Per a Val de Chistau

Iste puent d'aviento teniemos a suerte de pillar quatre diyas de vacanzas y decidiemos d'aproveitar-los puyando ta Sobrarbe, que feba bien d'anyos que no bi ibanos. En ir radius de perras, como de cutio, pillemos tres nueitz en un albergue de Saravillo, Borda Miguela, y a zaguer nueit en Plan en Casa Rafaleta, que yera un present d'Arale. Asinas que, como buen blogger, soi un canso y un egolatra, asinas que contaré bellas impresions que me'n levé d'as cursas que faciemos y os puestos que visitemos.

O primer diya nos faciemos una curseta por Anyisclo. De nieu no bi'n heba guaire, asinas que se podeba peteniar bien de rato. En deixar l'auto se viyeban bellas construccions humanas: un puent bien pincho sobre o río Aso, y una ermita dedicada a Sant Urbez que me fació a-saber-lo goyo. Ye d'ixas que aproveitan as formas d'as paretz de roca ta escusar-se costruyir-ne. Y en un foradet bi heba una imachen d'o santo. Seguntes un panel i fan tres romerías a l'anyo.

Ya dentrando en a val, o paisache yera poliu de tot, encara que os arbols heban perdiu quasi totz as fuellas. O camin va bien de rato a o canto d'o río, podendo viyer os churros que fa. De badinas bi'n heba un trapacil, pero ta qui siga pensando en ir-ie de verano, ye viedau banyar-se-ie. L'augua yera clara de tot, viyendo-se-ie mesmo lo zaguer zaborro. Iba con a deleria de poder guipar bell guardafuents, pero estió imposible. Sí que viyemos prous cardoneras, belunas bien grans, y que en un troz feban combinación con as buixarderas, fendo unas imachens repolidas. De muixonetz y tal, nos habiemos d'aguardar dica lo zaguer diya ta viyer bella cosa intresant.

A cursa por Anyisclo ye de muit buen fer y te i puetz foter tot lo tiempo que quieras. Nusatras nos i estiemos seis horas y meya, pero si se i plega más luego, u si escureix más tardi, da ta estar-se-ie todas las horas de sol que podatz. De costeras tampoco no bi'n ha guaires. A unica bell poco punyetera yera antis de plegar en a Selva Plana, a on que rematemos o nuestro camín, porque se nos feba tarde. Dimpués, nos dició lo guarda que bi heba bells 25 minutos de camín plano ta plegar en a Ripareta. T'atra vegada madrugaremos más a viyer si bi plegamos.

A l'atro'l diya, marchemos t'a Val de Pineta con uns amigos ta mirar de plegar en as planas de Lalarri. Bi estiemos en un viache organizau por Nogara, en fa ya diez anyos alto u baixo. Bielsa no lo remeraba tant turistico y, encara que asperaba de sentir bell poquet de belsetán, quasi tot lo que se i sentiba yera francés. En o viache que i estiemos con Nogara no heba nevau tanto y se podeba fer o camín más pincho. Con tot y con ixo, nos faciemos una gambadeta repolida, con poca costera, que la puede fer qualsiquier. En plegar en Lalarri, mereixe la pena d'amanar-se t'os churros que bi ha a lo fundo. Ye un camín no guaire largo y o paisache ye repoliu. Como anecdota, bella buena persona replegó as mias lunetas, que me heba deixau a on que aturemos a fer un bocau y me las deixó en un camal d'una mata en o camín de tornada t'o parking. Si me yes leyendo: muitas gracias, moceta!

O zaguer diya ya yeranos prou cansos y no querebanos que fer una visita t'os lugars d'a redolada. En beluns nunca no i yera estau, como ye o canso de Chistén. Ye un lugar que, de bonico, bi'n ha que'n son más, pero ¡qué bien i charran!. De totz os lugars que soi estau d'o Pirineu, nomás en Fonz y Echo heba sentiu charrar aragonés a tanta chent. Crebando antimás os mitos de que s'amaguen, nos fotiemos bien de rato en un bar sentindo a un par de hombres de bells 40-50 anyos charrín charrán y yo regalando-me en sentir-los.

En Chistén tamién ye una repolida vista d'a redolada, dende o alufrador de Puyadase, a on que, antimás d'una anvista buenisma, bi ha una caseta y mesas ta fer-te un almuerzo, chenta u brenda. O camín ye curto y bien facil y surte dende o mesmo lugar de Chistén.

A nueit la faciemos en Plan, en Casa Rafaleta. Entre que nos somos feitos a luxos, y que levabamos tres nueitz dormindo tot chelaus, l'hostal nos pareixió o mismismo Edén. Calient, con buen leito d'ixos tot duros, y una banyera d'hidromasache graniza. Ta remerar que somos pobres, a cena nos la faciemos en o bar d'a carretera pretando-nos-ie bell par d'entropans de bacon y queso, más fredos que a picha d'un "caminant blanco". Visitemos tamién por a redolada o "Puen pecadó", un puent sobre a Cinqueta dende a on que diz que aventaban a la chent que "pecaba". Astí mesmo teneban un panel interpretativo a on que bi heba una poesía de Nieus Luzía Dueso que charraba d'ixe puent, d'a Cinqueta y d'as telleras que bi ha por astí.

O maitín de tornada no ibanos a fer cosa en primeras, pero como que Arale no heba puesto viyer guaire muixons, a la fin decidiemos de fer una cursa rapideta ta Revilla y os suyos miradors. Ya por o camín, tenié a suerte de viyer un garabiu, ixe muixón amariello ye mal viyer y que, seguntes Vidaller tamién se le diz aiguadero amarillo, cagadaga, collerins, dorotín doroteo, engarabiu, maduraligo, martín durero, molinero, papafigo, picapuerco, taranlara, tirolero, tranlara, u uriol, entre atros. Tanto por o camín, como ya en os miradors, podiemos gronxiar-nos rato y rato viyendo cluixiuesos - un d'ells, un eixemplar choven - y vueitres a trompicuesco. Ixa parti ye tot un goyo t'os aficionaus a la ornitolochía.

De Sobrarbe, d'as Vals de Vió, Bielsa y Chistau, me levo bien buenas remeranzas. Tenemos un país bien pincho, con cantons que son alfayetas, plens d'historias, cultura y vida y pende de nusatros que ixo contine vivo y en buen estau. No podemos deixar que se malmeta, se muera u esdevienga un Marina d'Or con fresquet.