Radedor #Inktober 06

Los wombats estioron uns marsupials que vivioron en una zona chiqueta d'A Tierra. Pareixeban onsetz por la suya grandaria, y de vez radedors por las palas grans que feban servir pa esfonsar. Pero lo que mas trucaba l'atención d'ells yera que cagaban quadrau. En lo sieglo XXI pasoron a estar parte d'a cultura popular d'o planeta por iste feito. Por tot se feban la mofla de l'animalot por la forma d'as suyas buenyas. ¡En yera de papis la chent d'alavez! La humanidat conoixeba una parte bien important d'os sers vivos con qui compartiban espacio, y no podeban deixar d'enarcar-se d'as maravillas que trobaban a cada nuevo conoiximiento. La flora y fauna terrestre les embacilaba. En aquellas envueltas encara se creyeba en la Teoría d'a Evolución. Agora nos pareixe increyible pero teneban respuesta pa tot. No nomás pa los wombats. Tamién pa ornitorrincos, los cancros ferradura, los propios humans y mesmo los dinosaurios. ¿Puetz creyer-te-lo?

Tardemos a-saber-los sieglos en enterar-nos d'a verdat. T'a part d'alavez no faltaba qui la columbrase, pero la mayoría por motivos entivocaus. Se puet arribar a lo conoiximiento por casualidat u mesmo por error. A qui sosteneba que la Tierra, la humanidat y la resta d'animals, y las plantas, las piedras y tot yeran obra dreita de Dios se le teneba por varrenau u fanatico. Y de razón, no les ne faltaba. Tot lo que se sabeba apuntaba a que la Evolución yera un feito. Faltaba por desarrollar disciplinas enteras de conoiximiento pa poder prebar la existencia de Dios. Quan lo consiguiemos nos trobemos con lo suyo particular sentiu d'a humor. Los wombats no yeran que una gracieta. S'estió aguardando milenios dica que se popularizó la chanza. Le teneba igual lo tiempo, encara que yera una d'as pocas cosas que no heba creyau. Nos dició que s'esmelicaba cada vegada que belún de nusatros s'enteraba de que existiba un bicho que cagaba quadrau. Dios yera bien escatolochico. Nos encarranyemos a-saber-lo quan sabiemos lo de los dinosaurios. ¡Y tantas atras cosas! ¡Si sabeses tot l'embolique que se feban los nuestros antipasaus pa explicar lo suyo mundo quan quasi tot yera concietos divinos!

Ya no en queda, de wombats. Ni de cluixiuesos, pangolins u yetis. Tot barrumbiadas que tenió Dios. Ixas grometas yeran una fatera. Atras no nos facioron redir tanto quan las sabiemos. Tot lo que funciona malament en los nuestros cuerpos ye astí porque asinas lo decidió. U pior encara: por pura galvana en lo proceso de disenyo. Dios yera chuzón, sí, pero tamién un barrustas y un galván. Practicament yeranos una versión beta. Por ixo nos estafurriemos tantismo. Por ixo estricallemos buena parte d'a suya obra y, prou que sí, por ixo lo matemos.

Iste relato fa parte de l'Inktober literario en aragonés de 2020.

Espada #Inktober 05

La primer vegada teneba ueito anyos. Yeranos ensayando una obra de teatro d'o colechio. Yo feba de campesina, un papel chicot. A Diego, que yera amigo mío dende la guardería, le heba tocau de Chaime I. Iba tot pincho, con lo vestuache reyal y por debaixo tela plateada d'ixa que remeda la cota de mallas. Si su mai l'hese arribau a veyer actuar, s'hese regalau. ¡En yera de rebonico que pa qué! Tot chugarriando, le furté la espada suya y preté a correr. Ell empecipió a encorrer-me, chilando pa que le'n tornase. Me chiré, con l'arma en la man y lo brazo bien largo. No adubió a aturar y ¡zas! en tot lo uello. Me pensaba que le'n heba quitau. Ell ploraba, escacilando como si l'hese muerto. Yo, toda espantada, mesmo plegué a pensar que l'heba deixau ciego. A la fin la cosa no estió tant grieu. Vinió la enfermera, se lo levoron ta l'hespital y tornó a l'atro día con una esterza. Tres meses que s'estió con ixa esterza lo pobret. Prou que dende alavez toda la resta d'a cachimalla empecipió a clamar-le "lo pirata" y, mesmo hue, dimpués de tantos anyos, i hai qui le diz asinas las nueitz de borina. Su mai ya no le deixaba chugar con yo. Que yera masa bruta, un chicazo, deciba. China-chana perdiemos lo contacto, tot y que Teruel ye una ciudat chicota asinas que hemos seguiu veyendo-nos de cabo ta quan.

La segunda, ya yera mas gran. Una amiga feba anyos en febrero y decidiemos de celebrar-lo puyando t'os carnavals d'A Fueva. Ya sabe, ixos que van de lugar en lugar zorriando y minchando como si s'ise a prohibir. Nusatras ibanos de Star Wars. La segunda trilochía, la d'as precuelas, yera en cines, y yo m'heba feito un trache a saber qué pincho de Darth Maul, lo malo d'a primera. Ixe con la cara roya y negra y asinas como con punchos. ¿Que no lo conoixe? Rai, uno que fa blincos y pintacodas y cosas pareixidas. Porta una espada doble que agafa por lo meyo. Una asinas teneba yo. No pas una de verdat, claro. Yera un palo pintau. De tardes, ibanos ya todas como cestos. Yeranos en que me sé yo que lugarón, buscando un pacharán u qualcosa asinas pa desensebar. Chunto a yo yera Raquel, una amiga que s'heba vistiu d'Obi Wan. Uns críos se nos acercoron. S'heban visto la cinta y empecipioron a decir-nos que no podebanos estar chuntas, que nos hebanos de barallar. Fendo cullebretas nos aluenyenemos bell poquet y prencipiemos a fer comedia. Como si fuese la zaguer scena de l'Episodio uno, pero en versión penible porque, como le he dito, ibanos pifolismas. Calculé malament y en una d'ixas le fotié buen truco con lo palo en la bariella. Raquel – Obi Wan, cayió por tierra escupindo sangre. A yo se me pasó la tronzadera de camín. Un d'o lugar, que iba meyo bien, l'acercó t'a Cruz Roya. Lo morau le duró días, y dos caixals no tornó a veyer-los. Encara ben d'estar por lo lugar aquell.

La tercera estió fa dos semanas. Alfredo y yo nos casabanos dimpués de nueu anyos festellando. Pai, mai, los suegros, las familias, los amigos... toda la chent que queremos chunta en un salón. Tot iba de bitibomba. La chenta, bien de calidat y de cantidat. Como cal en una voda. Los cambreros yeran eficients, la mosica sonaba quan heba de sonar, lo vin maridaba a la perfección con cada plato. David Bowie amaneixió por los altavoces. Yera lo sinyal pa que venise la tarta nupcial. Quantos pisos de laminerías remataus por dos funko – pops que se suposaba yeranos nusatros. Hebanos acordau que aquell monstruo de zucre lo tallaríanos con un sable que heba furtau pai quan fació la mili. Lo teneba como una choya. Siempre se bambiaba d'a suya feta. "En tot lo morro d'o Sarchento Peláez, le'n furté. Nian en paró cuenta lo patantón d'ell" repetiba cada vegada que recontaba la historia, que no'n yeran pocas. Lo que no hebanos charrau yera qui la tallaba. Traye, que lo foi yo. No, que ye de casa mía lo sable, lo foi yo. Deixa-me que tu tiens firme periglo. Que ye un sable viello, ¿que puet pasar? Y astí acabó la pleitina. Le'n heba clavau en la pancha. Ya puetz contar la que se montó en un petén. Alfredo sangraba como un tocinet, yo le pretaba la ferida, que ye lo que siempre fan en las cintas. La resta no feba que chilar. Los ninos plorando. Un d'os cambreros y a la mía tía Josefa esturdius de tot. Suerte que ell teneba un tío medico que a escape talló la sangonera y lo levoron ta l'hespital. A cascar-la voda, lo baile nupcial, la fuent de chicolate y todas ixas costodias. A la fin, cosa. La cicatriza se la queda pa cutio, claro. Recuerdo de voda, que diz ell. Pero no le dié en garra organo vital ni cosa pareixeida. Bien se vale que ye un sol y me quiere a embute, que si no...

Asinas que aquí soi. Creigo que ye momento de prener unas clases d'esgrima. ¿I hai plazas?

 Iste relato fa parte de l'Inktober literario en aragonés de 2020. 

Radio #Inktober 04

Heba tastau, por bella semana, lo gusto d'a fama y la gloria. La noticia que heba dau lo suyo programa, la gran exclusiva sobre la vida privada d'ixa diputada, heba feito que lo programa de radio esdevenise trending topic. "Los maitins de Carlota y Bruno" ya no yeran un boletín mas d'una cadena chiqueta. Quasi no heban dau las sinyals horarias que marcaban la fin d'o suyo noticiario d'ixe día y ya teneba qualque mensache convidando-la a platós de televisión, bell periodista que quereba conoixer las fuents suyas y mesmo una ufierta de treballo d'a competencia. Politicos d'o partiu d'a diputada, y tamién d'a resta de l'arco parlamentario, quereban parlar con ella.

En los retz socials, que tant poco a sobén revisaba, no deixaba de puyar lo numbro de followers y friends. Bella entrevista mas tarde, ya heba feito mas diners que en a-saber-los anyos en las ondas. Y encara que no lo ganó, estió nominada a lo premio Waves. En ixa gala, i yera tot lo mundo d'a comunicación. Lo menos, totz los importants. D'a radio, prou que sí, pero tamién d'a prensa y la televisión. Y dende feba bell anyo, tamién los bloggers, podcasters y youtubers que feban que los medios tradicionals pareixesen barcos de vapor, maquinas d'escribir u walkmans.

Debió haber aproveitau lo momento pa renegociar lo suyo contracto. ¡Se'n repenedió tanto, de no haber-lo feito! De toda l'audiencia que heba conseguiu lo programa, la mayoría ixopó t'as cadenas que tradicionalment la heban tenida. Los mensaches deixoron d'arribar, dengún no quereba entrevistar-la, y mesmo los followers y friends empecipioron a fer volito. Yera bien pareixiu a lo suyo anterior estau. La rutina por anyos y anyos de fer un programa sin mica trascendencia dillá d'os quatre frikis d'a radio que encara existiban. Quatre cadenas se repartiban tot lo publico y la resta no feban soque sobrevivir como podeban.

Ya feba un anyo d'ixa noticia. Deixó lo café con leit sobre una d'as caixas de merchandising d'o programa que amuntonaban en l'estudio. Remeró la fama, las entrevistas, la reputación, la gala con lo suyo vistiu de disenyador francés. Trasquió ixaliva conscientement, como si asinas podese amerar la mentira que yera a pocas de decir en lo programa. La mentira que la tornaría ta ixe puesto a on que tant bien heba viviu por bell tiempo. Yera la segunda vegada que lo feba en toda la suya carrera y ya conoixeba bien lo resultau que heba teniu la primera.

¿Prevenius? - avisó lo tecnico. Carlota asintió con lo tozuel – Adintro en tres, dos...

Iste relato fa parte de l'Inktober literario en aragonés de 2020.

Lo pre d'un malaudo

Allá ta marzo, quan la pasa va empecipiar a correr por la peninsula, bi habió un consenso social alto u baixo gran en que caleba encadar-nos si querebanos salvar las vidas de muita chent. Bi habió, prou que sí, voces que no i yeran d’alcuerdo. La mayoría yeran mas en contra de bella mida concreta que de l’esprito cheneral d’as leis que se facioron en aquellas envueltas. Pasau l’espanto primero, que nos deixó acollonadas en casa rodiadas de papel de culo, tornemos a salir t’as carreras, en una desescalada que acceleroron porque los pixautos iban encarranyaus y que acabó en la clamada “nueva normalidat”.

Una d’as cosas “normals” en ista “nueva normalidat” ye que muera chent. Ya somos anestesiadas. Las muertas ya no son que una inquesta estadistica. Nos molesta mas haber de portiar la mascareta que las UCIS plenas.

Eixemplo d’a desconexión con la vida d’ista nueva etapa coronavirica son los titulars que i hai en bell medio. “Zarrar Madrit costará nosequantas perras”, diz lo clickbait d’un prestichioso periodico monarquico. No pasaría cosa si ixa información fuese ixo, información, y no una campanya en contra de nuevas midas contra la pasa. Se discute y se debate sobre qué perdas economicas causarán los decretos u sobre las molestias que patirá la población. Pero pocas rufiertas veigo sobre las vidas que se salvan u se deixan de salvar.

Talment, dende la envista purament electoralista, Sánchez y Iglesias s’entivocoron. Talment no hese caliu las midas de metat de marzo. ¿Hese muerto muita mas chent? A fe que sí. Pero la economía no sería tant malament y, pa forro de bota, hese muerto un porcentache considerable de chubilaus que le cuestan diners a l’estau. I hai noticias totz los días sobre los diners que se pierden con tal u qual mida politica. Imos tot lo día chafando basas de glarimas d’os interpresarios que han de "malfurriar" chanfles en EPIs y que malfian de que treballemos dende casa pagando-nos luz, calefacción y wifi. Sería intresant que s’estudiase quántas vidas se salvoron por quedar-nos encadadas ixos meses. Quántas se salvan por cada día que s’aplican midas contra la covid. Y tamién, prou que sí, quántas ha costau ubrir Madrit antes de que tocase, quántas las condicions laborals en lo campo iste verano u amuntonar-nos en los medios de transporte masivo d’as ciudatz. Lo que pierde la economía ye de buen quantificar y le’n acumularán a lo gubierno. No pas las vidas salvadas. Qui quiera “salvar la economía”, que nos explique quántas vidas cuesta fer-lo. U quántas ye disposau a sacrificar.

Ye important la economía, prou que sí. Entre atros motivos porque ixo tamién suposa muertes a la fin. Pero queda pasa pa firme tiempo y creigo que somos perdendo la perspectiva de que isto se tracta de vidas. De chent que muere u chent que se salva. Y que la suya vida pende fundamentalment d’os recursos que tiengamos en la sanidat y d’as midas que se prenga dende l’administración. ¿A quántos euros va lo muerto?

Granizo #Inktober 03

Abel ya yera granizo de chiquet. Quan empecipiemos primaria feba un tozuel mas d'altaria que Drazen, lo fillo d'os serbios que totz sabebanos que acabaría de chugador de baloncesto. Pero en arribar a la secundaria, quan la resta creyebanos que nos igualaríanos bell poquet, pasó tot lo contrario. Siguió limpio creixer. Por cada día, bell centimetro mas. En un mes s'heba feito bell palmo mas altero. S'heba d'acochar pa entrar ta clase y a la fin d'o curso, mesmo heba de fer-lo a galapatons.

A la chent tant grandaz la sabiduría popular le acumula bella mena de fateza. Las personas como Abel siempre se describen bien birontons en libros, cintas y comics. Ell, manimenos, yera tot lo contrario. Agudico como lo que mas d'a clase que, curiosament, tamién yera Drazen. Encara que como lo serbio faltaba muito por los entrenamientos d'alto rendimiento, las notas suyas yeran prou piors. Pareixeba que lo tozuel d'Abel, gran en consonancia con las resta d'o suyo ser, yera capable d'amuntonar totz los conoiximientos que lo profesorau nos transmitiba. Los suyos treballos, en cuenta de copia-pegas d'a Wikipedia, como febanos totz, yeran verdaderas tesis. Las suyas redaccions, literatura d'avantguardia.

Con tot y con ixo lo pobrichón patiba como alma en peneta por lo suyo volumen que le privaba de fer a-saber-las cosas. Los calculos que ell mesmo fació deixaban claro que dimpués d'o verano ya sisquiá i culliría en l'aula. Los amigos hebanos de fer qualcosa. Y prou que lo faciemos. Prebemos a tallar-le un peu, que yera lo mas facil. Talment asinas deixaría de creixer. Lo menos ya yera un troz mas chiquet. Abel se dispertó, sin lo suyo peu, encantau. Si me tallatz lo cucho tamién puet estar que entre en clase de nuevas, nos proposó. Concha, que teneba una vesant psicopata que a totz nos feba miedo, le'n talló de camín. Lo propio Abel nos fue decindo qué parte tallar cada día. A ell no pareixeba molestar-le quedar-se sin partes d'o cuerpo. A nusatros, rai. Y Concha, acontentada con la suya nueva fayena.

Tallemos y tallemos. Y tanto tallemos que pa lo nuevo curso Abel yera nomás intelecto. Como a tot ixe conoiximiento, tanto formal como informal, le caleba un contenedor fisico, decidió distribuyir-se entre las ments de toda la clase y, dende ixe día, totz somos un poquet mas agudos.

Iste relato fa parte de l'Inktober literario en aragonés de 2020. 

Esgarrón #Inktober 02

Lo tozuel le feba a saber qué mal encara. Debeba d'haber estau inconscient por quantas horas. A lo suyo redol, la sola companyía de calavres y repuis d'armas y armaduras. Ulor a vodiellos y sangre y lo barrunto d'a tronada que s'acercaba dende l'ueste. La enrestida d'a caballería yera la zaguer cosa que podeba remerar. Dimpués, tot yera fosco. La batalla yera perdida antes de que la primer flecha abandonase un d'os arcos enemigos. Lo rei s'heba encerrinau en resistir y lo suyo sinyor no le deixó guaires opcions. Podeba haber reblau. Podeba haber feito bella negociación, en tierras u en diners. Sabeba que atras vegadas las pleitinas s'heban apanyau d'ixas maneras. No pas en ista ocasión.

Prebó a devantar-se. Fació garras, pero tasament se teneba. La tierra esbarizaba. Los fluyius d'os suyos companyers d'armas la heban tornada toba. Trobó a un d'os portaestandartes. Astí yera la suya bandera, feita esgarrons como la suya tierra. Un país que luitaba por no dispareixer. Atro amo vendría, tant bueno u tant malo como lo que conoixeba. Ixo nunca no se sabeba. N'heba conoixiu de millors y piors y los anyos le heban amostrau que le caleba malfiar-se de totz ells. Mesmo los que pareixeba que trayeban a cotenas paz y prosperidat pa lo suyo puelo, a sobén acababan embolicando-los en belatro conflicto que dengún no entendeba.

Heba conoixiu pocos anyos sin guerra dende que participó en la primer, asinas que antimás de a malfiar-se d'os reis y sinyors, heba aprendiu lo que se fa quan se conquista un nuevo territorio. La fricasera que los soldaus deixan en pasar por lugars y ciudatz. Ixa chiqueta plana por a on que caminaba, ixos paisanos suyos chacendo por tierra, yera lo zaguer entrepuz que l'enemigo teneba antes de plegar en casa suya. En ixe momento, la suya muller, los suyos fillos, los primos, los vecins que d'una u atra manera s'hesen librau de participar en la batalla, y tot lo lugar, serían patindo la furia d'os invasors.

Replegó bell troz d'a bandera. Si plegaba a vivir bell anyo mas, si conseguiba eslampar ta bell cabo a on que podese instalar-se, ixe esgarrón sería tot lo país que quedaría con ell. Un troz de tela, memoria de tot lo que heba perdiu.

Iste relato fa parte de l'Inktober literario en aragonés de 2020. 

Peix #Inktober 01

Dende lo pozal de plastico, lo peix recient pescau fació un zaguer esbrunzazo y aturó a pensar. No quereba malfurriar la poca rasmia que le quedaba. A lo suyo redol una miquirrina d’augua le proporcionaba un chiquet entorno a on que poder alentar bell minuto mas. Debaixo d’ell, quatre companyers d’especie chaceban tuertos y pudindo ya a muerte. Levaban firme rato afogaus.

Difuera se sentiba los dos humans, charrutiando sobre futbol. Sobre un equipo que, por lo que heba sentiu en la clase de cheografía d’a escuela marina, yera d’una ciudat que sisquiá teneba mar. ¿Cómo s’atreviban a quitar-les de l’augua d’ixas trazas? ¿Quí yeran ixos dos papis que cometeban un chenocidio en lo suyo vecindau? Prebó de reubicar-se en lo pozal, secutindo la coda pa aibar a un d’os peixes calavre. Alentó entre que la charrada externa feba casamuda ent’a politica. Bell representant publico «no teneba ni ideya», por lo que deciba un. «Tu, que lo que quiers ye vivir de l’estau», le respondeba l’atro, chilando mas por cada momento.

Adintro, l’oxicheno s’acotolaba. Heba de calcular lo suyo siguient movimiento con ficancia. Columbraba lo canto d’o pozal dende lo suyo puesto. Difuera, las parolas heban esdeveniu escacilos y faltadas. Los dos pescataires se tricolotiaban. Yera lo suyo momento. Con la zaguer ixafegada, secutió totz los suyos musclos. Lo suyo cuerpo blincó, prebando de fer un Fosbury ent’a libertat entre que los humans no’n feban caso. Consiguió asomar lo tozuel por dencima d’o pozal, deixando la enrobinada ansa de fierro abaixo, prebando de mover-se ent’as rocas a on que, dimpués de bell par de trucazos, asperaba trobar la mar. Pero igual como heba puyau, tornó t’o fosal que’n miraba de fuyir. Si hese puesto, hese zarrau los uellos, disposando-se a morir. La suya naturaleza le privaba de fer-lo.

Lo corazón traquetiaba a monico. Sentiba la suya hora plegando quan lo pozal se bochó. Ascuitó un lapo que se respondió a l’inte con unatro y, de rapiconté, lo suyo atabul de plastico s’heba vulcau. Los peixes calavres y ell, agarrapizau a lo filo de vida que le quedaba, salioron aventaus, rocas t’abaixo ent’a mar que les aguardaba. Fluashhhhh. Yera en lo suyo medio de nuevas. Alentó tranquilo dica que tornó a orientar-se. Yera en casa suya, en aquella immensa casa suya. Alto flotaban los calavres d’os suyos companyers de pozal y un poquet mas t’alla, lo d’un d’os pescataires que heban teniu la zaragata.

Iste relato fa parte de l'Inktober literario en aragonés de 2020.