miércoles, 18 de octubre de 2017

Lo TSJA y las suyas barrenadas sentencias

Aquello d'a división de poders, fa muito tiempo que no se lo creye dengún. Pero bi ha vegadas que ye tant evident, que se disimula tant poco, que fa sangre... En lo nuestro caso, lo Tribunal Superior de Justicia de Aragón, ye un eixemplo penible de como lo poder chudicial treballa pa una ideyolochía.

Siempre me ha preocupau, y habría de preocupar-nos a todas, que lo poder chudicial siga tant mayoritariament en mans d'a dreita. Y d'a pior dreita, muit a soben. Nomas cal fer-se una gambadeta por la facultat de dreito ta parar cuenta de por a on alienta politicament la mayoría d'os futuros advogaus y chueces. Admiro fundament a toda la chent d'izquierdas radicals que s'han habiu de fer los x anyos de carrera compartindo aularios con ixa clica.

Pero como una d'as millors armas contra la suya terror ye la nuestra humor, pensé de adedicar-les ista primera historia barrenada. En la memoria, guardaba beluna d'as suyas barrenadas sentencias, pero una busca en Google, me'n dio quantas mas. Asinas que, pa qui le faiga honra, aqui va l'audio d'a Historia barrenada, y vinclos a cadauna d'as noticias que se i charra. Que faiga buen prebo, y paratz cuenta, porque si bell diya tenetz un chuicio, puet que acabetz en iste barrenau tribunal!



L'aragonés en lo Curriculo de primaria

Las bicis no podrán ir por plazas y peatonals


Lo 010 se queda sin municipalizar

Averly a cascar-la

Hora y meya de relichión en primaria

martes, 3 de octubre de 2017

Tierra de barrenaus 4x01.Turismofobia, lupos, l'aragonés y discos que te cal

Empecipia una nueva temporada. Pleno de ganas de fer nuevas cosas, d'ixoriar lo programa, y de contar con la vuestra participación. Millor, aspero, tamién tecnicament, ya que me voi fendo a maniar los trastes d'a radio y a fer grabacions. Cuento que se empecipiará a notar la experiencia.

Pa iste primer programa, femos una uellada a los temas rusients d'o verano. Empecipiamos con la clamada "turismofobia", de man de Chorche, un aragonés emigrau a Barcelona, que la vive en primer persona. Tamara nos charrará d'o lupo de Monegros, que tanto ha espantau a los ganaders d'asti, y que tanto mal i han dau en la prensa, y con tant pocos argumentos scientificos.

L'aragonés será present en lo programa como obchecto, amás de como vehiculo. Asinas, con Mario charro d'os nuevos cursos de Nogara pa 2017/2018, pa que tos quede clara qualsiquier dubda que tiengatz. Y tamién de Nogara, Cherardo nos traye una exclusiva: Lo nuevo disco "O zaguer chilo" que arrocla a vinte bandas fendo mosica en aragonés. Pa celebrar-lo tamién he teniu la honor de tener en directo a Krevi Solenco, que se fació bell par de temas en lo programa.

Y antimás, la nueva falca, una nueva sección, clamada "Historias barrenadas", an que charro d'o Tribunal Superior de Justicia de Aragón, lo disco nuevo de Jah'sta, y un concurso.... Qué mas podetz demandar? Pues regular que muitas cosas! Asinas que charratz por ixa boqueta, mientras encara nos lo permiten...

Asperto que tos faiga goyo!







miércoles, 27 de septiembre de 2017

Lo proceso d'independencia catalán. Tierra de barrenaus especial

Nunca no he planteyau lo programa de radio como un espiello de l'actualidat. En l'orichen sisquiera quereba emitir en FM, sino fer nomas un podcast. Pero, ai!, cosas d'a vida, a la fin soi fendo radio, u qualcosa pareixida, y pa forro de bota, me foi un directo.

Que Catalunya ye un tema que m'apasiona no ye garra secreto. Lo que somos vivindo en istos diyas ye una baruca y de vez me fa trobar-me con contradiccions, pasions miedos, debatz y emocions a cada paso. La escalada violenta protagonizada por l'estau talment fuese asperable, pero sincerament no creyeba que plegase ni tant luego, ni tant fura. Y lo que nos queda por viyer. Asinas que, dimpués de tot lo que pasó ixe 20 de setiembre, y de los feito que han iu a l'arreu dende alavez, me viyé quasi en la obligación moral de fer un Tierra de barrenaus radio sobre lo clamau "procés".

Lorient, de Podemos, Daniel, de Puyalon, Laura de Purna y lo periodista Chorche, nos dan a Arale, a yo y a todas vusatras la suya envista y opinions sobre iste afer. Bi convidé a muita mas chent, pero en istos diyas imos todas bien aqueferadas, y en estar un directo, tot se fa mas dificil.

Aspero que sirva iste programa ta que la chent que lo ascuite entienda una mica millor tot lo que ye pasando en Catalunya, i piense bell poquet, y que las que somos por lo dreito a l'autodeterminación y por la simpla democracia, tiengamos bellas quantas voces mas que sentir, en un momento comunicativo muit dificil.

Lo podetz sentir en la barra d'abaixo, u descargar-tos-lo dende aqui.

martes, 26 de septiembre de 2017

Como viyé... Guerra Mundial Z

A pur de sentir charrar-ne, y de leyer criticas a la cinta por haber feito un zancocho d'o libro, teneba pendient dende feba muito leyer Guerra Mundial Z. Soi un fan d'o cine de zombis dende bien chiquet. D'os recontamientos apocalipticos en cheneral. Guerra Mundial Z ye una gran en o suyo chenero, y un libro con muita medolla.

World War Z: an oral history of the zombie war (Guerra mundial Z: una historia oral d'a guerra zombie) estió publicau en 2006. Max Brooks (fillo de l'actor Mel Brooks, por cierto) ye o suyo autor, y ya heba escrito la clasica Guia de supervivencia zombie. Todas dos han esdeveniu ya clasicos d'a literatura friki.

Lo libro ye escrito como una cronica feita en un mundo que ha sobreviviu a un apocalipsi zombie. Un entrevistador se va trobando con personas sinyaleras en ixa guerra. Dende medicos que tenioron contacto con os primers infectaus, dica os militars que coordinoron as enrestidas d'a humanidat ta acabar ganando la guerra. La obra preba d'estar global y, encara que se nota, y muito, que l'autor ye estadounidense, fa una envista de lo que pasó en tot lo mundo. Chapón, Corea d'o norte, Cuba, Sudafrica, ... mesmo una historia de submarinos rusos u d'a Estación espacial internacional i apareixen. De vez, una ripa de temas i son tractaus. O papel d'a prensa, as conseqüencias economicas y socials, la relichión, lo fanatismo, la psique humana, .... Brooks deixa muit pocos temas sin charrar-ne en un libro que preba d'abracar qualsiquier aspecto esmachinable adintro d'un apocalipsi zombie.

Un d'os rasgos d'orichinalidat d'ista novela ye precisament la suya premisa, que ye que lo mundo ha sobreviviu a l'apocalipsi zombie, con las estructuras d'estau intactas. Sí, ha cambiau bella muga, y las relacions economicas y politicas entre los diferents estaus son bien diferents, pero lo sistema basicament ha sobreviviu. En quasi toda la obra de tematica zombie, lo mundo dimpués d'o devantamiento d'os muertos, u d'o contachio masivo, se esboldrega de tot, y las relacions humanas esdevienen poco mas que tribals. No pas en iste libro, y creigo que ixo le da una envista mas realista (en la mida que ixo ye posible en una novela zombie) y, prou que mas orichinal.

No ye lo mio caso, pero talment se pueda fer una mica canso a qui no le faiga guaire goyo la literatura belica. Sobre tot en la parte final, fa mas ficancia en ixo que no en as vesants mas "socials" d'a humanidat somesa a situacions limites. Ixo, y que en o fundo no deixa d'estar una "americanada", son as dos pegas que le podría trobar a un libro que, sobre tot, ye entreteniu.

jueves, 21 de septiembre de 2017

Tierra de barrenaus radio: Tercer temporada

Tres anyos van ya de programa, y mas de sisanta horas de grabacions en aragonés. China chana, voi fendo-me con isto d'a radio, y aspero que ixo se note a l'atro canto d'o podcast. Ista tercer temporada, ha estau una mica de transición entre lo modelo que teneba en las dos primeras y lo modelo que fare servir en quasi toda la quarta. Los programas monotematicos han iu deixando espacio a las entrevistas mas variadas, y ista tendencia será muito mayor en la temporada que empecipiará en octubre.

Los temas han estau bien variaus: patrimonio industrial, abusos policials, mosica, cine, .... pero sin dubda iste anyo l'aragonés ha estau de vez lo vehiclo y lo tema d'as charradas, estando mas protagonistas que en temporadas anteriors. L'actualidat ha mandau, y tamién l'intrés de l'audiencia por los temas relacionaus con la nuestra luenga.

Quanto a los directos, faltó de fer-ne uno, que habié de suspender por qüestions tecnicas y lochisticas. Tamién falta de penchar lo programa que faciemos en directo en lo Parque d'o Tío Jorge en la Cincomarzada, pero ye que la calidat d'o soniu no ye prou t'os standards d'o programa y guarda si son baixos....

Todas las errors, prebaré de correchir-las, con la vuestra aduya, durant iste nuevo curso que empecipia. Y todas las cosas que han saliu bien, que creigo que no son pocas, prebaré de millorar-las.

Pa la quarta temporada vienen quantas novedatz. Lo cambio de formato, no leva un cambio de duración. Los programas continarán superando las dos horas, pero serán mas dinamicos y variaus. L'horario d'emisión sí que cambea. Lo primer programa se emitirá (por casualidat) lo diya previsto pa lo refererendum d'autodeterminación de Catalunya, en horario de 21 a 23. Y a partir d'ixe 1 d'octubre, podretz ascuitar-lo totz los domingos, antes de marchar t'o leito.

Tamién quiero que i pase muita mas chent, que bi haiga mas variedat de contenius, mas mosicas, mas frikadas, y muita mas humor, porque si "la chent de l'aragonés" no nos redimos, poco ya nos queda...

Asinas que aspero que contine fendo-tos goyo lo que foi, y que iste programa sirva pa emplir un poquet mas lo país d'a nuestra luenga, que buena falta le fa. Pero sobre tot, quiesta lectora, ¿por qué no t'animas tu tamién a fer-te un podcast en aragonés? Ixo sí que ye facil (y util) y no atras cosas.

Y como siempre, muitas gracias a: Mario S., Tamara, Ruben S., Laura, Dani, Lorient, Diego, Guillén, Dabi F., Alex, Silvia, Chorche, Chesús, Fernando, Chusebron, Pati, Txema, Armando, Carlos, David, Marco, Cherardo, Mario G., Edu, Ruben R., Dabi A., Lucía, Chabi T., Chabi G., Juan Pablo, Chuse Raul, y Dabi L..

Por si te perdiés bell programa, contino tiens lo listau y los vinclos de toda la temporada

TdB 3x01. Sé lo que facietz iste verano

TdB 3x02. O patrimonio industrial en Aragón

TdB3x2,5 Pilars 2016 (Especial D'estrela a estrela)

TdB 3x03.Versions

TdB 3x04. Debat de cabo d'anyo

TdB 3x05. A cinta que me moló

TdB 3x06. Diya d'a luenga materna 2017

TdB 3x07. Escribindo en aragonés

TdB 3x08. XVIII Premios d'a mosica aragonesa

TdB 3x09. De l'Atlas t'Artieda, por Zuera y A Flama

TdB 3x10. Historias d'a policía zaragozana

TdB 3x11. Sociolingüistica, grafias y Moncayo en aragonés

TdB 3x12. Temazos 3








jueves, 14 de septiembre de 2017

Catalunya y los debatz que no se farán

Pa qualsiquier persona intresada en la politica, tanto a nivel teorico como practico, lo debat arredol d'o clamau Procés català ye apasionant. Somos vivindo un momento bien intresant, an que una parte muit important d'un pueblo demanda la suya independencia. Viyer naixer un estau sin que bi haiga un conflicto armau no ye guaire común, y la nuestra cheneración talment pueda presenciar-lo en primer ringlera. Iste momento politico ha visto como s'ha publicau literatura arrienda analizando-lo, los medios de comunicación dan ferrete tot lo diya con iste afer, lo procés ye en boca de totz y, manimenos, se ye perdendo una oportunidat graniza pa fer debatz de verdat. Porque la mayoría d'ixa literatura, d'a presencia en prensa y, a la fin, d'as charradas d'os bars y carreras, ye mas propaganda que atra cosa.

Lo proceso de independencia de Catalunya podría haber ubierto un debat serio sobre muitos afers. La mayoria d'os temas son aplicables, no nomas a la resta de l'Estau espanyol y d'os pueblos que hue i somos, sino a la filosofía politica en cheneral.

A on reside la soberanía? Qué capacidat de decisión tienen los ciudadans? Que ye "lo que nos afecta dreitament" y lo que no, y qui lo decide? Qual ye la diferencia entre lechitimidat y legalidat? Que mugas bi ha entre la una y l'atra? Qual va primero? Como s'han de resolver los conflictos? Que flexibilidat pueden tener las leis pa resolver-los? Qual han de tener? Como chestionamos lo multilingüismo en un estau? Que dreitos han de tener las comunidatz lingüisticas? Que ye la identidat nacional? Como se chestiona adintro d'un estau an que bi'n ha varias? Que conseqüencias lechislativas ha de tener lo reconoiximiento d'una identidat nacional? Como se relaciona ista identidat con atros aspectos d'as identidatz individuals y colectivas? Qui puede exercer lo dreito d'autodeterminación, como y por qué? Se puet imposar la solidaridat?...

Un ciento de preguntas más, se'n podría fer. Todas con ensundia. Con debatz que caldría levar-ie a expertos, a toda ixa crica de teoricas que treballan en totz istos temas por tot lo mundo, con envistas amplas y bien intresants. Totz temas que podrían pensar a una sociedat que ye intelectualment presta pa fer-lo, pero que se l'enfila enta la simplificación zaborrera de lo politico.

Pero la opción ha estau clara. S'ha optau por silenciar a toda una parte d'o conflicto y  por achiquir lo debat a premisas simplas. L'independentismo tien una presencia minima en totz os meyos de comunicación espanyols, y por un regular, ha d'estar a la defensiva. Lo debat, a quasi totz os nivels, se amuga a una colección de topicos y cunyadadas que acaban fendo referencias a lo DNI, a los orichens cheograficos d'os catalans, u a los chococientos fablants d'espanyol.

En Aragón, a toda ixa teoría politica, se le podrían anyader atros debatz. D'historicos por eixemplo, charrando sobre qué yera Reino y qué Corona, como nos chuntemos con Catalunya y qual yera la relación que tenebanos. Cómo s'entendeban los estaus medievals y que diferencia bi ha con los actuals. Cómo naixen y evolicionan los movimientos rechionalistas, nacionalistas y independentistas a los dos cantos d'a muga que nos une. Cómo chestionar la luenga que tenemos en común, tanto a nivel politico como d'autoridat(z) lingüistica(s).

Miedo a lo debat, como siempre. Miedo a que la chent conoixca los argumentos de l'independentismo en la resta de l'estau espanyol. Miedo mesmo a que i piense. Nos han furtau, a todas las ciudadanas de l'estau, la posibilidat d'un debat serio y con fundo. La mayoría ni en han parau cuenta, y muitas, mesmo lo aplauden.

miércoles, 13 de septiembre de 2017

Como viyé... Colossal

Las tardes de verano sin guaire faina trayen a soben buenas sorpresas. En ista ocasión tenió forma de cinta que no sé encara guaire bien ni por qué me la baixé. Talment me la recomendase belun u viyese lo trailer u que me se yo. Lo caso ye que Colossal, de Nacho Vigalondo ha estau una d'as grans troballas de l'anyo. Y ixo que ye protagonizada por Anne Hathaway, una actriz que no li tiengo guaire carinyo precisament.

La historia prencipia quan a la prota, una choven en l'ature y con problemas d'alcohol, li deixa la suya parella y marcha a vivir t'o lugar suyo. De vez, en Seúl (Corea) apareixe y desapareixe cada diya un mostruo chigant fendo esferras. Podría pareixer, a priori, unatra cinta de kaiju eigas, ixos monstruos chigants que arramplan con las ciudatz asiaticas, pero no.

La parte fantastica d'a historia ye nomas una enchaquia pa contar-nos atras cosas igual u mas intresants. La dominación, l'alcohol, lo concepto de masculinidat, la empatía, las conseqüencias d'os actos propios sobre la resta, lo trumfo social, .... totz ixos temas son presents en las poco menos de dos horas de cinta. Los personaches son presentaus d'una manera machistral, conseguindo que a escape experimentemos sentimientos enta ellas. La cinta engancha dende lo primer minuto con un ritmo que sin andar atarrantau, consigue que no aibemos la uellada d'a tele ni un inte.

Encara que bi ha mensaches, no son mica evidents, ni los personaches perfectos. Consigue contar-nos lo que quiere, fendo-nos pensar, viyendo reflexaus momentos que todas hemos viviu, y que antimás no siga una cinta moralista. Tot ixo me pareixe bien dificil. Pero antimas fer-lo a traviés de monstruos fantasticos, ye la rematadera. Sobrebuena cinta pa cine-forum de masculinidatz con zagals chovens.

lunes, 11 de septiembre de 2017

Temazos 3. Tierra de barrenaus 3x12

Terrible. Indigno. Decadent. Son todas parolas de tres silabas sin garra vinclo con lo programa que faciemos ta rematar la temporada. La sola cosa que ha continau igual en istos tres anyos de radio, ye lo programa de zarrar curso, asinas que por bella cosa será.

Unatra vegada Dabi, Ruben y yo, nos estamos bell poco mas de dos horas charrando de mosica, y redindo-nos una miqueta entre biera y biera. En ista edición, los temazos los trestallemos en tres categorías: cancion que nos fese odiar, cancion "monyas", y canción con bella relación con la TV u lo cine. Tres calaixos an que i culliban muitas cosas, y an que decidiemos de ficar lo que fiquemos.

Si te fació goyo Temazos y Temazos 2, iste tamién te'n fará. Si no, pues ye mas de lo mesmo, pero cada vegada lo femos millor. Amor, odio, humor, mosica, risas, .... en dos horas largas de radio en aragonés.

Ascuita-lo en la barra d'abaixo u descarga-te-lo dende aqui.



lunes, 28 de agosto de 2017

Como viyé... Jessica Jones / Alias (lo comic)

Ta isto d'os tebeos, soi bien mainstream. Me fa goyo lo comic superheroico yankee, bella coseta de humor y poco mas. Los debuixos me cuaca que sigan claros, polius, colorius, .... Asinas que, en primeras, a serie de Alias (rebaltizada como Jessica Jones dimpués d'a emisión d'a serie de TV) no me atrayeba guaire. Pero como a serie ma fació tantismo goyo, y la critica en charraba marabillas, me decidié a leyer-me o comic. Tamién influyó que lo trobase saldau en o mercau de Sant Antoni de Barcelona, ta estar sincero.

Alias / Jessica Jones estió publicada en Estaus Unius entre 2001 y 2004. Ye escrita por Brian Michael Bendis, con dibuixos de Michael Gaydos, y bella colaboracion de lo mio archienemigo Bill Sienkiewicz. En l'estau espanyol se reeditó en 2016, adintro d'a colección Marvel Saga. O primer volumen replega os nueu primers numeros, que corresponden con os dos primers arcos argumentals. A colección ye adintro d'a linia MAX de Marvel, an que se ficaban comics con un conteniu mas "adulto" de lo que feba por un regular la editorial, imitando lo que feba DC (a competencia) con a suya linia Vertigo

La protagonista, Jessica Jones, ye una superheroina retirada que treballa de detective privada. Lo suyo pasau con los Vengadors y los suyos superpoders, tot y tenendo bella importancia ta ubicar-la en l'universo Marvel, son qüestions menors en l'argumento d'a serie. Somos debant d'uns tebeos mas cercanos a las pelis de detectives que a los superherois. Lo que no empacha que i apareixcan personaches como Luke Cage, Carol Danvers, u lo Capitán America. Que ta lo que importan en a serie, podrían estar perfectament atras personas sin superpoders, ni renombre.

Todas dos linias argumentals contenidas en lo primer tomo, enganchan dende lo primer momento. Bendis te fa trusquir-te as pachinas a l'arreu deseyando de chirar-la ta enterar-te de como remata la historia, y de lo que ye pasando en realidat. En un momento que as historias en Marvel son sota-caballo-rei, a lectura de Jessica Jones m'ha tornau a buenas con a editorial. Dimpués quan foi alcordanza de que isto se publicó fa mas de quince anyos, torno a meter-me triste

De lo dibuixo, ya he comentau que ixe estilo no me fa guaire goyo. Con tot y con ixo, no fa problematica la lectura y la verdat ye que me i facié a escape. Cuento que ta una historia d'ista mena, tampoco no pegaría un Jim Lee, precisament.

Con a serie de televisión tien a saber que puntos en común. Pero en lo comic te trobas una Jessica mas macarra y menos optimista, si ixo ye posible. Tien, por decir-lo de bella traza, tonos mas foscos. Las dos me pareixen grans obras en los suyos respectivos medios y no sabría decir qual me ha feito mas goyo. En qualsiquier caso,aspero poder leyer antes con antes lo segundo tomo y viyer la segunda temporada.

viernes, 25 de agosto de 2017

A vispra d'a grafia DGPL

Si bell diya s’escribe la historia d’o proceso de normativización de l’aragonés, bi habrá datos a trompicuesco. Testimonios, actas, lechislación, … Pero creigo que tamién ye intresant escribir sobre las sensacions y las experiencias personals de qui vivimos u sufrimos istos procesos. Ya en he escrito muito y goso d’asperar a tener una mica de distancia temporal. Ista vez no asperaré tanto. Porque vivimos en un mundet an que toda la chent opina con una bamba graniza, asperando talment que a suya parola siga tenida como divina. La mia opinión no ye que una envista de tot personal, como quasi tot lo que escribo aqui. Hue quiero charrar sobre l’ambient que vivié en los diyas d'antes d’a presentación d’a grafia DGPL.

Quan la DGPL proposó lo proceso d’os tres expertos, todas sabebanos que no yera la millor solución. Manimenos, en la situación que ye l’aragonés, qualsiquier foradet por an que podamos viyer a luz a la fin d’o tunel, nos da a muitas l’asperanza de que se consiga solucionar lo conflicto. Costó de fer venir a plego a muita chent, ya lo sabemos. Porque  bi ha muitas desconfianzas, y con muita razón, en iste mundet. Tamién porque hemos viviu procesos de compleganzas y consensos arrienda que totz han rematau malament.

Vencidas ixas primeras resistencias, lo proceso tiro enta debant. Ta febrero se dició que se presentaría ixa nueva grafía. Lo diya d’a presentación no podeba ir-ie, pero yera bien tranquilo, porque totz os barruntos que tenebanos yeran buenos. Pocas horas dimpués, no sentiba que decepción en sentir que l’aragonés tornaba a perder la oportunidat de concarar lo futuro con ferramientas adequadas y a posibilidat de nidat de buena parte d’o movimiento de desfensa d’a luenga.

¿Qué pasó en ixe tiempo? Bell diya lo sabremos, prou que sí, pero no será hue ni aqui.

Los diyas d’antes charré con chent partidaria de las tres propuestas graficas “grans”. Y mesmo con chent partidaria d’atras propuestas graficas. Beluna teneba mas información, belatra menos. Pero todas pensabanos que ixo acabaría bien. Tenebanos muito claro como iba a estar una propuesta de grafia asumible por las tres asociacions. Soi charrando de muita chent con sensibilidatz muit diferents y que s’ha fotiu muitos anyos chustificando la suya opcion. Pero todas tenebanos claro que podebanos renunciar a bella coseta por ixa grafia comun. Y todas entendebanos que habrianos de reblar en bell punto. Charrabanos ya nomas de bell detalle. Mas por una qüestion d’alparciar u de curiosidat que por atra cosa.

Lo diya d’a presentación, y los siguients, me plegoron mensaches de muitas d’ixas personas. De todas las tendencias. A todas les heba feito burro falso lo resultau. Las partidarias d’a G87, tot y que teneban una grafia muit cercana a la suya propuesta, tamién yera tristas, en entender perfectament, que ixo ya s’heba prebau antes y no heba funcionau. Y que garra grafia podeba tirar entabant con o refus d’un sector tant amplo entre la suya comunidat d’usuarias.

Todas coincidibanos en los aspectos principals d’una grafia viable ta l’aragonés. Cuento, y no creigo que m’entivoque, que los tres expertos que se suposa que han feito lo chandrío iste, tamién lo teneban claro. Tanto o director cheneral, como lo suyo equipo, lo tienen claro. Tot lo mundo en fablilandia sabe qué mena de grafia ye viable. Pero lo resultau estió unatro.

Si sabemos cómo solucionar un conflicto, y tenemos las ferramientas ta fer-lo, ¿por qué no se fa? Por qué se proposa una solución que se sabe fracasada d’antes d’aplicar-la y que se sabe que ye inasumible por una parte importantisma d’as afectadas? Ye irresponsabilidat? Incompetencia? S'ha teniu una vegada mas la oportunidat ta superar lo conflicto y s'ha deixau eslampar.

Tot isto pasará. Todas istas propuestas habrán de reblar en bella mida. Tot iste proceso tendrá una fin. Y habremos d’escribir a suya historia y conoixer qui, cómo y por qué se facioron las cosas como se han feito. Ye una pena haber deixau pasar unatra oportunidat.

martes, 22 de agosto de 2017

Explotar lo recosiro mosical

Trobar a faltar la nineza u la choventut ye qualcosa normal. Yo mesmo lo foi. Yera mas choven, aguantaba mas, estioron anyos de descubrimientos, de libertat, de luitas y de esdevenir lo que agora soi. La mosica d'alavez, ye la banda sonora d'ixos anyos. Igual como la Marcha Imperial nos fa evocar a Darth Vader en un petén, Jesucristo García de Extremoduro me transporta ta las nueitz d'Atrio y Posturas. U l'Alzheimer de DEF CON DOS t'o Planta Baja.

No, no i soi inmune. Prou que contino ascuitando lo d'aquellas envueltas. Y quan m'empifolo con las amigas de l'instituto cantamos a Platero u a Siniestro Total. Pero ixo no priva que haiga continau descubrindo mosica. Si agora me demandasen de fer una triga de diez collas favoritas, la mayoría no existiban fa vinte anyos u acababan de empecipiar.

No ye la sola aria que pasa isto. Bi ha qui leva viyendo lo mesmo cine, leyendo los mesmos libros y comics, y ascuitando la mesma mosica dende que fació vinte anyos. Y no le prebes d'amostrar cosa nueva porque tot lo que se fació dimpués de (metetz la calendata que queratz) ye fiemo.

Lo gran obchectivo d'o capitalismo son as personas entre 35 y 60 ayos. Mas chovens u mas viellas no tienen tanta capacidat economica. Tamién son las personas que deciden la programación cultural tanto en arias publicas como privadas. Asinas que ye normal que existan dos fenomenos que tant de moda son como las bandas tributo, y los festivals de los 80 y los 90.

La mosica d'ixas dos decadas no ye particularment buena ni mala. No ye mas facil u dificil d'ascuitar que qualsiquier atra radioformula d'antes u d'agora. Ni las suyas artisas chenios d'a mosica, sin contimparación posible en lo present. Pero ixe recosiro vende. Qui nos fotemos ueito u mas horas cada diya en treballos de mierda, u mirando por internet de trobar-ne, qui viyemos como unatra cheneración hemos fracasau en aquello de cambiar lo mundo, queremos tornar a los tiempos an que creyebanos que ibanos a trunfar laboralment y politica. Y ixo tien una BSO.

Cosa que obchectar, a priori, a que todas tiengamos ixos momentos de fer alcordanza d'atros mas dulces, u mesmo que reivindiquemos mosicas que teneban una calidat y que talment no se les faiga aprecio en la mida que calga. Pero tiengo dos obchecions a ista mena d'eventos, como buen niquitoso que soi.

La una ye ixa lochica que en he charrau antes. Lo razonamiento de "la mosica, literatura, cine, etc.. d'antes mas son por definición millor que tot lo que se fa agora" leva, indubdablement a que "tot lo d'antes mas yera millor que lo d'agora", incluyiu prou qeu sí la situación politica. Tot ixo, en la mia opinión ye un robin que se nos va calando a moniquet en lo tozuelo y que explica porque tanta chent se va fendo conservadera con la edat. La edat no ye una enchaquia pa la falta d'inquietutz culturals. Todas podemos gronxiar-nos con nuevas produccions culturals, y todas tenemos capacidat pa entender los cambios politicos y socials que ocurren a lo nuestro arredol. Quedar-nos en lo pasau nos leva a fer de peso muerto pa qui preba de cambiar la sociedat, queramos u no.

L'atra ye la construcción d'un relato historico d'a cultura hechemonica an que, como en antes, contina sin cullir-ie cosa allena a ixe relato. En istos eventos d'os 80 y los 90 pareixe que en Aragón no bi heba producción mosical. Lo mesmo show suena igual en Santiago, Cadiz, Pinseque u Girona, quan tenioron una historia mosical buen diferent. Los 80 me pilloron criet, pero vivié mosicament los novanta y muitas d'as collas que sentiba yeran aragonesas y lo petoron bien petau. Pero nunca no i sonarán, quedando unatra vegada esborradas d'a nuestra historia. Talment, podríanos aprofitar ixe recosiro pa qualcosa positiva y reivindicar unatra vegada la cultura mosical que creixió en aquells anyos y que tant buena cullida dio. Y, ya que andamos en ixas, filar-la con tot lo que se contina fendo en iste pais que no ye ni poco, ni de poca calidat.



jueves, 10 de agosto de 2017

Patri y la literatura: Historias d'un insti publico V

De lo paso mio por Coras no recuerdo que una profesora buena. La que me dio en 1º de EGB, que siempre me refirmaba en la mia afición a la lectura, y que me recomendaba libros. La resta yera una clica de barrenaus de mayor u menor grau, quan no dreitament psicopatas. En tot caso, chent que no mereixeba tener a cargo suyo ni un periquito.

En l'instituto no tot yera ideyal. Recuerdo un profesor sustituto de Manuals (u como se decise) que levaba penchando d'o cinto un clavero con l'alica franquista, y que yera un carnuz. Bien se vale que duró poco la sustitución. Atra profe, de luenga pa forro de bota, s'encerrinaba en pronunciar como /x/ la J de una alumna que se deciba Judith, y ixe yera o suyo nivel de criterio lingüistico y de respeto a las personas. De profesors malos, u simplament mediocres, en tenié más d'un y de dos.

Pero en l'instituto tenié beluna d'as millors profesoras d'a mia vida. Prou que la comparanza con Corazonistas ye absurda, ya que me niego a reconoixer a ixo como profesorau.

A una d'as profesoras que me marcó le clamaremos Patri, por si no le fa goyo que en charre, d'ella. Yera profesora de Luenga y literatura, y tenié la suerte de que me dio clase un anyo, y la desgracia de que no me'n dase mas. Yera d'ixas personas apasionadas d'a literatura y de l'amostranza, y que antimás sabeba transmitir ixa pasión. Personalment, Luenga y literatura yera una asignatura que gosaba de aprebar porque me resultaba prou facil, pero de vez me feba muitisma galbana d'estudiar-la. Manimenos, ella conseguiba que ni me calese estudiar, porque me bebeba cadauna d'as suyas parolas en clase.

Una d'as alcordanzas que foi d'a clase suya estió lo romanticismo. Quan nos lo explicó yo yera adolescent. Un bullir d'hormonas, sentimientos, amors y desamors. Ixos momentos d'a vida tuya an que tot pareixe gloria u trachedia. Siempre exacherando cada acontecimiento d'o diya, como si estase clau pa la resta d'o tuyo esdevenider. Lo romanticismo, allora, yera un movimiento cultural que me atrayeba prou. Amor, libertat, rebeldía, ... lo teneba tot pa una persona de 16-17 anyos. Pa chupir-nos de l'esprito romanticista, un diya proposó de fer una clase diferent. Iba a meter-nos mosica d'autors romanticos, u cancions basadas en os suyos textos. Tamién ibanos a leyer belun d'ixos textos y charrar-ne. Y pa que nos gronxiasenos, no iba a pasar lista. No iba a existir las normas "normals" de clase.

Como ya he comentau yo feba fuina bien a soben, asinas que a ideya de fer-ne sin que me contase, yera un lamín. Manimenos decidí d'ir-ie, porque lo tema m'apasionaba. Ixo sí, chupiu d'aquell esprito facié un ratet tarde. Indo ta clase, la esmachinaba con toda la chent en plan hippie, leyendo y charrando y Patri explicando-nos de que iban todas aquellas metaforas que no entendebanos. Quan i plegué me trobé un panorama prou diferent. Sí, Patri heba conectau lo radiocasette, y leyeba en a loseta un poema de bell autor. Pero l'alumnalla teneba la mesma actitut que en una clase normal. Totz posaus en as suyas mesas, con los cuadernos ubiertos y lo boli presto pa prener nota. Por un momento pensé que m'heba entivocau, asinas que le pregunté a Patri:

- Perdona Patri, lo d'o romanticismo yera hue, no?
- Sí, sí, ye hue.
- Alavez, me puedo posar aqui debant por tierra pa ascuitar bien la mosica, no? -en clase gosaba de posar-me bien dezaga -
- Como quieras, prou que sí

Deixé la mochila en a mia silla y me posé por tierra a o canto d'o radiocasette.No entendeba porque les daban un troz de libertat y no lo aprofitaban. La mayoría, encara que podeban crebar las reglas de cada diya, decidiban voluntariament continar con la rutina y sin salir-se-ne ni un sacre d'as recholas d'arredol d'a mesa suya. Nomás lo mio companyer de mesa, un buen amigo que tamién lo yera flipando con lo romanticismo, m'acompanyó. A la fin d'a clase yeranos cinco u seis en ixa actitut. Ya podetz viyer que, como buen adolescent, yera un poquet "notas".

La clase estió marabellosa. Poesía, mosica y, sobre tot, un oasis en ixe desierto que gosa d'estar l'amostranza d'a literatura. An que no febanos que aprender una parrafiquera de datos de nombres d'autors, corrients, anyos y obras, Patri nos amostraba de qué iba cadauna d'ixas corrients, qué nos trobaríanos en ubrir un libro suyo, por qué se valeba la pena leyer-los (u no pas), ...

Atro diya nos fació un examen "sin compromís". No contaba pa evaluación, ni ibanos a tener una nota numerica. Consistiba en comentar tres textos. Un d'ells yera la Canción del pirata de Espronceda. Lo de comentar textos yera qualcosa que me feba a saber que goyo, porque no me caleba estudiar-lo y gosaba de fer-lo prou bien. En iste caso m'escribié bell fuello, charrando sobre a libertat d'o pirata, l'ausencia d'autoridat, y cosas asinas, que mereixió una anotación de Patri en un marguin que deciba "Juventud rebelde". M'encantó recibir aquello como nota d'un examen.

Ixas yeran clases especials, pero las mas cutianas tamién yeran buenas. Aquell anyo me animó a leyer muitas cosas que ni hese pensau de fer-lo y me sacó bell prechuicio sobre a literatura clasica. Patri prebaba d'amostrar-te a leyer de verdat. No nomas la tecnica de chuntar letras que ye lo que aprendemos de chiquetas, sino entender lo que se ye leyendo. Aturar-te un momento a pensar-ie, a analizar, mesmo a parar cuenta de cómo ye escrito y d'a polideza que guardan ixas parolas. Leyer-leyer, no pas entender simbolos. Y ixo ye muit gran. Una d'as mas grans feblezas d'o sistema educativo ye que bi ha una graniza proporción de personas, mesmo con estudios superiors, incapables de entender textos relativament sencillos.

Como toda la familia mia, trigué sciencias quan lo sistema educativo decidió que heba de fer-lo. Los famosos itinerarios, que tantas pleitinas provocan en cada reforma educativa ya existiban. Lo feito de tirar por sciencias suposaba que teneba una serie de asignaturas obligatorias y un surtiu d'optativas. Entre toda la ufierta cheneral d'asignaturas yera la de "Literatura universal". Atras me feban mas goyo a priori, pero sabeba que ixa asignatura la iba a dar Patri. M'hese encantau de poder trigar-la, pero no yera en lo "catalogo" d'as asignaturas pa la chent de sciencias. Como teneba bella amiga de letras que sí que iba t'a clase suya iba informando-me-ne. Yo me feba cruces, y contino fendo-me-ne, de qué clase de incompatibilidat viyeba lo sistema en que podese cursar de vez Física y Literatura Universal.

Un diya me castigoron por fer que me se yo en clase. Me facioron fuera y me ninvioron t'a biblioteca de l'instituto lo que quedaba de clase, que yera quasi toda. Veteme que por astí andaba Patri, con lo suyo alumnau, fendo clase, porque de cabo ta quan le feba goyo de baixar-se-ne t'a biblioteca a fer-la. Probablement estié un d'os alumnos que mas caso le fació ixe diya, por aquello de que si no i vas obligau, tot dentra millor. Ixa estió la sola clase de Patri que tenié la suerte de recibir aquell anyo.

Guardo muit buena alcordanza de muitas profes d'aquellas envueltas, pero sin dubda ye de Patri de qui millor en tiengo. Si bi'n hese mas como ella, probablement tendríanos una sociedat muitismo millor. Y si lo sistema educativo emparase maneras de funcionar como las suyas talment bi'n habría mas.

martes, 8 de agosto de 2017

En leyendo... Guerra mundial Z

En fendo anyos, me voi tornando mas cinico. Contino luitando, prou que sí, por si m'entivoco. Pero por cada diya confio menos en a humanidat y los feitos no fan que confirmar-me-lo. Guerra mundial Z ye un recontamiento como tantos atros d'apocalipticos: pleno d'ixe cinismo y d'ixa falta de fe en a humanidat. Nos dibuixa capables de fer qualsiquier barbaridat en un scenario limite. O libro tien muito mas suco d'o que se gosa d'asperar d'una novela de zombis. Quan leyeba la charrada que traduzco contino no podeba que fer-me a rialleta con ixa certeza de que lo mundo funciona asinas de malament y de que no tenemos buen apanyo. Insisto, aspero estar entivocau, y que bell diya haiga de minchar-me as mias parolas.


- Asinas que, en realidat, nunca no preboron d'apanyar o problema.

- Au vienga ¿se puet solucionar a pobreza? ¿Se puet solucionar lo crimen? ¿Se pueden solucionar las malotías, l'ature, la guerra, u qualsiquier atro brians social? Prou que no. Nomás puetz prebar de que sigan prou maniables ta que la chent contine con la suya vida. No ye cinismo, ye madurez; no se puet aturar la plevida, nomas fer un tellau y asperar que no tienga gotilleras u, lo menos, que no esgotarceye sobre la chent que va a votar-te.

- ¿Que quier decir ixo?

- Vienga...

- En serio, que quier decir?

- Vale, como quiera, imos t'o puto Barrio Sesamo. Quier decir que, en politica te centras en las necesidatz de la tuya base de poder. Si los mantiens contentos, ells te mantienen en o tuyo estudiet.

- ¿Por ixo se desatendió bell brot?

- Dios, fa que suene como si los ixuplidasenos.

- ¿Demandoron las autoridatz locals mas aduya d'o gubierno federal?

- ¿Y quan no nos han demandau os polis mas hombres, mas equipos, mas horas d'entrenamiento u mas "fundos ta programas d'alcance social"? Ixos pocaschichas son tant malos como los soldaus, tot lo diya queixando-se de que no tienen lo que les cal, pero ¿acaso ells concaran o risgo de perder a suya faina si puyan os impuestos? ¿Han d'explicar-le a Peter, lo d'a casa adosada, por qué l'esculan ta aduyar a Paul, lo d'o ghetto?

- ¿No les preocupaba que se fese publico?

- ¿Y qui iba a fer-lo?

- La prensa, los medios,...

- ¿Los medios? Se refiere a ixos retes mediaticos que yeran propiedat de belunas d'as interpresas mas gran d'o mundo, companyías que s'habrían afundiu si atra ola de panico trucase a bolsa? ¿Ixos medios?

- ¿Asinas que, en realidat, nunca no plegoron a instigar un encubrimiento?

- No caleba; ells lo encubrioron soletz. Teneban tanto u mas a perder como nusatros y, antimás, ya heban conseguiu las suyas historias l'anyo d'antes, quan os primers casos apareixioron en Estaus Unius. Dimpués plegó l'hibierno, Phalanx salió a la venda y os casos baixoron. Talment "fesen venir a plego" a bell periodista mas choven, diposau a fer la suya propia cruzada pero, en realidat, tot lo tema yera muit visto dimpués de bell mes. Heba esdeveniu qualcosa maniable, a chent yera aprendendo a vivir con ello y ya angluciaba qualcosa diferent; as grans noticias suposan un gran negocio, y siempre cal tener qualcosa nueva si miras l'exito.

- Manimenos, bi heba medios de comunicación independients.

- Sí, prou que sí, y ¿sabe qui les fa ficancia? Los manfloritas saputaces universitarios; y ¿sabe qui les fa caso a ixos? ¡Dengún! ¿Qui va a escuitar a una minoria maguinal d'a televisión y la radio publicas que no ye en contacto con lo publico mayoritario? Contra mas avisaban aquells saputaces elitistas de que los muertos caminaban, mas pasaban d'ells los estadounidenses de verdat.

viernes, 4 de agosto de 2017

Historia de una foto de Boltanya


Hebanos puyau las costeras d'as carreras boltanyesas y levabanos tot lo diya dando mal. Belún dició de pillar bieras ta totz en un d'os bars d'a plaza. La resta nos vam posar en unas escaleras ta descansar-nos. Pero ni los chilos reivindicativos, ni lo ondiar d'as quatribarradas se preneban ixe descanso. Entre que plegaba lo refresco y no, un periodista debió de pasar por asti y nos va tirar una foto que va apareixer a l'atro diya en la portalada d'o Heraldo de Huesca. Fa bell diya la va trobar en casa mai y me van venir t'o tozuelo recuerdos a xarramata.

En l'adolescencia y la primer choventut vivimos las cosas con firme intensidat. Los mios anyos d'instituto y FP van estar an que va prencipiar de verdat a tener una militancia politica, cultural y social. En 1999, l'anyo d'a foto, yera empecipiando a estudiar aragonés. Heba iu ta bell acto contra los pantanos y ya alternaba con la chent d'a cucha aragonesista en fiestas y locals. Pero probablement lo que va vivir en ixa chornada va estar un gran empentón ta decidir-me a tener un compromís mayor con muitas luitas.

L'uno de mayo de 1999, se va convocar en Boltanya una chornada "Por a Dignidat d'a Montanya". Se feban actos arrienda y s'acababa con un concierto con Labordeta, La Ronda de Boltaña, La Orquestina del Fabirol y Ixo Rai. La chornada va estar historica, acorando-se las entradas ta un concierto que beluns van haber de sentir dende difuera.

Me va enterar d'a convocatoria por un panfleto en un bar, que ye como s'enteraba la chent d'as cosas en la era pre-internet. Conoixeba a La Ronda de Boltaña dende feba relativament poco tiempo y me flipaba tot lo mundo que m'amostraban en las suyas cancions. La mia parella compartiba ixe gusto mosical, las reivindicacions, y tamién l'encantaba lo Pirineu. Asinas que yera un planazo lo que tenebanos debant.

I vam puyar, nos vam instalar en lo camping y vam marchar de borina. La mia parella yera muit amiga de una moza de Chobenalla. Por la mia parte, encara no teneba confianza con la chent d'a cucha aragonesista, pero nos conoixebanos de trobar-nos en las manis y, sobre tot, en los bars y locals como La Espelunga. De camin, nos vam chuntar con ells. Yeran un poquet mayors que no yo, y pareixeba que conoixesen lo lugar millor que casa suya. Vam ir ta un bar a fer uns hordios, y van prencipiar os canticos:

Entre la Plaza d'Espanya y la Plaza d'Aragón, s'encuentra la Independencia, que las separa a las dos!!! Ai, taaaaa chun tararachun ai ta chun tarara....

... y tornaban

Entre la Reina Sofía y Felipe de Borbón, estamos hasta los huevos de tanto Rey español!!!
Ai, taaaaa chun tararachun ai ta chun tarara....

Y asinas firme rato. Dimpués, S'ha feito de nueit, Baixando t'a escuela, Más magra, Aqueras montanyas, .... totz los greatests hits d'alavez.

Entre biera y biera, charrabanos de l'aragonés, d'as montanyas, d'a Chunta, de la independencia, .... u somardeabanos con belun.

Tocabanos quasi a sinyal por persona. Y a bota de vin. La mia quatribarrada, la portaba en la mochila porque no teneba palo encara. De bota, ni en teneba. Ixo sí, lo vin me rulaba terne que terne. En puyando la costera t'o lugar, vam aturar en l'auto d'un d'os chobenallos, no sabeba guaire bien por qué. Va ubrir lo maletero y va descubrir un amiro de botellas de vin ta ir replenando as botas, que ya iban todas bien esmediadas. Me feba cruces con lo grau d'autochestión d'aquella chent. Profesionals de la luita y la borina. ¡Y yo que me pensaba que me lo montaba bien!

Vam continar asinas tot lo diya. De nueitz, lo concierto yera a rebutir. La reivindicación yera present por tot. Por cada canción se coreaban lemas contra los pantanos y por la dignidat de la montanya. Y tamién os Aragón ye nación y mesmo bell In-Inde-Independencia. Pegallos en toda la nuestra ropa, quatribarradas a bando y muita, muita emoción. Las letras de Labordeta, La Ronda, Ixo Rai y La Orquestina nos daban alas ta soniar con un Aragón diferent, renaixiu, conscient de si mesmo, y argüelloso, que se concaraba con un modelo colonial que nos viyeba como fuent de recursos, y con una capital que yera complice d'ixe modelo.

No guaire tiempo dimpués, va prencipiar a militar en Chobenalla Aragonesista, va rematar los cursos d'aragonés y va fer-me socio de Nogara. No va estar ista, lochicament, a sola experiencia que me va levar a fer-lo. Pero aquella chornada, tot l'esprito que se i alentaba, y todas las movilizacions que van plegar dimpués van estar claus en la conformación d'a mia experiencia politica y d'as ideyas que hue tiengo.

Muitos anyos dimpués, fa bella semana, va tornar ta Boltanya por las chornadas que se van fer-ie ta celebrar os 25 anyos de La Ronda. En plegar t'a plaza d'alto, va viyer aquellas escaleras y va fer memoria d'aquell diya. Toda aquella ilusión, tot ixe mundo que se ubriba debant de los mios uellos, contrastaban con la cansera de seguir luitando por lo mesmo 18 anyos dimpués, de no haber conseguiu cambiar tot lo que querebanos. D'ilusión ya no bi'n ha tanta, ye cierto. Pero veigo a la chent que agora fa vintitantos y, tot y que actualizau a totz os cambios que bi ha habiu, las ganas de luitar y boriniar son las mesmas.

Ixa ye la parte mas emocional. En la parte historica y politica, aquellos yeran os primers pasos de tot un movimiento por una nueva cultura de l'augua y por la dignidat d'un territorio que viyeba como las metropolis aragonesa y espanyola no se'n alcordaban que ta explotar-lo. L'archivo documental d'a web Yesano ye un sobrebuen fundo ta prencipiar a conoixer ixas luitas en aquellas envueltas. En ixos diyas protestabanos principalmente contra os pantanos de Santaliestra, Chanovas, Biscarrués y lo recreiximiento de Yesa. En istos anyos, bella cosa s'ha conseguiu, pero a pur d'una fayenada que no habría de caler en un mundo que metese a las personas por debant d'a especulación. Como siempre, aprendamos d'o pasau ta estar mas eficients en las luitas actuals y futuras.



P.D.: En repasar bell dato ta escribir isto, m'he trobau con iste video, y m'han veniu un ciento memorias t'o tozuelo, asinas que la quinta mia, cuento que lo mesmo tos pasará....





miércoles, 2 de agosto de 2017

Sociolingüistica, grafias, y Moncayo en aragonés. Tierra de barrenaus radio 3x11

Que l'aragonés ye bien vivo lo contrimuestran muitas cosas. No son evidents, ni salen en las noticias terne que terne. Pero buena cosa de activistas treballamos por cada diya por fer reviscolar-se ista luenga nuestra tant morediza.

En Tierra de barrenaus siempre he prebau de no dar guaire mal con l'aragonés. La ideya d'o blog ye fer servir l'aragonés pa charrar d'as cosas que m'agane. Manimenos, ye quasi imposible no fer de cabo ta quan un programa con toda las cosas que pasan arredol d'a luenga. Sobre tot, si vusatras, quiestas lectoras y ascuitadoras, me lo demandatz. Asinas que aqui queda un programazo que en ye gracias a los quatro convidaus de luxo que he teniu.

Prencipio con una entrevista a Chabier Gimeno, que fa parte d'o Seminario Aragonés de Sociolingüistica. Ye ista una iniciativa que leva ya bell anyo funcionando y que ye fendo una fayena a saber que intresant, replegando datos importantismos pa tener en cuenta a la hora de fer politicas arredol d'as nuestras luengas, y fendo uns analisis que ya caleba. Lo suyo treballo podetz conoixer-lo en iste programa y leyer-lo en la suya web.

En la segunda parte, la mas larga, entrevisto a Juan Pablo Martínez y Chuse Raul Usón, representants respectivament d'a EFA y a SLA, qui charroron sobre la propuesta grafica d'a DGPL y lo comunicau que facioron istas dos entidatz refusando-la.

Pa rematar lo programa, Dabi Lahiguera charra d'o suyo libro recient publicau "A fabla de Moncayo. Estudio comparativo con a lengua aragonesa". Transiberiano edicions contina asinas con a suya linia editorial Selgua que empecipió con o diccionario de Fernando Romanos. Iste nuevo libro, antimás de replegar lo vocabulario d'a zona de Moncayo, charra de muitos aspectos historicos de l'aragonés. Una nueva obra imprescindible pa las amants d'a nuestra luenga.

Entre entrevista y entrevista, tot temazos, prou que sí. Y de fundo, sentiretz a Vegetal Jam que tienen nuevo disco publicau, y que si no lo tenetz, ya tardatz a fer-tos con ell.






miércoles, 26 de julio de 2017

Comulgar con menu cinco estrelas

Por muit feito que i siga, a hipocresía cristiana nunca no deixa de sorprender-me. A redota y retirada d'o laicismo que somos vivindo en zagueras, con una extensión d'a hechemonia d'una relichiosidat de baixa intensidat, les ha feito perder, mesmo mas, la poca vergüenya que teneban. Nomas asinas s'entiende la intensidat y exito d'as campanyas en defensa d'a subvencions d'os colechios privaus, u d'o furto d'edificios y propiedatz inmobiliarias. 

En un nivel muito mas baixo ye lo reconoiximiento implicito d'a necesidat de sobornar y fer chantache a la catrinalla ta que pasen por l'aro suyo y vaigan, china chana, interiorizando os ritos y creyencias suyos. La zaguera que me clamó l'atención ye una falca radiofonica d'o restaurant Macanaz. En ella, se i siente a una nina que no quereba fer a  primera comunión, pero que li han feito venir a plego. Quan su pai le'n pregunta, a nina insinua que lo ha feito porque se suposa que la celebrarán en o restaurant que se i anuncia.

O feito de que a garra nino se le ocurriría motu proprio, fer a primer comunión  sino bi hese una contrapartida en forma de presents y fiesta, ye acceptau comunment. Pero fer-lo tant explicito me pareixe ya una "sacada de chorra" d'o cristianamen.

A quasi totz los ritos relichiosos les trobo bell sentiu. Lo baltismo ye a bienvenida t'o mundo; lo matrimonio, una celebración d'un compromis de vida en parella; los funerals, la necesaria despedida d'un ser queriu, .... Pero no pas la comunión. No se fa a garra edat critica, ni bi ha equivalencia con fenomenos naturals, como lo naiximiento u la muerte. Ye un rito 100% relichioso. Pero antimás ye inexplicable de tot ta un crio. Tamién ta un adulto d'o sieglo XXI, pero ixo ye atra historia. Cal recordar que en a comunión, - en la primera y en todas las demás -  as cristianas minchan una hostia y beben vin que, literalment, se transforma en a sangre y carne d'o suyo dios. Yo, de verdat, no sé a qui se le ocurriban istas cosas y como se popularizoron tanto.

Tot y que normalizau socialment, ta un zagalet de 9-10 anyos no tien mica sentiu sino bi ha una celebración dezaga. L'acto d'a primer comunión, per sé, no atraye a dengún. D'asti que por cada diya as celebracions sigan mas grans y pareixcan mini-vodas. Cal aumentar a presión sobre as fillas d'ateas u laicas que deciden que as suyas fillas decidirán quan puedan entender lo que a relichión ye y represienta.

No soi descubrindo garra cosa que no siga vox populi, y que mesmo os cristians reconoixen. Pero con tot y con ixo, contina sorprendendo-me una falca en a radio que reconoixca d'una manera tant caboliosa o chantache a la catrinalla ta fer-les participar en actos relichiosos. Ixo, y que as cristianas mas furas no s'encarranyen por ixe anuncio.