sábado, 30 de enero de 2010

Fito & the monyas

En tasament dos diyas bi ha habiu dos fitas mosicals en Zaragoza bien diferents. A primer, o chueves de nueis, o concierto de La cabra mecánica y Fito & Fittipaldis y a segunda o Roscón Rock. D'as dos cal charrar-ne bella mica y as dos compartioron o parte “territorial” de TVE-Aragón. Dos companyeras y conoixidas de muitas que leyetz iste blog i aparixen en o video penchau abaixo. O primer en o minuto 13:45 charrando sobre o Roscón Rock y a segunda en o minuto 23 sobre o concierto de Fito.

No soi d'alcuerdo con que, como diz ixa personeta en o video, Fito faiga pop, encara que o rock que fa ye cada vegada más floixet. Ya decepciona prou o disco nuevo, que ye l'anterior con o debuixo d'a portalada cambiau, pero asperaba un concierto más canyero y no una sucesión de monyadas. La cabra mecánica transmitió muito más en a cacana horeta que podión tañer que Fito en a suya siesta-concierto de 2 horas y meya. Nomás Deltoya podió despertar-me, ta que a escape, se me tornasen a cayer os parpiellos con a siguient.

O rock ye muito más que no a mosica. Ye una traza de sentir y vivir a mosica y, dende ixa ambiesta, a mozeta d'a TV tien muita razón. Lo de Fito ya no ye rock. Y d'o publico, millor no decir-ne guaire. En que remató La cabra mecanica, disaparixió toda a marihuana que se yera fumando y amanixioron como camparols os iPhones ta grabar Soldadito marinero y penchar-lo en Youtube a l'atro'l diya. Qué chent, mañas!

Manimenos, en o roscón rock sí que bi eba rock. Zagalas y zagals que s'organizoron fa ya bellas anyadas ta reivindicar os puestos an que fer conciertos en ista inmortal ciudat. Zaragoza tien grands mosicas y mosicos a tamás d'a suya politica cultural, muitas vegadas inexistent. Fer una gambada ayere por o Paseyo Independencia u por as plazas yera un goi. En cada cantón te trobabas un estilo mosical diferent, una colla de chent que, a lo menos por agora, vive a mosica con deleria y transmite ixa rasmia. Chent que se mereix os 25 euros d'a dentrada de Fito muito más que no él.

Noticias Aragón (29/01/10)


1 comentario:

bercimuelles dijo...

An ye a sangre de Frito? Horchateroooooo

Entalto Platero!
Entalto Lichis!

DICA O CHUEBES LARDERO.

PD: I ♥ TAMARA!