martes, 18 de abril de 2017

Un ateu fendo fiesta en Semana Santa

Todas as Semanas Santas as ateas nos hemos d'aguantar como se nos invade la ciudat u lo lugar con ixa mena de Viñarock d'o cristianismo que se fa en istos diyas. Hemos de viyer como se les permite a las cofradias fer cosas que sisquiera gosarianos demandar y que, en caso de conseguir-lo, nos viyeríanos en una campanya mediatica de persecución de tantas que nos tien acostumbradas la dreita nacionalcatolica. Unatro de tantos efectos perchudicials pa la nuestra salut mental ye o mantra cunyau que eixemplifica tant bien iste tweet que leyié fa poco: "Los ateos deberían trabajar toda la semana santa porque eso de irse de vacaciones gracias a alguien en quien no creen es incohoerente. #DeNada". Creigo que a la mia lectora media no le cal que l'aclareixca cosa, pero por si un caso:

Si as ateas, y tamien as relichiosas, tenemos dreito a vacanzas y a diyas de fiesta, no ye gracias a garra ser sobrenatural. Ye gracias a los millons de personas que luitoron por tener ixos dreitos laborals, y a las que continan, por cada diya, desfendendo-los. Nomas a ellas he d'agradeixer-les que no m'haiga caliu treballar en istos diyas. Os mios dreitos, por muito que quieran beluns, no los condicionan las mias creyencias, sino la mia condicion de treballador.

Ni as ateas, ni tampoco as relichiosas de qualsiquier creyencia, no pueden esleixir la mayoria de lo suyo calendario laboral. Vivimos en un estau entregau a lo catolicismo, y que de aconfesional nomas tien lo nombre. Si de yo dependese, no tendría fiesta ni en Semana Santa ni en Nadal. Son dos calendatas que no me suposan cosa y que no tienen garra significau pa yo. A Semana Santa, pa forro de bota, sisquiera tien una calendata fixa, con tot lo problema que ixo creya en as programacions interanyals laborals y educativas.

Fueras de bella excepción, como lo 1 de mayo, os diyas de fiesta en l'estau espanyol vienen decidius por os representants d'una relichión.  Qui no i somos d'alcuerdo, no podemos que asumir ixos diyas y tricolotiar-nos con as chefas pa que nos den fiesta os diyas que en veras nos importan. Entiendo que cal tener una organización de l'anyo, y que probablement a mayoria trigaria ixos mesmos diyas en caso de poder fer-lo. Pero ye un debat que nunca no s'ubre y, como en tot en lo que no podemos decidir, habríanos de platenyar-nos qué diyas de fiesta queremos, como, pa que, y quals son os intreses festivos d'as que treballamos.

Asinas que no, no daré gracias a garra ser sobrenatural por tener fiestas. Les ne daré a todas las que luitoron y luitan por os mios dreitos laborals. Si bell diya me deixan esleixir, lo mas probable ye que no trigue la Semana Santa pa estar de fiesta. O tweet ye tant absurdo como decir que as fachas no habrían de tener fiestas laborals porque no creyen en a luita sindical y de clase que les n'ha conseguiu. Como todas as personas tiengo incoherencias a trompicuesco. Fer fiesta en Semana Santa, no en ye una.

miércoles, 12 de abril de 2017

Recordar as reivindicacions de l'aragonés

As Chornadas d’as luengas d’Aragón, que organiza Nogara cada anyo, antimás de una semana d’actividatz y dinamización de l’aragonés, son un foro sobrebueno pa prener-le o pulso a la luenga y a la envista que en tienen a chent que lo femos servir, sobre tot en Zaragoza. Iste anyo, tamién s’ha encertau que o sabado se organizó a chornada Mullers e luenga en Samianigo, de man de la Comarca de l’Alto Galligo. Asinas que me he pretau ueito diyas vivindo l’aragonés. Tot un goyo.


Pero de vez bella mica de preocupación, en sentir seguntes que discursos, que uno creyeba albandonaus, desacreditaus u superaus fa tiempo. Quasi totz de man d’o publico, pero tamién belun dende as ponents, que ye pior en tener l’autoridat d’o “micro y a mesa”.


Me fa una mica de cansera tornar a escribir isto, porque tanto yo como atras lo hemos feito un ciento de vegadas. Pero mientres contine calendo, continaré dando ferrete con istos afers eternos, porque si no tenemos claros os alazetz d’o movimiento en desfensa de l’aragonés, y as demandas y obchectivos d’a suya comunidat de fablants, a la nuestra luenga le queda dos telediarios.

Oficialidat

A oficialidat de l’aragonés no ye l’obchectivo zaguero, ni l’horizont, ni qualcosa aleixada. Ye l’alazet an que construir-lo tot dimpués. Sin a oficialidat, tot lo que faigamos continará tenendo os pietz de bardo, podendo-se esboldregar siempre que l’administración de turno quiera.


A oficialidat ye una qüestion de chusticia. Ye o reconoiximiento legal de que una luenga existe y que, por lo tanto, a suya comunidat de usuarios tien una serie de dreitos. Y l’administración una serie de debers. Sin a oficialidat, tot lo tarabidau legal que se faiga (lei de luengas, ensenyanza de y en aragonés, etc…) no será un dreito reconoixiu, sino un concieto satisfeito u una concesión a un lobby.


A oficialidat no salvará a l’aragonés, como sabemos todas. Nomas cal viyer o caso d’o gaelico irlandés, que siempre meten d’eixemplo qui relativizan a importancia d’ista reivindicación. Pero no cal enganyar-se. Sin oficialidat, a comunidat de usuarias continaremos sin dreitos, y l’aragonés se’n irá t’a fuesa.

Unidat d’a luenga

Dende Benás dica Ansó se charra la mesma luenga. Con a variación propia de qualsiquier atra luenga y con variedatz perfectament intercomprensibles. Que a norma culta u estandar replegue millor u pior, u con mayor u menor intensidat, as particularidatz de una u atra variedat ye qualcosa que, prou que sí, cal debatir. Pero ixo no puet fer qüestionar a unidat lingüistica de l’aragonés.


O famoso articlo de Saura me preocupa relativament poco, porque sé que ye una opinión ultraminoritaria y de buen vulcar, en no aguantar qualsiquier analisi minimament serio. Nomás s'ha publicau porque a l'Heraldo le va bien pa malmeter contra l'aragonés. Manimenos, sí que me preocupa que no nos creigamos a intercomprensibilidat. Que una ponent encomience a suya intervención en una charrada decindo que “voi a charrar en a variedat X y as de tal val m’entenderán”, en un entorno an que todas charrabanos aragonés, ye l’eixemplo d’ixa imachen que muitas continan tenendo de l’aragonés como una luenga fragmentada. O diya que se dició ixo, estié sentindo dende benasquesas dica ansotanas. Bi heba chent que teneba a luenga transmitida en a familia, y atras que la hebanos aprendida ya d’adultas. Deguna teneba garra problema en seguir as charradas, ni en entender-nos entre nusatras. Encara que levabanos charrando todas en as nuestras respectivas variedatz y modelos, queda chent que contina con ixa ideya de que l’aragonés nomas vale pa charrar con las d’a val.

A voluntariedat de l’adopción d’o castellano

Atra d’as declaracions que se repite en zagueras y que torné a sentir desgraciadament, ye la de que as fablants, deciden, u decidioron, deixar de charrar aragonés voluntariament. Concretament en ista ocasion se charraba d’as mullers y d’a falta de transmisión d’a luenga a las fillas “por o suyo bien”.


Quan existe toda una presión social y institucional pa que no se faiga servir una luenga, ¿en qué momento podemos charrar de voluntariedat? Quan en Zaragoza no existiba carrils bici, y fer servir ixe vehiclo yera visto como un concieto, ¿quanta chent iba en bici? En que s’han meso os medios, a ciudat se han plenau de ciclistas. Quan se charra d’o control d’a natalidat, a soben se diz que bi ha paises que tienen muitos fillos “por a suya cultura”. Manimenos en que baixas a presión relichiosa, fomentas a cultura arredol d’a sexualidat y permites a entrada de metodos anticonceptivos, baixa la natalidat. En a mia familia, y en quasi tot lo mio entorno, logar un piso yera d’ababols. Ixa ideya nian se contemplaba. Asinas que, igual como mis pais, chirmanas, primas, amigas, etc.. nos emboliquemos con una hipoteca de trenta anyos.


¿As zaragozanas se moveban en auto voluntariament? ¿As africanas tiene fillas “por a suya cultura”? ¿Me merqué un piso porque yera la millor opción pa las mias necesidatz? Faltaba, -y falta- información, medios y capacidat de decisión. Qui ha continau charrando aragonés en l’entorno cultural y sociopolitico que bi ha habiu en o zaguer sieglo, ha feito, sabendo-lo u no, un acto de resistencia y mesmo d’heroicidat. Qui deixó de charrar aragonés lo fació a soben sin saber que yera una luenga igual como qualsiquier atra, sin tener os suyos dreitos reconoixius por l’administración y sin poder pa reivindicar-los, en un entorno an que charrar-lo yera salir-te-ne d’o prestichio social, an que no se amuestra en a escuela, sin fablants “referencials”, …


Pa poder decidir voluntariament albadonar l’aragonés, s'ha de poder decidir voluntariament conservar-lo. Y pa muitas personas, ixa no yera una posibilidat. Talment sigamos decindo lo mesmo, pero cal parar muita cuenta en como se diz. Porque a culpa caye en unas u en atras. Y cal deixar claro que a culpa de que se deixe de charrar en aragonés ye de qui practica la represión social, cultural y politica a qui charra ista luenga, no a victima d’ixa represión.


Rai la grafia   
Atro d’os discurso que s’ixemena cada vegada que o conflicto grafico s’incrementa ye bella mena de pacifismo mal entendiu que diz que a grafia no ye important y que reduz o conflicto grafico a una cosa de quatre saputos. Ye innegable que os personalismos y intreses personals u politicos han afectau negativament a lo proceso de normalización y normativización de l’aragonés. Pero creyer que a causa d’o conflicto ye ixa, u que a suya solución pasa exclusivament por alpartar d’o proceso a tres, quatre u quince personas ye, como poco, de belulas.


A grafía sí que importa. O modelo sí que importa. ¿Como no va a importar? Y sobre tot, importa como se prenen as decisions y con qué criterios.


No bi ha garra luenga en occident que siga en condicions de sobrevivir sin un modelo culto, referencial y normativo y con una ortografia común y acceptada por a comunidat d’usuarias. Sin ixo, ya podemos treballar tot lo que queramos en as nuestras asociacions, lugars, vals y collas d’amigas, que nomas conseguiremos prolargar l’agonía d’a nuestra luenga. Isto cal tener-lo claro. Sin norma culta, todas y cadauna d’as variedatz morirán. Beluna durará diez anyos, belatra talment un sieglo. A sola posibilidat de salvación de l’aragonés pasa por un modelo estandar. Si tenemos isto claro, podemos debatir como fer-lo. Sino, a sola discusión ye de que color queremos l’atabul d’a luenga.


Entiendo que queda muit bien relativizar ixas luitas porque son la “parte fiera” de l’aragonés. Ye muito mas poliu de viyer os nuestros treballos. Os libros, os audiovisuals, as chornadas, … son una faina imprescindible y que facilita vivir y disfrutar a luenga. Pero pa que contine existindo una luenga que disfrutar, cal ixe atro treballo. Fosco, canso y impopular, pero imprescindible. Creyer que as cosas se solucionarán solas, que o modelo referencial no ye menester, u que vendrá solo dende una voluntat popular, ye fuyir d’un d’os mas grans problemas que tien l’aragonés hue.

Con voluntarias no se fa cosa

Si l’aragonés sobrevive hue, ye claro que ye gracias a toda la chent que ha decidiu en istas zaguers decadas luitar por a suya luenga. Con un emparo nulo por l’administración, qui mesmo bellas vegadas s’ha amostrau hostil con a luenga, o solo feito de continar charrando-lo ya ye activismo cultural, encara que siga de forma insconscient. Tot ixo, en chunto con o treballo asociativo por totz os cabos d’Aragón, ha feito honra a la luenga y gracias a ixo podemos charrar encara d’una luenga viva.


Pero la sola cosa que conseguimos ye aturar o proceso de perdua d’a luenga. Os datos de transmisión intercheneracional y mesmo de numer de fablants activos, igual como lo grau de conservación d’os rasgos aragoneses en a luenga charrada, debuixan un panorama prou negativo. Garra luenga occidental sobrevive a pur de voluntariau. Y muito menos en una sociedat con tant poquisma conciencia lingüistica como en ye l’aragonesa. Pa que l’aragonés contine vivo le cal prestichio social y emparo institucional. Pa conseguir as dos cosas cal personal treballando nomas en ixo y diners pa fer-lo posible.


Ye una toda una vergüenya que d’as 117 demandas d’actividatz d’o Programa Nieuz Luzía Dueso no bi haiga habiu financiación que ta 37. Cal recordar que ixe programa ye bien barato. Por un regular nomas se paga o desplazamiento d’as dinamizadoras de l’actividat. Si nian ixo, que ye una actividat educativa, que ye simplament un acercamiento de l’alumnau a la luenga, tien a minima financiación, ¿como podemos asperar que se prencipien a pagar politicas activas en desfensa d’os dreitos lingüisticos d’a comunidat d’usuarias de l’aragonés? L’aragonés va en una escalera mecanica de baixada y as actuals politicas de desfensa son pasos entabant en ixa escalera. Una ilusión nomas. Cal aturar a escalera pa poder prencipiar a abanzar.


L’actual lei de luengas no ye un marco acceptable
Tot y que todas somos d’alcuerdo en que a mal clamada lei de luengas d’o PP-PAR yera una barbaridat, no pareixe que o gubierno PSOE-CHA tienga prisa en cambiar-la. Sacar as denominacions de LAPAO y LAPAPYP, encara que imprescindible, se queda clarament curto. O punto de partida d’a nueva lei de luengas habría d’estar, como poco, l’anterior feita por o PSOE.


Me fa muito duelo viyer como, dende muitas personas de l’asociacionismo, se contina contemplando a lei actual como un marco an que treballar lechislativament. No ye acceptable que bi haiga una autoridat lingüistica unica ta catalán y aragonés, por meter un eixemplo, ni a zonificación, ni atros aspectos d’ixa lei. Aprofitar os suyos foraus, interpretar-la a la nuestra favor, nomas ha d’estar qualcosa circumstancial que no nos faiga aturar ni un momento en a nuestra reivindicación d’un marco lechislativo digno pa las nuestras luengas. Bi ha una mayoria parlamentaria en as Cortz más que suficient pa negociar una nueva lei, que faiga honra a la supervivencia d’as nuestras luengas, y que prencipie a reconoixer os nuestros dreitos. ¿Por qué sisquiera se ye treballando en ixe cambio lechislativo? ¿Por qué ha pasau quasi meya lechislatura, y continamos sin saber mica d’a intencions de l’executivo quanto a iste afer?


Cal una autoridat lingüistica pa l’aragonés, y nomas pa l’aragonés. A zonificación no ye admisible, ni sisquiera transitoriament. A comunidat lingüistica ye por tot Aragón y no podemos renunciar a os nuestros dreitos pendendo de do vivamos.

A endrecera d’a luita

L’aragonés contina estando a luenga con mayor periglo de desapareixer en Europa. Atras luengas han teniu problemas muit pareixius y son conseguindo revilcar. Garra no lo ha feito de manera espontania, ni gracias a asociacions de voluntarias, ni con “concesions graciosas” d’o poder politico. Totz os abances se han conseguiu gracias a una población concienciada que no ha reblau en as suyas reivindicacions y que teneban muito claras ideyas que en a nuestra tierra pareixe que encara faltan d’asumir-se. U que, si teoricament son asumidas, dimpués no se practican. Hemos de creyer-nos a desfensa d’a nuestra luenga y d’os dreitos d’as suyas usuarias. Y hemos de aprender que bi ha muitos camins pa conseguir ixos obchectivos, pero que totz, si fa u no fa, tienen una serie de caracteristicas comuns que le fan falta pa trunfar.

Oficialidat, unidat, modelo culto, profesionalización, marco lechislativo adequau, amostranza en y d’a luenga, visibilización d’a represión lingüistica, etc… son ideyas y reivindicacions que hemos de tener claras. Sino, ya somos redotadas

jueves, 6 de abril de 2017

Escribindo en aragonés. Tierra de barrenaus radio 3x07

Leyer ye una d'as mias aficions favoritas. Fer-lo en aragonés, antimás d'un placer, ye quasi una obligación moral pa qui amamos ista luenga. Y pa ixo, prou que sí, cal que bi haiga qui escriba. A soben, quan charramos d'escribir, pensamos automaticament en novelas, con o suyo ciento de pachinas, planteamiento, nyudo, desenlace y asinas asinas. Pero hue, mas que no nunca os formatos son muitos y bien distintos. En o nuevo TdBradio entrevisto a quatre autoras que fan servir diferents formatos y soportes.



Lucía López, autora d'o blog Mallata. Dabi Anquela, que va publicar fa bien poquet o libro de relatos Punto-Seguiu. Tamara Marzo, una d'as autoras d'o fanzine feminista Mullers y Cordials. Ruben Ramos, ganador de dos premios Arnal Cavero por Vidas Crebazadas y A l'atro canto d'a buega. Totz quatre con muitos atros prochectos y obras que han desembolicau durant os suyos anyos d'activismo y creación en aragonés.

Si a todas as luengas les cal qui las escriba y las desfienda, a una tant malauda como l'aragonés, le fa muita mas falta. Y si en todas as luengas, lo d'escribir ye mal negocio, pues poca chent gasta diners en leyer, en l'aragonés, con no perder guaires perras, ya nos femos contentas. Asinas que sirva tamién iste programa pa animar a que leigatz mas en aragonés y a que tos deixetz os chanfles de cabo ta quan en refirmar totz ixos prochectos que tanta honra le fan a la supervivencia d'a luenga.

Pero como vivimos en o mundo audiovisual, iste programa lo promociono con una videofatera, a vier si funciona millor. Aspero que tos faiga goyo!



martes, 4 de abril de 2017

Un maitin zaragozano

Quan os youtubers locals, os barrenaus d'o palo y o rosario, u os comentaristas de Heraldo te fan planteyar-te deixar la ciudat, ye buena cosa fer alcordanza d'ixa atra Zaragoza que vivo totz os diyas y que tanto amo. A Madalena ye, antimás, un lugarón adintro d'o monstruo zaragozano. Un puesto con a suya propia lochica, diferent d'a resta de vicos  y con dinamicas socials que, pa bien y pa mal, remiten a soben a la ruralidat.

Yera un maitin d'ixos que o sol t'eslucerna en salir de casa. Un abrazo de luz y calor que anuncia ixas poquetas semanas de goyosa primavera que van antes d'o furo y rusient verano zaragozano. As vecinas queremos decidir sobre o nuestro barrio -¡qué loquería! -y nos hebanos convocau pa fer-le un abrazo a la ilesia d'a Madalena. En istos primers diyas de caloreta, os capazos se prolargan. Ya no fa galvana estar-te firme rato de charreta. Encara que a nueit d'antes no s'embolicó, un cafe nunca no ye por demás pa sacar-se as zaguers laganyas. Charrin charrand, se nos pasa la hora d'a convocatoria y os camaras de televisión ya se nos miran, preguntando-se quan podrán hopar t'a siguient noticia. As periodistas siempre atabaladas!

A la fin, beluna pilla o megafono. Nos imos agafando d'as mans. Como lo contacto fisico no me fa guaire goyo, prebo de no aleixar-me d'as personas de mas confianza. Me miro de bislai, y con cansera intelectual, a una que demanda que a ilesia pase d'a superstición catolica a la superstición new age. As vecinas que fan tarde, s'han d'unir a l'abrazo sin o capazo previo. Ya se lo farán dimpués, en o vermut. Femos o fato bell ratet. Nos redimos. Enfortimos, unatro diya, o rete que nos enreliga a todas as madaleneras. A lectura d'o manifiesto reivindica que a ilesia catolica deixe d'arramplar con tot. Tot ixe patrimonio, feito a pur de furtar y explotar fisicament, intelectual y espiritual a tantas y tantas personas. Dito con mas elegancia y millors modos, que pa ixo tenemos buen cudiau.

Acaba l'acto y a mitat d'as presents nos enfilamos ent'a Plaza d'o Pilar. T'a nuestra Plaza d'o Pilar tamién. De todas as zaragozanas. En a Plaza Sant Bruno, l'azoque anima lo maitin d'o domingo. Entre zarrios y quincallas, siempre se i troba bella choya. Ya tiengo un puesto que siempre tien bell libro intresant sobre Aragón. En a pocha, pocas perras. O sabado no estió furo, pero me deixó lasa la cartera. En una d'as caixas d'o puesto, un libro sobre a obra de Asso, escrito por Antonio Peiró. "Qué vale?" pregunto a lo botiguer. Se me mira. Cuento que analizando quanto sería disposau a pagar por ixe libro, y sumando-le bell par d'euros. Siet. Yo no sé recatiar. Dubdo. Una amiga quier mercar-le-ne unatro. "Diez por os dos" - l'ufre la mia parella. Antimás de no saber recatiar, ye qualcosa que me mete niervudo y me fa a saber que vergüenya. O botiguer accepta a escape. L'amiga me deixa chanfles pa pagar o libro. "- Ya te los tornaré". Un "Tira!" me fa pensar que será mas facil convidar-le a una biera.

Con l'alegria que nomas un nuevo libro puet dar-te, continamos o camin ent'a plaza. Unas mozas portan unas pelucas azulas y son cantando. "Be d'estar una despedida de soltera", nos pensamos. Pero ¿a ixas horas d'un maitin de domingo?. En acercar-nos-ie descubrimos que a letra d'a canción ye un canto antiabortista. Unatra asociación d'as que preban de decir-les a las mullers qué fer con o suyo cuerpo. M'ufren no se qué. Les ne refuso. ¡Cómo va ista ciudat!

Pocos metros dimpués, a color azula torna a protagonizar la plaza. En iste caso ye o nuestro destino: a manifestación d'o Rete Augua Publica d'Aragón. Lo d'a Madalena y d'o Pilar son dos actos prou diferents pero con pareixius. A la fin, en os dos, nomas demandamos que todas podamos decidir sobre os nuestros recursos. S'estendillan una telas que represientan os rius nuestros .Uns globos chigants entretienen a catrinalla y a las mas enchugardidas d'a plaza. Atra vegada, trobar-te con chent arrienda. As d'a Montanya y as de Tierra Plana. D'o norte y d'o sur. De l'activismo politico y qui simplament desfiende o lugar suyo. Mas capazos. Mas abrazos. Mas complicidat. O rete que s'ixampla d'o barrio ta cada cabo d'Aragón y dillá.

Hemos de marchar, que hemos quedau a chentar en Penyaflor. A resta se'n iran en un rato t'o vermut. Regular que en tornar d'a chenta, nos ne trobamos a mas d'un, que encara ye vermutiando. ¡Paratz cuenta, que a l'atro ye lunes!

Zaragoza ye hostil bellas vegadas. Y t'agana d'exiliar-te ta bell cabo ideyalizau que, manimenos, tendrá as suyas propias miserias, que por agora ignoro. Atras, Zaragoza ye amable, polida, una amiga mas d'as que comparten la vida con tu. Un maitin pa disfrutar as suyas carreras, plazas y paisaches, un ratet con as amigas y companyeras de luita, ... ixo ye de mal sustituir. Zaragoza ye casa mia, y encara que tienga bella tubería embozada, y bella paret con crepazas, la amo con ixe "carinyo ancestral", que deciba Labordeta.

sábado, 25 de marzo de 2017

Como viyé... "Cronica de l'asesino de reis"

Qué millor homenache a Cronica de l'asesino de reis que un articlo larguizo pa explicar una opinión que podría dar en dos parolas: sobra pachinas. A patacadas, anyadiría.

Cronica de l'asesino de reis, por si belun no lo conoixe, ye una trilochía que se'n han publicau os dos primers volumens: "O nombre d'o viento" y "A temor d'un saputo" (The name of the wind y The wise man's fear). Tamién s'ha publicau bell par de spin-off's, (The Slow Regard of Silent Things y The Lightninng Tree)  un d'os quals tien version en castellano. Farto de que me lo recomendase tantisma chent, y aficionau como soi a la literatura de fantasía heroica, me leyié l'anyo pasau o primer libro y fa poco rematé lo segundo. Totz dos con a mesma sensación en rematar-los. Son buenos libros, cuentan historias intresants y tienen planteamientos bien orichinals, pero a narrativa ye panda como una maza, recreyando-se en detalles innecesarios y blicando-se partes con gran potencial.

Istos libros recuentan a vida de Kvothe, naixiu d'una colla de actors de teatro, y que irá esdevenindo un gran mago. O primer libro se centra en por qué "decide" de fer-se mago y as dificultatz pa estudiar en a Universidat, a entidat an que aprende machia. En o segundo, antimás de continar con ixos estudios, vive bella aventura, amostrando-nos una mica mas l'universo creyau por Rothfuss.

Entre as virtutz d'a obra, como ya sinyalaba antes, ye a gran orichinalidat en os planteamientos. A forma que tien de describir o funcionamiento d'a machia, en todas as suyas variedatz, ye bien novedoso, a lo menos entre as obras que he puesto leyer. Encara que no preba de dar-le una explicación scientifica, sí que le'n da una alto u baixo racional. A machia tien un coste y no ye un coste "mistico" sino fisico y/u intelectual.

Tamién l'ambientación ye prou alueixada d'o "medievo clasico" d'atras obras. L'universo de Rothfuss ye tecnolochicament y scientifica más abanzau y menos salvache, con una sociedat que probablement sería más cerca d'a Ilustración que d'as Cruzadas.

En a parte mala, ye basicament lo que comentaba alto: sobra pachinas a embute. No tiengo garra problema en leyer tot lo que calga si lo que me i cuentan "m'engancha" y me tien en candeletas. Soi d'os que s'ha fotiu nueitz de veilada en o sofa con una luceta dica acabar-se un libro porque no se'n podeba adubir. Pero no ye precisament ixo lo que me pasó con a Cronica de l'asesino de reis.

Durant tot lo primer tomo, Kvothe va dondiando buscando perras ta pagar-se la Universidat. Bella vegada, con a impresión de ir como una gallina escapezada. En o segundo s'embolica mientras cientos de pachinas con conceptos curiosos como lo protocolo d'a corte d'o Maer, u a luengas d'os Adem. Conceptos que, tot y que le dan muito suco a la obra, se podrían recontar en a metat d'espacio y sin tanta retolica, que plega a aburrir. Manimenos, fa unas elipsis absurdas en a historia d'o protagonista ventilando-se en tasament bella ringlera acontecimientos que darían perfectament ta bell par de capitols.

Talment o tercer libro faiga que tot cambie y que todas ixas pachinas que hue me pareixen vuedas u que charran de cosas sin sustancia, prengan sentiu. No creigo que me faiga o morro clo.

"Cronica de l'asesino de reis" ye, por agora, una buena obra. Se i cuentan cosas intresants, le da una envista nueva a lo chenero de "espada y bruixería" y te deixa con ganas de saber como contina la historia de Kvothe. A suya popularidat y orichinalidat farán, antimás, que esdevienga en poco tiempo, parte d'a cultura popular (underground u mainstream, ixo no lo sé) d'ista decadas. Pero en a mia opinión, tien importantes carencias narrativas que fan que siga de mal leyer en muitas ocasions y prou millorable en cheneral.

Quedo a l'aspera d'o linchamiento de man d'as fans de Rothfuss, que sé que en sotz muitas y que no sotz mica d'alcuerdo con tot lo que he dito.

NOTA: M'he proposau d'ir penchando comentarios sobre lo que veigo y leigo, asinas que aspero que isto siga l'empecipio d'una nueva sección fixa. Ya me iretz comentando que tos pareixe




viernes, 10 de marzo de 2017

Una chaqueta de crisi

Ya yes amanau a los quaranta. Pero no tiens ni perras pa un auto gran y rapedo, de color roya, y sin teito, con que fer estrapalucio por os cinturons de circumvalación. Lo que de verdat te va, lo que un diya te truca, ye una chaqueta inspirada en l'uniforme de Wolverine. La has vista quantas vegadas ya, anunciada en o Facebook. Cada vegada que i dentras, a alparciar u a compartir beluna d'as tuyas fateras, un banner te chila que la merques. O carnuz d'a foto ye un crianzon que le preba de bitibomba. Con as zarpas de Wolverine. En una scena con nieu cayendo en o fundo. Un poquet achenullau, y como pillando vencida, pa blincar dencima d'un hipotetico enemigo difuera de plano.

Y te decides. Y malas que t'ingresan a nomina,dentras en ixa web con nombre de chilo d'as Tortugas Ninja, y la mercas. No siga que, en que te pasen as facturas, se te quede en royo la cuenta, y a responsabilidat d'adulto te prive de fer ixe chirgo. Asinas, decides, concararás a crisi d'os quaranta. Con un concieto responsable. Con un malfurrie de tasament bella decena d'euros.

En bell par de clics, os diners esnavesan l'Atlantico y un choven chonflo y pecotoso, que se ye minchando un hot dog d'an que se sobrece untos por tot, recibe una alarma en o suyo mobil. Les cal fer un paquet. "Awesome Logan Zipper Jacket. Size XL. Zaragoza, Spain". Fa un cenyo de sorpresa. No le gosan de demandar cosas dende Espanya. Se quita l'unto d'as mans, deixa la minchanga sobre o repalmar, y prencipia a aprestar la comanda.

A l'atro cabo d'a mar ociana, asperas en candeletas a plegada d'a chaqueta. No la has vista que en fotos. No sabes ni o material de que ye feita, ni si habrás acertau con a grandaria. Te puetz permitir malfurriar ixos diners, pero con tot y con ixo contina fendo-te duelo gastar-los. Bien se vale que a sociedat tuya s'ha ocupau de deixar-te esbotar por astí. Tiens una edat an que has comprobau que tot lo que o capitalismo te prometió ye falso. Que os mensaches d'o cine, d'a escuela, d'a familia y todas as personas que admirabas, no yeran que idealizacions incumplibles. Nunca no serás ixe trunfador. O treballo tuyo, ni te imple, ni le trobas guaire sentiu. Os ababols ocupan os puestos más alteros d'a escala social, armaus con un tocho pa trucar-te en que prebes d'acucutar por os suyos dominios. Te vendioron una moto y no yera la de Wolverine. A lo menos tiens la suya chaqueta.

Pero "ei! te deixamos que te merques una chaqueta absurda!", te diz Facebook, entre anuncios d'oposicions a policía, y videos que celebran amistatz con chent que nian conoixes. A libertat a los quaranta, ye fer-te de cabo ta quan una pinta de biera "de la cara", vestiu con una chaqueta que recuerda a un superheroi.

O diya plega. A furgoneta de Correus aparca en a puerta d'o tuyo treballo. Te la levan t'asti porque por casa, no i yes nunca. Ye un paquet de plastico, zarrau con ixa mena de vesque termico. Lo ubres a moniquet, parando cuenta de no fer garra zancocho. Le ha costau mas d'un mes d'arribar dende os USA. La quitas d'o plastico. Astí ye. As colors azulas y amarillas son correctas. Baixas as dos cremalleras y te la calas. Va bien de grandaria. Te miras en l'espiello d'o escusau. Astí yes. Molas. Guarda si molas! Molas muito. Yes o puto Wolverine. Si teneses tres cutiellos salindo d'as mans, supersentius y factor curativo, no te caleba cosa mas. Porque l'uniforme lo tiens. Y cómo mola!

Ficas en a mochila a chaqueta que hebas traito. Encara que fa calor, vas a tornar-te-ne ta casa con a chaqueta de Wolverine. Prou que sí. Puyas t'a bici y prencipias a pedaliar. A chent se te mira, sí.... Son pensando: "Cómo puet prebar-le tant bien una chaqueta a belun?". Síiiii. Totz reconoixen l'uniforme de Wolverine d'os comics. L'uniforme que feba goyo, no ixe marrón mierda que le metioron tantos anyos. L'uniforme mitico de Wolverine. S'eslucernan en viyer a imachen d'un trasunto de l'heroi canadiense, circulando en una BH, por o carril bici d'a marguin cucha. Sabes que lo vas a petar. No puet haber-ie una chaqueta más molona en toda la ciudat.

Lo sol brila alto, en un cielo azul de tot. Ni un nyublo s'atrive a apareixer hue en Zaragoza. Ni en o cielo ni en a tuya humor. Hue tiens quasi quaranta, pero te sientes como quan en tenebas vinte, y encara le febas goyo a las zagaletas d'os bars, y salibas de chueves a domingo, y capaciabas con os amigos tot lo diya, y te pasabas os videochuegos, y cada libro yera una troballa, y no atro calco de bella cosa ya leyida antes.

Un auto de policia s'atura chunto a tu en o semaforo y te preguntas si te podrían aturar por "exceso de flow". "Lo siento sinyor" - diz con voz infantil l'achent en la tuya ment - "ye vusté fendo que a resta d'a ciudat s'avergüenye. Hemos recibiu queixas de tot lo vecinamen dende Chuslivol dica Val d'Espartera". "Pero sienta, sinyor achent" - le respondes en a conversa virtual que aspera la luceta verda - "me lo mereixco, soi a pocas de fer-ne quaranta. Y lo de salir a correr ye bien, pero no me acaba de satisfer". "Lo entiendo, lo entiendo, pero a lei..." Y deixando-le con a parola en a boca, a luceta se torna verda, y limpio pedaliar, continas lo camin.

Plegas en casa. Fas repaso. Te cal ordenar unas cosas, limpiar l'escusau, que tiens visita lo cabo de semana, y dimpués has de pasar a viyer a la familia, que los tiens albandonaus. Deixas la chaqueta en una percha. A molonidat se'n va con ella. Qué efimero ye o goyo que furneixen os placers materials! Ya ye plegada, sí. Dimpués de tantos diyas d'aspera. Deseyas que cada diya que te la metas te sientas como en iste ratet que has pasau. Beroyo. Choven. Poderoso. Encara que barruntas que no. Que atro diya petarás por atro cabo, y te mercarás una nueva fatera, que te traiga ixos sentimientos de tornada. Asinas son as cosas aqui. Asinas son as cosas con a tuya edat.

Pero cómo mola la chaqueta...


viernes, 3 de marzo de 2017

Diya d'a luenga materna 2017. Tierra de barrenaus radio 3x06

L'actualidat manda, de cabo ta quan. Mesmo en un programa como Tierra de barrenaus radio, que prebo que siga lo mas atemporal posible. Iste ye un programa diferent por muitas razons, pero sobre tot por o formato. En cuenta d'un tema central, con pocas convidadas como ye normal, iste prene una mica formato magazine y tocamos bells quantos temas con muitas convidadas.

A nueva propuesta grafica yera tema obligau. Mas, estando arredol d'o diya d'a luenga materna, que tamién en charro en o primer bloque. En o segundo, Marco y David nos charran d'una actividat feita en un IES de Carinyena y d'o programa Nieus Luzia Dueso. T'o tercer bloque, contamos con Cherardo, un d'os actors d'a companyía de teatro Fosca Delera. En ista zaguer edición d'as Vodas de Isabel, representoron a suya nueva obra "Con piedra u barro fagan algo", escrita en aragonés. Con ell y Tamara, charramos tamién d'as Vodas, convidando a tot qui no las haiga viviu a que lo faiga. Y rematamos con o chueves lardero, de man de Edu y Mario, que nos presientan ista fiesta y a suya versión nogarera.

Un formato que ya viengo prebando en programas como o primer d'a temporada, Sé lo que facietz iste verano, y que talment siga o formato principal en a temporada siguient. Ya me diretz que tos pareixe y, como siempre tos digo, ta qualsiquier tema que queratz proposar, tiengo as puertas d'o programa pataleras ta todas vusatras.

domingo, 26 de febrero de 2017

Unatra grafia fracasada

A historia recient de l'aragonés ye plena de prebatinas de normativizar a luenga, de fer frent comuns, de mesas negociaderas, de plataformas de compleganza, .... fracasadas. No cal levar guaire tiempo en isto ta haber-ne visto quantas. Quan en presencio unatra d'ixas, me debato entre a rabia y a pena, entre ploramiquiar u encarranyar-me, y quasi como mecanismo defensivo, me'n foi a rialleta, y preto a trollear, u a fer-ne chanza como olvidando que somos chugando con os zaguers alientos d'a luenga en mayor periglo de desapareixer d'Europa. Que os memes, y as gracietas no enganyen a dengún: lo viviu en istas zaguers semanas me pareixe unatra desgracia ta l'aragonés y a suya conservación.

Quan se proposó as "estreudes normativas" ta mirar de solucionar lo conflicto grafico no me pareixió la millor solución. Creigo que ye una academia formada por chent experta en l'aragonés qui ha de prener ixas decisions. Con tot y con ixo, qualsiquier iniciativa que consigua que se supere o conflicto y que podamos prencipiar a treballar en atras historias, me pareixe bien. 

Baixando a lo mas terrenal, todas tenemos alto u baixo claro como habría d'estar a grafia finitiva de l'aragonés en treitos chenerals. Una grafia que fese contentas a las suyas usuarias. Tanto a qui la tienen como luenga materna y qui la hemos aprendida d'adultas, como a qui la fan servir en zonas an que encara ye viva como qui somos prebando de que impla nuevos espacios. Prou que bi ha diferencias quanto a bellas qüestions menors, pero en lo basico todas tenemos en ment as caracteristicas d'ixa grafia.

Ixe yera l'obchectivo d'o "proceso d'os tres foranos". Que fesen una grafia que, dende a neutralidat, y con criterios filolochicos, podese fer-se servir por a suya comunidat lingüistica. Y l'obchectivo no ha cumpliu garra d'ixos preceptos. No somos pocas las que tenemos la sensación de que a propuesta grafica presentada por a Dirección General de Política Lingüística fa bell diya yera escrita d'antes y que lo que s'ha feito ye chustificar, y malament, ixa decisión.

No ye neutra ya que privilechia clarament a una d'as grafias (la clamada "d'o 87", G.87 entadebant) a favor d'a resta. Os criterios son concieteros de tot, primando os foneticos en uns casos, os etimolochicos en atros, metendo-ne de politicos en o caso d'a NY, y dentrando en temas que s'heba dito que no se i tractarían. De todas as propuestas graficas que existen hue ta l'aragonés, ista zaguera ye la que menos criterio tien. Mesmo la G.87 yera millor en ixo. 

Pero lo pior de tot no ye ixo, sino que no cumple o gran obchectivo: que nos i veigamos reflectadas as usuarias. Si a G87 no consiguió trunfar entre qui tienen l'aragonés como luenga materna, ¿qué nos fa pensar que ista grafia (G.DGPL entadebant), que ye lo mesmo pero con "v" lo conseguiría? Cosa. Entre a resta d'usuarias tamién nos trobamos con que un numer importatn, y m'atrevería a decir que mayoritario, la refusa, asinas que continamos con o mesmo problema, pero con una grafia mas.

Caleba una grafia que complegase, que resultase de consenso, como dicen en a mesma introducción:

Así pues, entendemos que nuestro papel de mediadores nos lleva a intentar encontrar una ortografía de compromiso entre la racionalidad lingüística y las tradiciones socioculturales; una ortografía en la que se vean representadas todas las partes, lógicamente dotada de la necesaria bondad técnica y coherencia interna; una ortografía, en suma, que sea merecedora de consenso. Sin duda, en la práctica existe el riesgo de sumar una ortografía más a las precedentes, pero merecerá la pena si esa nueva ortografía goza del favor de todos. Como filólogos que apreciamos la lengua aragonesa y los esfuerzos de su comunidad de hablantes para dignificarla y darle un futuro viable, nada nos satisfaría más que contribuir positivamente a esa gran empresa colectiva. 

"Mereixedora de consenso", "gozar d'a favor de totz", "coherencia interna", ... son tres d'as faltas que tien ista nueva grafia que, manimenos, sí que "suma una ortografía mas a las precedents".

S'ubrió un plazo d'un mes ta fer definitiva la propuesta grafica. Encara se ye a tiempo de apanyar a situación. Si se ye intelichent, se puet salir d'isto con un prencipio d'alcuerdo. Si se contina con a torpeza contrimostrada, iremos por mal camín.

Bi ha qui diz que si ye a zaguer oportunidat, u que encara que no nos faya goyo nos la hemos de minchar. No sé si opinarían lo mesmo d'as muitas "zaguers oportunidatz" que he viviu en os anyos que levo en isto d'a defensa d'a luenga. En o proceso de Chuntos - II Congreso de l'aragonés muitos creyiemos que isto podeba reendrezar-se a la fin y no estió asinas. Bella cosa feríanos malament. Iste atro proceso, sin participación ni transparencia, tampoco no pareixe que vaiga a resolver o conflicto. De culpables, caldrá buscar-ne, porque sí que lo hese puesto conseguir. Caldrá viyer por qué s'ha preso a decisión de fer asinas una propuesta que a priori caleba que tenese consenso y que solucionase o conflicto.

Caleba intentar-lo, prou que sí. Como he dito antes, a solución no yera optima, pero si conseguiba apanyar o conflicto me valeba. Con ixe documento no nomás no se soluciona o conflicto sino que, ta yo a lo menos, se pierde a confianza en a DGPL y a suya necesaria neutralidat. Si se va a funcionar con tot igual, l'aragonés continará tenendo os mesmos problemas sin solucionar.

Caldrá, como levamos fendo decadas, continar treballando dende as asociacions y dende cadaguna de nusatras por dignificar a luenga, por fer-la servir, por mantener-la viva y que impla por cada diya mas espacios d'os que le han furtau en os zaguers sieglos. No somos pior que fa dos anyos. Vientos favorables habrán de plegar bell diya y sino, caldrá que bufemos. Tenemos una luenga que no nos la mereixemos. Faigamos porque contine viva.

Nota: Ista opinión ye mia y nomas que mia. No represento a garra asociación. No teneba pensau d'escribir guaire sobre o tema, pero visto que qualsiquier s'apunta a opinar (y me pareixe bien) y mesmo que belun m'ha demandau a mia opinión sobre o tema, pues he creyiu convenient fer istas pocas reflexions.

miércoles, 1 de febrero de 2017

A cinta que me moló. Tierra de barrenaus radio 3x05

Sin estar precisament un saputo d'o cine, ye una d'as mias pasions. Os medios actuals permiten, antimás, levar t'a gran pantalla historias que de chiquet nomas yeran posibles en o comic u a literatura de Sciencia Ficción u Fantasía.

China chana as frikis nos imos fendo con o mundo, y hemos aconseguiu emplir d'as nuestras basemias os cines. Como en tot, bi'n ha de buenas y de malas, de millors y pior feitas. Cintas que pareixen salidas d'a ment d'un politoxicomano en un d'os suyos viaches y ideyas que de puro chenial son incomprensibles. Y atras cintas que simplament fan goyo, pero no sabes por qué.

A ufierta audiovisual d'agora ye tant gran y variada, y o tiempo libre tant radiu, que me cal trigar muito. Por ixo, recurro a la chent que tien gustos pareixius pa que me recomiende qué viyer u qué leyer. En iste programa nos chuntemos quatre amigas y charremos de cintas que nos heban feito goyo. Sin garra criterio a priori. A triga no podeba salir mas variada. Cintas que replegoron arrienda diners en taquilla contra atras que s'estrenoron dreitament en TV. Presupuesto multimillornarios contra cintas feitas con a pocha que heba feito lo suyo director. De tot, y muita diversión, como siempre, en iste Tierra de barrenaus radio, que prencipió con una videofatera, y que ya podetz ascuitar y descargar-tos.





martes, 24 de enero de 2017

A web d'a Casa Blanca

#modo somarda ON

Me pareixe muit bien que a la fin s'haiga sacau l'espanyol d'a web d'o gubierno d'Estaus Unius. A la fin, si yes en os USA has de saber y charrar anglés. No entiendo que, con toda la crisi que bi ha, se malfurrien diners en traductors y en chent escibindo en espanyol. Si antimás l'anglés lo entiende tot lo mundo. ¿Pa qué vas a meter-lo tamién en espanyol?

Antimás, ye claro que l'espanyol no ye una luenga de progreso, como l'alemán, u mesmo lo chino, que son luengas que fan honra pa trobar treballo y fer negocios en tot lo mundo. Con l'espanyol, ¿de qué vas a charrar? ¿De narcotrafico, futbol y bachata? A os ninos de Estaus Unius no les cal garrar atra luenga, porque ya charran anglés, que lo charran en tot lo mundo. Más de 800 millons de personas, y antimás ye a luenga que más se ye aprendendo. Lo que han de aprender ye a charrar-lo bien y no como os irlandeses u os australianos. Y si aprenden belatra luenga, pues que en siga una que les faiga honra.

Porque os que se encerrinan en charrar espanyol, lo que pasa ye que no se han integrau. S'han encerrau en a suya cultura "pueblerina" y no tienen a envista cosmopolita que le cal a Estaus Unius. En realidat lo que quieren ye imposar a suya luenga y os suyos costumbres a la resta d'estadounidenses. Porque se continan sentindo de Mexico, u de Colombia, u de an que siga, pero no estadounidenses, que ye lo que son. Porque ¿qué mete en a suya licencia de conducir? ¿eh? ¿eh? 

Tamién continan fendo servir nombres espanyols, que ya se los podrían cambiar. Que no sé como quieren que os estadounidenses les digan Ricardo u Javier, que ixo ye de muit mal pronunciar. Con lo facil que ye decir-se Richard u Jack. 

Que bueno, a yo no me importa que continen charrando espanyol en casa suya, pero ye que van por a carrera u por as botigas y continan charrando espanyol pa que no les entendamos, que ves-te-ne tu a saber lo que serán preixinando. Y pa forro de bota, mesmo bi ha barrios an que os cartels d'as botigas y d'os negocios los meten en espanyol. Que si i va un que no sabe espanyol, ¿como lo va a entender? Lo dito, que lo charren entre ells, pero que no nos lo imposen. Lo siguient será que en o Congreso preben de charrar espanyol, y ixo sí que no. A viyer si antimás va a caler deixar-se os chanfles en "pinganillos" y isto se va a tornar una torre de Babel, quan totz nos podemos comunicar en anglés

Y le digo espanyol, por no decir-le mexicano. Porque antimás entre ells charran muit diferent y no se entienden de un puesto a atro. En un puesto dicen "carro" y en atro "coche", y no te digo con o verbo "coger" que ixo ye la rematadera. Que en realidat yo creigo que ni ye una luenga, que ye un conchunto de fablas que se pareixen y tal, pero que la RAE quiere inventar-se una luenga, que dimpués no la charra dengún, y asinas acotolarán as variedatz venezolana y nicaragüense y muitas atras. Ixo sí que ye matar a riqueza lingüistica.

Asinas que bien por Trump, que ye un tipo de firmes conviccions y que sisquiera contine enfilando o país por an que cal, y a la fin deixe de reblar con todas ixas minorías que quieren imposarnos a suya verdat. ¡USA prevalecerá!

# Modo Somarda OFF

Pues ixo, que muit mal lo de que saquen o castellano d'a web d'o gubierno d'Estaus Unius. Tot lo que sirva pa reconoixer os dreitos lingüisticos de todas y totz me pareixe bien. Aspero que isto sirva pa que os castellanofablants puedan empatizar con as minorías lingüisticas, pero cuento que no me fará o morro clo.

Por cierto, en os USA bi ha un fascal de minorías lingüisticas, con luengas en verdader periglo, que cuento que tienen prous mas problemas que os castellanofablants pero, una vegada mas, a los medios espanyols lo que les importa no ye o patrimonio lingüistico, sino o nacionalismo lingüistico. Ni os dreitos lingüisticos d'as minorias, que en l'Estau espanyol, se la bufa.

miércoles, 18 de enero de 2017

Lo molinero y o folk combativo

En gravando o programa sobre versions de Tierra de barrenaus radio, m'aturé a ascuitar con ficancia a letra de Lo molinero, una pieza clasica d'o folk, en a versión gravada por a Ronda de Gudar "Astí queda ixo". La heba ascuitada un ciento de vegadas pero, por un regular, como qui siente plever. Y prou que sin lunetas moradas.

A letra charra d'un molinero que se suposa que buque con as zagalas que i levan o trigo pa fer farina. A canta preba d'avisar-les d'iste feito y les advierte de que si fan foriquetas con o moliner dimpués os mozos d'o lugar no las "pretenderán". No sabemos, pues en a canta no lo diz, si ixas trobadas sexuals son consentidas u no pas. No sabemos d'as estrucias sexuals d'o moliner, que talment sigan un reclamo, u si as mozas d'o lugars lo fan servir como alivio sexual, en una sociedat plena de "cazurros sexuals". En qualsiquier d'os casos, toda la canta ye una descripción de l'heteropatriarcau rural (l'urbano tien atros topicos) que, estando bien pensaus, decora con una napa de picaresca, a lo "ixotas de picadillo".

Si as mozas son forzadas por lo moliner, lo que se diz en a canta (que pa forro de bota ye bien animada), ye terrible. Si no en son, as mozas d'o lugar se suposa que tienen una vida sexual prou mierdera u que, en qualsiquier caso, o feito de vivir ixa sexualidat con o moliner, las fará estar refusadas en o lugar. Jodo petaca.

Tot isto me fació pensar bell rato sobre as letras en as letras d'as cantas folkis aragonesas. Si en os libros en aragonés, poquet a poquet imos salindo d'os topicos "crabas-cosas d'antes mas- a guerra -mont", pareixe que en a mosica, cuesta de salir-se-ne. A tematica d'os grupos folkis continan estando rurals, agroganaderas y "d'as cosas d'antes mas". Con bella excepción radida, u quan charran de "temas universals", o folk ye d'as pocas menas de mosica an que no trobamos una envista "combativa".

As pocas cancions que charran de qualcosa pareixida a la liberación d'a muller, lo fan en terminos nomás sexuals u coyunturals. As mullers son libres pa Santa Agueda. U bella muller punctual ye una persona con muito caracter que se imposa, y que destaca entre una población femenina de tot sozmesa. As mullers en o folk sufren, ploran, deseyan y son deseyadas, treballan ... pero qui vive aventuras, qui fa cosas importants, qui ye un heroi siempre ye un hombre.

Pocos temas politicos, fueras de l'aria agroganadera, protagonizan a mosica d'iste chenero. No se'n fa porque a o publico no lis faria goyo, u como no se'n fa, no bi ha publico folki "combativo"? Encara que no ye a mosica que más me cuaca, puyo totz os anyos t'o PIR y t'atros festivals, que tienen toda u buena parte d'a programación d'ista coda. A mayor parte d'a programación, por muit buena que siga, ye previsible y repetitiva. Mesmo o publico somos os mesmos dende fa muito tiempo. Ya nos conoixemos todas, u muitas. Y ye un publico que sí que me lo trobo dimpués en l'activismo politico y social. Que antimás reacciona por un regular prou bien a las innovacions en a mosica, y que ye bien ubierto.

Quiero pensar que cosas tant pinchas como "Mullers" de La Chaminera, que tenié a suerte de viyer en iste zaguer PIR, no quedará en una cosa punctual, sino que va fendo tranya pa la chent que quiere fer mosica "tradicional", pero con ixa component politica que tanto trobamos a faltar muitas. U que a la que ya existe, le quiere dar la interpretación historica critica que tanto cal. A mitificación de lo rural no puet ideyalizar seguntes que comportamientos ni normalizar seguntes qué relacions de poder.

Como en tantas atras cosas, en Aragón somos muit poquetas. Ya quasi no queda chent que faiga mosica en aragonés, como luenga principal. De collas folkis, por cada dia en tenemos menos tamién. Pero cuento que de buens mosicos, de publico, de ganas, y de espacio pa innovar bi'n ha a boticiegas.

¿Ye incapable lo folk de fer lo que por un regular entendemos por "mosica combativa"? Cal que no. A mesma Ronda se'n ye salida de cabo ta quan d'ixe "paisachismo". Os Chotos, facioron aquell "No más pantanos" que tamién se fació himno. Falta nomás un paset entabant pa que una colla folki faiga letras como las de Habeas Corpus. ¿Belun se i anima?





domingo, 15 de enero de 2017

Westworld y os robots asimovianos

A primer temporada d'a serie Westworld deixa buen gusto. Diez capitols d'una serie de sciencia ficción, an que lo presupuesto va mas t'os actors y os scenarios naturals que t'os pocos efectos especials que tien. Una trama que engancha de camin y unas actrices que treballan de bitibomba, en uns rols bien embolicaus. 

Ye inevitable pa las fans d'a sci fi, preguntar-nos cada vegada que apareixe un robot en pantalla, si ye u no asimoviano. Ye decir, si sigue as tres leis d'a robotica: "Un robot no fará mal a un ser humano, u por inacción, permitirá que un ser humano se faiga mal", "Un robot ha d'obedeixer as ordens dadas por os sers humans fueras de quan dentren en conflicto con a primer lei", "Un robot ha de protecher a suya existencia siempre que ista protección no dentre en conflicto con a primer y a segunda lei." Buena parte d'a suya literatura charra d'as conseqüencias d'ixas leis en o pensamiento robotico y de situacions que fan buega entre un comportamiento y atro.

A pregunta de si os robots de Westworld son asimovianos la responder la serie en o primer minuto con un contundent NO. De feito, ye o debat etico sobre os sentimientos de vida creyada artificialment, lo que centra l'argumento. Os robots de Westworld, antimas de pareixer fisicament humanos, tienen totz os nuestros sentimientos y son una parte fundamental d'ells mesmos. De feito, ixos sentimientos son un d'os principals atractivos pa os visitants d'o parque. Asinas que somos bien leixos d'os robots asimovianos, perfectas maquinas lochicas sin cosa pareixida a un sentimiento.

Manimenos, Westworld ye una serie bien asimoviana. Os charrazos de Robert, Bernard u Elsie con os robots recuerdan tantismo a las sesions psicolochicas de Susan Calvin, que a referencia ye inevitable. A definición d'a vida u d'a consciencia, os problemas eticos de creyar-ne, as conseqüencias de fer-lo, ... son totz debats que, como no podría estar d'atra manera, Asimov planteyó en as suyas novelas, dende diferents envistas. Westworld bebe de tot ixo y lo fa servir pa creyar una nueva ficción de una calidatz graniza, que nos fa reflexionar sobre a nuestra propia naturaleza, y sobre a definición mesma d'a humanidat. Asperemos que en a segunda temporada no s'esvarren ent'a sci-fi "d'azoque" y continen asinas.

viernes, 13 de enero de 2017

Un astronauta en l'aragonés

Foto de Marshall Henrie,
amprada d'a Wikipedia
En a seu de Salamanca, devantada entre os sieglos XVI y XVIII, bi ha un astronauta feito en piedra. No ye garra misterio IkerJimeneziano, ni a preba de que "nos cusiran dende difuera". Simplament obedeixe a un criterio de restauración.

Una amiga que treballa de restauradora me recontó ista curiosa historia. D'antes mas, as restauracions prebaban de que no se notasen. De que pareixese que a pieza en qüestión no heba pasau por un proceso "moderno" y que continaba incolume dende os tiempos que se fació. Corrients mas recients d'o mundo d'a restauración, desfienden tot lo contrario. A restauración no nomas no cal amagar-la, sino que cal que siga bien claro que en ye. Por ixo, nos trobamos con curiosidatz a boticiegas en muros de ilesias y castiellos, como astronautas, mobils u chelaus. Se fa isto, dicen, pa no enganyar a dengún y poder distinguir qué ye lo que queda realment d'a construcción orichinal y qué ye lo que s'ha feito en cadauna d'as fases de restauración.

L'aragonés ye tamién una viella seu, d'un milenio d'edat, que ye en as tres pedretas. Que le cal una restauración ye qualcosa evident.Ye erosionau, tien partes desgastadas, bell forau, y mesmo aprecisa elementos nuevos.

O pleito plega quan nos posamos a debatir sobre cómo fer ixa restauración. No sé si "o criterio de l'astronauta" ye millor u pior que lo de "que no se note". No sé si bi ha vias intermedias, u bell tercer criterio. Pero d'ixo, de criterios, nos ne cal en l'aragonés. Bells quantos, comuns y compartius, pa poder prencipiar a charrar, y no ir fendo cullebretas por os concietos u modas de cada anyo (u anyada). Dimpués, ya viyeremos si l'astronauta ha de levar a escafandra roya u verda.

miércoles, 4 de enero de 2017

Debat de cabo d'anyo. Tierra de barrenaus radio 3x04

Cosas de 2016. Que d'a metat no en
charramos, pero bueno...
Bi ha programas que me leva firme faina aprestar-los. Escribir o guión, trobar convidadas, aconseguir chuntar calendatas disponibles pa todas, documentar-me, .... Iste no ye un d'ixos programas. Teneba l'estudio reservau pa gravar-ne unatro y dos dias antes un d'os convidaus se fació un zancocho en a esquena. Bien se vale que tiengo amigas siempre prestas a aduyar-me bell poquet y que no dubdoron en venir-se-ne a gravar iste programa.

Durant bell poco mas de dos horetas, as cinco personas que nos chuntemos en l'estudio, estiemos charrando sobre tot iste zaguer anyo 2016. Dende l'actualidat mas local, dica la politica internacional. Politica, cultura, ... lo que nos fue salindo, en un programa mesmo con menos guion de lo cutiano en Tierra de barrenaus radio.

Regular que nos deixemos muitos temas, y a fe que nos habríanos d'haber documentau mas, pero cuento que o resultau final quedó bien pincho. Prencipiamos con iste Tierra de barrenaus radio un 2017 que asperemos que remate millor que no empecipia.

lunes, 2 de enero de 2017

A muerte de l'heroi

Vinyeta de Magneto vol 3, #1,
por Gabriel Hdez Walta
D'antes mas, os herois yeran dreitos, con prencipios, valors, tractamientos impecables, representants de tot lo bueno que pueda tener a humanidat y eixemplo pa todas y totz. En bell momento, se les querió dar una mica de humanidat de verdat, y fer-lis tener defectos, pasions, errors, ... Os herois perfectos y as historias moralistas se fueron quedando demodé, y prencipioron a petar-lo os antiheoris. Matar a l'enemigo yera un tabú, y prencipioron a mirar enchaquias pa fer-lo sin escandalizar a una sociedat que encara no yera feita a os nuevos herois. A poquet a poquet, plegamos a l'heroi actual, un verdader boque sin atros prencipios que imposar a suya envista d'o mundo, y ixo quan en tien.

¿Como se pasa, en bella decada, de aplaudir a bondat y altruismo de Superman a fer-le "la ola" a un traficant asesino como Pablo Escobar? Prou que sí, Pablo Escobar, y en cheneral totz os personaches "reals", ye muito mas intresant que o ixauto de Superman. Nos trobamos con todas as feblezas y dubdas nuestras reflexadas en ixe personache. Os nuestros impulsos y instintos mas primarios tamién fan parte d'Escobar. Ye mas "como nusatras".

Mesmo quan as motivacions son altruistas u moralment acceptables por a sociedat, os metodos emplegaus trescuzan todas as mugas eticas chustificando os medios pa la fin. Eixemplos claros podrían estar o Coronel Carrillo de Narcos u Jack Bauer de 24. Totz dos torturadors y asesinos por un teorico bien social, y aplaudius por muitas d'as espectadoras.

Tot isto me planteya qualques problemas. Ye bien, y soi o primer que l'encanta, que bi haiga personaches reals, que as suyas historias se recuenten, que podamos entender as motivacions d'os personaches ficticios pa fer lo que fan. Pero ¿son herois? ¿Son un eixemplo a seguir? ¿A manera que se cuenta a historia ye l'adequada? Ye normal empatizar con o pobre Heisenberg, de Breaking Bad, pero cal remerar que a la fin muerte en a mierda, y que a metat d'as cosas que fa son por puro egoismo y tienen consequencias fatals.

¿Ye o problema en a historia, u en os personaches? Cuento que no. O problema talment siga en que somos muit feitas a que o protagonista siga "o bueno". Empatizamos a escape con ella u ell. A suya verdat, ye "a verdat". A suya causa ye a nuestra. S'ha cambiau a manera de recontar historias, pero no a manera que las percibimos y interpretamos.

Una anecdota. De chovenón, bi habió dos cancions que causoron bell malentendiu entre a chent que compartiba vida con yo. Una yera "Balas blancas", de Barricada, que un conoixiu interpretó literalment. L'atra "Nos vimos en Berlín", de S.A., que atro conoixiu se quedó nomás con lo de "Judío cabrón" y creyó que yeran antisemitas. As dos cancions prebaban de transmitir precisament lo contrario. As dos son criticas contra o racismo y a limpieza etnica de l'estau d'Israel. Si antimás las contextualizas en os discos respectivos, y en a discografía, tanto de Barricada como de S.A. no i culle garra dubda. Manimenos, istas dos personas se quedoron con l'estribillo, con a lectura superficial, y no entendioron lo que se i deciba.

Me pienso que hue ye pasando una mica ixo. A mayoria d'a chent consume a ficción sin mica esprito critico. Se queda en o hooliganismo de emparar a lo prota y odiar a lo suyo antagonista y no piensa en lo que ye pasando en a historia. No sabe abstraer-se y pensar en a dureza d'as accions que i pasan y en as conseqüencias que tienen. U talment, a qui recuenta a historia, no li intresa recontar-lo, que tamién ye criticable.

Muitos herois d'agora "van a lo que van". No se miran que por o suyo propio intrés. L'altruísmo ye un desconoixiu. Fan lo que calga a qui calga pa aconseguir os suyos obchectivos. A suya sinceridat esdeviene crueldat, quan no son uns mentirosos compulsivos. Parte d'as suyas accions son moralment condenables en practicament todas as culturas humanas. Con ixos vimbres an que mirar-nos hemos de fer una sociedat que de vez que lis admira, condene ixas accions.

Siga an que siga lo problema, que ni lo sé, ni ye l'obchectivo d'iste post trobar-lo, me pienso que ya prencipia a sobrar antiherois y personaches realistas. Trobo a faltar l'heroi "bueno de tot". Ixe sin defectos, que t'amuestra o camin d'a virtut. Que nunca no arribarás a estar, pero que represienta tot lo que te faría goyo d'estar. Talment calga una mica mas ixa mena de personaches en una sociedat an que l'egoismo, l'agresividat u a crueldat son cada vegada mas comprendidas y an que as personas "virtuosas" son vistas como repelents, detestables, hipocritas u sospeitosas.

Me faria goyo de poder continar tenendo idolos que no tiengan os pietz de bardo. Eixemplos an que alufrar os mios ideyals. Conscient de que ye inalcanzable, pero seguro de saber qual ye o destino. Me faría goyo deixar de cabo ta quan ixe cinismo moderno y tornar t'os X-Men que no mataban, que se miraban de salvar a os inocents, que treballaban de conchunta y que creyeban en una sociedat en paz y libertat pa todas y totz. Sé que ye una ilusión, que ixo no existe, pero la ficción ye precisament pa ixo, ¿no?. Pa soniar con atras realidatz.