Ya lo sabeba yo

Yera una d’ixas chentas a on que yes prebando terne que terne que no salgan temas polemicos. Podemos charrar d’as nuestras vidas, de cine, de l’orache u de bell viache que haigamos feito, tot y que agora se’n fa bien pocos. Podemos charrar de qualsequier cosa pero, como tantas atras vegadas, belún decide que va a fer un d’os suyos mitins. Simplament la suya actitut corporal, lo suyo cenyo de profe de clase machistral ya me va prevenindo. Con la enchaquia d’o mal estau d’o Pabellón Puent d’a Expo empecipia a explicar tot lo que se fació mal en ixos anyos, cómo se malfurrioron capazos de diners y quánto furtarían los que t’a part d’alavez yeran en las institucions. Por una vegada, soi d’alcuerdo con ell, asinas que no miro d’esbarrar lo tema. Tot lo rato que siga con ixo no me da ferrete con atras cosas. Yera cabolioso, diz, que iban a furtar y que tot ixo d’a Expo sería un chandrío economico. Y guarda que yeranos avisaus dende lo 92. Ya se veyeba venir. 

Remato la chenta contento por no haber teniu zaragata y marcho enta casa. Por lo camín voi pensando en lo d’a Expo y paro cuenta d’o mitin. Siempre me pasa ixo. A l’inte no soi capable de responder a muitas d’as cosas que me diz, pero malas que deixamos de veyer-nos, ya solet, se m’ocurren un ciento de maneras de fer-lo. Remero los anyos d’antes d’a Expo, quan bells quantos nos manifestabanos en contra d’o macroevento, d’os gatos y fastos y d’as infraestructuras absurdas y alertabanos de que ixo, como tantas atras cosas y como tantas atras vegadas, no sería so que un negocio pa bells poquetz que pagaríanos la resta. Ell, como la mayoría de ciudadanas d’A Inmortal, nos clamaba en aquellas envueltas radicals antitot. Deciba que yeranos en contra d’o progreso y d’a graniza oportunidat que suposaba pa la nuestra ciudat. Nunca no le sentié ni una sola critica y mesmo, quan empecipié a treballar-ie, en la Expo, podeba endevinar ixe argumentario d’o facherío seguntes lo qual las activistas d’izquierdas nomás podríanos treballar en cooperativas de sucos ecolochicos u pareixiu.

Soi seguro de que no ye hipocresía. Realment pensará que ell avisó d’o chandrío Expo. Igual como con tantas atras cosas. Lo cerebro humano ye asinas. Filando lo que acababa de pasar, remeraba tamién como, no en fa tantos d’anyos, negaba lo factor antropolochico en lo calentamiento global. Comulgaba con todas las ideyas negacionistas que antes mas yeran mas ixemenadas y que hue tasament sobreviven entre los conspiranoicos mas furos. Agora me l’esmachino, como un moderno Fernando VII, decindo “Marchemos francament, y yo lo primer, por lo camín d’a luita contra lo calentamiento global”.

Nunca no reconoixerá que tenebanos razón. En lo d’o calentamiento global, en lo d’a Expo y en tantismas cosas que la izquierda radical, los movimientos vecinals, ecolochistas, feministas y tanta chent que calificaría de periglosas comunistas hemos avisau antes que no dengún. ¡Tenemos razons y razón tant a sobén y nos lo reconoixen tant poco!

Sisquiá, talment, bell día, descarten pa cutio rematar la obra d’o pantano de Yesa, l’augua no plegue a emplir l’entibo y empecipie un proceso chudicial y politico pa que totz los culpables de tot lo que ha pasau en istos anyos paguen por todas las irregularidatz y irresponsabilidatz. U qualsequier atro caso pareixiu. Se me mirará, con suyo cenyo de profe de clase machistral, y me dirá que ell ya yera avisando d’o chandrío de Yera antes quasi de que lo prochectasen. M’aconhortaré con haber teniu razón y si me veigo con ganas y batallero talment le explique la zaguer causa que desfiendo por si, vinte anyos dimpués, quier fer-se la bamba d’haber-lo visto venir dende lo primer día.

Malfurriar diners IV. En crisi

Amprada de Manel Fontdevilla

Siempre soi estau un poquet radiu. D’o ‘punyo preto’ que se diz en o castellano, por aquí a lo menos. Dende que me independicé, mesmo más. Talment por ixa cultura d’o no gastar que lo que calga u talment por as mias ideyas politicas, u un poquet de cada y d’atras cosas nunca no he levau bien que se malfurriasen os diners. Asinas lo he denunciau, como poco tres vegadas (I, II y III). U más. M’he sorprendiu en viyer lo que sale mirando ‘malfurriardiners’ en iste mesmo blog.

No soi d’as que creyen que ‘vivibanos por dencima d’as nuestras posibilidatz’. Me pareix que ixa frase ye un atro mantra neoliberal como ‘en Espanya no se tortura’ u ‘totz os extremos son malos’. Tener casa, vehiclo, ropa, bells trastes tecnolochicos y marchar bell cabo de semana t’o monte no son luxos. U millor dito, no habrían d’estar-ne.

Pero sí que creigo que muitas han viviu (y a mas gran parti continan vivindo) como han quiesto. Permitindo-se totz os concietos politicos que se les pasaban por l’esmo y, prou que sí, con os diners d’o pueblo. Valencia y Balears pareixen os paradigmas d’o malfurriar. Pero de aeropuertos sin avions u de prochectos de campos de futbol absurdos, tamién en sabemos por aquí. Dicen agora que Catalunya retallará en eventos chorras. Sisquía lo faigan. Y sisquiá aprendamos por aquí y a Belloch no le torne a dar por ExpoNabo, Zaragoza ciudat cultural u qualsiquier atra fatera nueva. A Urdangarín l’han pillau con o carret d’o chelau y furtando patacadas de diners con a suya fundación. (Cada vegada que siento a parola Fundación tremolo, pues gosan d’estar cheras a on que chitar os diners publicos) As periodistas, muito profesionals, s’han fotiu de lapos a viyer qui podeba laminar más o cul d’a suya machestat. ¿Qué tendrá a casa reyal?.... Ah sí, diners.

Tot isto ye mal, prou que sí. El jueves tien, dende fa bells meses, una pachina adedicada a casos a on que se malfurria diners. Cada semana i apareixen quatre casos y en fan un chiste. Podrían apareixer-ne quaranta, soi seguro. Pero a mia pregunta ye ¿qual ye o problema: que se malfurrien diners u que se malfurrien agora que bi ha crisi?.

Quan a cucha anticapitalista nos manifestabanos contra Expo Flufi, Expo Nabo, Expo Cultura u Expo Farlopa, quan denunciabanos o malfurrie en a casa reyal, en as barquichotas de l’Ebro, en aeropuertos vuedos y campos de futbol a cascar-la ta equipos que blincan de división masiau, quan luitabanos contra Gran Stafa – lo millor que l’heba pasau a Aragón dende os Reis Catolicos deciba belún...-, quan criticabanos os gastos en representación y caterins u que se pagase l’AVE y o caché d’un carnuz ‘tertuliano’ famoso espanyol ta que venise a pasar lo maitin en Aragón TV, quan demandabanos retalladas en os cuerpos y fuerzas de seguridat de l'estau, muitas personas que hue son carranyadas con o politicamen nos deciban que yeranos unas hippiosas en contra de tot, unas carranyadas y que les querebanos hoder a fiesta, a la finitiba. Muitas encara nos lo dicen y continando con os mantras neoliberals de que os macroeventos u costruyir cosas ye bella cosa buena ‘per sé’, muitas continan decindo-nos-lo. Y mesmo nos culpan de que no se faiga Gran Stafa u ExpoOstiasEnVinagre. Por desgracia ta todas, o tiempo nos da la razón masiau asoben.

Y agora tenemos aeropuertos, prochectos de campos de futbol, azutes, bien de militars y de policia y de trastes ta que chuguen, telecabinas bien alteros en a ciudat d'o cierzo, un desierto a meyo vender, catedras de homeopatía entre que s’esboldrega l’edificio de Filosofía, vicos vuedos en casa dios y casas vuedas en mel meyo d’a ciudat, tranvías ta conectar os vicos vuedos con o paseu Independencia, en obras una anyada de cada dos, y a los más carnuces de totz os partius políticos treballando en l’administración y en as interpresas publicas creyadas ta ixo. Pero se cobra por as medicinas, a catrinalla va t’a escuelas en prefabricaus y ‘cal’ baixar-nos os chornals ta que a Ilesia Catolica y a Monarquía, entre atros, continen con a suya ‘rave ta cutio’.

Ta yo isto nunca no ye tolerable. Ni en crisi ni nunca. Si todas istas anyadas os diners adedicaus a fateras, a prochectos publicitarios y a fer a fiesta d’a cocaína, s’hesen adedicau a fer escuelas, a amillorar a sanidat, a fer d’as ciudatz un puesto razonable y comodo a on vivir, a costruyir os equipamientos que de verdat les calen a los vicos, a que os lugars tiengan unas comunicacions y unas condicions de vida más dignas... hue prebablement seríanos en crisi, pero cosa no sería igual.

Diz que de tot s’aprende. Cada diya confio menos en a humanidat. Creigo que saldremos d’ista y a mas gran parti d’a chent ixublidará tot. Tornará a clamar-nos hippiosos estricalladors de borinas cada vegada que nos oposemos a eventos con mascota u a infraestructuras molonas. Nusatras no deixaremos de luitar, de denunciar y d’explicar porque no sabemos vivir d’atra traza.

Belloch o barrenau

Quan metié nombre a o blog, lo facié mas que mas, por chugar con o nick que veniba fendo servir mientres anyadas en o rete. Pero, en viyendo a beluns por ista tierra cada vegada pienso mas que Aragón ye una Tierra de barrenaus (y barrenadas, prou que sí).

O personache que talment millor cumpla iste perfil ye o nuestro quiesto alcalde Belloch. O suyo suenio d'a Expo, borrumbada compartida por milenta zaragozanas, incluyidas as d'a CHA, se va amostrando como lo que en reyalidat estió: un malfurriar de diners, una barbaridat ecolochica, una ababolada de modernos y una gran especulación inmobiliaria. Gambetos aventaus en solars, una azute que no vale ta cosa, sisquiá ta que as barquichotas esnavesen un Ebro (más) entibau y plen de cemento, arboleras convertidas en parques que (ixo sí) conservan os suyos nombres imperialistas, cabinetas penchadas d'un cable que saludan vuedas a l'Ebro dende alto y buen fascal d'edificios que dengún no quiere. Mesmo lolas y ababolas de todas as edatz fendo de guidas turisticos de baldes que agora mesmo te dicen por a on irá lo tranvía. Encara me pregunto d'a on surte toda ixa chentucia y en pensar-ie remero Idiocracia y pienso en quantas fillas tendrán.

Pero o suenio de Belloch no remataba con a Expo. A ell le fan goi as lifaras que se preta con toda ixa chent de tot lo mundo. Si Aznar teneba as suyas movidicas con Bush y Blair, a Belloch le molaba o COI, o Bureau d'as expos y toda ixa crica. ¿A on se fan as oposicions ta treballar-ie?. Y endrezó toda a suya rasmia enta ixos obchetivos. Fer de Zaragoza a ciudat d'as pachangas internacionals. Una feria d'o ganau, pero a lo gran y de vechetals. Y, por a mesma coderencia d'a expo, estricallando os zaguers ortals zaragozanos. Unas olimpiadas d'hibierno con siede en una ciudat a 200 metros sobre a mar. Una capitalidat cultural en una ciudat que zarra salas de conciertos, ixublida ferias sobre a cultura aragonesa, saca letreros en aragonés, ... entre que contina torturando toros.

Que penica que a Belloch no le salioron bien as cosas. As eleccions lo deixoron sin os suyos refirmes internos y externos, pues nian o PAR podeba salvar-le ista vegada. Ni dios, a qui rezó ta que no pasase lo que ha pasau. Sin sacar a cruz d'o concello, habió de pactar con os royos y os d'a fabla que se quedaba sin lo de l'esqui y sin os nabos. Bien se vale que le quedaba lo d'a cultura... Y va y gana Donosti! Pero no qualsiquier Donosti... Donosti con alcalde de Bildu! Os circuitos d'o tozuelo se le pretoron fuego d'a rabia, a ulcera se le ubrió y ya se “le'n fue a pinza de tot”.

Belloch, o de Zaragoza - Spain, o que no le fa goi que faigan servir os servicios publicos personas no empadronadas, ha pasau d'o paradiso, d'estar alcalde estrela, ta l'infierno de viyer como le'n quitan as separatistas, as comunistas, as ateas y chentucia d'ixa mena. Pobrichón.... Quasi, quasi me fa pena. Pero quasi nomás.

Malfurriar diners III, candidatas

A tamás de tener prou material como ta fer un blog, sisquiá feré una sección d'isto, pero, ye increyible a cantidat de articlos que se podrían escribir dende ixe malfurriar diners que facié ta noviembre. En o preto d'a crisis, Belloch-Biel-Marceli, que son uno y trino, nos enlucernan con as suyas barucas sobre chuegos olimpicos, exponabos, motorlands y todas ixas cosas... A un zaragozano como yo, le costa ya de saber a cuantas cosas nos ha apuntau “sinyó alcalde”.

Nusatras, aragonesas leyals y obedients, encantadas de conoixer-nos, bosamos relichiosament, os nuestros impuestos ta financiar una campanya publicitaria de más d'un millón d'euros, y un estudeo sobre cómo esfender a candidatura olimpica de Zaragoza de 100.000 euros (cinco zeros, los podetz contar). Total, hue, “Malfurriar diners procuctions” presenta 1.100.000 euros, bells 180 millons de ptas en publicidat!!! BIEEEEEN!!!

Belloch, que más que aragonés parix andaluz, diz que ye lo más gran dende tiempos de Cesar Augusto. Astí queda ixo, como a ronda teruelana. Quan, en bells anyos nos miremos enta zaga y as historiadoras escriban sobre ista parti d'a historia d'a Inmortal y d'o país, no adubirán a creyer que permitisenos isto. Y muito menos que bi hese voluntarias que esfendesen con o suyo treballo de baldes, istas barbaridatz. De feito, sobre o timo orichinal, o d'a Expo 2008 y sobre como nos enganyufló a prensa y o poder, ya s'escribe libros. El cachirulo de las vanidades, se diz. ¿Bell una lo ha leyiu? ¿Qué tal? Prometer, promete.

O millor d'a semana 016

Como deziba en o post d’antis, a primabera trai arrienda faina y, en alparzear bella mica por internet trobas más y más cosas que fer y leyer. Pencho abaixo, como todas as semanas, Lo millor d’a semana.

The Pirate Bay: Ista biñeta –si bi punchaz, s’enampla- la trobé mirando atras cosetas, y me fazió firme goyo. Cuantas begadas o mundo d’a industria mosical y de bideo han chilau que beniba l’apocalipsis y todas han estau mentira. Porqué ba a estar berdat agora? China chana, son conseguindo que baixar una peli de l’Emule siga un acto reboluzionario. Como deziba belún, a mosica esistiba antis que no a industria discografica y continará esistindo cuan muera. Ta qui no entienda anglés a traduczión la podez leyer en iste binclo.

Frikazo!: Remeraz que fa tiempo reté a os fabloggers a fer un articlo más friki que no uno que penché? Diaple replegó ixe reto y en fazió uno prou friki. Con tot y con ixo, no’n yera guaire. U a lo menos yera opinable qué articlo yera o más friki. Manimenos he de reblar debán d’o que fazió ista semana. Una replega de bersions d’as cantas de Star Wars con trastes de toda mena. M’achenullo debán de tú, Diaple. Malamen puedo ganar-le a isto. Has ganau.... por agora (risa maligna).

Combocatorias: Os fungos continan surtindo y, en rematar d’escribir l’anterior post he trobau dos combocatorias, diferens y parellanas de bez. En Zaragoza, somos menazaus, unatra bez, por una Expo. A clamada ExpoNabo que diz que se ferá por o bico d’As Fuens. Agora, que ya sabemos millor como ba tot isto d’as Expos, a Coordinadera Zaragoza Ziudat Compacta, s’ha concarau con ExpoNabo y continará o lunes con as chornadas Expo Paisajes 2014: Un nuevo derroche frente a las prioridades sociales y ambientales de Zaragoza. Serán en o zentro Joaquín Roncal y aspero que siga a simién ta enzetar tot un mobimiento ziudadano en contra de dixar que continen fendo o fato con a nuestra ziudat. Que ye inmortal, pero no tanto!

Atros que tamién esfienden a sostenibilidat y a balura cultural, sozial y meyoambiental d’o meyo, son a Coordinadera Biscarrués-Mallos de Riglos y que d’o 23 t’o 26 d’Abril fan as VII chornadas por o Rio Galligo con baixada de nabatas. L’año pasau i estié y cal ir-ie a lo menos bella bez. Se i pasa un rato sobrebueno y te metes bien barucoso cuan biyer baixar as nabatas. Borina, cultura, meyo ambién, reibindicazión... y mesmo gastronomía en un par de diyas... Que más querez. Miraz-tos o programa que de seguras que nos i biyeremos.

Periodistas abataniaus: Os gossos d’esquadra abatanión istos diyas a un fascal d’estudiants y a bels periodistas. Como os estudians importan igual, a prensa s’ha zentrau más que más en os suyos compañers abataniaus. Qué de fura sería a baralla ta que rezibisen tantos periodistas y tantos ziudadans que no feban que pasar-ie... Os gossos, pobrichons, deziban que les eban enristiu con siñals indepes que feban serbir igual como lanzas. Que si estasen siñals españols, tira! Pero as senyeras amb estrella fan muitismo más mal... Como siempre o tratamiento d’a informazión ha estau penible mientres istos diyas. Nomás una pregunta: Si agora un periodista u un estudian estricallase toz os beires d’una comisaría d’os mossos, serían tan comprensibos y solidarios como con o mozo aquel –eroe, le deziban- de Lazkao? Cuento que rezibir tantos palos como les fotión tamién carraña tanto u más que si t’estricallan a casa.

Mancusos: Ta rematar un poquet más tranquilo iste post, pencho contino un bideo de Los Mancusos, una colla de teyatro, que podiemos biyer o biernes en o Zentro Zibico Unibersidat y que tos recomiendo de biyer en que podaz. T’arreguir-se-ne bel poquet que asobén nos cal...

Agur Expo

Como un siñal, o sabado de nueis, en salir d’o conzierto de Calamaro, Flufi aparixeba por tierra. Ella – sí, ye fembra ta qui no lo sepaz – que nos eba cusirau dende o posiento suyo, con ixa floreta, diya y nuei, ta que plegasenos puntuals. Y yera muerta, u capina, a lo menos. A chen le tiraba fotos y un segurata d’os pribaus, remaniba quillau a lo suyo costau por si a bel matután le daba por pretar a foter-le de patadas, que de seguras que belún tenió ixa ideya.....

A l’atro maitín, nomás una taca azula en a tierra, un rebullo telas yeran a remeranza de Flufi qui, d’atra man, será siempre en os nuestros corazons. De conchunta con Raspa, prou que sí.

Metendo-se más serioso, a Expo ya ye rematada. Qui quiera que sía, ya ha pasau o buen rato y s’ha plenau a pocha con os diners y o treballo nuestro. Dengún no ha aprendiu cosa sobre a ecoloxía y muitos no tornarán nunca a fer una ringlera, u talmén sí, que ta tot ha d’aber-ne. L’Ebro ya ye bien estricallau y pior que puede plegar a estar.

De remeranzas, me’n lebo arrienda. Buenas y malas. Buenas, a un buen trapazil d’amigos que i he feito. A la UO Flamenco y Palmas, a os pinchaires buenos y malos y mesmo bel cambrero. Gambadas antis que prenzipiase biendo como iba costruyindo-se. As risas d’as cantas, as maldizions t’os cliens, os conziertos de Lurte, Dixie Rue del Percebe y La orquestina del fabirol, ... De malas; chornals radius, malas caras a tamás d’os buenos treballos feitos, prisas, mobbing, as fateras d’os cliens, os mainates morrofiemos, a pasibidat d’os sindicatos, a barra d’as sozcontratas...

Treballando en Expo IV: A programazión

Ta la Expo ibanos a tener a millor programazión cultural d’a historia de Zaragoza y patatín patatán... Ixo nos eban dito y, mozet, a la fin s’ha quedau en unos Pilars un poquet largos. Que Interpeñas ha teniu años con millors cartels...

Prenzipiemos con os puestos. L’anfiteyatro 43. Que ya les bale baltizar un anfiteyatro que emos bosau toz con o nombre d’un licor, que antimás sabe a diabetes... Guarda si amenista Zaragoza de puestos an que fer conziertos y, ban y fan isto. Que ye bien, l’anfiteyatro, pero no ye lo que amenistaba Zaragoza. I cullen bellas 6000 personas, asinas que por capazidat ya tenebanos a Multiusos. No bi ha escusaus y antimás ye masiau amán d’o río. Tanto que me pienso que no tardaremos ni un año en beyer-lo baxo l’augua. Aplausos t’os saputos!!! Lo bueno: que ye a l’aire libre, pero ta ixo tamién tenebanos – en pasau – o “Rincón de Goya”.

La resta de puestos son más pensaus ta que os biellos i esbasten una oreta, que ta fer-ie conziertos. An que as sillas no i son, ascape en trayen ta que puedan posar-se-ie. Rai si lo conzierto ye... quemisió... de Lurte, por exemplo. Que bier un conzierto de Lurte posau abría d’estar delito.

Dentrando en a programazión, un, que le fa goyo cuasi toda mena de mosica, se pensaba en primeras que no iba a adubir a bier toz os conziertos que s’iban a fer. Dentro toz os maitins por a puerta de l’Ebro y un amable boluntario me da un pasquin con a programazión d’o diya –muito ecolochico tamién- y... a más gran parti d’os diyas no i trobo cosa que sisquiá m’agane d’ir-ie. Fueras de bella poqueta cosa, bi ha bel conzierto bueno en o pabellón de Zaragoza, pero ixos leban unatra programazión que no aparix en o programa que esparden de maitins, asinas que cal endebinar-lo, u leyer la men a Belloch u bes-te-ne tu a saber. En l’anfiteyatro 43, mesmo bi ha diyas que i meten un punchadiscos y a cascar-la. Antis que folk, lo que calga. Mesmo achustan a Mari Cruz.

De grans actuazions, no bi’n ha abiu tantas. A la fin, o malastrazas de Bob Dylan, que benió sin o Papa, la Gloria Stefan, que mira-te que sería bien en casa suya en Miami, y Bunbury, que en Zaragoza creigo que ba a estar a primer begada que toque, no?. Resumen: “flojico, muy flojico”. Y a cultura aragonesa, amagada de tot, que cuan bi’n ha bien poco que lo dizen. A lo menos, como as donzainas, gaitas y tabals fan firme estrapaluzio se sienten por meya Expo.

Prou que como yo no soi ni moderno ni cosmopolita, puestar que tot isto sia porque me preta la boina. Continará... u no, que maitín torno t'o treballo...

Treballando en Expo III: Os bisitans

Se suposa que a Expo ye sobre l’augua y o meyo ambién. L’ombre ye estricallando a Tierra – u mesmo ya la ha estricallada de tot – y cal cambiar as cosas. Emos de reziclar, chitar cada cosa en una bolsa de una color diferén, ir en bizi y asinas asinas. Ixa ye a teoría. Os meyos de comunicazión y a mesma Expoagua reconoxen que no ye tenendo tanto esito como creyeban porque no i ba tantisma chen como eban pensau. Ye una d’as trazas de medir o fracaso u no d’a Expo. Ye de dar que si no bi ise dengún sería un fracaso. Pero unatra traza sería bier si a chen, en salir, ha cambiau sisquiá bella mica a suya ambiesta sobre o mundo, l’augua, o meyo ambién u cualcosa parellana, u simplamen ha replegau toz os papers de toz os pabellons de toz os países que nian sabe trobar en un mapa.

Toz ixos papeloz, por zierto, que nunca no leyerán. Todas ixas gorras, bolsas, penchamobils y atras fateras de merchandising bariau que malfurrian recursos, pero que arramplan con rasmia toz os bisitans d’a Expo. Y asinas, podemos fer una gambadeta por a Expo biendo como se malfurrian recursos por toz os cabos. Os bisitans nian saben guaire bien qué color ba con cada mena de basuera. En un contendor de organica puez trobar-ie basos de plasticos, periodicos, abanicos,... Lo d’o Flufibaso, cosa que se emplega en os mobimientos de cucha y ecolochistas dende fa arrienda años, no se fa serbir en toda la Expo y, an que se fa serbir, no tot lo diya, pos de nuei ya no cal estar ecolochistas, que ye un catenazo. Atra expocresía! Como exemplo nomás en meteré un, pero que creigo que, por desgrazia ye lo que piensan la más gran parti de bisitans d’a Expo: Yeranos en o pabellón d’España, en una d’as zaguers cambras. Bi eba bellas maquetas con botons que charraban sobre o “cambio de l’orache”. En una d’ixas aparixeba una ziudat de placha – no remero cual – y pretando un botón iba puyando lo ran d’a mar. Pretando-lo un ratet aparixeba 2020 y a ziudat s’engaronaba una miqueta, en o 2030 una miqueta más y asinas asinas. En 2099 a más gran parti d’a ziudat yera baxo as auguas. Una siñora a o canto de yo comentó que qué barbaridat. A suya compañera le respondió: Ixo rai! Nusatras ya no i seremos!

Continará....

Treballando en Expo II: Os pabellons

Lo de treballar en Expo m’ha permitiu bier-la sin pagar mica perra. Primer de tot, cal dezir que no merix os trenta y pico euros que cal pagar. Y ixo suposando que no calese fer ringleras ta cuasi tot. La más gran parti d’os pabellons son bella mena de caseta de turismo d’o país suyo. Atros charran bel poquet de l’augua y atros dreitamén son botigas.

D’os primers, o millor ye Malta, d’an que salié sin parar cuenta que lo feba. O pabellón más curto de bier, bels 3 u cuatro segundos. D’os zaguers, Pakistan, un Doner Kebab con un guariche-botiga an que benden chaperos, pulseras y artesanía. Ta tener bella cosa relazionada con l’augua y que no parixca tan zaforas, i han penchau unos cartels – en folios imprentaus – y unas fotos d’infraestruturas idraulicas: impresionan y bergoñoso de bez. Continando con os países con estau Hungría no ye que siga garra marabilla, pero as mullers que bi treballan son bien majas y lo chorizo que i benden rebueno. Belgica ye un d’os piors pabellons, pero i tienen un bar con milenta bariedaz de bieras. De conchunta con Japón y Marruecos, que sí que son pabellons majos de bier, la resta de países con estau son esposizions que bien podrían meter cualsiquier diya en a Lonja u mesmo en o Corte Inglés y que no bi iría dengún, muito menos pagando.

De comunidaz autonomas no’n he bisto guaires. O de Catalunya curioso, más que más por a colezión de botellas d’o Dr. Oliver Rodés y a riseta que me fazié cuan la bide. Abrán pasau “Los Gandules” por astí? As plazas tematicas son lo unico un poquet educatibo y tampoco no guaire. Astí se bei a más gran ipocresía -u expocresía, que mesmo se puede creyar una nueba parola ta isto- de toda la Expo. Una Expo que creba con toz os mensaches ecolochistas que i aparixen (bier primer foto). Con tot y con ixo, sisquiá todas as plazas balen guaire. “Agua Extrema”, an que cal fer una ringlera de bellas dos oras, ye una güeña gran como un pin.

No mancan que Aragón y España. En o primer, encara soi mirando que ye ixo d’Aragón. Fotos, fotetas, y fotizos. Sin cartels, sin sentiu y difizils de bier. Una botiga con productos d’a tierra y toritos espanjols por toz os cabos y un bideo penible con un matután prebando de fer una jota posmoderna. “Flojico, mu flojico” le dizión a Buñuel, como diz Labordeta en toz os conziertos suyos.

Y con muita pena he de dizir que España tien un d’os millors pabellons. Adedicau a la zienzia bi esplican bellas cosetas con un luengache prou fazil ta toz. Bi ha tamién una colezión de alfayas que no sé guaire bien que coño i fan...

Continará....

P.D. Ista foto de o pabellón d'Aragón por aintro no tos remera a garra cosa? Por exemplo.... quemisió.... un partiu pulitico que ye perén en o gubierno?

Treballando en Expo (1)

Por si belún no lo sabeba, soi treballando en a p*** Expo. Sí, dimpués de tanto creticar y tot ixo, bi soi treballando. Y antimás dende mayo. Pero cuan a ipoteca manda, l’ipotecau obedeix... Lo caso ye que, como a bida mía agora no da ta guaire más, as olimpiadas me la bufan y d’actualidat no’n sé mica, pos he pensau d’escribir sobre a Expo y o treballo que ye a unica cosa que puedo. Y ta prenzipiar, charraré d’as condizions laborals que bi ha en a buenrollista ExpoFlufi.

Ta qui no lo sepa, antiparti d’os natazos d’os boluntarios, bi ha treballadors d’Expoagua dreitamén y os “sozachustaus*”. Os d’Expoagua los achustón a trabiés de Randstand y as suyas condizions no son tan malizas, a lo menos, en lo que yo sé. Treballan cuatro diyas, descansan dos y lo chornal son bels 1200 euros a o mes. Os sozachustaus penden d’a interpresa. Por lo que conoxco d’os dos treballos que i he teniu y d’os compañers que he conoxiu, as condizions son penibles en cuasi toz. En o primero, antiparti de aber de pleitiar con un d’os más ababols mainates que nunca no eba conoxiu, se treballaba siete diyas ta descansar-ne uno por (redoble de tabals) ¡950 euros!. Fote! Y yera treballo cualificau! U siga, que se suposa que cal aber estudiau ta fer-lo...

D’ixe treballo en marché por ixas condizions, y d’astí o mensache que aparix alto d’iste blog. Os que i remanión lo fazión u porque no teneban ta do ir u por a posibilidat de quedar-se en a interpresa dimpués d’a Expo. Como a interpresa ixa a yo tampoco no me feba guaire delera y menos si continaba menada por o debandito ababol, marché. Y bien que fazié pos a los pocos diyas trobé unatro treballo millor, tamién en Expo.

D’ixe segundo treballo, de seguras que bi abrá tiempo de charrar-ne. Agora mesmo, plego de prener a baxa u siga que aspero poder escribir un poquet mientres istos poquez diyas.

Continará.....

Bellas fotos

A la fin a Urbana yera trancada -beyer o blog o 15 d'agosto - y dezidié de fer-me una gambadeta por a ziudat. Parixeba una desierto. Todas as botigas zarradas, mesmo muitas d'as terrazas d'os bars. Sisquiá Freakland, que nomás ubriban de tardis. A lo menos beyié a frontera d'o Paraninfo que encara no la eba bista. Que maja y escoscadica que la han dixada! O pobrichón siñor Ignacio ya parix unatro! Sin tanta molsa - u lo que estase - por denzima... Bueno, si no lo ez bisto tenez a foto abaxo. Tamién estié en a esposizión sobre a Brigada Licoln en Aragón que bi ha en o museu d'Istoria de Zaragoza. Ye bien maja encara que curteta. Asinas que nomás con ista y "Encrucijada de culturas" - d'ista en charraré bel diya más a fundo - ya bi ha más suco en dos museus que en toda a p*** Expo. Y as zaguers fotos que pencho son d'o que entienden beluns por "desembolique sostenible":

Pipean a Flufi!!!

Iste pobrichón Flufi... Primero lo secuestran y agora lo pipean... Que ganas teneba!

Pi ye tres?

Por si a Expo no pudise prou per sé y por si o suyo carauter zientifico no ese quedau contrimostrau de raso leigo ista notizia en Publico. En zagueras no soi guaire informau d'o que pasa difuera d'o guariche an que treballo y os suyos arredols, pero cuento que isto no ha teniu garra rispuesta dende garra asoziazión u coleutibo. Isto d'a zienzia no l'importa a dengún...

O pior d'ista chentota creazionista ye que se disbrazan de bella mena de zientifismo y parix que no les ba mal de tot. En l'Imperio (o de berdat, no l'español, que ixos son os encargaus) ya ye asinnatura en bels estaus y os que creyen que l'ombre ye creyazión dibina son muitos más que no parix. De feito caldría que salisenos bel diya t'a carrera y ir preguntando. U no, que beluns tenemos fé en a umanidat.

A beluns, por fer-se un baño en o río suyo suyo les identifican como periglosos bes-te-ne tú a saber qué. A belatros, que esparden mentiras de raso azientificas ta chustificar a toda una colla d'ababols que biben d'otris, les fan un congreso ta els en a marabillosa Expo de l'augua o meyo ambién y l'allolio... Sr. Belloch, ta cuan un congreso de o Flying Spaghetti Monster? Somos muitos os que, como FSM diz, creyemos que o cambeo de l'orache ye dreitamen relazionau con a disaparizión d'os piratas.

O titol de l'articlo, ta qui no lo sepa, ye porque en un estau de os USA, demandón que PI - sí, o numero Pi, alto u baxo 3,141592.... - estase 3. En fan a mofla os Simpsons en un d'os capitols suyos, que os más frikis de seguras remerarán.

Cabo de semana

Iste ye un d'ixos cabos de semana que no son ta escansar. Boriner, como os buenos cabos de semana de berano, prenzipia con un conzierto en contra d'a Expo. A tamás de que as collas no me faigan masiau goyo, más que más porque a la metat nian las conoxco, a enchaquia d'o conzierto ye prou ta ir-ie. O conzierto, antimás y como os buenos conziertos de berano, será a l'aire libre, en a Plaza Asso, d'o zaragozano bico-lugar d'a Madalena.

Caldrá alzar bella cosa de rasmia ta lo sabado, que en o Zentro Zibico Unibersidat ye o conzierto presentazión d'os nuebos discos de Draps y Prau, que de seguras que serán tan buenos u mesmo millor que os zagueros. Y ya que escribo sobre os Draps aprofeito ta remerar-le a uno que sé que de cabo ta cuan me leye que tien o disco mio d'os Draps, so boque!. Asperemos que nos trobemos en o conzierto... Pencho os cartels, que ya sabez que no adubo ta guaire más....

Gambadiando

Cuan o tiempo libre ye más que un luxo, una simpla gambada en bizi por as riberas zaragozanas d'a Uerba y l'Ebro, parix (y en ye) millor que un biache ta Paris. Y asinas pasó fa bels diyas, un poquet antis d'a crexida gran que tenió l'Ebro, pero cuan ya se uloraba. Parix que a Pai (Ebro) isto d'a Expo y d'os trabases enta Barcelona no l'han feito mica goyo y preba d'imbiar-los a muyir fardachos. Con bella cosa d'esito, cal dizir... Pos ya ha conseguiu que no bi aiga minitrasbase y que no se faiga a cosa ixa que quereban fer ta enguerar a Expo.

Encara que isto no ye un fotolog, ni preba d'estar-ne, ni yo soi fotografo, ni prebo d'estar-ne, contino pencho bellas fotos, que tiré ixe diya y que me parixen, a lo menos, curiosas. (Si bi punchaz, se fan más grans)

Se fan a mofla de nusatros (a la fin...)

Cuento que muitos ya abrez bisto, por a TB tradicional, por Youtube u por a paxina web suya o nuevo programa d’Aragón TV: OregónTV. Ye un programa que replega a tradizión d’os sketches d’umor de atros programas como Splunge, u d’os que feban de cabo ta cuan El Informal u Cruz y Raya, pero dende una ambiesta aragonesa, encara que más que más cheposa. No he puesto encara beyer toz os bideos, pero bi’n ha muitos bien buenos. Se’n fan a mofla d’a Expo y de Flufi (a qui rebaltizan como Flurvi) de contino y, tamién, por exemplo, d’os puliticos nuestros. Pero un d’os sketches que más goyo me fazió y que más me trucó o ficazio ye ixe d’o Comando Almugabar que ya en han feito, a lo menos, dos. I salen dos mozez encapuchaus, en plan terroristas, charrando d’as reibindicazions suyas. Siempre prenzipian os comunicaus suyos con un “Buena nuei!” y, mesmo en uno d’els charraban de l’aragonés. Sé que a muitos les ferá fastio ista mena de umor, pero a yo m’encanta de redir-me de yo mesmo.

Antiparti de que faiga u no goyo u grazia, o simple feito de que ixe sketch se faiga ye un siñal de que somos un poquet menos imbisibles. Ya salimos en Aragón TV, encara que sía ta que se faigan a mofla de nusatros. Conoxen, alto u baxo, bels d’os nuestros tics y d’a traza de charrar nuestra. Cal remerar programas que han feito cosas parellanas en atros países como Vaya Semanita en ETB u Polonia en TV3. Que aparixcamos en a televisión ye una traza de normalizar-nos sozialmen y blincar un poquet as mugas d’a Madalena.

Os bideos los podez biyer en www.oregontelevision.com si no querez u podez biyer o programa a ixas oras tan malizas que lo fan. Abaxo en pencho un par...

Carnabals

Prenzipia Febrero y con iste mes os carnabals. Os sobrarbencos y atros que no m’intresan tanto. Os carnabals son tot un exemplo de borina pagana (como a canta de Lurte) y d’imbersión de l’orden sozial. An que toz son, u parixen iguals. Os sobrarbencos, antimás, alzan en os suyos lugars, una tradizión que china chana ha sobrebibiu a milenta afers mientres a istoria. A o catolizismo y a o franquismo. Dos d’as más faxistas corriens de ¿pensamiento? que bi ha abiu en Aragón y que han prebau que disaparixesen terne que terne. Manimenos os carnabals han endurau y continan estando una d’as más grans fiestas de muitas bals.

Dixando a un costau o sinnificau pulitico y relichioso (u antirelichioso, millor dito) d’os carnabals, son un borinon como pocos bi’n ha. Os d’A Fueba que son os que conoxco millor y os unicos que he bibiu, son bella cosa que cal bibir-la. Ta endizcar-tos un poquet tos contaré alto u baxo que se i fa.

Prenzipian o Sabado a ixo d’as 10 d’o maitín, en Tierrantona, an que se troba o conzello de o monezipio d’A Fueba. Astí dan de baldes una tazeta de chicolate u café y un poquet de coca (la de minchar). Dimpués se ba marchando (en autos) d’un lugar t’atro y en cadagún puez fer-te bella cosa diferén. En Palo bi ha un socalzet con pernil y sardinetas. En Elumo (en castellano El Humo de Muro) fan chiretas. En atros lugars entropans, ganchitos y atras potras, pastels, arañons, costiellas... Un poquet de tot. Cal dizir que si yes bechetarian ye mala cosa, pos i trobarás pocos lugars an que no aigan muerto bels pocos bichos ta fer a birolla....

Tot isto con una charanga y toda la bal y os turistas disbrazaus de cualsiquier cosa. Mochos de fregona, Calico Electrónico, Duffmen, San Pancracios, Payasos, Che Guevaras, capezas d’allo, gambas, sotas y asinas asinas. Una ripa de disbrazes por un regular bien orichinals y treballaus que, cuan plega a nuei los conoxes toz.

En rematar bi ha un ratet ta escansar, pero no guaire. Porque a ixo d’a meyanuei prenzipia una orquesta en Tierrantona an que cal endebinar qui ye cadagún, pos, por un regular a chen ya no i ban disbrazaus.

A os zaragozetas o conzello nos ha organizau bels actos no guaire entretenius, como gosan fer. Manimenos bels barrenaus d’ixos que ban contra a Expo ferán iste Biernes un carnabal en plan pasabillas que saldrá a las 18:00 d’a Plaza d’as Canteras y continará a ixo d’as 19:00 en a Plaza San Miguel. Cuento que dimpués irán por A Madalena, pero d’ixo no’n sé mica. O lema “Por un fin del mundo ecológicamente sostenible” (Por una fin d’o mundo ecoloxicamen sostenible) ye una d’as ideyas más incheniosas que nunca no eba bisto y, de seguras que, qui pueda ir-ie (beluns treballamos a ixa ora) pasará un buen rato. Que tiengaz toz un sobrebueno carnabal sigaz an que sigaz...

+ info en: http://www.pirineodigital.com/2008/reportajes/carnaval/carnaval-pirineo.htm sobre os carnabals pirinencos y en http://saludamoryrebeldia.blogspot.com sobre o carnabal alternatibo zaragozano.

Es de España y sus regiones...

ExpoFlufi no dixa d’enfolgar-me a bida. Iste maitin, ascuitando Aragón Radio, “la nuestra d’els”, deziban que ya yera presta a programación de mosica tradicional aragonesa que bi abría en a Expo. "Fote!" Me pensé mientres bel par de segundos. "A la fin sí que parix que a cultura aragonesa tendrá en a Expo bella chisleta (jejeje) de presenzia". Pero cal continar ascuitando todas as noticias dica la fin. Y dimpués d’ixe par de segundez, a locutora ha continau dizindo que Fulanico s’encargaba d’a programazión y que bi podríamos ascuitar cosas como ista que beniba contino. Y preta una jotera a cantar quemisió d’un lión (ya no sé si o zaragozano u lo de León que aparix en o escudo español) y que España entera se enardece al oir la jota. No conozco a resta d’a programación de ¿folk? ¿aragonés? que bi abrá en a Expo, pero si ixo ye o exemplo... Pos como en o Pilar. Joticas patrioticas que deziban los de Gomaespuma u Jotas Coloniales que’n podez leyer arrienda en Aragón Colonial.

Y asinas continamos, cada begada Aragón más S.L. y más chusmeso. Y aplaudindo as bondaz d’a Expo y Gran Stafa (que darán treballlo a toz!).

Jotas colonials en a Expo y t’a Feria d’Amostranza, ni brenca ni meya, que ixo ye cultura española y no cal dar-le diners como a la Feria d’Andaluzía, que, conzellera de Cultura mediante, s’ha independizau culturalmen d’España. Tanimientres, a lo menos, podremos ir siñando o manifiesto que han presentau un trapazil d’asoziazions a fabor de Amostranza ta que nos sientan (que no “ascuiten”...) una mica y que beigan que, a tamás de que a colonización cultural ye talmén a más fortal que se ye fendo dende o conzello en muitos años, a soziedat aragonesa no se dixa engañuflar y demanda Cultura Aragonesa con mayusclas.

Isto d'alto lo he escrito iste maitin sin mirar-me a web ni saber qué eba pasau en a pregunta que se fazió en o Conzello d'A Inmortal o pasau Biernes. Suerte que bi abió una camara ta grabar a bergüeñosa autitut d'os puliticos que bi eba y o caso que nos ferán.... Tos dixo penchau o bideo que cuento que ya abrez bisto en Purnas, Estricalla u Aragón Colonial...

Pilars y represión

Y como os royos no aturamos ni ta zorriar en o Pilar, en bels pocos diyas ya bi ha abiu arrienda aizions y, como no podeba estar d'atra traza en l'año Flufi, arrienda represión polizial. O mesmo diya d'o pregón, bellas personas prebón de amostrar una pancarta contra a OTAN en a Plaza d'o Pilar. Ascape a polizia i fué a espardir a democrazia y abentón a pancarta entre empentos y trucazos. Bi ha un par de bideos en YouTube y más t'abaxo en pencho uno. Atra colla de chen que feba un acto anti-Expo tamién tenión as correspondiens identificazions emplindo un poquet más a lista negra que ye fendo-se o Delegau d'o Gubierno Español. Ambute polizia en a mani antitaurina, en a carrera Alifonso l'atro diya mientres o pasabillas de Timbalao y omnipresén en a Madalena. En iste bico en tenemos agora de tot. Dende fa bels meses son ya cutianos os "rechistros aleatorios", identificazions y presenzia polizial con tozineras y tot. Como si bella begada ese estau un bico an que tenesenos problemas d'orden sozial. Bueno, talmén ta beluns, sí que somos un problema sozial....

A lo menos podiemos sentir una sobrebuena charrada en A Enrestida an que estión responsables d'o Nafarroa Oinez y d'a Federazión de Fablans charrando d'a mobilizazión sozial por as luengas y d'as borinas que han organizau y son organizando. Una charrada con muita umor pero a rebutir de ideyas y d'esperenzias compartidas a uno y atro canto d'a muga.

Y os Pilars, a tamás de tot, continan. Y continan as mobilizazions y actos de toda mena de chen. Dende o BIC (Bloque Independentista de Cuchas) m'han pasau o manifiesto y o cartel d'os actos suyos que podez leyer en o blog d'A Enrestida (como ya diziba en l'anterior articlo). En o suyo blog tamién i sale a programazión d'os Pilars Disidens igual como en o bletín suyo (Esmo). Atros que han feito un nuebo numer d'o boletín suyo (Zinquena Ringlera) ye UCA, an que charran d'os 300 años d'abolizión d'os Fueros, o zinqueno cabo d'año d'o coleutibo, l'afer d'o Puen de Piedra...

Expo, PSOE, polis y l’aragonés

Beyendo Aragón TB, me dizen que bi ha dos nuebas notizias sobre a Expo 2008. “De seguras que ye buena cosa”, me pienso somardón. A primera diz que ban a trayer quemisió cuantos mil polizias nuebos ta beilar por a nuestra seguranza. U yera por a seguranza d’a Expo? Ixo no m’ha quedau guaire platero… Ye lochico que si, como se suposa que pasará, Zaragoza acubillará en ixos diyas a millons (u más) de personas, bi aiga más polizía ta os posibles, probables y cuasi seguros, problemas que tendremos de trafico y d’atras cosetas pero, se ferán serbir ta ixo u ta prebar que no bi aiga garra boz en contra d’a Expo y que si bi’n ha se silenzie antis con antis? Ya emos bisto qué pasó en Sebilla u Barzelona en ebentos parellanos y sabemos qué fan con os coleutibos sozials. De todas trazas a polizia ya ye “apatrullando” toz os bicos cusirando que dengún no se mueba guaire (u mica).

Ista yera alto u baxo d’asperar, asinas que continé beyendo a TB por si deziban belatra cosa más curioseta. Y jibo si en dizión! L’asambleya de “majaras” ha dezidiu de creyar una comisión de “castellano urchen” (u bel nombre parellano) ta cusirar (unatra begada cusirando) que o castellano emplegau en as publicazions d’a Expo no siga malo. Buen castellano en Aragón. O millor, si cal. Y Aragón S.L. contina sin que meta “augua” en a caseta d’a plaza Espiña, Flufi contina dezindo-se Flufi y no Chisla, como botó (bosando, caldría remerar) a chen, contina sin aber garra notizia sobre si l’aragonés tendrá bella mena de presenzia en a Expo encara que nomás siga que en a caseta d’Aragón….

Y de rematadera, prebablemen por o cambio de gubierno en o conzello a Ofizina d’Emanzipazión Choben a tornau a clamar-se Oficina de Emancipación Joven y han cambiau lo cartel que se beyeba dende difuera d’a Casa d’os Morlanes. Y con ixe cartel tamién ha disaparexiu o doble nombre d’a Fuella d’o Boluntariato que torna a estar nomás que en castellano. D’o Zentro d’Amprens encara no sé cosa, porque no i soi iu, pero cuento que poquez diyas le quedarán con ixe nombre si encara i remane. Chiquez conquistas que s’eban conseguiu sin garra problema dende a soziedat ni a chobentut t’a que iban endrezadas, abentadas por bella pocoesmo d’o PSOE. L’aragonés continará estando imbisible, encletau en o Pirineu, en as asoziazions y en bels puestos d’a Madalena. Caldrá fer bella reflesión, u qué?