Johan Ferrandez d'Heredia, Os paisaches de y recomendacions de verano. Tierra de barrenaus 4x12

L'estudio d'a historia d'Aragón en la secundaria ye, en la mia opinión, prou radiu. Pasé por colechio y instituto sin saber que las quatre cosetas prou basicas. Ni me nombroron en totz aquells anyos l'aragonés, ni prou que a Johan Ferrandez d'Heredia, una d'as personas mas importants y influyents d'o sieglo XIV en Aragón. Mesmo ya d'adulto m'ha costau una mica trobar-ne información. Asinas que bien se vale que conoixeba a Guillén Tomás qui conoixe muit bien iste personache y tot lo medievo. Nos explica toda la suya figura y por qué ye tant important pa la chent que amamos y estudiamos l'aragonés.



En la segunda entrevista, Chuserra Barrios nos parla d'o suyo blog "Os paisaches de", un d'os pocos supervivients que continan, terne que terne, escribindo en aragonés. Nos i trobamos con viaches por tot lo mundo, y por luengas arrienda que tienen los suyo propios problemas. Beluns compartius con l'aragonés, belatros bien diferents. Tot ixo, complementau con fotos bien pinchas d'os puestos por a on que viacha.

En acabando lo programa, me permito la bamba de recomendar-tos que fer con lo vuestro tiempo libre d'iste verano. Series, libros, comics, ... entretenimiento de toda mena por si tos aburritz. Y antimás, la nueva sección de "Cancions blasfemas", lo resumen d'o blog y bella mica de mosica.

La temporada ya ye a pocas d'acabar-se, asinas que torno a animar-tos a que m'escribatz contando qué tos ha pareixiu, qué tos ha feito mas goyo y qué no pas y sobre tot, que queretz que faiga en la cinquena temporada que, si no cambio d'horario ni garra atra cosa rara, s'estrenará lo venient 7 d'octubre. Pero antes de tot ixo, lo programa de setiembre, con Ruben, Dabi y totz los TEMAZOS.

L'anonimato d'o blog

"Os tozals no s'achuntan, a chent sí", diz o refrán. Y encara que fablilandia ye una comunidat bien chiqueta an que quasi todas nos conoixemos, de cabo ta quan me toca d'explicar por qué miro tanto de guardar lo mio anonimato. Terne que terne me he de desetiquetar en Facebook, he de demandar que se despenchen videos u fotos. Mesmo bella vez he deixau de publicar comentarios en o blog u he demandau que esborren tweets an que se me nombraba con o mio nombre "oficial".(1)

Bi ha diferents razons. La primera ye l'entorno an que vivimos y a vision que bi ha sobre as mias ideyas politicas, culturals, etc... He visto como feban fuera d'o treballo a muita chent simplament por sindicar-se, u por tener inquietutz politicas. No ye precisament ixe un problema que vaiga a tener en o treballo que tiengo agora, pero nunca no se sabe a on rematará uno. D'atra man, muitas d'as personas que conoixco, d'o mundo "normal", tampoco no entienden todas ixas ideyas. Ni las entenderán nunca, por muito que les n'explique. Y a fe que he prebau de fer-lo un ciento de vegadas, pero ya uno se fa viello y no preba de fer venir a plego a dengún que no siga capable d'entender seguntes qué envistas. De feito, por un regular, no charro de politica que con chent que tienga uns minimos comuns con as mias ideyas.

A luenga ye atro entrepuz tamién asociau. Haber d'explicar, en 2016, qué ye l'aragonés, por qué lo desfiendo, por qué cal conservar-lo, que ye una sola luenga, etc... no ye a mia misión y me fa una cansera insoportable. Vivimos en un mundo an que la mayoría d'as vegadas a chent no pregunta por curiosidat de saber como viyes o mundo, sino por ganas de contar-te a suya versión y de amostrar-te-la como a unica verdadera. Y como ixa ya me la sé, porque sale totz os dias en Heraldo, m'estimo mas de perder o tiempo con atras cosas mas utils.

En un tercer puesto, tamién ye lo miedo por a mia integridat fisica. Encara que no he recibiu menazas serias, sí que me ha plegau más d'un comentario bien furo. Quan a la chent le qüestionas cosas tan delicadas como o sistema de creyencias u a suya identidat nacional u lingüistica, a soben se lo prenen muit malament. Cuento que a mayoría no pasan d'estar farutes on-line, que nunca no ferían cosa en o mundo fisico, pero nunca no se sabe como de barrenada ye la chent.

Razons a favor de salir de l'anonimato no en trobo garra. A mia credibilidat no pende d'o nombre con que firme lo que escribo. D'atra man, a qui quiera saber de verdat qui soi, no le costará guaire de conseguir-lo. No ye un secreto indescifrable.

(1) Me pareixe tan real o nombre que i mete, como qualsiquier d'as embotadas que foi servir u que me meten. D'asti a especificación

Una decada barrenada

En fer servir a base 10 pa contar, a nuestra cultura tien ixa tendencia a celebrar os multiplos de 5 y de 10 con especial ficancia. Y como me pareixe un momento tan bueno como qualsiquier atro pa fer una uellada a iste tiempo de treballo, lo aprofitaré.

A primer cosa que cal, ye agradeixer a toda la chent que leye o blog, ascuita o programa, y me sigue en os retes socials. Más que más a qui interactuatz con yo, que ye pa lo que se inventó isto de internet; pa comunicar-se.

A segunda, demandar perdon si a belun l'he feito mal sin querer. Sé que he teniu os mios momentos más ronyazas u encarranyaus, y que no siempre he sabiu navegar-me bien con ixo d'a diplomacia y a empatía. Aspero continar millorando como creigo que lo he feito en iste tiempo.

Quan se fa a uellada ent'o pasau, se gosa dar bella cifra, asinas que tampoco en isto fuyiré d'os topicos y las daré. A dia de hue, van publicadas 728 entradas en o blog. O programa de radio, l'atro gran proyecto de TdB leva 22 programas emitius con bellas 50 horas de radio en aragonés. Antes, ya en heba feito quantas mas en as colaboracions de La Enredadera con a sección de L'aragonés ye bien vivo u en Fendo Orella, an que colaboré durant una temporada. Tanto lo programa como as colaboracions, las puetz trobar en a canal de Ivoox.

En Flickr ya van quasi 400 fotos puyadas. No pretendo que dengun creiga que son buenas fotos. Las tiengo basicament como soporte grafico d'o blog. Pero creigo que bi'n ha, de buenas, y a fe que de curiosas.  Quanto a Youtube, ya son mas de 100 videos compartius. Isto ha viviu muita actividatz en zagueras con a ideya d'as #videofateras, que tanto exito ye tenendo (adintro d'o que se considera "exito" en o mundet de l'aragonés). Pa rematar, he quiesto fer o fanzine, pa tener qualcosa en soporte fisico, con a doble ideya de tener un recuerdo y de financiar o programa de radio.

Cifras aparte, me quedo con diez anyos de aprendizache individual y colectivo. Ya he dito muitas vegadas que iste blog (y tot lo que le rodía) nomás tien sentiu adintro d'un movimiento de defensa d'a luenga y d'una manera de entender a comunicación que comparto con bellas quantas personas. Aspero que continemos treballando todas nusatras por un Aragón y un mundo diferent, más variau, chusto y poliu y que continemos tamién compartindo ixos raticos tan rebuenos.

Os fabloggers. Tierra de barrenaus radio 1x01

Dimpués de muito tiempo barruntando-lo, y de bella mica menos aprestando-lo, ya puetz ascuitar o primer programa de Tierra de barrenaus radio. Dos horas de radio de tot en aragonés, que hemos aprofeitau ta charrar de blogs en aragonés. ¡Que millor traza de prencipiar a versión radiofonica de un blog en aragonés!. U un fablog, como les decibanos fa tiempos.

O programa, que lo puetz sentir en MP3 u OGG, u descargar-te-lo dende iste vinclo (botón dreito en o formato que quieras y alzar vinclo como...), repasa o gran movimiento de creyación de blogs en aragonés que bi habió fa una decada y a on que naixió, entre muitos atros, iste blog que leyes agora. Hue, muitos d'ixos blogs han desapareixiu "como glarimas en a plevia", pero muitas encara nos alcordamos con firme carinyo d'aquella etapa y de toda la chent que nos conoixiemos.

He teniu a suerte de compartir iste primer programa de radio con tres grans personas como son Marco Joven, autor de Estricalla, Roberto Mensachero, autor de As tierras olbidatas y organizador d'as dos trobadas de fabloggers, y Santi Paricio, autor de O chemeco d'as parolas. Totz quatre estiemos charrando d'os blogs nuestros, d'atros, d'as ferramientas informaticas, d'aprender aragonés, .... una mica de tot en dos horas que cundioron muito, pero que se nos quedoron curtas.

Tamién bi estió present por telefono, o gran Chorche Romance, autor, entre atras cosas de Purnas, blog d'obligada lectura ta muitas de nusatras y que dio tamién a suya anvista.

Aspero que tos faiga tanto goyo ascuitar-lo como a yo me fació gravar-lo. T'ambientar-tos un poquet, tos recomiendo de visitar os blogs d'os convidaus, que vinclo abaixo, y fer-le una uellada a o video que nos recordó Mensachero y que yera una replega d'as cosas que febanos en aragonés en internet quan os fablogs y os fabloggers lo petabanos.

Entra en os blogs:

As Tierras olbidatas

O chemeco d'as parolas

Purnas 

Siet anyos barrenaus

Mensachero, Cordón trenzau y Purnas en a
II Trobada de fabloggers

Siet anyadas en ferá en bells diyas d'aquell 'Ola mundo' que fació Tierra de barrenaus un cinco d'aviento de 2006. Fa poco, un mocet me fació remerar que iste ye un d'os blogs escritos en aragonés que más tiempo leva ubierto sin aturar. Creigo que totz os meses, como poco, bi ha habiu bell post nuevo. He teniu millors y piors tiempos y prou que millors y piors articlos. Pero lo feito ye que aquí contino. Recontando as mias basemias y delerias y prebando de que qui me leyetz pasetz un buen rato a lo menos.

Ubrié lo blog por diferents razons. Una d'ellas ye a terapeutica. A soben bi ha pensamientos que no comparto con guaire chent por diferents razons. Aquí he recontau cosas muito personals u pensamientos que o suyo discurso me ye de dificil estructuración "en viva voz". Cosas que talment m'aganaba que o mundo sabese pero no gosaba decir-las que escribindo-las d'amagatons baixo un nick que ya no enganya a dengún.

Atra yera a mesma por que prencipié a fer clases d'aragonés: amillorar o mio conoiximiento d'a luenga, "forzando-me" a fer-la servir. Os primers tiempos yera un sostobe contino de diccionario y libros que, china chana ha esdeveniu menos freqüent. As nuevas ferramientas informaticas permiten no haber de tener una  biblioteca dezaga ta poder escribir un post decent. Ixo, y me fería goyo de creyer que tot lo que he aprendiu en istos siet anyos ha amillorau o mio libel. Ye una recomendación que foi a tot qui remata segundo ran y no sabe o qué fer con tot ixe conoiximiento. Lo primer, que mire de trobar a bella persona u colla de chent que faya servir a luenga y quede semana par d'atra. U fer-se de bella asociación que faya servir l'aragonés de contino, ye de dar. Pero como muitos tienen horarios marcianos, como en he teniu yo muitas anyadas, u son de mal convivir, u son vergonyosos, u viven en quemisió dó, atra d'as cosas que pueden fer, compatible de tot con as anteriors, ye ubrir-se un blog. No cal garra conoiximiento d'informatica, ni de disenyo grafico. Ni cal que tienga un tema brillant. Ni sisquiá un tema. De todas trazas ye un blog en aragonés y o publico ye más que radiu y siga intresant u no pas lo leyerá poqueta chent.

Tamién he feito bell experimento que a la fin no salió como asperaba. Aragón ateo, encara que yera un prochecto que me feba muito goyo, a la fin no podié atender-lo como creigo que mereixeba. Trobo a faltar tamién más comentarios d'a chent. Y, tot cal decir-lo, a aquell "troll bueno" que mientres bell tiempo estió correchindo-me os posts.

Os blogs, tot cal decir-lo, se son quedando bell poquet demodé. No como as cintas magneticas d'audio, pero sí talment como os vinilos. Una cosa repuyal, que nomás as romanticas como yo continamos fendo servir. U autoras de prestichio, por un regular vincladas a bell meyo de comunicación más gran. Os fablogs, como les decibanos en os tiempos d'oro, ni te cuento.

Quan prencipié a escribir TdB, yera quan cada semana surtiba un fablog nuevo. Yera toda una esclatada contina de fabloggers que mesmo, gracias a las ganas que teneba Mensachero, pleguemos a fer bell par de trobadas. Astí conoixié u facié más pacha con chent como Purnas, Cordón Trenzau, o mesmo Mensachero, Charrabis, o blogger de Os Monegros y muitos atros. Bell poquet antis precisament Cordón Trenzau, O chemeco d'as parolas, Estricalla, u toda la ripa blogs que teneba Chorche yeran os mios referents. Estió lo que me fació decidir-me por meter a mia chicota alportación a la fablogosfera. Hue, quasi totz ixos referents son en as tres pedretas u dreitament en o fosal de blogs. Os nuevos retes socials los han deixau viellos. Mesmo TdB notó una gran baixada en a suya producción malas que me facié FB y Twitter. Tamién plegoron t'a part d'alavez, atros blogs d'a mesma coda (politica u lingüistica) tant grans como Desde Banarus, Aragonando, Labrándonos en la sombra, Kale Borraja, Fendo huellos, O diaple d'o gadget, Os repuis u As tierras olbidatas, entre atros muitos. Una verdadera comunidat y fuent de muitos textos que reflexaban (y beluns encara lo fan) lo sentir de toda una cheneración.

Creigo que os blogs, y más encara os fablogs, continan estando una ferramienta que fa honra. Ye una traza facil y de baldes, y con amplas posibilidatz, de publicar escritos dillá d'os ciento quaranta caracters u d'os mensaches chiquetz con que funcionamos en FB y Twitter. D'o mensache curto, facil y rapedo. Agora que as revistas en papel, os periodicos y tot lo que se fa con celulosa, ye más en crisi que ta qué, no nos queda que o rete si queremos publicar bella cosa con suco.

Asinas que por una vegada, me voi a meter nostalchico. No diré que lo que bi heba antismas yera millor, porque simplament creigo que yera diferent. Hue bi ha atras trazas de comunicación y de relacionar-nos. Pero sí quiero reivindicar o papel d'os blogs personals y animar a todas aquellas que tantas buenas letras nos dietz (y encara nos ne datz belunas), que continetz u tornetz a fer-lo. Que escribatz, que a l'aragonés le calen todas as voces posibles y muita, pero que muita reflexión. ¿Ta quan ixa tercer trobada, chent?

Quarteno cabo d'anyo

Ahiere se feban quatre anaydas dende que prencipié con ista historieta de Tierra de barrenaus (y barrenadas). T'a part d'alavez prencipio mas como un chuego, una traza de pasar o mio tiempo libre, que en ixas envueltas en teneba más. China chana ha iu esdebenindo un fillet mio. Quatre anyadas ya, en istos tiempos a on que tot dura poco, a on que Facebook, Twitter y demás han acotolau quasi os blogs, Tierra de barrenaus i contina, en a blogosfera, y en aragonés. Muitos atros blogs remanen inactivos de tot u son ¿ta cutio? en o fosal (Aragón colonial, O chemeco d'as parolas, Estricalla, ....). En ha surtiu arrienda de cosas dende ixos primers posts que no feban que remerar convocatorias. As seccions: microbarrenaus, o millor d'a semana, Ampraus, En leyendo, Exerciendo lo pasquinismo... He penchau mosica y videos de toda mena: dende Comando Cucaracha dica David Bowie con Nine Inch Nails. Pulp, Franco Battiato, Los enemigos, Reincidentes, S.A., Azero, que me se yo.... He charrau d'Aragón, Catalunya, Escocia, Euskal Herria, Palestina, Chiapas, de todas as cantonadas d'a planeta. He visto morir locals (Dispierta Fierro, siempre te remeraré) y naixer atros (como A Flama, ixe gran puesto de compleganza d'as indepes y atros movimientos socials). He visto naves en flamas dillá d'Orión. Ui, no, ixo no lo he visto.

Tierra de barrenaus mesmo tenió un fillo (ya soi güelo) que se diz Aragón ateo y a on voi penchando noticias y articlos sobre l'ateismo y as relichions y atras supersticions. Me he feito facebook, que dicié que nunca no me'n fería. He charrau tamién de milenta cosas que han pasau politicament istas anyadas: o tozolón electoral y social de CHA, eleccions de toda mena, a catalanofobia, a vada cheneral d'o 29-S, a manifestación por un Aragón trilingüe, as chornadas por as libertatz nacionals, as anfifaixistas, ... Tamién bi ha habiu articlos sobre cultura, sciencia, television... Y Magic, que dende que cerroron Freakland lo he iu deixando a moniquet.

Diz que cal contar as anyadas d'os mixins multiplicando por siet ta transformar-las en anyadas humanas. No sé qual será a vida meya d'un blog, y que edat tendría alavez si estase una humana, pero aspero que iste se faiga bien viello y veiga a rienda de cosas pasar.

Bueno, o caso ye que ta celebrar-lo con todas vusatras, tos convido a una biera. Ista tardi de 18 a 20.30 seré en A Flama ta convidar-tos a un botellín d'Ambar (u refresco). Nomás cal que me digatz una d'as frases que siempre pencho debaixo d'o titol d'o blog. No vale a que agora ye penchada, no tos creigatz que tos lo meteré tan facil. Astí tos aspero...

Ampraus 044

Ya un poquet más relaixau d'os mios afers de treballo, y dimpués d'as fiestas d'a Madalena, aspero tornar con bien de rasmia y muitas cosas intresants ta emplir o blog de conteniu. Prencipiar con un Ampraus no ye un sinyal d'orichinalidat, pero bueno. Asinas ye a vida. Ilustro iste con una sobrebuena vinyeta de Fontdevilla que publicó en Publico. Muito gran!

Fablando de tornadas, torna O chemeco d'as parolas, un d'os pioners en isto d'os fablogs. Y torna tamién citando a otri, en iste caso un articlo d'o País a on que charran de luengas en periglo y, prou que sí, i sale l'aragonés.

Octubre 17 nunca no nos dixó. U sí. Va y torna de cabo ta quan, siempre con videos intresants ta fer-se una rialleta como aquel que nos dixó d'o santo por tierra u iste nuevo que penchó sobre o baile d'o Mao Mao.

Purnas ye qui nunca no marcha y mesmo nos twittea A flama. Fa bells pocos diyas penchó un articlo d'opinión-vomeco amprau de o Heraldo. Espanyol y rancio son adchetivos que asoben van chuntos, pero lo de l'hombre iste ye brutal. O somarda analís de Purnas nos dixa tamién a rialleta que cal fer-nos ta no plorar deban d'iste panorama mundialero espanyolazo tan aburriu y inquesto que tenemos.

A lo menos en iste cabo de semana buena cosa de buenas chents (y de malas tamién) nos chuntaremos en Echo ta pasar un sobrebuen ratet en o PIR. A suya programación la podetz consultar en l'achenda gaitera ta qui l'intrese. No i viyemos fendo una bieras u unos sucos d'aranyons d'ixos tan buenos que fan por ixas tierras. Salut!

Nobedatz

Dimpués d’istos pocos diyas de descanso, torno con muita rasmia, ganas de fer cosas y bellas nobedatz. A mía ideya cuan prenzipié con Tierra de Barrenaus yera basicament esbastar un ratet cada diya y aprofeitar ta espardir combocatorias y gomecar bellas ideyas que me dondiaban por l’esmo terne que terne. China chana Tierra de Barrenaus s’ha combertiu en cualcosa más ta yo. Muitos sé que me liyetz asobent. Atros, más de cabo ta cuan. Y atros simplament biyetz os bideos que pencho.

Lo que quiero agora ye dar-tos bella cosa más. Ta prenzipiar tos boi a ufrir una adreza electronica tierradebarrenaus@gmail.com que, dende agora será a d’o blog. Podetz imbiar-me-ie todas as combocatorias que quieratz u cualsiquier cosa que tos agane que publique u que esparda. Antimás, dende agora imbiaré de cabo ta cuan un boletín informatibo ta tot qui quiera. T’apuntar-se-ie imbiatz-me un mensache a o debandito correu indicando-ie que queretz rezibir o boletín. Que i saldrá? Pues as zaguers nobedatz de Tierra de Barrenaus, combocatorias de toda mena (culturals, politicas...), bideos de lemurs y asinas asinas.

A segunda nobedat ye una nueba cuenta de Flickr. Bella mena de Flickr de Barrenaus. Si belún no conoix ista web, ye basicament, un puesto an que penchar fotos. No soi guaire buen fotografo. De feito soi penible, pero me fa muitismo goi de tirar fotos de totz os puestos y mobidas que i soi. Asinas que talmén no i trobetz amanixers gloriosos, pero de seguras que i trobaretz fotos de manis siñaleras u puestos bien pinchos. Por agora bi ha tres albums tematicos: Aragón, an que pencharé fotos d’os puestos t’an que boi; Cultura aragonesa con mosica, tradizions y asinas asinas. Y Luitas, con fotos de toda mena de lutias sozials, culturals y politicas d’iste país y de dillá d’a güega.

Aspero que tos faigan goi as nobedatz y que las prenzipietz a fer serbir antis con antis. Asinas que ya podetz ir imbiando os buestros parixers t’a nueba adreza (tierradebarrenaus@gmail.com) y en bels pocos diyas prenzipiaré a imbiar info. Tos dixo con unatro bideo de lemurs. En primerías parix que ye un monchón, pero be-te-me que no! Que ye un lemur de berdat! Que'n ye de pincho! Igual como un mixín, pero en mono...

Cronica d'o puen. MdaS 021

Una semana rariza a pasada. Pocos diyas de treballo, ziento de mobidas... Asinas que guaire no he puesto leyer. Prenzipión os actos o miercols de nueis con a XI Borina por l’aragonés. A tamás d’estar bispra de puen y de coinzidir con o conzierto de Tako, o Meta rebutió de chent. Se i penchoron todas as falordias presentadas t’o concurso d’a II Trobada de fabloggers. Una borina bien pincha que remató bien tardi. A l’atro’l diya, en rebellar-nos marchemos a fer una gambadeta por o Paseu Independenzia a biyer os puestos de libros. Pocas nobedatz intresans i biyemos. Con tot y con ixo bellas cosetas sí que i trobé. Y bien pinchas. O Diczionario de terminos cheograficos de Chesus Casaus y Pascual Miguel ye a primer. Ya lebaba muito tiempo asperando-lo y poder a la fin alparziar-lo me fazió firme goi.


Zaragoza, Ciudad sumergida, me sorprendió asabelo. Conoixeba a l’autor suyo, Eduardo Laborda, y parti d’a suya obra pictorica, pero no pas o libro suyo. Si podetz bel diya, fez-le una golladeta y, más que más, si tenetz a oportunidat de charrar con l’autor, que tos rezentará arrienda istorias curiosas.
O terzer libro que me fazió goi lo presentoron de tardis en a debantadera d’a nueba siede intergalactica d’a
Biblioteca Frida Kahlo en Cantín y Gamboa. Ye Zaragoza Rebelde y se composa de un buen fascal de testos sobre os mobimientos sozials en A Inmortal entre 1975 y 2000. Un pasau inmediato que cal conoixer u no ixuplidar. Iste libro, antimás, ye parti d’un prochecto que tamién incluye dos exposizions y una pachina web.
En ixa mesma debantadera se presentó tamién a librería asoziatiba
La Pantera Rossa, que’n he charrau ya bella begada y o “Rinconcico Zapatista”, un puesto en a siede nueba d’a Biblioteca adedicau de tot a la reboluzión zapatista de Chiapas.
Entre os actos que programó a Frida Kahlo, podiemos trobar un chiquet ratet ta bisitar a barra organizada por o BIC, que dión bel poquet de conteniu a ixe esbafau San Chorche. Tot un luixo de poder biyer un cado independentista en a Pza San Bruno, firme bistero. Cada diya, l’independentismo s’amaga y s'abergüeña menos.


Tot isto y encara no yera plegau lo cabo de semana!. En rematar a chornada d’o biernes fuyiemos ent’o mont, t’as Chornadas d’o Galligo. O sabado de maitins dondiemos por a Galliguera y dimpués de chentar estiemos biyendo como feban a nabata en a placha de Morillo. Estiaño l’adibión unatro trampo asinas que bi eba bella poca de medrana por si s’entrascaba en bel puesto. De tardis tamién estiemos biyendo os mallos d’Agüero y a ermita d’o lugar con una portada majisma y muito bien coserbada. Iste lugar, que encara no conoixeba parix estar una alfaya de raso. Se i conserba l’aragonés alto u baixo bien, bi ha güeitres de diferens menas y atras abes y, amás d’a debandita ermita, os mallos suyos son firme impresionans. Una redolada repolida.
En Ayerbe, en plegando a nueit, se feba una ferieta ta tastar os “liquidos d’o Mediterraneo”. Por 5 € podebas tastar tres menas de bin d’a redolada, un plato de mondongo y queso y azeite y miel. Sobrebuena ideya ta fer conoixer toz ixos productos. Ya o domingo, a nabata eba de baixar. Entre que feban os zaguers apaños, chent d’a organizazión nos esplanicó una mica a istoria y bellas istorietas de nabatas y nabaters. Como ye de dar tot se mezcloteyó con a reibindicazión d’a bida d’os ríos y prou que d’as riberas suyas y os suyos abitadors, umanos y no umanos. Podetz trobar unformazión sobre o prochecto d’entibo aquí, pero si de berdat queretz conoixer l’afer, pasatz-tos-ie y preguntatz porque de camín tos esplicarán bien tot lo que calga.

Un buenizo pseudopuen ta remerar-lo. Unatro año torno a pensar-me de puyar tamién ta Laspuña que astí baixan por a Zinca. Será ta cabo Mayo asinas que talmén nos i trobemos. Y si no regular que l’año benién en a Galliguera.

Chentuzias... y diez mil más. MdaS015

Ista semana ye de contradiczions por toz os cabos. Aragoneses que no ben d’estar-ne, donans de sangre que torturan u cristianos masclistas. Bueno, ista zaguera no ye una contradiczión pues en o suyo libro sagrau queda bien platero cómo han d’estar as relazions con as mullers.

Labadora liberadera: O Baticano ye enzerrinau de tot en dar-me notizietas como ista que podez leyer en Publico y en o blog an que la trobé de casualidat. Si soz tan chandros de no punchar-ie ta leyer-la tos ne comento. O periodico d’o Baticano publicó, en o diya d’a muller, que l’imbento que más eba feito por a suya –y tamién a nuestra- liberazión yera estau a labadora. Remeré cuan lo leyé un chiste masclista que no escribiré aquí pero que de seguras que a más gran parti conoixez. O problema ye que istos no yeran fendo chanzas. Que lo piensan! Y lo escriben, que ye mesmo pior! Contimparando a imbenzión d’a labadora con a incorporazión d’a muller t’o treballo remunerau u a pildora. Cal remerar que se suposa que o Papa charra dreitamen con Dios. Cuento que iste l’abrá dito que nos comunique reflesions tan intresans como ista. Con tot y con ixo, continará abendo mullers cristianas y feministas cristianos y cristianas. Yo no entiendo ni pon ya...

Concurso de españols: Parix que’n han feito uno y no en ebanos parau cuenta. Bergoñoso ye l’articlo publicau o pasau 10 de Marzo en El Periodico. En ye por tantas cosas que caldrá fer trestallos diferens. A primer l’articlo y a traza d’escribir-lo. "As bozes más libres de l’aragonesismo". Aquí fan serbir a parola aragonesismo que, en primeras nomás aplican que t’o PAR, pues CHA siempre ye o partiu nazionalista, no pas aragonesista. Pero cuan ye ta charrar mal de CHA, Labordeta ye aragonesista (y bueno) y no nazionalista (y alabez, malo). Istos dos, antimás, son as bozes más libres. Y en son porque tienen unas posizions ideolochicas más españolas que no dengún en os suyos partius. Os independentistas u mesmo os criticos de CHA, somos radicals antiespañols. Bozes libres no. Que be d’estar que belún nos ha engarcholau os garganchons nuestros. Manimenos si, te fotes güeito años representando a un partiu nazionalista y dimpués dizes istas cosas, en cuenta d’estar un ipocrita yes una boz libre. Bien y brabo! Adedicar una pachina completa a isto me parix prou penible. Que en istas calendatas y con tot lo que ha plebiu continen beyendo-se opinions asinas en chen que se suposa que esfiende Aragón... Jibo! Que miedo! De Hipolito poco que charrar. En o PAR me pienso que a más gran parti piensa igual como él. Si a la fin no botan en contra d’a lei de luengas no será por ganas si no por remanir en o gubierno de conchunta con o PSOE y pillando bel troz de cualcosa que les darán.

Deumil: Diez mil independentistas catalans marchón por Bruselas. Istas bozes puestar que t’os periodistas no sían libres y en cuenta d’estar catalanistas serán periglosos independentistas que tienen os mesmos obchetibos que ETA... A notizia la conoixie en o blog d’Aragonando -muito recomendable de leyer asobén- y me sorprendió asabelo. Sisquiá en Aragón podesenos chuntar diez mil indepes en Zaragoza. Mesmo fendo a proporzión de poblazión (alto u baixo 1/5) con chuntar dos mil en bel acto... China chana. Bel diya....

Tot bale?: En istos diyas he conoixiu de dos iniziatibas que me fan un poco de pena. A primer, que la sentié en a radio, pos estión dando muitismo mal, ye a tortura de toros a fabor d’os donans de sangre. L’atra una colaborazión d’UNICEF con Aramón. Cuento que a las personas que repleguen l’aduya d’UNICEF u a sangre donada les importará prou poco como s’aiga conseguiu. Bale tot? Me pienso que no. Entidaz como istas han de tener unas trazas una mica eixemplars mesmo en dembas que no son de tot suyas.Bi ha muitismas atras trazas de conseguir diners que no cal torturar a dengún u colaborar con una interpresa que ye estricallando meyo Pirineu (y l’atro meyo, ya biyeremos...).

Anunzio de Deumil:

Dios ye masclista: O millor d'a semana 002

Tornamos con o milllor d'a semana. Prebaré de meter un titol todas as semanas que resuma lo millor, u como en iste caso, que charre d'un d'os afers.

- En ixa cristofobia que diz que bibimos en zagueras -sisquiá- estié fa bels pocos diyas alparziando sobre o masclismo en l'antigo y o nuebo testamento. Lo que trobé estió muito millor. D'una man, l'articlo que amenistaba, d'atra una pachina sobre ateismo sobrebuena: http://www.sindioses.org/ que fa bels diyas que ye d'entre os binclos d'iste blog. L'articlo fa un repaso por zitas biblicas masclistas y por a opinión d'a ilesia u ilesias cristianas. I charran d'a catolica, pero tamién d'a resta de corriens d'o cristianismo. Nunca no he entendiu que belún pueda amenistar un dios ta esplicar-se l'uniberso suyo dimpués de fer los diez u doze años. Alto u baxo dixé de creyer en un dios a la mesma edat que dixé de creyer en follez, fadas u David o Gnomo. Y no entiendo que mica adulto pueda creyer-ne. Pero, ta yo, ye mesmo de más difizil entender que una muller, siempre despreziada y somesa por a/s ilesia/s pueda creyer en o dios que lo fa posible por aizión y omisión. No digamos un omosexual, ...

- En o chemeco d'as parolas torna a aber-ie bida! Dimpués de bel tiempo que no tartiba ha tornau a penchar cualcosa y, como ye normal, ye un buenizo articlo sobre a normalizazión / normatibizazión d'a catalán. En muitas d'as cosas que i diz aplicables a l'aragonés. Ya se te trobabaa a faltar en a blogosfera, charrabis! Sobre ixe prozeso contino de normalizazión que tienen as luengas subordinadas -que, en a mía opinión continarán estando-ne ta cutio todas as que no tiengan un estau propio que las refirme-trobé un bideo de casualidat. Asobén dizen os saputazes -y o bulgo, siempre saputaz tamién- que, con isto d'a globalizazión y d'a inmigrazión, as luengas minoritarias / minorizatas no i cullen. Que son barraches t'a combibenzia con os nuebos abitadors d'o país que bienen de luen. En Em dic Mireia tamién se'n charra con un personache inmigran que siempre se l'endrezan en castellano y se mete toda nierbuda. En Cataluña se son fendo muitas cosas en a endrezera de normalizar o catalán tamién entre ista nueba poblazión. Un bideo sobre ixo lo tenez a la fin...

- D'a globalizazión debandita, en ha surtiu a crisis ista que diz que tenemos. Siempre he dito que l'afer u disziplina que menos cosas sé ye a economía. Ta yo ye un misterio de tot. Fosca como a foscor. Manimenos en O Diaple d'o Gadget trobé un bideo -de o programa de Buenafuente- que m'esplicoteyó de raso porqué y cómo emos plegau en a crisis. Un chenio, l'ombre iste.

- En a FLA, en o puesto de Malavida, beyé que, a la fin, Juako Malavirgen eba publicau un disco. Juako ye d'ixos pocos mosicos que crei que a cultura be d'estar libre y de baldes y cuento que, de diners, no'n ba ni millor ni pior que cualsiquier atro mosico aragonés. En a web suya podez sentir de baldes o disco. Y si tos amanaz a o Salón d'o comic que se ferá o cabo de semana benién tamién podrez mercar-lo-ie en o stand de Malavida.

A despedida la foi con d'os bideos. O primer, una d'as millors eszena d'o zine Manga, que fazió que remerase o tiempo ixe que m'empapuzaba d'as zintas de urotsukidoji, akira y cualsiquier cosa con un Mechwarrior. O striptease de Dominion Tank Police. O segundo sobre o catalán y los inmigrans que'n he charrau alto. Que tos faiga buen prebo...

Dominion Tank Police:

Catalá:

Lo millor d'a semana: 001

Con o segundo cabo d'año de Tierra de Barrenaus, quiero prenzipiar un nuebo trestallo: Lo millor d'a semana. Asobén trobo por o rete cosas que me fería goyo de charrar-ne aquí, pero que no tienen prou suco u que simplamen y por galbana, a la fin no en charro. Todas ixas cosetas irán chuntas en una mena de resumen de cada semana. Tamién ye una traza de escribir, a lo menos, cuatro u zinco post a o mes, que en zagueras os fabloggers parixemos un poquet chandros.

Y asinas prenzipia O millor d'a semana 001:

- Grazias a Desde Banarús conoixié a una d'as organizazions más penibles d'Aragón: CHEN. O nombre suyo ye en aragonés y dizen rasmia y cosas asinas, pero encara no tenemos guaire platero qué se suposa que son (Lo que son lo sabemos toz...). CHENtota.

- Parix que os diners que Alejandro Sanz furtaba, SGAE mediante, lo iba ficando en una cuenteta en Liechtenstein. Ai, que trabeser iste Alex! Que pena me fa que t'aigan pillau! Guarda si se queixaba de que a piratería yera delito y que os 'manters' yeran as piors personas d'a mundo y... fote! él lebando los diners nuestros ta paradisos fiscals. A notizia en Publico. Por zierto, belún sabe como se diz Liechtenstein? Cuento que cualcosa como /lijtenstain/ y no pas /lichestein/....

- D'as chornadas antifaixistas no'n he charrau brenca, pero son estadas bien pinchas. A charrada y o conzierto de Muskaria estión prou buenos y bi eba arrienda chen. Por lo que he sentiu tamién a resta d'actos. Cal felizitar a la Coordinadera y a la resta d'organizadors. Entre els A Enrestida charra en o blog suyo sobre as chornadas: http://aenrestida.wordpress.com/2008/12/02/unas-chornadas-plenas-dilusion-y-de-chen/

- Ya he dito bella bez que no me fan goyo as repetizions en Magic. Que tot lo mundo chugue con Affinity, Zetro-Canto y mierdas parellanas me parix que fa d'o chuego un caten, asinas que me cuaca asabelo que se faigan barallas orichinals y que istas trunfen. Una d'as zaguers que he bisto chugar, que funziona bien y que ye orichinal (y friki) mesmo en o nombre ye a Comunidat de l'anillo que fa serbir un camatón de peteniadors de planos (Planeswalkers) ta ganar. Fez-le una güelladeta aqui.

- Como no podría estar d'atra traza y, ta rematar un par de bideos. Sobre mixins y sobre Los Gandules (Os chandros), bersión charanga....

Mixins que s'estozolan:

Los Gandules con charanga:

20 d'abiento y II cabo d'año

Cuasi de presen de cabo d’año ta iste blog (Que’n femos dos ya!) me plega a notizia d’o conzierto que han presto os enrestidos t’o 20 d’abiento. En ista calendata remeraremos unatro año más a figura de Chuan V de Lanuza, o mozo, asesinau por esfender os dreitos y libertaz nazionals d’Aragón en 1591, y en 2008, umillau de tot por os quemisió-nietos d’aquels boques.
O conzierto ye difizil d’amillorar: Magnetophones, que no los he sentiu pero tiengo muito buenas referenzias. Prau que en cada conzierto amilloran más. Y ta rematar, una d’as millors collas d’a historia d’a umanidar: Obrint Pas. Asinas que esborraz tot lo que tenesez en l’achenda ta ixe diya porque no se i puede mancar. Toda a informazión la tenez en: http://enrestida2008.wordpress.com

Grazias, A Enrestida, por iste presén. Tierra de Barrenaus tos lo agradeix asabelo.

Unibersitaires

Con muitos cursos prenzipiando l'aragonés contina mobendo-se. Encara mancan prous diyas t'a II Trobada pero o concurso de microfalordias ya en tien siet. En tan poquet tiempo cuento que ye un exito. Ayer, en a publizidat d'a FNAC ya i aparixeba a charrada que ferá Chorche Romance.

Tanimientres, Unibersitaires, un nuebo colectibo en esfensa de l'aragonés que tendrá l'actibidat suya más que más en a Unibersidat Aragonesa, se presenta ista tardi a las 16:55 en l'aula 501 d'o edifizio Interfacultaz. Ya caleba que bel colectibo prenese l'erenzio d'a Colla Unibersitaria por l'aragonés (CUA) que, ta qui no los remere, esfendión l'aragonés fa muitos años en a unibersidat, publicando o boletín O Lupo, con qui muitos aprendiemos tanto. Por experienzia, a unibersidat ye un puesto furo an que esfender cualsiquier ideya, pues ye plena de mielsudos que les fa galbana cualsiquier cosa. Y no porque sían masiau aqueferaus indo ta clase, que muitos nian i ban. A tamás d'ixo, me pienso que ye un d'os puestos an que cal estar. De feito ye una pena que mientres istos años no bi aiga abiu garra colectibo cultural en esfensa de l'aragonés que aiga conseguiu sobrebibir más de tres diyas. Asinas que tos deseyo toda la suerte d'o mundo y que espardaz tot lo posible l'aragonés en a unibersidat! Y más que más en ixa facultat rebutién de saputazes que toz sabemos....

Por no fer un articlo de propio ta una fatera, contino tos pencho un bideo que toz os antimadridistas, que creigo que en somos muitos, sabrez gronxiar: Aupa Irún!

IN

A mosica sonaba por os altabozes d’a ziudat. As radios y telebisions no dixaban de charrar-ne. A chen impliba a carreras. Chilaban, cantaban, blincaban, s’acarrazaban. Consziens de que o poder que eban feito mientres años, de que nunca no aber reblau, les eba endrezau dica ixe inte chusto. Os más biellos ploraban de goyo remerando os primers años de luita. Os más chobens paraban cuenta d’estar bibindo un inte istorico y de que agora les caldría fochar firme. Toz sabeban que un nuebo mundo prenzipiaba.

Ista ye a microfalordia presentada por Tierra de Barrenaus t'o concurso d'a II Trobada de Fabloggers.

II Trobada

Buenas notizias t'os fabloggers! A segunda trobada ya ye presta. Grazias a lo treballo de Mensachero que nunca no rebla en isto de achuntar-nos a toz de cabo ta cuan, habemus trobada. A calendata eslexida ye o cabo de semana d'o 21 - 22 de nobiembre. Con charrada en Fnac y tot! Qué ran! Unatra nobedat ye a combocatoria d'un concurso de microfalordias que ya ha prenzipiau y que encara bi ha de plazo dica lo quinze ta imbiar-ne. Son nomás que 100 parolas, asinas que mesmo os alumnos de primer ran podez gosar de fer-ne una. Ta saber-ne más: http://trobada.blogdns.net/

Enta Banarús

O zaguer articlo de Desde Banarús ye un d'ixos que sabe fer el tamién y que tantas charradas iperfrikis en as nueis de borina nos ha dau. De seguras que a benién begada que nos beigamos podremos charrar más fundo d'ixe afer, pos ye bien intresan, pero por agora, me fería goyo comentar bellas cosas.

Sobre o creximiento sostenible, remero que en unas chornadas que estié fa bels pocos años se charraba sobre a insostenibilidat de no remero qué. Creigo que yera un entibo en Latinoamerica. Una d'as personas que feba a charrada charró sobre creximiento sostenible. Dimpués d'a charrada sentié a un d'os organizadors una d'as millors frases que he sentiu: "o creximiento, por definizión no ye sostenible". Ye berdat. Garra cosa puede crexer ta cutio. Nunca. En garra caso. Bueno, talmén a entropía, pero ixe ye atro afer y, por agora, sin aplicazión practica.

Sobre as posibles soluzions t'o problema que planteya l'actual modelo, bi'n ha unatra que o blogaire no'n ha charrau, y que ye tan simple como amugar a natalidat a un fillo/a por parella. U mesmo menos. Basectomia solidaria por decreto, que cantaban DEF CON DOS. Prou que ixo nomás se puede fer con un gubierno autoritario y que tendría arrienda d'implicazions morals dillá d'a propia superbibenzia d'a espezie umana y a planeta an que bibe. Antiparti d'a mesma superbibenzia, me pienso que o modelo de desembolique, de relazions umanas y de sistema productibo oczidental nos endreza dreitamén ent'a idiocracia. (Los que no aiga bista a zinta, beyez-la).

L'atra soluzión que se debuxa ye a de jopar d'a Tierra enta atras planetas u, como diz Banarús, enta atras reyalidaz paralelas. Prou que ixa ye una soluzión temporal, una fuyida entabán como bien i diz. De feito, en un contet de Isaac Asimov, iste charra d'un uniberso an que a chen merca casas en planetas desiertas de reyalidaz alternatibas. O protagonista en merca uno y bi troba a chen charrando en alemán costruyindo-ie una casa en l'atro cabo d'a planeta. Alabez, charrín-charrán con els, paran cuenta de que os dos unibersos han teniu a mesma ideya y, en aber-ie, tamién por denifnizión, un numer infinito de reyalidaz alternatibas, yera de dar que, en bel inte se trobarían.

Paranoias de frikis u os berdaders problemas d'a umanidat?

20 d'Abiento

Tornan as Chornadas por os dreitos y libertaz nazionals d'Aragón. En ista sietena edizión, son organizadas por Unibersidá - Coleutibo Aragonesista, A Enrestida y Chobenalla Aragonesista mientres os diyas 17 y 21 d'Abiento. O programa ye:

Lunes 17 d'Abiento. 20:00 Salón d'actos. Casa de l'estudian (C / Corona d'Aragón, 42)

Mesa Redonda "L'aragonés en internet" con os fabloggers Mensachero, Charrabis y Cordón Trenzau.

Miercols 19 d'Abiento: 19:30. Salón d'Actos. Casa de l'estudian (C / Corona d'Aragón, 42)

Charrada: "Aragón, 300 años de asimilación" con os istoriadors Daniel Lerín y Lorién Jiménez

Chuebes 20 d'Abiento: 19:30. Aula 4 Escuela d'Estudios Sozials (C / Violante de
Hungría, 23)

Proyeuzión: "Aragón, 25 años después". Documental de Miguel Montañés y Isabel Soria

Biernes 21 d'Abiento. 19:30 Seminario 6 Facultat de Zienzias Economicas y Interpresarials (C / Dr. Cerrada,1-3)

Charrada: "Yesa en la actualidad" con representans de l'asozíazión Río Aragón y Antonio Casas, profesor de Cheolochía d'a Unibersidat de Zaragoza.

Cuento que son bien intresans, asinas que iz-ie...

D'atra man, y bels poquez diyas antis, o biernes 14, o BIC ha organizau bels actos tamién ta remerar a fegura d'o Chustizia d'Aragón, asesinau por esfender os dreitos y libertaz nazionals d'Aragón. A las 20:30 ferán un acto pulitico en a Plaza d'o Chustizia (no en a plaza Paraiso, sino en a que bi ha en o Casco Biello) y dimpués, a las 22:00 se ferá una borina independentista en o local d'A Enrestida. Podez trobar más informazión en o blog d'ista zaguera asoziazión.

Por si bel espisguardau no conoix a istoria d'o Chustizia, Chuan V de Lanuza, puet conoxer-la en iste mesmo blog en os articlos que fazié de berano sobre as Tres Esferras (parti 2).

Bufa ixa bela...

Bufa, bufa, bufa ixa bela, bufa, bufa, bufa-la ya.... Si estase una personeta le'n sería cantando. Tierra de Barrenaus fa güe un año. Lo que prenzipió más que más, como un puesto ta pasar bel ratet, espardir combocatorias y prebar d'amillorar o mio aragonés, s'ha tornau en toda una basemia ta yo. Cuan he de peteniar por Zaragoza, antis de dormir, cuan beigo, leigo u siento as notizias... siempre bi ha bel inte an que pienso "d'isto caldría que'n charrase en o blog". Tiengo arrienda articlos prenzipiaus en l'ordinador mío que nunca no rematé y ideyas, muitas ideyas que nunca no he puesto fer reyalidat.

A la fin, un añet. Más de 6000 besitas. 150 "articlos" (uno cada dos diyas y pico no ye mal) y tot en ista chicota luenga que china chana me pienso que irá rebiscolando. En iste zaguer año he feito casamuda, tiengo un mixín plegau dende Banarús, he descubierto a bizi, CHA s'estalapizó en as elezions, s'han cremau arrienda fotos d'o Rei d'Espaja, Comando Cucaracha ha feito nuebo disco.... Y he escrito. Muito. Aquí y dillá d'iste chicorrón blog que aspero que tos faiga tantismo goyo como me'n fa a yo. A! Y he chugau a Magic. U millor dito he partizipau en os torneus de Freakland, porque fueras de bel torneu, no i he feito que a risa... y pasar-ie un buen ratet.

Os diez afers que más en he charrau son: aragonés, conzierto, Aragón, mosica, friki, Nogara, Zaragoza, aragonesismo, borina y pulitica. Ya beyez. Tot mezclotiau.

Simplamen agradixer-tos a toz los que leyez ista finestreta t'o mundo que me he feito. A toz os fabloggers que aduyaz a que en ista luenga se pueda charrar de tot y que, a monico, imos fendo una nueba coleutibidat de usuarios de l'aragonés. A toz os que luitan por l'aragonés y/u por Aragón. Y nomás aspero poder continar fendo iste blog más tiempo y millor feito. D'ideyas, creyez-me, no me'n mancan...

Cronica d'a Trobada

A la fin a trobada se fazió. A ixo d’as 20 nos chuntemos en La Gramola buena cosa de fabloggers que continón plegando china chana dica estar-ie bels bente. Bi yeran Remenches, Charrando TB, O chemeco d’as parolas, Os Monegros, Estricalla, Cordón Trenzau, Aragón colonial y asinas asinas. Tamién se i amanón un par de academicos de l’aragonés, asinas que a Trobada podemos dezir que estió un esito de raso.

Con bella biera debán pretemos a charrar d’una y d’atra cosa, d’os nuestros blogs y d’as nuestras basemias y, más que más de proyeutos cara t’o futuro. De lo que cal fer y de lo que caldría que se fese, como en todas as charradas malas que se chuntan dos neofablans. Mensachero dizió qui eba ganau os premios (tos los podez mirar en o blog d’Estricalla) y continemos charrando y apañando lo mundo mientres prenxipiaba o partiu de rugbi entre Tonga y Anglaterra. Abié de marchar antis que no quereba porque teneba atro compromís, pero aspero que, como dizié fa diyas, isto no siga que un primer trango, y creigo que’n ye estau.

Agora somos en contauto, nos conoxemos fisicamen y, como de seguras nos trobaremos en os Pilars fendo bieretas por bel conzierto u bar, continaremos charrando, apañando lo mundo y (aspero) fendo onra a l’aragonés.