jueves, 10 de agosto de 2017

Patri y la literatura: Historias d'un insti publico V

De lo paso mio por Coras no recuerdo que una profesora buena. La que me dio en 1º de EGB, que siempre me refirmaba en la mia afición a la lectura, y que me recomendaba libros. La resta yera una clica de barrenaus de mayor u menor grau, quan no dreitament psicopatas. En tot caso, chent que no mereixeba tener a cargo suyo ni un periquito.

En l'instituto no tot yera ideyal. Recuerdo un profesor sustituto de Manuals (u como se decise) que levaba penchando d'o cinto un clavero con l'alica franquista, y que yera un carnuz. Bien se vale que duró poco la sustitución. Atra profe, de luenga pa forro de bota, s'encerrinaba en pronunciar como /x/ la J de una alumna que se deciba Judith, y ixe yera o suyo nivel de criterio lingüistico y de respeto a las personas. De profesors malos, u simplament mediocres, en tenié más d'un y de dos.

Pero en l'instituto tenié beluna d'as millors profesoras d'a mia vida. Prou que la comparanza con Corazonistas ye absurda, ya que me niego a reconoixer a ixo como profesorau.

A una d'as profesoras que me marcó le clamaremos Patri, por si no le fa goyo que en charre, d'ella. Yera profesora de Luenga y literatura, y tenié la suerte de que me dio clase un anyo, y la desgracia de que no me'n dase mas. Yera d'ixas personas apasionadas d'a literatura y de l'amostranza, y que antimás sabeba transmitir ixa pasión. Personalment, Luenga y literatura yera una asignatura que gosaba de aprebar porque me resultaba prou facil, pero de vez me feba muitisma galbana d'estudiar-la. Manimenos, ella conseguiba que ni me calese estudiar, porque me bebeba cadauna d'as suyas parolas en clase.

Una d'as alcordanzas que foi d'a clase suya estió lo romanticismo. Quan nos lo explicó yo yera adolescent. Un bullir d'hormonas, sentimientos, amors y desamors. Ixos momentos d'a vida tuya an que tot pareixe gloria u trachedia. Siempre exacherando cada acontecimiento d'o diya, como si estase clau pa la resta d'o tuyo esdevenider. Lo romanticismo, allora, yera un movimiento cultural que me atrayeba prou. Amor, libertat, rebeldía, ... lo teneba tot pa una persona de 16-17 anyos. Pa chupir-nos de l'esprito romanticista, un diya proposó de fer una clase diferent. Iba a meter-nos mosica d'autors romanticos, u cancions basadas en os suyos textos. Tamién ibanos a leyer belun d'ixos textos y charrar-ne. Y pa que nos gronxiasenos, no iba a pasar lista. No iba a existir las normas "normals" de clase.

Como ya he comentau yo feba fuina bien a soben, asinas que a ideya de fer-ne sin que me contase, yera un lamín. Manimenos decidí d'ir-ie, porque lo tema m'apasionaba. Ixo sí, chupiu d'aquell esprito facié un ratet tarde. Indo ta clase, la esmachinaba con toda la chent en plan hippie, leyendo y charrando y Patri explicando-nos de que iban todas aquellas metaforas que no entendebanos. Quan i plegué me trobé un panorama prou diferent. Sí, Patri heba conectau lo radiocasette, y leyeba en a loseta un poema de bell autor. Pero l'alumnalla teneba la mesma actitut que en una clase normal. Totz posaus en as suyas mesas, con los cuadernos ubiertos y lo boli presto pa prener nota. Por un momento pensé que m'heba entivocau, asinas que le pregunté a Patri:

- Perdona Patri, lo d'o romanticismo yera hue, no?
- Sí, sí, ye hue.
- Alavez, me puedo posar aqui debant por tierra pa ascuitar bien la mosica, no? -en clase gosaba de posar-me bien dezaga -
- Como quieras, prou que sí

Deixé la mochila en a mia silla y me posé por tierra a o canto d'o radiocasette.No entendeba porque les daban un troz de libertat y no lo aprofitaban. La mayoría, encara que podeban crebar las reglas de cada diya, decidiban voluntariament continar con la rutina y sin salir-se-ne ni un sacre d'as recholas d'arredol d'a mesa suya. Nomás lo mio companyer de mesa, un buen amigo que tamién lo yera flipando con lo romanticismo, m'acompanyó. A la fin d'a clase yeranos cinco u seis en ixa actitut. Ya podetz viyer que, como buen adolescent, yera un poquet "notas".

La clase estió marabellosa. Poesía, mosica y, sobre tot, un oasis en ixe desierto que gosa d'estar l'amostranza d'a literatura. An que no febanos que aprender una parrafiquera de datos de nombres d'autors, corrients, anyos y obras, Patri nos amostraba de qué iba cadauna d'ixas corrients, qué nos trobaríanos en ubrir un libro suyo, por qué se valeba la pena leyer-los (u no pas), ...

Atro diya nos fació un examen "sin compromís". No contaba pa evaluación, ni ibanos a tener una nota numerica. Consistiba en comentar tres textos. Un d'ells yera la Canción del pirata de Espronceda. Lo de comentar textos yera qualcosa que me feba a saber que goyo, porque no me caleba estudiar-lo y gosaba de fer-lo prou bien. En iste caso m'escribié bell fuello, charrando sobre a libertat d'o pirata, l'ausencia d'autoridat, y cosas asinas, que mereixió una anotación de Patri en un marguin que deciba "Juventud rebelde". M'encantó recibir aquello como nota d'un examen.

Ixas yeran clases especials, pero las mas cutianas tamién yeran buenas. Aquell anyo me animó a leyer muitas cosas que ni hese pensau de fer-lo y me sacó bell prechuicio sobre a literatura clasica. Patri prebaba d'amostrar-te a leyer de verdat. No nomas la tecnica de chuntar letras que ye lo que aprendemos de chiquetas, sino entender lo que se ye leyendo. Aturar-te un momento a pensar-ie, a analizar, mesmo a parar cuenta de cómo ye escrito y d'a polideza que guardan ixas parolas. Leyer-leyer, no pas entender simbolos. Y ixo ye muit gran. Una d'as mas grans feblezas d'o sistema educativo ye que bi ha una graniza proporción de personas, mesmo con estudios superiors, incapables de entender textos relativament sencillos.

Como toda la familia mia, trigué sciencias quan lo sistema educativo decidió que heba de fer-lo. Los famosos itinerarios, que tantas pleitinas provocan en cada reforma educativa ya existiban. Lo feito de tirar por sciencias suposaba que teneba una serie de asignaturas obligatorias y un surtiu d'optativas. Entre toda la ufierta cheneral d'asignaturas yera la de "Literatura universal". Atras me feban mas goyo a priori, pero sabeba que ixa asignatura la iba a dar Patri. M'hese encantau de poder trigar-la, pero no yera en lo "catalogo" d'as asignaturas pa la chent de sciencias. Como teneba bella amiga de letras que sí que iba t'a clase suya iba informando-me-ne. Yo me feba cruces, y contino fendo-me-ne, de qué clase de incompatibilidat viyeba lo sistema en que podese cursar de vez Física y Literatura Universal.

Un diya me castigoron por fer que me se yo en clase. Me facioron fuera y me ninvioron t'a biblioteca de l'instituto lo que quedaba de clase, que yera quasi toda. Veteme que por astí andaba Patri, con lo suyo alumnau, fendo clase, porque de cabo ta quan le feba goyo de baixar-se-ne t'a biblioteca a fer-la. Probablement estié un d'os alumnos que mas caso le fació ixe diya, por aquello de que si no i vas obligau, tot dentra millor. Ixa estió la sola clase de Patri que tenié la suerte de recibir aquell anyo.

Guardo muit buena alcordanza de muitas profes d'aquellas envueltas, pero sin dubda ye de Patri de qui millor en tiengo. Si bi'n hese mas como ella, probablement tendríanos una sociedat muitismo millor. Y si lo sistema educativo emparase maneras de funcionar como las suyas talment bi'n habría mas.

martes, 8 de agosto de 2017

En leyendo... Guerra mundial Z

En fendo anyos, me voi tornando mas cinico. Contino luitando, prou que sí, por si m'entivoco. Pero por cada diya confio menos en a humanidat y los feitos no fan que confirmar-me-lo. Guerra mundial Z ye un recontamiento como tantos atros d'apocalipticos: pleno d'ixe cinismo y d'ixa falta de fe en a humanidat. Nos dibuixa capables de fer qualsiquier barbaridat en un scenario limite. O libro tien muito mas suco d'o que se gosa d'asperar d'una novela de zombis. Quan leyeba la charrada que traduzco contino no podeba que fer-me a rialleta con ixa certeza de que lo mundo funciona asinas de malament y de que no tenemos buen apanyo. Insisto, aspero estar entivocau, y que bell diya haiga de minchar-me as mias parolas.


- Asinas que, en realidat, nunca no preboron d'apanyar o problema.

- Au vienga ¿se puet solucionar a pobreza? ¿Se puet solucionar lo crimen? ¿Se pueden solucionar las malotías, l'ature, la guerra, u qualsiquier atro brians social? Prou que no. Nomás puetz prebar de que sigan prou maniables ta que la chent contine con la suya vida. No ye cinismo, ye madurez; no se puet aturar la plevida, nomas fer un tellau y asperar que no tienga gotilleras u, lo menos, que no esgotarceye sobre la chent que va a votar-te.

- ¿Que quier decir ixo?

- Vienga...

- En serio, que quier decir?

- Vale, como quiera, imos t'o puto Barrio Sesamo. Quier decir que, en politica te centras en las necesidatz de la tuya base de poder. Si los mantiens contentos, ells te mantienen en o tuyo estudiet.

- ¿Por ixo se desatendió bell brot?

- Dios, fa que suene como si los ixuplidasenos.

- ¿Demandoron las autoridatz locals mas aduya d'o gubierno federal?

- ¿Y quan no nos han demandau os polis mas hombres, mas equipos, mas horas d'entrenamiento u mas "fundos ta programas d'alcance social"? Ixos pocaschichas son tant malos como los soldaus, tot lo diya queixando-se de que no tienen lo que les cal, pero ¿acaso ells concaran o risgo de perder a suya faina si puyan os impuestos? ¿Han d'explicar-le a Peter, lo d'a casa adosada, por qué l'esculan ta aduyar a Paul, lo d'o ghetto?

- ¿No les preocupaba que se fese publico?

- ¿Y qui iba a fer-lo?

- La prensa, los medios,...

- ¿Los medios? Se refiere a ixos retes mediaticos que yeran propiedat de belunas d'as interpresas mas gran d'o mundo, companyías que s'habrían afundiu si atra ola de panico trucase a bolsa? ¿Ixos medios?

- ¿Asinas que, en realidat, nunca no plegoron a instigar un encubrimiento?

- No caleba; ells lo encubrioron soletz. Teneban tanto u mas a perder como nusatros y, antimás, ya heban conseguiu las suyas historias l'anyo d'antes, quan os primers casos apareixioron en Estaus Unius. Dimpués plegó l'hibierno, Phalanx salió a la venda y os casos baixoron. Talment "fesen venir a plego" a bell periodista mas choven, diposau a fer la suya propia cruzada pero, en realidat, tot lo tema yera muit visto dimpués de bell mes. Heba esdeveniu qualcosa maniable, a chent yera aprendendo a vivir con ello y ya angluciaba qualcosa diferent; as grans noticias suposan un gran negocio, y siempre cal tener qualcosa nueva si miras l'exito.

- Manimenos, bi heba medios de comunicación independients.

- Sí, prou que sí, y ¿sabe qui les fa ficancia? Los manfloritas saputaces universitarios; y ¿sabe qui les fa caso a ixos? ¡Dengún! ¿Qui va a escuitar a una minoria maguinal d'a televisión y la radio publicas que no ye en contacto con lo publico mayoritario? Contra mas avisaban aquells saputaces elitistas de que los muertos caminaban, mas pasaban d'ells los estadounidenses de verdat.

viernes, 4 de agosto de 2017

Historia de una foto de Boltanya


Hebanos puyau las costeras d'as carreras boltanyesas y levabanos tot lo diya dando mal. Belún dició de pillar bieras ta totz en un d'os bars d'a plaza. La resta nos vam posar en unas escaleras ta descansar-nos. Pero ni los chilos reivindicativos, ni lo ondiar d'as quatribarradas se preneban ixe descanso. Entre que plegaba lo refresco y no, un periodista debió de pasar por asti y nos va tirar una foto que va apareixer a l'atro diya en la portalada d'o Heraldo de Huesca. Fa bell diya la va trobar en casa mai y me van venir t'o tozuelo recuerdos a xarramata.

En l'adolescencia y la primer choventut vivimos las cosas con firme intensidat. Los mios anyos d'instituto y FP van estar an que va prencipiar de verdat a tener una militancia politica, cultural y social. En 1999, l'anyo d'a foto, yera empecipiando a estudiar aragonés. Heba iu ta bell acto contra los pantanos y ya alternaba con la chent d'a cucha aragonesista en fiestas y locals. Pero probablement lo que va vivir en ixa chornada va estar un gran empentón ta decidir-me a tener un compromís mayor con muitas luitas.

L'uno de mayo de 1999, se va convocar en Boltanya una chornada "Por a Dignidat d'a Montanya". Se feban actos arrienda y s'acababa con un concierto con Labordeta, La Ronda de Boltaña, La Orquestina del Fabirol y Ixo Rai. La chornada va estar historica, acorando-se las entradas ta un concierto que beluns van haber de sentir dende difuera.

Me va enterar d'a convocatoria por un panfleto en un bar, que ye como s'enteraba la chent d'as cosas en la era pre-internet. Conoixeba a La Ronda de Boltaña dende feba relativament poco tiempo y me flipaba tot lo mundo que m'amostraban en las suyas cancions. La mia parella compartiba ixe gusto mosical, las reivindicacions, y tamién l'encantaba lo Pirineu. Asinas que yera un planazo lo que tenebanos debant.

I vam puyar, nos vam instalar en lo camping y vam marchar de borina. La mia parella yera muit amiga de una moza de Chobenalla. Por la mia parte, encara no teneba confianza con la chent d'a cucha aragonesista, pero nos conoixebanos de trobar-nos en las manis y, sobre tot, en los bars y locals como La Espelunga. De camin, nos vam chuntar con ells. Yeran un poquet mayors que no yo, y pareixeba que conoixesen lo lugar millor que casa suya. Vam ir ta un bar a fer uns hordios, y van prencipiar os canticos:

Entre la Plaza d'Espanya y la Plaza d'Aragón, s'encuentra la Independencia, que las separa a las dos!!! Ai, taaaaa chun tararachun ai ta chun tarara....

... y tornaban

Entre la Reina Sofía y Felipe de Borbón, estamos hasta los huevos de tanto Rey español!!!
Ai, taaaaa chun tararachun ai ta chun tarara....

Y asinas firme rato. Dimpués, S'ha feito de nueit, Baixando t'a escuela, Más magra, Aqueras montanyas, .... totz los greatests hits d'alavez.

Entre biera y biera, charrabanos de l'aragonés, d'as montanyas, d'a Chunta, de la independencia, .... u somardeabanos con belun.

Tocabanos quasi a sinyal por persona. Y a bota de vin. La mia quatribarrada, la portaba en la mochila porque no teneba palo encara. De bota, ni en teneba. Ixo sí, lo vin me rulaba terne que terne. En puyando la costera t'o lugar, vam aturar en l'auto d'un d'os chobenallos, no sabeba guaire bien por qué. Va ubrir lo maletero y va descubrir un amiro de botellas de vin ta ir replenando as botas, que ya iban todas bien esmediadas. Me feba cruces con lo grau d'autochestión d'aquella chent. Profesionals de la luita y la borina. ¡Y yo que me pensaba que me lo montaba bien!

Vam continar asinas tot lo diya. De nueitz, lo concierto yera a rebutir. La reivindicación yera present por tot. Por cada canción se coreaban lemas contra los pantanos y por la dignidat de la montanya. Y tamién os Aragón ye nación y mesmo bell In-Inde-Independencia. Pegallos en toda la nuestra ropa, quatribarradas a bando y muita, muita emoción. Las letras de Labordeta, La Ronda, Ixo Rai y La Orquestina nos daban alas ta soniar con un Aragón diferent, renaixiu, conscient de si mesmo, y argüelloso, que se concaraba con un modelo colonial que nos viyeba como fuent de recursos, y con una capital que yera complice d'ixe modelo.

No guaire tiempo dimpués, va prencipiar a militar en Chobenalla Aragonesista, va rematar los cursos d'aragonés y va fer-me socio de Nogara. No va estar ista, lochicament, a sola experiencia que me va levar a fer-lo. Pero aquella chornada, tot l'esprito que se i alentaba, y todas las movilizacions que van plegar dimpués van estar claus en la conformación d'a mia experiencia politica y d'as ideyas que hue tiengo.

Muitos anyos dimpués, fa bella semana, va tornar ta Boltanya por las chornadas que se van fer-ie ta celebrar os 25 anyos de La Ronda. En plegar t'a plaza d'alto, va viyer aquellas escaleras y va fer memoria d'aquell diya. Toda aquella ilusión, tot ixe mundo que se ubriba debant de los mios uellos, contrastaban con la cansera de seguir luitando por lo mesmo 18 anyos dimpués, de no haber conseguiu cambiar tot lo que querebanos. D'ilusión ya no bi'n ha tanta, ye cierto. Pero veigo a la chent que agora fa vintitantos y, tot y que actualizau a totz os cambios que bi ha habiu, las ganas de luitar y boriniar son las mesmas.

Ixa ye la parte mas emocional. En la parte historica y politica, aquellos yeran os primers pasos de tot un movimiento por una nueva cultura de l'augua y por la dignidat d'un territorio que viyeba como las metropolis aragonesa y espanyola no se'n alcordaban que ta explotar-lo. L'archivo documental d'a web Yesano ye un sobrebuen fundo ta prencipiar a conoixer ixas luitas en aquellas envueltas. En ixos diyas protestabanos principalmente contra os pantanos de Santaliestra, Chanovas, Biscarrués y lo recreiximiento de Yesa. En istos anyos, bella cosa s'ha conseguiu, pero a pur d'una fayenada que no habría de caler en un mundo que metese a las personas por debant d'a especulación. Como siempre, aprendamos d'o pasau ta estar mas eficients en las luitas actuals y futuras.



P.D.: En repasar bell dato ta escribir isto, m'he trobau con iste video, y m'han veniu un ciento memorias t'o tozuelo, asinas que la quinta mia, cuento que lo mesmo tos pasará....





miércoles, 2 de agosto de 2017

Sociolingüistica, grafias, y Moncayo en aragonés. Tierra de barrenaus radio 3x11

Que l'aragonés ye bien vivo lo contrimuestran muitas cosas. No son evidents, ni salen en las noticias terne que terne. Pero buena cosa de activistas treballamos por cada diya por fer reviscolar-se ista luenga nuestra tant morediza.

En Tierra de barrenaus siempre he prebau de no dar guaire mal con l'aragonés. La ideya d'o blog ye fer servir l'aragonés pa charrar d'as cosas que m'agane. Manimenos, ye quasi imposible no fer de cabo ta quan un programa con toda las cosas que pasan arredol d'a luenga. Sobre tot, si vusatras, quiestas lectoras y ascuitadoras, me lo demandatz. Asinas que aqui queda un programazo que en ye gracias a los quatro convidaus de luxo que he teniu.

Prencipio con una entrevista a Chabier Gimeno, que fa parte d'o Seminario Aragonés de Sociolingüistica. Ye ista una iniciativa que leva ya bell anyo funcionando y que ye fendo una fayena a saber que intresant, replegando datos importantismos pa tener en cuenta a la hora de fer politicas arredol d'as nuestras luengas, y fendo uns analisis que ya caleba. Lo suyo treballo podetz conoixer-lo en iste programa y leyer-lo en la suya web.

En la segunda parte, la mas larga, entrevisto a Juan Pablo Martínez y Chuse Raul Usón, representants respectivament d'a EFA y a SLA, qui charroron sobre la propuesta grafica d'a DGPL y lo comunicau que facioron istas dos entidatz refusando-la.

Pa rematar lo programa, Dabi Lahiguera charra d'o suyo libro recient publicau "A fabla de Moncayo. Estudio comparativo con a lengua aragonesa". Transiberiano edicions contina asinas con a suya linia editorial Selgua que empecipió con o diccionario de Fernando Romanos. Iste nuevo libro, antimás de replegar lo vocabulario d'a zona de Moncayo, charra de muitos aspectos historicos de l'aragonés. Una nueva obra imprescindible pa las amants d'a nuestra luenga.

Entre entrevista y entrevista, tot temazos, prou que sí. Y de fundo, sentiretz a Vegetal Jam que tienen nuevo disco publicau, y que si no lo tenetz, ya tardatz a fer-tos con ell.






miércoles, 26 de julio de 2017

Comulgar con menu cinco estrelas

Por muit feito que i siga, a hipocresía cristiana nunca no deixa de sorprender-me. A redota y retirada d'o laicismo que somos vivindo en zagueras, con una extensión d'a hechemonia d'una relichiosidat de baixa intensidat, les ha feito perder, mesmo mas, la poca vergüenya que teneban. Nomas asinas s'entiende la intensidat y exito d'as campanyas en defensa d'a subvencions d'os colechios privaus, u d'o furto d'edificios y propiedatz inmobiliarias. 

En un nivel muito mas baixo ye lo reconoiximiento implicito d'a necesidat de sobornar y fer chantache a la catrinalla ta que pasen por l'aro suyo y vaigan, china chana, interiorizando os ritos y creyencias suyos. La zaguera que me clamó l'atención ye una falca radiofonica d'o restaurant Macanaz. En ella, se i siente a una nina que no quereba fer a  primera comunión, pero que li han feito venir a plego. Quan su pai le'n pregunta, a nina insinua que lo ha feito porque se suposa que la celebrarán en o restaurant que se i anuncia.

O feito de que a garra nino se le ocurriría motu proprio, fer a primer comunión  sino bi hese una contrapartida en forma de presents y fiesta, ye acceptau comunment. Pero fer-lo tant explicito me pareixe ya una "sacada de chorra" d'o cristianamen.

A quasi totz los ritos relichiosos les trobo bell sentiu. Lo baltismo ye a bienvenida t'o mundo; lo matrimonio, una celebración d'un compromis de vida en parella; los funerals, la necesaria despedida d'un ser queriu, .... Pero no pas la comunión. No se fa a garra edat critica, ni bi ha equivalencia con fenomenos naturals, como lo naiximiento u la muerte. Ye un rito 100% relichioso. Pero antimás ye inexplicable de tot ta un crio. Tamién ta un adulto d'o sieglo XXI, pero ixo ye atra historia. Cal recordar que en a comunión, - en la primera y en todas las demás -  as cristianas minchan una hostia y beben vin que, literalment, se transforma en a sangre y carne d'o suyo dios. Yo, de verdat, no sé a qui se le ocurriban istas cosas y como se popularizoron tanto.

Tot y que normalizau socialment, ta un zagalet de 9-10 anyos no tien mica sentiu sino bi ha una celebración dezaga. L'acto d'a primer comunión, per sé, no atraye a dengún. D'asti que por cada diya as celebracions sigan mas grans y pareixcan mini-vodas. Cal aumentar a presión sobre as fillas d'ateas u laicas que deciden que as suyas fillas decidirán quan puedan entender lo que a relichión ye y represienta.

No soi descubrindo garra cosa que no siga vox populi, y que mesmo os cristians reconoixen. Pero con tot y con ixo, contina sorprendendo-me una falca en a radio que reconoixca d'una manera tant caboliosa o chantache a la catrinalla ta fer-les participar en actos relichiosos. Ixo, y que as cristianas mas furas no s'encarranyen por ixe anuncio.

viernes, 21 de julio de 2017

Como viyé.... "Memorias de un pene selecto"

Qué decir de la persona que deixó sin sangre en a pocha a tot lo publico de Ficomic con o suyo trache de Dazzlord? D'aquell que cocina, con argüello y televisau, un mezclallo de atún, mayonesa y pan rallau y se lo mincha con un debantal que mete que "si no pareixe vomecada, no ye minchanga ni cosa"? Pues que si fa un tebeo una novela grafica, cal mercar-la, prou que sí!

"Memorias de un pene selecto", de Carlos Melgares, estió publicau por Editorial Cornoque a finals de l'anyo pasau y fue dreito t'a muntonera de tebeos que teneba pa leyer. A la fin en istas vacanzas, cayó en un maitin en a placheta de Pals. A novela grafica basicament cuenta la vida de l'autor dende a concepción, prencipiando como un espermatozoide, dica agora.

Melgares y yo somos quasi quintos, asinas que viviemos y creixiemos en un mesmo entorno. Ixo ya sería prou ta sentir-me identificau. Pero ye que antimás, a o pobron, tamién le tocó d'ir ta un colechio no mixto de mosens. Marianistas, concretament. Asinas que por cada historieta que leyeba, feba alcordanza de beluna d'as mias "Historias d'un cole de mosens". Qualsiquier que haiga sufriu un cole de mosens, i trobará ixe ambient hostil que se i respiraba.

Dimpués se va fendo gran y tamién recuenta las primers zorreras y l'adolescencia. Con totz ixos problemas, dubdas y inseguridatz que totz teniemos. Tot isto, ilustrau con unos monyaquetz bien pinchos y recontau con firme gracieta. Lo tebeo ye pleno de ternura, y d'un recosiro que no queda mica pasteler. Se leye en un peten y ye d'ixas obras que te fan pasar un buen rato, que ye lo menos que cal demandar-le a un tebeo. Barrunto, antimás, que no será d'ixos tebeos que leigo una vegada y se quedan en o repalmar pillando polvo. Regular que en una segunda y tercer lectura, le saco mas treslada.

Asinas que, si no lo tenetz encara, ya podetz pillar diez euretz, que no van ta garra cabo, y pillar-tos-lo antes que no s'acore.



martes, 18 de julio de 2017

Un lupo charrando aragonés

La plegada d'un lupo ta Monegros fa reviscolar lo debat arredol d'a chestion d'a presencia de lupos en Aragón. Ya dende feba tiempo se barrunta que ista situación se daría. Los lupos ibericos acucutaban en la muga castellana y cal parar cuenta de que somos charrando de una especie que se puet fer tranquilament 100 kilometros cada diya ta trobar caza. En lo costau catalán, lo lupo italiano, que pareixe que iste monegrino en ye, ye bien cerqueta d'as nuestras mugas.

Tot isto, lo debat que ha trayiu, las amigas que me'n han charrau y lo que s'ha sentiu por los medios, me torna a levar ta las exacheracions, ta lo debat grueso y sin datos, que se da tant a soben. Quasi siempre, de feito.

Los ganaders que lo lupo les ha muerto bella uella, y muitas que les refirman, argumentan que lo lupo "no ye qualcosa d'os Monegros". Nian d'Aragón, he sentiu. Cuento que importaba igual a on hese apareixiu iste visitant, que en qualsiquier cantón de lo país, bi hese habiu voces que churaban y perchuraban que nunca de la historia bi heba habiu lupo en ixa zona.

Manimenos los datos scientificos, tant ixuplidaus como siempre, nos indican lo contrario. Lo lupo estió bien present en toda la peninsula dica lo sieglo XIX. Empecipiando lo XX, encara en quedaba en quasi tot Aragón, a pesar d'a presión d'os humanos. No ye dica los anyos sisanta que disapareixe d'Aragón, y no de tot, ya que de cabo ta quan belun trescruza as mugas castellanas u, como en iste caso, las catalanas.

Asinas que no. Por muito que qui diga la frase no haiga visto nunca lupos en Aragón, ni su pai, ni yayo, ni sisquiera o lolo d'o lolo más viello de lo lugar chure haber visto nunca lupos en Aragón, no en fa tanto que lo lupo va disapareixer d'o país. De relatos y historias, todas en conoixemos. Como la que sale en Es recuerdos de paye, de Óscar Lerín, qui recuenta:


Antes en la Comuna i heba lobos. Un d'estes zaguers lobos viviba en un monte y le deciban el rei d'el Falcé (que ye como se diz ixe monte). Es lobos mataban las uellas, per ixo es pastors teneban mostins con collar de punchos ta defender-los.
Ta privar de que el rei d'el Falcé continase matando ganau le pretón fuego al monte. Ya no se sabió cosa más d'este.
Sobre es onsos, la verdá que no sé cosa. Me pienso que la Comuna yera más tierra de lobos que d'onsos, u al menos no he sentiu parlar de que en i hese.

Los lupos ya no son en Aragón. Habe anyos ya que no. Pero no marchoron fa tanto, por muito que a sapiencia popular, ixa que tant a soben tant poco sabe, diga.

L'aragonés tamién sufre d'istos mals. "Aqui nunca no s'ha charrau atra cosa que castellano". ¿Quantas veces nos hemos habiu de sentir ixa falacia?. En Zaragoza ye verdat que desapareixió luego, pero lo rastro pervivió dica hue. En estar la metropoli, antimás, acullió a mils de migrants d'as zonas aragonesofonas, por lo que l'aragonés nunca no deixó de sentir-se en la nuestra ciudat. Antimás, dende la plegada de lo movimiento en desfensa de l'aragonés, atros mils de personas lo han iu aprendendo, y muitas lo femos servir de cutio en a nuestra vida.

En zonas muito mas enta lo sur d'as que se tienen por "tradicionals", l'aragonés se perdió fa bella decada. Lo sieglo XX, que en envista historica ye "antes d'ahiere", prencipió con un país an que l'aragonés yera luenga vehicular de una parte importantisma, como contrimuestran totz os testimonios, investigacions y los repuis en o castellano que se i charra hue.

Mesmo en lugars an que hue encara viven aragonesofablants, bi ha qui niega que se i charre. "Ixo, en lo lugar vecin, aqui no". Tot ixo obedeixe a ixa percepción de "lo malo" u "lo que no fa honra" que tenemos. Charremos de lo lupo u de l'aragonés. En l'atro canto, lo bueno y deseyable, "s'ha feito toda la vida". Las fiestas de Lo Pilar pareixen estar milenarias, quan s'inventoron o sieglo pasau. Y mesmo l'azute pareixe que haiga conseguiu que se navegue un ríu que fa milenios que viye a los humanos esnavesar las auguas suyas.

L'aragonés, igual como lo lupo, desapareixió circumstancialment de muitos puestos. Bi ha qui creyemos que totz dos han de recuperar territorio, porque creyemos que a diversidat biolochica, lingüistica y cultural son riquezas, y alportan muito mas que os problemas que puedan creyar. Prou que cal saber chestionar-lo, porque sino, creyaremos un refús que no beneficiará a garra d'as partes.

No podemos, ni debemos, basar los argumentos nomas en la experiencia propia. Ye la definición de ixo que en zagueras le decimos "cunyadismo". Pa tot debat cal datos, y no vivencias u anecdotas. En iste caso, los datos son contundents y evidents y Aragón ha pasau muito tiempo sentindo a los lupos charrar aragonés.

Por desgracia, un aragonés puet vivir tranquilament toda la suya vida sin sentir una charrada en a nuestra luenga. Igual como puet vivir sin viyer un lupo. Pero ixo no les fa desapareixer d'a nuestra historia ni d'a nuestra realidat por mas que beluna quiera.

Bella noticia sobre lo lupo de Monegros:

http://www.eldiario.es/aragon/sociedad/asentamiento-estable-Aragon-posibilidad-prepararnos_0_659685086.html

http://www.eldiario.es/aragon/elprismatico/lobo-llego-Monegros_6_654494563.html

Bell video sobre la historia de l'aragonés




lunes, 17 de julio de 2017

Historias d'a policia zaragozana. Tierra de barrenaus radio 3x10

De chiquet, a uno le cuentan tot ixo de que a policía ye ta protecher-nos d'os dolents personaches que s'amagan por cada uembra d'a ciudat. En a tele, apareixen heroicos luitadors por una sociedat que nunca no les agradeixe la suya fayena. Visitan os colechios ta amostrar a los ninos y ninas as suyas bondatz. Son lo mas pareixiu a los superherois que tien la vida real. Pero un dia creixes, y prencipias a conoixer-los. A sufrir a suya fachenda, a enterar-te d'os suyos negociaus, a sufrir os suyos trucazos, ... y como ye normal se te pasa. A realidat ye muito mas puerca que a tele.

Podríanos pensar en los de siempre. Os antidisturbios. A purria d'a purria. Ixos que s'adedican a protecher a los privilechiaus y abataniar a las que protestan. Ixos que un diya protechen as manifestacions d'os nazis, y a l'atro diya enristen contra manifestacions pacificas. Podrianos pensar tamién en la poli espanyola. Os que s'inventoron un "terrorismo anarquista" y amortan as camaras quan les toca "interrogar" a bell activista politico. U en as policias "autonomicas", que nomas son una version d'a espanyola, con un cambio d'uniforme. Todas ellas forman parte d'un sistema de represión que ye bien vistero.

Pero tamién a nivel local tenemos lo nuestro. A policia local, por a suya naturaleza, no habría de crear guaires problemas. As suya funcions teoricas son aluenyadas d'a represion. Pero ixo no significa que no faigan abusos de poder. Y si antimas, se fa una unidat de propio ta tractar asuntos que pertocarían a la poli espanyola, y lo imples de lo mas estalentau d'o cuerpo, pasan las cosas que pasan en ista ciudat con la UAPO, y que ya pasoron con atras prebatinas que se facioron.

En o programa repaso quantos casos d'abusos policials que hemos teniu en a nuestra ciudat, centrando-me en a UAPO, una unidat qüestionada dende o suyo naiximiento, y de tot innecesaria en una ciudat como Zaragoza. Tamién foi una mica de memoria d'a suya trachectoria, que la historia cal tener-la siempre present.

A plegada de Zaragoza en Común en o concello, prometendo en o programa electoral la suya disolución, fació que muitas nos fesenos alufras de que a la fin se correchise ixa error historica, que fa parte d'o legau Belloch. Manimenos, dos anyos dimpués, no pareixe que tiengan mica intención de fer-lo. No será precisament porque haiga baixau a suya conflictividat. A explicación que dan ye que cal reformar toda la policia, y bi soi d'alcuerdo, pero a disolución d'a UAPO ye precisament o millor punto ta empecipiar a fer-lo y deixar claros os criterios que moverán ixa reforma.

Gubernar en minoria no facilita las cosas, ye verdat. Menos, si o necesario aliau ye un PSOE hooligan de tot d'o cuerpo que ells mesmos creoron. Pero lo que por decreto se fa, por decreto se puet desfer. Asinas que la sociedat zaragozana habremos de continar demandando la disolución d'un cuerpo policial innecesario, problematico y que dengún no trobará a faltar.



Fuents y vinclos citaus en o programa:

Creación d'a UAPO (chulio 2006, El Periodico de Aragón)

UVE, el terror de la noche (Zaragoza rebelde)

Agresión d'a UAPO a un menor y resumen historico (mayo 2016, Arainfo)

Agresión d'a UAPO a un menor (mayo 2016, Eldiario.es)

Agresión d'a UAPO a tres chovens (abril 2012, Heraldo de Aragón)

Agresión en un concierto (febrero 2014, Arainfo)

Video d'a denuncia d'o concierto

Pinyoran dos personas en a ringlera d'un minchador social (Chinero 2017, Arainfo)

Pinyora de 400 € por posar-se en a cera

Debat en o Concello de Zaragoza (octubre 2016, Heraldo de Aragón)

Debat en Radio Zaragoza (SER) sobre a UAPO

Dreitos civils 15M


lunes, 26 de junio de 2017

Arya, la picaraza

La cultura faunistica que las urbanitas tenemos en istas latitutz fan que, por un regular, conoixcamos muito millor os comportamientos de animals exoticos y aluenyaus que no pas os propios. Todas hemos visto, u sondormiu, os crocodilos d'o Serengueti asperando a la molta a que pasase lo buei, u a los monetz de Madagascar, u a los cancros ferradura. Totz animals que sabemos distinguir perfectament y que forman parte d'a cultura popular.

Manimenos, por cada diya ye menos la chent que conoixe la parola picaraza, que sabe distinguir cinco aus d'as que viven en a ciudat, u dos peixes que no sigan lo sirulo. No digamos ya lo comportamiento mientras vive d'o tocin que nos minchamos con una biereta en o vermu d'o domingo. Precisament o comportamiento d'as picarazas ye una cosa que soi descubrindo en zagueras y que, a un megaurbanita como yo, me deixa bien enarcau.

Prencipió un diya en la faina mia. A oficina an que treballo da a un patio amplo rodiau de pisos. Un companyer m'avisó de que difuera bi heba show y como no bi heba guaire empandullo me'n salié. Astí, o vecindau se miraba curioso como una picaraza iba coixín - coixand fuyindo d'atras dos que le chilaban firme. A imachen en salir d'a oficina yera d'una picaraza en as tres pedretas, caminando por tierra, entre que as atras dos le grallaban dende una farola y un pueyo. A primer picaraza teneba feridas por tot. En lo cul, le faltaba la mayoría d'as plumas y tamién teneba calvas en a foyeta y en o tozuelo. En primeras no facié cosa. Pero dimpués me prencipió a remorder la conciencia.

Estié un rato consultando si podeba ocupar-se-ne bell servicio municipal. A la fin, valurando varias qüestions, decidié que a mia parella, que de muixons en sabe prou, y yo, nos ocupasenos d'o paixariquet. M'estié buena cosa de rato dica que la pillé chitando-le una chaqueta. A picaraza no podeba que esvolastriar poco mas de tres u quatro metros. La deixé en una caixa dica plegar d'a faina y la levé ta casa de meyodiyas.

Le faciemos unas curas, asesoraus por chent que sabeba lo que se feba. Le deixemos unas pizquetas y bien d'augua en dentro d'una caixa bien ampla que le apanyemos. A l'atro maitin, pareixeba tranquileta y mesmo heba minchau bell poco. Le metiemos nombre: Arya. Como lo personache de Chuego de tronos. A las pocas horas, la mia parella me gritó ta decir-me que heba escrabutau.

Tasament pasé con ella quince horas. Yera una picaraza que probablement la habría d'haber deixau morir sin fer-me-ne. Cuento que me pilló con a moral baixa. No yera o millor momento d'a mia vida tampoco. O peluchismo ye una malotía que m'afecta prou, encara que luite contra ella. Tot ixo chunto fació que me dase prou mal con aquello.

A imachen d'as picarazas que la heban picotiau dica provocar-le la muerte, m'encorreba. Se me quedó grabada a fuego. No sé si desfendeban lo niedo debant d'una invasora, u si les heba feito qualcosa u qual yera o motivo ta ixa quimera. As picarazas son d'os paixaros mas intelichents, y como ixe diya descubrié, tamien bien cruels.

Ixe comportamiento, que nunca no heba presenciau, creyeba que no tornaría a viyer-lo. Manimenos, en tasament una semana, lo he tornau a presenciar dos vegadas. En a primer, o trueno plegó antes que no l'eslampiu. Os grallius m'alertoron entre que leyeba baixo una ciresera. Dos arbols mas t'alla, quatro picarazas se tricolotiaban firme. Bueno, ta estar mas exactas, tres picarazas le foteban un sobo, limpio picotiar, a una quarta. Poquet a poquet, la iban aluenyando de l'aria que pareixe que protecheban. Por cada pizcotiau, se viyeba volar plumas. A la fin, a picaraza fuyió, cuento que bien ferida.

Pocos diyas dimpués tornaba ta casa por o carril bici que va arredol d'o Parque Tio Chorche. Quasi en plegando t'o puent de Sant Chaime, en una d'as chiquetas pinetas que i hai, viyé un paixaro por tierra. En acercar-me-ie, paré cuenta de que yera una picaraza, sin garra d'as plumas caudals y con o tozuelo feito un cristo. Aturé la bici y me'n baixé. En un petén prencipioron as menazas d'as atras picarazas. Puyé a uellada y las viyé mirando-se-me fito-fito. Un mozo que veniba dezaga de yo tamién se i aturó, y me dició que fese ficancia, porque yeran protechendo o niedo. A ell no se le fació mica raro ixe comportamiento, asinas que cuento que i sería feito. Ista vegada no la queríe prebar de salvar. A naturaleza ha de seguir os suyos camins, y son malas calendatas ta que nos faigamos cargo de dengun. 

No sé qué lectura farán d'istas cosas os hippies que idolatran a infinita bondat d'a naturaleza. Pero creigo que cal muita mas educación y divulgación d'o ecosistema que tenemos mas cerqueta. No ye normal que conoixcamos millor as rutas migratorias d'as ballenas azuls que os comportamientos familiars d'un ser que tantismo nos acompanya como ye la picaraza.

martes, 20 de junio de 2017

Fendo fuina. Historias d'un insti publico IV

Quan arribé en o Medina Albaida yera bien cagarrisclas. Nian se me pasaba por l'esmo a posibilidat de faltar a clase. En os mosens yera, dreitament, imposible, en os ueito anyos que me i heba fotiu. Pero arredol de yo, a moniquet, as mias amigas prencipioron a fer fuina.

Gosabanos fer servir "hacer pirola" u "picarse la clase", en un tiempo anterior a que se popularizase via televisiva lo de "hacer pellas", expresión que ya conoixié de bien adulto, y que hue pareixe haber entrau con firme rasmia en o vocabulario adolescent. ¡Qué viello me fan sonar istas cosas!

Tardé muito a fer fuina por primer vez. Como he dito, yera bien cagoso. Viviba a tasament tres minutos d'o instituto. Arredol d'o Medina Albaida bi has quantas carreras que son bien viellas: Coimbra, Andrés Gurpide y Concepción tienen vecinas que levan vivindo-ie mas de meyo sieglo. Ixe yera o caso d'a familia mia, asinas que nos conoixeban muit bien en toda la redolada. Teneba buenas razons ta que me fese cerina que me pillase tal u qual vecina. Y n'i heba de bien alparceras, ta forro de bota!

As mias amigas, que tampoco no yeran tant garrispas de primeras, tamién tardoron bell poquet. As más gosadas, u aquellas que les importaba bien poco lo de suspender, prencipioron a fer-ne. A la fin, mesmo yeran de mal viyer por clase. Belun, nian sabebanos si continaba matriculau. Ixe 3º d'ESO estió un segundo naiximiento ta yo. Muitas cosas cambioron aquell curso en o mio interior. Entre atras, que perdié lo miedo a muitas cosas.

Asinas que, quasi plegando la fin d'o curso, facié la mia primer pirola. A los mas chiquetz nos cusiraba firme lo bedel y as profesoras. Yera mas facil blincar la cleta que salir por a puerta. En aquellas envueltas, encara no feba l'altaria que fa agora. Creigo que la puyoron a finals d'os novanta.  Saliemos bellas quantas amigas. No tenebanos un destin. Yera fer fuina por o simple feito de fer-ne. Por contrimostrar que nusatras tamién podebanos. Que tamién tenebanos ixa valor. Que nos importaba igual faltar a una clase.Lo corazón m'esbotaba. Sabeba que mai y pai yeran treballando, pero lo vecinamen me podeba pillar.

Encara yeranos fendo-nos un fumarro en a ribera d'a Uerva, decidindo qué fer quan sonó la sirena d'o recreyo. "¿Qué yera ixo?" nos preguntabanos. No tocaba que chuflase la bocina. Acucutemos por a cantonada y dos autos de la policía local correban a toda vitesa ent'a puerta de l'instituto. "Hibo, si que se'n fan por nusatras!" dició beluna... T'a part d'alavez la ETA encara meteba petardos de cabo ta quan, y lo de fer simulacros lo tenebanos bien aprendiu. Tot pareixeba que ixo yera un aviso de bomba. Ta tiempo d'examens yera qualcosa cutiana. No sabebanos guaire bien qué fer. Probablement ya tenebanos a falta mesa. Pero d'atra man, yera claro que ixa hora no s'iba a fer clase, entre unas cosas y atras. Asinas que decidiemos de tornar ta l'instituto ta estar-nos con a resta de companyeras lo que quedaba de clase.

Tornemos a blincar la cleta mientres viyebanos como os cientos d'alumnas saliban d'as aulas. Beluna fació groma con que si de verdat bi heba una bomba, ibanos dreitas t'a muerte, estando as unicas que hesen puesto sobrevivir. Tenebanos poco talento, como en tienen todas as personas de 14 anyadas... Asinas que aquella primer pirola d'a mia vida, duró bien poco. Tasament 20 minutos.

A l'atro anyo, y dica que salié de l'instituto, en vendrían muitas mas. Salié esleixiu representant d'os estudiant en o Consello Escolar. Iba t'aquellas aburridismas reunions, prebando d'alportar-ie a envista d'as alumnas. Una d'as avantallas d'estar-ie yera que m'enteraba de quan ninviaban as faltas d'asistencia ta casa. Asinas que durant ixos diyas, a mia clica y yo, yeranos siempre a la tisva d'os buzons. Salibanos de clase y pretabanos a correr ta casa ta pillar as cartas antes que os pais y asinas, poder falsificar a suya firma. Tamién facié pacha con bell profesor que me iba avisando quan yera en momentos de fer tantas faltas que podeba perder a evaluación contina.

M'importaba prou poco perder a evaluación contina. Me tocaba la figa tot l'anyo y en os dos zaguers meses aprebaba o curso entero. Asinas yera (y soi) d'estalentau. Manimenos sí que m'importaba que gritasen a mis pais ta fer-les-ne saber. Recuerdo fer mas cuentas ta escusar ixa perdua d'a evaluación que en a clase de Mates. En l'alternativa a la relichión sisquiera apareixeba o primer diya de clase. En anglés, que iba sobradismo, ta aviento ya heba feito todas as faltas posibles. Y a resta d'asignaturas iba alternando seguntes m'aganase. A la fin d'o curso yera en a pocas de perder a evaluación contina en todas.

En bachillerato, de fer fuina, ya en faciemos un arte. Nos pleguemos a reservar totz un diya ta picar-nos-lo enterico. De maitins nos desayunemos en un bar d'o vico. Pillemos bell par de botellas de vin y bella potra ta minchar y marchemos t'o Parque Gran. Bi estiemos tot lo maitin fendo lo que se fa a ixas edatz: charrar de tot lo que nos preocupaba, festellar, zorriar y fumar bell poquet, redir-nos, conoixer-nos, descubrir os nuestros deseyos y intimidatz mas amagadas, ... Estió un diya bien pincho.

Quan yes adolescent tiens tot lo tiempo d'o mundo pero, con tot y con ixo, te'n falta. Yo no quereba que estar con las mias amigas y charrar. Y conoixer tot ixe mundo que s'ubriba patalero debant d'os mios uellos. Un mundo que yera mesmo mas amplo en venir d'un colechio an que me lo heban amagau de tot y m'heban amostrau nomas un chiquet y nacionalcatolico cantón. Aquellas pirolas radeban unas horas mas a o diya que se me feba tant curto y me deixoron buenizos momentos que siempre remeraré.

viernes, 9 de junio de 2017

As botelladas. Historias d'un insti publico III

Fa bell dia sintié a un zagal de bells vinte anyos decir "botellada". Ye una parola que, en a mia quinta, se feba servir a ormino. De feito, no en tenebanos garra atra pa ixe concepto. Quan a os medios de comunicación espanyols les dio por charrar d'ixe fenomeno, lo baltizoron como "botellón". Talment se decise asinas en Castiella u en Andalucía, pero regular que en Zaragoza no. Hue, ye una d'ixas parolas perdidas. A chent una mica mas choven que yo ya no la fa servir y muitas nian la han sentida. Yo feba pirola pa fer botellada y agora la chent fa pellas pa fer botellón. Ixo tamién ye perdua de patrimonio.

As botelladas no las inventó a cheneración que las popularizó en TV. Ni la mia. Una persona bien cercana, 13 anyos mayor que yo, me recontaba siempre como en feba ell, en os anyos 80, en a carrera Universidad. A botellada no ye atra cosa que chovens de pocas perras pasando un buen rato en a carrera. En lo que ixo esbarre pende d'o civismo d'as personas, no de l'alcohol. Un tocin ye un tocín, con una biera y con cinquanta.

Como tantas atras personas, a mia iniciación alcoholica me plegó en l'instituto. A diferencia d'atros, a biera me encantó dende o dia que la tasté. Tamién tastaba en aquellas envueltas tinticola, Dracula, 43 con pinya, ... totz ixos breballos ultradulces, que zorriaba con anglucia, prencipiando un camin que me trayería bella alegría y no pocos problemas.

O cuerpo humano se fa a escape a l'alcohol y cada vegada nos ne caleba más pa enzorriar-nos. No tenebanos un duro, asinas que a botellada yera qualcosa que heba de plegar antes u dimpués. Yera a solución lochica. Bien luego, con 14 anyetz, prencipiemos a fer-ne.

As primeras que i estié, las febanos a colleta d'amigas. Metebanos 200 u 300 pecetas cadaun y pillabanos lo que se podese en o Mercadona d'a Zona Pixauta. Siempre tenebanos bell mayor de 16, que yera la edat legal en aquellas envueltas, u belun que pareixese una mica mas gran. Pocos problemas teniemos pa mercar alcohol, la verdat. Bien de tinticola, bella litrona calient y, si yeranos prou chent, bella botella de licors pa barrachar-los con "colorín" (refrescos), u chitar-le-ne a la tinticola "pa que puyase mas". Nos n'ibanos t'o parque Miraflores, y limpio zorriar dica que acotolasenos tot.

A poquet a poquet, as collas de l'instituto ibanos ixamplando os nuestros roldes de amigas. A nuestra se chuntó con atra, y con atra, y con atra,... y en bell mes, nos podebanos chuntar dica 60 u 70 personas en o parque. En as compras, con tantisma chent, nos caleba ir siet u ueito t'o mercau, y os diners ya adubiban pa mercar de tot. Mesmo veniba chent d'atros institutos.

Encara que mirabanos de replegar a vasuera que chenerabanos, o parque lo deixabanos bien puerco. A las cheringas que deixaban os yonkis de maitins se sumaba siempre bella botella que se nos estricallaba, os fumarretz, u bella bolsa de potras ya vueda. De mosica, no en tenebanos, pero en puyar-se-nos l'alcohol, bien que cantabanos. Lo de deixar-se chanfles en chelos y vasos, que he visto que se fa agora, yera qualcosa que ni se nos ocurriba. Tot lo que restase diners pa l'alcohol yera malfurriar. A bebida, si caleba mezclar-la, lo febanos en botellas d'augua vuedas. Y siempre, tot calient, prou que si. Quan nos metebanos finos y mercabanos chelo, febanos un forau en a botella pa ficar-lo-ie y prou.

Gosabanos de quedar bien luego. No mas tarde d'as cinco. Y a soben a las siet u poco mas, ya marchabanos de bars. A botellada s'esmicazaba en colletas d'una decena de personas como muito, que nos trestallabanos por un regular por gustos mosicals. En os bars ya no nos caleba beber que pa mantener a zorrera, asinas que pocos diners nos i deixabanos. Ixo, quan nos deixaban dentrar-ie. Si no, a seguir la borina en a carrera y prou.

Aquellas botelladas masivas pasoron a escape pa yo, y me zarré una mica mas o rolde d'amistatz. D'o Parque Miraflores pasé t'o mas discreto Pignatelli, u ta os "Pisos piloto" an que sí que teniemos bell problema con a policía, que bella vez nos aventó tot l'alcohol que nos trobó.

As botelladas cumpliban dos misions muit importants en a vida d'un adolescent. D'una man, poder empifolar-nos, lo que a os pres que iba l'alcohol en os bars yera imposible. D'atra, y la mas important, socializar-nos. Aleixadas de l'estrapalucio d'os bars, y quan encara podebas charrar con bella coherencia, os ratos de botellada yera an que febanos a retolica sobre os nuestros problemas, suenios y ilusions. D'o mesache que nos feba goyo, d'os problemas de l'instituto, de mosica, de drogas, de politica, de sexo, ... de tot lo que le pasa por l'esmo a un adolescent.

Dica que os medios prencipioron a dar-ne notorio, as botelladas no preocupaban guaire a la sociedat. Yeran, antimás, un fenomeno de qui no nos podebanos permitir empifolar-nos en un bar. As pixautas se i sumoron en popularizar-se. Todas as chovens, de todas as cheneracions, s'han feito lo pre pa drogar-se legalment u no. As botelladas estioron a forma mas cheneralizada en a mia cheneración, y no me pareixen la pior forma de fer-lo.

jueves, 8 de junio de 2017

De l'Atlas t'Artieda, por Zuera y A Flama. Tierra de barrenaus radio 3x09

Charrada en Esfendemos a tierra 2014
La calor plega en Aragón, os primers festivals van pasando y se prencipia a conoixer a programación d'os estivers. Primers viaches, primers capazos en a terraza. Lo diya se fan largos y as zaragocetas nos quedamos cundindo por as carreras tot lo diya. ¿Y qué millor ta levar en l'auto en ixos viaches, u en o MP3 quan te'n vas t'a piscina que un nuevo Tierra de barrenaus radio? Plenico de contenius intresants y variaus.

Prencipiamos con Ruben, qui nos recuenta la suya experiencia fendo montanya por a parte marroquí de l'Atlas. Un viache bien pincho, an que os montanyers con pocas perretas pueden tener buens momentos que remerar. Contino, nos visita Chabi, qui nos charrará d'o curso que fació en Zuera, an que por primer vegada en muito tiempo, tenioron clases d'aragonés. Antimás Chabi tamién ye o responsable d'Arasubs, a web que subtitola cintas a la nuestra luenga.

A Flama, a mitica tabierna que tanto a refirmau a la nuestra luenga dende Zaragoza, zarra las suyas puertas o mes de chulio. Silvia, una d'as suyas socias, charra d'istos siet anyos, de como prencipió y de muitas d'as cosas que han visto ixas quatro paretz. Rematamos con unatra visita de Laura, de Purna, qui ye embrecada en a organización d'o festival Esfendemos a Tierra, que torna a fer-se estianyo en Artieda. Una programación que no tien cosa a envidiar a qualsiquier atro festival, pero feita dende l'autochestión, y con reivindicacions bien claras y firmes. 

Asinas que viaches, experiencias, borina, mosica, aragonés, reivindicación, ... en dos horetas de radio en aragonés. ¿Qué mas puetz demandar? Tira a escape a dar-le a o play, y comenta-me que te ha pareixiu!

Descarga-te-lo aqui

jueves, 1 de junio de 2017

De borina por Iruña Rock

Con a enchaquia d'o Iruña Rock, apareixiemos iste cabo de semana por Pamplona, una ciudat que, tot y tenendo vinclos familiars, no conoixco guaire. S'encertó que yera o diya de lo barrio viello, asinas que la chornada prencipió mesmo antes que no nos pensabanos, y nos trobemos con muitas cosas intresants.

Lo maitin nos estiemos de bar en bar, viyendo lo que se i yera cocendo. Bailes, vistius tradicionals, buena cosa de mesas de colectivos, de paradetas de artesanía y, sobre tot, un ambient bien pincho. Tot un goyo viyer como valuran a suya cultura, tanto por a cantidat de chent que i participaba, como por a respuesta d'o publico.

Araba que quedase bell pamplonica adintro de casa, en un maitin que antimás teneba l'orache como aliau. Por las carreras, nos ibanos trobando ya con quantas personas que s'endevinaba que iban t'o festival que bi heba de tardes. En as paretz, pancartas penchadas con as reivindicacions suyas. Entre os puestos, colectivos feministas, de memoria historica, una radio libre, ... Y, prou que sí, cartels d'a manifestación contra l'entibo de Yesa que tamién se feba de tardes. Diya movidet en Pamplona.

Iruña Rock se celebró en a Ciudadela, en bell meyo d'a ciudat. Un puesto muit bien comunicau pa un festival que acertadament no s'habió de fer en a quinta forca como gosan de fer-se ista mena d'eventos. D'a infraestructura no puedo decir que bondatz. Bien d'escusaus, zona pa descansar-se con mosquera, variedat de minchanga,... En os retes, os diyas d'antes heban penchau un mensache charrando de "pres populars". La mia sorpresa plegó en viyer que, en Pamplona, una ciudat bien cara, lo pozal de biera lo vendeban a quatro euros en un festival. Talment por ixo rematemos como rematemos.

Entre as paradetas, merchan d'as collas y lo tipico d'un festival, pero tamién un puesto de la campanya "Me tacho de macho" que se ye fendo en contra d'o concepto hechemonico de masto. Personaches como El Drogas u Kutxi Romero son estaus caras visibles d'ista campanya que me pareixe importantisma y que me'n declaro fan. Entre concierto y concierto, tamién sonaba por megafonía o spot d'a campanya. Asperemos que iniciativas como ista continen ixemenando-se por tot.



Dawn of the maya y Hesian estioron encargadas de prencipiar lo festival con un publico que iba plegando a moniquet. La solana foteba fuerte y muitas nos preniemos ixe ratet pa descansar-nos baixo a uembra d'os arbols y disfrutar posadetas d'a mosica de dos collas que me facioron firme goyo. Tanimientres, nos trobabanos con as aragonesas que i yeran idas, y que tamién heban aprofitau lo maitin pa conoixer la hostelería local.

Ya podetz contar que, en levando tot lo diya limpio zorriar, y con la vencida que hebanos pillau en Hesian, quan prencipió Zoo aquello petó. Como ya descubriemos en o concierto de Zaragoza, antimás de Panxo y Arnau, lo trombón ye toda una troballa en l'animación a lo publico. Prencipiemos astí un festival de pogos que nos deixó por tierra bell par de vegadas. Ixo no fació que reblasenos, y en La Raíz, encara que lo soniu estió una mica pior, nos fartemos ya de blincar. En plegar S.A. nos habiemos de descansar. Lo nivel de borina ya iba convertindo a más d'una y mas d'uno en ixos ixallos que pareixemos a bella hora d'a nueit. En plegar os clasicos, nos uniemos a la pogamenta, con un recinto ya rebutient de tot. Y como Boikot ya ye tot clasicazos, no aturemos dica la fin d'o concierto.

Habiemos de marchar ta casa, ya en as tres pedretas. A l'atro diya, moraus por tot lo cuerpo, lo tozuelo luitando por salir-se-ne d'o crapacin, as garras tremolosas y a pancha fendo pintacodas. Hue, quatro diyas dimpués, encara me fa garrampa un troz de culo, no sé guaire bien por qué. Os moraus d'os pogos, prencipian a disapareixer pa deixar l'espacio a las fizadas d'a mosca negra. Se'n vale la pena ista ixarrota por un festival? Prou que sí! Y ixo que no i fuemos que una d'as nueitz!

Sisquiá en 2018 se repita iste festival, que en a suya primer edición ha deixau o nivel alto de tot. Sisquiá tamién s'exporten as suyas virtutz t'a nuestra ciudat. Un festival reivindicativo, con collas de nivel, pres asequibles y en un espacio ubierto recuperau t'as ciudadanas. ¿Qué me decitz d'un Zaragoza Rock en o parque de l'Alchafaría en 2018?