domingo, 30 de agosto de 2009

Ampraus 031

Ya biyetz que cada diya soi más chandro. Agora he librau ixo de microbarrenaus, una traza de penchar microposts con fateretas que baiga escribindo en os pocos ratetz libres que tiengo.

Sindicalismo: U uchetismo, millor dito. As trazas que fa serbir, a lo menos en Aragón UGT, ya las conoixemos todas. En o blog de Salud, Rebeldía y Cerveza fría, han trigau con muita razón una sobrebuena biñeta de Vergara y una canta de Transfer sobre o tema.

Catalanofobia: Purnas contina con o suyo treballo periodistico (d’o bueno) y alporta datos y documentos (ixo que se suposa que han de fer as periodistas) sobre El Torricó, lugar catalanofablan d’Aragón. As esbergoñadas d’o PAR continan espardindo as suyas mentiras y paranoias que, a pur de repetir-las, muita chent las crei sin mica cretica.

Más paranoicos: Entre os que biyen a ERC por tots os cabos y os d’o sexo, bi ha muitos paranoicos por o mundo. Seguntes informa Publico, bi ha polemica en a perfida Albión por as fruitetas ixas d’o dibuxo d’alto. Son de uns lamins ta ninos, y bel ment-puerca diz que son buquindo como crapas y mesmo fendo trios. Sin parolas. Ye berdat que, en dezir-lo ya no puetz que biyer-les dando-le, pero y si ye asinas, que?. As pobras ninetas podrían prenzipiar a chuntar mazanas y peras y... (Jibo! Ixo me remera a bellas declarazions de una conzellera de Madrit...). Cuanto tiempo libre tienen belunas...

Espiello: Habemus nuebo numer d’Espiello, a millor rebista en aragonés que diz Bubón. Y en ye. En iste numer i aparix, entre atros muitos buenos contenius, una entrebista con Ruben Ramos, sobrebuen escritor y ganador dos begadas d’o Arnal Cavero. Asinas que, si encara no la tenetz ya sotz pasando-tos por Nogara a mercar-la. Antimás tos i podretz informar sobre os curso en bels diyas que ya se prenzipiarán a parar.
Bideos: Ta rematar pencho contino dos bideos. La un, me lo imbió Arale y cuento que lo abretz bisto ya muitas pos ye espardindo-se por o rete asabelo y mesmo lo han penchau en bels blogs aragoneses, como Tiempo de Desidias. Se diz Operación Pandemia y ye una d’ixas teorías conspiratorias que, ta yo, tienen muitisma credibilidat. L’atro ye menos traszendent. Ta qui tenemos mixín, de seguras que tos ferá muitismo goi. Poca chent a sabiu parar cuenta y dibuixar tan bien as fateretas que fan os mixins de cutio, como o tal Simon. Ye o zaguer bideo de Simon’s cat y si no etz bisto os anteriors tos recomiendo asabelo de biyer-los antis con antis






Conozes a Marzelo?

Con isto d'a ipotetica puyada d'impuestos, o PP ha tornau (si ye que nunca lo eba dixau) t'o discurso d'a esfensa d'as "clases meyas". Que bes-te-ne tú a saber o qué ye ixo ta ellas! En ixe discurso bi ha una d'ixas fateras que, en estar tantas begadas repetidas suenan a berdatz absolutas pero, a lo menos ta yo, no'n son. Ye ixa de que as clases meyas son as piors tratadas, por que no son ricas y, antimás, no reziben as aduyas que se suposa dan a las clases baixas. Asinas les he sentiu dezir a muitismas burguesetas. "A las pobras les aduya lo estau (u as ong's u qui sía), pero a yo qui m'aduya?" repiten terne que terne queixando-se d'a mala suerte d'estar "clase meya". "Tiens razón, mozeta" -m'agana de responder-les- "fe-te pobra y podrás rezibir aduyas ta gronxiar-te tot lo que quieras". Dentrar en a clase alta ye difizil, pero no pas en a baixa.
Me remera tamién a todas ixas que charran d'a suerte d'os profesors y mayestros y que dizen que tienen muita barra por tener as bacanzas que tienen. "Pos para-te una oposizión, apreba-la y tendrás ixe chornal y ixas bacanzas..." Ixo ya no gosa fer-les tanto goi. Entiendo que muita chent nian tien a oportunidat de parar una oposizión por aber de treballar ta sobrebibir, pero a más gran parti que se queixa d'as condizions laboral d'os profesors y mayestros no son d'ixos.
Asinas que, como bien diz a mazada aragonesa: Conozes a Marzelo?, pues fe-lo!

microbarrenaus: rebistas zientificas

Miro una rebista zientifica. La teneba la chirmana mía pero se la lebó y m'aganaba de leyer un d'os articlos. Manimenos no la trobo en a papelería. Bi ha dos rebistas sobrer torturar toros, una sobre components electronicos, cualques repalmars adedicaus a alparzeyos u bideochuegos, milenta de superstizions, pero de zienzia ni brenca ni meya...

microbarrenaus: periodistas chandros

Qué chandros son bels periodistas! Ayere de tardis estié sentindo a SER en o treballo igual como güe de maitins. As notizias son as mesmas parola por parola. O Gran Chirmán me dicta a berdat.

domingo, 23 de agosto de 2009

Ampraus 030

Ye posible una edizión de Ampraus sin fer bella noteta ateista?. En ye! Y lo contrimuestro contino.

En a Franja continan con lo suyo, que ye lo nuestro.
Iste articlo, publicau en Lo cacao de la FACAO (blog buenismo, por zierto), charra sobre muitas cosas. Normalizazión, normatibizazión, politica y luengas.... muita medolla en pocas ringleras. Com siempre, uno creyeba istas cosas superadas, pero os mios compañers de treballo catalanofobos, me aduyan a tornar t’a reyalidat: cal tornar a repetir os mesmos argumentos porque encara no lo han ascuitau tantos...

300 años: Lo cabo d’año d’a perda d’a nuestra independenzia pasó d’amagatons sin pena, gloria ni cosa. Ya t’a par d’alabez belún (de CHA, por zierto) dizió que caldría zelebrar u a lo menos fer bel acto, por o 300 cabo d’año d’a Baralla de Zaragoza. Una asoziazión ya ha dau o primer trango fendo una obreta de teyatro por as carreras de Zaragoza. L’articlo de Aragón Digital (que tos combido a leyer ta redir-tos-ne un poquet) diz que ye ta calentar ta l’año benient, cuan de berdat ye lo cabo d’año.

Trasobares escribe muito buens articlos de cabo ta cuan y no puedo leyer-lo tanto como me fería goi. Iste lo trobé de casualidat y refleixa un pensar que se ye estendillando asabelo por a soziedat. Totz os diyas en o mío treballo de maitins me trobo a una u dos d’ista mena de personas.

Lupos: que a Arale le fan muito goi. Biyé iste articlo en Publico sobre un lugar en a Sierra de la Culebra que han aprofitau a presenzia de lupos ta pillar perras d’a UE y creyar “industria turistica”. Ye una pena que calga que os bichos sigan rendibles ta que no bi aiga un camatón de ababols que quieran acotolar-los, pero si con ista mena de politicas se consigue salbar a os lupos u los onsos ya conseguimos prou. A biyer si aprenden por aquí, que d’onsos y lupos encara bi’n ha muitos que no quieren nian sentir fablar...

Ta que pasetz un ratet tos pencho un bideo de ..... lemurs!, en iste caso en o meyo natural suyo y rezentau por David Attenborough, que muitos lo conoixeretz por os reportaches de naturaleza que fa.




Solidarias

A las fuerzas d’opresión no les metemos ixe nombre por estar más punk que no Manolo. Les ne dezimos porque’n son. Nunca no aduyan a cosa y, de rebés, si pueden, te fan a tana. Iste ye o caso de Lois Inazio, a qui quieren engarcholar mientres 7 años por esfender a una persona d’a polizia en as fiestas de San Lorient. Dende aquí a mia solidaridat con Lois Inazio, compañer de tantas y tantas nueis de borina. Asperemos que tot quede en unatra anécdota que rezentar.
Ent’o Sur unatra solidaridat, en iste caso con o lugar y a redolada d’Exulbe. Dimpués de tot por lo que han pasau, encara tienen prou rasmia ta tornar a fer o Carrasca Rock que se zelebrará iste cabo de semana benient. Tamién dende iste blog muita suerte con o festibal y con toda a faina que tos queda por astí....

domingo, 16 de agosto de 2009

Ampraus 029

Torno t’o blog, que en iste berano ye masiau quedo, ta una nueba dentrega d’Ampraus. Replegando-ne soi dende fa semanas, china chana, pues he teniu arrienda treballo y en estar solo en casa no he adubiu que a sobrebibir... A lo menos ixo se soluziona ista nuei. T’as lectoras que me/nos conoixetz, Arale plega ista mesma nuei, asinas que itz parando-tos t’as sesions de fotos chiapanencas que tos tocará d’aguantar.

Ateismo: A iste afer le podría adedicar una seczión todas as semanas. Siempre bi ha cosetas intresants, cuento que por lo absurdo d’as relichions. Tan absurdas que, a tamás de foter-se meya bida rogando a un (u más) dios que les proteixa de totz os mals d’o mundo, dimpués han d’ir a besar mantas sagradas con una mascarota no sía que dios siga con reseco y ixublide abentar os birus d’a debandita manta. Qué dios puede dixar a las suyas fidels pillar ixas malotías? Que mena de chent ba a besar mantas creyendo que ixo puede cambiar o suyo destino u que asinas se comunica con dengún? Sino estase relichión, diríanos que son barrenadas de tot, pero...

Debant d’isto bi somos muita chent. Pero agora ye alto u baixo fazil. Encara que continamos estando minoría os ateus que nos concaramos de berdat con todas as relichions y que diya a diya esfendemos un mundo que no aiga de achenullar-se debant de dengún, ya bi’n eba antismás. En Fendo Orella leyié ista intresant notizia sobre l'ateu Federico qui, mesmo en a suya muerte continó fidel a os ideyal suyos ¡ent’a fin d’o sieglo XIX! Bien por Fede!

Una d’as trazas de luitar contra as relichions ye ridiculizar-las analizando os mitos suyos. O mixín penchó un cartelon que podetz biyer punchando a o canto, an que, en inglés, fan una descripzión bien azertada d’o cristianismo: “A creyenzia que un zombi cosmico chodigo que ye su propio pai puede fer-te vivir ta cutio si minchas simbolicament a suya pizca y le dizes, telepaticament, que lo azeptas como mayestro, ta que pueda abentar una fuerza mala de l’alma tuya que ye present en a umanidat porque una muller-costilla estió combenzida por una sirpient charrina que minchase d’un arbol machico... Prou que tien sentiu!”

In-chustizia: O nazionalismo banal contina con lo suyo. Agora nos ban a quillar un siñal aragonés a o canto de l’español. Puestar que en a zeremonia i baiga a baturraina, en no tener eixerzito propio, y canten unas joticas, tan aragonesas como españolas, d’ixas de “Es de España y sus regiones Aragón la más hermosa”. O
chustizia encantau. Aragón mola, pero aintro d’España. Tanimientres tamién podemos trobar unatra campaña d’o megaespañol conzello zaragozano. Ixos cartels que biyetz en a foto, que encara no sé guaire bien ta que balen, pero que en un d’els mete “Mi río. Que haga correr el espíritu de mi ciudad por España y a España por mi ciudad. Una persona mejor de una ciudad mejor en un mundo mejor.” Bella muestra millor de nazionalismo banal?

Zerbantes omosexual?: Ixo ye lo que diz un libro. Y mesmo pior: catalán! A notizia me parixió curiosa por fata. Qué importa reyalment con qui fese foriquetas Zerbantes u d’an estase naixiu? Ixo a la chent normal. Pero lo bueno d’a notizia ye que de seguras que muitas españolistas ya yeran carrañadas con l’autor por dezir que un d’os mitos suyos yera catalán y manflorita. Se puede estar más antiespañol? Jejeje...

Dreitos animals:
PETA ha denunziau a o zirco Ringling por abatanar a beluns d’os bichos que tienen engarcholaus. Mesmo consiguión grabar un bideo contrimostrando-lo con una camara amagada. No sé como rematará a cosa. Cuento que continarán librando-se. Ya sabetz que a chustizia no fa guaire caso a istas cosas. Pero sí que podemos fer cosas. Y ye que ixe zirco bendrá ta Zaragoza en Nobiembre. Bellas asoziazions ya han prenzipiau a protestar. Cal prenzipiar a organizar-nos ta que no biengan u a lo menos que as ziudadanas no leben a la suya catrinalla a biyer animals torturaus.

Ta rematar, güe no meto bideos de lemurs. Soi estau escoscando un poquet a casa y he meso o conzierto d’Obrint Pas “Un poble en moviment” en a TB. Ye buenizo de tot, y pencho contino una d’as millors cantas suyas, y en a bersión en directo una d’as más emozionants, por a partizipazión de Belén Agulló, chirmana de
Guillem Agulló.





lunes, 10 de agosto de 2009

Jolio con o nino friki!

Biyé un troz d'o bideo que pencho contino en a tb y me trucó lo ficazio. Pero dica que no lo biyé entero no sabeba de berdat d'o que ye capable iste mozet. Cuento que muitas abretz chugau a Guitar Hero u abretz prebau de fer o cubo de Rubic. As dos me parixen fainas difizils. O cubo nunca no lo he sabiu resolber, encara que tampoco no en he emplegau guaire tiempo. Con o Guitar boi millor china chana, a pur de foter-le oras en os pocos ratos libres que tiengo. Iste zagal consigue resolber dos cubos de rubic, mientres ye chugando a o Guitar Hero en modo experto, ¡tañendo con l'ancón! Y si ixo no estase prou antimás lo fa biyendo a pantalla en un espiello ta poder grabar-se millor. Biyetz-lo dende lo prenzipio dica la fin si tenetz os 6 minutos que dura porque ye increyible. Tien talento, masiau tiempo libre u las dos? Ixo ya m'importa menos. Cadagún fa serbir o tiempo suyo en o que quiere...

jueves, 6 de agosto de 2009

He ganau!!!!

Fa tres años que torné a chugar a Magic. Entre Discordia y Coldsnap. Tres años perdendo rondas. Nomás eba conseguiu dentrar en premio una begada. En a presentazión de Caos Planar que quedé sieteno. Dende alabez sabeba lo que yeran os premios por os sorteus u por biyer-los en mans d'otri. Con a crisis cuasi eba dixau Magic por custions economicas. Pero en iste largo y aburriu berano (dende que marchó Arale) he tornau a chugar. O primer torneu estió en tornar d'Artieda, una d'as Launch Parties de M10. Como ye costumbre fazié a risa. A cosa cambió iste cabo de semana. Bi eba Booster Draft de Alara. Como que no he puesto chugar guaire dende chinero, a coleczión la conoixco por o spoiler de Rebellion y belatro draft que chugué fa meses. Manimenos ixe domingo yera lo mio, pues GANÉ. As tres rondas. Primer d'a mesa mía. Por custions de desempates quedé segundo en o ranking d'as dos mesas. Pero lo important ye que gané as tres rondas y ¿qui sabe si esenos puesto chugar-nos o desempate...? A pena ye que o torneu no se rankeaba t'os puntos Magic. Ta una begada que gano!

O mazo que me fazié estió un berde-blanco con buena curba. A más gran parti d'as partidas las gané con bichos bolador (que no'n lebaba que dos) enrestindo con bels Exalted (alticamaus?) denzima. O mazo s'azeleraba bel poquet con tres bichos que, en dentrar en chuego pillabas carta. Y si no estase tan "empanau" ese puesto ganar millor. A primer partida la perdié por un 2/2 bolador que me fazió arrienda daños y yo teneba un acechador qasali en a man dende o primer turno. Pero eba ixublidau que teneba reach... Lo remeré cuan nomás me quedaba un punto de bida...


O listau d'o mazo ye o siguient: (nombres en castellano, que ye en a luenga que beniban as cartas d'o draft)


Esperanza renacida
Halcones emisarios
Mago de manada qasali
Guardaespaldas rhox
Behemot con sellos
Visionaria élfica
Guardia armado leonino
Elfo cyliano
Acechador qasali
Camino al exilio
Hechicero de la casta Visionaria
Mojón campo salvaje
Forastera de Valeron x 2
Guardia valiente
Poder del alma
Regalo de las gargantúas
Excomulgar
Gárgola oscura
Meditante rhox
Sierpe reclutada
Senescal de Valeron
Arquero desperdigador
Reclusa pálida

Panorama de Bant
Llanura x 8
Bosque x 7