domingo, 28 de diciembre de 2008

Zienzia ta Cabo d'año. Lo millor d'a semana 004

Sobrebibindo a la tornada ent’a reyalidat, ban pasando as ¿borinas? nadalencas y poquet a poquet prenzipio a xublidar o 20 d’abiento. Una semaneta asperando por si Fedeguico deziba cualcosa y a biyer as reaizions que, a la fin, no’n son estadas ni tantas ni tan furas como ese quiesto. Con tot y con ixo encara remane en yo a buen sabor que me dixó a semana pasada, y estando o nadal!

- Chusto con o 20 d’abiento prenzipio o millor d’a semana. Aragonando ha publicau un chiquet articlo an que fa remeranza de as actibidaz que s’han iu fendo entre istas zaguers añadas arredol d’o 20 d’abiento y d’o – baltizau asinas fa tiempo – Diya d’os dreitos y libertaz nazionals d’Aragón. Astí i aparixen cuasi toz os actos que s’han feito y un par de cartels que m’han traito arrienda remenches.... Aprofitando pencho abaixo o bideo d'A Enrestida que metión en o conzierto. Buenismo, como tot lo que fa en zagueras l'autor y o colectibo.

- Grazias a Arale podié leyer en papel, que en dichital que fa muita galbana, o Publico de o Sabado y bi trobé un par d’articlos intresans: la uno charra d’un d’os mainates d’a ilesia en l’estau, o bispe Blazquez. Más exemplos d’a ilesia de Chesucristo ixa que agora mesmo fa misas en aragonés un diya y malmete contra muller, omosexuals y librepensadors a l’atro’l diya. Bien por els y por toz los que les chustifican! L’atra de millor leyer y más curioseta, ye sobre una teoría formulada por bels biologos de cómo prenzipio o sexo. Cuento que istas personas serán condenadas ta l’infierno. Antimás d’estar zientificos, imbestigan sobre o sexo y leyen a Aldous Huxley...

- Charrando d’afers zientificos, m’enteré por un articlo en o Periódico de Aragón de que se fan 200 años d’o naiximiento de Charles Darwin y que estiaño será l’año Darwin, fendo-se arrienda actos sobre a suya faina. A bier si dan tanto mal como con os cabos d’año d’a guerra d’independencia (española, prou que sí) u con Cervantes. Mientres alparziaba sobre istos afers, m’he trobau con un chiquet blog sobre zienzia con cosas muito intresans, encara que tamién bi’n ha atrás que no’n son.

- Ya plegan as primers notizias sobre Conflux, a nueba coleczión de Magic que a presentazión suya se ferá ta primers de Febrero, y que ye a segunda d’o bloque de Alara. Como siempre en Rebellion ya tienen a Fabrica de alparzeos y en Magic Madrid cuasi toz os diyas charran de bella nobedat.

Como no sé si me bagará d’escribir antis que no remate l’año, que pasez un sobrebueno cabo d’año an que sigaz y un millor año benién!


miércoles, 24 de diciembre de 2008

Os antifas y Telecinco

Grazias a o follet Buco ;-) he puesto biyer o bideo que pencho un poquet más abaixo. Ye feito por a Coordinadera antifa de Madrit (Castiella) con imachens que emitió Telecinco y atras que grabó pero no podió emitir, en pillar-les os antifa a qui yeran espiando con camara amagada. Ye un exemplo bien platero d'a manipoliazión que fan de contino.

Muito asoben emos de sentir tot ixo de que desacheramos con a manipoliazión. Pasa como con tantas atras cosas, que de tanto sentir-las terne que terne, a la fin mesmo te fan dandaliar. En ixos intes ye cuan un bideo d'ista mena cal. Ye chenial tanto como tratan a notizia con gloriosas frases como "antifaixistas, faixistas y tot ixo..." mezclotiando-lo con una manca de seriosidat y una desidia penible, u lo de "Antifa? nunca no eba sentiu yo ixa parola". ¿Y qué ostias fas en un debat sobre collas antifas, ababol?

Como las imachen, en iste caso son millor que cualsiquier cosa que pueda dezir, tos pencho lo bideo, biyez-lo dica la fin, y ya en charraremos, ...

Tos pencho un binclo, que o bideo ye de google videos y no tiengo problemas ta penchar-lo.

domingo, 21 de diciembre de 2008

200 dignidaz. Lo millor d'a semana 003

Lo millor d’a semana estió o diya d’ayer. Un diya an que bels doszientos aragoneses chilemos bien fuerte que queremos tornar a estar un país libre. A lagor que ayer se sembró no tardará en creixer y en fer fruitos. Un diya que prenzipió con una manifestazión istorica ta l’independentismo aragonés y remató con un d’os millors conziertos que bi ha abiu en ista ziudat. Muitas grazias a os organizadors por aber feito posible iste diya. Un bideo de a mani lo podez trobar aquí y tamién a notizia en El Periódico de Aragón. Tanimientres CHA zelebra os asesinatos y as imbasions constituzionalmen y iste ye o ran suyo. Ta qui no lo sepa o personache de CHA que i amaneix ye o transfuga que bella bez en he charrau. Sin comentarios, que no le’n cal garra.

L’aragonés no dixa de fer notizias. A la fin tenemos o nuebo Espiello ta leyer-lo con articlos sobrebuenos, como siempre. D’a lei de luengas ya no sé que notizia penchar, que cada diya en tenemos bella cosa nueba. Que sí, que no, que sin PAR, que sin CHA, ... quemisió. Nusatros con lo nuestro que a no tener lei ya i somos bien feitos. Ye curiosos que sí que ba conquerindo espazios en a TB, encara que muitas begadas tienga un trato tan penible como en tien. Purnas ha penchau os bideos d’os más de binte minutos que l’adedicón en “a nuestra”.

- Aquí tenez un articlo sobre as politicas educatibas y d’igualdat que se fan en Bolibia. Caldría que empentasen tamién a conserbazión d’o quechua y atrás luengas d’astí, pero a endrezera cuento que ye bien buena.

- Os organizadors d’o Nafarroa Oinez estión o miercols en Zaragoza ta combidar-nos a la suya fiesta d’a luenga basca en Nabarra. A suya web ye:
www.nafarroaoinez.net
- Ta esbastar un poquet pencho tamién un par de binclos sobre Chuck Norris y os feitos d'a suya bida un d’os grans actors d’a historia d’o zine y dos bideos mosicals bien diferens. O primer, de La Troba Kung Fu, una colla catalana eredera de Dusminguet y con un directo buenizo de tot, como contrimostrón l’año pasau cuan estión en A Inmortal. O segundo o Duque, - o de berdat- cuan yera chobenón, en o bideo d’una d’as millors cantas d’a historia d’o rock. Y más frikis, que tot cal dizir-lo...








domingo, 14 de diciembre de 2008

Manifestazión contra o siñal español

En amanando-se lo 20 d'abiento ban aparixendo as actibidaz que os diferens colectibos y organizazions paran ta iste diya nuestro. As zaguers que conixco son bien pinchas. Unas chornadas sin nombre a l'estilo d'as Chornadas por os dreitos y libertaz nazionals, pero organizadas por A Enrestida, Puyalón y Chobenalla y/u o BIC. Prenzipian o 18 con a charrada "Lanuza must die". Orichinal titol. Caldrá biyer de que se i charra y o debat de dimpués promete....

O cartel d'as chornadas lo tenez en http://aenrestida.wordpress.com/2008/12/12/chornadas-20-d-abiento-bic/ an que, antimás, podez trobar toda a informazión que cal. O 20 de maitins se ferá a manifestazión que pertoca, estiaño contra o siñal español d'a Plaza Aragón. O gran, pero cuento que tamién os atros tres que agora bi ha. Porque ta qui no en aiga parau cuenta, ya bi'n ha cuatro: o de capitanía, lo gran de dezaga de Chuan y dos debán fendo conchunto con os d'Aragón, Zaragoza y Europa. O cartel d'a manifestazión, que biyez alto, ye d'o millor que s'ha feito, en a mia opinión, dende fa muitismo en l'aragonesismo. Muitismo friendly, que dirían os anglofablans, estetica que, en zagueras s'ha trobau muito a faltar. Que ya ye prou de tanta pipa!

Y a biyer si l'año benién nos metemos toz d'alcuerdo ta organizar toz os actos de conchunta.

Dios ye masclista: O millor d'a semana 002

Tornamos con o milllor d'a semana. Prebaré de meter un titol todas as semanas que resuma lo millor, u como en iste caso, que charre d'un d'os afers.
- En ixa cristofobia que diz que bibimos en zagueras -sisquiá- estié fa bels pocos diyas alparziando sobre o masclismo en l'antigo y o nuebo testamento. Lo que trobé estió muito millor. D'una man, l'articlo que amenistaba, d'atra una pachina sobre ateismo sobrebuena: http://www.sindioses.org/ que fa bels diyas que ye d'entre os binclos d'iste blog. L'articlo fa un repaso por zitas biblicas masclistas y por a opinión d'a ilesia u ilesias cristianas. I charran d'a catolica, pero tamién d'a resta de corriens d'o cristianismo. Nunca no he entendiu que belún pueda amenistar un dios ta esplicar-se l'uniberso suyo dimpués de fer los diez u doze años. Alto u baxo dixé de creyer en un dios a la mesma edat que dixé de creyer en follez, fadas u David o Gnomo. Y no entiendo que mica adulto pueda creyer-ne. Pero, ta yo, ye mesmo de más difizil entender que una muller, siempre despreziada y somesa por a/s ilesia/s pueda creyer en o dios que lo fa posible por aizión y omisión. No digamos un omosexual, ...



- En o chemeco d'as parolas torna a aber-ie bida! Dimpués de bel tiempo que no tartiba ha tornau a penchar cualcosa y, como ye normal, ye un buenizo articlo sobre a normalizazión / normatibizazión d'a catalán. En muitas d'as cosas que i diz aplicables a l'aragonés. Ya se te trobabaa a faltar en a blogosfera, charrabis! Sobre ixe prozeso contino de normalizazión que tienen as luengas subordinadas -que, en a mía opinión continarán estando-ne ta cutio todas as que no tiengan un estau propio que las refirme-trobé un bideo de casualidat. Asobén dizen os saputazes -y o bulgo, siempre saputaz tamién- que, con isto d'a globalizazión y d'a inmigrazión, as luengas minoritarias / minorizatas no i cullen. Que son barraches t'a combibenzia con os nuebos abitadors d'o país que bienen de luen. En Em dic Mireia tamién se'n charra con un personache inmigran que siempre se l'endrezan en castellano y se mete toda nierbuda. En Cataluña se son fendo muitas cosas en a endrezera de normalizar o catalán tamién entre ista nueba poblazión. Un bideo sobre ixo lo tenez a la fin...
- D'a globalizazión debandita, en ha surtiu a crisis ista que diz que tenemos. Siempre he dito que l'afer u disziplina que menos cosas sé ye a economía. Ta yo ye un misterio de tot. Fosca como a foscor. Manimenos en O Diaple d'o Gadget trobé un bideo -de o programa de Buenafuente- que m'esplicoteyó de raso porqué y cómo emos plegau en a crisis. Un chenio, l'ombre iste.
- En a FLA, en o puesto de Malavida, beyé que, a la fin, Juako Malavirgen eba publicau un disco. Juako ye d'ixos pocos mosicos que crei que a cultura be d'estar libre y de baldes y cuento que, de diners, no'n ba ni millor ni pior que cualsiquier atro mosico aragonés. En a web suya podez sentir de baldes o disco. Y si tos amanaz a o Salón d'o comic que se ferá o cabo de semana benién tamién podrez mercar-lo-ie en o stand de Malavida.
A despedida la foi con d'os bideos. O primer, una d'as millors eszena d'o zine Manga, que fazió que remerase o tiempo ixe que m'empapuzaba d'as zintas de urotsukidoji, akira y cualsiquier cosa con un Mechwarrior. O striptease de Dominion Tank Police. O segundo sobre o catalán y los inmigrans que'n he charrau alto. Que tos faiga buen prebo...

Dominion Tank Police:



Catalá:



sábado, 13 de diciembre de 2008

Terne que terne con blinking

Tos charré fa bellas semanas d'un mazo que eba costruyiu alazetau en criaturas con efectos de dentrada y/u salida en chuego y con bels enchizos y bichos que trayeban bichos d'o zimenterio. O mazo no funzionó masiau mal, pero tampoco no consiguié pasar que una ronda y en belunas d'a resta de rondas, no fazió ni brenca ni meya. Con tot y con ixo, ya sabez que soi una mica zerrín, tozola y de mal reblar, asinas que dezidié de continar fendo eboluzionar o mazo. Conoixeba buena cosa de cartas que podeban cullir-ie, pues siempre soi a la tisba de dos estratechias, ista y os elementals, que me fan muito goyo.

O resultau ye ista blinking reanimator 2.0 que o suyo listau tos pencho abaixo. De cuatro rondas chugadas en o zaguer torneu d'estandar, en ganó dos: una contra una petatierras y l'atra contra una de fadas -una mica zaborrera, cal dizir-lo-. Perdió contra merfolks y kithkins pero as dos por 2-1 asinas que se contrimuestra que puede ganar-les. Antimás ye un mazo bien dibertiu de chugar. De feito, l'adchetibo más repetiu en bier-me-lo chugar ye estau fastioso. O contrario gosa tornar-se barrenau en bel rato, de biyer como piruleas terne que terne. Sobre tot os tribals que, cuan lo tienen tot presto t'amolar-te, chugas una Ira de Dios, escoscando a suya parti d'a mesa, y os tuyos bichos con remanir -traduczión más que libre de l'abilidat persist- tornan t'a mesa con toz os efectos de dentrada. Rico, rico.

Ya que charramos de Magic, Rebellion ha publicau un par de notizietas majas. La una l'aparixión de Nicol Bolas como Peteniador de planos -planeswalker- en Conflux. Como tampoco no le tiengo guaire cariño, no ye que m'aiga posau guaire barucoso. Sí que me foi más contento d'a linia de productos que ye publicando Wizards en zagueras. Os paquez de dos mazos precostruyius con tematica y sin formato. O paquet de Elfos contra goblins estió bien majo y Jace contra Chandrá, ta yo, ye una alfaya. Agora plega Divine vs. Demonic, que ya podez contar por do irá...

Blinking reanimator 2.0:
Asesino gorro rojo x 4
Convertirse en niebla x 3
Visionaria élfica x 2
Saga profanadora x 3
Garganta chillona x 4
Efímero fluctuante x 4
Maniquí temporario x 4
Despreciables de cocina x 3
Anillo del olvido x 4
Ira de Dios x 3
Trow desagarrador x 2
Cuevas de Koilos x 4
Brezal fétido x 1
Llanura x 4
Pantano x 4
Pradera vívida x 3
Yermos de Llanowar x 2
Cenagal vívido x 2
Clachan rústico x 2
Espesura murmurante x 2

jueves, 11 de diciembre de 2008

$GA€ pude

Y cuan l'arraclán fizó a o zapo, íste le preguntó: "porqué?". "Ye en a mía naturaleza". le respondió l'arraclán. Igual como ye lochico que os arraclans fizen, ye lochico que los mafiosos faigan cosas de mafiosos. Por un regular os mafiosos paran cuenta de que as suyas cosas de mafiosos no se faigan publicas pues podrían tener problemas con a lei. D'atra man, os mafiosos gosan controlar os meyos de comunicazión de masas, os gubiernos y mesmo os chuezes, polizias y atras instituzions adedicadas -teoricamen- a proteixer os dreitos d'os ziudadans. Pero de cabo ta cuan, tienen bel forau, bel mafioso espiguardau no fa bien as cosas y les pillan en una.

Asinas pasó que l'asoziazión mafiosa SGAE, que be de gastar más diners en abogaus ta esfender-se de pleitos que en esfender os dreitos d'os autors, perdió un chuizio y abrá de bosar 60.000 euros de piñora por grabar en un casorio sin preguntar a dengún. Ye una chiqueta bictoria, pero a lo menos s'han contrimostrau dos cosas: 1. se les puede ganar en un chuizio y 2. ye cada begada más publico a moral d'istos siñors y os metodos que fan serbir. Que muitos ya los conoixemos bien, pero muitos atros no pas.

Cuasi en a mesma semana, tamién ganó unatro chuizio que dixó sin mosica unas fiestas balenzianas de moros y cristianos. Como sabemos tamién gosan cobrar en festibals beneficos. Podríanos preguntar si en o de o Jose Carlos ixe, tamién se lebón o suyo botín, ... Con tot y con ixo, contina sin aber-ie mica partiu politico que se les concare. Toz tienen masiau miedo d'os mosicos "populars".

Contino tos dixo un binclo ta un documento que trobé fa bels años. Ye de cuan ZP plegaba d'arribar en o poder y quedó en Moncloa con "mosicos" de toda mena. Entre els bi eba una colla -Dead Capo- que no conoixco, pero que eslampó d'o control d'a mafia y publicó ista cronica d'a trobada. Sobrebuena y ta esmelicar-se-ne. U ta plorar, seguntes...

Mientres la leyez podez ascuitar a Lamatumbá, una colla gallega que conoixié en os conziertos d'a FLA y que me fazión asabelo goyo. (No sé si pagarán a la $GA€, pero a yo sí que lo que me importa ye a mosica...)





lunes, 8 de diciembre de 2008

Lo millor d'a semana: 001

Con o segundo cabo d'año de Tierra de Barrenaus, quiero prenzipiar un nuebo trestallo: Lo millor d'a semana. Asobén trobo por o rete cosas que me fería goyo de charrar-ne aquí, pero que no tienen prou suco u que simplamen y por galbana, a la fin no en charro. Todas ixas cosetas irán chuntas en una mena de resumen de cada semana. Tamién ye una traza de escribir, a lo menos, cuatro u zinco post a o mes, que en zagueras os fabloggers parixemos un poquet chandros.

Y asinas prenzipia O millor d'a semana 001:
- Grazias a Desde Banarús conoixié a una d'as organizazions más penibles d'Aragón: CHEN. O nombre suyo ye en aragonés y dizen rasmia y cosas asinas, pero encara no tenemos guaire platero qué se suposa que son (Lo que son lo sabemos toz...). CHENtota.


- Parix que os diners que Alejandro Sanz furtaba, SGAE mediante, lo iba ficando en una cuenteta en Liechtenstein. Ai, que trabeser iste Alex! Que pena me fa que t'aigan pillau! Guarda si se queixaba de que a piratería yera delito y que os 'manters' yeran as piors personas d'a mundo y... fote! él lebando los diners nuestros ta paradisos fiscals. A notizia en Publico. Por zierto, belún sabe como se diz Liechtenstein? Cuento que cualcosa como /lijtenstain/ y no pas /lichestein/....

- D'as chornadas antifaixistas no'n he charrau brenca, pero son estadas bien pinchas. A charrada y o conzierto de Muskaria estión prou buenos y bi eba arrienda chen. Por lo que he sentiu tamién a resta d'actos. Cal felizitar a la Coordinadera y a la resta d'organizadors. Entre els A Enrestida charra en o blog suyo sobre as chornadas: http://aenrestida.wordpress.com/2008/12/02/unas-chornadas-plenas-dilusion-y-de-chen/

- Ya he dito bella bez que no me fan goyo as repetizions en Magic. Que tot lo mundo chugue con Affinity, Zetro-Canto y mierdas parellanas me parix que fa d'o chuego un caten, asinas que me cuaca asabelo que se faigan barallas orichinals y que istas trunfen. Una d'as zaguers que he bisto chugar, que funziona bien y que ye orichinal (y friki) mesmo en o nombre ye a Comunidat de l'anillo que fa serbir un camatón de peteniadors de planos (Planeswalkers) ta ganar. Fez-le una güelladeta aqui.
- Como no podría estar d'atra traza y, ta rematar un par de bideos. Sobre mixins y sobre Los Gandules (Os chandros), bersión charanga....

Mixins que s'estozolan:




Los Gandules con charanga:

sábado, 6 de diciembre de 2008

20 d'abiento y II cabo d'año

Cuasi de presen de cabo d’año ta iste blog (Que’n femos dos ya!) me plega a notizia d’o conzierto que han presto os enrestidos t’o 20 d’abiento. En ista calendata remeraremos unatro año más a figura de Chuan V de Lanuza, o mozo, asesinau por esfender os dreitos y libertaz nazionals d’Aragón en 1591, y en 2008, umillau de tot por os quemisió-nietos d’aquels boques.
O conzierto ye difizil d’amillorar: Magnetophones, que no los he sentiu pero tiengo muito buenas referenzias. Prau que en cada conzierto amilloran más. Y ta rematar, una d’as millors collas d’a historia d’a umanidar: Obrint Pas. Asinas que esborraz tot lo que tenesez en l’achenda ta ixe diya porque no se i puede mancar. Toda a informazión la tenez en:
http://enrestida2008.wordpress.com
Grazias, A Enrestida, por iste presén. Tierra de Barrenaus tos lo agradeix asabelo.

jueves, 4 de diciembre de 2008

Dreitos y libertaz nazionals

Ya s'amana o 20 d'abiento y os aragonesistas ban / imos parando os nuestros actos d'omenache y de remeranzas d'o que estiemos y queremos tornar a estar: un país independien y, más que más, con dignidat. Un d'os actos ya clasicos son as Chornadas por os dreitos y libertaz nazionals d'Aragón. Estiaño, en a suya VIII edizión, ye organizada por Unibersidá - Coleutibo Aragonesista (como toz os años, fueras d'o primer) a qui se adiben Astral y CHERA. O programa ye bien intresán, y más en un inte como en o que somos. Con una rebaxada en tot lo zentro simbolico de l'aragonesismo y en momentos (u no) de fer-se a lei de luengas. Tos pencho contino o programa y ya sabez que tenez más info en a pachina d'UCA: www.unizar.es/unibersida

Martes 9: "Entre la Plaza de España y la Plaza de Aragón" (Fuerza simbólica del monumento al Justicia) Ponente: Lorién Gimenez del L.I.S.A (Laboratorio de Investigación Social de Aragón) Salón de Actos Faculta de CC.EE y EE (planta 0) Hora: 19:30


Martes 16: “EZLN: 25 años de Autonomía Zapatista. Dignidad y Resistencia desde el Sureste Mexicano” Ponentes: Caracol Zaragoza-Red por la Autonomía Zapatista Salón de Actos Faculta de CC.EE y EE (planta 0) Hora: 19:00


Jueves 18: “Nueva Ley de Lenguas, ¿cómo es realmente?” Ponentes: Carlos Abril, miembro de la Academia de l´Aragonés Aula 22 Facultad de CC EE y EE (planta 2) Hora 19:30 Con la colaboración de Unibersitaires por l´aragonés.

miércoles, 3 de diciembre de 2008

XIV FLA

En momentos de fer o segundo cabo d'año de Tierra de Barrenaus (qui iba a pensar que duraría tanto), torno t'o prenzipio y remero que iste cabo de semana se fa a Feria d'o Libro Aragonés en Monzón. Parix que se han represo os antigos costumbres que fazión que ista Feria estase tan majiza, pues estiaño tornan a fer conziertos y torna a puyar-ie lo tren. Os conziertos serán as dos nueis d'a Feria (a d'o 6 y a d'o 7) y, entre atros muitos i tañerá Azero!!! BIEEEEN! Ya los trobaba a faltar, que fa muito tiempo que no los beigo en conzierto.

Ta los que no lo aigaz conoixiu, pues ya fa bels años que no se fa, bi ha un tren que puya ta Monzón dende Zaragoza de maitins (9:20) y bi torna de nueis (21:05). Ye una buenisma ideya. Nomás son zinco euros ida y tornada y puez biyer a Feria y mesmo o castiello de Monzón que ye bien pincho. Os detalles los podez leyer aqui.


Sobre a propia Feria bi seremos los de toz os años: Nogara, Fablans, Consello, REA, Gara d'edizions y muitas atras editorials, en castellano y en aragonés. Y cuento que tamién i serán os barrenaus capinazes de Malavida.


Por desgrazia, estiaño parix, seguntes informa Aragonando, que tamién tornan cosas malas. A extrema dreita d'a FACAO torna a tener-ie stand ta espardir as suyas fateras. Ye una pena que a ista chentota les dixe compartir puesto con chen que fa un treballo tan sobrebueno. Saca muitismo prestichio t'a FLA.


domingo, 30 de noviembre de 2008

sábado, 29 de noviembre de 2008

O leopardo y o babuino

Iste bideo lo fazión un diya en La dos, en os documentals d'a siesta, y güe lo he remerau. Ye, prebablemen, una d'as istorias más polidas que nunca no he bisto. Antimás ta un mono como yo, que cudia d'un mixín como Kurt (en a foto), ye poliu biyer a istoria de rebés, unatro mixín más gran cudiando d'un mono más chicot...

viernes, 21 de noviembre de 2008

Mazo ta Estandar

Soi estau dandaliando dica zaguer ora si ir u no t'o campionato de Magic d'ista tardi. Ye d'estandar y en o zaguer, con un mazo d'elfos, no fazié que a risa. A lo menos yo soi en isto de Magic simplamen ta pasar un buen rato, que si no, bibiría encarrañau tot lo diya. Que bi ha chen que ye asinas...

A la fin, y si no surte garra problema, sí que bi iré. Y a enchaquia ye a delera por prebar un mazo. Nunca no me ha feito goyo lo que fa la más gran parti de chugadors de Magic. Ixo de mirar-te en internet bel mazo, copiar-lo y chugar-lo, me parix que quita a millor parti d'o chuego, que ye a de diseñar o mazo. A más, gran parti d'as bezes, no funziona ni brenca ni meya, pero cuan belún consigue esfender-se, l'argüello de que siga estada ideya tuya ye incomparable. Asinas que he tornau a treballar sobre os "parpagueos" u "blincos" (dimpués charro de do bien ixo). A custión ye simpla: chugar criaturas que tiengan efectos que se disparen en dentrar en chuego y aprofeitar atras cartas y efectos ta que en salgan y bi dentren terne que terne seguntes baiga calendo. Asinas, de criaturas en chuego os 'asesino chapero royo', os 'dispreziables de cozina', os 'garganchons fundos' y bella coseta más. Ta fer-los blincar -u parpaguiar-, como momentary blink ya no ye legal, caldrá fer serbir 'tornar-se boira' y os manequin, antimás de os eroes cambiaformas, que si los matan, ferán tornar t'o chuego a criatura antis amparada por els. Ta esfender-me i meto tres 'iras de dios', 'edictos cruels' y o mio quiesto 'aniello d'o xubliu'. O resultau ye un mazo negro-blanco, que feba muito tiempo que no chugaba ixas dos colors que, a lo menos en as prebatinas caseras, funziona.


Puestar que no gane cosa, pero de seguras que pasaré un buen rato. Más que más, biyendo as caras d'os chugadors que nunca no entienden que t'arrisques a chugar cualcosa que no aparixca en internet.



Sobre o parpagueo u blinco: a carta en custión se diz Momentary blink, traduziu t'o castellano como 'pestaneo momentáneo'. O conzepto ye ixe: que a criatura sale d'o chuego ta dimpués tornar-ie. Ta os que no chugaz, isto se ripresenta por un regular debantando a carta y posando-la unatra bez en a mesa, que sería como un blinco. Asinas que, d'una man, a traduczión literal abría d'estar 'parpaguear una criatura'. Pero me fa más goyo blincar. D'una man podría prener-se como l'aragonesizazión d'o berbo inglés 'to blink' y d'atra dreitamén como blincar, que ye lo que fan as criaturas.



Y si dimpués de tot isto bi ha belún que quiera prebar de ganar-me a friki, que prebe d'escribir cualcosa pior que isto en o blog suyo. Jua,jua.jua....

miércoles, 12 de noviembre de 2008

Unibersitaires

Con muitos cursos prenzipiando l'aragonés contina mobendo-se. Encara mancan prous diyas t'a II Trobada pero o concurso de microfalordias ya en tien siet. En tan poquet tiempo cuento que ye un exito. Ayer, en a publizidat d'a FNAC ya i aparixeba a charrada que ferá Chorche Romance.
Tanimientres, Unibersitaires, un nuebo colectibo en esfensa de l'aragonés que tendrá l'actibidat suya más que más en a Unibersidat Aragonesa, se presenta ista tardi a las 16:55 en l'aula 501 d'o edifizio Interfacultaz. Ya caleba que bel colectibo prenese l'erenzio d'a Colla Unibersitaria por l'aragonés (CUA) que, ta qui no los remere, esfendión l'aragonés fa muitos años en a unibersidat, publicando o boletín O Lupo, con qui muitos aprendiemos tanto. Por experienzia, a unibersidat ye un puesto furo an que esfender cualsiquier ideya, pues ye plena de mielsudos que les fa galbana cualsiquier cosa. Y no porque sían masiau aqueferaus indo ta clase, que muitos nian i ban. A tamás d'ixo, me pienso que ye un d'os puestos an que cal estar. De feito ye una pena que mientres istos años no bi aiga abiu garra colectibo cultural en esfensa de l'aragonés que aiga conseguiu sobrebibir más de tres diyas. Asinas que tos deseyo toda la suerte d'o mundo y que espardaz tot lo posible l'aragonés en a unibersidat! Y más que más en ixa facultat rebutién de saputazes que toz sabemos....

Por no fer un articlo de propio ta una fatera, contino tos pencho un bideo que toz os antimadridistas, que creigo que en somos muitos, sabrez gronxiar: Aupa Irún!



D'Atenco ta Tosos

Cuantas luitas en cuantos puestos, por cosas tan diferens... Encara que a la fin gosan estar todas a mesma luita contra un mesmo enemigo, o capitalismo, con diferens caras.

Iste cabo de semana prenzipipan en Zaragoza unas chornadas sobre a luita zapatista, organizadas por Caracol Zaragoza. O primer acto será una borina en Vía Láctea iste biernes y mientres a semana benién se ferán charradas y una asambleya d’iste nuebo colectibo. O cartel lo tenez punchau alto y bi podez leyer o programa. Si querez saber-ne más en iste binclo de La Enredadera tamién bi ha más info.

Ta los que no conoxcaz guaire sobre ista luita tos recomiendo que tos informez. Fa bels años yo tampoco no’n sabeba guaire, pero grazias a Arale que me ba informando, he aprendiu muitismo sobre como se fa una reboluzión de berdat. Bi ha arrienda pachinas por internet, asinas que ye prou fazil informar-se-ne. Si tos estimaz más que tos lo espliquen en persona, a chen d’o caracol serán encantaus y podez ir ta l’asambleya que ferán o miercols 19 (beyer cartel).

Atra luita, en iste caso, más de casa, ye a que tien a chen d’a ribera uerbana contra os especuladors. En istos diyas de ExpoBorrainas, Gran Stafas, Arramons y mierdas d’ixas, o trabase d’a Uerba pasa silenzioso sin que se’n diga ni escriba guaire. L’Asociación Huerva Vivo tien un blog funzionando: http://huervavivo.wordpress.com an que ban penchando as notizias y combocatorias que ban fendo. Ista tardi, en o Zentro Cultural Laín Entralgo, a las 19:30 ferán una charrada an que esplicarán as razons suyas ta oposar-se a ista nueba formigonada. Asperemos que asinas baigan arroclando a chen en ista luita y que, a manifestazión combocada o 22 a las 10 en a Plaza d’a Ilesia de Tosos sía a rebutir de chen.

martes, 11 de noviembre de 2008

Torne bustet maitin

Remero ixa canta de GEN que deziba hoy te ha tocado madrugar / para ir a la oficina del INEM / te han dicho que aquí no queda nada / no hay ningún trabajo que ofrecer / lo siento, vuelva usted mañana. Iste maitín la teneba apegada igual como una mosca mientres leyeba as ufiertas laborals de l'INAEM.

He teniu muita suerte en a bida mía y, dica güe, no me eba caliu mirar guaire treballos. U me los he trobaus, u m'han surtiu, u dimpués d'una semana mirando-ne me han clamau. Pero en istos tiempos de crisis, a cosa parix más difizil. Y en ye. A ofizina de l'INAEM yera a rebutir de chen. A morfuga que bi eba yera un mezclallo de tristura y desespero con un siñalín de complizidat entre toz os que bi yeranos. Atros serbizios que he feito serbir dan zita d'aquí a un mes. Me i he trobau con un primo de yo que lo han forachitau dimpués de cuatro años treballando en a mesma interpresa. Unatra bictima d'un ERE. Como deziba una amiga que tamién me i he trobau: caldría que fese ringlera o fillo de **** que ha imbentaui isto d'a crisis...

Aspero que toz os que he bisto iste maitín siamos treballando en poquet tiempo. A! Y si belún amenista os serbizios d'un inchenier tecnico electronico, con experienzia de cambrero, cozinero, almenistratibo, mayestro, informatico y que aprende rapedo lo que calga, ya sabe ta do endrezar-se ... A! Y mientres escribiba isto he remerau unatra canta. Ixa de Reincidentes, d'os primers tiempos suyos, que deziba: si el INEM te quema / quema el INEM...

jueves, 6 de noviembre de 2008

1979


Naixié en 1979. No me lo eba proposau ni cosa parellana. Estió casualidat, igual como lo de naixer en Aragón. Pero ye de dar que os naixius en ixe año somos as millors personas d'o mundo, os que pior lo emos teniu, os que más emos treballau y menos emos rezibiu...... y asinas asinas dica que gomecase, podría continar. Yera groma tot lo anterior. Siempre me ha feito muita risa lo de dar-se bamba con a chenerazión d'uno. Tot ixo de "yo, cuan teneba a tuya edat...", "a busatros no tos ha tocau luitar", "a mosica d'os 80 ye a millor", "cuan yo yera choben sí que bi eba ideyals" me fa un mezclallo de sensazions entre risa y peneta. Parix que os umanos ideyalizamos de tot o tiempo an que yeranos más chobens y que creyemos que os chobens d'agora son una mierda.


Pues yo no. Prou que cuan yo yera choben luitabanos muito: los cuatro tolais de clase que nos apuntabanos ta todas. A mosica d'os tiempos mios yera la millor: Encara que ta par d'alabez muitas d'as cosas que agora creigo que son alfayas me fesen fastio. Os chobens d'agora no luitan cosa: pero conoixco buena cosa de zagals d'arredol de binte años más luitadors que o 95% d'o mio instituto. Y yo tamién fazié a tana t'os mayestros. Y si esenos teniu mobils prou que esenos grabau toz os lapos que nos fotebanos. Y prou que febanos botelladas. Yo lo dixaba tot escoscau pero muitos atros d'a mía edat, no.


Me pienso que as cosas no cambean guaire entre chenerazión y chenerazión. U a lo menos no tanto como nos creyemos. A tecnolochía sí que cambea, ye de dar. Pero a rebeldía d'os chobens y o catenazos que podemos estar os que prenzipiamos a pentinar bella caneta (de pels, no de l'animal), ixo no cambea guaire. Yera catenazo lo pai mio y os mios chirmans. En soi yo agora, y en serán bels zagalez que conoixco malas que creixcan siet u güeito años.


Tampoco no m'identifico guaire con o rollo de "a mía chenerazión", porque creixié educau por unos chirmans más de diez años mayors que no yo y goso ir de borina con chen más choben que no yo. Con tot y con ixo, as remeranzas que me trayió un bideo que me imbió Pantumak, estión bien majizas. Asinas que le'n agradixco muito y tos lo pencho abaixo ta que le faigaz una güelladeta. Os d'a mía chenerazión de seguras que ferez un buen ratet.


IN

A mosica sonaba por os altabozes d’a ziudat. As radios y telebisions no dixaban de charrar-ne. A chen impliba a carreras. Chilaban, cantaban, blincaban, s’acarrazaban. Consziens de que o poder que eban feito mientres años, de que nunca no aber reblau, les eba endrezau dica ixe inte chusto. Os más biellos ploraban de goyo remerando os primers años de luita. Os más chobens paraban cuenta d’estar bibindo un inte istorico y de que agora les caldría fochar firme. Toz sabeban que un nuebo mundo prenzipiaba.

Ista ye a microfalordia presentada por Tierra de Barrenaus t'o concurso d'a II Trobada de Fabloggers.


miércoles, 5 de noviembre de 2008

II Trobada

Buenas notizias t'os fabloggers! A segunda trobada ya ye presta. Grazias a lo treballo de Mensachero que nunca no rebla en isto de achuntar-nos a toz de cabo ta cuan, habemus trobada. A calendata eslexida ye o cabo de semana d'o 21 - 22 de nobiembre. Con charrada en Fnac y tot! Qué ran! Unatra nobedat ye a combocatoria d'un concurso de microfalordias que ya ha prenzipiau y que encara bi ha de plazo dica lo quinze ta imbiar-ne. Son nomás que 100 parolas, asinas que mesmo os alumnos de primer ran podez gosar de fer-ne una. Ta saber-ne más: http://trobada.blogdns.net/

viernes, 31 de octubre de 2008

TimOrange II

Que dengún piense que aquel afer con Orange se soluzionó. Ye berdat que ya tenemos ADSL, telefono fixo y telebisión. Ziento de canals y no i fan que fiemo. O caso ye que les denunziemos debán d'a Chunta d'Arbitrache y d'o Chustizia d'Aragón (en aragonés con iste segundo). Os dos nos dizión que tenebanos razón. Con os primers, Orange nos eba de bosar 120 euros que encara somos asperando y que, por ixo, les emos denunziau en o chuzgau. O Chustizia estió más rapedo y en pocos meses nos ingresón 43 euros. Asinas que parix que tenemos bella miquirrina de razón. Isto ye un poquet a parti "previously on Tierra de Barrenaus"...
Agora prenzipia a segunda parti. En as nuebas facturas nos cobran conzeptos que no emos achustau en garra inte. Entre atros dos numeros plus. Ista ye, si fa u no fa, a charrada que a mía quiesta parella, Arale, tenió con a treballadora de Orange por telefono:

- Buen diya! Soz cobrando-nos un euro de más en a nuestra factura.
- Ye que bustet tien achustaus dos numeros plus, pero uno ye de baldes. Asinas que nomás bosa un euro.
- Sincuse, pero yo no achusté garra numero plus.
- Aquí mete que sí.
[rato pleitiando que sí, que no...]
- Bueno, alabez, a lo menos diga-me que numeros son, ta poder fer-los serbir.
- Sincuse, pero a politica de pribazidat d'a interpresa no nos dixa dar-le ixa informazión.
- Me ye dizindo que no puedo saber que numers he achustau?
- Sincuse, pero a politica de pribazidat d'a interpresa no nos dixa dar-le ixa informazión.
[Churamentos]
- Bien, pos de-me de baixa d'iste serbizio.
- Ta dar-le de baixa d'o serbizio amenisto saber qué numers tien bustet achustaus. Puede dar-me-los?
[faltadas]

Y asinas mientres meya ora, con mis pais ascuitando, que beniban a fer socalze con nusotros. Continaremos con a baralla, pos ya ye una custión de dignidat. De todas trazas, tos combido a toz y todas a denunziar a istas chentotas. Me importa igual Orange que Timofonica que lo que sía, toz son unos zaborreros. Ya beyez que o Chustizia nos ha dau perras (y ha teniu una queixa más en aragonés ta las estadisticas) y Consumo d'a D.Ch.A por agora nos da la razón y puestar que as perras. Ye de dar que o sistema no funziona, pero os ziento y pico d'euros enfuelgan un poquet o diya...
Ta prebar que no soi solo, un par de binclos:

domingo, 26 de octubre de 2008

Enta Banarús

O zaguer articlo de Desde Banarús ye un d'ixos que sabe fer el tamién y que tantas charradas iperfrikis en as nueis de borina nos ha dau. De seguras que a benién begada que nos beigamos podremos charrar más fundo d'ixe afer, pos ye bien intresan, pero por agora, me fería goyo comentar bellas cosas.

Sobre o creximiento sostenible, remero que en unas chornadas que estié fa bels pocos años se charraba sobre a insostenibilidat de no remero qué. Creigo que yera un entibo en Latinoamerica. Una d'as personas que feba a charrada charró sobre creximiento sostenible. Dimpués d'a charrada sentié a un d'os organizadors una d'as millors frases que he sentiu: "o creximiento, por definizión no ye sostenible". Ye berdat. Garra cosa puede crexer ta cutio. Nunca. En garra caso. Bueno, talmén a entropía, pero ixe ye atro afer y, por agora, sin aplicazión practica.

Sobre as posibles soluzions t'o problema que planteya l'actual modelo, bi'n ha unatra que o blogaire no'n ha charrau, y que ye tan simple como amugar a natalidat a un fillo/a por parella. U mesmo menos. Basectomia solidaria por decreto, que cantaban DEF CON DOS. Prou que ixo nomás se puede fer con un gubierno autoritario y que tendría arrienda d'implicazions morals dillá d'a propia superbibenzia d'a espezie umana y a planeta an que bibe. Antiparti d'a mesma superbibenzia, me pienso que o modelo de desembolique, de relazions umanas y de sistema productibo oczidental nos endreza dreitamén ent'a idiocracia. (Los que no aiga bista a zinta, beyez-la).

L'atra soluzión que se debuxa ye a de jopar d'a Tierra enta atras planetas u, como diz Banarús, enta atras reyalidaz paralelas. Prou que ixa ye una soluzión temporal, una fuyida entabán como bien i diz. De feito, en un contet de Isaac Asimov, iste charra d'un uniberso an que a chen merca casas en planetas desiertas de reyalidaz alternatibas. O protagonista en merca uno y bi troba a chen charrando en alemán costruyindo-ie una casa en l'atro cabo d'a planeta. Alabez, charrín-charrán con els, paran cuenta de que os dos unibersos han teniu a mesma ideya y, en aber-ie, tamién por denifnizión, un numer infinito de reyalidaz alternatibas, yera de dar que, en bel inte se trobarían.

Paranoias de frikis u os berdaders problemas d'a umanidat?

jueves, 23 de octubre de 2008

Cosetas

Sin cuasi tiempo ta escribir articlos d'os que me fan goyo y sin cuasi combocatorias no bi ha guaire bida en iste blog. Con tot y con ixo siempre bi ha sobre qué escribir y si tiengo un ratet abré d'aprofitar-lo. Prenzipio con l'afer d'o siñal español dezaga d'o Chustizia. Y unatra begada torno a fer serbir o blog ta mirar de trobar rispuestas. O caso ye que, fa un par de diyas, pasé por l'antiga Plaza Aragón y bi yera o siñalaz nuebo. Manimenos me truco asaber-lo lo ficazio que no i yera ni l'antigo siñal español que gosaba d'estar-ie a o canto de l'aragonés, ni o de Capitanía. Belún en sabe cosa? Yeran en a labadora u han plegau en bella mena de pacto con quemisió yo qui ta cambiar dos chicorrons por uno gran?

Tanimientres abremos de pasar bel rato dibertiu. Y por ixo ista nuei marcharé t'a Vía Láctea porque i fa un monologo Charly Taylor. A iste ombre lo conoixié tañendo lo biolín en o Fierro (RIP). Ixe diya eban dito que i actuarían un inglés, un irlandés y un aragonés. A la fin no estió que l'inglés iste, pero me fazió muito goyo. Entre pieza y pieza mosical feba monologos que te'n esmelicabas. O biolín, no l'he tornau a biyer tañer-lo, pero con o suyo show contina y siempre que puedo y m'entero boi a biyer-lo. Con isto d'o Internet, mesmo tien una pachina como a buena chen, que pencho en a marguin y aqui.


No sé si Vía Láctea u Charly Taylor bosarán a la $GA€, pero ta qui tos faiga tantismo fastio como a yo, bi ha una manifestazión combocada contra els maitín de tardis por a CNT. Sérá a las 19:00 en a puerta d'os ladrons d'a carrera Bretón. Si no remero mal o numer 12. CNT no ye d'as organizazions que más goyo me fa, pero a berdat ye que en ye una d'as pocas que se concara de tot contra istos boques.


Y ta rematar, dimpués d'a manifestazión, os nogarers y as nogareras se chuntan en Nogara ta fer l'acto de debantadera d'os cursos de toz os años. Estiaño antimás d'a dentrega de titols, tamién bi abrá a tradizional lifareta, un pasabillas y a obra de teyatro que trunfa por tot lo mundo O yayo bolador. Asinas que aspero beyer-tos-ie y que nos faigamos cualcosa. A la fin sí que m'ha cundiu lo post....

viernes, 17 de octubre de 2008

Una de bideos

En estar sin treballo, puedo, de maitins mientres me desayuno, bier a TB y ya no soi espenchau d'o mundo de tot. De feito l'atro diya podié bier a entrebista que le fazión a Manuel Castán, presidén de l'academia de l'aragonés en Aragón TB. Tos la pencho más abaxo, que de seguras que muitos yeraz treballando u en clase. Tamíén pencho un bideo que m'he trobau d'o programa Vaya Semanita que fan en ETB y alto, o cartel d'a Feria de tradizions. O programa lo podez leyer aqui.

Manuel Castán



Puen d'o Pilar abertzale

jueves, 16 de octubre de 2008

Aduya con un cuadro

Boi a aprofeitar por una begada iste blog ta demandar una aduyeta. Dimpués de mirar un buen ratet por internet, a la fin he trobau un cuadro que yera mirando dende fa tiempo. Ye o que bi ha penchau alto. Ya sabez que si bi punchaz se fa mas gran. O cuadro ye sobre a Baralla de Zaragoza, en o mon de Torrero, an que luitón as tropas aliadas en a contraofesiba de 1710, ganando, conquerindo Zaragoza y tornando a meter os fueros aragoneses. Por poco tiempo, como sabemos. A custión ye que no sé ni qui ye l'autor ni en qué año se pintó, asinas que si belún lo sabe que me faiga un comentario y, si conoix lo mio correu, que me lo bi imbíe dreitamen. No doi diners, que agora mesmo no'n tiengo guaires, pero puede contar con o mio agradeximiento ta cutio y con una biereta.

miércoles, 15 de octubre de 2008

Cursos y ferias

Cuan dizen en a TB tot ixo d'os ochetibos d'año nuebo siempre m'ha parexiu una fatera. Yo, y como yo cuento que muitos más, cuan pensamos en qué fer con a bida nuestra ye cuan prenzipia o curso. En o caso zaragozano, ye mesmo más tardi, pos, dica que no pasan os Pilars, aquí dengún piensa en cosa. Asinas que ya ye plegada a ora de apuntar-se ta os cursos, chinnasios, prenzipiar a dixar de fumar, zorriar, drogar-se, rematar os estudeos y asinas asinas. Y prou que ya ye plegada a ora d'apuntar-se ta un curso d'aragonés y asinas no abrás d'ir tirando de diczionario cada begada que leigas iste u cualsiquier atro d'os tantismos fablogs que ya bi ha por tot lo rete. Nogara torna a ufrir cursos en orarios d'entre semana y os sabados de maitins. Tamién en ufre uno a distanzia, por internet y con tutorías personalizadas, y unatro en Tarazona. Os cursos prenzipian a la fin d'otubre, asinas que encara bi ha tiempo t'apuntar-se-ie.

Tanimientres, se fa iste cabo de semana a feria Tradizions de artes y ofizios tradizionals y cultura popular. Se ferá en a Instituzión Ferial de Monzón, o sabado. Entre atras muitas cosas intresans se i presentará o nuebo libro de AINAS, "Diccionario chistabín-castellano" de Fernando Blas y Fernando Romanos. De nueis, bi abrá zena popular de migas y longaniza y conziertazo de A Cadiera Coixa y Prau. Rarizo mezclallo, pero buena mosica,... Nos biemos astí!

lunes, 6 de octubre de 2008

... y un presén

Un granizo bideo que m'he trobau.

FolkloRIcos

Pocos, pero apañadicos, mira-te tu. Que nos emos colau en os telediarios-partes estatals. Os independentistas aragoneses prebemos de "reventar" l'acto. No estando que trenta contra o glorioso exerzito español y una tozinera d'a nazional, ya tenemos pitera, ya....
Fa risa leyer as cronicas d'os periodistas y más abendo estau astí. No han escrito bien ni una parola en aragonés de todas as que chilemos. Y como ni saben aragonés ni quieren aprender-ne, meten ixo de "y otras frases en fabla aragonesa". De lo d'as identificazions cuento que se'n enterarían por que les ne dizión, porque a polizía no fazió ni brenca ni meya dica que no marchón toz os meyos de comunicazión.


Como cronica poco que dizir. Nos i chuntemos bels trenta, como diz a prensa. De muitos colectibos, asoziazions y organizazions. Os españols, como siempre, alticamaus. Os no-biolentos-no-nazionalistas, nos chilón cosas tan repolidas como "chafadles la cabeza" mientres a polizía nos identificaba y a un conzentrau le furtón lo siñal suyo. A plaza Aragón l'han conquerida. Un trango más. A lo menos mientres os Pilars continará estando una mica nuestra, pos lo siñal no i torna dica que rematen. Ayer se charraba de demandar a disoluzión d'á Comunidat Autonoma d'Aragón y a nuestra anexión a Castiella - León. Total, si l'autonomía no bale que ta isto, pos millor no tener-ne. Atras proposas que he leyiu, son de clamar a la Pza Aragón, Plaza d'España B y a la d'España, plaza d'España A. As conzentrazions d'aragoneses las podríanos fer dreitamen en comisaria y asinas no ha de benir a polizia, que os pobrichons ben d'estar cansos ya. Y, ya que Belloch diz que somos folkloRIcos (as mayusclas son ta marcar l'azento), pos nos podrían subenzionar un museu etnolochico. Ya lo soi biendo: uns maniquis de trapo con a chambreta de Chobenalla, Puyalón u lo que sía y a estrelada en o güembro. Y un cartel abaixo que meta: "tradizional independentista". De mosica ambién Mallacán u La Ronda. Y dimpués una botigueta que i bendan moñacos. Quiento negozio que podría fer-se!. Si ye masiau caro, cuento que toz nos ufrimos a fer un conzierto u una "performance" en a Plaza S. Bruno ta las beniens fiestas d'o Pilar, u en S. Felipe si dizen de tornar a fer o folk astí... Y como zaguera opzión que nos faigan un capezuto u un chigán. La Pilara, el Morico, l'independentista, y asinas asinas...


A lo menos nos queda l'alegría de zorriar en a carrera entre amigos y buena chen en os zaguers diyas de fiesta. Cuento que ya sabrez que o BIC ha presto actibidaz en a Plaza Asso mientres o biernes, o sabado y o domingo. Ta más info tenez alto lo cartel (punchando-ie se fa más gran) y sino en o blog d'A Enrestida bi ha toda la info que cal.


Y no reblez, que os españols continan estando penibles.

miércoles, 1 de octubre de 2008

Combocatorias y más combocatorias...

Querría aber tornau con cosetas tranquiletas y tot ixo, pero l'actualidat manda y no dixan nian alentar. Os Pilars s'amanan, ya cuasi son plegaus y como toz os años, os colectibos y asoziazions pretan a parar cosetas. No lebo aqui que tres diyas y ya no adubo con tot lo que bi ha. De debantadera d'os Pilars os Enrestidos ya ban parando buena borina. Como siempre cal ir parando cuenta d'o blog suyo, pos istos Pilars prenzipian furo.

Sin rematar o cabo de semana, o domingo cal rebellar-se luego - u no dormir - ta ir ta la Plaza Aragón. Con nocturnidad y alevosía cuasi, os españols nos regalan un siñal suyo chigán chusto dezaga d'O Mozo. Se ye pasando una combocatoria de quemisió por correus y tos dixo penchau por aqui lo cartel. No podemos dixar que se nos pichen denzima d'istas trazas y antimás creigan que no imos a fer cosa. Ye penible la manca de rispeto que bi ha por os aragoneses que nomás somos que aragoneses...



En rematar a mani u salir d'a garchola, como toz os años, nos dixan sin siesta. A ¿recostruyida?, ¿renaixida? u rezién creyada plataforma Zaragoza Antitaurina combocan unatro año una Manifestazión contra a tortura a os animals, en particlar a os toros. Estiaño prenzipia en a plaza d'o Portillo y irá dica a Plaza España.



Tos dixo con un binclo por si a belún le fa onra ta una bisita t'a plaza Aragón...

viernes, 19 de septiembre de 2008

Enta Oczitania

A cascar-la! A la fin fuigo de bacanzas! Que ya caleba!
Mientres una semana seré por Oczitania y talmén Iparralde, asinas que tendré lo blog mesmo más xublidau que no agora. Me quedaré sin poder bier dos cosetas que aprofeito ta anunziar: la una, lo mercau meyebal que se fa bels meses más tardi, pero a lo menos se fa. Ixo sí, seguntes tiengo entendiu, no bi abrá conziertos ni actuazions ni cosa parellana asinas que ba a quedar una mica en baco. L'atra, y ista sí que me fa duelo de no poder ir-ie ye a presentazión d'o Diczionario chistabín feito por Fernando Blas y Fernando Romanos y publicau por Gara d'Edizions en -como no - a coleczión AINAS. Buena coleczión que cualsiquier que sia intresau de berdat en l'aragonés abría de tener en casa. A presentazión, ta qui pueda ir-ie, se ferá o Lunes 22 a las 19:30 en a sala "Ámbito cultural" de El Corte Inglés.

Que tos baiga bueno y nos biemos antis de Pilars!

lunes, 15 de septiembre de 2008

Agur Expo

Como un siñal, o sabado de nueis, en salir d’o conzierto de Calamaro, Flufi aparixeba por tierra. Ella – sí, ye fembra ta qui no lo sepaz – que nos eba cusirau dende o posiento suyo, con ixa floreta, diya y nuei, ta que plegasenos puntuals. Y yera muerta, u capina, a lo menos. A chen le tiraba fotos y un segurata d’os pribaus, remaniba quillau a lo suyo costau por si a bel matután le daba por pretar a foter-le de patadas, que de seguras que belún tenió ixa ideya.....

A l’atro maitín, nomás una taca azula en a tierra, un rebullo telas yeran a remeranza de Flufi qui, d’atra man, será siempre en os nuestros corazons. De conchunta con Raspa, prou que sí.

Metendo-se más serioso, a Expo ya ye rematada. Qui quiera que sía, ya ha pasau o buen rato y s’ha plenau a pocha con os diners y o treballo nuestro. Dengún no ha aprendiu cosa sobre a ecoloxía y muitos no tornarán nunca a fer una ringlera, u talmén sí, que ta tot ha d’aber-ne. L’Ebro ya ye bien estricallau y pior que puede plegar a estar.

De remeranzas, me’n lebo arrienda. Buenas y malas. Buenas, a un buen trapazil d’amigos que i he feito. A la UO Flamenco y Palmas, a os pinchaires buenos y malos y mesmo bel cambrero. Gambadas antis que prenzipiase biendo como iba costruyindo-se. As risas d’as cantas, as maldizions t’os cliens, os conziertos de Lurte, Dixie Rue del Percebe y La orquestina del fabirol, ... De malas; chornals radius, malas caras a tamás d’os buenos treballos feitos, prisas, mobbing, as fateras d’os cliens, os mainates morrofiemos, a pasibidat d’os sindicatos, a barra d’as sozcontratas...

martes, 9 de septiembre de 2008

Don Ramón y Perchita

Mientres trobo bel ratet ta escribir cualcosa con un poquet de suco, que puestar que sía ya dimpués d'a Expo, pencho iste bideo recopilazión d'os millors intes de Don Ramón y Perchita - no trafucar-se con Doraemon y Nobita - que ha apareixiu en Calico Electrónico. Adedicau t'os "yonkis"...

martes, 26 de agosto de 2008

Treballando en Expo IV: A programazión

Ta la Expo ibanos a tener a millor programazión cultural d’a historia de Zaragoza y patatín patatán... Ixo nos eban dito y, mozet, a la fin s’ha quedau en unos Pilars un poquet largos. Que Interpeñas ha teniu años con millors cartels...

Prenzipiemos con os puestos. L’anfiteyatro 43. Que ya les bale baltizar un anfiteyatro que emos bosau toz con o nombre d’un licor, que antimás sabe a diabetes... Guarda si amenista Zaragoza de puestos an que fer conziertos y, ban y fan isto. Que ye bien, l’anfiteyatro, pero no ye lo que amenistaba Zaragoza. I cullen bellas 6000 personas, asinas que por capazidat ya tenebanos a Multiusos. No bi ha escusaus y antimás ye masiau amán d’o río. Tanto que me pienso que no tardaremos ni un año en beyer-lo baxo l’augua. Aplausos t’os saputos!!! Lo bueno: que ye a l’aire libre, pero ta ixo tamién tenebanos – en pasau – o “Rincón de Goya”.

La resta de puestos son más pensaus ta que os biellos i esbasten una oreta, que ta fer-ie conziertos. An que as sillas no i son, ascape en trayen ta que puedan posar-se-ie. Rai si lo conzierto ye... quemisió... de Lurte, por exemplo. Que bier un conzierto de Lurte posau abría d’estar delito.

Dentrando en a programazión, un, que le fa goyo cuasi toda mena de mosica, se pensaba en primeras que no iba a adubir a bier toz os conziertos que s’iban a fer. Dentro toz os maitins por a puerta de l’Ebro y un amable boluntario me da un pasquin con a programazión d’o diya –muito ecolochico tamién- y... a más gran parti d’os diyas no i trobo cosa que sisquiá m’agane d’ir-ie. Fueras de bella poqueta cosa, bi ha bel conzierto bueno en o pabellón de Zaragoza, pero ixos leban unatra programazión que no aparix en o programa que esparden de maitins, asinas que cal endebinar-lo, u leyer la men a Belloch u bes-te-ne tu a saber. En l’anfiteyatro 43, mesmo bi ha diyas que i meten un punchadiscos y a cascar-la. Antis que folk, lo que calga. Mesmo achustan a Mari Cruz.

De grans actuazions, no bi’n ha abiu tantas. A la fin, o malastrazas de Bob Dylan, que benió sin o Papa, la Gloria Stefan, que mira-te que sería bien en casa suya en Miami, y Bunbury, que en Zaragoza creigo que ba a estar a primer begada que toque, no?. Resumen: “flojico, muy flojico”. Y a cultura aragonesa, amagada de tot, que cuan bi’n ha bien poco que lo dizen. A lo menos, como as donzainas, gaitas y tabals fan firme estrapaluzio se sienten por meya Expo.
Prou que como yo no soi ni moderno ni cosmopolita, puestar que tot isto sia porque me preta la boina. Continará... u no, que maitín torno t'o treballo...

lunes, 25 de agosto de 2008

Treballando en Expo III: Os bisitans

Se suposa que a Expo ye sobre l’augua y o meyo ambién. L’ombre ye estricallando a Tierra – u mesmo ya la ha estricallada de tot – y cal cambiar as cosas. Emos de reziclar, chitar cada cosa en una bolsa de una color diferén, ir en bizi y asinas asinas. Ixa ye a teoría. Os meyos de comunicazión y a mesma Expoagua reconoxen que no ye tenendo tanto esito como creyeban porque no i ba tantisma chen como eban pensau. Ye una d’as trazas de medir o fracaso u no d’a Expo. Ye de dar que si no bi ise dengún sería un fracaso. Pero unatra traza sería bier si a chen, en salir, ha cambiau sisquiá bella mica a suya ambiesta sobre o mundo, l’augua, o meyo ambién u cualcosa parellana, u simplamen ha replegau toz os papers de toz os pabellons de toz os países que nian sabe trobar en un mapa.

Toz ixos papeloz, por zierto, que nunca no leyerán. Todas ixas gorras, bolsas, penchamobils y atras fateras de merchandising bariau que malfurrian recursos, pero que arramplan con rasmia toz os bisitans d’a Expo. Y asinas, podemos fer una gambadeta por a Expo biendo como se malfurrian recursos por toz os cabos. Os bisitans nian saben guaire bien qué color ba con cada mena de basuera. En un contendor de organica puez trobar-ie basos de plasticos, periodicos, abanicos,... Lo d’o Flufibaso, cosa que se emplega en os mobimientos de cucha y ecolochistas dende fa arrienda años, no se fa serbir en toda la Expo y, an que se fa serbir, no tot lo diya, pos de nuei ya no cal estar ecolochistas, que ye un catenazo. Atra expocresía! Como exemplo nomás en meteré un, pero que creigo que, por desgrazia ye lo que piensan la más gran parti de bisitans d’a Expo: Yeranos en o pabellón d’España, en una d’as zaguers cambras. Bi eba bellas maquetas con botons que charraban sobre o “cambio de l’orache”. En una d’ixas aparixeba una ziudat de placha – no remero cual – y pretando un botón iba puyando lo ran d’a mar. Pretando-lo un ratet aparixeba 2020 y a ziudat s’engaronaba una miqueta, en o 2030 una miqueta más y asinas asinas. En 2099 a más gran parti d’a ziudat yera baxo as auguas. Una siñora a o canto de yo comentó que qué barbaridat. A suya compañera le respondió: Ixo rai! Nusatras ya no i seremos!
Continará....