban cobrau de más, y fa bells diyas nos plegó a carta avisando-nos de que tenebanos razón y de que Orange nos heba de tornar os diners.

No deixetz que tos timen, por favor. L'arbitrache ye un recurso de baldes, facil de fer servir y de buen ganar. A por ells!

Bellas cosas que odio iste nadal

Odio lo Nadal. No ye garra secreto, ni una actitut modernota. Simplament lo odio por tot lo que traye en todas as dembas: politica, relichion, sociedat u mesmo meyo ambient. Y por totz os ritos socials que cal fer en istos diyas. Menos important pero mas cutiano ye a programación d'os mass media que, a metat de noviembre, "s'ababolizan" y se plenan de monyacas que feman y anuncios sentimentaloides con chent vestida de Papa Noel acarrazando-se.

No ye por o Nadal. U talment sí. U ye por que yo soi mas niquitoso por istas calendatas. O caso ye que bi ha tres anuncios que me meten niervudo más que no atros. Que, en sentir-los, me dentran unas ganas de fer "cosas malas" que ta qué. Y he deciciu de charrar-ne, a viyer si con ixo, m'exorcizo bell poquet. Que, a la fin, ye ta ixo ta lo que creye iste blog.

 

O primer ye Pitingo. Cada vegada que lo siento me vienen unas ansias... No'n yera prou con Carlos Goñi u Alejandro Sanz. Baixoron o ran con Il Divo y Soraya. Quan piensas que no puet haber-ie cosa pior, plega Pitingo. Y quan creyes que será ixublidau malfurriando os diners en bell guariche, fa un atro disco. ¿Por qué? ¿Qué tos ha feito a humanidat?

 

O segundo ye un anuncio de no se qué. Creigo que ye de calefaccions u gas u cualcosa parellana. O caso ye que fan servir un d'os recursos más fastiosos d'a publicidat: os ninos. Qui sintatz asoben a radio comercial regular que habretz ascuitau, clavando-se en o vuesto oyiu interno como un clau rusient ixa voz chemecosa que diz "Mamá que sale fríaaaaaaa!!!". ¿Quan viedarán fer servir a ninas en a publicidat? Por favor, por as ninas, por as adultas, viedatz-lo ya!!!

 

Y, last but not least, a tercer. L'anuncio de Movistar. En cheneral, todas as companyías de telefonía tienen una publicidat buenrollista y chovenil LeticiaSabatera que fa vomecar. Pero os anuncios de Movistar fendo un remedo d'as asambleyas d'o 15M ye penible ya de tot. O comercial que se l'haiga alcurriu a ideya mereix que lo forachite lo banco de casa suya y dimpués que lo pillen bells quantos mossos d'esquadra ta que l'amuestren como s'escosca una plaza.

 

Ala pues.... Que tranquilico m'he quedau. Astí tos deixo tot l'odio, que yo agora me'n voi a sentir o debat d'o congreso espanyol que a fe a fe que me relaixará...

TimOrange IV

Ta qui no conoixca as nuestras aventuras con Orange puet leyer-las aqui (1, 2 y 3) . Dimpués de más de tres anyadas pleitiando con Orange, he de decir que nunca no heba teniu garra problema tecnico con ellas. Pero be-te-me que en iste zaguer mes soi tenendo-ne. O telefono fixo no funciona, l'ADSL de cabo ta quan s'atura y asinas asinas.... Como ta esviellar o blog mas asoben. M'he fotiu como tres horas penchau d'o telefono, reseteando routers y sentindo fateras. Cal decir tamién que, a lo menos, agora bi ha un telefono de baldes ta istas cosas: o 900 901 300 que han adhibiu fa poco a o 902 de pago que teneban.

En ista zaguer clamada, asperaba que me inviasen a una tecnica a la fin, pero no ha estau asinas. Y agora plega a parti "Barrenau carranyau". Lo primer de tot m'han demandau que enchegase un cable Ethernet t'o router. No tiengo porqué saber o qué ye ixo, pero o caso ye que lo sé pero no sabeba a on pegaba en ixe inte. A tecnica m'ha dito ¡que'n mercase uno! ¡que no valeba que un euro!. ¿Y porqué he de gastar ni un euro en un cable? A la fin, rechirando por viellas bolsas lo he trobau. En enchegar-lo a lo portatil mio a zagala ha parau cuenta de que no teneba tarcheta Ethernet. Nomas i ye o conector ta garra cabo. Dimpués de fer bellas prebatinas, resetear o router, tornar a enchegar l'ordinador y atras cosetas, m'ha cambiau a canal y no se que mas. "Mira-te a viyer si va funcionando y si deixa de funcionar, clama-nos, pero antis, consigue un ordinador con tarcheta Ethernet." "- Mire-se, no tiengo traza de conseguir-ne uno, no podrían inviar-me a una tecnica ta casa". Vale, ye mentira, puedo conseguir un ordinador con tarcheta Ethernet, pero porqué he de fer-lo? ¿Y si de verdat no podese? "Lo siento pero ta inviar-le una tecnica antis hemos de comprobar no se qué con a tarcheta Ethernet y sino no podremos inviar-le-ne una".

Cuento que en garra parti de l'achuste que facié con Orange meteba que heba de tener un ordinador con tarcheta Ethernet ni cosa parellana. ¿Qué mena de servicio tecnico tiene ista chent? Servicio tecnico no se, pero barra en tienen toda a d'o mundo...

Charrando d'o tema, somos pensando en cambiar-nos de companyia. ¿Bella lectora nos puet comentar como funciona a suya? ¿Ideyas?

TimOrange III

Fa ya más de dos anyadas que Arale y yo prencipiemos a nuestra luita contra Orange, por zaborreras. Ya ganemos una queixa deban d'a Chunta d'Arbitrache y Consumo d'a D.Ch.A. y unatra debán d'o Chusticia d'Aragón (feita en aragonés, antimás). Dimpués, como ya recentemos, nos continoron cobrando un par de conceptos que ni hebanos achustau ni yeranos fendo servir. Ista semana zaguera, y dimpués de 20 meses fendo-lo, hemos ganau unatra queixa en a Chunta d'arbitrache y consumo, conseguindo que nos tornen os diners que nos heban furtau. Encara no lo han feito, pero cuento que no tardarán guaire.

A tamás de no fer-me goi de definir-me como consumidor, pos siempre me pareix que consumidor y ciudadano son contrarios, creigo que ye important esfender os dreitos d'as consumidoras. Más que más si qui los estricalla ye una companyía de telecomunicacions u una caixa u banco. A ixas dos menas d'interpresas que tanto fastio me fan no les dixo pasar-ne ni una. Fa poco tamién conseguié que Ibercaja me tornase 9 euros gracias a una queixa a consumo que les metié.

Asinas que o mio consello ta todas as lectoras d'iste blog ye que detz mal, que conoixcatz os vuestros dreitos y los faigatz servir. As interpresas s'aprofeitan de que dengún no se queixa y asinas van timando a la chent. Con muito poco treballo podetz conseguir que no tos furten ixos diners que tanto treballo tos ha costau de ganar.

TimOrange II

Que dengún piense que aquel afer con Orange se soluzionó. Ye berdat que ya tenemos ADSL, telefono fixo y telebisión. Ziento de canals y no i fan que fiemo. O caso ye que les denunziemos debán d'a Chunta d'Arbitrache y d'o Chustizia d'Aragón (en aragonés con iste segundo). Os dos nos dizión que tenebanos razón. Con os primers, Orange nos eba de bosar 120 euros que encara somos asperando y que, por ixo, les emos denunziau en o chuzgau. O Chustizia estió más rapedo y en pocos meses nos ingresón 43 euros. Asinas que parix que tenemos bella miquirrina de razón. Isto ye un poquet a parti "previously on Tierra de Barrenaus"...

Agora prenzipia a segunda parti. En as nuebas facturas nos cobran conzeptos que no emos achustau en garra inte. Entre atros dos numeros plus. Ista ye, si fa u no fa, a charrada que a mía quiesta parella, Arale, tenió con a treballadora de Orange por telefono:

- Buen diya! Soz cobrando-nos un euro de más en a nuestra factura.

- Ye que bustet tien achustaus dos numeros plus, pero uno ye de baldes. Asinas que nomás bosa un euro.

- Sincuse, pero yo no achusté garra numero plus.

- Aquí mete que sí.

[rato pleitiando que sí, que no...]

- Bueno, alabez, a lo menos diga-me que numeros son, ta poder fer-los serbir.

- Sincuse, pero a politica de pribazidat d'a interpresa no nos dixa dar-le ixa informazión.

- Me ye dizindo que no puedo saber que numers he achustau?

- Sincuse, pero a politica de pribazidat d'a interpresa no nos dixa dar-le ixa informazión.

[Churamentos]

- Bien, pos de-me de baixa d'iste serbizio.

- Ta dar-le de baixa d'o serbizio amenisto saber qué numers tien bustet achustaus. Puede dar-me-los?

[faltadas]

Y asinas mientres meya ora, con mis pais ascuitando, que beniban a fer socalze con nusotros. Continaremos con a baralla, pos ya ye una custión de dignidat. De todas trazas, tos combido a toz y todas a denunziar a istas chentotas. Me importa igual Orange que Timofonica que lo que sía, toz son unos zaborreros. Ya beyez que o Chustizia nos ha dau perras (y ha teniu una queixa más en aragonés ta las estadisticas) y Consumo d'a D.Ch.A por agora nos da la razón y puestar que as perras. Ye de dar que o sistema no funziona, pero os ziento y pico d'euros enfuelgan un poquet o diya...

Ta prebar que no soi solo, un par de binclos:

Blog Orange no me quiere

Foro A hostias con las compañías de telefonía

TimOrange

Escribiba fa bels pocos diyas, sobre os fillos de **** de Timofonica (que continan estando-ne). Agora charraré d’atros “fillosde”, que dica fa poco no me’n eban feito denguna. A historia prenzipia un 18 de chinero cuan achusté una ADSL+llamadas+TV y tot ixo con Orange. Me dizión que en 30 u 40 diyas bendrían ta casa a instalar-la. Me parixió una barbaridat que tarden entre 30 u 40 diyas a fer-lo. Que han de fer en 30 u 40 diyas? O router lo fan artesanalmen u que?

Bueno, "cosas d’o capitalismo y d’a mafia d’as telecomunicazions.... Asperaré 30 u 40 diyas mientres Timofonica me ba cobrando..." pensé. Ai! Mísero de mí! Ai! Infelice! A los 30 diyas, por si un caso, y “ulorando o pirin” les pregunté que cuan beniban. Ascape, me dizión. Diez diyas dimpués, cuan remataba o amplo, granizo plazo, torné a preguntar. Ascape, me dizión. Bels pocos diyas dimpués, clamé a Orange. En 48 oras tos clamará un tecnico ta quedar con busatros y instalar-tos tot. En isto nos plegó o router, como una mena de “indireuta” querendo dizir “más tos bale que tos lo instalez busatros”, cosa que, siñors d’orange, no pienso fer, que he pagau lo técnico....

Y asinas han pasau más de 60 diyas. Toz os maitins, dimpués de fer-me o café clamo a orange y les torno a contar a mia historia. Dende fa dos maitins ya no me dizen que me clamarán en 48 oras, ya me dizen que me clamarán de camín. No sé que concepto tienen de “48 oras” u de “de camín”. Ye de dar que no ye lo mesmo que tiengo yo.

Continaremos informando, que agora he de clamar a orange ta remerar-les que ha de benir un tecnico....

Timofonica

Con ixas cosetas de que tiengo un blog, correu eleutronico y que me fa goyo mirar-me o internet de cabo ta cuan (mira-te tú que conzietos!), creyié menester meter una ADSL en casa nuestra. Dimpués de peteniar d’una botiga ent’atra y de beyer as diferens ufiertas me dezidié por una que no ye de Telefónica. Ixo sí, en todas me dizión que eba de conduzir-me con Telefónica ta tener linia y que, nomás dimpués me podrían meter l’ADSL. Bueno, bien. Que le imos a fer! Como conducir-se por internet yera de baldes ixo fazié. Dimpués d’emplir arrienda preguntas y fateras, lo consiguié endicando-me-ie que abría de bosar bels 15 euros por o mantenimiento de linia. Dimpués me dizión en a interpresa que ixos costes iban incluyius en a ufierta de l’ADSL que m’eban feito. Ye dizir, yo bosaba a la interpresa, por exemplo 35 euros, incluyendo-ie os 15 de Telefónica. Alabez, como tardan entre 30 y 40 diyas (que ya les bale) en meter-me-la, suposé que o primer mes le bosaría bels 15 euros a Telefónica por fer serbir a linia. Pero be-te-me que ayer me plegó una fautura de 48 euros. Jibo! Bel amigo ya m’eba abisau que ixo podeba pasar. Que, por si un caso, te cobran lo que les agana y si no tartes, bosas y t’a pocha suya! Quiento negozio que’n abrán feito con a fatereta ista!

Clamo t’o 1004. Dimpués d’un ratet ascuitando a una maquina una boz de muller me contesta. Le comento o caso mío y me diz que mirarán a beyer si bi ha bella error y que, en ixe caso me tornarán os diners en a benién fautura. Atura, mozeta! Que, si tot ba bien, dende o mes benién yo no tendré mica relazión comerzial con busatros! Que ya bosaré a otris... – No se’n faiga, que ya lo apañaremos con els y sino, le plegará un cheque en casa suya... Enluzernau, dezido confitar en a pobrichona moza ista, que no tien mica culpa. D’atra man, con l’ADSL me pillé una ufierta que te bendeban un portátil por un pre muito bueno. Abié de meter por debán 100 euros que, dimpués me sacarían d’as cuatro primers fauturas. Alabez, puestar que en a primer fautura me bosen a yo?
Increyible. Que mafia! Ya me’n eban contau d’istas un trapazil, pero dica que no lo bibes... Cuento que iste no ye que o primer capitol d’una larga falordia. Continaremos informando. Por agora, maitín prebaré de meter una quexa t’o consumidor en una d’as botigas de Timofonica. Qué pasará......?