La X Trobada Vivir en aragonés. Tierra de barrenaus 9x05

Pa qualsequier que quiera aprender, de verdat, una luenga ye fundamental la socialización en ixa luenga. Ye qualcosa que siempre hemos teniu claro en belunas d'as asociacions en desfensa de l'aragonés y que ha contrimostrau funcionar, aduyando a chenerar nuevos fablants activos. Lo contacto entre las personas que lo fablan por transmisión familiar y las que lo han aprendiu d'adultas ye vital pa que todas dos comunidatz se conoixcan y compartan inquietutz, realidatz y envistas y que talment s'habría de treballar mas pa crebar totz ixos mitos que ixemenan qui les intresa que no i haiga entendimiento. Istos dos afers son precisament los que treballan iniciativas como la Trobada Vivir en aragonés que protagoniza iste nuevo programa de Tierra de barrenaus.

De man de Cristina, una d'as organizadoras, conoixeremos un poquet lo naiximiento y la filosofía d'a Trobada que fa en pocos días la suya decena edición. Ciresa y Echo acullirán una vegada mas a una patacada de personas intresadas por la nuestra luenga los días 25, 26 y 27 de noviembre. S'ha organizau quantas actividatz bien variadas y pa tot lo mundo, asinas que no i hai garra enchaquia pa no ir-ie. Puetz trobar información y apuntar-te-ie aqui.

Antimás d'a Trobada tamién charraremos de nuevas d'o caso d'os 6 de Zaragoza, que han empecipiau con una campanya de firmas. Te convido a informar-te-ne si no conoixes iste nuevo caso de montache policial y de criminalización de l'antifaixismo y, prou que sí, a adhibir-te a ixa campanya.

En la parte mosical punchamos la zaguer canción de Valira, qui pasoron por Zaragoza presentando-nos lo suyo directo en La Casa del Loco, en un concierto que resenyamos. Ubrimos tamién un nuevo calaixo de cancions con un tema en aragonés sobre zorruspiar.

Programa #134

XXVI Chornadas d'as luengas d'Aragón. Tierra de barrenaus 5x08

Las Chornadas d'as luengas d'Aragón, que organiza l'Asociación Cultural Nogara totz los anyos, fan la suya 26ena edición, y arriban como siempre bien intresants y con actividatz a saber qué variadas. Istos diyas son totz los anyos una sincusa perfecta pa que buena parte d'a comunidatz aragonesofona de Zaragoza nos trobemos y aproveitemos las chornadas pa reflexionar, socializar y, prou que sí, capaciar firme.



Iste 2019 podremos disfrutar de charradas bien intresants que nos parlarán de iniciativas en defensa d'os dreitos lingüisticos por diferents puntos d'a nuestra cheografía. Dende lo Xiloca, dica las vals pirinencas, pasando por lo Matarranya y viachando dica Asturies. Representants d'o Centro d'Estudios d'o Xiloca, de Trobada, Clarió y Iniciativa pol asturianu recontarán las suyas experiencias. En l'apartau lambroto, como va estando cutiano en las zaguers edicions, lo furno de Tolosana trayerá un taste de trena y besos d'Aragón. Lo primer sabado tendremos una(tra)  chornada historica, podendo fer la visita d'o bus turistico en aragonés, por primer vegada, y asperemos que no pas por zaguer. Dimpués nos asperará una actividat bien especial: un vermut radiofonico de man d'Elena, creadora de "Qué diz ixa mesacha?", lo programa transfeminista y antiespecista en aragonés de Radio Montalbán. Lo diya d'antes, lo viernes, s'habrá feito la parte mas borinera d'as chornada. L'Arrebato servirá de scenario pa las collas Koakzión y Orbita, todas dos parte d'o disco O zaguer chilo II, publicau tamién por Nogara. Si no tenetz encara lo CD, ye una sobrebuena ocasión pa fer-te con ell. Por 10 euros, la entrada a lo concierto lo incluye.

Con las protagonistas d'as charradas, hemos charrau en iste nuevo Tierra de barrenaus que arriba dreitament en formato podcast antes de pasar por las ondas de Radio Topo. Representants de todas las organizacions y personas que fan posible totz istos actos nos recuentan en que consistirá cada actividat y nos transmiten toda ixa rasmia que aprecisamos las que nos dedicamos en la nuestra vida cutiana a desfender lo nuestro patrimonio y los nuestros dreitos lingüisticos. Nos veyemos en las chornadas!

L'aragonés ye bien vivo

Fablilandia se mueve. A monico, pero contrimostrando que l'aragonés ye bien vivo, igual como a sección de La Enredadera... En istos meses de prencipio de curso, se van encetando iniciativas y continando atrás, asinas que prebaré de fer un chiquet resumen.

D'estrela a estrela. Radio Topo contina enamplando o suyo refirme a l'aragonés. A chent de Fendo Orella, de conchunta con atras personas de Radio Topo y mesmo d'atras radios zaragozanas, han organizau una chornada de programación radiofonica de raso en aragonés. Entrevistas, mosica, cuentos, sciencia, feminismo, ecolochía y mesmo un curset d'aragonés... en dotze horas de programación. Sobrebuena iniciativa.

Cursos, cursos y mas cursos. Nogara fa la suya debantadera o viernes a las 20:00. Una chornada de dentrega de diplomas a qui fació cursos l'anyada pasada, pero, más que más, de trobada de todas as que charramos aragonés en Zaragoza. O Trango tamién prencipia os cursos suyos, como informaba Arredol, por un pre de nomás 10 €. Por o pre de dos cubatas en A Flama te puetz fer un curso d'aragonés.

A Flama contina con as suyas actividatz y con o suyo refirme a l'aragonés. O martes a las 20:30 será a primer trobada de una colla ta practicar l'aragonés. En primeras se ferá a trobada totz os martes, encara que si a chent que i va o primer diya decide atra cosa, se podría cambiar o diya. En Facebook tenetz un evento creyau. Siempre he pensau que a millor traza d'esfender l'aragonés y d'aprender-lo ye charrar-lo tot lo que se pueda, asinas que ista ye una oportunidat buenisma de fer-lo. Nos i viyemos!

Arredol ya ha feito más de un mes. China chana, contribuyindo a fer más facil o vivir en aragonés. Y han feito un video con mosica de Prau y imachens d'as noticias que han iu pasando en iste mes prou pincho. Asinas que con o video remato iste repaso. Ye vivo, ye vivo ¡L'aragonés!

Retes en rete. Una cronica subchetiva

Mientres istas vacanzas de Semana Santa se celebró en Ruesta una trobada de retes en rete que miraba de trobar alternativas a o capitalismo. A pregunta que prebaba de responder-se-ie yera ¿podemos vivir sin capitalismo? Tanto por a tematica como por atras qüestions (pasar quatre diyas en o Pirineu siempre ye un buen plan) decidié d'ir-ie sin guaires asperanzas, en un primer inte. Con tot y con ixo le dié una oportunidat a la trobada y prencipié a participar-ie. Mala ideya, mocetas! Istas son bellas impresions que m'he traito d'ixa trobada.

A birolla: No soi o más indicau ta criticar as trazas de minchar de dengún, pues soi bien rarizo en o mío minchar cutiano. M'importa igual si a chent ye vechetariana, vegana, macrobiotica, carnivora u nomás mincha Fresquitos. Personalment creigo que cadagún ha de minchar o que quiera y o que le prebe bien. Lo que no me fa mica goi ye trobar-me con un texto que chustifica unas trazas de minchar porque asinas -traduzco literalment d'o pasquín- nos reconecta con a Primera Fuent, ye la Traza Sagrada de Minchar, cal tornar t'a Unidat con o Creyador y con a Creyación y asinas asinas. Lo siento, pero m'importa igual si as fateras relichiosas son alacetadas en o que dició un chodigo fa 2000 anyadas u en un indio hopi, u un Na'vi u qui siga. Ta yo ye a mesma vasuera por muito new age que siga. Ta yo como si hese bendeciu a mesa un mosén.

Debat transversal sobre treballos: Estió un d'os tallers a on que participé. Sí que'n surtión de buena ideyas pero terne que terne se centraba en as ecoaldeas. Parixeba que qui vivibamos en as ciudatz lo febanos porque no nos ne quedaba atra, porque yeranos masiau falsos ta marchar ta un lugar u bella cosa parellana. En iste caso parixeba que caleba cambiar a pregunta de ¿podemos vivir sin capitalismo? por ¿podemos fuyir d'o capitalismo?. As ecoaldeas me parixen una ideya sobrebuena y creigo que cal refirmar-las dende os lugars y as ciudatz. Creigo que son una buena cosa ta fuyir d'o capitalismo y fer vistero que se puede funcionar d'atras trazas. Pero, ¿se puede fuyir d'o capitalismo ta cutio? Si bell diya as ecoaldeas se tornasen inquestas, ¿no remataría o capitalismo con ellas de camín? Creigo que o capitalismo no tien medrana d'as ecoaldeas porque no son guaire menaza (a lo menos por agora). Cal luitar en muitos frents y ixe prou que puet estar-ne uno, pero a o capitalismo va a caler espaldar-lo, y tamién dende as ciudatz.

Marcha t'Artieda: Probablement o millor que se i fació. Una d'as poquetas cosas que remeraba a on se feba a trobada, antimás d'os espiellos que bell una dixó en a “botiga de baldes”. Se fació una curseta dica a ermita de San Juan de Maltray amán de l'entibo, que rebutiba d'augua, a on que no explicoron a nueva campanya que son fendo. Aprofitando l'anyo Xacobeo han dixau un fascal de cantals pintaus d'azul en os puestos menazaus por o recreiximiento de Yesa. A ideya ye que ixos cantals vaigan dixando-se por tot lo Camín de San Chaime ta fer vistera a luita contra Yesa. A noticia podetz leyer-la aqui. Tamién estioron explicando a suya luita y, chusto quan se prencipiaba a charrar d'a mercantilización de l'augua y a suya consideración como un bien de mercau igual como qualsiquier atro, un atro iluminau de tantos que bi'n heba pretó a charrar de no se qué d'os druidas y d'os celtas, ixublidando o debat important. A la CHE, os druidas rai. Y a o capitalismo tamién. Dimpués a mesma infumable colleta prencipió a acarrazar a tierra u lo sol u fer bell saludo cosmico, mientres a minoritara resta encetabamos o camín enta Artieda.

Carne de secta: Garra cruz, ni estrelas de David, ni chent rezando cara t'a Meca ni cosa parellana. Y con tot y con ixo, pocos puestos tan relichiosos he visto como ista trobada. Un pasquin m'informaba de que a mía firma astronomica m'ubriba a s puertas de l'espacio cuatridimensional (sic). Unatro de que m'heba de conectar con a Primera Fuent y a Creyación (viyer más alto). Un taller o sabado de tardis prebaba de convencer-me de que bi heba una filosofía china que chuntaba l'astrolochía y a fisica quantica. A yo, que as relichions, as supersticions y as sectas ye tot lo mesmo, me parixeba estar en un campamento de Corazonistas.

Lo positivo: Prou que me'n levo d'experiencias positivas. 1. As companyeras que estiemos chuntas y con qui faciemos buens ratos y buena pacheta. Conoixer más a las companyeras de luitas siempre ye bueno. 2. Tamién i conoixié chent que no yera barrenada y que aspero tornar a escunzar-me. 3. Conoixer un puesto tan repoliu como Ruesta que nunca no i yera estau y viyer como quedan os lugars eshabitaus por os entibos. Tenetz fotos penchadas en Flickr de Barrenaus y aqui alto. 4. Saber con qué mena de chent no se puet contar en caso de revolución y conoixer un poco más a ixe ente clamau humanidat... 5. Viyer naixer una protorelichión, que siempre ye curioso. 6. Haber espardiu luitas como l'aragonés u os entibos entre chent de muitos cabos d'ista parti d'Europa (bi heba dende andaluces, portugueses u extremenyos, dica alemans u mesmo bell australiano espisguardau...)

A tamás de todas as queixas a valuración cheneral no ye mala de tot. Cuento, y aspero, que toda a crica de barrenadas que bi habió d'entre ixas cincocientas personas que bi estiemos, yeran minoría y que sí que bi ha chent treballadera entre a hippiealla (fote con o neolochismo!). Y tot lo aprendiu a ran d'organización y de trazas de treballar podría aplicar-se perfectament a todas as luitas anticapitalistas dende atra ambiesta y atras dembas. Si bella vegada se tornase a repetir i tornaría, ixo sí, sabendo lo que i trobaré y parando un taller titulau "misticismo y relichión, a mesma mierda ye".

Unibersitaires

Con muitos cursos prenzipiando l'aragonés contina mobendo-se. Encara mancan prous diyas t'a II Trobada pero o concurso de microfalordias ya en tien siet. En tan poquet tiempo cuento que ye un exito. Ayer, en a publizidat d'a FNAC ya i aparixeba a charrada que ferá Chorche Romance.

Tanimientres, Unibersitaires, un nuebo colectibo en esfensa de l'aragonés que tendrá l'actibidat suya más que más en a Unibersidat Aragonesa, se presenta ista tardi a las 16:55 en l'aula 501 d'o edifizio Interfacultaz. Ya caleba que bel colectibo prenese l'erenzio d'a Colla Unibersitaria por l'aragonés (CUA) que, ta qui no los remere, esfendión l'aragonés fa muitos años en a unibersidat, publicando o boletín O Lupo, con qui muitos aprendiemos tanto. Por experienzia, a unibersidat ye un puesto furo an que esfender cualsiquier ideya, pues ye plena de mielsudos que les fa galbana cualsiquier cosa. Y no porque sían masiau aqueferaus indo ta clase, que muitos nian i ban. A tamás d'ixo, me pienso que ye un d'os puestos an que cal estar. De feito ye una pena que mientres istos años no bi aiga abiu garra colectibo cultural en esfensa de l'aragonés que aiga conseguiu sobrebibir más de tres diyas. Asinas que tos deseyo toda la suerte d'o mundo y que espardaz tot lo posible l'aragonés en a unibersidat! Y más que más en ixa facultat rebutién de saputazes que toz sabemos....

Por no fer un articlo de propio ta una fatera, contino tos pencho un bideo que toz os antimadridistas, que creigo que en somos muitos, sabrez gronxiar: Aupa Irún!

IN

A mosica sonaba por os altabozes d’a ziudat. As radios y telebisions no dixaban de charrar-ne. A chen impliba a carreras. Chilaban, cantaban, blincaban, s’acarrazaban. Consziens de que o poder que eban feito mientres años, de que nunca no aber reblau, les eba endrezau dica ixe inte chusto. Os más biellos ploraban de goyo remerando os primers años de luita. Os más chobens paraban cuenta d’estar bibindo un inte istorico y de que agora les caldría fochar firme. Toz sabeban que un nuebo mundo prenzipiaba.

Ista ye a microfalordia presentada por Tierra de Barrenaus t'o concurso d'a II Trobada de Fabloggers.

Cronica d'a Trobada

A la fin a trobada se fazió. A ixo d’as 20 nos chuntemos en La Gramola buena cosa de fabloggers que continón plegando china chana dica estar-ie bels bente. Bi yeran Remenches, Charrando TB, O chemeco d’as parolas, Os Monegros, Estricalla, Cordón Trenzau, Aragón colonial y asinas asinas. Tamién se i amanón un par de academicos de l’aragonés, asinas que a Trobada podemos dezir que estió un esito de raso.

Con bella biera debán pretemos a charrar d’una y d’atra cosa, d’os nuestros blogs y d’as nuestras basemias y, más que más de proyeutos cara t’o futuro. De lo que cal fer y de lo que caldría que se fese, como en todas as charradas malas que se chuntan dos neofablans. Mensachero dizió qui eba ganau os premios (tos los podez mirar en o blog d’Estricalla) y continemos charrando y apañando lo mundo mientres prenxipiaba o partiu de rugbi entre Tonga y Anglaterra. Abié de marchar antis que no quereba porque teneba atro compromís, pero aspero que, como dizié fa diyas, isto no siga que un primer trango, y creigo que’n ye estau.

Agora somos en contauto, nos conoxemos fisicamen y, como de seguras nos trobaremos en os Pilars fendo bieretas por bel conzierto u bar, continaremos charrando, apañando lo mundo y (aspero) fendo onra a l’aragonés.

Trobada Bloggers

Parix que a la fin sí que nos trobaremos. O biernes puestar que se de un buen trango entabán en isto d'a multimedia aragonesofablan, y asperemos que siga o primer d'una endrezera mesmo más gran. U, a lo menos, feremos buena charradeta y bella biera. O puesto trigau ye o bar "La Gramola" en a carrera Concepción Arenal de Zaragoza y astí plegaremos a las güeito ta fer serbir a luenga nuestra. Igual como atros no podré quedar-me-ie guaire pero, como he dito en prenzipiar, aspero que iste no siga que o primer trango. China chana, ban adibindo-se más y más blogs a iste mundet y cada begada se fan cosas más intresans. Una d'as zagueras que he conoxiu, grazias a O Chemeco d'as Parolas, ye Fendo huellos, un blog adedicau a la naturaleza bien intresán. Biemplegau y aspero que nos beigamos tamién en a Trobada!

Y no puedo rematar sin agradixer a Mensachero que aiga preso a iniziatiba de chuntar-nos: Muitas grazias, mozet! Nos beyemos o Biernes!

Más combocatorias

Con Setiembre plegan os buenos deseyos cara t’o curso. Prenzipiamos l’año lectibo con rasmia y empentando proyeutos de toda mena, beluns bien pinchos. Dende Nogara ufren un curso d’aragonés a distanzia que se ferá por o rete. Ya no tenez mica sincusa de orarios u de bibir luen de Zaragoza, ya podez aprender aragonés bibaz an que bibaz y treballez as oras que treballez.

Tamién se ye parando una trobada de fabloggers ta la fin de Setiembre. Encara no ye guaire platero an se ferá pero ya caleba bella cosa asinas. Que nos beigamos y charremos d’o nuestro “treballo” y, más que más, que nos conoxcamos y faigamos, prou que sí, unas bieretas.

En iste berano no he puesto escribir guaire en o blog, como ye de dar, y no he charrau d’atras cosetas que s’han feito, como o II Carrasca Rock en Exulbe que, por lo que sé, estió muito bien. Podez trobar una cronica en Labrándonos en la sombra.

Dende o Zentro Aragonés de Barzelona, os aragoneses que i biben han presto una chornada de Cultura y, más que más, mosica aragonesa. Podez beyer o cartel penchau en iste mesmo afer. Tos dixo con o bideo d'a trobada de fabloggers.