martes, 24 de diciembre de 2019

Bolivia y cancions de nadal. Tierra de barrenaus 6x09

Latinoamerica ha marcau lo camín revolucionario muitas vegadas. Hue, como ahiere, los uellos de muitas de nusatras se chiran enta ixa parte d'o mundo mirando referencias. Prebando de trobar las respuestas que nos fan falta pa poder cambiar lo nuestro mundo mas cercano. Ixo, prou que sí, ye tot un problema pa lo capitalismo. Mas que mas, tenendo a los Estaus Unius tant cerca. Los golpes d'estau y la desestabilización de gubiernos democraticos son parte important d'as ferramientas que fa servir los USA pa desfender los suyos intreses economicos. Bolivia acaba l'anyo, por primer vegada en quasi catorce anyos, sin Evo Morales como president.



Diego Marín, autor de "Bolivia, las voces del pueblo" - libro que ya presentó en Tierra de barrenaus - torna t'o programa pa mirar d'explicar tot lo que ha pasau en istos zaguers meses. Cómo s'ha acabau con lo gubierno d'o MAS (Movimiento Al Socialismo), quí son los nuevos achents que menan lo país y quál ye la situación actual y las posibles conseqüencias, son belunas d'as preguntas que nos faremos.

Atendendo a las calendatas nadalencas que patimos istos diyas, en la parte mas mosical d'o programa tos traigo quatre propuestas. Quatre cancions relacionadas con lo nadal, que s'aleixan d'os villancicos que tanto ferrete nos dan en centros comercials, mercaus, emisoras y botigas. Se'n podría trigar muitas atras bien buenas y regular que qui me leyetz en sabetz quantas, asinas que tos convido a que me las faigatz arribar pa lo programa de nadal de 2020.

Arribamos asinas a la fin de 2019. Aspero que tos faiga goyo iste programa y que, como siempre, me ninvietz los vuestros comentarios y propuestas. Buen cabo d'anyo y felices fiestas!

lunes, 16 de diciembre de 2019

De visita a un Ebro creixiu

Quan, en dias como istos, l’Ebro baixa creixiu, furo y amplo, fa goyo baixar a veyer-lo. Dende la seguridat d’a marguin dreita, a quantos metros d’altaria sobre las auguas, impresiona veyer lo río fendo-nos remerar que lo cauz ye suyo tot entero. Que cada metro que le hemos sacau ye nomás un ampre temporal que nos permite fer servir pero que, en qualsiquier momento, nos puet esfuizar-ne, que pa ixo la tierra ye suya.

Ahiere, como en tantas atras creixidas, baixemos a mirar-nos un d’os nuestros ríos. Lo mas sinyaler. Los patos iban espisguardaus, mirando nuevos puestos a on que estar-se pa aguardar la medolla que les chitan las chubiladas, en un inconscient exercicio de desobediencia civil debant d’as ordenanzas municipals que viedan alimentar a la fauna. Atras aus, manimenos, yeran bien tranquilas. Los pescairetz s’aprestaban a pasar una nueit mas, cada ún en lo suyo camal de l’arbol que levan quantos anyos fendo servir de dormider. Un bernat pescataire, posau un troz d’o camín royo que encara remaniba sobre lo nivel de l’augua, iba pescando lo que pillaba. Tant aprisa que si no yeras bien a la tisva nian parabas cuenta de que s’heba moviu. Y entre lo dormider de pescairetz y lo territorio de pesca d’o bernat, un garrapescaire gran y argüelloso, pareixeba cusirar tot lo río dende una branca que sobreceba de l’augua.

Admirau como siempre por los rapedos cambios que fa l’Ebro en istos diyas, me pensaba en cómo lo vivirían todas las anteriors civilizacions que pasoron por la ciudat. Sin la seguridat que nos dan las infraestructuras actuals. Talment, a la fin, tenesen menos miedo que no nusatras, en saber por la experiencia propia y por la d’as personas mas grans d’a ciudat, dica a on arribarían las auguas. Encara que no tenesen las debantditas infraestructuras, probablement tampoco no las aprecisasen, en no haber estau tant ababols de construyir en puestos que sabeban que, de cabo ta quan, s’engaronaban.

No ye l’Ebro lo solo río que he visto creixer en la mia vida, afortunadament. Y en atros cabos, he visto arrigachuelos que, de rapiconté, esdeveniban un flumen d’augua que arramplaba con tot. Ye imposible no sentir miedo debant de fenomenos asinas, que te recuerdan la febleza propia y la frachilidat d’as nuestras bambosas construccions.

Manimenos bi ha una polideza salvache en veyer lo río asinas, desafiando a qui preba de domesticar la tierra en cuenta de aprender a convivir con ella. Dragaus, paretz, azutes y demás costodias no son que nyapas pa pareixer que se meten solucions a los problemas de qui vive cerca - u adintro - d’o cauz. La chestión fluvial ye atra d’ixas cosas que no se pueden solucionar a pur de cimento.

Muitos d’istos afers - lo funcionamiento d’o río, lo tresoro de vida que i aculle, la (in)utilidat d’as infraestructuras - no me las amostroron de mas choven. He habiu d’aprender-las dimpués, y gracias en buena parte a la chent que ha invertiu parte d’o suyo tiempo en ensenyar-me-las. En la ciudat d’a Expo de l’augua y en lo país de rios que ye Aragón, habríanos de tener muito mas conoiximiento sobre lo tema, y no recurrir de manera acritica a la cantidat de topicos desinformaus que se puet sentir en los partes y rufiertas d’os medios. Recursos educativos, n’i hai a trompicuesco, y nomás cal investigar bell poquet pa trobar-los. Conoixer los ríos ye conoixer una d’as partes mas importants d’o país, obligación pa qualsiquier que diga amar Aragón y lo suyo paisache y una buenisma manera de disfrutar mas d’o nuestro entorno.

lunes, 9 de diciembre de 2019

Lo Midi d'Osal y la 11K de La Cartuixa. Tierra de barrenaus 6x08

Lo mío contacto con l'esporte ye bien recient. No pas tanto con la montanya. Visité lo Midi d'Osal (Mieidia d'Aussau en occitán, Midi d'Ossau en francés) en l'anyo 2008 y me pareixió un d'os puestos mas polius que he visto en muitismo tiempo. Asinas que quan vide que Dani lo heba escalau iste verano, a escape querié saber-ne mas. Como d'escalada no en sé ni zarapita, decidié contactar con Rubén, con qui aspero poder fer antes con antes los mios primers pasos en ista disciplina, pa que m'aduyase. Entre totz dos facioron ista primer sección sobre escalada que aspero poder repetir antes d'acabar la temporada.



Explicamos nocions basicas sobre iste esporte pa toda la chent que, como yo, no lo ha practicau nunca. Tot, contextualizando-lo adintro de tres puyadas que Dani fació de verano en tres puesto muit sinyalers: los Mallos de Riglos, lo Parque Nacional d'Ordesa, y lo debantdito Midi d'Osal. Una sección que aspero tos faiga goyo tanto a las escaladoras como a las que no, y que me resultó a saber qué intresant.

En la segunda y muito mas chiqueta parte, voi con un esporte que sí que practico: lo correr. Qui me sigatz, sobre tot en Youtube, ya sabetz que goso de participar en corridas populars siempre que puedo. Una d'ellas, la de La Cartuja-Espacio Alfranca ye la que protagoniza ista primer sección que foi sobre lo running. Ye una preba que he corriu iste anyo por tercer vegada (d'as quatre edicions que leva celebrando-se) y que le he preso firme carinyo. 

En la parte mosical, tos presiento un d'os discos de l'anyo, que seguirá sonando ¡y muito! tot lo 2020. Una choya d'un d'os grupos que ye agora mesmo en lo suyo millor momento. Antimás, tendremos la segunda versión adintro d'as cancions trestalladas. Un clasico reconvertiu a lo punk d'ixos que cal conoixer.

lunes, 2 de diciembre de 2019

Victoria Invent plora quan le leyen en catalán

Prener-se dos minutos pa comprebar si las cosas que se leyen tienen alazetz de verdat, u si puet haber-ie bella motivación ye una cosa bien sana. Si antimás lo que leyemos ye en Twitter, ixe puesto fosco, pleno de respuestas facils, slogans y grometas de buena circulación y replicación, ye quasi obligación. Lo que se presienta como un drama personal y conmovedor, un patir de man d’una entregada mai que nomás quiere lo millor pa la suya cachimalla, en que esfonsas bell poquet, esdevien una campanya lingüicida. No sé guaire bien cómo, n’amaneixió fa bell día en lo mio timeline iste buen eixemplo.

Lo drama empecipia con una persona que tuitea:

Acabo de tener esta conversación con una amiga. Para que entendáis lo que padecen los niños castellanohablantes en una escuela donde no se les permite dar rienda suelta a su lengua materna. Nadie les pregunta a los que verdaderamente sufren la maldita inmersión lingüística.
Hoy tenía que leerle dos libros a Victoria, uno en castellano y otro en catalán. Cuando le he leído el primero, estaba súper atenta, ponía esa carita inocente que ponen los niños pequeños, como la de un bebé cuando descubre algo interesante. Ha estado escuchado con mucho interés e incluso entusiasmada hasta el final.
Cuando he empezado con el segundo, no había llegado a la segunda página que ya estaba dispersa, nerviosa, no quería escucharme. Incluso me ha dicho “no me gusta”. Y entonces me he puesto en su preciosa piel y me ha dolido pensar lo que sufren en el colegio, teniendo que familiarizarse todo el día, desde que entran hasta que salen, escuchando todo el día una lengua con la que no se identifica.
¡Qué manera de pasar d’Arcadia ta Mordor! Lo primero que piensa un, quan leye cosas asinas ye que ye un INVENT como los mallos de Riglos de gran. Piensa tamién, en si la criatura no sufre con las mates. Si le “entusiama y escucha con mucho interés” lo calculo, pero pateixe l’alchebra en estar una parte d’as matematicas con la que no s’identifica. ¡Maldita inmersión matematica!

Historias como istas, a on que las fillas y fillos de belun se fan servir como vehiclo pa ixemenar ideolochía, n’hemos viviu quantas ya. Todas recordaretz lo mitico “no te lo perdonaré jamás, Carmena” u las charradas entre Rocío Monasterio y la suya filla sobre l’Achencia Tributaria.

Conmoviu por lo relato, y por “l’acoso faixista” de man d’os independentistas que denunciaba en lo siguient tweet, siguié leyendo iste intresant relato. Me preocupaba la salut de Victoria seriament. No habié d’aguardar guaire, pocos tweets mas abaixo trobaba la respuesta a qualsiquier dubda que tenese. Ella mesma me confirmaba qual yera lo problema real d’a nina en istas parolas:

A todos los que me decís que cuando aprenda inglés va a flipar:
No, el inglés es una lengua útil y necesaria al contrario del catalán, que se ha convertido en un arma arrojadiza al servicio del nacionalismo. Ah, y suena cacofonico.

Lo problema no ye que la nina “pateixca la inmersión lingüistica”. Si fuese en anglés, no tendría garra problema. Probablement, mesmo se’n fese la bamba. Lo problema ye lo catalán, ixa luenga que, igual como l’aragonés, l’asturiano, lo vasco u lo gallego, “son inutils y innecesarios y nomás existen como armas a lo servicio d’o nacionalismo”. Si a la nina le leyes lo cuento en anglés, entenderá dende “Once upon a time” que ixa luenga ye necesaria y util y que no sirve a lo nacionalismo de dengún. Probablement faiga "ixa careta inocent que fan los ninos quan descubren qualcosa superintresant". Y, qui sabe, igual amaneix Mary Poppins y se meten a ordenar la cambra cantando Spoon full of sugar.

Lo que le pasa a ista persona tien un nombre, que ye catalanofobia. Y que si vivise en lo país nuestro sería aragonesofobia, en EH, vascofobia y asinas-asinas. Porque la sola luenga, cultura y identidat nacional que permite, mesmo la sola que talment concibe, ye la espanyola. Lo castellano, pa ella no ye un arma, a pesar d’o que ya le deciba Nebrija a la reina Isabel de Castiella en 1492, que “siempre la lengua fue compañera del imperio”.

Pa ista persona, toda la resta de luengas d’a peninsula, y si le’n preguntasenos muitas atras d’a resta d’o mundo, son cosas inutils y innecesarias. Y las cosas inutils y innecesarias ya cal fer-las dispareixer, que no fan que estorbo. Tot ixe patimonio, que ha conseguiu sobrevivir a sieglos y sieglos d’aculturación d’una manera quasi miraglosa, ye un entrepuz. Como en ye un repoliu conchunto arquitectonico industrial de finals d’o XIX, podendo fer-ie un util bloque de pisos. U un chacimiento arqueolochico d’o neolitico a on que podría fer-se un cumo pa lo bestiar.

Si dimpués continas leyendo los suyos tweets te trobas, cada vegada con menos sorpresa, una ripa de afalagos a partius y organizacions d’extrema dreita. Pero pa ixo, cal fer clic. Cal perder ixe minuto que la mayoría no pierde. Lo primer tuit que comentaba a fe que ha circulau por collas de WhatsApp de AMPAS y equipos de futbol de ninos, denunciando lo “salvache adoctrinamiento” d’a escuela catalana. Dibuixando un país pleno de ninos plorando cada vegada que lo mayestro les diz “obriu el llibre per la pàgina…”.

Cal saber lo que bi ha en lo fundo d’istos argumentos y, malas que fas dos u tres preguntas, se fa evident que lo crío, la cultura u lo patrimonio, les tiene igual. Que lo que se quiere ye acotolar qualsiquier expresión cultural que no encaixe en la suya chiqueta envista d’o mundo. No nos callemos. Los suyos argumentos son de culicaiga y de muit buen desmontar. Y ye tant simple como recurrir a la comparación con l’anglés. Si lo que les pareixe bien en castellano u anglés les pareixe mal en una luenga minorizada, ye por simple y puro nacionalismo lingüistico.

sábado, 30 de noviembre de 2019

Lo punto follet (Microrrelato de Licer)

Los puntos. Fuesen como fuesen, los puntos siempre emprenyaban a Licer quan yera chiquet. Acababa una oración y ¡pum! un punto yera astí pa fer estorbo. Quereba seguir charrando. Quereba que las diferents unidatz de sentiu venisen a l’arreu. Sin entrepuces que li fesen aturar, que trencasen lo ritmo que quereba conseguir. Mesmo a las comas, las suyas primas mas tolerants, les teneba una mica de quimera. “Si no existisen, talment los puntos no se creyerían con tantos dreitos”, pensaba a sobén. 

Levaba varrenaus a los suyos profesors con tanto refús a los puntos dica un nonidi de Floreal, quan li’n dioron un de diferent. Que no yera por tierra. Que flotaba y se calaba entre las letras, sin fer-les estorbo, nomás cambiando bella miquirrina lo suyo soniu, y ubrindo-li nuevas posibilidatz foneticas. De mas gran acceptó, como totz los folletz, lo sistema de puntuación. Pero nunca no ixuplidó aquell suyo primer punto volau.

Iste microrrelato ye protagonizau por Licer, un d'os personaches d'o mio libro Parola de follet. Si quiers saber-ne mas clica aquí.

lunes, 25 de noviembre de 2019

La Catalunya post- sentencia y mas relatos. Tierra de barrenaus 6x07

Ya ha pasau mas d'un mes dende que la sentencia d'a chusticia espanyola condenase a penas que arriban dica los tretze anyos a los presos politicos catalans. La reacción de man d'a suya sociedat no se fació asperar mica. Los CDR y lo Tsunami Democràtic, un nuevo achent en lo conflicto, son dinamizando una respuesta que ye tot un eixemplo de desobediencia civil. Manimenos, dende los medios de comunicación espanyols se nos amuestra un mundo de tot diferent a la realidat. Somos vivindo un d'os eixemplos mas caboliosos de guerra mediatica. Asinas que dende las mias posibilidatz, prebo con iste programa de fer la mia parte - la d'o colibri - pa crebar ixa desinformación.



En iste programa entrevisto a Chorche Romance, periodista aragonés y blogger que vive en Barcelona dende fa anyos y que tanto por la suya profesión como por las suyas inquietutz politicas conoixe de firme tot lo que ye pasando en Catalunya con lo suyo proceso independentista. Charramos de politica, información, represión, organización social y mesmo d'a vida cutiana en la suya ciudat. 

Ent'o cabo d'o programa, locuto un d'os relatos que mas goyo me fació d'escribir en lo suyo diya. Tercer d'una serie que clamé "Las transformacions" y que empecipioron como un exercicio d'un taller de creación literaria. Lo zapo ye ambientau con la canción "We all stand together" de Paul McCartney, que me traye a-saber-las remeranzas de quan yera chiquet. Creyeba que lo tema yera bien conoixiu, pero bete-me que entre la chent d'a mia cheneración que he preguntau, bien pocas la conoixeban.

En la parte mosical, dos propuestas, como quasi siempre. La primera, una nueva banda con disco fresquet d'iste verano, y una chira que acaba d'empecipiar. La segunda, una nueva "Canción d'antes mas" d'un dos grupos mas influyents d'Aragón en lo cambio de milenio.

domingo, 17 de noviembre de 2019

Lo chilo d'o sereno y atras historias d'a radio. Tierra de barrenaus 6x06 Especial d'Estrela a estrela

La radio lo resiste tot. Qualsiquier revolución comunicativa y tecnolochia que bi haiga habiu dende que se inventó ha arramplau con tot. Pero la radio contina con la mesma vida de siempre. Cambea, prou que sí, como tot en ista vida. Adaptando-se a internet y los dispositivos portatils. Y tamién a las modas comunicativas de cada momento. Pero en lo basico, sigue igual.



La novena edición de D'estrela a estrela se celebró iste 16 de noviembre. Tot un diya a on que la programación de Radio Topo, dende lo maitín luego dica la nueit, se fa de raso en aragonés y catalán, las dos luengas propias d'Aragón. Tenié la oportunidat de compartir lo mío programa con Miguel y Dabi, atros dos apasionaus d'a radio que participoron en lo mitico -y breu- programa de A hora charrante.

Miguel, antimás, ha empecipiau un nuevo prochecto radiofonico en Zintzilik Irratia de Errentería, El grito del sereno, a on que fan bella mena de late night bien divertiu. Nos presienta lo suyo programa y, chunto con Dabi recordamos A hora charrante, charramos de fer radio y tamién d'ascuitar-la, animando a toda la chent a que aproveite los recursos tecnicos que tenemos tant a man actualment y empecipie a fer lo suyo propio prochecto.

jueves, 14 de noviembre de 2019

Behobia - Sant Sabastián. 20 km de buena vibra

Haile Gebrselassie en la Feria d'o corredor

Quan empecipié a correr fa bells quatre anyos, no podeba entrefilar-me lo mundo que se me ubriba. Yo, que no heba feito esporte dende l'instituto, yera a los pocos meses mercando todas ixas cosas que me pareixeban fateras de postureo runner. Quan un amigo me convenció pa participar en la mía primera 10 K, tampoco no esmachinaba que bell diya ixo se tornaría una parte tant important d'a mía vida. Y quan ista primavera, dos amigos me proposoron d'apuntar-nos a fer la Behobia-Donostia, encara no yera conscient d'a dimensión d'ista preba.

La B/SS ye una corrida a on que se recorren los vinte kilometros que i hai entre Behobia, muit cerca d'a muga entre los estaus espanyol y francés, y Donostia. Iste anyo se celebraba los cien anyos d'a primer vegada que se facióm, quan vintidos giputxis la corrioron arribando a rematar-la catorce d'ells. Se n'han feito cinquanta y cinco edicions, ya que los primers anyos no se celebraba anyalment. En la edición d'estianyo, estiemos mas de trenta y tres mil las personas inscritas. La corrida ye bien conoixida por la dificultat tecnica en tener bella costera una mica fura, pero sobre tot por l'animación y l'ambient que i hai en tot lo recorriu.

N'heba sentiu charrar a-saber-lo. Antimás, soi un enamorau de toda ixa zona, asinas que caleba lo menos prebar de fer-la una vegada en la vida. Manimenos, en veyer lo perfil y l'altimetría m'entró un miedo que pa qué. Voi chusto pa acabar las meyas maratons, y ixo que las dos que he corriu son la de Zaragoza, a on que las costeras no son ni dignas d'ixe nombre. Con tot y con ixo teneba tot lo verano pa entrenar, asinas que empecipié a treballar firme. A dos semanas d'a corrida me pillé un catarro bien furo que me deixó sin baixar t'a carrera una semana. Pa forro de bota, l'orache daba plevidas, airera, fredor y quasi un apocalipsi. Asinas arribé ta Donostia. Creyendo que lo tendría bien dificil pa rematar-la. Por si todas ixas penas no fuesen prou, la vispra d'a corrida dormié fatal, devantando-me terne que terne toda la nueit.

Todas ixas penas y miedos se'n fueron de camín malas que empecipió la chornada. Ya en lo "top", lo tren que nos portiaba de Donostia ta Irún, l'ambient iba calmando las mias temors. Talment no rematase los vinte kilometros, pero a fe que pasaría un sobrebuen rato.  Por lo camín d'a gara t'a salida tot yera gromas, risas y buen rollo. Lo ciel yera gris de tot y la temperatura bien baixa, pero a lo menos la plevia nos respetaba. Tot y que sabeba que yeranos decenas de mils de personas participando-ie no podeba fer-me a la ideya d'o que m'aguardaba quan arribé a Behobia. Organizar a ixa patacada de personas, con tot l'orache en contra y que antimás salise tot bien, me pareixe tot una chesta. Saliba con un d'os zaguers grupos asinas que tenié tiempo pa ascuitar-me tot lo que los djs querioron proposar-me y trobar-me con bell atro aragonés que dondiaba por astí.

A la fin facioron lo sinyal. Hebanos d'ir t'a salida y l'orache, que dica alavez yera tranquilet, decidió que yera hora d'acabar con ixa calma y pretó a plever. Quedos, en la salida, nos ibanos chupindo. L'augua se fació pedretas y ya renuncié a toda asperanza de correr ixuto. Cosa que, d'atra man, heba asumiu la nueit d'antes. Highway to hell, tot un clasico d'os DJs d'o running sonó por megafonía y saliemos escopetiaus. Por las ganas d'empecipiar y, tot cal decir-lo, por sacar-nos la fredor que encomenzaba a arribar-nos dica la gosaralla.

En los vinte kilometros podié certificar la fama d'a Behobia. Las costeras no yeran tant temibles como heba esmachinau, pero sí duras y largas de fer. Cal tener prou serenidat pa no cremar-te en ixas primers puyadas y poder acabar la preba tranquilament y disfrutando-la. Lo paisache teneba de tot: lo mont, con las repolidas colors de l'agüerro, la Eukal Herria industrial d'a costa y lugars bien pinchos. A los dos costaus d'o camín que recorrebanos, la chent animaba con una rasmia que nunca no he visto en garra atra corrida. Tanimientres repasaba mentalment los puertos que iba pasando: Ventas, Gaintxurizketa, Capuchinos... Sabeba que si arribaba a Miracruz, yera tot feito. Lo que me quedaba yera en baixada y con a-saber-la animación seguntes deciba la web.

Una vegada mas, la Behobia no fació burro falso. Los zaguers kilometros estioron tot un corredor de chent animando. Las carreras de Donostia, por a on que tantas vegadas he dondiau, me recibiban ista vegada d'una manera de tot diferent. Arribaba con fuerza mesmo pa accelerar bella mica y prener lo mio ritmo d'as 10K. En la meta, muita emoción compartida entre totz los que hebanos empecipiau lo maitín en Behobia y la chent que nos aguardaba en Donostia. Nian heba parau cuenta d'os eslardons que levaba dica que me mudé.

Definitivament, la Behobia - Donostia sí que ye una corrida diferent. Por lo recorriu, por la suya intresant historia (que prebaré de recontar proximament en lo programa de radio), por los retos de futuro que se proposa, como la iniciativa 50/50/25, pero sobre tot por lo sobrebuen ambient que imple ixos vinte kilometros.

Como las buenas cosas d'a vida, lo bueno no ye nomás tastar-las, sino poder gronxiar-te con todas las sensacions que te puedan ofrir. Fue t'a Behobia con muitos miedos y muita ilusión. Los primers han marchau pa cutio y soi seguro que la siguient vegada que traviese ixa linia de meta lo faré con tanta u mas ilusión que iste anyo.

lunes, 11 de noviembre de 2019

Viache ta Mostar y 40 anyos d'Aviador DRO. Tierra de barrenaus 6x05

En lo primer programa de noviembre, empecipiamos con una miqueta de road movie. Un viache d'ixos que pa yo, que tiengo menos mundo que los personaches de Paco Martínez Soria, son de tot fascinants. Mario nos parlará d'a suya experiencia fendo 6000 kilometros en furgoneta, con la suya parella y un borche, dende Zaragoza dica Mostar, traviesando buena parte d'Europa. Conoixeremos bella particularidat de Croacia y Bosnia, con la envista d'una persona que i estió fa 15 anyos y que ha puesto comprobar totz los cambios que bi ha habiu en iste tiempo.



Lo segundo gran tema d'o programa ye centrau en Aviador DRO, una banda que en 2019 ye celebrando los suyos 40 anyos en activo. Dende que empecipioron en 1979 han viviu cosas arrienda. Sin aturar ni un solo momento y siempre preixinando nuevas cosas a fer. Lo aniversario ha serviu d'enchaquia pa publicar un sobrebuen libro que recomiendo a-saber-lo, mesmo pa qui no conoixcatz guaire la banda: Anarquía científica: La fascinante revolución tecno del Aviador DRO. Antimás, son fendo una chira que pasó por Zaragoza iste 4 d'octubre a on que sonoron muitos d'os suyos temas mas sinyalers y que deixó a tot lo publico que i yeranos una sensación sobrebuena.  Puetz veyer bell momento d'o concierto en lo video que pencho abaixo.

En la parte mosical, tos proposo la segunda canción Lololo, d'una colla que en tien quantas. Y prou que sí, cal charrar d'o fenomeno mosical d'as zaguers semanas. Si vives en una espluca y encara no t'has enterau d'o disco de reggaeton en aragonés cheso, tendrás la oportunidat de sentir lo suyo temazo "Chomeca con mí". ¿Prestas pa un nuevo programa en aragonés muggle?


jueves, 31 de octubre de 2019

Madurar #Inktober 31

Lo gran artista Rigoberto Ferrán i Virgili teneba de tot ixuto lo suyo arbol d’ideyas. Lo chardiner d’o suyo tozuel pasaba totz los maitins, a la hora d’a meditación, a mirar si bi heba habiu bella plevia la nueit d’antes que hese puesto fer fruitos nuevos. Ni que fuese un chito. Pero dende tiempo habe, cosa no medraba en garra d’as brancas d’ixe arbol. Nomás una ideyeta. Un barrunto talment. Chiqueta, quasi imperceptible. La sola asperanza que les quedaba a qui viviban en ixe cerebro.

Levaba tiempo cudiando-la. Heba iu medrando china-chana. Tant a monico que n’heba parau cuenta medindo-la, no pas por la suya observación cutiana. La ruixiaba y la abonaba. Mesmo si por bella malotía u una simpla resaca lo ciel d’a suya ment se meteba fosco, enchegaba luces artificials pa que abanzase lo suyo creiximiento. Pero nunca no acababa de madurar. Si seguiba asinas, nunca no sería una ideya util. Que podese fer-se realidat. Implementar-se en lo mundo fisico que tanto n’aprecisaba de nuevas.

Lo gran artista Rigoberto Ferrán i Virgili, como totz los grans artistas, viviba d’as suyas ideyas, que agora yeran inexistents. Lo cheque que la zaguera le heba conseguiu empecipiaba a quedar-se sin fundos. Ixe nadal lo banco no le ninvió la cesta con los turrons, lo cava y lo pernil. Nomás una tarcheta con un Papa Noel y una fuella con las ufiertas de microcreditos express. En la suya capeza, la preocupación empecipiaba a fer esferras. Los habitants sabeban que sin ideyas no bi heba buena birolla que nutrise las neuronas, ni viaches que ubrisen la ment, ni exposicions, conciertos u experiencias d’atra mena. Preboron a fer obras como un azute, que portiase mas augua ta l’hortal, y que acabó esbarrando lo riu mesmo mas leixos. U una plantación de matullos que provocó una plaga de vriespas que se foteban tot lo dia fizoniando-les.

Lo chardiner, que yera mas calmau y que, a diferencia d’a resta d’habitants d’aquell tozuel, le feba goyo de reflexionar antes d’actuar, determinó que ixa ideya no maduraría a tiempo. Las cifras d’a cuenta corrient yeran por cada día menos, igual como la calidat d’a birolla, d’as drogas y d’os suyos suenios. No le quedaba atra solución que crebar con los suyos prencipios morals. D’a tierra que teneba fació una maseta y le empecipió a dar forma. Con cudiau pero sin aturar-se ni un segundo mas d’o que calese. Sabeba que no le quedaba guaire tiempo. Le dio color, sabor y ulor. Y la rugosidat que aprecisaba. Qui no fuese guaire agudo, qui no fese guaire ficancia, no pararía cuenta de que yera una copia d’una ideya d’otri. Que yera artificial, no pas una ideya natural, creixida de l’hortal d’o gran artista Rigoberto Ferrán i Virgili. Por si un caso, bi anyadió un chicorrón detalle, que garra uello no experto captaría, que la diferenciase una chisla d’a ideya que remedaba. Lo chardiner sabeba que ixo yera una autochustificación pa poder convivir con la profanación que cometeba. Prenió la “ideya” ya remataba y la lanzó t’o mundo asperando que funcionase. Ixe estió lo primer d’os muitos plachios d’o gran artista Rigoberto Ferrán i Virgili.


Iste relato fa parte de l'Inktober literario en aragonés de 2019.

miércoles, 30 de octubre de 2019

Capturar #Inktober 30

Lo maitín d’un día de febrer todas las gavias de Rolando amaneixioron ubiertas. Lo treballo de anyos arrienda s’heba malmeso en unas horas. Una fayena que empecipió con firmes ganas y baruca y que agora bell ababol heba conseguiu que fese fallita.

En tot lo tiempo d’os suyos estudios teneba la mesma basemia: conseguir escardar la luenga. Deixar-la sin todas ixas parolas que le sobraban. Ixas que feban fiera la parla que tanto amaba. Malas que podió, empecipió a trigar-las. Ista sí, ista no. Ixa sonaba bien. Ixa atra, malament. Yera decidiu a escoscar tot lo lexico que feban servir los fablants. Consiguió la tecnolochía que aprecisaba y mesmo en desarrolló de nueva. Aprestó las gavias en una reformada bodega de casa suya y empecipió la cacera. Dende la A dica la Z, fue apresando todas las parolas que consideraba periglosas. Dende ixe día, dengún no las tornaría a decir.

Lo “leito ecolochico” que deixaban, no tardaba a ocupar-se. De camín, atras parolas empecipiaban a fer-se mas grans emplindo l’espacio vuedo. Atras vegadas, yeran nuevos vocablos los que decidiban luitar por un nuevo terreno a on que poder creixer. A istos, en estar febles, los acotolaba de camín. “Si belún hese feito isto antes, no me tendría agora tantisma fayena”, gosaba de pensar.

L’administración le’n agradeixió, prou que sí. No se podeba consentir que las parolas fuesen por astí a la bimbola, prenendo significaus que dengún no les heba dito, u chuntando-se a sufixos que a saber a ón heban estau antes mas u con qué atra parola s’heba uniu. ¡Mesmo n’i heba que se barrachaban con parolas d’atras luengas! Rolando heba resultau un gran colaborador en lo suyo plan.

La nueit d’antes d’ixe maitín de febrer, como todas las nueitz, repasó las gavias. Sentiba una gran pudor cada vegada que veyeba y sentiba todas ixas parolas, pero heba d’asegurar-se que denguna no s’heba eslampau. Astí yeran luitando por salir, por fer-se sentir, por arribar en las orellas, bocas y capezas d’os parlants. Por que belún las prenunciase.

A l’atro día de l’atentau ya s’heban ixemenau por tot lo país. De nuevas se ascuitaban por bars y botigas. Por las carreras, los parques y los centros d’estudio y treballo. Cada una que sonaba yera un cutiello clavau en lo cuerpo de Rolando.

Las autoridatz no tardoron guaire a trobar a la culpable. Ni s’heba molestau en amagar guaire lo suyo rastro. Un analís lingüistico d’a zona a escape fació evident d’a on saliba toda ixa disidencia lexica. Lo chuicio-express la condenó por “terrorismo lingüistico” y Rolando habió d’encomenzar de nuevas la suya fayena pero las suyas ferramientas fallaban. Las parolas se le eslampaban d’os dispositivos de captura. U quan creyeba tener-las presas, unatro eixemplar igual amaneixeba por belatro cabo.

En ixas gavias, todas aquellas parolas proscritas chuntas, heban teniu tiempo pa charrar y charrar. Heban preso la decisión de no deixar-se agafar nunca mas. De reproducir-se en que tenesen la minima oportunidat. Farían lo que calese: mezclar-se, disvrazar-se u amagar-se pa quan venisen millor tiempos. En morir Rolando, dengún no prenió lo suyo relevo y tot lo vocabulario corrió libre y sin miedos por lo mundo. Las que heban pasau por la suya garchola nunca no tornoron a estar las mesmas. Se les notaba en la etimolochía. Los suyos fillos, manimenos, siguen hue entre nusatros, indistinguibles de qualsiquier atra parola.


Iste relato fa parte de l'Inktober literario en aragonés de 2019.

martes, 29 de octubre de 2019

Lesionau #Inktober 29

A la hora que se foteba lo tiro que indicaba lo prencipio d’a corrida, Chulián yera en casa veyendo la televisión. Un mensache arribó a lo telefono: “Isto empecipia”. Contino, una foto d’a salida. “Te trobamos a faltar”. Yera la novia d’un d’os suyos companyers d’entrenamiento. I amaneixeba un flumen de chent, totz con lo fosforito vestuache d’os runners. La Behobia-Donosti yera una d’ixas corridas que totz en charraban meravellas. L’ambient, lo recorriu, la dificultat, la tradición… feba que fuese una preba bien especial pa muitos d’os suyos companyers d’o club.

S’heba estau entrenando de firme con totz ells por meses. Heba empecipiau prou floixo. Tasament adubiba a fer una 10K y en poco tiempo heba d’estar fendo lo doble de espacio y, pa forro de bota, con a-saber-las costeras. Ell, que yera feito a correr por una ciudat plana de tot. China-chana fue baixando tiempos. Entrenamientos de fuerza, series, exercicios de toda mena… y dimpués la millor parte: las bieras en lo bar solucionando los problemas d’o mundo.

Dica que arribó lo d’o clavillar. A pocas semanas d’a corrida, quan heba puyau d’os quince kilometros qualques vegadas, le empecipió a fer mal lo clavillar. Lo medico no le trobó cosa, pero yera incapable sisquiá de caminar guaire. Tot lo día coixín-coixand. Dimpués de bell tiempo seguiba igual. En la Seguridat Social no conseguiban dar con lo problema, asinas que empecipió con atras alternativas. Los companyers, que en lo club en yeran buena ripa, le recomendoron de tot: acupuntura, homeopatía, flors de Bach, reiki… Cosa no funcionó. Lo día s’acercaba y Chulián continaba sin poder correr. “Mesaches, no me queda tiempo ya. Venderé lo mio dorsal agora que encara puedo. Aspero que tos lo pasetz muito bien y alcordatz-tos de ninviar-me fotos” les escribió. A escape trobó qui le’n mercase. S’heban acotolau bell mes antes y n’i heba firme demanda.

Atro mensache: “Los chicos ya han pasau por l’arco de salida”. Chulián lo leyió. Fació un surbo d’o suyo café. En totz ixos meses, lo que heba empecipiau como un simple entretenimiento heba arribau a estar toda una disciplina que le exichiba a-saber-lo tiempo y esfuerzo. Pensó en los suyos companyers que tanto sudor heban vulcau en ixa corrida. Talment ixa tarde salise un ratet a correr. Lo tiempo que querese a lo ritmo que podese. Por puro placer. Ya heba pasau lo periglo. Nunca no arribarían a saber que yera fendo momenazas y en realidat no yera lesionau.

Iste relato fa parte de l'Inktober literario en aragonés de 2019.

lunes, 28 de octubre de 2019

Red RIADA y Festival contra la despoblación. Tierra de barrenaus 6x04

Foto: Os choperos barrenaus
Decadas de gubiernos espanyols y aragoneses no han conseguiu aturar la despoblación y la esferra demografica que pateixe Aragón. Como en tantas atras qüestions, las solucions las ha iu aportando lo pueblo siempre a pesar de l'administración que a sobén no fa que meter entrepuces u fer nyapas. En zagueras, la qüestión demografica ha conseguiu mas presencia en los debatz publicos. De vez, creixen las iniciativas populars pa mirar de trobar maneras d'acabar con lo problema y que toda la chent pueda vivir a on que quiera.



Una d'ixas iniciativas ye la Red RIADA, naixida iste mesmo anyo, y que arrocla a chent de tot lo país. La suya primer trobada estió en Burbaguena en marzo, y la zaguer asembleya se celebró iste octubre en Allepuz. Un foro bien intresant y con muito potencial pa chenerar sinerchias entre toda la chent que treballa en los suyos lugars y comarcas por un futuro digno. Entrevistamos a Anchel, un d'os participants, que nos recuenta cómo s'organiza y en qué consiste ista iniciativa.

Que se fese en Allepuz la suya asembleya no estió casualidat. Se i celebraba lo segundo Festival contra la despoblación dimpués d'una primer edición que estió tot un exito y que ya en charremos en Tierra de barrenaus radio. En ista segunda convocatoria tornoron a fer-se mesas de debatz, exposicions, actividatz pa toda la familia y una chenta popular. De tardes, un concierto con un cartel que tardaremos a veyer-ne uno tant bueno: Hormigón armado, El rincón del arte, La Ronda de Boltaña, Los Draps y Huntza. Conoixeremos de man de David y Fer cómo fue ista chornada tant especial.

Antimás, presiento la quarta y zaguer categoría mosical, con un grupo que, tot y tener una vida bien breu, fació historia y un temazo que cal ascuitar. Y mas mosicas y historieticas. Aspero que tos faiga firme goyo y que me faigatz arribar las vuestras opinions, aportacions, criticas y sucherencias!

Guiar #Inktober 28

Chuanet puya t’a bici. Leva diyas aprendendo a guiar-la. Ya ha feito bella prebatina sin ruedetas, con mai dezaga aparando lo sillín. Ye dencima. Empecipia a dar-le a los pedals. Ye una bici antiga y en primeras cal fer fuerza pa que tire. Un, dos, tres chiros de plato. La man de mai proteche de qualsiquier cayida. “Suelta, suelta” diz Chuanet, y fa, por primer vegada en la suya curteta vida, los primers metros sobre dos ruedas. Siente lo viento que le truca d’unatra manera. Nota cada pedreta y cada forau en lo solero d’a carrera. Y la boca le fa una hamaca en la cara que pencha d’as suyas orellas. Ubre los uellos pataleros. Le ha costau, pero lo ha conseguiu. Como Tomás, Irene y Alodia antes que no ell. Como lo conseguirán Paco, Lorient y Elena.

Ya leva buen rato rodando entre que mai aplaude, y s’acerca la costera. Le fa miedo. No quiere ir enta abaixo. Preba de chirar, pero la bici empecipia a fer cullebretas. No va t’a on que ell quiere. No va bien. Preta lo freno, pero no ye prou. Sigue dreito ent’a costera. S’estalapizará. Deixa lo peu en tierra pa mirar d’aturar y caye. S’ha esnafrau. Le fa mal l’ancón. Tien bell rasmiazo. Mai i arriba correndo. ¿Yes bien? ¿T’has feito mal? le pregunta. S’estrega lo brazo. Devanta la uellada. Mai tien ixa cara d’argüello que fa cada vegada que lo suyo fillo aprende bella cosa.

Chuanet prene la bici de tierra. “Soi bien, mama”. S’espolsa una mica lo pantalón. “¿M’aduyas una vegada mas? Agora he d’aprender a chirar”

Iste relato fa parte de l'Inktober literario en aragonés de 2019.

domingo, 27 de octubre de 2019

Abrigo #Inktober 27

Las cosas son a sobén millor que no las personas. Si ye que las cosas pueden “estar”. No sé si cal voluntat pa poder fablar de “estar” u lo simple feito d’existir ye prou. Lo caso ye que, de fa tiempo, creigo que ye asinas. Iste abrigo, viello, con bell forau y que la suya zarrapullera habe anyos que va malament, siempre ha cumpliu la suya función de protecher-me d’a fredor.

No me protechioron pai ni mai quan, en veyer que no yera la filla que creyeban, deixoron de refirmar-me. No querié seguir con la tradición familiar d’estudiar Medicina como pai u de quedar-me en casa y casar-me casada pa estar una maquina de librar críos como mai. Asinas que decidioron fer-me fuera de casa y que me buscase las manyas.

No me protechió lo mio chefe quan m’esbincé. Ell, que se feba la bamba de votar izquierdas y de empatizar con la clase obrera, aproveitó la mía baixa pa deixar-me sin treballo. Prou que la chusticia, por decir-le de bella manera, tampoco no me protechió en lo chuicio a on que le dioron la razón.

Ni me protechió tampoco lo mío novio quan vinió plorín-plorand a decir-me que se’n iba con unatra. ¡Cal tener barra! Glarimas de crocodilo, en feba a xarramata, pero sé que minutos dimpués yera con la pixauta ixa fendo l’amor. Yera tant simplaz que mesmo puyó un aftersex selfie ta Instagram antes de bloquear-me.

Pero iste abrigo se’n puyó con yo a-saber-las tucas. ¡N’hemos feito de kilometros chuntas que ni Williy Fog! ¡Tantas nueitz de borina, y capazos en la puerta de bell bar pa fer un fumarro! Astí yera quan s’esmarchinaba la calefacción en lo treballo. Lo chefe, pa escusar-se quatre perras heba mercau un zarrio de bomba de calor que fallaba terne que terne.

Agora empecipio una nueva vida. En Canarias me fará poca falta, y la casa que me permite pagar lo mío nuevo chornal ye tant chicota… Asinas que aspero que te faiga tanta honra como m’ha feito a yo. Sé que no ye un ser vivo. Que de sentimientos, no en tien. Pero me faría goyo de pensar que le fa tanto duelo despedir-se de yo como a yo despedir-me d’ell. Talment le quieras apanyar la zarrapullera. Cuento que te lo agradeixería si los abrigos podesen agradeixer.

Iste relato fa parte de l'Inktober literario en aragonés de 2019.

sábado, 26 de octubre de 2019

Fosco #Inktober 26

A las nueu d’a nueit la biblioteca zarraba las suyas puertas. Totz los humanos n’heban d’haber ixopau. Las luces s’amortaban y la foscor se feba duenya de repalmars y corredors. Nomás quedaba la feble iluminación que sinyalaba las salidas d’emerchencia. En ixe momento, lo viello libro aproveitaba pa fer la suya gambadeta. Yera ya tant antigo que tasament sería conscient bella horeta antes de tornar a chitar-se contra l’aparalibros.

Chunto a la entrada, las zaguers novedatz editorials comentaban la porquería que portiaban los suyos lectors en las mans. ¡Quánto les quedaba por aprender!, pensaba lo viello libro. Yeran chovens y creyeban que nunca no los deixarían de leyer. Tasament le tornoron lo saludo quan pasó a lo canto suyo.

Por lo camín se chuntó con la viella revista: un numero de Nature que practicament la totalidat d’o suyos articlos scientificos heban estau rebatius u actualizaus tanto que ya no teneba mica intrés. Una d’as gafas ya se le heba caito y sabeba que qualsiquier día la sacarían d’o catalogo. Totz dos conoixeban l’almagazén pleno de libros que bi heba en lo cobaixo, pero nunca no i heban visto garra revista. ¿Qué sería d’ella? S’estimaban mas de no pensar-lo.

A ixa retolica, siempre respondeba lo viello libro con lo suyo cutio penar: “Ye verdat que lo modelo de luenga mio s’ha quedau pasau de moda, y que muitas d’as cosas que cuento ya intresan poco, pero encara soi intresant. Muitos d’os mios contenius son atemporals. Pero ¿sabes quánto tiempo fa que no m’ampra dengún? Mesmo trobo a faltar que me caiga bella taca d’aceite d’ixos ababols que minchan de vez que leyen”

Lo comic d’Asterix se les unió chunto a una d’as mesas de lectura. Siempre acababan astí. “Vusatros a lo menos hetz teniu una vida larga, porque sotz en la parte d’adultos. Yo levo aquí bell par d’anyos y tiengo toda la enquadernación feita un zarrio. ¿Por qué no me leyerá mas la chent gran? Se piensan que por tener dibuixos soi nomás pa la cachimalla. ¡Qué ignorancia!”

En frent d’os tres yera la gran estantería de Sciencia Ficción. Los libros mas nuevos s’encorreban por lo repalmars, fendo que volaban y se foteban tiros. Los clasicos, manimenos, iban baixando a daria pa estar-se con ixos tres visitants. Cada nueit, un d’ells les recontaba la historia que las suyas pachinas amagaba. Lo viello libro, la Nature d’antes mas y lo comic d’Asterix las ascuitaban fendo firme ficancia. Adoraban ixas historias que les feban ixuplidar lo suyo chaquiento estau. Quan lo clasico d’a sciencia ficción remataba, totz tres se devantaban y aplaudiban. ¡En yeran d’agradeixius! China-chana se despediban dica lo diya siguient y tornaban t’os suyos puestos. Heban d’estar bien ordenaus por si les quereba amprar bell buen lector.

Iste relato fa parte de l'Inktober literario en aragonés de 2019.

viernes, 25 de octubre de 2019

Gustoso #Inktober 25

Acoflau en lo sofá, veyeba la suya serie favorita. En la forcacha un gran cuenco de ganchitos s’iba vuedando poquet a poquet. Naranchas particlas de snack iban cayendo sobre lo suyo cuerpo y fendo la silueta suya en lo mueble. Iban acompanyaus d’una biera de marca blanca, la que mas goyo le feba de todas las que heba tastadas en la suya vida. Ni artesanas ni IPAs ni costodias. La millor yera ixa lata verda de 0,25 euros con nombre alemán y fabricación murciana. Sobre la mesa remaniban los repuis d’a salchicha de bell animal indefiniu que s’heba pretau antes, con buen amiro de ketchup, mostaza y cebolla d’ixa cruixient que vendeban en lo super dende bell mes antes. Tot gustosas delicatessen que estrangutiba con anglucia.

Heba quedau dimpués con uns amigos, pero antes pasaría por la nueva pizzería que heban ubierto. Quereba visitar-la antes de que qualsiquier control de sanidat la fese zarrar. En l’aparador, un ciento de porcions i asperaban a que belún se las minchase. Tardó un rato a decidir-se. ¡N’i heba de tantas! Todas con ixe quesaz que a tanta chent le feba pampurria nomás de veyer-lo. Que se regalaba en una espesa masa de lardo. Ell no s’adubiba. Se las mincharía todas pero heba de trigar-ne. A la fin en pilló tres y un refresco pa pasar-las.

En un banquet d’o chicot minchador yera fendo lo primer mueso a una d’ellas, quan i entró l’equipo de televisión. Heban estau grabando un accident y veniban aganaus pa cenar. De camín se chiró, dando-les la esquena. ¡Qué vergüenya que lo veyesen asinas! En dos muesos acoró la porción que teneba en la man. Las atras dos, las embolicó en unas servilletas y se las ficó en la pocha. Con la uellada en tierra, asperando que los reporters le ignorasen, salió d’a pizzería. Chiró la carrera y sospiró. Lo suyo prestichio y imachen yeran a salvo. Bien se valeba que no bi heba garra preba grafica d’o gran chef de reconoixiu prestichio internacional Agliberto Granizo cenando en lo guariche mas zaborrer de tot Madrit.

Iste relato fa parte de l'Inktober literario en aragonés de 2019.

jueves, 24 de octubre de 2019

Mariau #Inktober 24

Heba d’entregar lo texto antes d’as meyanueit y no conseguiba escribir cosa con sentiu. S’heba estau a-saber-lo tiempo debant d’a pantalla, picando frases a l’arreu, pero no bi heba manera de elaborar una narrativa d’a calidat que aprecisaba. L’escamallo debió empecipiar a pasar-le factura. Las letras se feban borrosas sobre ixe fundo blanco. Escoscó los cristals d’as lunetas, sin solución. Agrandió lo tipo de letra. Mesmo nulo resultau. S’acercó t’a pantalla y pareixeba que las parolas fuyisen d’ell. Prencipió a mariar-se, sintió vertigo y cayió adintro de l’ordinador.

Arredol d’ell yera lo suyo texto. Toda ixa furrufalla de letras que no adubiban a prener sentiu. Se puyó en una T mayuscla dende a on que podeba columbrar totz los parrafos. Ixo yera una selva de silabas que medraban a la guingorria. Barruntaba que los textos bien escritos se pareixerían mas a ixos bosques de repoblación a on que totz los arbols van ordenadetz en ringleras, como soldaus formando en tiempo de paz.

La T, de rapiconté, se fació minuscla fendo-le cayer de nuevas. D’a talapizada se levó por debant toda la parola que, como en un efecto dominó, empecipió a espaldar letras, sinyals de punctuación y mesmo bell accento diacritico. Ell fuyiba d’a esferra que pasaba arredol. Esquivando vocals, blincando por dencima d’as consonants y aproveitando cada forau que las concieteras formas d’as letras humanas le deixaban. Quan tot l’estrapalucio se calmó decidió que puyar t’o palo d’o meyo d’una E sería talment mas seguro. No teneba tanta perspectiva como antes, pero yera prou pa veyer-lo tot.

Lo texto resultau de tot lo chandrío que heba formau teneba sentiu de tot. Yera, probablement, un d’os millors que nunca hese escrito. A fe que la revista sería contenta y que, d’ixe treballo, en saldría quantos mas. Paró cuenta de que teneba razón en lo suyo barrunto, y que cada letra, silaba y parola yera a on que caleba, con un orden preciso.

Dende ixa E, posau veyendo la suya involuntaria obra, sintió un estirón enta difuera. Lo suyo corpichón dichitalizau tornaba a fer-se carne. Yera unatra vegada en la silla, con la pantalla a l’endrecho. I veyeba perfectament. Pretó Ctrl+S y anotó una mas en la cuenta d’a suya musa a qui tantas le’n debeba ya.

Iste relato fa parte de l'Inktober literario en aragonés de 2019.

miércoles, 23 de octubre de 2019

Antigo #Inktober 23

Quan la guardia civil arribó a lo puesto a on que troboron a Chusé, la parella armada fació uellos. Sobre una gran basa de sangre y con un clau en la garra chaceba lo suyo cuerpo. L’heba trobau un vecín en salir de maitinada a fer las fayenas d’a demba suya. L’alcalde a escape se i acercó y avisó pa que suspendesen las fiestas y totz los actos que quedaban. Causa d’a muerte: desangramiento.

Ixa tarde, en lo pipete d’os zagals, los achents charroron con toda la chovenalla, que en ixe lugarón no yeran guaires. Totz recontaban alto u baixo lo mesmo. A pesar d’a gran diferencia d’edat, Chusé se les chuntaba bien a sobén. No quereba quedar-se antigo. Siempre prebaba de chupir-se de todas las modas y l’actualidat mosical. Se vestiba como la mozardalla, yera en totz los retz socials y, encara que no yera la penya suya, i pasaba firme rato. Muito mas que con la chent d’a suya edat.

A los chovens ixo les feba a-saber-la gracia y lo troleyaban de cutio. S’inventaban parolas de moda pa que las decise nomás ell, y por cada vegada que lo feba se’n esmelicaban. Le serviban cubatas feitos de combinacions imbebibles que se pretaba con un riso en la cara creyendo que yera lo mas en tal u qual discoteca. Nunca no dubdaba d’o que le deciban, asinas que las mentiras fueron creixendo. Cada día de fiestas le’n soltaban una mas gran. Agora totz se repenediban d’haber puyau tanto lo nivel. ¿Pero qui iba a pensar que lo faría?

En lo mobil suyo, que amaneixió a pocos metros d’o calavre a l’atro día, vidoron parte d’os suyos zaguers momentos. Mirando-se ent’a camara, con una zorrera important, farfallaba “iste ye lo mío Nail Challenge” y amostraba la pistola de claus. “Voi a clavar-me-lo en la garra, y ya sabetz que todas las perras d’a monetización d’o video irán pa la luita contra la deforestación. No ixuplidetz dar-le a la tringola y conducitz-tos a la mía canal. Creigo que va a fer-me mal, pero vale la pena. ¡Va por vusatros, seguidors! Y le’n dedico a los míos companyers d’a penya Marrulleros”. Lo mobil debió cayer-se-le porque dende lo soniu d’o clau no se veyeba que lo fosco ciel de luna perdida, pero se siguioron sentindo los suyos chilos y ploros por bell rato mas.

Chusé estió lo primer d’o lugar en tener una entrada propia en la Wikipedia, en estar la primer victima d’o Nail Challenge. A la semana d’a suya muerte, lo video s’heba viralizau y los hespitals se plenoron de chent con claus en las garras y una mica mas de suerte, u puntería, que no ell. Los fosals, d’a resta.


Iste relato fa parte de l'Inktober literario en aragonés de 2019.

martes, 22 de octubre de 2019

Pantasma #Inktober 22

Siempre heba creito que un esdeveniba pantasma quan se moriba. Que lo cuerpo tuyo se quedaba en lo mundo, fendo-se birolla pa los cucos y abono pa los arbols, entre que lo tuyo esprito marchaba ta… Bueno, t’a on que cada ún creyese. Que me sé yo. Lo ciel, lo mas allá, Chupiter, unatro cuerpo… I hai qui diz que mesmo unatro ser. Que te podebas ficar en lo cuerpo d’una gacela Thompson, u d’un koala. ¿T’esmachinas? ¿Tot lo día minchando eucalipto?

Pues no. Yo me torné una pantasma encara vivo. La mía alma se’n fue un día d’o cuerpo que heba habitau toda la vida. Lo menos dende que teneba memoria. Talment no pas de borche. Ixo no lo puedo guarenciar 100%. Pero bien d’anyos me i heba fotiu. Astí volando, sentiba como me saliba d’o mio ser fisico. Los musclos, uesos, pels y organos i continaban, con toda la ropa y las funcions vitals propias d’un animal. Pero yo, lo que quasi todas las filosofías y relichions entienden como “yo”, n’heba ixopau.

Preocupau, me quedé cerqueta d’o cuerpo, por si en bell momento podeba tornar-ie. Lo veyeba que no sabeba guaire bien a on se trobaba. La uellada perdida en l’horizont, trepuzando-se de cabo ta quan y sin mica intrés por cosa. En poco tiempo empecipió a tener comportamientos bien raros. Cada día un de diferent. Igual le daba por veyer reality shows, que por torturar fornigas en lo parque. Atro día se fació d’una cofraría y unatro se metió a cocinar decenas de tortiellas de trunfas que deixó podrir en lo rafe d’a finestra de casa suya.

Yo, lo mío yo etereo, por cada día yera mas convenciu de que no i tornaría nunca. Talment se me sacaban las ganas quan lo veyeba fer ixas cosas. S’heba tricolotiau ya con quantos vecins, y mesmo heba teniu una baralla con un taxista por no se qué d’a radio. Por la mía parte, viviba prou solo. Las pocas almas que m’escunzaba yeran bien furonas. No les feba goyo de charrar guaire y quan les preguntaba por lo funcionamiento d’ixe mundo tant nuevo pa yo, a escape saliban con qualque sincusa pa marchar a tot meter. Dica que me trobé con l’achent d’almas, ixa semana que lo mío cuerpo heba decidiu prescindir d’a minima hichiene.

Le reconté la mía situación, y lo que yera fendo lo mío yo fisico. Dimpués de tot ixe tiempo, agradeixié que m’ascuitase. Teneba ya ganas de desafogar-me con belun. Prenió nota y m’explicó que, por desgracia, yera un problema bien común en zagueras. Diz que s’heban abaratau los costes en la fabricación d’as almas y que de cabo ta quan pasaba. Bi heba habiu un ciento de reclamacions ya. Los nuevos modelos d’almas, actualizaus contra los fallos, arribarían en bella semana. Si lo mío cuerpo aguantaba dica alavez, no bi habría problemas pa tornar-ie.

Sospiré aliviau. Lo d’estar pantasma ye gracioso bell rato. Ixorrontas a belún, lucaneyas a la chent, veyes paisaches imposibles por las limitacions terrenals… pero trobas a faltar muito los vicios fisicos. A la fin, un alma humana no deixa d’estar humana, con deseyos humanos y necesidatz humanas. Malas que torné t’o mío cuerpo, me facié buen banyo y prebé de tornar a fer pacha con los vecins. Pero lo de torturar fornigas contino fendo-lo de cabo ta quan. Cuento que lo cuerpo pilla inercias que ni l’alma mas fuerte puet fer cambiar.


Iste relato fa parte de l'Inktober literario en aragonés de 2019. 

lunes, 21 de octubre de 2019

Tresoro #Inktober 21

Descubrió lo libro en las obras de restauración de l’edificio. Malas que lo vido por primer vegada entendió que ixo yera un tresoro. La enquadernación, la calidat, lo amagau que yera… tot indicaba que s’heba quiesto conservar, aluenyando-lo de mans infiels que podesen malmeter-lo. Yera la primer persona en quasi ueito sieglos que teneba acceso a la infomación que conteneba. Ubrió la portalada y empecipió a leyer. L’estau de conservación yera impresionant. Quasi antinatural. Pasó con firme ficancia las suyas fuellas dica arribar a un capitol concreto. Uno que le deixó sin sangre en la pocha. Lo que se i recontaba cambiaba de tot la versión d’a historia que se sabeba. Lo menos dica alavez. I aportaba toda una ripa de datos que, en primeras, pareixeban verdat. Ixo faría tremolar los alazetz d’o pasau oficial. ¡Obligaría a replanteyar tantas qüestions! Libros a embute habrían de reescribir-se. Estudios arrienda pasarían a estar mentira. Entre atros, la mayoría d’os que heba feito.

Ixe libro no veyería la luz. La verdat se’n iría con ell. S’aseguraría de que dengún no podese leyer-lo nunca. Pero no podeba destruyir-lo. Tot y que pleno de vereno pa la sociedat d’o sieglo XXI, seguiba estando un tresoro. Una choya. Ixas miniaturas, la mesma luenga en que yera escrito, la cudiada narrativa. Lo conservaría amagau en casa. En lo suyo estudiet. Astí a on que nomás ell entraba. Y en morir, demandaría que lo apedecasen con lo libro, conservau en una caixa especial que ya yera barruntando cómo fer.

Lo plan yera perfecto en la suya capeza. Manimenos, nunca no paraba cuenta de yo, lo suyo becario, que iba y veniba quan quereba y por a on que quereba d’ixe edificio en restauración. Quan vide lo libro, a escape entendié la suya importancia. Conoixendo como conoixeba a lo mio chefe, sabeba que no deixaría que veyese la luz. No yera la primer vegada que amagaba datos historicos pa fer encaixar las suyas varrenadas tesis. Asinas que dichitalicé tot lo que podié. Pocas semanas dimpués, quan confirmé que no teneba garra intención de fer-lo publico, vulqué toda la información en lo ret. La resta d’a historia ya la conoixen. Ell nunca no tornó a pisar una universidat y lo libro que cambió toda la nuestra anvista d’a historia d’o país pueden disfrutar-lo en iste mesmo museu.


Iste relato fa parte de l'Inktober literario en aragonés de 2019. 



domingo, 20 de octubre de 2019

Chafar #Inktober 20

“Lo que diz la companyera ye verdat”. Asinas yera como gosaba de chafar-me la parola. Malas que empecipiaba a exposar las mías ideyas, le faltaba tiempo pa interrumpir-me. Con ixa introducción, veniba a l’arreu un buen rato d’explicación d’o buen militant que yera, de quánto treballaba por la causa y de cómo de bien nos iría si le fesenos caso. No ya a nusatros como organización. A la ciudat entera. A tot lo país. Mesmo a la civilización occidental.

En garra d’as reunions heba conseguiu acabar de recontar tot lo que quereba decir. Quan le respondeba con un “perdona, deixa-me rematar, que soi en lo mio turno”, feba ixa cara de pena que tanto conmoveba a los suyos seguidors. Y bell minuto dimpués me tornaba a chafar lo discurso con beluna d’as suyas brilants ideyas d’iluminau. Los suyos partidarios mormostiaban “que borde la tía”. Tot y que lo feban a escuchetes, los labios suyos se leyeban millor que la letras grans d’as opticas. Ixas que fan servir pa graduar-te y que siempre me feban patir por la pobre persona que no adubise a leyer las primers ringleras.

A la salida d’a reunión, tot yera afalagos pa ell: “¡Qué bien has charrau!. Tiens ideyas prou buenas. Si puedo aduyar-te en bella cosa, di-me-lo”. Y limpio fer-le la rosca entre biera y biera en la post-asembleya.

Con tot y con ixo, yera un companyer. No febanos pacha. Sisquiera me pareixeba buena persona. Pero yera un companyer. Ixa tarde talment yera una mica mas alticamada d’o normal, u ya m’heba fartau de que me chafase. Quan m’interrumpió y le chité aquell ceniser, ¿quí me iba a decir que le ubriría lo tozuel? Yo estié la que mas s’espantó veyendo toda aquella basa de sangre. ¡Que en son d’aparateras las feridas en la capeza!

Gracias por deixar que te recuente toda la mia historia sin interrumpir-me. Y tú, ¿cómo acabés en ista garchola?


Iste relato fa parte de l'Inktober literario en aragonés de 2019. 

sábado, 19 de octubre de 2019

Fona #Inktober 19

Con lo dido endiz fació lo zaguer parramaco. Asinas se completaba la scena que levaba tiempo dibuixando en la paret d’a espluca. Ixa zaguer curva yera l’arco de su pai, tirando-le a lo toro que heban conseguiu cazar feba dos lunas. ¡Sisquiá ell tenese ixas estrucias! Guarda que no s’estaba firme rato totz los días mirando d’aprender. Heba prebau con la chabalina, l’arco y la fona sin garra resultau. No yera un buen corredor, por lo problema que tenió de chiquet en lo peu cucho. Ni sisquiá sabeba seguir bien los rastros. Pareixeba como si su pai, lo millor cazataire d’o clan, no le hese transmitiu la suya fuerza. La sola cosa que sabeba fer bien yera pintar. En las paretz de todas las espelungas a on que s’heban acubillau, heba deixau un bayo d’historias d’a suya familia. Las tribus que las fesen servir dimpués sabrían asinas de todas las fetas que heban pasau antes en ixos puestos. Conoixerían las chestas d’o suyos. Si ell no podeba fer-ne, lo menos recontaría las d’a suya chent.

Un maitín a la fin pasó lo que levaba tiempo barruntando: lo clan heba ixopau sin ell. Yera lo normal. Lo que feban con totz los que no yeran utils pa lo grupo. A la fin, ell no trayeba mica birolla pero en minchaba como un mas. Se fació una gambadeta por la redolada. Consiguió agafar bells quantos fruitos d’as matas que teneba cerqueta. Con ixo podría sobrevivir bell día mas. Agafó las pinturas y empecipió la que sabeba que sería la suya zaguer scena. Se dibuixó, con la fona, arrullando un cantal contra lo lión que les heba menazau lo verano pasau. En la suya historia, que nunca no heba ocurriu, ell salvaba a toda la tribu. Los que habitasen dimpués ixa espelunga, siempre creyerían que heba estau un gran cazataire.

Iste relato fa parte de l'Inktober literario en aragonés de 2019.

viernes, 18 de octubre de 2019

Misfit / inadaptau #Inktober 18

Dende la carrera puyaba lo soniu d’una canción d’os Misfits. Ixa mosiqueta siempre le transportaba t’os suyos anyos d’adolescent. Ixos a on que se creyeba un inadaptau social y portiaba tot l’uniforme d’os punks: la cresta de colors, lo chaleco de denim con chapas de briquetz enganchadas, los pantalons pretos y unas botas Martins con los curions royos. Bebeba zurracapote, la sangre heavy de l’Agujero Negro, y las litronas de biera calient d’o Udaco. Todas las nueitz acababan en baralla. Por un regular con los nazis d’o futbol, pero tamién con bell heavy que se lo mirase malament. U bell pixauto que no le querese dar una librica pa pillar costo.

Ixa canción d’os Misfits yera una d’as suyas favoritas. Quan la meteban en lo bar no s’adubiba a agafar d’o cuello a lo suyo millor amigo y bailar como si lo isen a prohibir a l’atro día. Blincando, empentando a tot lo que se metese en lo suyo camín, chilando pa que les ascuitasen en l’infierno. Heba pasau muito tiempo dende alavez, pero recordaba cada nota. Empecipió fendo lo ritmo con lo dido. Ta-ta-ta-ta. Dimpués movió una mica lo peu. Se devantó d’a siella y, en encomenzar la parte d’a guitarra se’n puyó d’un blinco t’a mesa. Seguiba estando choven, los Misfits tornaban a fer parte d’ell, y ell a fer parte d’o punkerío zaragozano. Quasi podeba sentir la cresta unatra vegada. La canción acabó. Los suyos parpiellos puyoron deixando entrar de nuevas la luz y fendo-le tornar t’o mundo real. Toda la resta d’o consello d’administración se lo miraba fendo uellos de caparra.


Iste relato fa parte de l'Inktober literario en aragonés de 2019.

jueves, 17 de octubre de 2019

Ornamento #Inktober 17

Teneba amigos que yeran fans d’o verano. Les feba goyo la calor, ir meyo espullaus por las carreras, capuzar-se en las badinas, la mosiqueta facilona y los mojitos en la placha. En teneba d’atros que adoraban l’hibierno. Arrebullar-se con la manteta en lo sofá, un buen chicolate calient, las luces de nadal por las carreras, los paisaches nevaus… Ell yera de l’agüerro.

En lo cabo d’o verano, quan las primeras fuellas empecipiaban a cayer, le cambiaba la humor. Ya le teneba igual si yera sudau, si lo sol le enlucernaba u los mosquitos le fizaban. Lo cambio d’estación yera a tocar y tornaba la suya felicidat. Toda ixa variedat de tonos en las brancas d’os arbols le inspiraba de raso. Las vacacions d’o treballo suyo se las pillaba pa ixas calendatas siempre. Quan ya toda la resta d’a plantilla yera tornada d’os suyos destins mediterranios. Aproveitaba pa pintar, escribir, fer bella canta u fustiar bella figureta. Lo que lo cuerpo le demandase cada anyo.

Cada día de vacacions preneba de tierra una fuella. No pas una a la bimbola. Tardaba buen rato a trigar-ne l’adequada. Habe tiempo heba empecipiau a ornamentar una d’as paretz de casa suya con ixe fruito de l’agorrada que los arbols deixaban cayer. En un d’os cabos, alto a la cucha, yera una fuella bien verda. Brilant, como si fuese de primavera. En l’atro, abaixo a la dreita, una d’un royo mas fosco que la sangre. Y entre todas dos, un Arco Sant Chuan de follarasca. N’i heba de tot: chopos y platanos, abetoches y freixens, faus y caixicos, cireseras y telleras. Bella mena de chardín botanico en un muro.

Quan i posó la zaguer fuella, la que empliba lo poco espacio en blanco que encara quedaba, la paret empecipió a esfer-se. Lo formigón, lo cheso y mesmo los fierros d’a estructura esdevinioron un fino polvo que se mezclotió con la follarasca. A monico, tot barrachando-se moviu por una bisa que prencipiaba a recorrer lo salón rodiando-lo. Las fuellas y lo muro, casa suya y los vistius d’os arbols se facioron uno. Y con la mesma suau airera, debant d’os suyos uellos, la paret se fue refendo, con todas las colors unidas en una composición como no heba visto en garra d’as exposicions de pintura que tanto freqüentaba. Dende aquell día, en casa suya, siempre yera agüerro.


Iste relato fa parte de l'Inktober literario en aragonés de 2019. 

miércoles, 16 de octubre de 2019

Salvache #Inktober 16

Chugaba con las olas d’a mar como si no fuesen feitas de puro chelo. Por muit buena nueit que fese, cabo d’anyo no yera buena calendata pa banyar-se. Ni sisquiera en ixe lugar de la Safor. Manimenos, astí yera ella, con las suyas amigas, como si podesen fer d’a fredor calor. Joan se descansaba, fendo-se un fumarro, posau sobre l’arena, sentindo-se un falso por portiar la suya chaqueta. “Yo no i entro. Sotz varrenadas. Tos aguardo aquí”, les heba dito.

La nueit que yera a pocas de rematar heba feito honor a la canción d’aquell Festivern: Nit salvatge. “¡Y tanto!” - pensó. La heba conoixida en la barra, demandando bieras pa toda la suya clica de Getxo. Dotze zagalas y zagals venius dende astí, de propio, ta ixe festival. Y a ell le heba feito galvana puyar bells pocos kilometros ent’o norte. Facioron pacha de camín. Chuntoron las collas d’amigos en lo concierto de Smoking Souls y, antes de que empecipiase Oques Grasses yeran mentendo bote de conchunta. Las dos clicas pareixeban conoixer-se de toda la vida. Quan acabó Riot Propaganda, totz dos se quedoron en un costau, apartaus bell poquet d’os amigos. Charrando de mosica y politica, d’os suyos lugars, de festivals y nueitz de borina. Marchó t’a tienda con ixe cenyo d’ababol d’os días que valen la pena vivir-se.

A l’atro día tornoron a chuntar-se en l’actuación d'Atupa. A metat de concierto de Juantxo Skalari, con los punyos devantaus baixo las estrelas d’ixe ciel valenciano, Amets le agafó lo tozuel y le besó. Duró lo que tardó lo ritmo d’o suyo ska en convidar a fer pogo de nuevas. Unatro baile salvache. Unatra canción que nunca no ixuplidaría. Se blincoron Plan B y Els Catarres y tornoron pa Aspencat entre las moflas d’as dos collas d’amigos.

Totz los conciertos sonoron perfectos. La biera sabeba como nunca. Sentiba que tot yera posible. Que Amets y ell, y totz los suyos amigos, y lo publico d’os festival y los mosicos que dende alto deciban las suyas proclamas, yeran capables de fer la revolución. Politica, cultural, personal. Por una nueit, una nueit salvache, la menaza de no independizar-se nunca, los minitreballos de mierda que heba teniu, los supensos, las esfullinadas d'a familia… tot dispareixeba. En los suyos uellos se dibuixaba un camín que le sacaba d’o barducal d’a suya vida cutiana.

Astí acababa la nueit. Astí acabaría probablement la suya historia. ¿Quantos kilometros les separarían a l’atra semana? ¿Seiscientos? ¿Setecientos? Sentiba que la luna se lo miraba, zocegosa por saber qué quereba, qué faría a l’atro maitín. Pensó en marchar de Castalla. Pensó en demandar-le que se’n venise. Quereba seguir conoixendo-la. Quereba saber toda la resta d’historias que le heba deixau por contar. Descubrir nuevas mosicas a lo suyo costau y vivir un ciento mas de nueitz como ixa.

Alentó lentament. Zarró los uellos. Risas. Mar. No iba a deixar que lo futuro le estricallase lo present. Ubrió los uellos. Lo fumo salió d’a boca suya. Amortó lo fumarro y s’espulló. A l’atro día decidiría lo que calese. Hue yera siempre encara. Se sacó lo miedo a la fredor d’o mediterranio hibernal y se ficó en l’augua. Amaneixeba en la Safor y remataba ixa nueit salvache.

Basau en la canción Nit salvatge, de Smoking souls que sirvió pa promocionar lo Festivern d’a edición 2015/2016


Iste relato fa parte de l'Inktober literario en aragonés de 2019. 

martes, 15 de octubre de 2019

Leyenda #Inktober 15

Bienvenius todas y totz a iste tour. Me digo Irina y hue seré la vuestra guía. Si tienen qualsiquier pregunta, no dubden en devantar la man y prebaré de responder-les. Como ya sabrán, y por ixo cuento que son en iste viache, tanto l’anterior dictador, como la lider d’a rebelión que nos liberó, estioron naixius y creixius d’iste mesmo lugar. Aquí mesmo, chunto a iste lavadero, diz que estió una d’as suyas zaguers conversas antes que totz dos empecipiasen la suya actividat politica. Yera fiestas y se chugaba lo campionato de guinyote. Como totz los anyos Raúl y Silvia se i apuntoron con las suyas parellas y arriboron a la final. Heba estau muit competida. Yera la zaguer partida d’o coto. Sobre la mesa, las cartas, dos pacharans, un whisky y un vin dulz. Repartioron. Raúl vido la suya man y dició: “Antes será Aragón una Republica Socialista que vusatras ganetz ista partida”. “Antes no, pero será”, diz que le respondió Silvia. Poco dimpués yera cantando las quaranta, ganando partida, coto y campionato.

La resta ye historia, no cal que les ne cuente. Gracias a Silvia se fundó la Republica Independient Socialista d’Aragón a on que agora podemos vivir libres y iguals. I hai qui diz que no pasó asinas. Mesmo n’i hai qui diz que perdió lo campionato. Los rechistros se cremoron en la revolución, ya lo saben. Talment no pasó exactament asinas, pero en toda leyenda i hai una parte de verdat. Continemos la visita.


Iste relato fa parte de l'Inktober literario en aragonés de 2019.