jueves, 24 de diciembre de 2015

Consellos y más ta una #cenafacha

En fa ya bell anyo que levo fendo servir o hashtag #cenafacha ta contar as mias penas en ixas lifaras nadalencas que nos imposa o calendario gregoriano. Dende que empecipié o fenomeno s’ha ixemenau y en istos diyas son muitas as personas que comparten ista opinión y iste sufrimiento. Talment ye o momento de fer-ne bella reflexión, memoria y, por qué no, consello.

Conste que quiero muito a la mia familia. Pero no comparto con ellas muitas cosas. A ideyolochía en ye una. En a familia-familia, soi a sola persona d’izquierdas. Si ubrimos una miqueta o rolde familiar, a la parentalla de segundo y tercer grau, no me quedo tant solenco, pero continamos estando una chiqueta minoría, cargada de pacencia. 

L’atra ye lo que dica no fa guaire pensaba que yera simpla prudencia. Con a intención de no provocar pleitinas esterils an que dengún no ferá venir a plego a l’atro, gosaba d’esquivar habilidosament os temas punchudos en a mesa. Bella vegada, fendo verdaders malabarismos dialecticos ta pasar d’o “tema catalán” a “o zaguer programa de José Mota” con tasament bella paroleta acompanyada d’un “quiers más torrón?” a o polemizador que pertocase. Manimenos, en l’atro canto, pareixeba que bi heba un encerrinamiento en amargar-me a nueit. M’he maravillau d’as pingoletas argumentals que ha feito bell familiar ta conseguir vinclar o vin de Carinyena que yeranos bebendo con “a dictadura chavista que nos deixa sin mercar papel de cul y compresas”. Yo le deciba prudencia, pero una amiga y aguda politica le clama lenguache d’o poder a ixa seguridat y bamba con que enristen contra yo, u contra las mias ideyas.

Estar solet ye duro. Si tiens en frent a la familia tuya pior. Por ixo, y no por ganas de fer-me-ne a mofla, que deciba belun, creyé o hashtag. Ta poder aconhortar-me con os followers y friends d’o rete. T’afogar ixas penas entre os bits y no rematar a pur de chilos u de faltadas que ye a soben lo que te demanda o cuerpo. Ixa ye a estratechia que decidié de fer servir dende fa bell anyo. Pero la barracho con atras d’antes y beluna nueva. Tos las describo.

A riseta somarda. A soben no quieren que endizcar-te ta que blinques. Mas que más con os temas que sabes que yes más sensible. En o caso mio, Catalunya. Deixa-les charrar entre que fas un cenyo como de “no te voi a responder. Soi por dencima d’ixo”. Si te’n preguntan, un “ye muito más embolicau que no ixo que dices, y creigo que no bi ha prou tiempo ta charra-lo”, te salvará de horas de retolica sin sentiu que rematarán con argumentos d’a mena “pero ye que isto ye Espanya” y cosas parellanas.

A pregunta inocent. Una d’as más divertidas. Has de fer como que no tiens ni ideya d’o tema que se’n ye charrando y fer-les cayer en as suyas propias contradiccións. Funciona millor, lochicament, si en realidat controlas o tema. Un d’os afers que foi servir isto ye con as lenguas. Cada vegada que sentencian “en Echo no s’entienden con Ansó porque ye de tot diferent lo que i charran”, les preguntas “ah sí? Tú que diferencias i trobas?” Lo mesmo vale ta totz os topicos. Preguntas como “pero exactament que ye lo que fació Monedero?” deixan a o contrario en evidencia, farfallando respuestas que no tien o cunyau promedio. Recuerda que un “por qué?” a soben ye a millor respuesta a qualsiquier argumento.

Fer esbarrar o tema: Tornan a dar ferrete con Venezuela? Aprofeita qualsiquier enchaquia ta cambiar de tema. Puetz inventar-te cosas si cal. “Pues en Caracas bi ha un observatorio astronomico, que son estudiando os obchectos transneptunianos.” En a familia mia, o tema de l'astronomía funciona de bitibomba, pero cuento que no ye lo cutiano, asinas que adapta-lo a lo que funcione en la tuya. O cunyau furo gosa de resistir-se, pero si sabes re-endrezar-lo bien de tal traza que se sienta igual d'important, tiens obchectos transneptunianos dica que salga o torrón.

L'enemigo común. Cuento que en todas as familias bi ha bell tema que une. ¡Qué tiempos quan o trasvase, que todas charrabanos d'o mal que nos deixaban en a tele y d'o carnuz de Cañete!. Regular que trobarás bella cosa que tiengatz un odio común: os pingüinos, Maná, Pablo Motos, o queso, …. quemisió! Si no ye asinas, regular que lo tendrás con parte d'a familia. En o caso mío, funciona muit bien a relichión ya que buena parte somos ateus y, como ye normal, deixamos a o cristianamen sin argumentos en un petén. L'odio une más que qualsiquier atra cosa. Aprofeita-te-ne!

O mal menor: Como o mal tertuliano, tiengo opinión quasi de tot. Fallo muito en economía y esportes porque son temas que, basicament, me la bufan. Pero encara que tienga opinión de quasi tot, siempre bi ha cosas que me “tocan” más y atrás que menos. Esfenderé a mia posición sobre os entibos u a lengua, con firme rasmia, pero si se charra, por eixemplo, d'o tramvia, pues ni tant mal. Prou que soi a favor d'o tramvía en Zaragoza y creigo que ha feito honra pa amillorar a vida en a ciudat, pero no voi a tricolotiar-me con a familia por una basemia de l'Heraldo. Si denguna d'as anteriors no t'ha funcionau, siempre puetz fer esbarrar o tema de conversa a uno que t'importe menos. M'estimo más de sentir fateras sobre bicis por as aceras u lo ciento d'averías que tienen os tramvías, a toda la reuca cutiana de micro y macromasclismos, por eixemplo.

Y tot isto no significa que no respete a la mia parentalla. Tot lo contrario. Si no los respetase los encorrería, les chilaría y los ninviaría a escaparrar. Manimenos m'aguanto lo que puedo, contraargumento quan no me'n queda atra y prebo de ufrir-les unatra anvista, que por un regular replegan con ixe cenyo de “ai que choven yes, que no sabes lo que dices”. 

A lo menos tiengo ixa atra familia, ta aconhortar-me y compartir istas penas. No debo d'estar tant solo, quan por tot, salen hashtag parellanos u bingos como iste que publicó eldiario.es y que me pasó la gran Lucía!


miércoles, 16 de diciembre de 2015

De viache por Cambrils y redolada

Dende chiquet, y como muitas atras familias zaragozanas, he teniu casa en Cambrils. Pa belun, isto me convertiría automaticament en catalanoparlant nativo, pero no ye o caso. O caso ye que, como muitas atras familias zaragozanas, febanos servir Cambrils nomás t’a placha, chiringuito y gambadeta. Conoixer a lengua, o pueblo, os habitants, os costumbres, a redolada,.... yera qualcosa que ni se nos pasaba por l’esmo.

Cosas d’a vida, en iste puent prencipiemos a mirar destino prou tarde y ya no quedaba cosa barata por os Pirineus occitanos que yera a primer ideya que tenebanos. A la fin ni por os occitanos ni por dengún. Decidiemos, allora, de marchar ta Cambrils que, lo menos, nos escusabanos os diners de l’aloix. No asperabanos trobar guaires cosas a fer por a redolada, pero a la fin, rematemos conoixendo puestos que nos percutioron a-saber-lo, sobre tot, por o feito d’estar tant cerca d’un puesto tant turistico como Cambrils, pero an que a mayoría d’a chent nunca no s’aluenya más de trescientos metros d’a linia de placha.

O primer diya lo pasemos en Tortosa. Una ciudat plena d’historia. De feito decidiemos d’ir-ie, porque saliba a soben en os libros d’historia que m’habié de leyer t’o mio prochecto de cabo de carrera. Un Ebro bien amplo y tranquilo la talla por a metat, trestallando a parte antiga d’o eixample. En a oficina de turismo, an que nos atendioron rebien, nos explicoron que en a ciudat, pa la Guerra Civil, les heban chitau 80.000 bombas. En Gernika en chitoron 50.000, pa que tos faigatz una ideya. Y ixo se notaba prou. Con tot y con ixo, tanto a ilesia como o castiello - fortificación son de muit buen viyer. Nomás por ixo ya mereixe la pena d’ir-ie. 

Pero talment lo que más goyo nos fació estió Os Chardins d’o Principe. En os terrenos d’un antigo balneario decidioron de fer un museu escultorico a l’aire libre. As esculturas de Santiago de Santiago preban de charrar sobre a historia d’a humanidat. Tanto as propias esculturas como l’entorno an que son, forman un conchunto digno de viyer. Y de fer-lo antimás a moniquet, pa poder parar cuenta d’os chiquetz detalles de cada pieza. Una choya.

A parte más natural d’o viache la prencipiemos por a Serra de Llabería. A tasament 15 minutos de Cambrils, nian podeba preixinar yo que bi hese mont. Mont d’o de fer cursas y tal. Mont, mont!. Pues be-te-me que sí que n’i hai. Y bien pincho. En a oficina de turismo de Pratdip tornemos a estar muit bien atendius. Amás d’indicar-nos as cursas que se podeban fer dende o lugar, nos charroron d’os “Dips”, uns cans-vampiros d’a mitolochía catalana. Por o lugar, tienen dips amagaus ta fer un chuego de trobar-los. Una traza de conoixer o lugar chugando bien divertida. Dende astí sale bella ruta de diferents dificultatz. La que faciemos yera prou simpla, pero una mica exichent en una parte con firme costera. A variedat de arbols y plantas, y o buen orache que nos acompanyó, fació una cursa bien agradable.

A l’atro diya, decidiemos de fer una chornada mixta lugars-naturaleza. De maitins, y traviesando una d’as boiras más pretas que nunca heba visto, visitemos Horta de Sant Joan. En l’ecomuseu, un hombre que quasi le costaba d’alentar y sin mica gana de atender-nos, nos vomecó un plano que no feba honra pa cosa. Quan le preguntemos por cursas, nos ninvió ta un aria de brenda y, viyendo que febanos estorbo, marchemos a fer una biera y a apanyar-nos a visita por a nuestra cuenta. Una faltada a la redolada de Els Ports, que ye repolida.

A la fin, decidiemos de peteniar bell poquet por Els Estrets. Yeranos una mica cansas y a cursa ye facil de tot. Ye tot plano, por o fundo d’una clamor, a bell metro por dencima d’os rios. Os ríus, con un augua transparent que reflexaba colors turquesas, fan un paisache de muit buen viyer. Encara que feba frescor, l’augua convidaba a una capuzadeta, asinas que de verano, ixo be d’estar un paradiso. Pa qui le faiga goyo a escalada, a redolada ye tamién buen pincha. I trobemos bells quantos equipos fendo-ne y en os lugars d’arredols bi heba quantas interpresas d’aventura. Tamién por Horta de Sant Joan pasa a via verda que va dende Alcanyiz t’o Mediterranio y yera tot plen de ciclista fendo-la.

O zaguer diya, Arale me convenció pa ir t’a parte viella de Cambrils. Tasament i yera iu bella vez de nino a viyer l’azoque que montaban de cabo ta quan, u ta mercar a bici que i teneba. Ye bien sinyaler d’a concepción que a familia mia, y cuento que muitas atras, tenemos de Cambrils. Un puesto an que a dengún no l’intresa ni brenca ni meya lo que fa a chent d’o lugar. Nomás nos servimos, en o pior sentiu, d’o lugar. Enter que febanos una gambada, una parella nos preguntó si sabebanos a on se feban os castellers. Ni sabebanos que se’n feban, asinas que prencipiemos tamién a mirar de trobar a plaza an que nos heban dito que sería l’acto.

Yera o diya d’a Inmaculada y be d’estar fiesta gran en Cambrils. Antimás de quitar o monyaquet d’o santo en procesión, i feban baile de chigants y capezutos, ball de bastons (palotiau) y, prou que sí, castellers. Tot con dolzainers y mosicos a patacadas. Buena borineta que nos estiemos viyendo y disfrutando. O maitin remató con un vermu en un bar cerqueta d’o puerto an que nos escuncemos con uns ciclistas de Cadrete que yeran fendo a via verda.

Cambrils me deixó, dimpués de trentaseis anyos, sin sangre en a pocha. Tener uns monts tant repolius y tant cerca u conoixer una tradición, chiqueta y sin aparatos, pero bien entretenida, me tornó a recordar que cal viachar ta totz os cabos con os uellos y a ment ubierta patalera pa chupir-te de tot lo que te pueden dar. Mesmo si son puestos tant teoricament ixautos como Cambrils.

viernes, 4 de diciembre de 2015

A rebelión aragonesa de 1591. Tierra de barrenaus 2x03

1591 estió un anyo a saber que important t’Aragón. Probablement menos decisivo que no 1707, anyo an que Felipe V d’Espanya sacó os fueros y leis aragonesas, rematando definitivament con un estau de sieglos d’historia. Pero muito más simbolico. Quan a “chusticia” castellana talló lo tozuel de Chuan V de Lanuza, o mozo, creyó un simbolo que hue encara remeramos. Muitos atros morioron chunto a ell, por as mesmas razons. Por desfender as leis y a independencia d’Aragón. A ixos atros no se les recuerda tanto, pero os suyos nombres apareixen por tot en que prencipias a forigar una miqueta en a historia.


Os feitos que pasoron en Aragón entre 1591 y 1593, han pasau a la historia con o nombre de Alteracions d’Aragón. Os historiadors que vinioron t’o programa s’estiman más atros nombres más achustaus t’a realidat d’o que i pasó: rebelión d’Aragón u sucesos revolucionarios. Se clame como se clame en iste programa nos adediquemos a repasar os feitos d’ixas envueltas. Dende muito antes, dende primer d’o sieglo XVI, ta poder contextualizar bien tot lo que pasó. Y dica muito dimpués. L’exercito castellano no marchó d’Aragón dica 1593, más d’un anyo dimpués de l’asesinato de Chuan de Lanuza. Os tozuels d’os foristas remanioron en as picas dica 1599.

Dende aquello, toda mena d’historiadors d’acercoron a los feitos. Con mayor u menor fortuna y con mayor u menor obchectividat. Con intencions de fer-ne un estudio de verdat u de fer servir os feitos ta creyar propaganda. Hue, continan estando polemicas as interpretacions que se fa d’as “alteracions” y cadagún en fa la suya. Hue encara bi ha muita documentación que se desconoixe u s’ignora.

Asinas que, con Lorient y Daniel, tenié a suerte y honor de compartir tres horas de programa, an que rechiremos bien rechirada a historia d’a rebelión aragonesa de 1591. Dos grans expertos en iste tema que regular que tos descubrirán nuevas cosas sobre istos feitos que garra persona que diga querer a Aragón y a la suya historia, puede deixar de conoixer y estudiar.

Como d’isto, en he escrito bella vez, contino tos deixo bell vinclo a bell articlo y bella mica de bibliografía.

Aragón en la monarquía de Felipe II (dos volumens). Jesús Gascón Pérez. Rolde de Estudios Aragoneses. Zaragoza, 2007

El árbol del Sobrarbe. Los mitos de origen del reino deAragón. Antonio Peiró Arroyo. Delegación del gobierno en Aragón. Zaragoza 2005 (contiene un capítulo adedicau a la historia y a la historiografía de Chuan de Lanuza V)

Justicia. Marisa Azuara. Amares.com. Zaragoza, 2006. (novela)

Aragón bajo los austrias. Gregorio Colás Latorre y Jose Antonio Salas Auséns. Librería General. Zaragoza, 1977

Tres esferras II. 20 d'aviento. En Tierra de barrenaus. Chunyo de 2007

O Chusticia y a mia visita con GozArte. En Tierra de barrenaus. Aviento de 2013.

jueves, 19 de noviembre de 2015

A ignorancia lingüistica en l'estau espanyol

No por cutiana deixa de fer-me espanto a ignorancia lingüistica cheneralizada que bi ha en l'Estau espanyol. Mesmo más, m'ixorronta ixa mena d'argüello tant estendillau de qui nomás charrar "en cristiano" y no quiere aprender garra cosa que no sía l'universal y comprensible espanyol.

Deciba un compa andorrano que a chent sabeba pronunciar millor Schwarzenegger que no pas Josep Lluís, y bella mica de razón no le falta. Encara que no he conoixiu practicament a dengún que prenuncie Schwarzenegger como cal (y no pas /chuacheneguer/), entiendo que ye de mal pronunciar ta un castellanofono y que antimás somos masiau influyius por l'anglés como ta parar cuenta de que ye un apelliu austriaco y que no cal prenunciar-lo "a l'anglesa". ¡Quantas risas se m'han feito quan prenunciaba correctament (tot lo que podeba) Schumacher u Kraftwerk! Pero, insisto, son parlas prou aluenyadas d'o nuestro latín romance cutiano. Mesmo cheograficament tampoco no los tenemos cerca y por un regular no tenemos guaire contacto con fablants d'anglés u alemán.

Manimenos, en un estau an que viven 47.000.000 de personas, más de 5.000.000, un de cada diez (como poco) charra catalán. Ya concretament en Aragón, antimás de tener a nuestra propia comunidat catalanofona, o contacto con o catalán ye contino. No nomás por a cercanía cheografica, sino tamién por o ciento de segundas residencias en Catalunya y Valencia y por a cantidat d'emigradas que tenemos en ixos paises. Pero, a mayoría d'a población aragonesa no tien ni ideya de catalán. Sisquiá d'a prenuncia suya. ¡Quantas vegadas s'habrá feito plorar a o nino Chesús en decir /Ca-ta-lun-lla/ u /es-pan-llol/!. Como ta prebar de que prenuncien sonius que ni existen en castellano...

Qué pena me fa toda ixa chent que se pierde a mosica y as letras de Obrint Pas, Manel, Sopa de Cabra u Pirat's sound sistema por puro racismo, en no aguantar que sigan feitas en catalán. Ixe refús tant absurdo lo venimos tetando dende chicotz. Remero perfectament que, de chicot, bi heba chent que se meteba o futbol en a TV3, amortando o soniu y metendo en a radio a l'espanyol que pertocase. Chent que pasaba os veranos en a costa catalana u valenciana y que exichiba que l'atendesen en castellano, encarranyando-se firme quan no lo feban. Dimpués de decadas de normalización lingüistica y de veranos en lugars catalanofonos, ¿quanta chent conoixetz que se fa la bamba de no haber aprendiu ni una parola de catalán? Fer-se a bamba de no haber aprendiu mica de qualsiquier cosa tenendo a oportunidat de fer-lo, habría de fer avergonyar-se a qualsiquier persona.

A incultura lingüistica leva tamién a la ideya de que una lengua digna de tal nombre no admite variación denguna, lo que ye de dar que ye falso. Ye ixemenada ixa absurda ideya de que todas as lenguas que no son o castellano se composan de millars de dialectos incomprensibles entre ells, y de que en Valencia charran de tot diferent en Tarragona u Fraga, pero en Quito u La Habana a lengua ye exactament a mesma que en Cadiz, u Santander. Fa anyos, le argumentaba a una persona a variación d'o castellano seguntes a on se charre y me respondeba con un aclaridor "hombre, pero s'escribe tot igual". Dimpués bi ha qui diz que no cal una grafía t'as lenguas.... ains!

Ixa incultura que s'expresa, tamién en o maltracto policial a qui charra catalán en Valencia, como en o caso de Miquel Gironés (y de muitos atros). ¡Cómo sería de distinto o caso si a ixos policías les hesen charrau en anglés u alemán, que regular que no entienden!

En l'estau espanyol, o nacionalismo lingüistico, que tant bien describe Moreno Cabrera en os suyos libros y charrardas, ha levau a creyar un espacio an que ye quasi imposible aprender una lengua diferent d'o castellano. A que siga bella mena de trauma y a que calga traducir-lo tot. No cal ni charrar d'o cine u a TV doblau. Afortunadament ixo va cambiando. Pero tant a monico....

Fa poco estié en una presentación de bell fanzine feminista. Bi'n heba en aragonés, catalán, castellano y francés. Tanto a moza que lo feba en catalán como la que lo feba en francés, lo heban traito traduciu, y quasi sincusando-se por no haber-lo puesto traducir tot. M'alcuerdo tamién como Xavi Sarrià se feba cruces quan le demandabanos en A Enrestida que a presentación d'o libro suyo la fese, como ye normal, en catalán. Ni o catalán, ni o francés son lenguas que sigan aluenyadas ligüisticament u cheografica de l'aragonés u d'o castellano. En ista parte d'Europa, garra persona habría de tener guaires entrepuces ta entender, si fa u no fa, un texto "normal" en ixas dos lenguas. Pero ve-te-me que pareixe imposible a intercomprensión. Traducir-lo tot a o castellano ye una condena más que una opción. En ixa mesma presentación de fanzines, por cierto, se presientó o Mullers y Cordials, de tot en aragonés, sin que suposase garra trauma y sin que denguna rematase chitando espuma por a boca.

O misterio d'a imposibilidat d'aprender lenguas en l'estau espanyol, no'n ye. As causas, ta yo, son bien evidents. D'una man, una tradición pedagochica en l'aprendizache de lenguas prou mala. Por muitos anyos s'ha amostrau muit malament. A pedagochía lingüistica d'antesmas yera, como poco, zaborrera. Y la d'agora s'endreza más a aprebar examens y a que creigas que charruteas lo que sía, que a realment aprender de buenas trazas una lengua. Aprender anglés, aragonés, swahili, u mandarín no ye facil. Cal fer un poder bien gran y qui creiga u diga lo contrario, u tien un cerebro privilechiau ta las lenguas, u creye que sabe más que no'n sabe, u simplament miente.

D'atra, ixe refús social a qui charra lenguas "no utils". Mesmo a qui aprende francés u alemán antes que no anglés. Muita chent se fa a mofla de qui gosa tener una buena prenuncia. L'atro diya un amigo feba uellos de caparra quan l'explicaba que bi ha 150 universidatz en tot lo mundo que amuestran catalán, pero nomás 8 son en l'estau espanyol, entre que Francia u Alemanya en tienen vinte. Bell diya habré d'escribir sobre as reaccions d'a chent quan les deciba que estudiaba aragonés u agora quan les digo que estudeo catalán.

As mesmas que ploran porque a chent ye incapable d'aprender un buen anglés s'encarranyan porque se faiga educación en catalán u euskera. U debant d'a posibilidat de que se prencipie a fer, con una voluntariedat quasi absurda, en aragonés. No entienden que un verdader bilingüismo, y no lo que se fa en a mayoría d'os malclamaus centros bilingües, sí que favoreixe l'aprendizache d'una tercer y sucesivas lenguas.

No tiengo ferramientas ta contimparar con atros estaus. Por lo que me dicen a situación en atros estaus ye millor. Y en bell estau colonial (Anglaterra, Francia, etc...) puet estar que mesmo siga pior. Pero en l'espanyol a incultura nos leva a que a chent se'n rida quan viye o video que meto abaixo de Moreno Cabrera, u a que, como denunció Esfendemos as luengas, en Aragón TV haigamos de sentir-nos argumentos como "te hablo en toledano?". Y a que, anyos más tarde, se torne a repetir o "Jose Luis Carod".... 

Antes (u de vez) de prencipiar a aprender lenguas, a fer una sociedat plurilingüe, cal saber lo que ye una lengua, a valura que tien, o patrimonio que representa, a relación que tien con a resta de lenguas, .... No ye tant dificil. Sisquiá cal una asignatura de propio. Con bella mica de sensibilidat cultural, de apertura de ments y, lo que ye más dificil, un emparo institucional que acotole o "cunyadismo lingüsitico", ya podríanos ir tirando entabant.

Bell video pa pensar (u plorar):



Aragón Tv triga a contertulios desconoxeidors d’a realidat lingüistica d’Aragón from Esfendemos as Luengas on Vimeo.






miércoles, 11 de noviembre de 2015

Pilars 2015. Tierra de barrenaus especial D'estrela a estrela

Os Pilars rematoron. Ta yo no estioron ni os millors ni os piors d'a mia vida, pero sí que tenioron momentos bien pinchos. Cuento que ta todas. En no tener un lugar, en estar naixiu y creixiu de Zaragoza, son istas las mias fiestas mayors. Son istas las que me trobo con as amigas que viven difuera y en as que aprofeito ta disfrutar a borina en a carrera.

Sobre o modelo de fiestas de Pilars bi ha muito que charrar, pero no estió iste o programa ta fer-lo. De feito, si bi ha bella voluntaria, tos proposo de fer-ne un sobre os Pilars y mesmo sobre as fiestas en Aragón. Tanimientres simplament aprofeitemos ta charrar una miqueta d'istos Pilars. D'os conciertos que nos heban feito goyo u no pas, d'as novedatz y d'as cosas de cutio, d'as polemicas politicas, .... una mica de tot.

Lo faciemos, antimás, adintro d'a programación d'a cinquena edición de D'estrela a estrela un cabo de semana an que toda la programación de Radio Topo se fa en aragonés y en catalán. Un diya muito especial ta todas as que queremos ista lengua y tamién ta qui nos fa goyo a radio. Como dicié por twitter, ye una maravilla devantar-te d'o leito y desayunar-te con un programa en aragonés y continar asinas tot lo diya. Un d'ixos poquetz diyas a l'anyo que realment vives en aragonés quasi as 24 horas. 

Ya podetz sentir u descargar-tos iste programa an que, como siempre, tant bien nos lo pasemos.

viernes, 6 de noviembre de 2015

Cacegadas (Lost) Tierra de barrenaus radio 2x02

Si bi ha una serie que, en as zaguers decadas, cambió as trazas de fer televisión, ixa ye Lost. No descubro cosa decindo que bi habió un antes y un dimpués d'a suya emisión. O boom d'as series prencipió con ista, y muit pocas han conseguiu meter-se a ran de calidat y de exito. Dimpués de Lost bi habió muitas prebatinas de "nuevas Lost" como FlashForward que se quedoron en no cosa. Bi'n habió d'atras que sin prebar d'estar-ne si plegoron a un gran nivel de calidat u d'exito: a primer temporada d'Heroes, True Detective, Game of Thrones, The Wire, The Soprano, Breaking bad, ... Pero denguna nos tocó tanto como Lost.



Facié tarde en Lost. Ya yeran fendo a segunda temporada en a TV. Pero como cuento que todas as que faciemos tarde, me trusquié totz os capitols d'a primer temporada a l'arreu. Lost ye d'ixas series que cada episodio te deixa con l'angunia de querer saber qué pasará contino. Guarda si soi puntual, que ye una d'as mias basemias, pero en os anyos que feban Lost, feba tarde terne que terne en pensar que me vagaba de viyer-me un capitol más.

"Lost ye una serie de personaches" estió un d'os mantras gafapasters más repetius en ixas envueltas. Tot un #ranciofact que, como tantos atros, ye verdat. En tener tanto tiempo ta costruyir os personaches, consiguioron fer-ne de bien buenos. L'actuación de muitos d'ells aduyó. Y charro en masculino porque, como podretz sentir en o podcast, tanto os papels, como l'actuación d'ellas, me pareixió prou floixa. Fueras de Julliet y, talment, Claire, os personaches femeninos son o punto más feble d'una serie rebutient de mastos alfa y fundament masclista. As mullers quedan, quasi todas as vegadas, en "novia, mai u filla de".

Con tot y con ixo, os personaches masculinos sí que yeran muit bien feitos, como deciba. John, Jack, Sawyer, Sayyid, Ben, Charlie, Desmond, Faraday  .... totz tienen intresants historias que les fan estar como son. Totz evolucionan de traza lochica y bien motivada, sin guaires d'ixos chiros absurdos que tanto nos i tiene feitas a ficción televisiva.


4, 8, 15, 16, 23, 42.... os numers que nos tenioron a todas en candeletas. Misterios que apareixeban por tot. Onsos polars en oraches tropicals, fumos negros asesinos, Una lucana iluminada por tierra en o preto d'a selva, uns habitants misteriosos... totz china chana aclarius, u no pas tanto.

Muitas vegadas se critican as tres zaguers temporadas, pero o feito ye que Lost ye d'as series que millor sobrevivió a la vaga de guionistas. Heroes, por eixemplo, no sabió salir-ne. Lost no nomás en salió, sino que lo fació muit dignament. As tres zaguers temporadas ye verdat que trencan una mica la dinamica d'as primers, afundando más en argumentos mas propios d'a fantasía u d'a sciencia ficción y aluenyando-se d'o "culebron" amoroso. Puet estar que por ixo precisament me pareixcan d'a mesma calidat que as tres primers. Ixo, y que tot lo que tienga viaches y paradochas temporals, siempre fa goyo.

Nos quedemos en o programa sin charrar d'o que facioron os actors dimpués. Juliet (Elizabeth Mitchell), que me pareixe a millor actriz d'a serie, tenió prou mala suerte con os suyos prochectos. O remake de V, que la teneba de protagonista, se canceló en a segunda temporada, deixando-nos a las pocas fans que teneba, en candeletas. Series muito piors continan fendo-se y tenendo exito, inesplicablement. Dimpués fació Revolution, un d'os piors catenazos que he visto en muito tiempo y l'eixemplo de cómo malmeter de tot una buena ideya. Revolution pasará t'a historia de como no fer una serie de televisión. Jacob tenió un chiquet papel en Dexter, an que, como en Lost, pasó sin pena ni gloria. O papel de Charlie (Dominic Monaghan) en FlashForward no yera malo pero, igual como con V, a serie estió cancelada antes de tiempo. Y muit mal zarrada argumentalment. A primer cinta de Wolverine, an que fa atro papelot, quasi millor ixublidar-la de tot. Kate (Evangeline Lilly) fa un papel en O Hobbit tant ixauto como o que fació en Lost, y antimás blasfemo, seguntes as fans tolkienianas. Hugo Reyes tamién tenió mala suerte con Alcatraz, una serie mediocre, pero entretenida. Ixo sí, fació un sobrebueno y divertidismo papel en aquell capitol de How I met your mother. Como no veigo ni Person of Interest ni o remake de Hawai 5.0 an que salen Benjamin Linus y Ji-Soo Kwon, no en opinaré. Y asinas cuento que podríanos continar con quantos más....

Si estiés fan d'a serie, en iste programa no trobarás garra analís saputo. Nomás a tres fans charrando-ne apasionadament y pasando un buen rato. Regular que lo sentirás asentindo u carranyando-te con nusatras. Fe-me-lo saber en os comentarios! Si no la has vista, ya tardas. Yes perdendo-te Historia d'a televisión y una sobrebuena serie. En o programa te vas a minchar spoilers a bando, pero regular que disfrutarás y vivirás a serie como todas las que la han vista. Aspero a fans y a no fans tos faiga firme goyo iste programa... y que nos lo comentetz!

Ascuita u baixa-te o programa clicando aqui


miércoles, 4 de noviembre de 2015

Cese temporal de l'actividat trolera

En fa ya bell tiempo, escribié un post aqui mesmo sobre relichión. Como de cutio, Florencio respondió y a o rato, le contesté yo de muit malas trazas. Prencipiemos a charrar-ne por mail. Una d'as cosas que me dició me trucó a-saber-lo, Deciba que no me reconoixeba en o furo d'as parolas mias y l'odio que treminaban. De razón, en teneba buen amiro.

Florencio y yo nos conoixiemos en Chobenalla Aragonesista fa a saber que anyos. Compartibanos una actitut vital: la de mirar de trobar vias intermedias ta plegar en consensos entre as diferents sensibilidatz que tenebanos en aquella organización. Ixa actitut la continé tenendo quan estié en o sindicalismo estudiantil, en "Unibersidá - Coleutibo Aragonesista", y habié de negociar con organizacions de profesorau, estudiantau y personal d'administración y servicios de toda mena. 

Os camins de Florencio y yo s'esbarroron. Prencipiemos a vivir en ciudatz diferents y a trobar-nos muit poquet. Pero tanto por internet como as vegadas que nos trobamos, Florencio siempre ye un "Ferfet Chusepet" que me recuerda a persona que soi y a que quiero estar.

En l'atro cabo, i yeran os trols que, en ixas envueltas, ya prencipiaban a existir. Internet no yera lo que ye agora y s'acubillaban más que más en a famosisma Ziber - Rufierta (1). Odiaba a aquells trolls. Por un regular anonimos, sin alportar garra propuesta, siempre criticando y incapables de decir-te lo mesmo dimpués por a carrera an que te los trobabas. Zaragoza ye chiqueta y Indepelandia más.

O tiempo pasó. Tenié quantas experiencias y, por bell tiempo, habié de deixar l'actividat asociativa y politica por qüestions laborals. Quan i torné, l'ambient yera mesmo pior que quan lo heba deixau. Fablilandia (2) continaba trencando-se y as prebatinas de compleganza siempre remataban en no cosa. Nuevos y viellos actors feban y fan servir o rete como un d'os campos de batalla y yo, en estar parte de fablilandia, embrecau y firme defensor d'una anvista de l'aragonés, decidié de dentrar en a guerra. 

Poco tiempo dimpués Florencio tornó a escribir-me por una d'as mias famosas troleadas. Torno a decir-me que no me reconoixeba. Y en zagueras o troleo ya s'ha tornau parte d'a mia rutina. Un troleo que me fa malmeter o radiu tiempo que tiengo ta l'aragonés u t'os mios vicios (lectura, cine y bieras, basicament). Un troleo que goso de fer a chent muito mediocre que no mereixe ni un sacre d'o tiempo mio. Un troleo an que a soben defiendo a chent que ya sabe, u habría de saber, defender-se sola. Y un troleo con que no feré venir a plego a dengún, encara que si que tienga bella fan que m'anime a continar, lo que siempre s'agradeixe. No quiero tornar-me ixa persona ronyazas que vive basicament d'odiar a l'otri. Tiengo cosas muito millors que fer y que fan muita más honra a l'aragonés. 

Creigo que l'aragonés no se mereixe a las personas a las que troleo de cutio. Pero tampoco no se mereixe que chitemos bencina a una chera que ya podría haber cremau toda la selva. Talment siga tiempo d'augua, de fer a parte d'o colibri, de pensar que foi más honra aduyando a fer consensos que troleando y dando de minchar a trols ta que se creigan importants. Asinas que, dende iste momento, anuncio un "cese temporal en l'actividat trolera" de man de Tierra de barrenaus, que todas sabetz qui soi. Habré de fer firme poder ta no tartir con seguntes que fateras d'as que cal leyer por astí.

No significa isto que haiga revlau u que haiga cambiau en as mias conviccions cuanto a l'aragonés y a la politica lingüistica que s'habría de fer en iste país. Contino pensando basicament lo mesmo. Pero creigo que, precisament por ixo, he de trobar millors trazas de defender-lo. Cal saber quan se fa más honra en cada puesto. Talment ixa siga a sola lición que pueda dar a muita chent en fablilandia. No ye poco.


(1) En charremos bell poquet en o primer programa de Tierra de barrenaus radio.
(2) Yo tamién odio o termen Fablilandia, pero ¿a que todas nos entendemos asinas?

miércoles, 28 de octubre de 2015

En leyendo... 100 razones por las que deje de ser español

De casualidat me trobé con iste libro en A Flama fa anyos. Belun lo heba deixau ixublidau y de cabo ta quan me leyeba bell troz. Ye tot un tratau sobre a historia d'Euskal Herria dende una anvista de tot subchectiva, la de l'autor, qui reconta como ha viviu y vive suya identidat nacional. O libro no tien pierde, encara que, como con totz os libros, tienga pasaches más u menos afortunaus. L'estilo d'escritura, antimás, ye bien ameno fendo-lo de muit buen leyer y, pa forro de bota, os capitols son curtetz y muito independients. Un libro ideyal ta leyer-ne un trocet cada nueit. Como con tot lo de Txalaparta, ye de mal trobar si no yes socia. Yo me lo pillé en Pamplona aprofeitando que i pasaba, pero regular que La Pantera rossa te lo puet trayer. Iste ye un d'os trozos que más goyo me fació.

Agora levamos quasi un sieglo dando-le vueltas o dreito d'autodeterminación. Ye dificil que un colonizador accepte que os pueblos que coloniza se puedan autodeterminar. Y t'escamalla fer poders ta cambiar as suyas estructuras politicas ta que admita as nuestra demandas. Siempre se prebó y siempre se fracasó. Ye muito más eficaz y satisfactorio declarar-se ubiertament independentista, y imposar a soberanía por a vía d'os feitos dica an que podamos.

A dengún no imos a contrimostrar que somos un pueblo y una nación fendo agudos analis sobre nacions y nacionalidatz, sino comportando-nos como tal. con a praxis. Nomás amostrando-nos y comportando-nos firmement conseguiremos contrimostrar que aquí bi ha una nación y un problema nacional. O treballo y a luita decidirá que seremos en o futuro, si una nación vasca u, por contra, espanyols y franceses, romanizaus. Diz Joxe Azurmendi que tampoco no podemos estar siempre fendo chirar a noria d'a Historia. Ye cierto que quan as personas prenen conciencia d'o suyo pasau prenen conciencia d'a suya identidat, pero hemos feito masiada historia ta conceder-nos un pasau millor, y lo que le cal a Euskal Herria ye un futuro millor. Encara que os vascos no hesenos teniu Estau de Navarra, ni Fueros, ni Dreito, ni Arbol de Gernika, ni carlismo, ni aranismo, sería lo mesmo. No imos ent'o pasau sino ent'o futuro. Ye urchent a independencia no porque os mios lolos perdioron l'euskera en o sieglo XIX, sino porque os mios fillos, y mils como ells, en o preto d'o sieglo XXI, no pueden estudiar en a suya lengua lo que deseyan. Ye urchent a independencia porque en o nuestro país tenemos prous vimbres pa fer a sociedat más democratica, más culta, más sociable, más eficaz y más participe d'a diversidat d'a planeta, que la que nos depara la dependencia. Más encara, porque a independencia ye tamién a millor favor que le podemos fer a los amigos espanyols que quieren lo mesmo pa o país suyo. QUe son fartos d'un Estau más enradigau en a Inquisición y o militarismo, que en o Renaiximiento y a Ilustración. Un Estau - garchola, an que siempre vencioron os mesmos espadons, as mesmas clases, os mesmo reis, os mesmos vispes. Garra garcholer puet estar libre. A nuestra liberación será la suya.


Y prou de considerar a os pueblos como propiedat d'os Estaus, en cuenta de considerar a l'Estau como un instrumento a o servicio d'os pueblos, modificable y remodelable seguntes as aspiracions humanas. Prou de ascuitar que toda reivindicación de independencia, tot fer dubdar d'as mugas estatals, ye qualcosa utopica, mesmo sacrilega. S'entivocoron os filosofos d'o sieglo XVIII: luen d'haber feito desapareixer lo sagrau, a nuestra epoca no ha feito que trasladar-lo d'a esfera metafisica a la politica. En un mundo que se diz racionalista y razionalizau, l'Estau ha concentrau sobre sí tot lo potencial intelectual y afectivo que antes más se artibuyiba a las relichions. Y manimenos, cosa no bi ha más mutant que as mugas d'os Estaus, y más en os tiempos que corren. Ixa ye a qüestion: soberanía u dependencia, O millor dito: democracía sí u democracía no. No bi ha mayor apolochía d'a violencia como recurso politico que viyer a la comunidat internacional reconoixer, quasi de camín, a tot Estau que imposa la suya independencia por a vía d'as armnas, entre que niegan o dreito a decidir a os pueblos que lo demandan democraticament. Tienen miedo a las urnas. Les fa espanto a democracia.

domingo, 25 de octubre de 2015

Esperanzah World Music Festival (2). Organización y entorno

Una d'as performances que se facio
Si l'atro diya charraba d'os conciertos d'o Esperanzah World Music Festival, hue me toca charrar de toda la resta de afers. Dende a organización dica las anecdotas u l'entorno, o cabo de semana cundió prou.

En viyer o perfil hippie d'o festival, a verdat ye que nos feba una mica de miedo que a organización fuese un caos. Ta forro de bota, ibanos chustetas chustetas de tiempo y caleba acreditar-se ta dentrar en a zona d'acampada. Manimenos nos trobemos con tot lo contrario: una organización sobrebuena en quasi tot. De ringleras, pocas en faciemos, y las que faciemos no nos levoron guaire rato. 

A zona d'acampada yera en o Parc Nou, an que tamién yera o cletau d'o festival. Un parque plen d'arbols con firme follarasca, asinas que ni nos calió mirar por a on saldría o sol. Nomás o parque ya mereixe de fer-se-ie una gambadeta si andatz cerqueta. Antimás, en dentrar ta l'acampada t'acreditar-nos nos trobemos con un cartel con as normas d'o camping, incluyida una anti-caparras, que no permitiba de fer rudio dimpués d'as quatre. Dimpués en charraré, pero a intención yera buena. As plazas d'acampada yeran amugadas y creyebanos que ibanos a estar más pretas que ta qué. Pero, u heban calculau muit mal u muit bien, porque bi heba espacio por demás ta todas. 

Ya sabetz que lo d'o pichar ye una d'as mias basemias (puetz leyer sobre ixo aqui y aqui), y que me carranyo muito quan os escusaus son pocos u mal chestionaus. Tot lo contrario que en iste festival. Pichaders de piet y de gabina a trompicuesco y bien situaus. Escoscaus a soben y mesmo con papel hichienico dica bien prencipiada la tarde. Tot un eixemplo que empachó que a chent improvisase pichaders por un parque repoliu.

Antiparte d'os conciertos, que yeran os actos principals d'o festival, Esperanzah estió tamién una mena de feria d'o cooperativismo y a solidaridat. Toda la parte d'a virolla yera d'intepresas d'economía alternativa, igual como muitos d'os puestos de artesanía u asociacions que bi heba en o recinto. De maitins se feban actividatz ta ninos y bell debat, u bella actuación. Como gosa de pasar en istos ambients, a carga de superstición y relichiosidat new age veniba de man d'un taller de meditación, muito cerqueta d'un puesto que vendeba orgonitas. Siempre me preguntaré porqué s'encerrinan en fer istas fateras y, lo pior, por qué tienen tantas seguidoras. Afortunadament, pasé por o taller de meditación y no plegaba a la vintena de personas... pero astí yeran.

Me sorprendió a variedat de chent que bi heba y a cantidat de lenguas que se i parlaban. Nomás entre que metebanos a tienda de campanya ya podié sentir castellano, catalán, euskera, alemán y francés. D'entre o publico muita hippie, prou que sí, pero tamién indepes catalans, chent con sinyals d'Euskal presoak, bell punk, bell rapero, y asinas asinas... y un gran porcentache de mullers, cal decir.


A parte negativa la metió o debantdito caparra d'acampada. En ista ocasión más gabacho que de cutio. Como he dito antes, en l'acampada no se podeba fer rudio dimpués d'a quatre. A primer nueit estió perfecta. Bell ababol fació bell rudio, as encargadas d'o camping (tot voluntariau) le'n dicioron, se calló y todas dormiemos de bitibomba. Manimenos a segunda nueit, as encargadas no i estioron. Os caparras aprofeitoron ta drogar-se bien drogaus y fer o caparra. Ye decir, encargar-se de que toda l'acampada nos enterasenos d'o guays que yeran. Chilando de propio ta dispertar a la chent, metendo mosica a tot estrús, presumindo de que l'heban tocau o culo a una en un pogo y asinas asinas. Uns farutes gabachos que habioron d'asperar a que papa encargau no i estase ta poder estar dolents. Fastio no, lo venient. A sola recompensa que tenié, estió a de viyer-les de maitin posaus en as suyas sillas mirando-se enta l'infinito en no poder dormir d'o pasote que levaban. Aspero que se estalapizasen con l'auto de tornada ta casa suya.

Ya difuera d'o que estió lo festival, a redolada nos trayó bella cosa bien pincha. O lugar, El Prat de Llobregat no ye guaire poliu. O catalán yera quasi inexistent entre a chent que i viviba y bi heba más sinyals d'Andalucía que de Catalunya (ya no digo ni estelades). Viyemos quantas personas con cardelinas engarcholadas en unas gabias prou chiquetas. Encara nos femos cruces d'a on veniba ixa mena de moda. Mesmo viyemos tres hombres aturaus debant d'una d'ixas gabias, mirando-se fito-fito a la cardelina. No sé si asperaban que ponese bell uego u que prencipiase a cantar La Traviatta. Sin sangre en a pocha.

Manimenos, en o mesmo termino municipal bi ha cosas intresants. L'aeropuerto de El Prat define muito a vida d'a redolada. Por ixo, y en estar prou cerca d'o delta, a Placha de El Prat ye a saber que gran, repolida y sin edificios arredol. A un canto la mar y a l'atro una selva de pins. Arrienda placha ta estar-te-ie, fer una gambada u lo que sía. A o canto d'a placha ye o delta d'o riu Llobregat y, como totz os deltas, ye un puesto sobrebueno t'a ornitolochía. Estiemos en información ta conoixer as rutas que bi heba y nos trobemos con información a sobrefaixo sobre cursas ornitolochicas u de naturaleza cheneral. Bi'n heba mesmo d'especializadas en limicolas, marinas, etc... No i faciemos que una gambadeta pues yeranos escruixinadas d'a nueit d'antes, pero en ixe ratet ya nos vagó de viyer un bernat pescataire (Alcedo Atthis), que mesmo se posó un ratet y se ficó en l'augua ta pesacar. Tamién viyemos un buzo (Podiceps cristatus) que s'estió firme rato nadando en una d'as basas que bi heba.


Entre que te fas a gambada por o delta, yes sentindo y viyendo terne que terne os avions acercando-se a l'aeropuerto a bells pocos metros de tu. Ye prou curioso de viyer-los tant cerca, y  mesmo han feito un chiquet parque con bancos de piedra ta posar-te-ie y viyer-los con comodidat.

Tot en conchunto, tanto o festival, como a redolada, estió una sobrebuena experiencia. Asinas que, ye prou probable que, de borina, u de turismo, tornemos bell diya ta El Prat.

lunes, 19 de octubre de 2015

Esperanzah WMF (I). Cronica d'os conciertos

Manu Chao
Por primer vegada en toda la mia vida, he pasau bell diya de Pilars difuera de Zaragoza. ¿Qual podría estar o motivo ta, por primer vegada, traicionar a ista ciudat, deixar aqui a las amigas y tres diyas de borina? Pues ni más ni menos que tot un festival. O Esperanzah World Music Festival, que cuento que ye o zaguer d'a temporada estivera, y que, a priori, teneba tot un cartel. Asinas que asti va la cronica.

O viernes, en treballar de maitins as dos, pleguemos chustas ta plantar a tienda, fer una uellada a la zona de minchar, cambiar diners, pillar unas biera y ir a tot meter a lo concierto d'Amparo Sánchez. En quatre formatos la he vista ya, y en os quatre me ha pareixiu una gran artista, capable de trasmitir firmes emocions. y de fer-te bailar como quan dengún no se te mira. En tasament una horeta fació cantas actuals y antigas y estiró as orellas a lo festival en estar o solo nombre femenino de tot lo cartel. Contino, La Troba Kung Fu nos fació continar con os bailes, con o suyo curdión que bell diya le pretará fuego. En a horeta radida no le vagó de tocar muitismas d'as cantas que quereba ascuitar, asinas que me quedé con firmes ganas de más.  Fermín Muguruza yera o siguient, en un concierto bien intenso. En durar nomás una hora, no s'estió con experimentos y tiró de clasicos. Sentir "En la linea del frente" en chaponés, u piezas como Kolore Bizia u Hay algo aquí que va mal, chunto a bailables como Big Benat u Inkomunikazioa estió tot un luxo. Muguruza contina cerenyo, ¡y cómo!


Amparo Sanchez
O plato fuerte d'a nueit veniba contino. Si ya en Muguruza se notaba que plegaba prou más chent, en Manu Chao dreitament ni se i culliba. Un flumen de hippies s'arrocloron en prencipiar un concierto de bellas tres horas. Y encara que estió un conciertazo, ixo no lo puede dubdas dengún, s'estendilló masiau en a mia opinión. Tot lo curto que se m'heban feito os tres anteriors, se me fació de largo iste. En parte por o mesmo rollo que leva, repetindo terne que terne as frases clasicas suyas, y en parte porque tanto pogo sin biera me deixó meyo deshidratau. A resta de collas, Amparo, La Troba y os Dubioza, pasoron por o scenario ta fer-ie bella colaboración, pero las d'a fin, con Fermín cantando-se Dub Manifest, Sarri Sarri y Gora Herria, estioron una graniza borina. Pena d'haber-las visto dende luen, porque no adubibanos ya.

Dubioza Kolektiv, a siguient colla, no fació burro falso. Una colla que conoixié de casualidat en iste Viña Rock y que en disco no suenan ni la metat que en directo. Si tenetz a oportunidat de viyer-los en directo, no la malmetatz!

O sabado prometeba muito, pero o perfil de collas yera de tot diferent. D'un sonius y uns mensaches más buenrollistas y hippies, se pasaba a los sonius más rapers y letras más politiqueras (en o buen sentiu d'a parola) de Zoo, Aspencat u Los Chikos del Maiz. Ubrioron a tarde Bitxe, una colla que yera "o cupo local" como ells mesmos se definioron, seguius de Santo Machango, colla canaria con un soniu muito funk y como una scenografía muito buena. Pero, sentindo-lo muito por ells, lo que querebanos yera que prencipiase Aspencat. O nuevo disco suena de pistón, y en directo no ye menos. As nuevas cantas quedoron tant potents sobre o scenario como as antigas. Himnos como Naixen primaveres, Antimateria u Queden matinades nos facioron blincar dica quedar-nos sin chenullos. Atra vegada que nos quedemos con muitas ganas de más. A Aspencat nomás los he vistos en festivals y ya m'agana de poder disfrutar-los en un formato más largo.


Bitxe

Zoo yera o concierto, ta yo, más asperau d'o festival. Tasament lo heba puesto viyer un quarto d'hora en o Viña y o solo disco que tienen publicau me pareixe de lo millor que s'ha gravau en zagueras. Igual como Aspencat, no facioron burro falso, ufrindo un concierto muito más bailable d'o que m'hese pensau en primeras. No i falto a colaboración de Los Chikos del Maiz, ni o que ta yo estió un d'os momentos d'o concierto y d'o festival: a versión de Esbarzers de La Gossa Sorda. Encara que ye dificil superar a la orichinal, ta la que no tiengo parolas, Zoo ha conseguiu fer una versión bien pincha y que, en directo, suena memo millor que no pas en a gravación. Si Zoo contina asinas, somos debant d'una colla que ferá historia. Y he teniu a suerte de conoixer-los en o primer disco!

Fartas de blincar, chupidas en sudor, pero goyosas como ninas con chuguetes nuevos, marchemos a fer un bocau y descansar-nos bell rato, que ya nos caleba. A Los Chikos del Maiz los viyemos un ratet de vislai. Prou ta sentir C.O.P.S. y beluna de Riot Propaganda. A cansera, l'alcohol y que Gatillazo tampoco no nos motivaba guaire nos fació revlar y marchemos a dormir quedando-nos (atra vegada) sin viyer a Dremen, lo que me queda pendient.


Aspencat

A valuración d'o festival, cuanto a mosica y conciertos, ye prou buena. M'hese feito goyo más rato t'as collas que me fan más goyo, pero cuento que os fans de Gatillazo y Manu Chao opinarán lo contrario. A sola cosa en contra que puedo decir ye o poco tiempo que bi heba entre colla y colla. Os scenarios yeran prou cerca, pero si querebas simplament fer un pichau y demandar-te una biera, yera quasi imposible de no perder-te una u dos cantas d'a colla siguient. Asinas que si ta l'anyo venient se torna a fer, tos recomiendo muito d'ir-ie. Por os conciertos, prou que sí, pero tamién por atras cosas que'n charraré en que pueda.  




Nota: Ya siento no tener ni fotos ni videos millors, pero yera disfrutando d'o festival.... De videos, en tenetz buena ripa en Youtube, y tos recomiendo de fer-ie una uellada.

viernes, 9 de octubre de 2015

Cronicas pilaristas 2015. Primers "vibras"

Os Pilars son un estau mental. Ixo no cal ni recordar-lo. Siempre bi ha bella aguda que, creyendo que no en heba parau cuenta, me fa notar que porto cachirulo dos diyas antes d'o pregón. Ta yo, os Pilars prencipioron ahiere quan salié de treballar. No me caleba pregón, ni codete, ni penyistas. Ya yera en modo Pilars.

A programación d'estianyo ye parellana a os anteriors. Bell concierto intresant, o cunyarcato instalau en Interpenyas, y as barras / barraques /  txosnas madaleneras an que pillar un capazo no ye una opción, ye lo minimo. De novedatz bi'n ha beluna que m'ha feito contento.

A carpa d'o ternasco d'Aragón ye un d'os puestos que más visito en istos diyas. Dimpués d'as denuncias d'os vecins (m'escusaré adchectivos) l'anyo pasau, y de que bella colla anulase o concierto por as modificacions que les caleba fer en o soniu, a carpa ha feito casa muda t'a ribera. O nuevo puesto me pareixe muitismo millor. Zona trestallada t'as cenas, muito más amplo, no guaire luen d'o centro, bien comunicau y con más ufierta gastronomica. A programación ye, como totz os anyos, de raso aragonesa, y con conciertazos: Los Jaques, 13 Krauss, Azero, Artistas del gremio, Ixera, ....

As periodistas gosan de repetir frases como "con el tradicional pregón empiezan las fiestas del Pilar", pero o "pistoletazo de salida" (ranciofact) ta yo lo meten o "ya tradicional" concierto de Los Gandules en o Ternasco. Ya que agora as tradicions se fan a escape, proposo que en o nuevo reglamento de protocolo de o concello, obligue a las concelleras a ir t'o concierto de Gandules, con banda y tot.

Como de cutio, Los Gandules estioron muit grans. Fueras de bella cazurrada, en a muga con o ranciofactismo, Los Gandules facioron lo que millor saben fer: dar-nos un ratet divertiu y plen de ixautadas pa prencipiar as fiestas. En a carpa no se i culliba. Ye lo bueno de no tener competencia. Por dos horas si fa u no fa, repasoron totz os temazos que les han feito conoixius, y tornoron a redir-se de tot. Guarda que ya soi feito a Los Gandules, que los he visto un ciento de veces, pero contino encarcando-me cada vegada que deixan cantar a o publico. Sentir cientos de garganchons chilando que "A NASA siempre manda codetes que plegan en a luna..." ye d'ixas cosas que no sabes si fer-te-ne a risa en estar gracioso u plorar en estar a sola cosa que podemos meter-nos d'alcuerdo ta fer tanta chent de conchunta. Parabiens a Los Gandules por o concierto y que duren firmes anyos.

L'atra nueva ubicación que me fa a saber que goyo ye la d'o concierto de La Ronda de Boltaña. A la fin tornan t'a Plaza d'o Pilar, an que caldría que tocasen totz os anyos. Nunca no ha teniu garra sentiu tractar a La Ronda como simplament unatra colla más de folk. Nomás cal viyer l'asistencia meya a qualsiquier concierto d'a plaza Sant Felipe, con bell ciento de personas, y contimparar-la con as multitutz que arrocla La Ronda. Feito a viyer-la de vislai, u mesmo dende dezada d'o scenario, quasi se me ferá raro poder ascuitar-las en un buen puesto.

Os zaguers Pilars me facioron una mica de burro falso. Probablement porque ya voi tenendo una edat y as mias amigas tamién. Treballos, responsabilidatz, fillas y todas ixas cosas que te fan recordar que ya no tiengo 20 anyos. Y que en fa muito. Pero una vegada que he asumiu ixo, istos Pilars me dan buena vibra. 

Como de cutio, cuento que lo millor será en as barras d'o vico. As d'o BIC en a plaza d'a Madalena, prou que sí, an que antimás, diz que o sabado a las 22, bi habrá un metecantas rebueno. Pero tamién as comunistas u las d'o bago d'o conello. Astí ye o millor d'os Pilars. Trobar-te con toda la chent que nos visita en istos diyas. Vivir a fiesta en as carreras. Conoixer chent nueva. Bailar y cantar dica l'amaneixida. Capaciar dica apanyar Aragón y dillá. Y tot, prou que sí, en aragonés.



viernes, 2 de octubre de 2015

Andorra y redolada. Tierra de barrenaus 2x01

Fa poco se sentiba en a radio un anuncio, que no m'alcuerdo de qué yera. En ell, un nino yera carranyau porque s'heba fotiu tot lo verano "en o lugar" entre que atro heba iu ta no se an. Puet estar que fuese que parque tematico u bella cosa asinas. Aquell anunció me fació un fastio que pa qué. Yo creixié en Zaragoza, sin que mis pais tenesen lugar, pues tamién yeran d'aquí. Nunca no en conoixié, de "lugar", dica las 14 anyadas. Dimpués conoixié a la mia parella, que ye d'Andorra, y china chana, ixe lugar baixoaragonés esdevenio un poquet tamién en o mio, pero me pena muito a chent que no tien lugar de chiquet u que no en conoixe nunca. Se ye perdendo meyo mundo.

Andorra no ye particularment poliu, ni tien edificios pinchos, ni unas fiestas d'o copon, .... ni falta que fa. Tien, como totz os lugars, o suyo ambient, as suyas particularidatz, a suya idiosincrasia, y todas ixas cosas que "nomás se fan en Andorra" (sustituiga-se Andorra por qualsiquier atro cabo). 

Pero sí que ye verdat que Andorra tien bella coseta intresant ta qui no la conoixe. Ye un d'os lugars d'a ruta d'o tambor y o bombo, una parte d'a cultura y a relichiosidat - espiritualidat aragonesa que cal conoixer, encara que nomás siga ta poder criticar-la. Un debat siempre apasionant o d'a muga entre expresión cultural y expresión relichiosa que prou que concaremos en o programa.

Tien tamién Andorra un sistema economico que ye eixemplo d'o que s'ha feito en muitos atros lugars pero que, ta un de Zaragoza como yo, yera desconoixiu. Dica án puede plegar un "cacicato" u a influyencia que pueda tener una interpresa en un lugar yera bella cosa que no podeba preixinar yo en a mia metropoli. Y ixo que quan plegué en Andorra ya heba conoixiu Xaraba y Figueruelas, que tamién tienen lo suyo...

Como en muitas atras partes de l'Aragón rural, en Andorra y redolada bi ha unas fuertes inquietutz culturals, de cutio ixublidadas por os medios de comunicación grans. Ixas inquietutz, y o treballo terne de bell indichena garrispo fación que, por eixemplo, Chino Chano fuese o primer programa de televisión en aragonés, emitiu fa ya buena cosa d'anyos, en a televisión andorrana. Tamién que se haigan feito en Exulv ya diez edicions d'o festival Carrasca Rock, una gran fiesta d'a redolada, un festival sinyaler en o calendario d'o verano aragonés y tot un eixemplo d'o movimiento cultural y mosical que bi ha en a redolada. No guaire luen, en Alloza, se recupera o dance, dimpués d'anyadas d'albandono.

Tamién o medio ambient ye qüestion de debat en una comarca marcada entre atras cosas por una central termica. Pero no nomás por ixo. A esferra d'o gran fuego de 2009 fació que naixese a plataforma "Nuestros montes no se olvidan", precisament ta que no s'ixublidase ni a redolada cremada, ni os cudiaus que cal que tienga o mont ta que no torne a pasar qualcosa asinas. No guaire luen d'Andorra, ye Auguaviva, ya en l'Aragón catalanoparlant. Un puesto que se concaró a la menaza d'un nuevo entibo absurdo como tantos atros. A zona que quieren afogar sin garra razón lochica, ye un d'os puestos más repolius de tot Aragón y an que auguavivanas y chent de toda la redolada, han pasau firmes ratos buenos de verano.

De tot isto charremos por muito más de dos horas, en un programa que nos deixemos un ciento de cosas por charrar-ne. Talment calga fer-ne unatro, pero por agora, ascuita-te iste aquí, descarga-te-lo y ya sabes que soi asperando as vuestra sucherencias.











martes, 29 de septiembre de 2015

Bella consideración sobre as eleccions en Catalunya

Vinyeta de Manel Fontdevila ta
Eldiario.es
Fer un analís d'as zaguers eleccions en Catalunya ye dificil y largo. Cal parar cuenta de muitas cosas, tener muitos datos, conoixer a realidat d'ixe país.... asinas que no me considero capacitau pa fer-ne un analís. Chusto lo contrario que qualsiquier bocatoba d'os que salen en as rufiertas d'a tele, u d'os cunyaus de bar, que igual me tiene, porque en a mayoría d'os casos tienen a mesma ideya, u ixo pareixe. A rematadera de tot isto, o maximo exponent d'o cunyarcato, d'a idiocracia, d'o infraserismo estió lo debat Karmele - Belén Esteban. Ent'a fuesa que va la humanidat....

Asinas que no voi a estar menos que no dengún y voi a contar bella consideración d'o que opino sobre istas eleccions tant importants y que han deixau un paisache tant raro.Si Belén Esteban puede, no voi a poder yo!

Qui ha ganau ye de pior definir, pero no pas quí ha perdiu. Dos clarismos y l'atro quasi. D'una man Unió, que en un exercicio d'analís politico nomás contimparable a UPyD refusando complegar con Ciutadans, se deseparó de CDC por o suyo independentismo y se autocondenó a la no cosa. Chusto antes d'unas eleccions hiperpolarizadas, quedar-se en una posición esbafada ye fer-se l'harakiri politico. Parellano a lo que le pasó a Catalunya Sí que es pot, que pagó cara ixa mesma indefinición. Como ixe caso ye particular, dimpués lo ixamplo. 

L'atro gran loser d'a nueit estió lo PP, cosa que me fació firme goyo. En charrando con un amigo que gosa de treballar por Catalunya, le dició que parte d'os suyos clients yeran muit pro - Albiol y que teneba prous refirmes en bell puesto. Que un faixista d'os que no s'amagan como Albiol podese tener un buen resultau, yera qualcosa que me feba miedo. Aquella Plataforma per Catalunya s'ixublidó en marchar os suyos votants enta o faixismo cool de Ciutadans. Pero Albiol teneba un mensache bien parellano a aquells. Y si hese teniu exito, probablement hese influyiu en un mensache (más) xenofobo en o PP estatal. Bien se vale que l'amigo aquell s'entivocaba y Albiol dormirá o suenio d'os chustos y s'apresta a fer de calavre politico como senador, eurodiputau u conseller d'Iberdrola.

Catalunya Sí que es pot, no va poder. Como he dito antes, quan as opcions son lo blanco absoluto u toda la foscor posible, quedar-te en un gris marengo no gosa de tener buen resultau. Cuento que a ideya no yera mala de tot. Siempre he visto con buenos uellos a compleganza de fuerzas d'a zurda politica, encara que no siempre creigo que siga la millor estratechia. Pero creigo que en iste caso, en estar unas eleccions an que a pregunta no yera "qui quiers que chestione o gubierno pa las cosas de cada diya" sino "quiers que se prencipie a montar un estau independient?", a indefinición u la vía intermedia yera guarencia de fracaso. En unas eleccions parlamentarias "normals", soi seguro que parte d'o voto, tanto unionista como independentista hese iu ta ixa lista, pero iste no yera o caso. Por ixo, sí que comparto con l'oficialismo podemita (y d'a resta de fuerzas que'n feban parte) de que istos resultaus no se pueden levar t'as espanyolas punto por agulla.


Quí ha ganau? L'independentismo. Sin dubda. Y o dreito a decidir. Ha ganau por numer de diputaus. Si l'unionismo hese ganau por numer de diputaus, a escape hesen recurriu a la retolica de "istas son as reglas d'a democracia y si no te fan goyo se cambean". Pero como no ye o caso, s'acarrazan a o dato de voto indepe / no indepe, decindo, como ye verdat, que os indepes han conseguiu "nomás" un 48%. Que ye verdat. Y comparto con CUP que con ixas cifras no se puede fer una declaración unilateral d'independencia. Pero a trampa ye en dividir os votos por indepe / no indepe. Pretender que Catalunya sí que es pot ye no indepe y que o suyo electorau, preguntau en un referendum, votaría que no a la independencia, ye mentir. Parte sí y parte no. Qué parte? Dica que no se faiga un referendum formal no lo sabremos.

O feito ye que bi ha un 48% de votos a partius favorables a que Catalunya tienga un estau propio, un 40% que quieren que Catalunya contine fendo parte de l'estau espanyol y un 12% (si fa u no fa) que quieren que o pueblo catalán pueda decidir librement si fer un estau propio, quedar-se en l'estau espanyol u belatra opción. Os d'as rufiertas dicen que ye imposible proclamar a independencia con un 48% a favor "nomás". O feito ye que bi ha, lo menos, un 60% a favor d'un referendum y ixo sí que ye una mayoría clara.

Cada vegada ye más claro, ta tot lo mundo mesmo en os territorios más espanyols d'Espanya, que a sola traza de solucionar iste afer será un referendum. Uno legal, y que o suyo resultau siga admitiu por todas. Como se ha feito en atras partes d'o mundo, y como regular que se rematará fendo en Catalunya.


Independència és un fàstig si no és de classe i vermella, deciba una canta de Riot Propaganda. Da-me un estau y di-me fato, diría yo, pero a verdat ye que tienen razón. Por ixo, me foi tant contento de que tot penda en buena mida de CUP. Un partiu que, fueras de bella error puntual, admiro muito, y que son fendo un exercicio de coderencia. Aspero que continen asinas y no permitan que contine en o cargo o mafioso de Mas, hereu d'una tradición politica fastiosa y advenedizo d'un independentismo que sabió forzar-le. Mas ye un lastre t'a independencia catalana y cal librar-se-ne antes con antes.

O futuro ye de mal predecir en cheneral. Y en l'inte politico actual ye tot un risgo que no voi a correr. Lo que pase penderá muito, masiau, de qui bi haiga en o gubierno espanyol en 2016 y d'a relación de fuerzas en ixe parlamento. De si s'ubre u no pas, o melón d'a reforma constitucional, de cómo rematen os pactos en o parlamento catalán, .... de tantas cosas que no goso fer garra predicción. Ixo sí, que plega un tiempo d'un intrés politico granizo, creigo que no lo dubdamos dengún.

Y t'Aragón qué? Deciba Carlos Saura en un exercicio de cosmopaletismo cunyau que "yera más por a independencia d'Aragón que no pas a catalana" (leyetz a noticia que as declaracions suyas no tienen pierde). Lo cierto ye que l'independentismo aragonés contina masiau a monico, sin considerar-se sisquiá una opción politica planteyable t'a mayoría d'a chent. Ye verdat que en zagueras creigo que se son fendo muitas cosas bien, y que l'independentismo va fendo musclo y ixemenando-se ta puestos an que no plegaba fa no guaire, pero encara ye fendo garras. Que tiengamos a o canto un eixemplo d'o camin independentista ye qualcosa que habremos de saber chestionar, aprofeitando as avantallas que a suya experiencia nos alporta y sabendo-las aplicar a la nuestra tierra. Bell diya aspero que andemos ixe camín que ubre o pueblo catalán. Que vaigan fendo tranya....