miércoles, 27 de febrero de 2008

Zaragoza, Spain

Aragón y l'aragonés disaparixen china chana y, más que más, en Zaragoza. En o binclo a la fin d'iste articlo podez beyer a Belloch prebando de charrar ¿anglés? chunto a os conzellers de PAR y IU. Y de rematadera, lo primer que diz ye Zaragoza, Spain. Penible. Birchenzica, que me quede como soi. Ista mesma chentota se rediba fa bels pocos diyas de una zagala charrando aragonés en o conzello!!! Jibo!

D'atra man o concurso A tot estrús Popyrock que fazió lo conzello l'año pasau, ha cambiau o nombre suyo. Bueno, en reyalidat, simplamén lo ha alcorzau. Agora ye... sí! lo has endebinau! Popyrock. Simplamen Popyrock. Cal parar cuenta de que no han dixau o nombre en castellano, pos no'n teneba. Agora o nombre ye en anglés. Talmén a RAE aiga adibiu pop y rock a o dizionario suyo, ya sabez como son, pero ye de dar que son parolas que bienen de l'anglés. D'ixe anglés que nian charrutían os nuestros conzellers y alcalde....


Bel diya m'independizo mesmo d'Aragón....


Lagors noruegas

O mundo ye en momentos de plegar en a suya fin. U a lo menos os umanos. Ista apocaliptica ambiesta que comparte Arale y muitos atros (yo mesmo en os diyas malos) en ye a d'os noruegos, que ya se son parando ta lo pior. Iste maitín he puesto ascuitar en a TB como o gubierno de Noruega ha presto una mena de bunker an que alzar asabelo bariedaz de lagors ta guaranziar que, si bi ha un apocalipsis se pueda tornar a sembrar por a planeta as plantas que más onra faigan a os superbibiens. Prou que ta que ixo balga ta cualcosa, cal que bi'n aiga.... Guaranzian tamién a dibersidat biolochica.

M'ha parexiu asabelo curioso. Más que más en un mundo enzerrinau en achiquir ixa bariedat acotolando toda mena d'espezies u fendo transchenicos, pero ixe ye unatro afer. O reportache continaba con una güellada ta unatra reserba que bi ha en l'Estau español parellana. No ye un bunker ni tien ixa enchaquia de que podamos repoblar a Tierra. Simplamen tien una balura zientifica ta conoxer todas as lagors que ba abendo-ie por l'Estau. As imachens yeran d'acollonar. Arrienda aparadors (pero arrienda, e!?) con un puyal de potes y en cadagún ficaus una alpada (alto u baxo) de lagors.


Asinas que ya sabez. Cuan l'apocalipsis plegue, talmen o 9 de Marzo u talmen dimpués, cal marchar ta no se dó de l'Artico a mirar ixas lagors que bien que nos caldrá... (I abrán ficau cañimo???)

jueves, 21 de febrero de 2008

Aprende a chugar a Magic

Asoben me preguntan que ye ixo de Magic y como se chuga. Ye difizil d'esplicar ta qui no'n sepa mica. Y, más que más, muito largo y embolicau. Pero grazias a Youtube, an que ya bi ha de tot, y a unos siñors muito amables, ya podez aprender alto u baxo qué ye ixo de Magic. S'ha feito un bideo que trobé en Rebellion en seis partis an que esplican lo alazetal de Magic. Prou que en tasamen bente menutos que adedican a esplicar o funzionamiento de chuego no se puede saber-ne tot, pero ye un prenzipio. Asinas que en Barrenau TB (ya deziba en l'anterior articlo que isto rematará estando un bideo blog) tos pencho o primer bideo. A resta los tenez en a debandita web de Rebelion y prou que en YouTube.



martes, 19 de febrero de 2008

Más bideos

No sé si a la fin isto rematará estando una canal de TB, pero mientres yera penchando l'anterior articlo, he remerau un bideo que me fazió muito goyo. A bier si belún troba bel caso parellano a o d'o bideo por istas tierretas...

Se fan a mofla de nusatros (a la fin...)

Cuento que muitos ya abrez bisto, por a TB tradicional, por Youtube u por a paxina web suya o nuevo programa d’Aragón TV: OregónTV. Ye un programa que replega a tradizión d’os sketches d’umor de atros programas como Splunge, u d’os que feban de cabo ta cuan El Informal u Cruz y Raya, pero dende una ambiesta aragonesa, encara que más que más cheposa. No he puesto encara beyer toz os bideos, pero bi’n ha muitos bien buenos. Se’n fan a mofla d’a Expo y de Flufi (a qui rebaltizan como Flurvi) de contino y, tamién, por exemplo, d’os puliticos nuestros. Pero un d’os sketches que más goyo me fazió y que más me trucó o ficazio ye ixe d’o Comando Almugabar que ya en han feito, a lo menos, dos. I salen dos mozez encapuchaus, en plan terroristas, charrando d’as reibindicazions suyas. Siempre prenzipian os comunicaus suyos con un “Buena nuei!” y, mesmo en uno d’els charraban de l’aragonés. Sé que a muitos les ferá fastio ista mena de umor, pero a yo m’encanta de redir-me de yo mesmo.

Antiparti de que faiga u no goyo u grazia, o simple feito de que ixe sketch se faiga ye un siñal de que somos un poquet menos imbisibles. Ya salimos en Aragón TV, encara que sía ta que se faigan a mofla de nusatros. Conoxen, alto u baxo, bels d’os nuestros tics y d’a traza de charrar nuestra. Cal remerar programas que han feito cosas parellanas en atros países como Vaya Semanita en ETB u Polonia en TV3. Que aparixcamos en a televisión ye una traza de normalizar-nos sozialmen y blincar un poquet as mugas d’a Madalena.



Os bideos los podez biyer en www.oregontelevision.com si no querez u podez biyer o programa a ixas oras tan malizas que lo fan. Abaxo en pencho un par...








martes, 12 de febrero de 2008

Articlo de Calvo Alfaro

Un articlo curioset que he trobau por astí... Cal remerar que ye de 1919. Bellas cosas cambean tanto y belatras tan poco...




Necesidad de un Partido Republicano de Aragón:

Le falta a España una intervención directa de la ideología aragonesa. Por ello y por razones de carácter autóctono, es imprescindible que todos los partidos políticos se aragonesicen.

Todos los partidos, sin excepción ninguna, pero muy particularmente aquellos que por representar la vanguardia ideológica del pensamiento aragonés tienen la sensibilidad más vivificada. El Partido Republicano muy especialmente.

Yo no puedo creer que las huestes democráticas de Aragón renuncien al ideal de aragonesización; creando la gran democracia aragonesa, forzosamente ha de convivir con las otras tierras ibéricas hermanas.

De este modo, es indiscutible que las fuerzas verdaderamente liberales del país, con un ideal regional e interregional habrían de ser mucho más eficaces al Estado que actualmente en una esfumada personalidad.

La creación de un gran partido republicano aragonés, autónomo y con miras a la autonomía le haría mucho más sólido y mucho más respetado en el Madrid de los fariseos.

Nuestro magno pensamiento – de todas las ideas y de todos los matices aragoneses – debe estar en el futuro renacimiento por el cual el País Aragonés mande al Parlamento de todos los pueblos hispánicos sus representantes, rotundamente, inconfundiblemente aragoneses.

La creación de un gran Partido Republicano de Aragón realizaría el milagro de la bella unión de fuerzas democráticas con ramificaciones en todas las tierras y rincones de Aragón.

Pensad esto y meditad, que acaso en vuestras manos, extirpadas del funesto caciquismo está el porvenir de nuestro resurgimiento, como pueblo libre y consciente de sus destinos. No lo olvidéis, ya que sois aragoneses por ley biológica y republicanos por coincidencia ideológica.

Y sobre todo, tened en cuenta que este renacimiento no llegará mientras no se realice entre nosotros la sagrada unión de fuerzas y de ideales.

Hemos de prepararnos para la revolución y la revolución que a nosotros nos corresponde como parte alícuota de este gran retablo ibérico es la aragonesa, con la extirpación de lo viejo, de lo caduco y de lo inservible.

Julio Calvo Alfaro (agosto 1919)
Ideal de Aragón nº 165, 10/09/1919
Extraído de GERMÁN ZUBERO, Luis (1998) Aragón durante el siglo XX. Estudios urgentes. Cuadernos de Cultura Aragonesa nº 28. Rolde de Estudios Aragoneses. 1998, Zaragoza.

viernes, 8 de febrero de 2008

Timofonica

Con ixas cosetas de que tiengo un blog, correu eleutronico y que me fa goyo mirar-me o internet de cabo ta cuan (mira-te tú que conzietos!), creyié menester meter una ADSL en casa nuestra. Dimpués de peteniar d’una botiga ent’atra y de beyer as diferens ufiertas me dezidié por una que no ye de Telefónica. Ixo sí, en todas me dizión que eba de conduzir-me con Telefónica ta tener linia y que, nomás dimpués me podrían meter l’ADSL. Bueno, bien. Que le imos a fer! Como conducir-se por internet yera de baldes ixo fazié. Dimpués d’emplir arrienda preguntas y fateras, lo consiguié endicando-me-ie que abría de bosar bels 15 euros por o mantenimiento de linia. Dimpués me dizión en a interpresa que ixos costes iban incluyius en a ufierta de l’ADSL que m’eban feito. Ye dizir, yo bosaba a la interpresa, por exemplo 35 euros, incluyendo-ie os 15 de Telefónica. Alabez, como tardan entre 30 y 40 diyas (que ya les bale) en meter-me-la, suposé que o primer mes le bosaría bels 15 euros a Telefónica por fer serbir a linia. Pero be-te-me que ayer me plegó una fautura de 48 euros. Jibo! Bel amigo ya m’eba abisau que ixo podeba pasar. Que, por si un caso, te cobran lo que les agana y si no tartes, bosas y t’a pocha suya! Quiento negozio que’n abrán feito con a fatereta ista!

Clamo t’o 1004. Dimpués d’un ratet ascuitando a una maquina una boz de muller me contesta. Le comento o caso mío y me diz que mirarán a beyer si bi ha bella error y que, en ixe caso me tornarán os diners en a benién fautura. Atura, mozeta! Que, si tot ba bien, dende o mes benién yo no tendré mica relazión comerzial con busatros! Que ya bosaré a otris... – No se’n faiga, que ya lo apañaremos con els y sino, le plegará un cheque en casa suya... Enluzernau, dezido confitar en a pobrichona moza ista, que no tien mica culpa. D’atra man, con l’ADSL me pillé una ufierta que te bendeban un portátil por un pre muito bueno. Abié de meter por debán 100 euros que, dimpués me sacarían d’as cuatro primers fauturas. Alabez, puestar que en a primer fautura me bosen a yo?
Increyible. Que mafia! Ya me’n eban contau d’istas un trapazil, pero dica que no lo bibes... Cuento que iste no ye que o primer capitol d’una larga falordia. Continaremos informando. Por agora, maitín prebaré de meter una quexa t’o consumidor en una d’as botigas de Timofonica. Qué pasará......?

jueves, 7 de febrero de 2008

Notizietas de l'aragonés

L'aragonés ye bien bibo, ya lo dizen por astí en un programa de radio... Iste ´mes de Febrero imos a estar bien aqueferaus. Ta prenzipiar podemos ir t'a charrada de Aleksey Yeschenko de titol "Promoción de la literatura aragonesa en Rusia: una apuesta por el diálogo cultural" y que organiza Rolde de Estudios Aragoneses. Ta qui no lo conoxca iste siñor treballa en o Zentro Norcaucasico de Estudeos Soziolingüisticos d'a Unibersidat de Piatigork (Rusia) y ha traduziu a o ruso bellas obras como No deixez morir a mía boz y ye traduzindo Reloch de Pocha. A charradeta se ferá o Miercols benién a las 19:30 en a Biblioteca d'Aragón (C / Dr. Cerrada, Zaragoza)

Y charrando d'a Bilioteca d'Aragón, PEA s'achuntó con a suya direutora con qui charrón de a situazión d'as obras en aragonés en a debandita biblioteca y d'o premio de literatura en aragonés "Arnal Cavero". Parix, seguntes a suya propia cronica, que a reunión estió alto u baxo bien. Caldrá beyer si a la fin da bel fruito....

En a demba d'as publicazions, y como ya informaban en O Chemeco d'as parolas fa poco, ya podemos leyer o numero 4 d'a rebista Ambista. Ye una rebista eleutronica sobre patrimonio cultural aragonés escrita más que más en aragonés pero tamién en catalán y castellano (encara que poco). Iste numero s'adedica en gran parti a Teruel, a siempre xublidada en istos afers de l'aragonés. No conoxeba guaire a rebista, pero he de dizir que o conteniu suyo ye bien bueno y, en estar eleutronica y no aber de malfurriar diners en tintas y cosas d'ixas a presentazión ye increyible. Mesmo se i pueden beyer bideos. Muito buena, de berdat....

Ta rematar (por agora) un poquet de borina que bi abrá o diya 22 en o Z.S.A. A Enrestida. I han organizau un conzierto, de conchunta con Nogara, Fendo Orella y Mago Fermín de refirme ta La Orquestina del Fabirol. I tañerán Dechusban y uns gaiters. Tamién Fendo Orella adedicará a ista colla un espezial en o suyo programa de radio. Ista iniziatiba contrimuestra unatra bez cuanto se quiere a La Orquestina en Aragón y en fablilandia y ye que talmén siga una d'as collas que más han feito por recuperar y fer balurar a nuestra cultura y a nuestra luenga.

Y si querez biyer a Dechusban antis d'ir t'o conzierto bi ha arrienda bideos suyos d'o conzierto de 25 cabo d'año d'a Federazión de Fablans. En pencho uno d'exemplo: