A cascar-la 2024. Tierra de barrenaus 11x08

Rematamos l’anyo y m’he resistiu a fer resumen de 2024 u deseyos pa lo 25. Pa enmarcar la calendata, ixo sí, tos comparto una editorial sobre los mesías. Concretament, sobre los mesías de l’aragonés, que de cabo ta cuan, n’amaneixe cualcún pa trayer la verdat a lo pueblo fablilandés. Ya sabez que en ista temporada goso compartir las editorials de TdB tamién en texto bel día dimpués d’emitir-se en la radio.

En Pase de prensa damos treslau d’os zaguers zancochos culturals d’o concello de Zaragoza y lo gubierno d’Aragón, charrando d’o campo de tiro de barra que han sacau d’a ciudat y d’as limitacions horarias d’a Biblioteca d’Aragón, todas dos decisions que han teniu la suya respuesta ciudadana. Femos cronica d’a cena d’hibierno de Nogara y tos proposamos cuantos buenos plans mosicals y boriners pa istos primers días de 2025.

En la parte mosical conoixemos, d’a voz d’un d’os suyos components, lo nuevo single de Poble Nostrum, que empecipiaran a mover por lo país lo suyo nuevo EP. En la calaixera, repetimos calaixo d’a temporada pasada: la canción - relato. Y por si yera poca narrativa, completa lo programa un relato locutau. 

Que rematez bien iste 2024 y entrez con ganas a-saber-las de charrar aragonés en lo 2025.

Recuerda que puez ascuitar toz los programas en Ivoox, Spotify y la web de Radio Topo.

Programa #181

 

A prioris y posterioris: Diario electoral 01

Diz que i hai cambio de ciclo politico. Que plegan anyos de gubiernos de dreitas, chunto con lo ultrafacherío. Pareixe bella mena de maldición, inevitable, contra la que no podemos que encocolar-nos en posición fetal aguardando a que lo mal pase. Atros son mas optimistas y desfienden que encara tenemos la oportunidat de aguantar lo lapo que l'electorau nos ha fotiu y que, lo menos en l'estau quede un gubierno meyo civilizau. No soi un buen analista politico y no voi a iluminar-tos con grans reflexions que faigan chirar lo resultau, pero quiero aportar la mía envista sobre tot lo que pasa arredol d'istos meses electorals y, si puedo, fer honra pa que iste agüerro lo mundo siga un poquet menos mierda. Empecipio hue con iste Diario electoral, que no sé guaire bien encara t'a on irá.

A prioris y posterioris:

Las semanas d'antes d'as eleccions mas d'una persona me preguntaba qué iba a votar pa todas dos convocatorias electorals. Fa tiempo que desmitifiqué lo voto, que lo de fer-lo "en conciencia" m'importa prou poco y que las razons estratechicas me pesan muito mas que no atras. En primeras, pa las Cortz aragonesas toz los partius dignos de votar-se teneban asegurada representación. Pa lo Concello de Zaragoza, la situación yera prou mas dificil. Todas las encuestas que s'iban publicando en ixos días sinyalaban lo mesmo: que Zaragoza en Común, Podemos y Chunta Aragonesista quedarían arredol d'o 5% de voto, lo que menazaba con que pasase lo que a la fin pasó: que un, dos u mesmo las tres candidaturas se quedasen sin representación. I heba voces, ixos días, que consellaban concentrar lo voto en una u atra opción. Atras, iban a contramán, desfendendo que caleba forzar de bella manera que todas tres fuerzas en aconseguisen, de representación, apostando por un 10+2+2+2 = 16 que dase l'alcaldía a Lola Ranera, con lo refirme d'a resta d'a izquierda.

Voté a ZeC. No sin dudas. Las encuestas deciban que yera qui mas probabilidaz teneba de quitar concellers. Yera tamién la candidatura que mas me convenceba y que creigo que millor treballo ha feito en istos anyos. Asinas que chuntaba lo voto estratechico y de conciencia, con tot lo miedo d'o mundo d'entivocar-me y que Podemos y CHA quedasen por dencima y hese "aventau" lo mío voto. A qui me demandaba consello no le podeba responder. ¿Y si ZeC quedaban zaguers? ¿Y si teneban razón los de repartir voto? ¿cómo se reparte voto de manera eficaz? A la fin lo mío voto sí que contó, pero me podeba haber entivocau como lo facioron muitismos companyers que apostoron por las atras opcions.

A la mayoría d'os que me preguntaban les teneba igual a quí votar d'ixos tres. Yo les deciba que votaría a ZeC pero que no podeba dar-les garra razón de peso pa que no votasen a los atros dos, que no bi heba garra garantía de que ixe mas-menos 1% fese chirar lo resultau a favor d'una u atra lista.

Agora muitos carranyan a qui votó Podemos u CHA. Yo me veigo incapable. Lo marguin d'error d'as encuestas podeba haber fallau y que l'orden de voto hese estau bien diferent. Lo ret ye a rebutir de capitans A posteriori que entonan ixe "¿veyes como teneba razón?". Creigo, sincerament, que no bi heba garra razón de peso pa apostar por una u atra estratechia en lo momento que se presentoron ixas tres candidaturas a lo concello. 

Sí que i hai motivos pa carranyar a los responsables d'haber plegau a ixa situación d'as tres candidaturas. U las d'as cuarto de Uesca, que no en charro porque desconoixco mesmo mas. Ya se sabeba que ixo podeba suposar que cualcuna quedase difuera d'o concello. Mesmo todas, como pasó en Uesca. La rematadera estió la presentación de Aragón Existe en las municipals zaragozanas en unatra d'as maniobras sinsentiu que ha feito ixe ¿partiu? ¿plataforma? ¿penya? y que aduyó a fer venir la situación que tenemos hue en la ciudat. Se sabeba que isto podeba pasar y, con tot y con ixo, se tiró entabant. ¿Pa qué? ¿Por qué? ¿Tanto pesan los vuestros egos? ¿Tant grieus son las vuestras diferencias? ¿De verdat una candidatura de reivindicación d'o entorno rural y d'o territorio vuedo tien la necesidat de presentar-se en una ciudat de 700.000 habitants? ¿Cuals son las diferencias programaticas muncipals entre ZeC, Podemos y CHA? ¿Cuántas vegadas hesen votau diferent en la lechislatura d'haber conseguiu representación?

Lo clamamiento a lo voto util ye de buen fer a posteriori. Y bien perigloso, por cierto, ya que ixa linia de razonamiento acaba en un voto a lo PSOE, que ha contrimostrau istos zaguers anyos que cuan fa bella cosa d'izquierdas ye porque la izquierda le obliga, no pas porque se lo creiga. Pero lo que sabebanos todas, antes d'as eleccions, yera que lo escenario de que buena parte d'o voto d'izquierdas se quedase sin representación yera bien probable. Sisquiá haigan aprendiu. No nos ne queda atra si queremos evitar la barbarie que s'acerca.

Lo Buñuel no rebla

El Buñuel no se rinde se coriaba iste cabo de semana en lo concierto de Los chikos del maíz. Dende que los chueces decidioron dar-le la razón a los suyos amigos d'o PP, la menaza d'o desaloixo fació movilizar-se a lo barrio d'o Gancho y a toda la resta de personas de Zaragoza que desfendemos lo modelo de Centro Social Comunitario que tant bien ha funcionau en istos anyos. La respuesta en la carrera estió eixemplar y masiva. Hue, manimenos, y deixando claro la nula intención de dialogo que tien lo gubierno municipal, s'ha feito l'anunciau desaloixo. Quieren que lo Buñuel torne a estar un edificio vuedo, enronando-se por cada día, aguardando a que, talment, en bell momento d'o siguient anyos se faiga un Centro Civico incapable de sustituyir ni una chiqueta parte d'a vida y actividatz que se i dinamizaban. Tot por puro odio -y miedo- a la organización popular, a las personas que contrimuestran por cada día que se puet treballar d'atra manera, dende l'autochestión, creyando alternativas a las institucions y los modelos capitalistas.

Los espacios fisicos colectivos son bien importants. No seré yo, que levo los zaguers anyos dando ferrete con ixo día sin atro, qui diga lo contrario. Pero si lo Buñuel acaba efectivament desaloixau, si perdemos ixe espacio, lo que no podrán espaldar ye lo que s'ha construyiu en tot iste tiempo. Plegarán nuevos espacio, u recuperaremos ixe, nos trobaremos en las carreras u empliremos los centros socials ya existents. Lo que ye seguro ye que d'una manera u atra Lo Buñuel seguirá vivo.

En lo siguient programa de Tierra de barrenaus charramos d'as fiestas d'a Madalena, d'o CSC Luis Buñuel y de tantas y tantas atras enrestidas contra l'autochestión de l'ocio y las fiestas y d'os centros socials. La mía intención yera compartir lo texto d'o manifiesto de desfensa d'o Buñuel hue, sin saber que, por desgracia s'iba a encertar con lo día d'o suyo desaloix. Aquí tenetz ixe texto que preba d'explicar lo que ye lo Buñuel y por qué cal desfender-lo. Las movilizacions no han feito que empecipiar, asinas que vaigamos-ie y desfendamos tot lo que ixe Centro Social ha suposau y suposará. Lo texto orichinal y todas las novedatz lo puetz consultar en la suya web.

MANIFIESTO “YO REFIRMO LO BUÑUEL”

En 2011 bellas vecinas d’o zaragozano barrio d’o Gancho empecipioron a dar-le vida a l’edificio abandonau de l’antigo instituto Luis Buñuel. Naixió asinas lo Centro Social Comunitario Luis Buñuel. Un espacio chenerau por y pa lo barrio, de manera comunitaria y asembleyaria, y que ha constituyiu un verdader centro cultural d’un d’os barrios mas populosos de Zaragoza.

¿Conoixes lo Buñuel? Te lo presentamos

Lo Centro Social Comunitario Luis Buñuel ye un prochecto colectivo chestionau por personas voluntarias que ofreixen lo suyo tiempo de manera altruista pa treballar por lo común organizando un ciento d’actividatz ubiertas a toda la ciudadanía.

¿A on ye? En Zaragoza, en la plaza Santo Domingo numero 15, encara que tamién tien una entreada por lo paseyo d’Echegaray (una puerta de color amariella). Ye en lo bell meyo d’o barrio zaragozano d’o Gancho. L’edificio ye de cabo d’o sieglo XIX, estió museu de Bellas Artes dica 1911 y siede d’o concello de Zaragoza dica 1965. Entre 1986 y 2005 fació d’instituto.

¿Dende quan? Lo CSC Luis Buñuel naixió en 2011 y dende alavez se i han sumau collas y colectivos que i fan un ciento d’actividatz pa los vecins d’o barrio d’o Gancho y pa toda la ciudadanía.

¿Qual ye la suya filosofía? 1. L’AUTOCHESTIÓN, aduyar a personas y colectivos a creyar, experimentar y transformar. 2: Ye un espacio UBIERTO a lo barrio y a toda la ciudat, sin mirar-se color ni ideolochía. 3. La enerchía d’o SOCIAL, enfilada pa lograr lo bien común, que plega en meta increyibles. 4: Lo Buñuel ye un espacio COMÚN pa prochecto y actividatz integraderas.

¿Cómo funciona? I participan mas de quaranta entidatz ciudadanas de caracter social y de voluntariau civil, incluyidas cooperativas d’iniciativa social sin animo de lucro. Qualsequier persona con una ideya de caracter social puet proposar-la a l’asembleya de l’asociación pa que s’aprebe por consenso y se faiga funcionar.

¿Qué actividatz se i fan? Arrienda. Por eixemplo, ye la siede d’a banda mosical de L’Almozara; cuenta con biblioteca y ludoteca; ofreixe espacio pa bailes en linia y ye la siede d’Artistas por la Paz; los suyos muros acullen una asesoría socio-churidica; se i fa clases de yoga, teatro, chimnasia pa mayors y danza; s’organiza un “mercau d’o tiempo” y i hai un “espacio pa lo silencio”, sin ixuplidar la chardinería u lo taller de clown. Totz los sabados la cocina solidaria reparte bellas 300 chentas y qui l’aprecise puet acudir a lo roper de baldes y a la botiga solidaria. S’organiza conferencias, tallers educativos, procheccions, mosica en directo, eventos solidarios.. y a-saber-las actividatz mas pa un publico de todas las edatz y procedencias.

¿Por qué nos movilizamos? Lo Gubierno d’a ciudat de Zaragoza pretende desaloixar a l’Asociación CSC Luis Buñuel lo venient 23 de chinero. Con la mida, iste puesto deixará d’estar un espacio verdaderament social y comunitario autochestionau, con tot lo que ixo suposa.

Han “promeso” a los vecins un centro civico de chestión municipal, promesa que pareixe de mal cumplir. Con tot y con ixo, si a la fin se convierte en un espacio que contine dando servicio a lo barrio, no será por atra razón que por lo esfuerzo de todas las vecinas que han estau istos anyos mantenendo-lo vivo y en uso.

Manimenos, muitas cosas se perderían con iste cambio. Por eixemplo, en un centro civico no son las vecinas qui deciden qué actividatz aprecisan ni puet esdevenir de rapiconté en un espacio de refirme mutuo y autocudiau pa las mas vulnerables, como ocurrió entre lo encadamiento. Tampoco no podría deixar-se como espacio pa las necesidatz que no lo mercau ni l’estau cubreixen como lo Rastro d’a Plataforma Social u la Olla comunitaria. I hai quantos atros eixemplos como istos. Lo modelo d’o Buñuel constituye un proceso d’experimentación social, refirme mutuo y integración radical, imposible de remedar en espacios de chestión municipal.

Los centros socials y los espacios vecinals son una realidat en ciudatz tant importants como Barcelona, Malaga u Madrit y alportan vida cultural, artistica y social alternativa. Pero, sobre tot, lo CSC Luis Buñuel ye un espacio integrador pa todas las personas que arriban nuevas a lo barrio y que troban, entre las actividatz que se i organizan, un puesto de convivencia imprescindible pa creyar retz vecinals con los habitadors d’o barrio y de toda la ciudat.

Lo CSC Luis Buñuel ha feito un centro civido a mida d’o barrio de Lo Gancho, un centro a peu de carrera intercheneracional y intercultural que fa barrio y fa vida. Lo CSC Luis Buñuel ye en lo corazón d’o barrio y en lo corazón de millars de personas que dende fa mas d’una decada i troban lo suyo espacio. Nomás en los zaguers quatre anyos s’ha feito 192.000 usos comunitarios.

Pero lo Gubierno d’a ciudat aprecisa tener lo control y decidir de manera unilateral qué se i fa y qué no pas. Lo proximo 23 de chinero procesderá a esfuizar-lo pa instalar un suposau centro civico. Lo centro actual cubre de sobra la demanda cultural d’o barrio que antimás ya disposa d’a Casa de Choventut Sant Pablo, la Casa d’Amparo, lo Centro de día Sant Blás, Zona Choven Ramóny Cajal…

Queremos una ciudat con diversidat d’espacios. Ye sano tener puesto con filosofías comunitarias y autochestionadas, mesmo mas quan contribuyen a millorar lo bienestar social d’a comunidat. Espacios libres a on que lo propio barrio chenera vida, con las suyas iniciativas, creya la suya realidat artistica y cultural. No siempre ye menester lo control institucional mientras se respete y beneficie a la sociedat. ¡Queremos lo nuestro Buñuel!

Por istas razons, qui firmamos abaixo, MANIFESTAMOS LO NUESTRO REFIRME A LO CSC Luis Buñuel como recurso social y que pueda asinas continar lo treballo suyo pa todas las personas que viven en lo barrio de Lo Gancho y en toda Zaragoza

Lo catalán en lo concello de Zaragoza

En lo momento periodistico que vivimos quasi ni s'amagan las intencions dezaga d'os titulars. En un d'ixos diarios dichitals que tanto amaneixen en grupos de WhatsApp y retz socials, una periodista titulaba "El catalán puntúa como el inglés para elegir plaza en el Ayuntamiento de Zaragoza" con caboliosa intención de fer encarranyar-se a lo publico obchectivo d'ixe medio. A yo, lo puet tener seguro, m'encarranyó prou. ¿Cómo se puet consentir que anglés y catalán den los mesmos puntos? ¿En qué sociedat vivimos? ¿Ye que no somos conscients d'a importancia d'as luengas? Pa yo no i hai discusión posible y a fe que todas las lectoras seretz d'acuerdo que lo catalán habría de dar mas puntos que no l'anglés. Todas dos son luengas igual de respetables como toda la resta, pero qui sabe catalán, antimás de conoixer-ne una, ye colaborando a protecher un patrimonio cultural propio d'Aragón que ye en serio periglo. Ye fendo posible mantener un herencio lingüistico milenario que sobrevive malament en la nuestra tierra, mientras que l'anglés tien la suya supervivencia asegurada. No nomás por estar la luenga de l'imperio, la mas aprendida d'o mundo y una d'as mas fabladas, sino porque, a diferencia d'o catalán, todas las ninas y ninos la estudean obligatoriament en las escuelas encara que no siga una d'as luengas oficials d'Aragón.

Somarderías aparte, tot lo que i hai tanto en lo titular como en la noticia ye unatro eixemplo d'o espanyolismo y la incultura lingüistica tant ixemenada por la nuestra tierra, empecipiando por lo nuestro president y lo suyo primoroso librito.

La reacción a lo titular en un mundo normal, sin prechuicios lingüisticos, sería un "oh claro". ¿Por qué iba a contar menos una luenga que atra a l'hora de decidir destino adintro de l'organigrama funcionarial d'una ciudat a on que garra d'ixas luengas ye oficial? Pero por desgracia no vivimos en ixe mundo y las luengas tienen unas escalas d'importancia. En lo cuerpo d'a noticia s'explica que lo criterio pa dar mas puntos por fablar-se una luenga ye que ixa s'amuestre en las EOI d'Aragón(1), a on que se puet aprender anglés, francés, alemán, italiano, chino, ruso y catalán. Explica tamién, que los puntos no sirven pa fer-se funcionario sino pa trigar destino entre los muitos puestos d'o concello a on que se incluyen administrativos u incheniers, por eixemplo.

Que s'haiga trigau l'anglés pa lo titular no ye mica casual. ¿A qué no resultaría tant efectista si fuese "El catalán puntúa como el italiano para elegir plaza en el Ayuntamiento de Zaragoza" u "El italiano puntúa como el inglés para elegir plaza en el Ayuntamiento de Zaragoza"? En l'imachinario d'a nuestra sociedat l'anglés ye l'idioma que CAL saber, lo prestichioso, l'important, la luenga de l'imperio. Por dezaga n'i hai atros, como lo francés y l'alemán, que tienen bella utilidat, sobre tot si vas a treballar en seguntes que campos empresarials. Porque lo solo motivo que puet tener un hispanofablant pa aprender una luenga ye l'economico, ixo ni se qüestiona. L'italiano, en ixa mesma linia ideolochica, a lo menos ye un idioma de verdat y te puet fer honra si vas t'alla de turismo. Lo chino y lo ruso nomás se puet entender que s'estudien por las debantditas qüestions economicas. Y dimpués de tot ixo ya ye lo catalán, que no vale pa cosa, que mesmo belún le niega la suya naturaleza de luenga. Deciba no sé qui, en modo somarda, que "en Espanya todas las luengas sirven pa comunicar-se fueras d'o catalán, l'euskera y lo gallego que sirven pa hoder".

Posiblement, garra d'ixos funcionarios faigan servir garra d'ixas luengas en lo suyo treballo cutiano. Si en aprecisasen beluna, sería requisito pa acceder a ixe puesto. Pero nomás una ye sospeitosa. Nomás d'una i hai una asociación - los nacionalistas lingüisticos de cutio - que se'n queixa. Diz, un d'os portavoces d'ixa clica que "Un ciudadano de Gerona, por ejemplo, tendrá más facilidad para sumar puntos que uno de la misma Zaragoza que no tenga conocimientos de catalán". Claro. Y uno de Pequín. U de Pau. ¿Quál ye lo problema? No suma mas puntos por estar de Beijing, Pau u Chirona. Los suma por saber una luenga y tener un titol en ixa luenga.

A la fin, si preguntas a la chent que fa istos razonamientos, si en bell momento han teniu la corrección politica de reconoixer lo catalán como luenga y la suya importancia patrimonial y cutural, en que forigas bell poquet surten las suyas verdaderas motivacions. No quieren que lo catalán - u qualsequier atra luenga minorizada - existan. No quieren que sentir-la en las carreras, en las televisions, en las aulas, en garra cabo. Son a favor de que se charre nomás en la esfera privada, a on que lo molestoso soniu d'ixas parlas disidents no emporque los suyos oyius. Son en contra de que dé puntos pa un traslado, prou que sí. Pero tamién de que s'amuestre en las EOIs, u en las clases de primaria y secundaria. De que tiengan espacios en radio u televisión. Lo dito: de que existan. Son la chent que espaldaría la Seu de Zaragoza pa fer-ie un bloque de pisos. No tos ne ridatz: lo facioron con Averly.

I hai tanto a cambiar socialment pa que s'entienda, de verdat, que las luengas - todas las luengas - son utils y que las luengas - todas las luengas - son patrimonio, que enacara que las administracions y lo mundo educativo empecipiase con firme rasmia y convicción manyana mesmo me pienso que nos costaría a-saber-lo veyer los primers resultaus reals. Como de toda manera ixo no va a pasar, nos toca a nusatras, la chent que sí que entendemos que la diversidat lingüistica ye un tresoro, explicar-nos y explicar-lo terne que terne, prebando a lo menos de que qui tienga una mica de sensibilidat cultura nos ascuite.

(1) Sobre beluna d'as reaccions d'a chent quan les explicaba que aprendeba catalán en la EOI de Zaragoza, escribié iste post.

Lo TSJA y las suyas barrenadas sentencias

Aquello d'a división de poders, fa muito tiempo que no se lo creye dengún. Pero bi ha vegadas que ye tant evident, que se disimula tant poco, que fa sangre... En lo nuestro caso, lo Tribunal Superior de Justicia de Aragón, ye un eixemplo penible de como lo poder chudicial treballa pa una ideyolochía.

Siempre me ha preocupau, y habría de preocupar-nos a todas, que lo poder chudicial siga tant mayoritariament en mans d'a dreita. Y d'a pior dreita, muit a soben. Nomas cal fer-se una gambadeta por la facultat de dreito ta parar cuenta de por a on alienta politicament la mayoría d'os futuros advogaus y chueces. Admiro fundament a toda la chent d'izquierdas radicals que s'han habiu de fer los x anyos de carrera compartindo aularios con ixa clica.

Pero como una d'as millors armas contra la suya terror ye la nuestra humor, pensé de adedicar-les ista primera historia barrenada. En la memoria, guardaba beluna d'as suyas barrenadas sentencias, pero una busca en Google, me'n dio quantas mas. Asinas que, pa qui le faiga honra, aqui va l'audio d'a Historia barrenada, y vinclos a cadauna d'as noticias que se i charra. Que faiga buen prebo, y paratz cuenta, porque si bell diya tenetz un chuicio, puet que acabetz en iste barrenau tribunal!



L'aragonés en lo Curriculo de primaria

Las bicis no podrán ir por plazas y peatonals

Lo TSJA refirma que las interpresas evadan impuestos

Lo TSJA suspende lo convenio laboral d'o concello de Zaragoza

Lo 010 se queda sin municipalizar

Averly a cascar-la

Hora y meya de relichión en primaria

La relichión en Bachillerato

Cincomarzada zancochera

Montando un puesto en a
"Cincomarzada" de 2015

Que o concello de Zaragoza quiere acotolar a Cincomarzada, más que una rumor, ya ye una evidencia. Que a FABZ colabore en ixa faina de traza tant entusiasta u inchenua, seguntes quieras pensar mal u no, ya ye más nuevo. A lo menos ta yo. Talment haiga plegau o momento de qüestionar si hemos de deixar en mans d'a FABZ y d'o concello a celebración de una fiesta de caracter tant popular como a Cincomarzada. Talment haigamos de planteyar un modelo asambleyario y participativo. U bien diferent a l'actual como poco.

Ya dende fa bell anyo, o concello decidió que a estratechia de ir cambiando de parque a Cincomarzada anyo par d'atro podría funcionar. Asinas pasemos por bella mica de parques millor u pior adequaus a todas as necesidatz d'a fiesta. En totz os casos, pior que no o Tío Chorche. A enchaquia y a complicidat d'as vecinas d'o parque estió prou ta que no nos alticamasenos masiau. Encara que a popularidat (en totz os sentius d'a parola) d'a fiesta baixó, no podioron acotolar-la y totz os anyos tirabanos alto u baixo entabant. Mesmo si pleveba, s'apanyaba qualcosa y febanos buens ratetz.

Iste anyo plego la rematadera. Totz os despropositos posibles se concentroron arredol d'a Cincomarzada en un clarismo eixemplo de cómo no chestionar una fiesta. A culpa ye d'o concello, prou que sí, pero bi habió atros embrecaus en o zancocho, como a FABZ u os penyistas. Complices involuntarios, u no? Ixo ya lo sabrán decir millor atros que conoixcan millor as familias, mafias y collas d'afinidat d'ista Inmortal y, de cabo ta quan, ababola ciudat.

Ya d'antes d'a creixida apocaliptica de l'Ebro, o Concello prencipiaba con o suyo mini-boicot programando actos paralelos. Antiparte de fer competencia a la propia Cincomarzada, creigo que fer una recreación de los Sitios, en una calendata que se ye remerando unatra fita historica leva, como poco, a la confusión. Pero en o país que s'inventó a exposición de "Fernando II o rei que imachinó Espanya", a rigor historica no ye so que una groma. Tampoco no me voi a meter niquitoso con o tema historico d'a cincomarzada, pues creigo que ha sobreciu o motivo historico que levó a celebrar-la y agora se tracta d'atra mena de celebración. O concello podría no programar cosa en a Cincomarzada y convidar a las ciudadanas a ir-ie y conoixer o treballo de tantas y tantas entidatz socials y aprofeitar os parques ta lo que son: vivir-los y disfrutar-los. Mesmo ta fer educación ambiental, fendo campanyas de respeto a las zonas verdes urbanas. Pero dende fa anyos decidió d'amarguinar-la, amagar-a y mesmo fer-le a "competencia".

Con a creixida, plegó a enchaquia. No soi cheologo ni tiengo prous conoiximientos ta saber si bi heba bell periglo. Sí que sé, pues paso totz os diyas por astí, que en o parque no se viyeba garra problema. Con tot y con ixo, confiaré en a buena fe d'o Concello y suposaré que sí que existiba ixe periglo y que caleba sacar a celebración d'o parque. Como de feito se fació con as penyas que fuoron t'o Parque Torreramona, que pareixe que han privatizau, u con a recreación d'a guerra d'o francés que tanto goyo fa a l'espanyolamen. Ye curioso que chusto, as unicas que yeran imposibles de reubicar yeran os colectivos, asociacions y organizacions que pareixe que tanto estorbo fan a lo concello, no?. Se podeba reubicar a las Penyas, ixas que nomás se tricolotean con o Concello quan preba de sacar-les o negocio que tant mafiosament manullan. Se podeba reubicar a recreación, que tanto tocaría os corazons d'o espanyolismo, que tant furament refusoron a invasión d'ixos malcaraus que nos quereban imposar a civilización. Manimenos no bi heba traza humana, pareixe estar, de reubicar a las asociacions, a tot ixe teixiu social que fa que por cada diya, ista ciudat tienga vida. Ni o Parque Gran, u lo d'a Paz, u tantos atros que tenemos a suerte de tener en Zaragoza, pareixeban querer a nuestra presencia. 

Pancartas en a Cincomarzada de 2004

A FABZ no nomás ni tartió sino que colaboró en ruedas de prensa con o concello anunciando a imposibilidat de celebrar-lo en a calendata y mentindo quan se dició que se celebraría o primer domingo que se podese. Atro desproposito, por cierto. Ya que a cincomarzada no se celebraba o 5 de marzo, se podeba cambiar a qualsiquier atro diya. ¿Por qué a un domingo? Ye bella cosa que dengún no me ha sabiu responder encara. 

Con tot y con ixo, y como muitas ya nos barruntabanos, continoron as cagarruciadas. ¿Qual yera lo pior diya ta meter a Cincomarzada? Uno que bi hese atras cosas que fer en Zaragoza, que parte d'a ciudat tenese puent y hopase bien luen, y si antimás se celebraba belatra fiesta tanto en Zaragoza como en a resta d'Aragón ta que un amiro de chent se'n tornase t'os suyos lugars, millor. Ixe diya yera Sant Chorche. Con más diyas que fornigas, s'heba de trigar ixe. Qui prenió ixa decisión? Con qué criterios?

O 23 d'abril se chuntoron asinas a feria d'o libro, una feria d'artesanía alimentaria en a Plaza d'os Sitios, y dos cincomarzadas, la d'as penyas y la d'os colectivos. La una en o parque penyista de Torreramona y l'atra en o Tío Chorche. Os diyas d'antes, a mayoría d'as mias amigas, companyeras de treballo, familiars, etc... que no yeran embrecadas en garra asociación nian sabeban que se fería o 23 d'abril, y prou que tampoco no a on. O concello y a FABZ no facioron mica publicidat, encara que por a radio se sentiba terne que terne anuncios d'o Diya d'Aragón, cuento que pagaus por a DChA. Por qué as penyas no fuoron t'o Parque d'o Tío Chorche encara ye un misterio ta yo. Pero ye claro que tenendo un parque en rechimen de semipropiedat, ta que vas a marchar t'atro cabo. Ye normal.

Plegó o 23 d'abril. Ya contabanos que bi habría muita menos chent. Bien se valeba que Los Gandules yeran anunciaus a las 17:30 en o parque y una patacada de chent vendría a viyer-los. Pero ups! O concello, a FABZ u qui fuese o responsable, ixublidó de sacar-los d'as webs u d'anunciar que, ixe diya, Los Gandules ya teneban concierto en Calamocha y que, alavez, no podeban venir t'o parque. Mirar d'afirmar unatra colla que trayese una cantidat de publico parellana, cuento que yera imposible, porque total, como yera nomás t'os colectivos, ....

Montemos os nuestros puestos, entre que viyebanos como a o nuestro costau una colla de personas s'apanyaban una barra firme pincha. Extracción de fumos, un chenerador granizo como un güei, una decena de personas treballando-ie d'uniforme,... quasi pareixeban profesionals.... Probablemente porque en yeran. Talloron, por cierto, bell par de brancas d'o pin que teneba en a suya parcela mientres montaban, lo que cuento que tampoco no ye guaire legal. Les preguntemos de qué colectivo yeran, porque ya nos prencipiaba a pareixer una mica raras as trazas que teneban de treballar y que todas isen con chambretas de publicidat d'un ron. Nos dicioron que yeran d'un caterin que les heban "subafirmau" a barra. 

Faciemos uellos de caparra quan nos lo dicioron, pues ni se nos heba pasau por o tozuelo, como ye normal, que se permitise "subafirmar" barras a interpresas en una fiesta popular que se suposa que ye ta empentar que as asociacions y colectivos d'o teixiu social zaragozano pueda fer bell par de perretas con que sobrevivir tot l'anyo. Avisemos a las autoridatz d'a FABZ y a respuesta estió mesmo más penible. A barra en qüestion yera d'una asociación de penyistas que la heban adchudicau a o caterin ixe. Penyistas que siquiá yeran en o parque. Yera un negocio. Mica motivación social. Siquiá de diversión. Puro NEGOCIO. Ixo se permitiba? Sí. Ixa estió a respuesta d'a FABZ. Dende feba anyos, ta forro de bota, seguntes nos informoron ellas mesmas. Pero en ista edición d'a Cincomarzada, antimás, fendo competencia dreita a toda la resta de colectivos que teneban arredol. Atronando-nos con a suya mosica de Melendi y reggaeton, por cierto, y sin deixar ascuitar a mosica d'a resta.

Bella persona decidió que, ya que a FABZ no iba a aturar o desproposito y no nomás no feba cosa, sino que chutificaba feriar os puestos d'a cincomarzada, caleba que s'informase a las clients de a on yeran consumindo. Una d'as cosas que fa muita d'a chent que va t'a cincomarzada ye aprofeitar ta refirmar a os colectivos. Por defecto, ixas personas entre as que soi yo mesmo, suposamos que todas as barras representan colectivos y organizacions ciudadanas. S'informó alavez a os clients que ixa barra yera de una interpresa y que decidisen, con toda la información, si quereban fer-se a biera astí u en belatro puesto. Beluns i continoron tant tranquiletz y bells atros decidioron de marchar. Dica que plegó un encargau "cunyau" que se concaró de muit malas trazas con a persona que yera informando. Le convidemos a que fese lo mesmo y que informase de qué yeran a resta de barras. No caleba porque a resta yera bien claro a qui perteneixeban. Nomas ell quereba amagar l'orichen d'a barra y o destino d'os diners que se i deixaba la chent. Nos "informó" chilando que a FABZ feba lo mesmo, subafirmando o suyo puesto. Si ixo ye asinas me pareixe mesmo más denunciable, y tos convido a que tos n'informetz y me lo escribatz como comentario u tos metatz en contacto con yo.

A cincomarzada, dende bien choven, ye una d'as mias fiestas favoritas d'o calendario zaragozano. Un diya a l'aire libre, con borina, reivindicación, mosica,... conoixendo atras luitas y atras luitadoras y compartindo experiencias con muita chent. Ye tamién, ta muitas d'as asociacions que i van, una d'as principals fuents d'ingresos que tienen en tot l'anyo. Manimenos, u precisament por ixo, o concello quiere acotolar a fiesta d'a cincomarzada. Os motivos por os que a FABZ i colabora voluntariament u involuntaria me son desconoixius.

Cuanto a las penyistas mica no aspero d'ellas. Nunca no s'han preocupau que d'ellas mesmas y d'o cazurrismo que amuestran en un grandismo porcentache. Ye una pena que una ideya tant buena como la d'as penyas acabe en un negocio ta uns pocos, seguius por un ciento de capins millor u pior intencionaus.

Aspero que cambeen as cosas luego en o Concello de Zaragoza, pero en qualsiquier caso y pase lo que pase, ya ye hora de cambiar a traza de pensar y chestionar a Cincomarzada. No podemos tolerar que contine en mans d'una ineficaz y poco participativa chestión d'a Federación de Vicos. Talment ye hora de prencipiar a pensar en una Cincomarzada chestionada dreitament por as organizacions que sí que nos intresa que a Cincomarzada siga en veras popular.

Belloch o barrenau

Quan metié nombre a o blog, lo facié mas que mas, por chugar con o nick que veniba fendo servir mientres anyadas en o rete. Pero, en viyendo a beluns por ista tierra cada vegada pienso mas que Aragón ye una Tierra de barrenaus (y barrenadas, prou que sí).

O personache que talment millor cumpla iste perfil ye o nuestro quiesto alcalde Belloch. O suyo suenio d'a Expo, borrumbada compartida por milenta zaragozanas, incluyidas as d'a CHA, se va amostrando como lo que en reyalidat estió: un malfurriar de diners, una barbaridat ecolochica, una ababolada de modernos y una gran especulación inmobiliaria. Gambetos aventaus en solars, una azute que no vale ta cosa, sisquiá ta que as barquichotas esnavesen un Ebro (más) entibau y plen de cemento, arboleras convertidas en parques que (ixo sí) conservan os suyos nombres imperialistas, cabinetas penchadas d'un cable que saludan vuedas a l'Ebro dende alto y buen fascal d'edificios que dengún no quiere. Mesmo lolas y ababolas de todas as edatz fendo de guidas turisticos de baldes que agora mesmo te dicen por a on irá lo tranvía. Encara me pregunto d'a on surte toda ixa chentucia y en pensar-ie remero Idiocracia y pienso en quantas fillas tendrán.

Pero o suenio de Belloch no remataba con a Expo. A ell le fan goi as lifaras que se preta con toda ixa chent de tot lo mundo. Si Aznar teneba as suyas movidicas con Bush y Blair, a Belloch le molaba o COI, o Bureau d'as expos y toda ixa crica. ¿A on se fan as oposicions ta treballar-ie?. Y endrezó toda a suya rasmia enta ixos obchetivos. Fer de Zaragoza a ciudat d'as pachangas internacionals. Una feria d'o ganau, pero a lo gran y de vechetals. Y, por a mesma coderencia d'a expo, estricallando os zaguers ortals zaragozanos. Unas olimpiadas d'hibierno con siede en una ciudat a 200 metros sobre a mar. Una capitalidat cultural en una ciudat que zarra salas de conciertos, ixublida ferias sobre a cultura aragonesa, saca letreros en aragonés, ... entre que contina torturando toros.

Que penica que a Belloch no le salioron bien as cosas. As eleccions lo deixoron sin os suyos refirmes internos y externos, pues nian o PAR podeba salvar-le ista vegada. Ni dios, a qui rezó ta que no pasase lo que ha pasau. Sin sacar a cruz d'o concello, habió de pactar con os royos y os d'a fabla que se quedaba sin lo de l'esqui y sin os nabos. Bien se vale que le quedaba lo d'a cultura... Y va y gana Donosti! Pero no qualsiquier Donosti... Donosti con alcalde de Bildu! Os circuitos d'o tozuelo se le pretoron fuego d'a rabia, a ulcera se le ubrió y ya se “le'n fue a pinza de tot”.

Belloch, o de Zaragoza - Spain, o que no le fa goi que faigan servir os servicios publicos personas no empadronadas, ha pasau d'o paradiso, d'estar alcalde estrela, ta l'infierno de viyer como le'n quitan as separatistas, as comunistas, as ateas y chentucia d'ixa mena. Pobrichón.... Quasi, quasi me fa pena. Pero quasi nomás.

Ampraus 057

Ya viyetz que en zagueras no escribo guaire. Asperemos que tornar t'a rutina me faiga centrar-me bell poquet y reprener o blog, que con tanto twitter y facebook lo tiengo prou albandonau. Como siempre que no soi inspirau, pos meto un ampraus...

Prou prou luen ye o titol d'un libro escrito por Tamara Marzo y Carlos García. Lo presentoron fa bells pocos diyas t'a prensa y he sentiu que en bell par de semanas puet estar que bi haiga una atra presentación. Ye un libro ta ninas sobre o meyo ambient que as suyas historias pasan en espacios naturals d'Aragón. Y prou que en aragonés. Caldrá leyer-lo. Hehehe.


Cara d'ababol se le quedó a o nuestro quiesto alcalde capín quan nombroron a Donosti capital cultural de no se que. A iste pobrichón le creix l'enanamen. Dimpués d'as eleccions disapareixió mientres bells diyas. Quasi se queda sin estar alcalde. Ta estar-ne le deixan sin ExpoNabo ni chuegos olimpicos. Habrá de charrutiar con os royos chungos y con os socialdemocratas con cachirulo ta gobernar y agora un os diaples indepes vascos le sacan o zaguer chuguete que le quedaba a ell. Tan catolico y espanyol y no l'ha valiu ta cosa. L'alcalde ploramica se tornó furo y menaza con chuicios y cosas d'ixas. Sobrebueno l'articlo de Purnas sobre iste afer.

O verano ya ye plegau y os festivals con ell. Ya pasó o Tamborilé y o Pobo y en poco tiempo seremos en Ansó en o pior PIR (a priori) que nunca no bi haiga iu. Lo mesmo de todas as anyadas pero con un diya menos de borina. Cada anyada mas penible. A tamas de tot, i pasaremos un buen ratet en as badinas y nos zorriaremos tot lo que bi haiga en a redolada. Dimpués, si sobrevivimos a las fiestas de Teruel, plega a gran fita de l'independentismo aragonés: o festival Esfendemos a Tierra. O contrario d'o PIR. Cada anyada millor. Estianyo Dada, Mallacán, Alkol 96, Eina y Batikano Rojo. Buenismo de tot... Qui quieratz puyar-ie en autobus podetz pillar os viaches en A Flama. Más info en a web d'o festival.


Y sin pena ni gloria despedimos un atro 29 de chunio. Bell articlo en Desde Banarus, bell atro en Purnas. Belloch carranyau, pero por atras cosas y en Aragón ixublidando-nos de qui somos...
Ta despedir l'ampraus, l'ampro a canta a Octubre17. Muitas gracias por dar-me a conoixer a Els Catarres!

As zaragozanas foranas y Belloch

Fa diyas que Florencio escribiba en o suyo Facebook queixando-se por no poder pillar una bizi si no yera censau en Zaragoza. Teneba toda a razón en queixar-se. Hue leigo que ta lo bus, o tranvía, as piscinas, etc os censaus en Zaragoza tendremos millor pre que os foranos que nos acompanyan en ista ciudat.

Soi zaragozano, fillos de zaragozanas, y nieto por parti de pai de zaragozanas. Talment por ixo quiera tanto a ista ciudat. Ye quasi lo unico que heba conoixiu dica las catorce u quince anyadas, quan empecipié a viachar bell poquet más que no os veranos en Cambrils. He conoixiu a muitas foranas que han quiesto u no les ha quedau atra que venir-se-ne t'aqui, muitas vegadas emplidas de pena por deixar os suyos lugars d'orichen. Siempre he prebau de que se sentisen como en casa. De que viyesen Zaragoza, y más que más o mio vico d'a Madalena, con os mios uellos. Con ixos uellos que viyen repolida cada cantonda d'a ciudat. Que sienten a las casas, palacios, monumentos y carreras mormostiar a suya viella u no tanto historia. Bellas vegadas lo he conseguiu a lo menos en parti, belatras no tanto. Mesmo belunas ya sienten a Zaragoza como parti suya gracias, entre atras cosas a lo mío encerrinamiento en que asinas estase.

Agora lo concello quiere fer-les ciudadans de segunda. No ye tanto a puyada de pres lo que veigo mal, sino ixe sentimiento de refus t'a mia ciudat que creya en a foranalla. No quiero que denguna d'as mias amigas se sienta por demás, se sienta forana aquí, sienta que ye menos de Zaragoza que no yo, siga naixida u creixida a on que siga. Sigan d'Andorra, Banariés, Uesca, Guatemala, Palestina, Tudela u Cerveruela.

Muitas d'as que agora habrán de bosar más por os servicios d'o concello, no han esleixiu vivir en A Inmortal. Han habiu de venir-ie por estudios, treballo, familia u milenta cosas. ¿Quantas s'han habiu de venir a estudiar a carrera ta Zaragoza? ¿Quantos han habiu de marchar d'o suyo lugar en no trobar-ie treballo? Ya no ye que no mereixcan bosar más, ye que mesmo habrían de bosar menos en estar bella mena de refuchiaus. Aragón tiene un malotía (entre tantas atrás) que se diz centralismo y que fa que Zaragoza, arrocle quasi tot, y que dende as institucions se empente ixo. Belloch, que be de consumir lo mesmo que Mourinho u Aznar ye encerrinau en fer una ciudat d'un millón de personas, en fer un chicot Madrid, que tanto be de trobar a faltar. En fer una ciudat – show con eventos surrealistas como ExpoNabo. D'alternativas partitocraticas quasi no bi'n ha, pues pocos enristen de verdat contra ixe modelo de ciudat y por un regular lo fan con a boca chiqueta que zarran de tot quan les toca de gobernar con o nuestro mega-alcalde-por a gracia de Dios Nomas cal remerar aquella borrumbada clamada Expo 2008.

Asperemos que isto siga bella mena de maniobra electoral, que no contine ixe Zaragoza contra Aragón tan peniblement famoso, que a resaca electoral y personal de Belloch le faiga reblar y que todas y totz podamos, si queremos sentir-nos acubillaus en a ciudat a on que queremos u a on que hemos de vivir. Y asperemos que bell diya denguna no haiga de venir t'aqui si no quiere, prou que sí.

Barrenau pregunta: porra electoral

Una nueva sección, que ya levaba bell mes sin fer-ne denguna nueva. Barrenau pregunta prebará de fer iste blog un poco mas participativo, de replegar as vuestras opinions y sumar-se a ixa moda-esprito d'o 2.0, u a lo menos d'o 1.5.


A primer, que fa a debantadera d'a sección ye sobre as eleccions que son en momentos de fer-se. Quan queda tasament 40 diyas, tos convido a esdevenir en Rappels y Aramises y contestar ¿qual creyetz que será o resultau electoral en as Cortes d'Aragón y en o Concello de Zaragoza? Lo imos a fer en plan porra, ye decir no se puet repetir o resultau de una que lo haiga dito antis y qui encierte se levará un premio. O premio será una biera (u refresco) pagada por moi, en A Flama, trigada por a ganadora d'entre todas as que i venden, incluyidas as d'importación.


Ta participar-ie, hetz de deixar como comentario o resultau ta Cortesy t'o concello, por partius y diputadas / concellers. Ya sé que ye inchusto ta qui no viva en Zaragoza, pero asinas ye mas dificil d'encertar. Ta ganar cal encertar exactament os dos resultaus. Si dengún no endevina os dos, ganará qui en haiga endevinau uno. Y si no gana dengún, me feré yo a biera a la vuestra salut con qui quiera acompanyar-me.


Prou que o mio pronostico va a estar o primer. Astí va:


Cortes d'Aragón:
PP: 30, PSOE: 24, PAR: 7, IU: 3, CHA: 3


Concello de Zaragoza:
PSOE: 12, PP: 12, CHA: 3, IU: 2, PAR: 2


Lo he escrito por orden que creigo que tendrán de votos. Tamién me permito o luxo de apostar (isto no dentra en a porra) que, encara que UPyD no conseguirá representación, será o partiu más votau d'os extraparlamentarios.


Remeratz que ye o resultau que creyetz que bi habrá, no o que queretz que bi haiga...
Faigan as suyas apuestas!

Ampraus 049

Dimpués de pasar o reseco pilarista y de tornar t'os treballos, caldrá continar escribindo, no? Y como ya sabetz que soi muito chandro, pues torno con un ampraus. Un poquet de tot.

Quanto vale? Ye una d'as frases que más sentié decir en Pilars. Por treballar en un bar y porque en salir-ne, un par de nueitz m'amané t'o cabaret que organizaba Dada en a Plaza San Pedro Nolasco. En no estar subvencionau por o concello, ni por garra atra institución, terne que terne pasaban o chaper ta replegar as perras d'a chent que i yera a lo chilo de "¿Quanto vale?" " Vale menos un concierto que una chambreta de Zara?" Quantisma razón. O show que i facioron mientres os Pilars estió tot un eixemplo de cómo fer as cosas autochestionadas. Humor, mosica, más humor, contorsionismo, poesía... ta tot lo mundo. De baldes, u no, seguntes lo que cadagún querese y podese dar. A saber-lo de momentos ta no ixublidar como a versión reggae de "Soy el novio de la muerte", os sobrebuens conciertos de Dada y Los teloneros u o monologo sobre a perda d'a virchinidat de Juako Malavirgen. Asperemos que en os Pilars venients torne a haber-ie bella cosa parellana... ¿Quanto vale?

O movimiento okupa en Zaragoza ye bien fuerte en as zaguers anyadas y son fendo reyalidat ixo de "un desaloix, una atra okupación. Malas que son forachitaus d'un espacio liberau, en prenen un atro. Quan prencipié a escribir isto existiba encara La Vieja Escuela y en tasament tres diyas l'antiga garchola de Torrero ye estada liberada por as okupas a on que se ye fendo agora mesmo o Hackmeeting. Asperemos que dure bien de tiempo y se i puedan organizar tantas u más cosas que en os anterior C.S.O.'s que bi ha habiu en as zaguers anyadas. Suerte!

"L'aragonés ye bien vivo" torna ta La Enredadera iste mesmo domingo. Se i charrará de muitas cosas y, como ye de dar, d'o empecipiallo d'os cursos d'aragonés. ¿Cómo? ¿Que encara no te i has apuntau? ¿A que yes asperando? Por ufierta no será... Nogara fa cursos de maitins, de tardis, os cabos de semana, on line.... Fablans tamién. Y de seguras que en a tuya redolada, si yes de difuera de Zaragoza, bi ha bella asociación que'n fa. Y si no, posa-te en contacto con qualsiquier d'as debanditas asociacions que bell apanyo podrán fer. Prou que millor presencials que no pas a distancia. Que o contacto humano ye muito important, moceta!

Marcelino marcha ta Madrid. Caleba charrar-ne. Pero poco en queda por decir. Ha estau o manso d'os mansos. O president que no se movió y salió en a foto. Ya me pareixeba a yo que tornar a fer clases de esquí, como que no... Nos deixa o marrón de que a venient presidenta será u Almunia u la Rudi. Villamala y Villapior. Ai mama! Madalena independient y autochestionaria ya!

La rematadera la da o debandito video d'o cabaret, o reggae de Soy el novio de la muerte "perpetrau" por Diego Peña. Que tos faiga goi.

Mani y concierto

Quasi no plego, pero cal penchar un par de convocatorias. A primer ye a manifestación en esfensa d'o Parque Bruil. Si bell diya bi ha un diccionario aragonés de definicions (antiparti d'o "Santiago Val") chunto a zancocho saldrá una foto d'as obras d'o Parque. A lo menos o Periodico ye dando treslada d'a noticia. Cuento que a zancochada ye tan evident y salvache que ye imposible d'amagar lo mal que s'ha feito. Asinas que ya sabetz, si hetz feito servir o parque, si queretz bella miqueta ixe repoliu bico que ye a Madalena, si simplament sotz en contra de que toda ista crica de ababolas continen estando igual de zaborreras, malfurriando os diners de todas y redindo-se de nusatras, itz t'a manifestación. Aqui podetz trobar bells motivos más.

Y o cabo de semana borina, prou que sí. Nogara torna a ufrir-nos borina d'a buena con un concierto por l'aragonés a on que tanyerán Atland, Prau y Los Draps. Si en o zaguer concierto de Nogara, con La Orquestina del Fabirol, a borina estió como estió, iste promete mesmo puyar o ran. A ran personal, antimás, m'agana a saber-lo de tornar a viyer un concierto en a DeVizio que fa bien d'anyadas que no i voi y muitas más que no i veigo un concierto. No cal faltar!

Malfurriar diners III, candidatas

A tamás de tener prou material como ta fer un blog, sisquiá feré una sección d'isto, pero, ye increyible a cantidat de articlos que se podrían escribir dende ixe malfurriar diners que facié ta noviembre. En o preto d'a crisis, Belloch-Biel-Marceli, que son uno y trino, nos enlucernan con as suyas barucas sobre chuegos olimpicos, exponabos, motorlands y todas ixas cosas... A un zaragozano como yo, le costa ya de saber a cuantas cosas nos ha apuntau “sinyó alcalde”.

Nusatras, aragonesas leyals y obedients, encantadas de conoixer-nos, bosamos relichiosament, os nuestros impuestos ta financiar una campanya publicitaria de más d'un millón d'euros, y un estudeo sobre cómo esfender a candidatura olimpica de Zaragoza de 100.000 euros (cinco zeros, los podetz contar). Total, hue, “Malfurriar diners procuctions” presenta 1.100.000 euros, bells 180 millons de ptas en publicidat!!! BIEEEEEN!!!

Belloch, que más que aragonés parix andaluz, diz que ye lo más gran dende tiempos de Cesar Augusto. Astí queda ixo, como a ronda teruelana. Quan, en bells anyos nos miremos enta zaga y as historiadoras escriban sobre ista parti d'a historia d'a Inmortal y d'o país, no adubirán a creyer que permitisenos isto. Y muito menos que bi hese voluntarias que esfendesen con o suyo treballo de baldes, istas barbaridatz. De feito, sobre o timo orichinal, o d'a Expo 2008 y sobre como nos enganyufló a prensa y o poder, ya s'escribe libros. El cachirulo de las vanidades, se diz. ¿Bell una lo ha leyiu? ¿Qué tal? Prometer, promete.

Malfurriar diners II, en Nadal

No que charraba fa bels pocos diyas sobre malfurriar diners y me trobo en o 20 minutos con un articlo an que fablaban d'as perras que todas imos a dixar-nos en tener un fascal de lucetas malfurriando diners y enerchía por toda a nuestra quiesta ciudat. Bieeeeen! Inde en charra en o blog suyo, en un articlo bien intresant an que tamién i culle Barcelona que, a tamás d'estar catalanas no s'eslampan d'as fateras nadalencas. Leyetz-lo que ye buenizo de tot.

Nadal y malfurriar diners son sinonimos. O nadal, antimás de muitas atras cosas ye una orchía de tot lo pior d'o capitalismo. Tot o proceso d'os presents obligatorios chenera una cantidat de basuera inchustificable de tot. A más gran parti d'os presents rematan amagaus en un calaixo (u aventaus dreitament) y totz os papers emplegaus ta envolver-los emplindo, con bel poquet de suerte, os contenedors azuls. O belén d'a Plaza d'o Pilar ye una faltada t'a intelichencia. D'una man contina representando nomás que a una parti d'a población, as catolicas. Fendo, antimás, parti de toda a maquinaria catolica ta atrayer a la catrinalla t'a suya secta-mafia-relichión. D'atra representa Palestina muito millor agora, cuan lo son fendo y ye a rebutir de maquinas, que no dimpués con os pacificos partorcetz y una crica reis portiando presents. Finalment costa buena cosa de diners. Con una chiqueta parti de tot ixo podrían apañar os foraus en o nuevo carril bici de o Coso, escoscar un poquet os poligonos d'a marguin cucha, fer conciertos ta replegar diners ta países empobrecius, dar de minchar a toda a chent que ye indo t'o minchadors socials.... tantas y tantas cosas...

Con tot y con ixo, en tiempos de crisis, de leis de economía sostenible, de retallar os presupuestos t'a universidatz, de campañas t'amortar os standbys d'os electrodomesticos, ye una faltada t'a intelichencia lo d'as lucetas. Malfurrian diners y enerchía sin sacar-ne mica treslada. Y antimás preban de vender-lo como que son cabidando diners porque l'año pasau en malfurrioron más. Brut!

Antismás, o mío refús t'o Nadal yera más que más, por o mío ateísmo. O nadal, por muito que bi haiga chent que prebe de bender-lo como atra cosa, no tien sentiu sin o catolicismo. Güe ixe mesmo refús contina, pero ye más grau o refús que me produix o malfurriar, o timo capitalista, an que se consigue que tot lo mundo gaste más diners que no puede y aplauda un malfurriar de diners publicos de todas, en lucetas, monchons de chodigos y romanos y escandinavos obesos.

microbarrenaus... y agora las olimpiadas

Zaragoza tremola con cada zorrera de Belloch. Exponabo, Zaragoza capital de quemisió, olimpiadas... Pero que ha feito ista ziudat ta merixer isto? Ah, sí, botar-le.... :-( China chana Zaragoza se combertirá en a ziudat d'as paridas. Faiga aqui a suya orterada, empresario! Le daremos de tot, estricallaremos lo río, l'ortal, lo bico, lo que calga ta que bustet y os suyos compañers d'orterada se farten de ternasco y de buquir en os nuestros prestichiosos otels! Qué razón tenió Cano con a biñeta que pencho contino...

Ampraus 029

Torno t’o blog, que en iste berano ye masiau quedo, ta una nueba dentrega d’Ampraus. Replegando-ne soi dende fa semanas, china chana, pues he teniu arrienda treballo y en estar solo en casa no he adubiu que a sobrebibir... A lo menos ixo se soluziona ista nuei. T’as lectoras que me/nos conoixetz, Arale plega ista mesma nuei, asinas que itz parando-tos t’as sesions de fotos chiapanencas que tos tocará d’aguantar.

Ateismo: A iste afer le podría adedicar una seczión todas as semanas. Siempre bi ha cosetas intresants, cuento que por lo absurdo d’as relichions. Tan absurdas que, a tamás de foter-se meya bida rogando a un (u más) dios que les proteixa de totz os mals d’o mundo, dimpués han d’ir a besar mantas sagradas con una mascarota no sía que dios siga con reseco y ixublide abentar os birus d’a debandita manta. Qué dios puede dixar a las suyas fidels pillar ixas malotías? Que mena de chent ba a besar mantas creyendo que ixo puede cambiar o suyo destino u que asinas se comunica con dengún? Sino estase relichión, diríanos que son barrenadas de tot, pero...

Debant d’isto bi somos muita chent. Pero agora ye alto u baixo fazil. Encara que continamos estando minoría os ateus que nos concaramos de berdat con todas as relichions y que diya a diya esfendemos un mundo que no aiga de achenullar-se debant de dengún, ya bi’n eba antismás. En Fendo Orella leyié ista intresant notizia sobre l'ateu Federico qui, mesmo en a suya muerte continó fidel a os ideyal suyos ¡ent’a fin d’o sieglo XIX! Bien por Fede!

Una d’as trazas de luitar contra as relichions ye ridiculizar-las analizando os mitos suyos. O mixín penchó un cartelon que podetz biyer punchando a o canto, an que, en inglés, fan una descripzión bien azertada d’o cristianismo: “A creyenzia que un zombi cosmico chodigo que ye su propio pai puede fer-te vivir ta cutio si minchas simbolicament a suya pizca y le dizes, telepaticament, que lo azeptas como mayestro, ta que pueda abentar una fuerza mala de l’alma tuya que ye present en a umanidat porque una muller-costilla estió combenzida por una sirpient charrina que minchase d’un arbol machico... Prou que tien sentiu!”

In-chustizia: O nazionalismo banal contina con lo suyo. Agora nos ban a quillar un siñal aragonés a o canto de l’español. Puestar que en a zeremonia i baiga a baturraina, en no tener eixerzito propio, y canten unas joticas, tan aragonesas como españolas, d’ixas de “Es de España y sus regiones Aragón la más hermosa”. O chustizia encantau. Aragón mola, pero aintro d’España. Tanimientres tamién podemos trobar unatra campaña d’o megaespañol conzello zaragozano. Ixos cartels que biyetz en a foto, que encara no sé guaire bien ta que balen, pero que en un d’els mete “Mi río. Que haga correr el espíritu de mi ciudad por España y a España por mi ciudad. Una persona mejor de una ciudad mejor en un mundo mejor.” Bella muestra millor de nazionalismo banal?

Zerbantes omosexual?: Ixo ye lo que diz un libro. Y mesmo pior: catalán! A notizia me parixió curiosa por fata. Qué importa reyalment con qui fese foriquetas Zerbantes u d’an estase naixiu? Ixo a la chent normal. Pero lo bueno d’a notizia ye que de seguras que muitas españolistas ya yeran carrañadas con l’autor por dezir que un d’os mitos suyos yera catalán y manflorita. Se puede estar más antiespañol? Jejeje...

Dreitos animals: PETA ha denunziau a o zirco Ringling por abatanar a beluns d’os bichos que tienen engarcholaus. Mesmo consiguión grabar un bideo contrimostrando-lo con una camara amagada. No sé como rematará a cosa. Cuento que continarán librando-se. Ya sabetz que a chustizia no fa guaire caso a istas cosas. Pero sí que podemos fer cosas. Y ye que ixe zirco bendrá ta Zaragoza en Nobiembre. Bellas asoziazions ya han prenzipiau a protestar. Cal prenzipiar a organizar-nos ta que no biengan u a lo menos que as ziudadanas no leben a la suya catrinalla a biyer animals torturaus.

Ta rematar, güe no meto bideos de lemurs. Soi estau escoscando un poquet a casa y he meso o conzierto d’Obrint Pas “Un poble en moviment” en a TB. Ye buenizo de tot, y pencho contino una d’as millors cantas suyas, y en a bersión en directo una d’as más emozionants, por a partizipazión de Belén Agulló, chirmana de Guillem Agulló.

O millor d'a semana 027

O bico en fiestas. A la fin son prenzipiadas as fiestas d’a Madalena y parix que se podrá fer a chera de solstizio. Ta qui no lo sepatz, ixo no estió tan platero mientres a semana pasada. En momentos de prenzipiar as fiestas os bezins nos trobemos con o parque meyo cletau. Parti d’ixas cletas yeran chunto a l’espazio an que se ferá a chera. Preguntando a las autoridatz dengún no sabeba dezir-nos cosa segura. De “Parques y Jardines” ta “Servicios Públicos” y d’un cabo t’atro. O caso ye que encara no sabemos guaire bien o qué ferán en o parque. Parix seguro que ban a cambiar a traza de ruxiar-lo y os camins, pero poco más sabemos.
Antiparti d’a manca d’informazión, ye penible que en un parque se faigan obras mientres o berano. Igual como as carreras s’apañan de berano, si cal fer cosa en un parque, que se faiga en nobiembre que dengún no lo fa serbir. A rispuesta ye que as obras se son fendo con diners de o plan E ta creyar treballo y que han d’estar feitas antis d’abiento. Alabez a culpa será d’o conzello que no ha trobau garra atra obra en a ziudat que se pueda fer en berano. Fuens de parques y chardins, como informa Eraldo, mesmo han prebau de fer serbir a solidaridat con os treballadors como arma contra os bezins. Nusatros continaremos achuntando-nos todas as tardis ta reibindicar o parque. Si iste ye o conzepto de partizipazión ziudadana que tiene o conzello imos bien... Por tot isto cal que ista chera de San Chuan sia a rebutir de chent. Antiparti de porque ye una fiesta bien dibertida, porque estiaño cal que se beiga que somos muitos os usuarios d’o parque que queremos continar fendo-lo serbir y que tenemos o dreito d’opinar sobre o qué ferán astí.
Antimás d’iste afer cal remerar que continamos de fiestas dica o domingo benien. O programa lo podetz consultar aquí.

Desde Banarús. Se me adebantó en dos articlos en a mesma semana un bideo de Juan Carlos Moreno Cabrera y bellas fotos sobre as rondas negras italianas. D’o primer poco más que dizir-ne. En fa de goi ascuitar a ixe ombre! Ye tot un argumentario. D’o segundo parix una rispuesta a la pregunta de “La ola”. Isto podría tornar a pasar. Pues sí. Prou que sí. Y cal estar a la tisba pues muitos meyos de comunicazión son refirmando midas parellanas en toda Europa. Nomás cal biyer a cantidat de notizias que cheneran casos tipo Marta del Castillo. Qui no conoixcaz a notizia, aquí tenetz a bersión de Rebelión y de Público.

Biscarrués: Que como bien dizen ye un lugar, no pas un entibo. Continan as mobilizazions contra o entibo. Mientres toda a semana se fan charradas y actos ta informar y ta protestar contra ista sinrazón. O programa y muita más informazión lo podetz leyer en http://www.riogallego.org/.

Magic: Diz que cambiarán os regles con a plegada de M10, a nueba edizión basica. No he puesto leyer os cambios, pero ascuitando o programa de Magic Madrid, no me han feito mica goi. A más gran parti son fateras que no cambiarán guaire o chuego, pero as modificazions en a mecanica d’a fase de combate son penibles. Basicament, se rematón as pirulas tipo Fanatico Mogg u un simple Creiximiento chigant. Muito mal t’os siñors de WotC. Como bien dizen en o debandito programa, si Magic ye masiau difizil ta belún, que no i chugue. Imos ent'a Idiocrazia, remeratz-lo... A dificultat d’os regles y todas as posibilidatz que ixo da, ye una d’as grazias de Magic. Sin ixo o chuego se queda en baco. Asperemos que se lo piensen unatra bez u cambeen de camín d’opinión.

De bideos, tos ne pencho un de Mezquita de Jarque. Puestar que belúns bi beigatz a bel zorrizo bailando que se parix muito a un serbidor. Qué malo ye ixo de que tot o mundo tienga una camara de bideo!

O millor d'a semana 016

Como deziba en o post d’antis, a primabera trai arrienda faina y, en alparzear bella mica por internet trobas más y más cosas que fer y leyer. Pencho abaixo, como todas as semanas, Lo millor d’a semana.

The Pirate Bay: Ista biñeta –si bi punchaz, s’enampla- la trobé mirando atras cosetas, y me fazió firme goyo. Cuantas begadas o mundo d’a industria mosical y de bideo han chilau que beniba l’apocalipsis y todas han estau mentira. Porqué ba a estar berdat agora? China chana, son conseguindo que baixar una peli de l’Emule siga un acto reboluzionario. Como deziba belún, a mosica esistiba antis que no a industria discografica y continará esistindo cuan muera. Ta qui no entienda anglés a traduczión la podez leyer en iste binclo.

Frikazo!: Remeraz que fa tiempo reté a os fabloggers a fer un articlo más friki que no uno que penché? Diaple replegó ixe reto y en fazió uno prou friki. Con tot y con ixo, no’n yera guaire. U a lo menos yera opinable qué articlo yera o más friki. Manimenos he de reblar debán d’o que fazió ista semana. Una replega de bersions d’as cantas de Star Wars con trastes de toda mena. M’achenullo debán de tú, Diaple. Malamen puedo ganar-le a isto. Has ganau.... por agora (risa maligna).

Combocatorias: Os fungos continan surtindo y, en rematar d’escribir l’anterior post he trobau dos combocatorias, diferens y parellanas de bez. En Zaragoza, somos menazaus, unatra bez, por una Expo. A clamada ExpoNabo que diz que se ferá por o bico d’As Fuens. Agora, que ya sabemos millor como ba tot isto d’as Expos, a Coordinadera Zaragoza Ziudat Compacta, s’ha concarau con ExpoNabo y continará o lunes con as chornadas Expo Paisajes 2014: Un nuevo derroche frente a las prioridades sociales y ambientales de Zaragoza. Serán en o zentro Joaquín Roncal y aspero que siga a simién ta enzetar tot un mobimiento ziudadano en contra de dixar que continen fendo o fato con a nuestra ziudat. Que ye inmortal, pero no tanto!

Atros que tamién esfienden a sostenibilidat y a balura cultural, sozial y meyoambiental d’o meyo, son a Coordinadera Biscarrués-Mallos de Riglos y que d’o 23 t’o 26 d’Abril fan as VII chornadas por o Rio Galligo con baixada de nabatas. L’año pasau i estié y cal ir-ie a lo menos bella bez. Se i pasa un rato sobrebueno y te metes bien barucoso cuan biyer baixar as nabatas. Borina, cultura, meyo ambién, reibindicazión... y mesmo gastronomía en un par de diyas... Que más querez. Miraz-tos o programa que de seguras que nos i biyeremos.

Periodistas abataniaus: Os gossos d’esquadra abatanión istos diyas a un fascal d’estudiants y a bels periodistas. Como os estudians importan igual, a prensa s’ha zentrau más que más en os suyos compañers abataniaus. Qué de fura sería a baralla ta que rezibisen tantos periodistas y tantos ziudadans que no feban que pasar-ie... Os gossos, pobrichons, deziban que les eban enristiu con siñals indepes que feban serbir igual como lanzas. Que si estasen siñals españols, tira! Pero as senyeras amb estrella fan muitismo más mal... Como siempre o tratamiento d’a informazión ha estau penible mientres istos diyas. Nomás una pregunta: Si agora un periodista u un estudian estricallase toz os beires d’una comisaría d’os mossos, serían tan comprensibos y solidarios como con o mozo aquel –eroe, le deziban- de Lazkao? Cuento que rezibir tantos palos como les fotión tamién carraña tanto u más que si t’estricallan a casa.

Mancusos: Ta rematar un poquet más tranquilo iste post, pencho contino un bideo de Los Mancusos, una colla de teyatro, que podiemos biyer o biernes en o Zentro Zibico Unibersidat y que tos recomiendo de biyer en que podaz. T’arreguir-se-ne bel poquet que asobén nos cal...