Guarda si mola Lorwyn!

Lorwyn me fa goyo. Ye berdat que no ye a colezión más "teunica" de Magic, ni cal saber guaire ta chugar con istas nuebas cartas, pero como yo soi asinas de raro, pos que me fa goyo. Talmén contine estando una mica nino en iste chuego... As mecanicas de meter arrienda bichos denzima d'a mesa siempre m'han cuacau. Nomás cal dezir que me he fotiu meyo año chugando con un mazo de fongos y saprolins en estandar y bloque. Asinas que ixo de chugar trasgos no ye raro ta yo. En o zaguer torneu d'estandar que bi abió en Freakland quedé en un más que bueno (ta yo) cuarteno puesto asinas que no fería tan mal o mazo (encara que os pairings tamién fazión o suyo).

Debán de todas as creticas que ista colezión ye sufrindo de man d'os más saputos y biellos chugadors me he tornau en un firme esfensor de Lorwyn, más que más, dimpués de beyer Time Spiral que no me fazió guaire goyo. Y, antiparti, han quitau asabelas cartas buenas por un pre razonable. Fueras d'os peteniadors de planos, o mainate d'os "kinkis" y belatra carta más, a resta son prou baratas y pueden fer onra en muitos mazos, asinas que conto que ista será una d'as colezions que más cartas en merque. A unica pega que le beigo ye lo difizil que ye fer-te un mazo sin estar tribal, pero en a resta de puendas d'estandar, tamién s'han chugau güeito u diez mazos nomás y dengún ha dito cosa.

En zagueras, plego de leyer en Rebellion que istos de Wizards ferán ta nadals (boques!) un pac de elfos y trasgos con dos mazos precostruyius bien pinchos. Podez leyer a notizia punchando aqui. Asperemos que plegue belún t'Aragón porque pende en o pre ye más que prebable que'n merque uno.

PTQ, que poliu nombre tiens!

Yera Sabado, 18 de Chulio y, dimpués de aber cambiau de punta ta coda lo mazo que eba feito serbir o diya d’antis en o torneu de bloque, m’endrezaba ta Freakland a chugar o PTQ de Zaragoza ta Balenzia. Como por un regular, no teneba guaire asperanzas de fer cosa. O diya d’antis eba estau penible y. encara que m’eban dixau un par d’Innos de Gaia y una Fuerza Espectral continaba con a mía basemia de chugar un mazo de saprolins y fungos. Ai, mama, que redotas más granizas! A la fin fazié un 1-5 y me quedé alto u baxo lo 40 de bels 42 que rematemos (Ebanos prenzipiau 57). Bueno, como yo a isto de Magic chugo por fer un buen rato y porque no tiengo con qui chugar difuera d’os torneus de Freakland, a yo rai os puntos, a clasificazión y tot ixo…

A esperienzia d’o PTQ, con tot y con ixo, estió bien majiza. Estando de bloque, a lo menos no eba de preguntar terne que terne ixo de “sincusa, isto que coño fa?”. Como lo mazo de saprolins de dibertiu de chugar encara que pierdas, tampoco no m’aburrié. Antiparti de que no bi eba a posibilidat de que se chugase zetro-canto que ye o mazo más odiable d’o mundo.

Remeraré ta cutio d’ixe cabo de semana bellas chicorronas aneudotas. Beyer como me meto una “Boira paradoxal” (Paradox haxe) con un Potro controlau por o contrario (Viva y bravo!, que diz Monteys), o pleito de dos catalans por a interpretazión d’una carta (creigo que yera una Rayanube ala agrietada), un mazo de slivers (encara no’n eba bistos), no fer serbir una fuerza numerica que me daba partida por medrana a o counter y parar cuenta dimpués d’a fase d’enriste que l’atro no teneba cartas en a man ¡y chugaba monored! y asinas asinas…Con tot isto que rezento, ya pararez cuenta d’o malo que soi en isto de Magic. China chana iré amillorando. Aspero que, a lo menos, bel aragonés se clasificase ta lo PT de Balenzia…

Debantadera de Future Sight

O Domingo de maitins yera o diya: a debantadera de Future Sight, a colezión que remata con o bloque de Espiral d’o Tiempo. Como en as atrás dos colezions marché ta Freakland – cuasi a unica botiga que fa istas cosas en Zaragoza – asperando ubrir bel Akroma u, a lo menos, Engendros de Bogardan, Lajas de Trokair, Vengadora de Serra… Bella coseta que poder cambiar y/u chugar.

As nobedaz en a organizazión me fazión asabelo goyo. Una redometa d’augua ta cada chugador, una carta foil aleatoria ta cadagún y l’aire acondizionau. Antimás no se fazió a fatera de cambiar de mazo y asinas rematemos antis y no nos lebemos o tipico chasco de ubrir cosas buenas y aber-las de pasar. D’o mazo poco bueno en surtió: una Noble fada que nian sabeba que esistiba pero que me fazió buena onra y un Yacimiento de Gemas (prebablemen a millor carta que i pillé). Bella común que m’intresaba y poco más.

En os sobres (tres, de Future Sight) se repitió un diaplerón 2/2 que buela y teneba prisa. L’incombenien, un eco de descartar-se una que tampoco no empreñaba masiau. Tamién i pillé tres bichos (berde, azul y negro) que fan que as tuyas cartas sigan trasgos purulentos, elfos de llanowar u 1/1 boladors. Istas cuatro, chugando con más cartas con demenzia son prou periglosas (si en ese teniu...)

O mazo lo fazié pensando en meter-ie criaturas chicorronas con buelo u desbanezer-se prebando de tener un mazo agresibo. A estratechia, por os resultaus estió entibocada. En que quillaban un pin denzima d’a mesa os míos cucos pretaban a correr u s’esmortezeban por as purnas d’a nueba tierra roya que fote tiros. A millor carta, amás d’o Yacimiento de gemas que me permitió chugar as tres colors en cualques partidas, os diaplez que, de conchunta con o Magofuerza primordial feban asabelo mal. Atrás buenas que chugué o brutal Saqueador il-Kor y a dríada del bosque gusano y o Kraken d’o mar profundo que, si conseguiba pisar a mesa estricallaba a l’oponen en dos enrestidas. A pior, Presagio de Llanowar, que dende a terzer ronda banquileé en que podeba.

Remató o diya con un 2-3, seis puntez, un seizeno puesto (de bentitres que rematemos) y un sobre de Future Sight que me tocó en o sorteu.
Tos dixo con o listau d’o mazo por si querez fer bella soxerenzia u simplamen redir-tos-ne:
1 Draco joven colapúa
1 Sabio de epityr
1 Rayanube ala agrietada
1 Errante il-dal
1 Magofuerza primordial
1 lente prismático
3 diablillo de caverna profunda
2 presagio de llanowar
1 buscar el mañana
1 siembranubes
1 espada de los mansos
1 noble hada
1 exhumador de la cordillera skirk
2 presagio de craneos
1 llamar al submundo
1 driada del bosque gusano
1 mentor de llanowar
1 funerario
1 saqueador il-kor
1 presagio aven
1 blindaje petrificado
1 kraken del mar profundo
1 yacimiento de gemas
4 pantano
4 bosque
5 isla

Primers cartas de Future Sight (II)

Contino con os comentarios sobre as cartas, encara que a la belozidat que aparixen nuebas notizias, isto se queda biello en un par d'oras.

- Korlash, Heir to Blackcblade: Atra d'as millors cartas que i aparixerán. En monoblack ya ye colluta, pero con Urborg, tierra aparexida en Caos Planar ya se puede fer serbir en mazos multicolors. Antimás se rechenera y, en estar un zombie tien puesto en mazos tribals (encara que nunca no he bisto garra mazo de zombies. As copias que no podamos fer serbir por tener-ne uno en chuego nos fan onra ta mirar un par de pantanos , si con tot ixto no en estase prou, la dan de baldes en as presentazions! TOTAL! (prenunziau en madaleniense).

- Tombstalker: Ta qui no faiga serbir o zimenterio ta cosa (lo que cada diya ye más raro, y más en os mazos negros) ye un 5/5 bolador por poquismo mana, más que más si emplega fetchs.

- Yixlid Jailer: Ta o banquillo ta poder estricallar os mazos que no fan que tornar-te cosas d'o zimenterio (como ixa Blink que me fazió a tana en o zaguer torneu).

- Arc Razor: En primeras parix prou feble, pero estoi que en una control royo-azul puede fer buena onra. Si a partida dura prou mata china-chana a l'atro chugador.

- Bogardan Lancer: En una Boros podría cullir-ie, encara que me pienso que bi ha millors bichos por ixe pre.

- Homig Sliver: En os mazos de Sliver beyerá chuego de seguras. Puez mirar os millors Slivers contra cada estratechia.

- Llanowar Mentor: Fa que todas as tuyas cartas sigan elfos de llanowar potenzials. Nunca no te quedarás sin mana u bichos 1/1 u elfos (en mazos tribals). Ta yo, una d'as millors infrecuens. Y ta qui en tienga, podrá fer serbir os suyos tokens d'os miticos elfos de llanowar.

- Magus of the Vineyard: Minicombo de seguras y, si l'atro chugador no puede fer cosa con o mana, le ferá un cremau de dos toz os turnos...

- Nacatl War Band: Buenisma per sé si no estase tan cara. Contra os mazos que plenan a mesa de bichos chicorrons muito millor y ta qui yeranos chugando mazos de saprolins (qué pasa?, cadagún pierde como quiere, no?) seremos tremolando cuan nos lo chuguen.

- Tarmogoyf: Con todas as cartas que salen en ista colezión que tienen dos tipos (tierra -criatura y atras cosas más marzianas) iste bicho se puede fer un 3/4 u un 4/5 en o turno dos u tres.

- Virulent Sliver: Con ista m'he feito buena rialleta remerando os mazos de bereno que me feba de chicorrón. Beyerá chuego? Ganará a la fin bel mazo de berenosos bichos?

- Veilstone amulet: Buena traza de continar tenendo toz os tuyos bichos en chuego.

- Tolaria West: Con ista tiengo a duda de si te puez mirar unatra tierra. Si ye asinas, ya podremos completar l'Urzatron, mirar a tierra d'a color que nos manca u ixa que te fa o combo (a Urborg ta Kolash, por exemplo...)

- Nimbus Maze: Una doble que nomás nos fa onra ta bosar os costes dobles. Chugada con dobles ye unatra doble. Intresán y, de seguras, carisma.

Con isto ya he rematau de comentar o primer spoiler parzial, encara que en MagicMadrid ya han publicau o segundo spoiler parzial con atras 75 cartas. Parix que a nueba colezión trayerá muitas nobedaz ta o bloque y o chuego, en cheneral ubrindo-se a nuebas estratechias. Jolio, que bloque, s'han fotiu los de Wizards! Ta tornarnos barrenaus! Nos beyemos en as presentazions, que se suposa que bi abrá en Freakland.

Primers cartas de Future Sight (I)

Ya son salindo as primers notizias sobre as nuebas cartas de Future Sight ("Güellada t'o Futuro"), a colezión que tranca o bloque d'Espiral d'o Tiempo. A cartas aibadas en o tiempo tienen un formato de raso nuebo crebando con toda a tradizión de Magic encara que os creyatibos an dito que ixe no será o "look" futuro d'as cartas. Estoi que ye lo que se gosa dezir un globo sonda, ta beyer como reazionamos a chen. Particularmen o nuebo modelo de carta no me fa mica goyo. Por una bez soi d'alcuerdo con os "puretas". O caso ye que en Rebellion y en MagicMadrid ya bi ha listaus parzials, mesmo con os debuxos d'as nuebas cartas y querría comentar-ne belunas. No he seguiu garra criterio. Simplamen he trigau as que m'aganau y sobre as que podeba dezir bella cosa. As cartas las tenez en as pachinas debanditas.

- Blade of the sixth pride: Igual como en Espiral d'o tiempo fazión una fetch ta pobres (espansión terramorfica) agora preban de tresminar-nos iste Lion d'a sabana ta pobres. Ye comuna y fote tres daños en o terzer turno asinas que, a lo menos, caldrá prebar-la.

- Seth's Tiger: Bella mena de counter blanco que, antimás dixa un bicho en a mesa. Ta yo, una d'as millors d'a colezión. Estricalla de raso cuasi toz os rematadors.

- Ramosian Reanimator: Con ista ya se puede fer o mazo de rebeldes que s'alufraba dende a rechiradera de rebeldes que salió en Espiral d'o Tiempo. Con tot y con ixo tampoco no creigo que se chuguen guaire ista mena de mazos.

- Delay: Simplamen m'ha parexiu dibertida. Estoi que no beyerá guaire mesa abendo-ie Fugas de Mana que cuasi siempre fan o mesmo. A unica utilidat que le trobo ye contra mazos Tron que tiengan prou mana ta que as fugas no les faigan cosa.

- Foresee: A yo me parixe sobrebuena. Amillora a cantidat y a calidat d'as cartas. Y no ye masiau caro de chugar. Caldrá beyer-lo en aizión.

- Spellweaver Volute: En un mazo de purnas ye cuasi un cetro isocrono. Puestar (ye muito prebable de feito) que m'entiboque, pero de seguras que baldrá firmes diners.

- Spin into Myth: En reyalidat ye un antibichos azul, que ixo ya ye prou. Dende a mia ambiesta masiau caro de chugar, pero dimpués de beyer o pre d'o Psionic Blast, cualsiquier cosa.

- Bitter ordeal: Ye clamando a o combo. Encara que no se pillase a "tronada" ya estricalla de raso mazos como Cetro-Canto y atros de combo u mesmo control.

Y ya no me baga de fer más güe. Continaré cuan pueda y tos dixo a imachen d'o token de l'elfo de Llanowar. Sí, ez leyiu bien. Bi abrá tokens d'os elfos porque bi ha unatro elfo que'n fa copias.

Primers notizias de Future Sight

Encara mancan dos meses ta las presentazions de Future Sight (a terzer colezión d'o bloque d'Espiral d'o tiempo) y prenzipian a saber-se bellas cosetas. Por agora son custions mas que mas esteticas como o logo, os debuxos d'os sobres y caxas y asinas-asinas. Si en Espiral d'o tiempo se charraba d'o pasau de Magic y se reeditaban cartas biellas y en Caos Planar d'o presen y se editan cartas clasicas d'un color en atro, en Future Sight ("Güellada t'o futuro") as cartas "aibadas" serán cartas que dimpués se publicarán en atras edizions d'o chuego. En ista ocasión no creigo que creye tantismo intrés como as atras. Toz querebanos saber que cartas se reeditarían u que colors podrían cambiar d'estratechias, pero agora todas as cartas serán nuebas de raso. Simplemen belunas se tornarán a editar más entaban.
Tornan a aparixer-ie belunas d'as carauteristicas d'o bloque como as mecanicas de "penchar" u "troz de segundo" y prou que os "slivers" (istos no goso traduzir-los porque no sé ni lo que ye en inglés). Aspero que tamién continen salindo-ie os fongos que tantismo goyo me fan.
Si querez saber-ne más tenez as zaguers informazions y rumors en: www.rebellion.es/magicrebel y www.magicmadrid.es.
Freakland ye esbiellando a suya pachina web, asinas que conto que en bels diyas tamién podremos trobar-ie informazión. Por agora, en o suyo foro(www.freaklandgames.com) , i han penchau os torneus de Marzo.

Más notizias de Magic

No aturan as notizias sobre Magic. O Spoiler de Caos Planar ya ye cuasi completo. En iste inte se'n conoxen 116 d'as 165 cartas d'a nueba colezión (www.rebellion.org/magicrebel). A la fin Ocio Joven de Zaragoza ferá a presentazión o Sabado 20. Promete muito, pos as cartas que he conoxiu dica agora pueden reboluzionar o chuego. Como diz o cartel d'as presentazions: "Y si una presentazión podese cambiar-lo tot?" ("Et si une avant premiere pouvait tout changer?") (www.magicmadrid.es/blog/?p=167). Aquí a o canto podez beyer o nuebo Akroma que no ye que un exemplo d'a filosofía de Caos Planar: cartas biellas u clasicas cambiadas de color (un giant growth royo, una ira de dios negra, akroma royo, un fungus blanco y asinas asinas...)

Freakland, que en primeras no ferá presentazión, a lo menos en Chinero, ha conseguiu organizar un PTQ ta l'onze de Febrero. O formato será Extended (por desgrazia ta yo, que nunca no i he chugau) y ya son parando una minipaxina web sobre o PTQ. Qué mes! Astí nos beyeremos....

Caos Planar: a nueba colezión de Magic

Ya ye plegando... Ya cuasi ye aquí a nueba colezión de Magic, Planar Chaos (segunda d’o bloque "Espiral d’o tiempo"). Os foros ya son a rebutir de rumors y ya se conoxen bellas cartas que i aparixeran (como una bersión negra d’a "Ira de Dios"). En Zaragoza encara no sé si bi abrá presentazión. Seguntes a paxina de WotC (www.wizards.com) bi abrá una en OcioJoven (www.tiendaociojoven.com/zaragoza) o diya 20 (encara que no sé como i cullirá a chen) y se diz que bi’n abra unatra en Freakland (www.freaklandgames.com) o diya 28. Asperamos que a colezión siga tan buena como en parixe y que se faigan as dos presentazions (u más). Tan y mientres podez mirar-tos os spoilers parzials en www.magicmadrid.es u en www.rebellion.es/magicrebel.