miércoles, 13 de julio de 2011

Rudi nos torna t'a reyalidat

Ya lo venibanos mascando dende as eleccions d'o 22 de mayo, pero agora ya ye anunciau y me pienso que, en tornar d'o verano, será un feito. A lei de luengas ye muerta. U se derogará u se cambiará ta que no faiga honra. Mesmo menos que no'n fa agora.

Analisi politico cuento que no cal. O espanyolamen chungo ha pactau con a interpresa de servicios politicos y como no quieren nian charrar de qualcosa que no sía l'espanyol y o fragatí, nos deixan más difuera d'a reyalidat. No nos reconoixen como personas con os mesmos dreitos que a resta d'habitadors d'o país. Si con ista lei de luengas no los tenebanos guaranciaus de tot, agora tornamos a estar “outlaws”.

¿Y qué feremos agora en Fablilandia? Bi ha habiu esferents camins dende que se dició que se fería una lei de luengas y que d'astí en surtiría una academia. Un que esfendeba que caleba continar treballando independientement de lo que fese a D.Ch.A pos no caleba asperar-ne cosa y ixe treballo nunca no sería por demás. Ye la que he esfendiu yo y me pienso que lo tiempo y os feitos me dan a razón. Atra que deciba de asperar a que a D.Ch.A. fese y desembolicase a lei y que toda a resta de cosas no valeban. Agora que ixo no pasará, a lo menos en quatre anyadas no sé o qué ferán.

Ya no tenemos a lo gubierno treballando por nusatras. Agora tot pende de nusatras mesmas. Tot lo que se faiga por l'aragonés pendera de lo que queramos y podamos fer as personas que charramos y esfendemos ista luenga.

¿Y d'a normativización qué? L'academia triada fa pocos meses nunca no será nombrada por o gubierno y, prou que nunca no podrá fer un standard oficial (con o sentiu de institucional). Asinas que tornamos a la situación d'antis. Continamos sin tener una autoridat reconoixida por todas as asociacions y fablants. Contino pensando que l'Academia de l'aragonés (EFA) tien prou representatividat, autoridat por a traza de naixer y refirme social como ta fer ixe rol d'autoridat. En tot caso ye una autoridat que no puet exercer o CFA, Nogara, Fablans u qualsiquier atra asociación. Asinas que, qui asperaba a lo gubierno, ¿qué ferá?. ¿Qué feremos totz? ¿Fer un atro congreso ta que, sino sale lo que me mola y soi o president boicotear-lo? ¿Charrar o mio modelo d'aragonés con os mios amigos y dedicar toda a rasmia mía a criticar a l'atro?

Quatre y concaradas, iste ye o nuestro país y ista ye a nuestra luenga. Torno a decir lo que siempre he dito y sisquiá m'entiboque. A l'aragonés no lo salvará garra gubierno (mientres continemos estando una autonomía espanyola, ye de dar), u a lo menos, no cal asperar que lo faiga. A l'aragonés lo salvaremos u lo feremos morir qui lo charramos.

3 comentarios:

Anónimo dijo...

soi d'acuerdo con tu... uno de os grands pecaus de o movimiento de l'aragonés en os zaguers anyos ha estau precisament dar credibilidat a os cantos de sirena de o PSOE. Y astí han reblau tanto lo CFA como lo EFA. Tornaremos ta las eternas discusions sobre grafías, modelos de normativización, etc. etc. Pero lo futuro de l'aragonés lo decidiremos os suyos charradors, os patrimonials y os "neos". Entre que bi haiga chent que escriba, charre, piense, sienta, amuestre y se comunique en aragonés, a iste muerto encara le'n queda muito por vivir...

Anónimo dijo...

S'ha perdiu muito tiempo. En custions de semanas se pueden fer asabelo cosas,mesmo se puede prebar de fer una rebolución (¿15M?) y aqui pasaban os meses y meses sin fer cosa, mesmo pasaban os años, ¡¡os quinquenios!!.....y no veyébanos que yera un tiempo valiosismo, que cada segundo valeba su peso en oro.

¿Cuantas cosas se podeban haber feito en 7 meses dende chinero de 2011? ¿Cuantas cosas s'han feito? Puestar que nomas o vuestro libro.

Ya ye masiau tarde, lo menos ta la cheneración de chen que hemos perdiu miles d'horas d'a nuestra vida en esta luenga.

¿Altra vegada prencipiar de cero? ¿Altra vegada a convocar reunions? ¿Altra vegada a comprobar que se cumplen os alcuerdos? ¿Altra vegada a vier potencialidaz en un movimiento "emerchen"? ¿Altra vegada arroclando chen y veyer que AGORA sSI imos toz chuntos?

¿Masiu tarde ta tornar a escomenzar?

Anónimo dijo...

L'E.F.A. agora le fa fiestetas a l'S.L.A.
Pero que tampó no debemos tener miedo, por que o miembro d'o PAR en o CSLA votó con os miembros d'E.F.A.