Cristal #Inktober 01

Se miraba con anglucia, a traviés d’o cristal d’o supermercau mas gran de L’Almunia, la sección laminera d’o furno. I teneban buen amiro de bollos de toda mena. Bi heba d’ixos roldes, bien cargaus de zucre, con una napa de coloricos por alto. Tamién napolitanas, que rebutiban un chicolate negrismo por lo suyo centro. Caragolas d’ixas con pansas y almendras, que tamién levaba alma. Y envasaus en bolsetas individuals de plastico, un festival de dulzor que feba que la suya saliva sobrecese la boca.

Los ninos iban tapando-le la envista de cabo ta quan. I pasaban, sinyalando a l’adulto que les acompanyase qual yera la suya triga. Pai, mai u qui fuese agafaba un esguant y bi ficaba la man. Bella vegada, esfendo-lo. Belatra ni se lo meteban. D’astí viachaba t’o carro, rebutient d’atras birollas que tamién s’hese pretau. Mesmo bi heba ninos que nian aprecisaban de l’aduya d’os mayors. Se serviban ells mesmos lo que les aganase y lo portiaban dica la caixa estratechicament situada bien cerqueta pa satisfer los concietos d’a catrinalla.

Sintió ruchir la fonsera. Viyer tanta birolla rebutindo por los carros siempre le dispertaba la gana. Dende que heba empecipiau la nueva crisi tasament teneban pa minchar. Los platos que le meteban en casa yera mas chiquetz por cada día, y mas espaciaus en lo tiempo. De lamins, feba meses que no en tastaba. La pasa les heba teniu encadaus quantas semanas. Sin clases, lo bocau que de cabo ta quan le ufriban los suyos companyers de clase, heba dispareixeu. En tornar ta escuela, con l’espanto que totz teneban, dengún no quereba ya compartir minchanga. Lo teneban vedau de tot.

Su mai ya yera en la ringlera d’as caixas. Le saludó con la man y un riso, empentando lo carro china-chana, siempre mantenendo la distancia con la sinyora de debant. Vido a lo nino y siguió la suya uellada. Lo pobrón tornaba a mirar-se con langaria la sección de laminerías d’o furno. Un bollo d’ixos chicotz no valeba guaires perras. S’acercó. N’agafó un de color rosa, con un arco de Sant Chuan de cagadicas (1) deixaus a la bimbola por dencima. Le’n amostró a lo suyo fillo, que fació uellos. Quasi podeba sentir como s’heban agrandiu las suyas ninetas en veyer-la deixar-lo sobre la dotzena de uegos, en la cinta que iba guiando la birolla ent’o lector de codigos. D’o bolso, en sacó la tarcheta que le heban dau en los servicios socials d’o barrio, asperando que fuese la zaguer vegada que le caleba recurrir-ie. Ixe mesmo maitín heba feito una entrevista de treballo que heba saliu prou bien. Talment a l’atra semana tornase a entrar chanfles en casa.

Dezaga d’ella, masa cerca pa la distancia de seguridat que marcaban las nuevas normas sanitarias, sintió la voz d’una muller. No charraba a escuchetes, no yera un simple pensamiento que se le hese eslampau d’o tozuel t’a boca involuntariament. Quereba que la ascuitasen.

- Les dan la tarchetica y lo malfurrian en laminerías. Los diners d’o espanyols pa que se merquen bollos. ¡A yo no m’aduya dengún!

Fació como que no la sentiba, que lo mitin que yera pronunciando aquella sinyora no iba con ella. Difuera, lo nino seguiba mirando-se-la fito-fito, aguardando poder sentir unatra vegada lo gusto d’ixa repostería que tantismo goyo le feba. Tenió por un momento la tentación de tornar lo bollo. Chiró lo tozuel enta dezaga, columbrando de vislai lo cenyo encarranyau d’a sinyora. Tornó a mirar-se ent’o suyo fillo, que no deixaba d’alufrar lo solo concieto que s’heba permtitiu en meses. Replegó lo bollo y la resta la birolla en la bolsa que heba traito de casa y ficó la tarcheta en la pocha. Ixe lamín, ixe chiquet concieto, de nomás bella decena de centimos, lo faría feliz y ixo yera, pensó, lo primer paso pa que nunca no esdevenise un saco de carranya como lo que encara ronyaba bell metro por dezaga.

(1) A falta d'una parola millor pa definir ixos cepilladizos de zucre de colors, u de chicolate, que se gosan meter dencima d'a-saber-los postres, foi servir ista, que se diz por Andorra. Si en sabetz garra atra, encantau de leyer las vuestras aportacions.