lunes, 30 de abril de 2007

XIV Chornadas d’as luengas d’Aragón

A semana d’o 7 t’o 12 de Mayo os aragonesofablans tenemos una d’ixas fitas de toz os años an que no podemos faltar: as Chornadas d’as luengas d’Aragón. Nogara, que ye l’asoziazión organizadera, leba 14 años fendo-las y s’han combertiu en un referen añal ta qui aimamos ista luenga, Iste año bi abrá zinco charradas-rufierta y un diya d’autibidaz (o Sabado de maitins). As charradas se ferán de Lunes a Biernes a las 19:00 en o Zentro Joaquín Roncal (C / San Braulio 5-7) de Zaragoza y serán as siguiens:

- Lunes 7: L’abentura d’escribir en una luenga minoritaria con Unai Elorriaga (premio nacional de literatura en 2002, escribindo en euskara)
- Martes 8: ¿Por qué escribimos en aragonés? Con Quino Villa y Marta Martín (escritors)
- Miercols 9: Modelos d’educazión bilingüe. Implicazions t’a familia y a escuela con Ángel Huguet (Profesor de Psicolochía Ebolutiba en a Unibersidat de Lleida)
- Chuebes 10: Presentazión de l’academia de l’aragonés. Con cualques representans de l’academia amostrando as fainas feitas dende a suya naxedura.
- Biernes 11: Debate sobre a politica lingüística. Con representans de partius politicos aragoneses.

Istas chornadas se completan con as autibidaz d’animazión y informazión que se ferán o Sabado dende as 12:00 en a plaza San Bruno.
Ta más informazión podez punchar aquí ta ir ta la web de Nogara. Como podez biyer os temas que se o tratan son asabelos importans y mesmo bi’n ha beluns que no remero que s’aigan tocau masiau. A literatura asoben ye xublidada en as charradas sobre l’aragonés y, l’amostranza, encara que i sale más asobén creigo que abría d’estar un tema más que prenzipal.

5 Mayo Manifestazión d’Aragón no se bende

Aragón no se bende ye una mena de plataforma que achunta coleutibos y chen por un desembolique sostenible y en contra d’a especulazión con o territorio en todas as trazas que agora somos sufrindo. Dende as esferras que son fendo en as montañas aragonesas dica a cuasi imposibilidat de que un choben merque una casa sino le toca una VPO (y con tot y con ixo tampoco no ye fazil sin garra refirme) pasando por os entibos y atrás custions. A la fin una plataforma que preba de que toz podamos bibir en os nuestros lugars y ziudaz d’una traza dinna. Ya leban tiempo fendo campañas de diferens trazas, como la d’espardir os billez (falsos, ye de dar) de zincozientos euros en a zincomarzada, l’escaparate que metión en Spain Squeare y asinas asinas. O Sabado 5 de Mayo han combocau una manifestazión, refirmada por asabelos coleutibos an que espardirán informazión y denunziarán l’autual modelo de desembolique. Ta qui no conoxcaz o suyo treballo tos combido a que besitez a suya web y a que baigaz t’a manifestazión.

III Conzierto solidario con Bolibia

Por terzer año, l’asoziazión Tinkunakama organiza, en colaborazión con Unibersidá – Coleutibo Aragonesista, o conzierto por Bolivia. Ista iniziatiba surtió fa tres años ta conseguir diners ta proyeutos de desembolique en a redolada bolibiana de Cochabamba. En as dos pasadas edizions bi abió asabelo chen y ixo fazió posible imbiar un fascal de diners ent’allá. Zinco euros aquí son muito allí. Como en a resta d’edizions, amás d’o donatibo que se da en a dentrada (5 euros) bi abrá un bingo, una esposizión fotografica y se i benderán articlos de comerzio chusto, tot con a enchaquia de conseguir diners ta imbiar-ie.

Iste año contaremos con as autuazions de Ruido Rojo, Angélida y Juako Malavirgen, de qui ya he fablau en anteriors articlos. A los dos primers no los he sentiu nunca pero de seguras que son bien buenos. De Juako poco queda por dezir. Qui no lo aigaz bisto nunca, aprofeitaz ista ocasión y no tos lo perdaz que de seguras que ferez firmes rialletas.

O conzierto se ferá a las 20:30 en o zentro zibico Laín Entralgo (Paseu d’a Mina, Zaragoza). Tos i asperamos!

martes, 24 de abril de 2007

San Chorche esbafau

Iste cabo de semana, a la fin, no podíe puyar ta Pandicosa t’as Chornadas De Rizio. Me fazió buena cosa de pena pero yera imposible. De todas trazas a chen que conoxco que bi estión me dizión que bi abió prou chen y lo i pasón muito bien. Aspero que se repitan atra añada. O caso ye que m’abié de quedar en a capital d’os cheposos y, a lo menos asperaba que, como toz os años bi ese bella cosa que fer: quemisió, bel conzierto, manifestazión, borina… cualsiquier coseta. Y me trobé con o San Chorche menos reibindicatibo que nunca no eba conoxiu.

Antis de tot, he de dezir que a yo San Chorche rai. Que no soi cristiano y que me flore asabelo istas imposaduras de patrons. Y que o diya nazional d'Aragón abría d'estar o 20 d'abiento (asesinato de Chuan de Lanuza, Chustizia d'Aragón) u lo 29 de chunio (cuan se fazión os Decretos de Nueba Planta). Con lo debandito, ya que tenemos una enchaquia ta que Aragón y l’aragonesismo nos faigamos bisteros sin que se nos miren como bichos raros u periglosos independentistas – etarras que portan azeto borico en as suyas buxacas, cal aprofeitar ixe chicorrón cado que bel diya nos dixa o poder.

O Sabado de nueiz marché t’o conzierto folki que nos regaló Santa Flufi. Atamás de bella colla prou aburrida – en a mia opinión – y que no feban que cuatro u zinco cantas cadaguna, o conzierto estió majizo. Y entre Flufis y atrás fateras, Biella Nuei me fazió o primer – y cuasi unico – presén d’a nuei, charrando de l’ausenzia de l’aragonés y o catalán en o nuebo estatuto S.L. antis de fer una canta en aragonés. Bien por els!.

O Domingo en a feria d’o libro, podié beyer bellas nobedaz d’as editorials que siempre me miro: Unaluna, Gara d’Edizions, Malavida, Onagro… Si tenese más perras… M’abié de aconortar mercando o libro sobre l’ansontano y o fagotano que ha feito Miguel Anchel Barcos ta la colezión AINAS y que, fendo-ie una güelladeta parixe tan bueno como lo estudio d’o belsetán que leyié de Chabier Lozano. La fura dels baus crebó a poca tranquilidat que bi eba de maitins con un quemisió – ixo no lo sé definir en garra luenga - de chen penchada de milenta puestos y arañas chigans. Ta qui le faiga goyo colluto.

Plegaba a tardi y paré cuenta que no sabeba ni cuan ni do yeran os conziertos u autos que se fan toz os San Chorches. Y no yera por estar pensando en as mias cosas u por que la calor m’ese regalau os sesos. Yera porque simplamen no bi’n eba. En un año eleutoral no boi a pedir que toque la Ronda, pero bella cosa a lo menos. Cualsiquier. Ixo rai si tornan a tocar os cansos de Carbonell y Carmen París, pero que a lo menos den zirco t’o pueblo.

En zaguerías toda a reibindicazión d’atros años quedó en os Biella Nuei, una mesa informatiba de CHA o Domingo de maitins y a borineta que se formó en o Fierro. Penica de país!

Debantadera de Future Sight

O Domingo de maitins yera o diya: a debantadera de Future Sight, a colezión que remata con o bloque de Espiral d’o Tiempo. Como en as atrás dos colezions marché ta Freakland – cuasi a unica botiga que fa istas cosas en Zaragoza – asperando ubrir bel Akroma u, a lo menos, Engendros de Bogardan, Lajas de Trokair, Vengadora de Serra… Bella coseta que poder cambiar y/u chugar.

As nobedaz en a organizazión me fazión asabelo goyo. Una redometa d’augua ta cada chugador, una carta foil aleatoria ta cadagún y l’aire acondizionau. Antimás no se fazió a fatera de cambiar de mazo y asinas rematemos antis y no nos lebemos o tipico chasco de ubrir cosas buenas y aber-las de pasar. D’o mazo poco bueno en surtió: una Noble fada que nian sabeba que esistiba pero que me fazió buena onra y un Yacimiento de Gemas (prebablemen a millor carta que i pillé). Bella común que m’intresaba y poco más.

En os sobres (tres, de Future Sight) se repitió un diaplerón 2/2 que buela y teneba prisa. L’incombenien, un eco de descartar-se una que tampoco no empreñaba masiau. Tamién i pillé tres bichos (berde, azul y negro) que fan que as tuyas cartas sigan trasgos purulentos, elfos de llanowar u 1/1 boladors. Istas cuatro, chugando con más cartas con demenzia son prou periglosas (si en ese teniu...)

O mazo lo fazié pensando en meter-ie criaturas chicorronas con buelo u desbanezer-se prebando de tener un mazo agresibo. A estratechia, por os resultaus estió entibocada. En que quillaban un pin denzima d’a mesa os míos cucos pretaban a correr u s’esmortezeban por as purnas d’a nueba tierra roya que fote tiros. A millor carta, amás d’o Yacimiento de gemas que me permitió chugar as tres colors en cualques partidas, os diaplez que, de conchunta con o Magofuerza primordial feban asabelo mal. Atrás buenas que chugué o brutal Saqueador il-Kor y a dríada del bosque gusano y o Kraken d’o mar profundo que, si conseguiba pisar a mesa estricallaba a l’oponen en dos enrestidas. A pior, Presagio de Llanowar, que dende a terzer ronda banquileé en que podeba.
Remató o diya con un 2-3, seis puntez, un seizeno puesto (de bentitres que rematemos) y un sobre de Future Sight que me tocó en o sorteu.
Tos dixo con o listau d’o mazo por si querez fer bella soxerenzia u simplamen redir-tos-ne:
1 Draco joven colapúa
1 Sabio de epityr
1 Rayanube ala agrietada
1 Errante il-dal
1 Magofuerza primordial
1 lente prismático
3 diablillo de caverna profunda
2 presagio de llanowar
1 buscar el mañana
1 siembranubes
1 espada de los mansos
1 noble hada
1 exhumador de la cordillera skirk
2 presagio de craneos
1 llamar al submundo
1 driada del bosque gusano
1 mentor de llanowar
1 funerario
1 saqueador il-kor
1 presagio aven
1 blindaje petrificado
1 kraken del mar profundo
1 yacimiento de gemas
4 pantano
4 bosque
5 isla

miércoles, 18 de abril de 2007

Sorpresa, sorpresa!

Iste maitin me soi desayunando con a notizia de que han pillau un fascal de diners y ladrons en Marbella que teneban ambute negozios de drogas y prostituzión. A chen son arrapadas y mesmo bi ha qui diz – “Con Gil no pasaba isto. En que marchó tot prenzipió a ir mal”. Pero qué asperaban? Qué grazia que feba a toz o chonflo facha! Cuan presentaba os programas de Telezinco dende una bañera con un fascal de mozas arredol, a chen se’n arreguiba y lo trobaba simpatico. Dimpués cuan prenzipió a fer y esfer en Marbella se la miraban como una ziudat que yera muitismo millor que no antis. Sin carrilanos, ni mandarras no toda ixa chentota que feba fiera a ziudat. Toz, mesmo qui l’almiraba, reconoxeban que furtaba y especulaba a tot estrús. Pero a els rai porque teneba a ziudat repincha. Y prou que, como se diz en castellano (y de seguras que bi ha bella esprision en aragonés parellana) de aquellos polvos vienen estos lodos.

Cuan a chen xublidan l’arte d’a pulitica (que no ye solo custión de partius) y prenzipia a almirar a qui furta pero “escosca” a ziudat ye de dar que qui bienga dezaga prebará de fer o mesmo. – A iste d’antis le funzionó. Quemisió d’años estando eslexiu una begada y unatra. A yo tamién me funzionará – debeban pensar-se os Cachulis y demás. Pero cuan a mierda prenzipia a pudir masiau, cuan rebute por os chalés y conzellos, belún, por fato que sía, remata ulorando-la y ixa pudor empreña asabelo.
Y tamién son arrapadas as chens por a esferra que fazión ayer dos zagalez en os Estaus Chunius. Como pueden fer serbir as pistolas ta ixo? Pues simplamen porque no se pueden fers serbir ta garra atra cosa! Qui esfienden a libertat de tener armas de fuego dizen que con un cutiello u un auto se tamién se puede matar. Y con un zaborro que trobes por a carrera! Prou que sí! Pero os cutiellos son pensaus ta tallar o pernil – u lo que siga – , os autos ta ir d’un puesto t’atro y os zaborros simplamen son por toz os cabos. Pero una pistola nomás ye pensada ta matar y con os diners que bale, caldrá fer-la serbir! Qui creiga que en l’Estau español somos milllor con o control d’armas, ayer en Telezinco fazión esclatero que no yera asinas. Ta qui no beyese “o parte” fazión un reportache an que, con una camara amagada, un mozet prebaba se fer-se a lizenzia contestando barbaridaz en a preba psicolochica. Dizindo que yera nierbudo, que creyeba que a chen l’isolaban y l’amarguinaban y asinas asinas. A enfermera que bi yera le dizió que, en primeras, no podeba dar-le a lizenzia, pero que rai, que le’n daba de todas trazas…

No me fa goyo fer de saputaz, pero no sé qué sorpresa bi ha abiu en istos dos afers. No’n trobo mica. Son as cosas que pasan cuan se permiten seguntes que situazions puliticas y sozials.

lunes, 16 de abril de 2007

Primers cartas de Future Sight (II)

Contino con os comentarios sobre as cartas, encara que a la belozidat que aparixen nuebas notizias, isto se queda biello en un par d'oras.

- Korlash, Heir to Blackcblade: Atra d'as millors cartas que i aparixerán. En monoblack ya ye colluta, pero con Urborg, tierra aparexida en Caos Planar ya se puede fer serbir en mazos multicolors. Antimás se rechenera y, en estar un zombie tien puesto en mazos tribals (encara que nunca no he bisto garra mazo de zombies. As copias que no podamos fer serbir por tener-ne uno en chuego nos fan onra ta mirar un par de pantanos , si con tot ixto no en estase prou, la dan de baldes en as presentazions! TOTAL! (prenunziau en madaleniense).

- Tombstalker: Ta qui no faiga serbir o zimenterio ta cosa (lo que cada diya ye más raro, y más en os mazos negros) ye un 5/5 bolador por poquismo mana, más que más si emplega fetchs.

- Yixlid Jailer: Ta o banquillo ta poder estricallar os mazos que no fan que tornar-te cosas d'o zimenterio (como ixa Blink que me fazió a tana en o zaguer torneu).

- Arc Razor: En primeras parix prou feble, pero estoi que en una control royo-azul puede fer buena onra. Si a partida dura prou mata china-chana a l'atro chugador.

- Bogardan Lancer: En una Boros podría cullir-ie, encara que me pienso que bi ha millors bichos por ixe pre.

- Homig Sliver: En os mazos de Sliver beyerá chuego de seguras. Puez mirar os millors Slivers contra cada estratechia.

- Llanowar Mentor: Fa que todas as tuyas cartas sigan elfos de llanowar potenzials. Nunca no te quedarás sin mana u bichos 1/1 u elfos (en mazos tribals). Ta yo, una d'as millors infrecuens. Y ta qui en tienga, podrá fer serbir os suyos tokens d'os miticos elfos de llanowar.

- Magus of the Vineyard: Minicombo de seguras y, si l'atro chugador no puede fer cosa con o mana, le ferá un cremau de dos toz os turnos...

- Nacatl War Band: Buenisma per sé si no estase tan cara. Contra os mazos que plenan a mesa de bichos chicorrons muito millor y ta qui yeranos chugando mazos de saprolins (qué pasa?, cadagún pierde como quiere, no?) seremos tremolando cuan nos lo chuguen.

- Tarmogoyf: Con todas as cartas que salen en ista colezión que tienen dos tipos (tierra -criatura y atras cosas más marzianas) iste bicho se puede fer un 3/4 u un 4/5 en o turno dos u tres.

- Virulent Sliver: Con ista m'he feito buena rialleta remerando os mazos de bereno que me feba de chicorrón. Beyerá chuego? Ganará a la fin bel mazo de berenosos bichos?


- Veilstone amulet: Buena traza de continar tenendo toz os tuyos bichos en chuego.

- Tolaria West: Con ista tiengo a duda de si te puez mirar unatra tierra. Si ye asinas, ya podremos completar l'Urzatron, mirar a tierra d'a color que nos manca u ixa que te fa o combo (a Urborg ta Kolash, por exemplo...)

- Nimbus Maze: Una doble que nomás nos fa onra ta bosar os costes dobles. Chugada con dobles ye unatra doble. Intresán y, de seguras, carisma.

Con isto ya he rematau de comentar o primer spoiler parzial, encara que en MagicMadrid ya han publicau o segundo spoiler parzial con atras 75 cartas. Parix que a nueba colezión trayerá muitas nobedaz ta o bloque y o chuego, en cheneral ubrindo-se a nuebas estratechias. Jolio, que bloque, s'han fotiu los de Wizards! Ta tornarnos barrenaus! Nos beyemos en as presentazions, que se suposa que bi abrá en Freakland.

viernes, 13 de abril de 2007

Primers cartas de Future Sight (I)

Ya son salindo as primers notizias sobre as nuebas cartas de Future Sight ("Güellada t'o Futuro"), a colezión que tranca o bloque d'Espiral d'o Tiempo. A cartas aibadas en o tiempo tienen un formato de raso nuebo crebando con toda a tradizión de Magic encara que os creyatibos an dito que ixe no será o "look" futuro d'as cartas. Estoi que ye lo que se gosa dezir un globo sonda, ta beyer como reazionamos a chen. Particularmen o nuebo modelo de carta no me fa mica goyo. Por una bez soi d'alcuerdo con os "puretas". O caso ye que en Rebellion y en MagicMadrid ya bi ha listaus parzials, mesmo con os debuxos d'as nuebas cartas y querría comentar-ne belunas. No he seguiu garra criterio. Simplamen he trigau as que m'aganau y sobre as que podeba dezir bella cosa. As cartas las tenez en as pachinas debanditas.

- Blade of the sixth pride: Igual como en Espiral d'o tiempo fazión una fetch ta pobres (espansión terramorfica) agora preban de tresminar-nos iste Lion d'a sabana ta pobres. Ye comuna y fote tres daños en o terzer turno asinas que, a lo menos, caldrá prebar-la.

- Seth's Tiger: Bella mena de counter blanco que, antimás dixa un bicho en a mesa. Ta yo, una d'as millors d'a colezión. Estricalla de raso cuasi toz os rematadors.

- Ramosian Reanimator: Con ista ya se puede fer o mazo de rebeldes que s'alufraba dende a rechiradera de rebeldes que salió en Espiral d'o Tiempo. Con tot y con ixo tampoco no creigo que se chuguen guaire ista mena de mazos.

- Delay: Simplamen m'ha parexiu dibertida. Estoi que no beyerá guaire mesa abendo-ie Fugas de Mana que cuasi siempre fan o mesmo. A unica utilidat que le trobo ye contra mazos Tron que tiengan prou mana ta que as fugas no les faigan cosa.

- Foresee: A yo me parixe sobrebuena. Amillora a cantidat y a calidat d'as cartas. Y no ye masiau caro de chugar. Caldrá beyer-lo en aizión.

- Spellweaver Volute: En un mazo de purnas ye cuasi un cetro isocrono. Puestar (ye muito prebable de feito) que m'entiboque, pero de seguras que baldrá firmes diners.

- Spin into Myth: En reyalidat ye un antibichos azul, que ixo ya ye prou. Dende a mia ambiesta masiau caro de chugar, pero dimpués de beyer o pre d'o Psionic Blast, cualsiquier cosa.

- Bitter ordeal: Ye clamando a o combo. Encara que no se pillase a "tronada" ya estricalla de raso mazos como Cetro-Canto y atros de combo u mesmo control.

Y ya no me baga de fer más güe. Continaré cuan pueda y tos dixo a imachen d'o token de l'elfo de Llanowar. Sí, ez leyiu bien. Bi abrá tokens d'os elfos porque bi ha unatro elfo que'n fa copias.

martes, 10 de abril de 2007

IX Borina por l'aragonés

Iste biernes, Nogara y Ligallo de Fablans organizan a IX Borina por l’aragonés. Iste año torna t’o Refugio del Crápula an que, como toz os años, se i benderá presiego con bin y se i ferán sorteus de cursos d’aragonés, chambretas, libros y atros materials relazionaus con a nuestra luenga, Ye una d’as pocas ocasions que tenemos os fablans d’achuntar-nos de borina y poder fer serbir a nuestra luenga con tot lo mundo.

Astí se gosan trobar biellos y nuebos alunnos d’os cursos, biellos y nuebos sozios d’as asoziazions y, toda mena de chen relazionadas de bella traza con l’aragonés u con as asoziazions que lo esfienden. Ye una sobrebuena traza de sozializar l’aragonés encara que nomás siga que entre nusatros. Y ta qui no lo prautique guaire asoben, que i baiga y asinas lo esbiella un poquet.

A ixo d’as güeito alto u baxo y antis d’a borina, que prenzipiará a las diez, debán d’o Crapula se i meterán un par de mesas informatibas d’as dos organizazions con mosiqueta, informazión y toda mena d’articlos en aragonés: libros, apegallos, chambretas, discos…Aspero beyer-tos-ie y que podamos fer unas bieras en aragonés y que as dos organizazions continen asinas con iste furo, pero gran treballo que ye a dinificazión y recuperazión de l’aragonés.

lunes, 9 de abril de 2007

A bida a unatra belozidat

He prebau cuasi toz os meyos de transporte urbano, publicos y pribaus. He feito serbir l’auto mientres cuasi toda la mía carrera, que “estudiaba” en o bico de l’ACTUR. Ta puyar-ie de cabo cuan y ta cuasi toda la resta de puestos siempre he emplegau a nuestra quiesta linea roya de pudorencos autobuses. Y, prou que he peteniau Zaragoza por toz os cabos. Fueras d’a moto, que nunca no he menau – bueno una begada, pero millor no remerar-lo – ya sabeba como funzionaban os tres meyos prinzipals de bella cosa tan fazil, y de bez tan difizil, como ye mober-se d’un puesto t’atro.

Fueras d’uno que ye sobre o que quiero charrar güe: a bizi. En independizar-me – u cuasi – y prenzipiar a treballar – con achuste y diners, s’entiende – pensé que amenistaba bel meyo de tranporte fazil d’alparcar, que pribase as tan inquestas entrascadas, que no ese d’asperar mientres oras baxo a plebia, an que no ese de ulorar as aletas de dengún y, si antimás yera ecolochico, millor ta toz…

Ye esclatero que ixo nomás podeba estar que una bizi. Dende allora la foi serbir de contino y m’he trobau con toda una nueba ripa de sensazions, con unatra Zaragoza, bista dende unatra ambiesta, bista a diferén belozidat. As partis negatibas, as conoxidas por cualsiquier que aiga pillau una bizi por A Inmortal – y me pienso que por cualsiquier atra ziudat d’ista grandaria - : os autos que te fan beyer a craba roya, os chiflius continos malas que te ficas en o meyo d’un carril, os foraus por tierra, as costeras, o fumo d’os buses…Pero l’atro costau, o positibo, torna ixo en fateretas.

En cualsiquier puesto puez aturar y fer una güellada por o bico an que yes. Nunca no ebas parau cuenta d’ixe poliu edifizio u d’ixe parque nuebo que han feito fa poco. Istos diyas que l’Ebro baxaba os mayencos ¿abrilencos? -que tamién me fazión beyer a craba roya, pero en Taust – feba firme goyo cruzar os puens y aturar en a metat a beyer-lo tan crexiu y goyoso. A penar d’a costereta, pasar o puen de Piedra dende a marguin cucha fa una bista d’o Pilar amanando-se enta tú bien pincha. En zaguerías, ta qui, como yo, nunca no fa esporte, ye una traza de tornar a fer-ne cabidando tiempo y diners. Agora lo que me cal, ye prenzipiar a fer-la serbir t’atrás cosas que no sigan ir t’o treballo. Recicleta organizó fa poco unas cursas por Zaragoza con un taller d’apaño de bizis que m’ese feito goyo ir. O conzello, tamién de conchunta con Recicleta, ye organizando t’os meses d’Abril, Mayo y Chunio cursas culturals en bizi por bicos zaragozanos u d’os lugars d’arredol. Aspero que astí nos beigamos.

Bella cosa cambea (a la fin!)

Ista Semana Santa estié en Andorra, como toz os años dende fa zinco. Y como toz os años – a lo menos dende fa zinco – se fazió a Rompida, as prozesions y toda ixa mena d’autos relichiosos que se i fan. Encara que no bi abió guaires nobedaz sí que bi abría bellas cosetas que me fería goyo comentar.

A primera ya lebo cualques años beyendo-la y bella bez lo emos charrau entre bels aragonesofablans y no ye atra que o cambio de nombre d’a Rompida. Encara que toda a chen contina dezindo-le asinas, en os pasquins ofizials, guidas turisticas y meyos de comunicazión i aparixe como “El romper”. A primera no ye aragonés, ta qui no’n sepa mica. Simplamen ye un nombre tradizional en castellano no normatibo. Pero unatra begada más, bel saputaz ha dezidiu que ixo sona furo y que se cambea por bella cosa más pincheta, más elegán, más española: El Romper!. Podrían aber-le dito La ruptura de a ora u, mesmo mirando-se enta os andaluzes – que, a lo bisto, ixos sí que charran bien – y copiando a suya madrugá, tornar a baltizar-la como “A Rompía”. Encara denguno no me ha sabiu esplicar ixe cambio y no sé como no bi ha abiu garra protesta en o lugar u en a contornada.

A segunda, y a que más m’importa – ye que, a la fin, bi ha un bar an que se puede sentir buena mosica – u simplamen mosica – mientres fas un ordio. Cuan prenzipié a ir t’Andorra bi eba un chicorrón café que menaban unos archentinos an que se feba bel conziertet y a mosica no yera mala. Ixe café trancó en poco tiempo y, dende allora, toz os bars yeran iguals. Chunda-chunda y más chunda-chunda. De cabo cuan y en bels bars, meteban bella canta de Reincidentes, Platero u Extremo mientres un cuartal d’ora y prou!, unatra begada chunda-chunda. Isto, y a mía delera por a biera, feban que a ormino marchase ta casa bien luego. Pero iste año, dentré en un bar que ha cambiau de mans fa poco y beteme que me trobé con que i meteban Mallacán, Reincidentes, Obrint Pas, Cramberries, Pink Floyd, Iron Maiden, Manu Chao, Macaco y asinas asinas. De tot un poco. Bella bez se i colaba bella coseta más comerzial – La Oreja de Van Gogh, Paulina Rubio, Melendi… - que tampoco no inquestaba guaire. Marché d'o bar cuan i plegaba o Sol y abendo pasau una sobrebuena nuei. O bar estió a rebutir toda la nuei. Talmén no tantismo como belatros, ixo ye bien difizil, pero de seguras que fazión buena caxa. No sé si trunfará - aspero que sí - pero a lo menos agora os andorranos pueden eslechir. Yo no i bibo, pero i conoxco chen que de seguras no irá ta garra atro bar tanimientres iste contine ubierto. Si iz t’Andorra, ye bien fazil de trobar. Dentra en cualsiquier bar d’os que bi ha en o zentro d’o lugar y, malas que sientas una buena canta, ya i yes plegau.

Ah!, y esprisions ta toz y todas =s andorran=s y a resta de baxoaragones=s. China – chana ban cambiando as cosas enta millor; continaz asinas!

miércoles, 4 de abril de 2007

Ordenadors coleutibos

Güe aparixeba en o Periodico d'Aragón una d'ixas pocas notizietas que i meten de cabo cuan sobre zienzia u teunolochía. O conzello, a Unibersidat y o Ministerio d'Educazión han feito un programa de "ordenador coleutibo" ta poder analizar os datos de unas prebatinas que se son fendo arredol d'a fusión como fuen d'enerchía alternatiba. O prochecto consiste en que cada persona intresada meta en o suyo PC un programa que, cuan no se i ye fendo cosa, s'enchega t'o rete y pilla datos d'un serbidor que le'n nimbia. O PC treballa con els, fa lo que calga fer y los torna a nimbiar t'o serbidor, ya analizaus. Ta qui quiera conoxer-ne más u baxar-se o programa puede fer-lo en www.zivis.zaragoza.es. Antimás bi ha premios y se ferá una presentazión de resultaus en Mayo en o Teatro Romano de Zaragoza.
A penar d'os equipos que gosan tener as instituzions y unibersidaz, que se suposan son lo millor, no ye a primer begada que s'han de fer cosas como ista de coneutar asabelo ordenadors ta fer posible l'analís de cantidaz chigans de datos. Dende fa tiempo, a NASA, con tot lo suyo poder tecnolochico, ye fendo serbir PC's de tot o mundo (mas que mas, de toz os frikis d'o mundo) en o suyo programa
SETI (Search for ExtraTerrestrial Intelligence) que se mira de trobar siñals d'intelichenzia que biengan d'a resta de l'uniberso conoxiu. Prexinaz tot lo que puede caler analizar en un prochecto asinas.... Si tamién querez colaborar con iste programa tenez más info aqui.

martes, 3 de abril de 2007

Dos grans libros

Ista zaguera semana, a la fin, saqué una mica de tiempo ta leyer. No ta enantar un par de pachinas de bel libro. Ta leyer de berdat. Con fumarro, biereta y tot. O caso ye que me bagó de rematar dos libros que eba prenzipiau feba bellas semanas y que me han feito asabelo goyo.

La uno yera Ucronía, que ya fablé d’el fa poco, cuan lo publicó Nogará y lo presentó Dabi, o suyo autor. A istoria que i rezenta ye ambientada en l’Anglaterra d’o sieglo XVI y o suyo protagonista ye Tomás Moro, autor de Utopía. Esconoxeba a iste personache istorico y a suya bida igual como esconoxeba as trazas d’escribir de Dabi. Me he trobau con unos d’os millors libros en aragonés que nunca he leyiu. Malas que prenzipias a leyer-lo te bi intresas y quiers continar. Como os buenos libros. Tien aizión, reflesions filosoficas, bella cosa d’Istoria… de tot. O modelo d’aragonés que se i emplega ye bien rico. No se queda en as cuatros paroletas que toz femos serbir pero tampoco no embolica a parla ta que no se i entienda cosa. Antimás creigo que ta la chen que ye aprendendo aragonés ye un buen libro por an que prenzipiar a leyer, encara que aigan de tener un dizionario bien amanau ta mirar-ie as dudas que, de seguras, les surtirán.

L’atro estió “Aspectos morfosintácticos del Belsetán” de Chabier Lozano y Angel Luis Saludas, publicau drento d’a sobrebuena colezión AINAS que edita Gara d’edizions de conchunta con cualques instituzions. En iste estudio trobamos un analís bien ordenau y esclatero d’a parla belsetana. Encara que, en primeras, podría parixer aburriu mirando-se l’endiz, ta qui l’intrese nomás que una miquirrina a luenga aragonesa – u as luengas, en cheneral – i escubrirá todas as carauterisiticas d’o belsetán, a ormino contimparadas con atros dialeutos de l’aragonés (más que más, con os más amanaus).
Asperemos que iste ran de publicazions contine tanto en Nogara, que plega de prenzipiar, como en Gara d’Edizions que, con Ainas, creigo que ye fendo una d’as millors fabors que se podaban fer a ista fableta nuestra.

Nos molamos

En o caramullo d’a barra que contrimostran tener os nuestros puliticos, o Consello de Gobierno d’a D.Ch.A. ha proposau dar o Premio Aragón a os zinco representans d’as collas puliticas que escribión o nuebo estatuto. En iste premio se i incluye a CHA, encara que Chesús Bernal, o suyo representán, ha dito que yera una bergüeña y que puestar que no lo azeutase, cuan les ne den.
Si l’estatuto ese estau millor (que guarda si yera fazil) tampoco no m’ese parexiu ni meyo normal. A qui le parix normal que a chen se de premios a si mesmos? Güe quiero dar o premio “Tierra de Barrenaus” a las mías mans que han picau istos sobrebuenos testos, exemplo platero de a gran literatura aragonesa! No ye surrealista?
No me lo creyeba cuan lo leyeba. Yera una mena de “nos molamos tanto que nos imos a dar a nusatros mesmos un Premio – o Premio Aragón ta más INRI – por fer iste chandrío”. Pero aquí, en ista Tierra de Barrenaus – y de estalentaus – no pasa cosa. A chen contina mirando-se enta atro puesto mientres nos pichan, dizen que plebe y, agora, preban de que recoxcamos qué bien que nos han pichau. A millor pichada que nunca no ebanos bisto. Yqué rica! Be de saber a arañons u a cualsiquier atro licor d’ixos tan dulzes, pero que, a l’atro’l diya te dixan un reseco que no puez nian fablar.
Con tot y con ixo, Marzelino tornará a ganar. Y tornará a fer gubierno con o PAR. Y a CHE continará chitando tierra – tamién en o sentiu castellano – denzima d’os foraus y crepas de Yesa (prou que si bi ha bel tierratremo no i pillará a MI y JAB).
Y a la fin Aragón S.L. continará colonizau, eslanguindo-se, esmortezendo-se… a no estar que bel diya rebellemos y forachitemos a ista colla matutans que tenemos en o poder.