martes, 30 de octubre de 2007

Sobre O conzierto

Asinas, con una “O” bien gran, pos o conzierto d’o Sabado estió O conzierto. O que caleba fer dende fa tiempos. Siete collas siete cadaguna millor, que fazión que nos gronziasenos mientres quemisió qué de oras. Pleguemos a ixo d’as 20:15 asinas que a Dechusban no los beyemos guaire, por a unica cosa que no me fazió goyo d’o conzierto: a organizazión d’a barra. Tres cambreros ta miles (repito MILES) de personas. Y lo que ye pior: miles d’aragonesofablans. U a lo menos, de chen intresada por l’aragonés. Pero istos no han sentiu ixo que deziba un mayestro de yo, de que l’aragonés morirá, pero de zirrosis?.

Dixando a un costau ixe chicorrón afer con as bieras (que s’acotolón a metat conzierto), as collas increyibles y o publico mesmo más. Muitisma chen que sisquiá toz charrasen aragonés, y muitismos siñals d’Aragón. Con estrela, sin estrela, con escudo, con debuxos, pegallos de toda mena, pasquins arrienda... A la fin os aragonesofablans tornamos a tener ixa gran borina que no tenebanos y que nos merexebanos dende fa años. Parixeba que no ese cambiau cosa. Yeranos os mesmos pero tamién muitos más. Me sorprendió cuantisma chen chobena bi eba. Muito más chobena que no yo, encara que ixo siga cada begada más fazil. Qui deziba que l’aragonés y l’aragonesismo ya no yeran de moda ? Con CHA estozolada, se fa un conzierto por l’aragonés y a respuesta d’a chen choben y no tan choben ye ir-ie a fascals. Pero nomás ir-ie a beyer un conzierto de unas collas de mosica que te fan goyo. Ir-ie a chilar que l’aragonesismo no prenzipia ni remata en CHA (encara que i pase) y que continamos bibos. Que os chobens continamos fendo-nos-ne por a nuestra cultura y as nuestras luengas. Que no imos a aturar ni a dixar que Marzelino y Biel continen fendo-nos a tana y xublidando-nos. Cal aprofeitar ixa rasmia que se contrimostró en o conzierto. Cal aprofeitar-la ta fer zeprén toz de conchunta y tirar entabán una lei de luengas dinna y muitas atras cosas.

Qui esfiende l’aragonés no tien porqué estar aragonesista. Sisquiá ye deseyable que toz qui esfiendan l’aragonés sigan aragonesistas. Pero creigo que ye de dar que qui se considere aragonesista ha d’esfender l’aragonés y nomás aprendendo-se a letra de Aqueras montañas u de S’ha feito de nueis. En zagueras comentar a creyazión d’una nueba plataforma creyada ta la esfensa d’a luenga que espardión o suyo primer pasquin por d’entre o publico d’o conzierto. A suya paxina web ye http://pea.blogdns.net/ y bi podez leyer o manifiesto d’a suya creyazión y bellas cosetas más que ban fendo. Caldrá estar a la tisba, porque promete muito. Y prou que grazias t'o Ligallo y os ligallers por organizar-lo tot.

Ta rematar y como ye cuasi obligatorio un par de bideos. La uno de la fin d'o conzierto con toz os mosicos denzima d'o tarabidau fendo una bersión tabiernera d'o billano y la otro de un troz de canta d'a Ronda bisto dende o publico an que se beyen a cantidat de siñals que bi eba.









Y si no ese saliu en a TB?

Enrestidas faxistas bi ha arrienda toz os cabos de semana por tot lo mundo. Fa poco a chen se miraba enluzernada enta Israel por ixos nazis que i eban aparexiu que foteban lapos a chodigos, musulmans, pobres y, a la fin, a tot qui se trobaban. Agora, fa pocos diyas a chen enluzerna tamién con o matután ixe que agredió a la mozeta sudamericana.

En iste mundo de imachens a informazión no ye cosa sino leba de compañía unas sucosas imachens que toda a chen en charre a o diya benién. Os rufierters, ixas personas tan saputazes, carrañan a o mozet que se quedó chelau sin fer cosa ta esfender a la pobre zagala. Me fería asabelo goyo beyer a toz ixos en ixa situazión a beyer que feban tan baliens que se troban en os platós de TB.


Pero lo pior ye que, como siempre, si no bi ese abiu una camara que lo grabase, toz tan tranquilos. Ixa mesacha ese marchau ta casa suya, o tontolaire tan tranquilo y no bi abría garra “alarma sozial”, que le dizen. Como deziba no se qui, lo que no aparixe en a TB no ye notizia.


Mesmo pior ye como charran d’o problema en as telebisions de tot l’Estau. En os programas d’analis politico parix que isto ye cosa de cuatro barrenaus sin mica organizazión u en tot caso d’una “tribu urbana”. En os programas sensazionalistas puros (os d’analís pulitico tamién en son, encara que un poqeut menos) as trazas que fan serbir ta charrar d’iste caso son ta plorar... u ta cremar-les o estudiet. Remero ixos diyas que se feba lo de “Curso de Etica Periodistica” en Caiga quien caiga. Agora bi ha unatro programa que, de bella traza y de cabo ta cuan, tamién fa ixa funzión. Abaxo podez beyer o bideo de o programa Se lo que hicisteis an que charrón d’isto (prenzipia allá t'o minuto 2:00 y contina en unatro bideo).
Agora nomás cal asperar t’as manifestazions (faxistas y antifas) d’o 20-N y beyer como las fan por a TB. Será curioso, más que más, porque ye bien probable que ta ixas calendatas dengún no remere ya a o boque iste d’o metro.

jueves, 25 de octubre de 2007

Nadals

Ya plega o Nadal. Sí, en Otubre ya ye plegau o Nadal. En a TB ya nos son bombardeando con os chuguetes y prexino que ascape prenzipiarán con os lamins de nadal, os perfumes y toda a parafernalia nadalenca. Ya güe en Telezinco han feito o clasico reportache de qué chuguetes son de moda.



Odio, con tot lo mío corazón, o Nadal. No ye una custión de odiar-lo por moda ni por cosas asinas. Ye porque representa cuasi tot lo que odio. O Nadal ye a fiesta d'o capitalismo. Consumismo, cristianismo, ipocresía....lo tien tot. Y prou que masclismo. Beigo un anunzio d'un bideochuego endrezau ta ninas an que pueden eslexir entre albeitar, diseñadora de moda, guisandera u mai. Fueras de lo d'albeitar un topico dezaga de unatro. No bi ha un bideochuego ta aprender a estar pai, guisander u diseñador de moda. Pero ye que ye de dar que os ninos nunca no serán guisanders, diseñadors de moda y muito menos pais.Os ninos cuan creixan serán soldaus, polizias, luitadors a muerte u ninjas. Ye platero!




Ista ye una que he bista, pero en o debandito reportache de Telecinco (que yera ta gomecar, cal dizir-lo) charraban d'as nuebas moñacas. Agora ya se puede eslexir entre a moñaca - mai que ha de cuidar d'os fillos suyos, a moñaca bebe que picha, se pede, gomeca y chita toda mena de liquidos d'o cuerpo y a moñaca guarrona moderna d'a muerte que buque con os suyos compañers d'instituto portando una ropa chupilerendi. Ta os ninos, manimenos tenemos toz os chugetes molons: escalextric, playstation con bideochuegos de foter lapos a tot lo que se mueba, autos chicorrons y asinas asinas... Y tanimientres os pais y mais malfurriando os diners en o Toys 'r' us ta que o nino/a no pille una depresión.




Podría continar charrando d'a güeña que ye o nadal mientes oras, pero cuan belún lo fa muito millor que no yo, creigo que ye millor dixar-tos con as saputas parolas y bideo de S.A. que, antimás tañerá en Alcañiz o diya 1 d'Abiento seguntes me dizió ayer una amiga.






Otra vez llega la navidad, La gente emana felizidadtodos sonrrien sin parar, ¿a quien pretenden engañar?si todo sigue igual...
es navidad en jerusalen, y en navidad matan tambienjesusito ya va a nacer,que te pille un palestino ¡cacho cabron!y que te cuelge de un pino.
el gran negocio va a comenzar, los precios por las nubes estantodos como locos a comprar, todo sea porque es navidady hay que aparentar, ¡anda ya!
Turron, un pavo y champan, eso no nos puede faltaraunque mañana no haya para comer, todo sea porque es navidady hay que aparentar.
Los pobres niños son machacados por la television,por miles de anuncios(de juguetes), en los que el niño solo tieneque apretar un boton, y para nada cuenta su imaginacion.
Por eso y mas ¡me cago en la navidad!puta navidad ¡me cago en la puta navidad!
Millones de abetos cortaos, por una estupida tradicion,que luego acabaran tirados, en la basura, en cualquier lado,luces por toda la ciudad, para intentarla disfrazar,anuncios de paz y hermandaz, que despues ya de nada valdran
Me da asco la noche vieja, todos puestos hasta el gorro,desahogan su fustracion, hoy todo eta permitido,le meto mano a esta chica y a este le meto un sopapo,¡que divertido soy!
Por eso y mas ¡me cago en la navidad!puta navidad ¡me cago en la puta navidad!
por eso y muchas cosas mas me cago en la puta navidad!de verdad que asco me da tanta hipocresia, tanta falsedad,venga idiotas a comprar, el consumo es el espiritu de la navidad¡os vamos a sacar hasta la medula espinal!¡feliz falsedad ...amiguitos!





martes, 23 de octubre de 2007

SGAE en "Público"

Ayer o periodico cuasi nuebo "Público" publicaba un articlo sobre a SGAE dende l'ambiesta economica. En estar una asoziazión "sin animo de lucro" no puede ganar diners u ixo se suposa. Pos iste articlo da una mica de luz sobre como fa a SGAE ta ganar diners sin ganar-ne. Incheniería economica que dizen beluns como una mena de eufemismo d'a parola "furtar". Furtanto, antimás, con toz, TOZ, os puliticos refirmando as suya autibidat. Sobre a SGAE bi ha tantismo que dizir, y tot malo, que podría emplier iste blog nomás con els, pero por agora dixo iste sobrebueno articlo sobre una d'as caras d'a SGAE que no'n sabeba guaire: http://www.publico.es/dinero/8605

O primo de Rajoy

“D’abarca” son os razonamientos de asabelo chen. Dizen por as TB’s espanjolas que toz os espanjols tienen un trigador nazional aintro d’els y que cadagún trigaría a chugadors diferens (de futbol, prou que sí). En zagueras tamién bi ha un adugador de Formula 1. Pero no dizen que toz os almenistraus baxo iste poliu estau tienen un filologo, un idrologo y agora, mesmo un climatologo aintro.... U un primo fisico nucleyar.

Toz saben de tot. Os rufierters d’a TB un diya charran d’ETA y unatro d’o trabase, pasando por o zaguer chugador de futbol, o cambeo climatico a SGAE u a situazión en Chechenia. Y mira-te tú, que de tot en saben. Y en saben muito! Son periodistas, pero tamién politologos, soziologos, idrologos, filologos y asinas asinas, arramplando con todas as disziplinas. Ombres y mullers d’o renazimiento a camatons que implen os programas de maitins d’a TB, as colunnas d’opinión d’os papers, as radios y que creyan opinión. U millor dito fan que a opinión suya siga la de muitos repetindo terne que terne as mesmas fateras. He bisto como chen que no eba pasau nunca por o Pirineo u los Monegros y probablemen cuasi ni saben de seguras an son, opinaba con una seguranza que fa tremolar sobre os entibos u as pistas d’esqui. Y chen que nian fa serbir correutamen o castellano fa clases machistrals sobre filolochía catalana u mesmo aragonesa sin mica bergüeña.



Rajoy is diferent, como o país suyo. Ye capable de reconoixer as suyas mugas, u a lo menos beluna d’ellas y, charrando d’o cambeo climatico ya prenzipia dezindo “Yo, de este asunto sé poco” (Yo, d’iste afer, se poquet). Bueno, bien, parix que no ba a ir de saputo. Pero contina charrando (porque?, si ya ha dito que'n sabe poco?) y diz “pero mi primo supongo que sabrá” (pero lo primo mío estoi que’n sabrá). A! Bueno! Si o tuyo primo sabe.... Y plega la rematadera cuan diz: “Oiga, he traído aquí a diez de los más importantes científicos del mundo y ninguno me ha garantizado el tiempo que iba a hacer mañana en Sevilla'. ¿Cómo alguien puede decir lo que va a pasar en el mundo dentro de 300 años?" (Sienta, he trayiu aqui a diez d’os más importans zientificos d’o mundo y dengún m’ha guaranziau l’orache que ferá maitín en Sebilla). “D’abarca” ye o razonamiento, como he dito en prenzipiar iste articlo... Ye que a zienzia ta qui no ye zientifico ye como una cosa misteriosa. Fry, de Futurama, preguntaba en un capitol como funzionaba quemisió qué. O suyo sobrín prenzipiaba a esplicar-le-ne y a l’inte Fry, sin entender-ne mica, deziba “Bale, machia”. Ixa ye l’actitut de muita chen enta la zienzia...



Pero toz opinan de tot. y opinan d’a mesma traza (que no lo mesmo) que Rajoy. en as tabiernas, en as casas, asoben a chen opina de cosas que no’n sabe. Con l’aragonés ye platero. Cuanta chen sabe bel menimo sobre l’aragonés? Pero toz saben, u creyen saber que no ye que un dialeuto d’o castellano, que cuasi no se charra, que no se fa serbir t’atra cosa que no sigan as fainas d’o campo, que ye un conchunto de fablas locals y asinas asinas...Lo pior de tot ye que mensache como iste de Rajoy chupen a la chen y dimpués ban repetindo-los por toz os cabos. De leyer nian tartir. De mirar-se bel inte bel libro, rebista u pachina web sobre o tema, ta qué? Si Rajoy, que tien un primo que ye fisico, ya nos ha dito que ixo d’o cambeo de l’orache ye una fatera que cuasi de seguras que no esiste? Pos bienga, toz t’a casa, a enchegar a calefazión en un auto con gasolina a rebutir de plomo. Y tornemos a costruyir zentrals nucleyars y termicas que “dan treballo” a muita chen.
Podez sentir o soniu d'a charrada en

lunes, 22 de octubre de 2007

Unatro Cabo de semana en aragonés

De cabo cuan pasan istas cosetas. Y cada begada más asoben. Qui deziba que no se podeba bibir en aragonés? Y mesmo en tierra plana... Iste cabo de semana unatra begada podremos bibir un poquet más en aragonés. O Biernes prenzipiaremos con a Debantadera d'os cursos de l'Asoziazión Cultural Nogara. Iste acto que se fa todas as añadas cuan son en momentos de prenzipiar os cursos ye tot un clasico an que nos chuntamos mayestros, alunnos, sozios y amigos de l'asoziazión ta fer buenos charrazos. Estiaño prenzipiará con una charrada sobre l'aragonés repuyal a las 19:00. Dimpués se entregarán os titols ta la chen que aprebó o curso pasau y ta rematar, como no, una lifareta. Dimpués de seguras que, a lo menos bella biera nos feremos por ixos bicos de Dios...


Pero cal dixar un poquet de rasmia ta o Sabado pues ixa calendata torna a estar istorica. Torna, a la fin, "L'aragonés en a carrera". Borina mitica an que muitos nos amanemos ta l'aragonés por cuasi primer bez y que feba cuatro años (si no remero mal) que no se feba. Por "L'aragonés en a carrera" han pasau arrienda collas, como nos esplicó en Pilars Chan, en representazión d'a Federazión de Ligallos de l'aragonés. La Orquestina del Fabirol, Hugo de Paula, Gwendal, Ixo Rai y asinas asinas. En ista edizión, que zilebra os 25 años de Fablans, i ascuitaremos a mosica de Prau, Dechusban, Lurte, Comando Cucaracha, La Ronda de Boltaña, La Orquestina del Fabirol y Biella Nuei. Un conziertazo que parix que nos tendrá dispiertos dica lo maitín d'o Domingo, pero si ye con ixa enchaquia, rai!




Cara ta Abiento ya se ban parando cosetas, ta que podamos ir apuntando-ne en l'achenda nuestra. A Feria d'o Libro Aragonés de Monzón ferá a suya trezena edizión os diyas 7, 8 y 9 d'Abiento. En que se sepan más cosas ire informando. Como nobedat, tamién en Abiento pero, por lo que sé, sin calendata encara, se son organizando unas chornadas sobre toponimia aragonesa en a comarca de l'Alto Galligo que continan con as suyas autibidaz a tot estrus. Podez beyer a notizia aqui.




Torno a dizir: qui no charre, ye porque no quiere...

jueves, 18 de octubre de 2007

Sin aturar...

Istos mozez y mozetas d'A Enrestida no nos dixan nian escansar o reseco pilarenco. S'han enzerrinau en remanir autibos "diya par d'atro" y han parau unas chornadas ta remerar os 300 años que lebamos sin os nuestros dreitos como pueblo. Qué catens! :-) Y han saliu unas chornadas bien pinchas que prenzipian ista mesma tardi (por razons de treballo y de problemas con l'interfaz d'o blog no he puesto publicar isto antis).


Ubrirá as chornadas Guillén Tomás con una charrada sobre "Luenga y identidat en Aragón" que, conoxendo-le de seguras que ferá firme onra a Aragón y a l'aragonés. No sé si continará a endrezera d'a charrada que se fazió en Nogara y que ye penchada en CharrandoTB (puncha aqui si la quiers beyer) pero en cualsiquier caso será intresán. Maitín continará Chorche Romanze con "Medios aragoneses o medios españoles en Aragón" sobre os meyos de comunicazión, ye de dar. Trancarán as chornadas chen de Endavant que esplicarán como son treballando por os países suyos y dimpués se ferá un conzierto en l'Arrebato con collas catalanas y aragonesas. Torno a dar a norabuena a os enrestidos que terne que terne son fendo buena faina por Aragón y l'aragonesismo.


D'atra man y a ran instituzional, y alabez, muito más jauto se fa tamién a VI Feria de l'asoziazionismo choben . Encara que como agora l'aragonés ha feito boleto d'o conzello ye a Feria del asociacionismo joven sin más. Sin bilingüismo ni todas ixas fatezas que tanto parixen fer a tana a la conzellería de chobentut (puncha aqui ta más info). En a plaza d'os Sitios y dende o chuebes dica o sabado se achuntarán arrienda organizazions chobens de toda mena: chobentuz más u menos legals de partius puliticos, asoziazions culturals (como Nogara), cristianos, scouts y asinas asinas... Tamién se i ferán autibidaz como tallers, charradas y ixas cosetas. No ye que siga una marabiella pero siempre ye bueno pasar-te-ie y fer una güelladeta ta beyer o pescau que se ye bendendo. O programa y más info en http://www.delibreeleccion.org/.

martes, 16 de octubre de 2007

Cronica de Pilars (u no)

Ya pasón os Pilars. Ya nos cale asperar atros 300 y pico diyas dica os beniens. Y cal fer una cronica a lo menos de lo millor y de lo que remero...
En o punto d’actos d’a programazión ofizial, no estié que en bels conziertos, pero me quedaría más que más con tres que i fue. A tornada de Heroes que me parixió un buenismo conzierto. Que lo aigan feito por perras, a yo rai! Yo iba a sentir buena mosica y ixo estió lo que i fazié. Ta qui ebanos teniu a suerte de aber-los bisto bella begada antismas, nos remerón ixos conziertos que rematabas cuasi sin poder alentar en sentir una canta buena dezaga de unatra que no te bagaba nian de ir a por biera. Aspero que tornen de berdat y faigan chiras y nuebos discos más a soben encara que conto que ixo ye bien difizil. Con tot y con ixo diz que l’asperanza ye a zaguer cosa que se caziega. Atros dos conziertazos que merixión asabelo la pena estión Lurte y Comando Cucaracha. Os dos fazión un sobrebueno espeutaclo y bien dibertiu an que nos achuntemos buena cosa de conoxius y se beyón tamién arrienda siñals d’Aragón. O tarabidau ixe que metión en a Plaza d’o Chustizia estoi que le fa más onra a ista mena de conziertos que no o de San Felipe.

En o que pertoca a la parti “popular – sozial” d’as fiestas estiaño ye estau simplamen enluzernan. Prenzipió con una charrada, organizada por A Enrestida an que representans d'a organizazión de Nafarroa Oinez y d'a Federazión de Ligallos nos charrón d'as suyas autibidaz. Muito intresán y antimás amena. D’una man a “Ronda Fierra” que enduró dica quemisió que ora, se tornó ascape en una borinaza como pocas en eba bistas. Bailes, gaitas y donzainas mientres oras y oras, dentrando en bars de tot o bico d’a Madalena y dillá y rematando en a mesma Plaza Espagna an que se bailó o Tin-Tan y atras cosetas (a ixo d’as tres d’o maitín si no remero mal). China chana se fue amanando-ie chen dica que rematemos un buen camatón. Muitos d’els con traches tradizionals (mesmo uno d’els, un siziliano que l’embolicón).
Atra Ronda que, en iste caso, salió d’A Enrestida fazió a debantadera d’a barra d’o BIC (Bloque Independentista de Cuchas) que mientres as nueis de o Chuebes, o Biernes y o Sabado, fazión que nos i achuntasemos ambute chen de l’aragonesismo y mesmo de mobimientos nazionalistas, soberanistas u independentistas d’atros paises. Buena mosica, buena compaña, buena borina.... se puede pedir más? Y tot isto que se fazió con a rasmia de bels poquez que creyón que caleba fer-lo y que le fería buena onra a o pais y creigo que asinas ye estau. De seguras que, como en todas as nueis de zorreras, d’ixas tres en salieron un pueyo de ideyas y de proyeutos y sino ye asinas (que lo dudo) a lo menos balió ta que nos achuntasenos en un puesto an que toz nos entendebanos y que se fese bistero que bi ha muitismos chobens (y no tan chobens) que creyemos en atra traza de entender Aragón, o mundo, a borina, os Pilars.... Aspero que qui organiza / organizamos actos en iste mundet que ye l’aragonesismo prenga nota de qué cosas funzionan y pare cuenta en porqué. Yo ya lo he feito.Y bueno, en o trestallo personal, muitos buenos Pilars a tamás d’aber teniu que achuntar como podeba treballo y borina y a tamás tamién d’a edat mía y d’o mio figau que no ye qui gosaba estar y prenzipia a abisar-me que tantos diyas de contino no los puedo endurar. Esprisions ta tos os que m’he dixau de nombrar que puestar que nian los remere....

lunes, 8 de octubre de 2007

Pilars y represión

Y como os royos no aturamos ni ta zorriar en o Pilar, en bels pocos diyas ya bi ha abiu arrienda aizions y, como no podeba estar d'atra traza en l'año Flufi, arrienda represión polizial. O mesmo diya d'o pregón, bellas personas prebón de amostrar una pancarta contra a OTAN en a Plaza d'o Pilar. Ascape a polizia i fué a espardir a democrazia y abentón a pancarta entre empentos y trucazos. Bi ha un par de bideos en YouTube y más t'abaxo en pencho uno. Atra colla de chen que feba un acto anti-Expo tamién tenión as correspondiens identificazions emplindo un poquet más a lista negra que ye fendo-se o Delegau d'o Gubierno Español. Ambute polizia en a mani antitaurina, en a carrera Alifonso l'atro diya mientres o pasabillas de Timbalao y omnipresén en a Madalena. En iste bico en tenemos agora de tot. Dende fa bels meses son ya cutianos os "rechistros aleatorios", identificazions y presenzia polizial con tozineras y tot. Como si bella begada ese estau un bico an que tenesenos problemas d'orden sozial. Bueno, talmén ta beluns, sí que somos un problema sozial....


A lo menos podiemos sentir una sobrebuena charrada en A Enrestida an que estión responsables d'o Nafarroa Oinez y d'a Federazión de Fablans charrando d'a mobilizazión sozial por as luengas y d'as borinas que han organizau y son organizando. Una charrada con muita umor pero a rebutir de ideyas y d'esperenzias compartidas a uno y atro canto d'a muga.



Y os Pilars, a tamás de tot, continan. Y continan as mobilizazions y actos de toda mena de chen. Dende o BIC (Bloque Independentista de Cuchas) m'han pasau o manifiesto y o cartel d'os actos suyos que podez leyer en o blog d'A Enrestida (como ya diziba en l'anterior articlo). En o suyo blog tamién i sale a programazión d'os Pilars Disidens igual como en o bletín suyo (Esmo). Atros que han feito un nuebo numer d'o boletín suyo (Zinquena Ringlera) ye UCA, an que charran d'os 300 años d'abolizión d'os Fueros, o zinqueno cabo d'año d'o coleutibo, l'afer d'o Puen de Piedra...



viernes, 5 de octubre de 2007

Pilar, uoooooh, Pilar

Prenzipian os Pilars!!!! Bieeeeeeeen!!! Ta toz os que no tos fan mica goyo aclariré que soi d'ixas pocas personas que no son de garra lugar. Naxié en Zaragoza, igual como mis pais y a metat d'os lolos míos y aquí he bibiu toda la bida mía. Alabez, istas son as fiestas d'o mío lugar, asinas que ixa deleria que me fa ye parellana a la que la fa a cualsiquier persona as fiestas d'o lugar suyo... Con tot y con ixo, y continando con una chicorrona tradizión de bel par d'años, o conzello ha programau unas fiestas prou pobrichonas. Os mesmos conziertos de toz os años en os mesmos puestos y poca ufierta alternatiba. Os folkis abremos d'ir estiaño ta la Plaza d'o Chustizia, que asperemos que siga millor que S. Felipe que ascape se quedaba chicorrona. Encara que, continando tamién con ixa tradizión, a programazión folki ye muito floxa y con pocas collas aragonesas. A lo menos podremos ascuitar-ie a Lurte, Comando Cucaracha, Cadiera Coixa u Biellas Nuei, pero nos quedamos sin La Ronda (con o nuebo disco encara rusién), La Orquestina u los Chotos... O rock tampoco no sale guaire millor. Fito unatra begada, Marea unatra begada y asinas asinas... Iré t'o conzierto de Reincidentes que fa muito que no los beigo y que a lo menos por menos de bente euros t'ascuitas cuatro collas y no solo una. Ta foter-se-ie toda la nuei.

Entre os coleutibos sozials sí que se ye parando bella cosa millor u, a lo menos, diferén. Podez trobar informazión en o blog d'A Enrestida que, en iste sentiu (y en muitos atros), son más informaus que no yo.

Pero, como muitas begadas digo, os Pilars no son unas fiestas, ye un estau de l'esmo, asinas que encara que o conzello ufra lo mesmo que toz os zaguers años, encara que china chana me faiga biello y no pueda ni zorriar ni salir tantismo como me fería goyo, de seguras que faré un buen ratet y que muitos fablans nos trobaremos de borina por istos bicos y nos feremos buenas bieras y buenos charrazos.

martes, 2 de octubre de 2007

9x6=54

Beyer a TB asoben ye una tortura, pero muitas begadas me fa goyo amortar l’esmo, dixar-lo esenchegau y babear y estormacar lo que a TB m’esgargalle. Fa poco yera beyendo o programa nuevo de Ramonchu an que un adulto ha de responder preguntas de ninos de Primaria. Que a más gran parti d’os que i salen no sepan contestar a muitas preguntas de seguras ye un siñal de cuanto utils ta la bida adulta son as cosas que nos amostran en a escuela primaria pero ye de dar que bi ha cosas que os ninos han d’aprender y que en a bida cutiana son alazetals. U ixo creyeba yo….

A custión ye que un ombre de bels trenta años que ye estudiando filolochía abió de concarar una pregunta de zinqueno de primaria sobre matematicas. A pregunta yera, alto u baxo: Fulanito y Menganito tienen 54 mazanas. Fulanito en pilla 2/6 d’as mazanas y Menganito 3/6. Cuantas mazanas tien cadagún?

No ye como atras preguntas que i salión como “cuantos güesos bi ha en un umano?” un en que año puyó t’o trono nosequí?. Ixas cosas, se xublidan ascape en no emplegar-se de contino y podemos saber-las alto u baxo… Sé que bi ha bels 200 güesos en o cuerpo umano u que Felipe I (II de Castiella) yera Rei en 1591, pero no sé esautamen cuantos güesos tenemos ni cuan puyó t’o trono Felipe I. Pero sé, y se suposa que toda a chen que aiga pasau por a escuela u mesmo aiga estau bel diya en un bar d’os que bi ha a o canto de todas as escuelas sabe sumar, restar, multiplicar y dibidir numero simples sin fer serbir a calculadora.

Pos l’ombre iste abió de fer serbir un comodín y nian gosó dar una rispuesta amanada. Nos trobamos con ixe gran problema de un numero dibisible por 6 que antimas da de coziente unatro numero d’una zifra. Alabez l’ombre iste no sabe ni a tabla d’o 6 ni a d’o 9. No sabe qué sinnifica un “crebau” . No sabe dibibir ni multiplicar. Tien trentaidos años, ye fendo una carrera unibersitaria, ha pasau por a escuela (por ixa d’antismas que diz que se i amostraban millor as cosas y no agora, con istos royos) y NO SABE MULTIPLICAR NI DIBIDIR.

Iste ye o conoxiu “fracaso escolar”. Que una persona “educada” no sepa multiplicar ni dibidir numers d’una zifra. Pero a razons d’a fracaso escolar ta muitos son os emigrans, l’amostranza ta la ziudadanía y atrás fateras asinas….

Por zierto, si no ese sabiu qui escribió o Quixote, ye prebable que ese aparexiu en toz os zappings d’as TB’s, pero como “as matematicas son muito difizils”, ixo rai!. Creigo que cal saber qui escribió o Quixote y que cal tener una ambiesta y unos conoximientos chenerals d’Istoria, Luenga, Literatura y todas as “Zienzias Sozials”, pero parix que poca chen beye menister que a chen sepa multiplicar y dibidir. Y isto, encara que pueda parixer una chanzeta u bella cosa t’arreguir-se-ne, creigo que ye un granizo problema de toz. Que iste ombre podría aber estau mainate d’a Expo y, quemisió…, encargar-se de mercar os barcos ta esnabesar l’Ebro, por exemplo…

Cronica d'a Trobada

A la fin a trobada se fazió. A ixo d’as 20 nos chuntemos en La Gramola buena cosa de fabloggers que continón plegando china chana dica estar-ie bels bente. Bi yeran Remenches, Charrando TB, O chemeco d’as parolas, Os Monegros, Estricalla, Cordón Trenzau, Aragón colonial y asinas asinas. Tamién se i amanón un par de academicos de l’aragonés, asinas que a Trobada podemos dezir que estió un esito de raso.

Con bella biera debán pretemos a charrar d’una y d’atra cosa, d’os nuestros blogs y d’as nuestras basemias y, más que más de proyeutos cara t’o futuro. De lo que cal fer y de lo que caldría que se fese, como en todas as charradas malas que se chuntan dos neofablans. Mensachero dizió qui eba ganau os premios (tos los podez mirar en o blog d’
Estricalla) y continemos charrando y apañando lo mundo mientres prenxipiaba o partiu de rugbi entre Tonga y Anglaterra. Abié de marchar antis que no quereba porque teneba atro compromís, pero aspero que, como dizié fa diyas, isto no siga que un primer trango, y creigo que’n ye estau.

Agora somos en contauto, nos conoxemos fisicamen y, como de seguras nos trobaremos en os Pilars fendo bieretas por bel conzierto u bar, continaremos charrando, apañando lo mundo y (aspero) fendo onra a l’aragonés.