Por qué no creyer?

As cosas en que puede creyer a chent nunca no deixan d'enarcar-me. Fa bells diyas, en una charrada, una companyera nos deciba que no podebanos vestir de royo de maitins porque va en contra de no se qué movida zen, u bella cosa parellana. Que nos caleba ir cambiando de ropa seguntes o momento d'o diya. Bell rollo parellano a lo Feng Shui, pero con a ropa, cuento que será. Unatra companyera le preguntó "¿pero creyes en ixo?", a lo que ista contestó con un "¿por qué no?".

Astí sintié como totz os poders que fan as profesoras de sciencias de toda la planeta quedaban en no cosa debant d'una fatera inventada por bell iluminau, u mesmo por bell chuego infantil elevau a la categoría de filosofía, con un acotracio d'exotismo oriental, siempre millor que qualsiquier cosa d'o "scientifista occident", que deciba no se qui.

Ixa mesma persona, bell diya dimpués, dició creyer en l'horoscopo porque creyeba que "as planetas influyiban en nusatras en l'inte de naixer". Tamién ye cristiana, d'as que van ta misa de cutio, y s'amostró carranyada quan les dicié que a homeopatía yera nomás augua u zucre, y que as flors de Bach y o reiki yeran atros timos iguals.

Charro d'ista persona, pero ye una actitut prou común. Creyer en tot. En tot fueras de en a sciencia, ye claro. Talment Jonathan Miller teneba razón quan s'estimaba más definir-se como no-creyent (disbeliever) que como ateu, ya que ye un concepto más amplo. Veigo masiau a soben como as cristianas creyen, antimás, en toda mena de atras creyencias. Belunas incompatibles, por cierto. Talment una vegada que crebas a muga d'as creyencias con una fatera, ubres a puerta a toda la resta. No sé si o cerebro funciona asinas, pero o fenomeno ye amplament estendillau.

Por qué no creyer en o "Feng Shui modisto"? Porque ye una fatera que se viye dende luen. Porque no bi ha garra estudio, indicio, sinyal, ..... que indique que siga asinas. Porque no se basa en una observación de fenomenos contrastada por dengún.... Por qué no creyer en l'horoscopo? Porque ye una ababolada que a posición d'unas planetas en relación a la nuestra y a uns debuixos que bells occidentals facioron en o ciel fa sieglos, y que ta forro de bota, hue ya han cambiau de posición, influiga de garra traza sobre nusatras. Porque a sola influyencia que tien Marte u Venus (u a Luna) sobre nusatras ye a suya gravedat y en l'inte de naixer a gravedat d'as mans d'a partera u medica ye más gran que no ixa. Por qué no creyer en (ficar nombre de creyencia no contrastada)? Porque, como dició Sagan, afirmacions extraordinarias cal que tiengan prebas extraordinarias. Porque si no nos preguntamos porqué as cosas son como son u si funcionan a humanidat desapareixería.  Porque dengún no viyó o can de Ricky Martin minchando Nocilla d'a totera de dengún.

Si quan nos dicen que meter un cactus en un repalmar te puede aduyar a conseguir treballo, u que pichar en l'escusau d'o medico mientres le faltas te curará os mals d'o garganchón, no se t'enchega l'alarma que te diz "isto ye una fatera", talment habríanos de revisar o nuestro esprito critico y, sobre tot, o nuestro sistema educativo. Porque ixo sí que ye un fracaso educativo.

A pregunta que cal fer no ye "por qué no?" sino "por qué?". Por qué cal vestir d'azul de maitins ta que as cosas vaiga bien? Por qué a Luna provoca más partos? Por qué nos van a fumigar avions en un ineficaz y absurdo chenocidio?. Y ya que prencipiamos a preguntar cosas, no sería por demás preguntar tamién "cómo?" u "ta qué?".

Información, información, información. En cal, y a palladas. Un d'os problemas que tamién me trobo a soben con istas "omnicreyents", pero tamién con muitos atros perfils de diferents graus de creyencias, ye a falta d'información. A homeopatía ye un d'os eixemplos más plateros. Quan a la chent que la esfiende les pregunto que si saben lo que ye, a soben me dicen que son "medecinas naturals", "hierbas", "medicamentos sin quimicos", u cosas parellanas. Lo que indica que ignoran dos cosas: lo que ye a "medicina scientfica" (1) y lo que ye a homeopatía.

Quan les explico lo que ye de verdat a homeopatía, fan uellos de caparra. Por un regular creyen que les miento (qüestions d'autoridat). Tamién gosan de recontar bella experiencia de "amimefuciona". Me preguntan "y alavez porque deixan vender-lo en farmacias?"... cosas asinas. Pero creigo que nunca no he feito venir a plego con iste afer a dengún que ya creyese. He conseguiu que qui no conoixeba a homeopatía estase a la tisva y la refusase, pero una vegada que i creyeban m'ha resultau imposible de fer-les cambiar d'opinión, encara que pueda alportar toneladas de prebas.

Ye muito facil, por lo que pareixe, creyer-te una fatera. Ye muito más dificil, y d'ixo cuento que bi habrá estudios, reconoixer que has estau creyendo en una fatera, u que o tuyo sistema de creyencias ye basau en chorradas que bell iluminau s'inventó bell diya y que consiguió ixemenar a bando. Errare humanum est, sed perseverare diabolicum.


(1) Termino que foi servir ta entender-nos. A medicina que no ye scientifica no ye medicina.

Top fateras: Holosintesis, orgonitas y 432 Hz

Dende fa un tiempo me cuaca de fer "colección" d'as fatezas más grans que me voi trobando u me van recontando as mias amistatz magufas u escepticas, u qui simplament saben que me fan goyo istas cosetas. A ormino me quedo sin sangre en a pocha en viyer a cantidat de fatezas que se puede plegar a creyer a chent, y a graniza cantidat de timadoras que bi ha por tot. A mayoría d'ellas se viyen que'n son a kilometros y bi'n ha belatras que no pas tanto, pero que no aguantan ni dos minutos d'analís. Ixe menester que tien a chent de creyer en cosas, que nunca no he entendiu, y o feito de que a mayoría d'a chent no tien uns minimos conoiximientos d'os fundamentos scientificos, unius a la falta de capacidat critica a l'hora de leyer qualsiquier noticia u texto, fan que istas cosas continen espardindo-se.

De todas las que he replegau en zagueras, en he trigau istas que tos comento, ta que nos podamos fer unas risas, u unos ploros, pendendo de l'estau d'animo que tiengatz quan lo leigatz.

Holosintesis: A homeopatia en imachens. Ya nomás o titols tira fuerte. O timo d'o timo. A definición tien totz os elementos propios d'istas fatezas: "Holosintesis ye una mena de medicina vibracional basada en disenyos, que fa servir imachens d'elementos d'a naturaleza, components bioquimicos, principios activos de fitoterapia y de farmacolochía, tractadas matematicament con estructura de cheometría sagrada". Analizar a frase tranquilament. Aturatz-tos en cada parola. No tien mica sentiu. ¿Cheometría sagrada? ¿Medicina vibracional? Muito gran. Completan a descripción con atras expresions que pareixen scientificas a tot qui no ha leyiu un libro de sciencia en a suya vida: "efecto de bioresonancia sobre a memoria celular" "patrón natural d'equilibrio", "sanación de estructuras", "paquetz d'información", "ambito fisico-celular", "nexo entre lo fisico y lo psicoenerchetico", "reequilibrio bioenerchetico" y asinas asinas.

Basicament, s'adedican a vender apegallos, alfombretas ta ixoriguetz y cosas asinas con unas colors muito pinchas. Tamién fan videos absurdos con ixos disenyos a on que "limpian l'augua d'a nuestra planeta" (basau, por cierto, en Masaru Emoto, inventor d'a memoria de l'augua), y te "tractan con o dibuixo basau en a Estevia y atras plantas. (a estevia ye pegando fuerte estianyo, eh?). Basicament ye una traza de vivir a pur de vender uns dibuixetz feitos con o spirografo y bell poco de photoshop.

Tamién lo barrachan ¡como no!, con o budismo y os mandalas, atra fateza que'n charraré bell diya.

Orgonitas: (No trafucar-se con os Gorgonitas, sers que saliban en a cinta Small soldiers) Ista la conoixié fa poco, pero m'encantó tamién por o suyo potencial comercial. A historia ye que un psicoanalista d'os anyos 30, Wilhem Reich, se inventó bella mena de Fuerza (igual como a "Force" de Star Wars u a lo que mientres muitos sieglos se creyó que yera l'eter, que no tien masa y ye omnipresent y que nos influye a todas. Ixa enerchía-substancia clamada orgón (que vien de vez de as parolas orgasmo y organismo), puede estar mala, pero con uns dispositivos, clamaus orgonitas, se transforman as malas vibracions en orgón nuevo que fa que a enerchía siga buena y tal. A orgonita se fa basicament con cuarzo, filo de cobre, raspaus de aluminio, una resina y poco más, y se vende muito bien, por lo que se viye. Prou que dengún no ha trobau nunca garra indicio de que ixo valga ta cosa, pero ¿qui quiere a verdat dimpués de gastar-se 90 euros en una piramide de colors que te saca o mal rollo de l'ordinador?. 

A parti graciosa ye que, por eixemplo, sirve ta luitar contra os chemtrails (y contra os unicornios vampiro cuento que tamién). A parte no tant graciosa ye que tamién meten que puede curar o cancer, asinas que en a mia opinión, cada vegada que una pachina asegure u insinue sisquiá ixo, qui lo haiga escrito habría d'estar imputau por un delito contra la salut publica.

LA a 432 Hz: Ista zaguer la descubrié fa poco y ye la que me ha feito escribir iste post. Ye una teoría conspirativa que diz que Goebbels (sí, o nazi) fació cambiar o standard d'a nota LA ta que pasase d'estar afinada a 432 Hz a 440 Hz. T'as enfensoras d'ista teoría, o feito de que a mosica se afine a 440 Hz fa que nos sintamos cansadas y tiengamos malestar "porque os armonicos d'a mosica no encaixan con a frecuencia vibratoria d'o ser humano". A frecuencia d'a Tierra ye, seguntes ellas, 8 Hz. 440 Hz no ye multiplo de 8, pero sí 432, asinas que prometen que, si afinas os instrumentos mosicals prenendo un LA de 432 Hz "os tuyos atomos y l'ADN prencipian a resonar en armonía con a espiral de PHI d'a naturaleza".

Conspiracions nazis, frecuencias de vibracions y a naturaleza. Teneba totz os elementos, pero ista historia yera bien curiosa, porque yo tampoco no teneba guaires conoiximientos de mosica y de cómo s'afinaba. Bien se vale que, en tres pachinas serias ya te trobas con a historia de l'afinación. A frecuencia de 432 Hz no nomás no s'ha feito servir nunca como afinación t'o LA, sino que sisquiá se fa servir agora, a efectos practicos a de 440 Hz, encara que siga la oficial a efectos scientificos y legals. A finals d'o XIX y prencipios d'o XX yera fixau en 430.55 Hz. Prou que totz ixos efectos malos ta sociedat no los ha comprobau dengún nunca y Goebbels prebablement ni estió en a conferencia que decidió estandarizar o LA a 440 Hz en 1939.

As reptialianas son entre
nusatras...

No soi un gran scientifico. No soi ni scientifico. Soi un simple auxiliar administrativo que le fan goyo istas cosas y que tien una mica de sentiu común, curiosidat y capacidat t'alufrar as cosas. Siempre que veigatz qualsiquier cosa que sone bella mica raro, que charre de sciencia dende una pachina no scientifica, que prometa curar cosas que se suposa que no tienen cura u que charre d'una embolicada conspiración, aturatz-tos un inte un pensar en a lochica d'ixo. Miratz bella pachina más, preguntatz a las vuestras amigas scientificas, etc... Por un regular, si metes en google o nombre d'o timo en qüestion y as parolas "esceptico" u "timo", tos apareixerán as atras anvistas. Por desgracia, por un regular, si meter en google nomás o nombre d'o timo te apareixen os cientos de pachinas que copian a la primer fuent u que venden os hologramas, as orgonitas u lo que sía...

Tos deixo bells vinclos ta que les fayatz una uellada:
Holosintesis
Sobre as orgonitas 
A conspiranoia d'os 432 Hz, y as explicacions historicas en Cienciarte y La mentira está ahí fuera.

Cuento que iste ye o primer post d'una serie a on que iré penchando atras fateras y enganyufas que veigo por astí. Si queretz inviar-me-ne beluna podetz escribir-me a tierradebarrenaus@gmail.com. Si tenetz prebas de que sirven ta bella cosa, escribitz-le millor a James Randi, qui ufre 1.000.000 de dolars a qui lo faya.

L'aragonés ye bien vivo (noviembre 2012)

De tornada ta La Enredadera de Radio Topo, que tos remero podetz sentir dende o suyo blog, dimpués de una chiqueta colaboración con atro programa, El Kantamañanas, a on que estié charrando bell poquet sobre a homeopatía. Contino tenetz o resumen de contenius d’ista edición de “L’aragonés ye bien vivo”.

Peli d’o Bandiu Cucaracha
O primer largometrache aragonés d’animación podría fer-se en aragonés. A historia de Mariano Gavín, o bandiu Cucaracha podría blincar t’a gran pantalla si os suyos creyadors, Hector Pisa y Juan Alonso consiguen os diners ta fer-la. A financiación se ye fendo a traviés de micromecenazgo u crowdfunding. Ta qui no sepa qui ye, se tracta d’una traza muito emplegada en zagueras ta financiar obras d’arte como discos u pelis. Qui quiera refirmar a financiación dentra en una web y ingresa una cantidat. Ixa cantidat dimpués da dreito a una copia d’o disco, por eixemplo, u entradas t’o concierto presentación u t’a devantadera d’a cinta y asinas asinas.
A cinta será rodada de raso en aragonés y dimpués traducida t’o castellano, l’anglés y o francés. Contará con a colaboración de personaches conoixius d’o mundo d’a scena como Javier Coronas, Pepín Banzo, Joaquín Sorribas, Sho Hai, Isidro Ferrer, Francisco Palomares u Fran Fraguas.
A peli promete accion y aventuras con muito ficacio en o tractamiento estetico y visual d’a epoca y será feita con monyacos de latex movius por os creyadors.
Ta qui encara no conoixca a Mariano Gavín, o Bandiu Cucaracha, remerar que estió un bandoler d’o sieglo XIX que, en a Sierra d’Alcubierre, diz que furtaba a os ricos ta dar-les-ne a los pobres, como un Robin Hood aragonés, y que remató muerto por balazos d’a Guardia Civil, de conchunta con a resta d’a banda suya. Y si queretz conoixer a suya historia lo millor ye sentir a sobrebuena canta que fació fa muitas anyadas La Orquestina del Fabirol.
A mosica d’a cinta tamién será de luxo con nombres como Moby, Lurte u Trivium Klezmer.

La cursa del submarino
La cursa del submarino ye o nombre d’un curtometrache feito por os ninos d’a Escuela de Sant Chuan o curso pasau y que participará en o “Certamen Nacional de Encuentro de Escolares”. Bi participan ueito curtos aragoneses más, pero iste ye l’unico feito de raso en aragonés.
O curto reconta a historia d’o capitán Pifolo y os suyos repatans a bordo d’un submarino y d’as aventuras que les pasan. O resultau ye una falordieta de quatre minutos bien pincha y muito bien montada. Sobrebuena iniciativa d’a Clica del Cinca-Cinqueta y asperemos que ganen!       

 

Zaragoza sinya o manifiesto por un Aragón trilingüe
Fa bellas pocas semanas conoixebanos o refirme d’o concello de Zaragoza a lo manifiesto Aragón Trilingue, a iniciativa de CHA. Ista refirme ye aintro d’una politica de mover ixe manifiesto en as institucions a on que ixe partiu ye present. S’ha conseguiu en bells poquetz, como en Zaragoza, a on que a suma de CHA, IU y PSOE lo ha feito posible. En atras institucions con mayorías PP-PAR u a on que lo PSOE ha dau libertat de voto, no ye estau posible.
Cal remerar que o debandito manifiesto sale d’a Coordinadera por un Aragón Trilingüe que se ye tornando a achuntar dende ista primavera y a on que bi ha organizacions de toda mena: politicas, culturals, sindicals, … O manifiesto denuncia o tracto que son tenendo as luengas de man d’o nuestro gubierno y apuesta por continar treballando ent’a oficialidat que ordena la UNESCO y por a suya amostranza y refirme dende as institucions.
L’anterior vegada que se fació qualcosa parellana estió quan se fació o manifiesto “Chuntos por l’aragonés” que levó t’o II Congreso por l’aragonés, y que lo refirmoron buena cosa de concellos, diputacions provincials y organizacions que iban dende penyas dica l’IEA pasando por asociacions, partius, sindicatos, collas de mosica, miles de personas a ran individual...

 

D’estrela a estrela

Ya plega a segunda edición de D’estrela a estrela, una chornada a on que toda a emisión de Radio Ropo será de raso en aragonés. L’anyo pasau estió a primer edición con más de 10 horas de emisión en aragonés a on que participoron programas como La Enredadera, El Kantamañanas, Rueda libre, Hijos del agobio y, prou que sí, a chent de Fendo Orella.

Ista anyada a respuesta ye estada mesmo millor y son bells 17 programas los que se ferán en más de 15 horas que bi ha programadas. Como novedat, antimás, tamién se ferá servir o catalán en belun d’os programas.

O venient diya 1 d’aviento a las 8 d’o maitin prencipia a emisión, que rematará con una fiesta en l’Arrebato a on que podremos chuntar-nos totz los que encara continemos de piet y enteros.

 

 

 

Día del patués
A val de Benás contina contrimostrando as suyas ganas d’esfender o patrimonio lingüistico y lo fa con o día del patués, una iniciativa que chuntó a lo lugar en esfensa d’iste dialecto de l’aragonés tan particlar.
Os actos, que se facioron en o Palacio d’os Condes d’a Ribagorza, prencipioron con una chicolatada con torta, continoron con una actuación de man de l’alumnalla d’o CRA (Centro Rural Agrupau) Alta Ribagorza y d’a suya profesora Carmen Castán. Dimpués, a las ueito, se fació prochección d’un curtometrache realizau por l’alumnalla d’o CES “Valle de Benasque”. A chornada remató con a lectura de bellas partis d’as obras ganaderas d’a sección “Poesía y Narrativa en Patués” d’o premio literario “Villa de Benasque”.

 

Feria d’o Libro Aragonés de Monzón
Plega ya a Feria d’o Libro Aragonés, una d’as primers cosas que’n charré en iste blog, fa ya quasi seis anyadas, y una d’as fitas fixas de todas as anyadas.Se fa a XVIII edición y han trigau como tema central “As escritoras aragonesas” qui protagonizarán dos exposicions en a parti d’abaixo d’a zucrera de Monzón.
Entre os expositors, como todas as anyadas, bi serán asociacions, editor y botiguers con arrienda materials en aragonés y sobre a cultura aragonesa. Por un regular gosan d’estar-ie Nogara, Fablans, Consello d’a Fabla, Xordica, Gara d’Edizions, Mira editores, Rolde d’Estudios Aragoneses / Aladrada, Asociación de Gaiters d’Aragón, Editorial Pirineos, y muitos atros, que encara que no tocan o tema de l’aragonés fan cosas bien pinchas: Eclipsados, GP Ediciones, Onagro, Malavida, …
No s’ha anunciau encara si ista anyada bi habrá o tren d’a cultura que gosa de puyar-ie dende Zaragoza. O cambio de dirección en o Patronato a trayiu cambios tamién en a Feria. Se ferán menos presentacions ixamplando o tiempo de cadaguna. Bi habrá una pregonera d’a Feria que iste anyo será Luz Gabás y se ferá a entrega de dos premios, que encara no se conoix a ganadora.
Tamién s’ha feito promocionar a feria mientres iste mes con un ciclo de trobadas con autoras por a on que son pasadas Ángeles de Irisarri, Patricia Esteban, José Antono Adell u Ros Beret. A novedat, talment buena t’atros, pero penible ta yo, que me l’habré de trusquir, ye a coincidencia d’a FLA con atra feria, Navideas, a on que os comerciants locals prebarán de sacar treslada vendendo cosas de nadal. Ixo sí, caldrá prebar a pista de chelo, que no se tien a oportunidat guaire asoben...

Rematemos con o reto de que bella colla faiga una canta en aragonés, que ista vegada, puet estar que tienga exito. Ta ixo remeremos a versión que fació Ángel Petisme de Ixo Rai de "Te debo una canción" y que s'editó en o disco tributo Nueba Cozina.

Y ta despedir-nos tos deixo con o video promocional de D'estrela a estrela d'ista anyada.

 

 

Ampraus 062: Rabanaque, magufos y Prau

Ya en feba bien de tiempo que no paraba un Ampraus. Con l’empecipie d’o curso he teniu más tiempo ta leyer pachinetas y ascuitar podcasts (verdader vicio en zagueras), asinas que contino pencho bellas cosetas que he trobau.

Daniel Rabanaque fació un poema t’o libro Zaragoza Rebelde, que se publicó en 2008. Pareix tan luen, y no’n fa que quatre anyadas... O caso ye que, encara que ya tien tiempo, no lo conoixeba. En ascuitando La Enredadera, Daniel lo recitó como nomás ell sabe. Lo podetz ascuitar a partir d’o minuto 1:37:00 si tos baixatz o programa y leyer-lo en o blog suyo: Zaragoza Rebelde.
 
En iste mesmo blog ya charré d’iste poeta metendo una d’as suyas obras, que siempre m’emociona en sentir-las en directo. Un adhibiu a aquel “La Revolución no será televisada”. Si queretz viyer-lo, iste cabo de semana será en o festival Gaire. Si no queretz u podetz, tos pencho un video ta que, la venient vegada que tiengatz a oportunidat de viyer-lo u leyer-lo, no la deixetz pasar.



En a mia luita contra a relichión, a homeopatía y atras tantas creyencias que, inexplicablement en a mia opinión, chupen tantismo a la chent de cuchas, he trobau un articlo en Kaos en la Red sobrebueno d’un tal Darwin Palermo. Iste mozo tien, si fa u no fa, a mesma opinión, y se fa as mesmas preguntas sobre o tema d’a creyencias, a pseudociencia, l’escepticismo y a politica. Sobrebueno l’articlo “La cucha magufa y os escepticos de dreitas” y de raso d’actualidat, pues en zaguerías istas historietas, a lo menos en Zaragoza, son por totz os cabos. Aprofeito ta meter un video-sketch que me invioron sobre a homeopatia y tornar a meter o vinclo a l’articlo que facié fa poco sobre a homeopatía, y que se ye leyendo a-saber-lo (muitas gracias ta todas).



Charrando de videos, lo millor, millor, o de Prau. O nuevo disco ye en momentos de salir t’a venda y Prau ya nos ye calentando o morro con iste video que han feito. A escape será o concierto de presentación que a fe a fe no nos perderemos dengún, pero tant y mientres, a gronxiar-nos con o video-presentación de Os pietz en a tierra.



No compres caballo cheeeesoooooo!!!

Sobre a homeopatia

Preixina que maitin tiens un examen. Te yes quedando dormida de tot y no quiers porque encara te falta d'estudiar. No sabes o qué fer y preguntas a quatre amigas. Una te diz de fer-te un café. A cafeína t'aduyará a estar-te dispierta bell rato más. A segunda te diz que pilles una gota de café, la chites en un vaso d'augua y te bebas ixe vaso. Una tercer te diz que te prengas un somnifero y una zaguera te diz que prengas una parti tan chicota como puedas d'ixe somnifero, la chites en un vaso d'augua y te bebas ixe vaso. Cuento que todas feríanos caso a la primer amiga. En os atros tres casos, no continaríamos dispiertas u, a lo menos, no por o que nos hemos preso.

Pues asinas, si fa u no fa, funciona a homeopatía. O café sería o remedio scientifico contra o suenio. O quatreno sería o remedio homeopatico (1) y os atros dos eixemplos me servirán ta charrar sobre dos principios d'a homeopatía: similia similibus curantur (lo parellano cura lo parellano) y a ultradilución.

¿Porqué iste post?

Quan sentié charrar a una companyera a primer vegada sobre a homeopatía, creyeba que simplament yera una fatera que ella heba ascuitau en bell puesto new age y que l'heba feito goi. No creyeba que guaire chent la prenese ni que representase garra periglo. Manimenos, en pasar o tiempo, he visto como muita chent la fa servir. Chent con estudios, cultura, y mesmo muitas personas con formación scientifica. Prou que tamién he visto a muitas personas d'ixe mesmo perfil ir a que les leigan as mans, as cartas u leyer o suyo horoscopo. A la debandita companyera tamién l'habié d'explicar porqué l'horoscopo no tien mica base. Creigo que ye important que qui sabemos que as personas son estando timadas, denunciemos ixe timo. Asinas que m'ha pareixiu important denunciar a homeopatía, un d'os mayors timos d'a historia. En rematar isto cuento que no feré cambiar d'opinión a dengún. As relichions, a espiritualidat y as creyencias ye lo que tienen: que por muito que sigan insostenibles a chent no deixará de creyer en ellas. Pero si nomás una persona le foi pensar-ne u investigar-ne u si consigo que beluna no deixe o suyo tractamiento medico por a homeopatía, habré conseguiu prou.

¿D'a on surte a homeopatía?

A homeopatía no ye garra disciplina milenaria traita d'a China, ni se basa en a naturaleza u plantas naturals. No ye medicina natural como muitas creyen.

A homeopatía ye un invento d'o medico Samuel Hahnemann (1755-1843), en un tiempo a on que a medicina scientifica yera quasi inexistent. A on que a la chent se le curaba, d'entre atrás trazas, a pur de sangrías. Por una experiencia personal, Hahnemann prencipió a desembolicar lo que hue clamamos homeopatía basada en o principio de similia similibus curantur (lo parellano cura lo parellano). Iste prencipio sostiene que “lo que puet creyar un conchunto de sintomas en una persona sana puet curar a una malauda que tienga ixe mesmo conchunto de sintomas”. Por iste mesmo prencipio si tiens suenio, lo que has de fer ye prener un somnifero ta remanir dispierto (amiga nº 3) u dar-le biera a una persona ta que se le pase a zorrera. De tot contra o sentiu común y tot lo que a humanidat conoix sobre a sciencia, no?

A homeopatía tien antimás un atro principio alazetal. Ixe prencipio diz que contra más diluyida siga una sustancia más potent ye o suyo efecto. En l'eixemplo d'o café, aplicando nomás iste prencipio tendríanos a l'amiga nº 2 que nos da café diluyiu porque a cafeína tendrá más efecto si ye diluyida (como todas hemos comprobau en a vida cutiana). Si aplicamos os dos prencipios -lo parellano cura lo parellano y contra más diluyida siga una sustancia más potent ye- tenemos, abradabra, "medicina" homeopatica (“amiga” nº 4).

¿Como se fa un “medicamento” homeopatico?

Seguindo con o razonamiento que hemos feito antis y con l'eixemplo. Queremos fer una producto homeopatico que nos faiga dormir: un somnifero homeopatico. Con a lochica homeopatica preneremos cafeína y augua. Disolveremos una parti de cafeína en 10 d'augua y lo sobateremos. Agora cal pillar una chisla d'o liquido que resulta y disolver-la una atra vegada en 10 d'augua. Sobater. D'o liquido que resulta (se suposa que bi habrá 1 parti de cafeína por 100 d'augua) se prene una chisla y se disuelve en 10 d'augua. Y asinas todas as vegadas que queramos. Quantas más vegadas lo faigamos, más potent ye o “medicamento”. Podetz prebar-lo en casa. Talment prencipietz a tener suenio por lo aburriu pero qualsiquier que piense meyo segundo en iste proceso sabrá que, ya en o primer vaso, no ye bebendo que augua. No digamos en o trenteno vaso, que ye lo  que venden interpresas como Boiron.

Homeopatía 2.0 y a memoria de l'augua

O mundo ha cambiau muito dende o sieglo XVIII. Si Hahnemann estase naixiu d'o sieglo XX y hese estudiau medicina, a homeopatía prebablement nunca no hese existiu. Pero ya existiba y bi ha muita chent que viviba y vive d'ella. Como no tien garra alazet scientifico y a qualsiquier que se ature a pensar dos segundos le pareixen una fatera os principios filosoficos d'a homeopatía, habioron d'inventar un nuevo principio. Una nueva explicación a porqué a homeopatía se suposa que funciona en contra de tot lo que sabemos d'a sciencia y d'a naturaleza.

Ixe principio nuevo plegó d'a man de Masaru Emoto, naixiu en 1943 y graduau en Relacions internacionals por Yokohama y Doctor en “medicina alternativa” (siga lo que siga ixo) por a Univesidat internacional ubierta d'a India. Emoto sostiene que l'augua tien memoria, que remera as sustancias que bi ha habiu disueltas en ella y que ye sensible a las emocions humanas. ¿Base scientifica? A mesma que o tarot, os horoscopos u a culomancia.

¿En qué basa ixa teoría? Basicament o experimento consiste en pillar dos botellas d'augua. En una escribe parolas polidas como “paz” u “alegría”. En l'atra, de fieras, como “guerra” u “pena”. Dimpués chela augua d'as dos botellas y triga cristals (los que l'agana) d'as dos muestras. Diz Emoto que los cristals d'a primer botella son muito pinchos y los d'a segunda muito fieros. Aturatz un inte y pensatz-ne (tic tac, tic tac...). Cuento que tos habrán surtiu bellas preguntas como ¿qui diz si son polius u fieros? ¿como s'eslixen os cristals? ixa mesma augua habrá pasau antis por atros puestos ¿porqué no remera ixas emocions?... y asinas asinas. Tamién bi ha variants de l'experimento encara más marcianas como meter-le a una mosica de Mozart y a atra un charrazo de Hitler.

Prou que os experimentos que fa no tienen garra control scientifico ni han estau contrastaus por garra persona independient. Masaru Emoto, manimenos, ha conseguiu con istas “teorías” alazetar a homeopatía y antimás fer-se bien rico. Os suyos libros se venden como churros. De feito conoixié a iste hombre fa ya muitos tiempos en una caseta d'a feria d'o libro a on que una persona d'una asociación ecolochista me lo prebó de vender como bella cosa revolucionaria. Tamién cobra bien de diners, prou que sí, por as suyas charradas y mesmo vende augua “tractada” a o pre de 140 euros / litro (35 dolars más gastos d'invio por bell poco más de 200 ml). 

Dende fa tiempo, a teoría d'a memoria de l'augua s'ha barrachau con a homeopatía y muitas explican que a homeopatía funciona porque remera a sustancia que tenió disuelta. Encara que la remerase tampoco no funcionaría, pero bueno....

¿Porqué bi ha tanta chent que consume homeopatía?

A homeopatía se popularizó primerament, en un tiempo que a medicina scientifica quasi ni existiba. Os tractamientos que bi heba yera dolents y asoben yeran piors que a propia malotía. A homeopatía no feba empiorar a lo pacient. De feito no feba – ni fa – cosa. A lo menos lo pacient teneba l'asperanza de que a “medicina” no lo matase ni le fese mal. Y siempre bi heba, como bi'n ha hue, remisions espontaneas.

Hue a medicina scientifica, y a sciencia en cheneral, ye prou enantada. Sabemos muito millor como funciona a biolochía y a quimica. Sabemos como interactuan os compuestos y como i reacciona o cuerpo humano. De feito, si no lo sabesenos, no seríanos aquí agora. A medicina scientifica ha feito creixer a nuestra asperanza de vida y a calidat d'a mesma a rans que nian podeban preixinar en tiempos de Hahnemann. Pero muitas personas desconfitan d'a medicina scientifica.

No sé en atros puestos, pero en o mio entorno, que son qui leyen iste blog, cuento que ye por a masiau cutiana mala praxis de bellas medicas y farmaceuticas. Prou que se fan cosas mal, que recetan cosas que talment no nos calen, que as farmaceuticas se fan ricas con a dolor y a muerte de millons de personas arredol d'o mundo y mesmo talment siga verdat bella conspiranoia farmaceutica y disenyen virus ta dimpués vender as curas. Pfizer u Bayern son o diepl, d'alcuerdo. Pero que ixo no tien mica a viyer con que a homeopatía funcione u no, u con que l'ipuprofeno funcione u no.

A homeopatía ha conseguiu tener muitas seguidoras gracias, en a mia opinión a atros dos factors. Uno: que no tien efectos negativos. Ixo ye porque de feito, d'efectos no'n tien. Ni negativos ni positivos ni de garra mena. A segunda: una buenisma campanya de marketing y buenos contactos. Por as mesmas razons que se viedó en o suyo diya a Power Balance y s'obligó a qui la fabricaban a tornar os diners, s'habría de viedar a homeopatía. Pero a Power Balance yera una chiqueta gran interpresa y a homeopatía ye tot un negocio embrecau en os sistemas sanitarios de meyo mundo.

¿Qui fabrica homeopatía?

Ya viyetz que la podetz fer en casa vuestra. No ye guaire dificil. Pero bi ha una interpresa que fa buena parti d'as pindolas que podemos mercar en qualsiquier farmacia. Se diz Boiron y ye un “laboratorio” naixiu de Francia con siedes por tot lo mundo y que en 2011 tenió un esquilmen de 42 millons d'euros. ¡Vendendo pindolas de zucre!. Con ixas cifras no ye raro que ista anyada no le haiga importau pagar 12 millons de dolars en Estaus Unius ta aturar as denuncias por publicidat enganyosa.

Como qualsiquier transnacional cudia bien de que o suyo negocio s'esparda por tot. Dica no fa guaire te podebas conseguir un titol d'homeopatía en tres minutos en a web de Boiron. Como ixo yera una conya marinera lo sacaron d'a web. Por cierto fa bells pocos diyas facié ixe mesmo curso. Si lo hese feito fa dos anyadas agora sería titolau en homeopatía. Tamién s'adedica a financiar catedras de homeopatía en universidatz como a nuestra quiesta Universidat deZaragoza. No sé si beluna lo creyeba pero ya viyetz que Boiron no ye que una atra interpresa transnacional que, como atras farmaceuticas, paga ta amagar as denuncias contra ella, merca investigacions y da titols d'experto sin mica preparación a qui l'agana.

¿Porque a belunas “les funciona”?

Como todas as “terapias alternativas” a belunas “les funciona”. Ye igual como a chent que va ta la devinadera y “l'encierta tot” u “muitas cosas”. Ta tot isto bi ha explicación. A homeopatía funciona en a mesma mida que funciona l'efecto placebo. ¿Como sabemos isto? Porque a homeopatía y os placebos dan os mesmo resultaus en os experimentos de doble ciego. Como belunas no sabretz lo que ye ixo meteré un eixemplo: Tenemos tres collas de personas con una malotía. D'ixas tres collas a una le daremos un medicamento, a una atra un “medicamento” homeopatico y a una tercera le daremos augua decindo-les que ye o medicamento. Denguna d'as personas de denguna d'as tres collas sabe lo que le dan. Denguna d'as personas que dan os tres “medicamentos” saben lo que ye dando. Por ixo se diz de doble ciego, porque evitas que as personas que son en o experimento puedan influyir sobre o resultau d'o mesmo.

¿Qual ye o resultau? As personas d'a colla que l'han dau o medicamento real sanarán. Bellas personas, un chicot porcentache X, d'a colla tractada con homeopatía sanarán. Y bellas personas un chicot porcentache Y, d'a colla tractada con augua sanarán. Pues en totz os experimentos feitos X ye alto u baixo igual como Y. En beluns un poquet más altero, en belatros un poquet más baixo. Conclusión: Os efectos que tiene sobre as personas a “medicina” homeopatica son indistinguibles de los que tien un placebo. En reyalidat no. A homeopatía cuesta diners y os placebos no.

Remato lo post con dos videos que aspero que tos faigan goi y que son muito más amenos que iste catén de quatre pachinas (en OpenOffice) que m'he fotiu. Deixo bells vinclos que tos pueden fer goi y tamién con  dos zaguers qüestions:

1.- Si creyes en la homeopatía a yo rai. Ye a tuya vida y os tuyos diners. Igual como si te fas cristiano u vas t'o tarot todas as semanas. Pero, por favor, nunca no deixes de fer-te as medicinas reals por prener homeopatía. Prene-la tamién si quiers, no te ferá garra mal (ni garra bien), pero no deixes l'atra medicación.

2.- No pienso publicar GARRA anecdota de “a yo me funciona”. Os casos particlars le'n comentatz a qui l'intrese que yo ya me'n he leyiu milenta por tot lo rete. Si tenetz argumentos, los publicaré prou que sí, pero no experiencias personals, por conmovedoras que sigan

James Randi explica a homeopatia:

Programa Escepticos sobre a homeopatia:

Web sobre a homeopatía

Libro Círculo escéptico sobre a homeopatía

 

(1) Encara que, como se viye dimpués, caldría pillar una chisla d'o vaso y chitar-la en un atro vaso d'augua, y continar fendo ixo muitas vegadas ta que o remedio homeopatico funcionase de tot. Lo foi servir como eixemplo d'os principios d'a homeopatía.

Mas escepticos

Talment ye una percepcion personal, u talment no, pero lo caso ye que cada vegada me sorprendo de mas chent que creye en curacions alternativas, horoscopos, dioses y atras fateras. No contrimostrables por definición, prou que sí. Talment a sciencia ye pasando por un inte de poco prestichio. Talment en tiempos tan furos a la chent le cal aconortar-se con un universo esmaixinau de pantasmas, enerchías indetectables y sers sobrenaturals. U talment o sistema educativo fracasa de tot a la hora de explicar o qué ye a sciencia y o metodo scientifico.


Con tot y con ixo, ta toda acción bi ha una reacción. Y, afortunadament, ETB ha continau financiando Escépticos, una serie de reportaches que denuncian a pseudo-sciencia. U a lo menos dan una anviesta scientifica sobre bellas cosas que no'n son.


O primer capitol estió adedicau a la plegada en a Luna de l'Apolo XI y as teorías d'a conspiración. O segundo charra sobre medicinas alternativas, fueras d'a homeopatía que le dedicarán un capitol propio. Muito gran. Que pena que no dure que 40 minutos y no haigan puesto dentrar más a fundo en bells temas...

Aquí lo tenetz, fresquet, ta que tos lo veigatz. Especialment adedicau a todas as hippies que tiengo arredol: