martes, 12 de junio de 2018

Las mozas. Historias d'un cole de mosens XI

Un ser imachinario charró a los chefes d'o mio colechio y les dició que lo millor pa la nuestra educación yera que nos separasen d'a mitat d'a población, trigando como criterio los nuestros chenitals. Ixo, que los chueces fachas d'un estau aconfesional han decidiu que paguemos entre todas, tien conseqüencias educativas muit grieus, como que me plantase con tretze anyos sin haber puesto creixer con zagalas d'a mia edat y tener alavez un problema de relacions prou grieu con ellas, dica que me i facié.

Las mesachas nos embabiecaban a muitos de nusatros dende crietz. T'a part d'alavez sí que yeran ixos "sers misteriosos" que diz lo topico masclista. Sers que no hesen estau misteriosos si hesenos creixiu sin troixar-nos. Pero como no las tenebanos en casa, hebanos d'ir a buscar-las por la redolada.

Lo primer colechio an que nos aventuremos, como Livinsgtones preadolescents, estió lo Gascón y Marín. Un companyer de clase - no me preguntetz cómo lo aconsiguió- festellaba con una zagaleta d'ixa escuela. Con ixa enchaquia, una colla d'amigos quedabanos con los dos y marchabanos ta un callizo d'o Paseyo la Mina, an que viyebanos como se besuquiaban toda la tarde. Totz dos levaban aparato dental, y siempre febanos chanzas con las posibilidat de que las suyas ferrallas d'enganchasen y no podesen desbesar-se, habendo d'avisar a sus pais pa que venisen y los descubrisen pecando. La resta mirabanos de charrar con las mesachas, avergonyaus de tot, mirando de fer-nos con una novia, sin saber guaire bien lo que ixo yera.

Las siguients expedicions nos levoron ta Carmelitas. Astí conoixeba a una zagaleta, filla d'uns amigos de mis pais. Pasabanos por la puerta quan en saliban a viyer si escunzabanos con la que nos fese goyo. Pa quan feban fiesta d'o cole, y bella tarde que las monchas andasen espisguardadas, gosabanos de colar-nos-ie pa alparciar qué podeba haber-ie de diferent en aquell patio misterioso freqüentau nomas por zagalas. Las dificultatz pa entrar-ie, y lo feito de que me pareixeban una mica pixautas, fació que a escape chirasenos t'o tercer destin en lo nuestro viache en busca de companyía femenina.

Asinas pleguemos en lo que mas nos duró. Lo colechio publico Miraflores. Lo tenebanos bien cerqueta y lo patio suyo yera a ran d'a carrera y d'o parque. Una cleta nos separaba, pero nos apanyabanos, charrando a lo tuyo traviés, u mesmo pasando-nos los libros de textos pa que nos i sinyasen y nos metesen bella ixautada de crietas. Ya faríanos once u dotze anyos y, tot y estando encara bien patantons, las hormonas empecipiaban a alticamar-se. Ellas, ye claro, se nos ne rediban. No yeran como las de Carmelitas, pixautas y d'un cole no mixto. Yeran bien feitas a lo contacto con atros ninos. No febanos que decir fateretas propias d'ixa edat y con que nos adedicasen bella floreta, ya marchabanos de tornada ta casa a dos palmos de tierra.

Las mesachas me ubrioron, en ixos zaguers anyos de cole y en los primers d'instituto, un mundo diferent, an que las relacions entre las personas no teneban ixa pudor de masto violento marcando territorio que tanto se cautivaba en Corazonistas. Quan a la fin en conoixié y podié tener las relacions normals que habría de tener qualsiquier choven, trobé una companyía muito millor en ellas que no pas en ells. La mia cuadrilla, durant muitos anyos, yera formada muit mayoritariament por zagalas. Una opción que la educación segregada, trigada por mis pais, desfendida por la ilesia, y subvencionada encara hue por los impuestos de todas, me negó.

En marchar t'o instituto publico, s'encertó que beluna d'ixas mesachas d'o Miraflores fue con yo ta clase. Mesmo con bell par contino tenendo amistanza dimpués de tantas anyadas. No puedo evitar fer-me a riseta cada vegada que recuerdo ixos meyodiyas en lo parque, charrutiando de fateras, con miedo mesmo a acercar-nos-ie. Ni evitar pensar en tot lo diferent que hese estau la mia vida d'haber puesto relacionar-me con mesachas d'una manera normal durant los mios primers anyos d'existencia.

lunes, 4 de junio de 2018

Mosicas que me va trayer d'o Viñarock. Tierra de barrenaus 4x10

T'os festivals, i vas siempre con la langaria d'ascuitar bell concierto, de viyer a la tuya banda favorita, y de pasar ixos ratos sobrebuenos que siempre te'n alcordarás. Pero te'n tornas siempre con bella sorpresa inasperada. Bandas que nian conoixebas, directos millors (u piors) que no asperabas, versions de cancions, discursos combativos, ... Y con muita mosica.



Iste zaguer Viña va contar que nos estiemos bellas trenta horas de conciertos en total. Ixo da pa muito. A la chent que amamos la mosica nos fa goyo de charrar-ne y de sentir-la de conchunta con atras personas. Asinas que en iste programa quiero compartir con vusatras una chiqueta parte d'a experiencia mosical que va estar la pasada edición d'o Viñarock. A beluna d'as bandas las viyeba por primer vegada. D'atras, me sé lo suyo setlist de corazón. D'atras que va viyer, no en charro porque no bi ha cosa que decir, u porque me deixoron fredo, u porque iba masiau zorro.

Antimás, aproveito pa charrar d'a programación festivalera d'iste verano aragonés, que ye buena, abundant y variada. Bien de mosica pa un mes de muito bailar y cantar. Aspero que tos faiga goyo y que me deixetz en los comentarios las vuestras opinions, sucherencias, faltadas, y lo que calga.

lunes, 21 de mayo de 2018

Filla de gaiter

(Puetz descargar-te iste relato aqui)

Trucó a la puerta, tot y que yera nomas estrinyida. Siempre lo feba. Pai siempre respetó a-saber-lo la mia intimidat. Pausé la reproducción que teneba en pantalla y me chiré. “Pasa, pasa!”. Con una riseta, empentó la puerta d’a mia cambra. Carriaba una caixa gran, con papel de regalo d’ixe que vendeban en la papelería d’abaixo de casa nuestra. Feba decisiet anyos y, como cada 20 d’aviento, me trayeba la suya estrena. Siempre se i feba muito. Bellas vegadas acertaba y belatras no, como l’anyo que me trayó ixe vistiu rarizo que heba mercau en una botiga de Paseo Las Damas. En ista ocasión, iba a acertar de tot, pero yo encara no lo sabeba.
-         ¡¡¡Bufa, bufa, bufa ixas velas…!!! - Siempre me cantaba La Orquestina pa felicitar-me. Moveba la caixa a lo compás, d’un costau ta l’atro, bandiando ixe misterioso paquet.
Yo me’n rediba, y me meteba una miqueta roya. Antes mas me feba vergüenya estar lo centro d’atención, mesmo si nomas yeranos pai y yo, y en casa nuestra.
-         ¿Interrumpo, filla? Si quiers i torno dimpués, ¿e?
-         ¡No, no, ababol! Yera editando l’audio d’a grabación d’ahiere. Aspera que voi a guardar los cambios y soi toda tuya.
Levaba firme rato retocando una d’as primers cancions que hebanos grabau con la colla que teneba alavez. Manimenos no acababa de quedar como yo quereba. Bien se vale que tornemos a grabar-la, bell anyo dimpués, en un estudio profesional. Aquell material yera insalvable.
-         ¿Qué me trayes? ¿Qué me trayes? - Prebaba de pareixer mas niervuda que no en yera en realidat. Pai teneba muita langaria por lo mio present y quereba que sabese que lo valuraba. La suya nineta yera tant gran que ya adubibanos a compartir aficions, borinas, viaches, … Una chiqueta adulta ya.
-         Alargué los brazos, movendo los didos d’as mans pa que me pasase aquella caixa tant gran. ¿Que bi habría adintro?. Devantando-me d’a silla, le facié un beset en lo caixo entre que le agafaba la caixa. Totz dos nos posemos en lo leito mio.
-         ¡¡¡Qué niervols!!! ¿Qué ye? ¿Un balón? Hehehe - siempre febanos bella groma asinas quan nos regalabanos qualcosa. Yera evident que ixo no yera un balon. Yera evident que nunca no me regalaría un balón. Nunca no he estau yo de guaire esporte.
-         Aaaaaah - feba cenyo de misterio - Ubri-lo a viyer! - Feliz cumpleanyos, carinyo. Aspero que te faiga goyo. - cambió lo tono chuzón, por unatro mas tierno.
Esgarrapé lo papel que envolveba aquella caixa. Yera de cartón marrón, zarrada con precinto. Tardé bell poco a conseguir ubrir-lo. A la fin, ubrié la caixa y astí yera. Fendo uellos, me trobé con l’estuche d’a gaita de pai. Pensé un momento. ¿Qué yera aquello? ¡No me podeba estar regalando la gaita! Debeba haber feito servir la funda pa ficar-ie lo present. Me lo miré. Se me miraba fito-fito, prebando de grabar en la suya retina ixe momento. Ell me sabeba enarcada, y yo sabeba que ell lo sabeba. “¿Qué has feito?” le pregunté entre que empecipiaba a ubrir la zarrapullera.
Astí yera, con lo suyo vestiu royo con dibuixos blancos. Con las pelletas de cullebra forrando lo bordon y la bordoneta. La gaita de pai. Alodieta. No me lo podeba creyer, asinas que le’n pregunté, farfallando por los niervols
-         ¿Qué… qué… qué sig - significa isto, papa? - ya lo barruntaba
-         Alodieta ye tuya, ¿qué va a significar? Yo ya no puedo bufar-la. Ye decir, bufar-la sí, pero no fer-la sonar - l’artrosi de pai cada vegada le dificultaba mas fer los suyos didos gambadiar por lo clarín. - Quiero que sigas tu qui torne a rancar-le ixas melodías tant repinchas que tantas vegadas hemos bailau.
Pai se me miraba con complicidat. Por lo mio esmo, pasaban un ciento de bailes, de nueitz de veilada, de festivals, que m’heba levau dende nineta. En totz, presents Alodieta, prou que sí. Companyera inseparable de pai. Encara que en ixe momento pareixese que se despediban.
-         No puedo quedar-me-la, papa. Ye tuya. Ye la tuya gaita. La tuya Alodieta. Ya me’n mercarás una quan tiengamos bella perra. Iste verano treballaré, que ya tiengo mirau un bar en Salou que les fa falta chent
-         Rai que treballes u no. Fe pocha pa atras cosas. Regular que te fa falta un nuevo ordinador, que ixe lo yes estirando a-saber-lo. Quiero que tiengas a Alodieta. Quiero que faiga parte d’a tuya historia como en ha feito d’a mia. ¿Sabes que yera con yo quan conoixié a tu mai?
Prou que lo sabeba. Antes de morir, mai me lo heba contau bell par de vegadas. Pero pai ye muit charrín, y le fa tanto goyo de remerar los tiempos de chovenet, que siempre le deixo recontar ixas historias.
-         Yeranos en un bar, en Ansó. Nos hebanos chuntau los quatre varrenaus que t’a part d’alavez estudiabanos gaita. Bueno estudiabanos…. la febanos sonar, si a un caso, d’aquellas trazas. ¡Qué chandríos! - movió lo tozuel como si censurase la mosica d’o suyo “yo” pasau - Nos hebanos chuntau, te deciba, en un bar. I yera tamién Chuan, ixe que nos trobemos l’atro diya en lo concierto. ¿Te’n alcuerdas? Yo bufaba “Aqueras montanyas”, que yera una d’as quatre que nos sabebanos, quan tu mai entró. Difuera pleveba, y levaba un chapero de fieltro que se sacó en entrar t’o bar. Lo espolsó, deixando cayer l’augua ta tierra, y se apanyó los pels. Ixos pels negros y largos que teneba de chovena. ¡Ai! - sospiró - ¡En yera de polida! - siempre se feba la riseta quan charraba de mai - A la esquena, una funda de donzaina. Yo m’entivoqué con la nota. Bueno, me torné a entivocar. Ya te digo que no yera guaire bueno alavez. Yera empecipiando.... Mai conoixeba a un d’os mosicos que nos hebanos chuntau. Abel. A ixe no lo conoixes. Se demandó un pacharán y se’n vinió a tocar con nusatros. Bella hora dimpués yeranos los zaguers en lo bar. Abel, tu mai y yo. Estió una gran nueit. Tu mai m’amostró mas sobre mosica en ixe rato que pasemos chuntos, que tot lo que heba aprendiu yo por la mia cuenta dica alavez. Paré cuenta d’a importancia de tener una mayestra, y de las mugas de autoaprendizache. Y, prou que sí, aprofité ixa enchaquia pa decir-le de quedar bell diya a ensayar. Yera de Uesca, pero estudiaba en Zaragoza, asinas que los diyas de cada diya vivibanos en la mesma ciudat. Yo creigo que me dició que sí por la gaita. L’encantó lo soniu y las faldetas. Ixe diya encara no teneba la pelleta de cullebra. “Ya te’n conseguiré beluna” me dició. “No puet estar que la tiengas asinas d’espulladeta, te pillará fredor”. Ibanos una mica pifoletz ya, he de confesar-te.
-         Precisament por ixo, pai, has de quedar-te-la. No puedo acceptar-la.
-         ¡No digas fateras! Una gaita ye pa fer-la sonar. Pa que la chent pueda bailar. Y divertir-se. Y festellar. ¡Mesmo reivindicar!
Me yera entrefilando la siguient historia
-         ¿Sabes que a pocas acaba presa ista gaita? - heba acertau - Yeranos protestando contra la guerra. La colla de gaiters i fuemos a animar una miqueta. “Garra manifestación sin gaita”, yera un d’os nuestros chilos de guerra. Tu mai y yo ya yeranos novios y, con atros amigos nos apuntabanos a todas. Gracias a las suyas clases, ya entendeba una mica millor de qué iba tot aquello d’a mosica. ¡Guarda si tenió paciencia tu mai! Hebanos dormiu en l’acampada contra la guerra que se fació en la universidat. De nueitz aturmentemos a los companyers… ¡qué risas nos faciemos! Uno, mesmo acucutó por la tienda y m’aventó los maripis. Bueno, que esbarro… A l’atro’l diya, como te digo, bi heba “mani”. I levemos las gaitas, tot tocando himnos. “Val de Benás”, “A las barricadas”, … y beluna pa fer la gracia: Kortatu, d’Obrint Pas, l’Ikusi Mendizaleak, … ya sabes. Los antidisturbios s’heban desplegau por tot arredol d’o Paraninfo. Lo claustro se suspendió y mesmo lo rector salió a prebar de negociar. La tensión fue puyando durant tot lo maitin. La policia iba con los escudos, y los cascos y toda la mandanga pa trucar-nos. Tu mai y yo, como siempre, en primer ringlera. Limpio bufar. Animando a la chent y aturmentando a aquells “achents de l’orden” - en decir isto siempre feba un tono somarda. Pai nunca no ye estau guaire amigo d’a policia - Encara nos femos cruces de por qué enristioron. Estió un momento como hese puesto estar qualsiquier atro. Bi heba tensión, sí, pero no mas que en tot lo maitin. Lo caso ye que enristioron. Me levé un porrazo en lo costau que no levaba la gaita y prebé de fuyir. Lo policia me heba agarrapizau asinas a l’Alodieta - pai feba momos prenendo la gaita ta explicar-me la historia - Yo, limpio estirar. Creyeba que se trencaría… A la fin un empentón d’atro policia le fació soltar la gaita y corrié atarrantau, buscando a tu mai y a la resta de compas entre tot lo caos que se heba formau. Sintié lo rudio d’as pelotas de gomas que nos chitoron. Dimpués en lo congreso, lo president dició que no, pero sí que nos ne lanzoron, ixo te lo digo yo - puyaba la man como quan en las cintas americanas churan sobre la Biblia. - Tantó adubié a correr que en prebar d’aturar, quan ya sentiba que s’heba pasau lo periglo, m’estozolé. Cayé por tierra, a redolons, prebando de que la gaita no se fese cosa. Yo me facié quatre feridetas, pero ista - sinyaló a Alodieta - mira-te. ¿Viyes iste raspau d’aqui? D’ixe diya. Y iste zurciu d’aqui - se viyeba como bi heba un recusiu en la faldeta - Pues tamién.
Asinas encara s’estió firme rato mas. Recontando-me una y atra aventura con Alodieta. Y con mai, prou que sí, la suya companyera de chestas y batallas. Y con la suya colla d’amigos. Las suyas parolas feban que qualsiquier nueit de gamberradas pareixese una epopeya epica, protagonizada por herois que consiguen lo tresoro amagau por los malvaus bruixos de tierras de fantasía. D’ixas historias, beluna ya las heba viviu con yo, y le correchiba:
-         ¡No pas, papa, no pas! ¡Ixe diya yo encara no me sabeba aquella canta!
Tot y que yo teneba prou talento pa la mosica, no me’n he d’avergonyar, a pai siempre le ha feito goyo d’exacherar-lo a-saber-lo.
Me tornó a contar la vegada que quasi la cacegó, por la zorrera que levaba. U quan le furtoron l’auto con la gaita adintro, y lo troboron, estampau contra una farola tres lugars mas t’abaixo d’a val, pero con la gaita intacta. La suya participación en lo festival escocés d’a gaita, yera una d’as suyas favoritas. Se i chuntoron trenta gaiters nomas d’Aragón, y mas de dos mil de tot lo mundo. Festivals, conciertos, ensayos, … ¡lo que heba viviu aquella gaita!.
-         Yes muito millor mosica que no yo – me dició mas serio quan creyió que m’heba cansau d’as suyas historias – Lo que yes fendo con las tuyas amigas ye bien important. Ixas primers cancions suenan de bitibomba. Si bell diya quiers introducir-ie la gaita, m’encantaría que fuese ista la que sonase en la vuestra mosica. – Prou que heba pensau de calar-ie la gaita en bella canción, pero nian heba pensau en Alodieta – Será una honor pa yo y pa Alodieta de pasar t’a siguient cheneración.
No me podeba negar. Le hese feito micazas. Antimás, por muito que conscientement refusase la gaita pa que la conservase ell, en verdat teneba a saber que ganas de empecipiar a practicar en serio con ella. Ya tocaba a saber que instrumentos en ixos anyos, pero denguno teneba ni un sacre d’a historia que heba viviu ella.
-         Gracias pai – l’acarracé firme, con un d’ixos abrazos que no son por compromís, sino por ixa relación especial entre dos personas que se respetan y admiran mutuament. – Faré que suene como cal. Pero, a truca, te voi a meter una condición: m’has de fer bella clase…
-         ¿Qué clase quiers que te faiga si en sabes muito mas…?
-         ¡Calla! – le interrumpié – M’has de fer bella clase. Y m’has de prometer que, si la medicación va funcionando, bell diya te’n puyas t’o scenario con la nuestra colla y fas de gaiter.
-         ¡Ui! ¡No te’n faigas por ixo! Ya sabes que me falta tiempo pa puyar ta un scenario!
Nos ridiemos. Empecipió a comentar-me bella qüestion técnica, y d’o mantenimiento, pa poder conservar-la en condicions. Bella semana dimpués faciemos la primer clase. Lo que ha viviu ista gaita…
Y agora ye tuya, filla mia.

sábado, 19 de mayo de 2018

Los chuegos d'a caca

Heraldo de Aragón. Mayo 2025

Los “chuegos d’a caca” empecipiarán lo venient mes de chunyo


Lo Congreso apreba, por mayoría absoluta, la primer convocatoria d’ista asperada competición.

Con una mayoría ampla, de 240 diputaus, lo Congreso ha aprebau hue la “Lei de Competicions Estiveras y Esprito Patriotico” que entrará en vigor iste mesmo mes y convocará pa iste chunyo los popularment conoixius como “Chuegos d’a caca”. Lo ha feito posible los votos a favor de Ciudadanos, PP, Coalición Canaria y PNV. Iste zaguer partiu se sumó a l’alcuerdo a zaguer hora, a truca de un nuevo pacto economico.

Seguntes ista nueva lei, lo sorteyo pa participar en la Competición Patriotica incluyirá a toda la población espanyola, fueras de bells supuestos, como haber participau en churas de bandera civils antes de 2020, fer parte d’os cuerpos y fuerzas de seguridat de l’estau u haber feito beluna d’as donacions patrioticas replegadas en la “Lei 5/2022 - Vodafone de Sostenimiento de la leyaltat a la integridat territorial y corona espanyola”. Por cadauna d’as rechions espanyolas, dos d’os suyos ciudadanos -un hombre y una muller - habrán de competir en istos chuegos, an que habrán de superar prebas fisicas y de conoiximientos d’a realidat nacional d’o nuestro país. Los dos ganadors recibirán una casa de 80 metros quadraus en lo centro de Madrit y un credito pa estudiar un master que podrán pagar con uns intreses muit intresants.

En un d’os aspectos mas polemicos d’a lei, a los perdedors se les defecará en la boca. Los defecadors, serán trigaus entre los millors espanyols en diferents arias, por lo que qui no gane podrá recibir excrementos de bispes, chenerals, tertulianos, youtubers, escritors,... Lo mesmo president Rivera será entre los defecadors, que s’adchudicarán a cada “defecau” por sorteyo, pa que no bi haiga sospeitas de favoritismos.

Iste zaguer punto devantó un furo debat entre una oposición, que no acaba d’entender lo nuevo rumbo que la nuestra nación -la de totz- nos diemos en lo zaguer mandato electoral. Lo PSOE acabó abstenindo-se, en no estar d’alcuerdo con “bells aspectos d’a lei” ya que entendeba que “no se guarancian los dreitos d’os vechetarians” y ye una lei “sin una financiación adequada y con una radida participación d’a ciudadadanía en la suya elaboración”. La suya portavoz, Susana Díaz, ha asegurau que si lo PSOE ganase las nuevas eleccions, cambiará la lei pa guarenciar “una opción vegana de defecación y la posibilidat de que, qui haiga participau en ONGs, no entre en lo sorteyo”.

Dende la bancada d’o partiu comunista-separatista Podemos-Compleganza Espanyola Dende Abaixo, las criticas han estau mas furas. Los suyos vinticinco diputaus han votau en contra. “Nos oposamos a istos chuegos que refirman un modelo patriotico que no en somos d’alcuerdo. No bi ha habiu participación en la elaboración d’as prebas, no se reconoixe la rica pluralidat cultural espanyola, y no se respeta la recomendación europea pa la biodinamización d’a birolla”. Lo partiu antisistema ha anunciau proximas movilizacions tanto en los retes como en las carreras. Ya bi ha varios change.org demandando la derogación d’a lei, y una campanya de firmas en las plazas de qualques ciudatz espanyolas.
D’atra man, los sindicatos mas representativos han anunciau que “se pensarán muito una convocatoria de atures parcials en turnos de baixa producción alcordaus con cadaun d’os centros de treballo” pa protestar por la lei. Isto podría estar inconstitucional dimpués de l’aprebación d’a “Lei Coca - Cola d'empente d’a producción y l’emprendimiento” lo pasau chinero, por lo que ya se ye negociando con la CEOE unatra forma de protesta que no faiga aturar lo progreso d’o pais.

A pesar d’istas pocas protestas, la lei ha estau muit bien recibida por las figuras de prestichio d’a nuestra nación. Vargas Llosa d’ha ufierto de camín a adaptar la suya dieta pa que la mierda le sepa millor a lo perdedor que le toque. Lo nombre d’o recient premio Nobel de Literatura ye un d’os mas firmes candidatos a defecador. En Aragón, lo president Lamban ha recibiu con goyo la noticia: “Espanya se mereixe una población que conoixca bien Espanya y que se sienta espanyola, contrimostrando la suya espanyolidat por cada diya”. Lo lider d’a oposición, Nacho Escartín lo tornó a acusar de tranfuguismo por lo suyo fichache por Ciudadanos un mes antes d’as zaguers eleccions, y de “no querer un Aragón autonomo, con respeto a la ruralidat y una alimentación sana”. Lambán tornó a recordar la conveniencia de que los Monegros acullisen beluna d’as prebas d’os chuegos. “Ye un scenario referent d’a espanyolidat, amplo, moderno y pleno de potencialidatz”, aseguró.

Ye asegurada, ixo sí, la grabación d’una d’as galas d’os chuegos en la Expo de Zaragoza. Asinas lo anunció lo president de l’Academia Espanyola d’a Televisión Javier Cárdenas, qui será tamién presentador d’o programa, que se fará a traviés de Televisión Espanyola, Trece TV y la plataforma de contenius dichitals Forocoches. Los coalcaldes d’a ciudat, Jorge Azcón y Roberto Fernández, han quiesto agradeixer a lo gubierno central que “s’alcordase d’una ciudat siempre leyal con Espanya como ye Zaragoza”. Se prevei que la gala creye una cinquentena de puestos de treballo directos y indirectos pa los servicios de caterin, transporte y prostitución.

Heraldo d'Aragón publicará, a partir d'iste domingo, una serie d'especials, an que se irán detallando los perfils d'os candidatos d'os chuegos d'a caca, detalles sobre las diferents prebas, y toda mena d'información relevant. La publicación d'ista separata ye estada posible gracias a la colaboración d'Ibercaja, lo Gubierno rechional y lo Concello de Zaragoza.

miércoles, 16 de mayo de 2018

Millons de botellas vuedas

Lo curso de catalán me ha traito en istos zaguers anyos muitas alegrías en forma de libros que me he leyiu istos anyos. Dimpués d'haber-me leyiu Licantropia, de Carles Terès, Totes les cançons parlen de tu, de Xavi Sarrià y Com un record d'infantesa, de Feliu Ventura, que con totz tres va pasar un sobrebuen rato, no teneba guaire claro qué libro leyer iste curso. En una visita a una librería de Barcelona en lo zaguer viache que i facié, trigué por casualidat -y por la garantía que me daba la editorial Sembrallibres - lo libro Milions d'ampolles buides, de Manuel de Pedrolo. Una vegada mas m'he levau una sorpresa en descubrir un buen libro d'un autor que desconoixeba y que cuento que me dará bella alegría mas.

Lo libro, ambientau en la Barcelona de 1968, recuenta la historia d'un militant d'un chiquet partiu d'izquierdas que proposa de fer un atraco pa conseguir diners con que mercar armas pa fer la revolución. En las suyas pachinas nos trobamos con la vida cutiana d'a militancia politica clandestina d'aquellas envueltas. Leyeba las reunions d'o partiu con una riseta en la cara, en viyer-me reflexau en ixas discusions que hue continan estando las mesmas. Meyo sieglo dimpués, cambean las tecnolochías, las trazas y poco mas, pero las dinamicas siguen estando prou pareixidas. 

En toda la historia, ye bien present lo debat quanto a la chustificación de l'uso d'a violencia. No tanto a un libel filosofico, que tamién, sino practico. D'as conseqüencias personals d'o suyo emplego, d'as razons que han de levar a una persona a fer-lo. D'atra man, entre que nos recuenta como se va aprestando l'atraco, lo protagonista va calando lo que clama "Notes del viure civil", an que charra de l'ambient politico d'ixe anyo. Vagas, manifestacions, revueltas estudiantils, ... en la zaguer decada (tecnicament) d'o franquismo.

L'autor, Manuel de Pedrolo, ye un d'os escritors mas prolificos en catalán. Con decenas de novelas publicadas, dimpués de problemas arrienda con la censura, la suya obra mas conoixida ye "Mecanoscrit del segon origen", que se levó t'a TV, en TV3 y t'o cine, en una cinta dirichida por Bigas Luna y Carles Porta. Lo suyo compromís politico con la izquierda independentista duró toda la suya vida, trayendo-le no pocos problemas y un retraso en la publicación d'as suyas obras de buena cosa d'anyos. En iste 2018 se fa un sieglo d'o suyo naiximiento, con lo que ye de buen trobar a saber que homenaches a iste disciplinau escritor que prebaba de escribir totz los diyas, mesmo fixando-se un horario pa fer-lo.

Unatra vegada, gracias a la editorial Sembrallibres, he conoixiu una gran obra d'un gran autor. Cal agradeixer que se faiga un treballo tant bueno, tanto en la triga d'obras a publicar, como en la calidat d'a edición. Cada luenga ubre tot un mundo literario nuevo, y en lo caso d'o catalán, me ye dando beluns d'os mios millors momentos literarios d'os zaguers anyos.

viernes, 11 de mayo de 2018

Sagas X-Men: Inferno

Una aburrida familia aspera l'ascensor en un edificio de Nueva York. Por la radio charran d'un insufrible escaldabullo que ye fendo ixe verano. La familia i dentra y de l'ascensor, que tien cara y uellos, nomas en sale chilos y un basón de sangre que a escape limpia un treballador sin nian parar-ne cuenta. Asinas empecipia lo numero 239 de Uncanny X-Men, lo primer d'una saga que tenió a saber que exito, que s'estendilló por tot l'universo Marvel y que metió las bases d'os crossovers mutants d'as siguients decadas. 

Inferno ye un crossover (un cruce entre coleccions) de Uncanny X-Men (numeros 239 - 243), X-Factor (#35-39) , New Mutants (#71-73)y la creyada de propio pa isto X-Terminators (#1-4) de finals de 1988 y primers de 1989. En l'Estau espanyol s'editoron totz como una colección en un orden alto u baixo cronolochico, tot y que ixo yera de mal fer por la propia estructura d'a saga. Las guionistas son Louise Simonson y Chris Claremont y entre los dibuixants tenemos a Marc Silvestri, John Bogdanove, Terry Shoemaker, Walter Simonson y Brett Blevins.

La saga recuenta una invasión demoniaca a la Tierra Marvel, con diferents protagonistas. Madelyne Pryor ye un d'os centros de gravedat d'a saga arredol d'a qual chiran qualques linias argumentals. D'una man, lo demonio N'astirh, que rivaliza con Magik y S'ym por lo control d'o Limbo, pacta con ella pa que le aduye a conquerir Nueva York a truca de conseguir-le reunir-se con lo fillo que tenió con Scott Summers (Cyclops). D'atra, Mr Siniestro, revela a la fin lo misterioso orichen de Madelyne, que resulta no estar que un clon de Jean Grey feito por ell pa fer-la servir pa las suyas finalidatz. Entre atras, dar-le lo fillo que quereba con Cyclops y que suposa d'un material chenetico excelent. No cal ixublidar que iste crio esdevendrá en lo futuro en lo superheroi Cable. 

L'atro personache con prou protagonismo ye Magik. Illyana Rasputin contina con la suya baralla por lo control d'o Limbo y por lo suyo autocontrol. Porque la invasión demoniaca que se recuenta en istos 20 comics, afecta a totz, cambiando-les la suya personalidat y mesmo fisicament. Illyana va transformando-se en un diaple, con la suya coda, cuernos y unyetas. Los X-Men no eslampan a istos cambios y se van tornando mas agresivos. En lo caso de Longshot y Dazzler, mesmo se tornan bambosos, adedicando-se en lo preto d'una baralla a meter-se pinchos entre que la resta luitan.

Como no podría estar d'atra manera, lo culebron romantico tamién ye present en la saga. Podríanos decir, de feito, que tot Inferno ye provocau por la perdua d'o fillo de Madelyne y los celos que siente de Jean Grey que ye tornada t'a vida y que se chunta con Cyclops qui, de vez, creye muerta a Madelyne. Ta embolicar-lo tot una mica mas, la Reina Follet (como le claman a Ms. Pryor los demonios, triga a lo chirman de Cyclops, Havok, como lo suyo Rei, conseguindo d'ell una sumisión y complicidat completa. Con menos intensidat, pero tamién present ye lo triangulo amoroso entre Dazzler, Rogue y Longshot, que tamién da bell momento divertiu.

Los X-Men d'istas envueltas yeran en una d'as suyas millors etapas. Dimpués d'a suya muerte debant de tot lo mundo s'heban instalau en Australia y yeran invisibles, por un fetizo, a totz los meyos electronicos como las camaras de TV. Un equipo formau por Wolverine, Storm, Rogue, Psylocke, Dazzler, Longshot, Havok, Colossus y Madelyne Pryor en una d'as primers formacions con mas mullers que hombres. Como en quasi toda la obra de Claremont, lo concepto d'equipo que, treballando de conchunta, funciona millor que la suma d'os suyos components, ye lo que fa a istos X-Men capables de redotar a los demonios que preban de conquerir la Tierra.

Como novedat, i son los X-Terminators, con Boom-Boom, Rusty Collins, Rictor, Leech, Arti, Skids y Wiz Kid. Una colla de crios que iba chuntando X-Factor en los numeros anteriors y que eslampan t'aduyar-se mutuament viyendo la invasión demoniaca. Wiz Kid ye un d'os personaches clau en toda la saga, a pesar de que dimpués d'istos numeros tasament tornó a salir bella vez en bell comic. La resta tenioron diferents suertes. Boom Boom y Rictor acabarían fendo parte d'os Nuevos Mutants y dimpués de X-Force. Rusty, que yera un personache que s'heba entregau a la chusticia y que yo de criet siempre contimparaba con los insumisos, chunto con Skids, la suya parella, acabarían en lo Frent de Liberación Mutant. Arti y Leech apareixerían de cabo ta quan con papels ultrasecundarios en bella serie mutant, y sobre tot en Generation X.  En qualsiquier caso, istos quatro numeros son bien frescos, sobre tot si los leyes, como ye lo mio caso, con la edat que se suposa que tienen, en lo preto de l'adolescencia.

Antimás de totz los personaches, que ya son tot un atractivo pa acercar-se a ista saga, l'ambientación ye atro d'os puntos fuertes. La invasión demoniaca no nomas significa que los diaples entren a gorgollons por lo portal dimensional que s'ubre en New York, sino que toda la ciudat se "demoniza". L'ascensor d'a primer pachina torna a minchar-se humanos bell numero dimpués, uns prismaticos se quedan con los uellos d'un turista alparcero, lo Empire State creixe, y asinas asinas.

En ista saga, Claremont y Simonson aclaran tot l'orichen de Madelyne y fan trobar-se a toda una ripa de personaches que, encara que relacionaus entre sí, iban cadaun a la suya. Dimpués d'Inferno, los mutants d'as diferents coleccions irán tenendo mas relacions entre ells pa acabar, como totz sabemos mesclando equipos y fendo las macrosagas que vendrían dimpués. 

Quan torné a leyer-la lo feba con lo miedo cutiano de retrobar-te con qualcosa que t'aimas tanto y que tantos buenos momentos te dio de criet. Pero la verdat ye que contina estando una obra entretenida, con a saber que suco. Las quatre linias argumentals complegan perfectament en una final climatica de tot y que, como buen Claremont, deixa ubierto.

martes, 8 de mayo de 2018

Xavi Sarrià, lo Viña, una baqueta y una partida de morra

De cada Viñarock te levas bell recuerdo, bella anecdota, bella historieta que no deixas de recontar terne que terne, aburrindo a ixe publico farto d'as tuyas "batalletas". La que teniemos en lo concierto de Xavi Sarrià ye, como poco, curiosa, y una buena enchaquia pa charrar d'o millor concierto d'ista edición.

L'airera bufaba con rasmia. Las viñarockeras nos amontinabanos en la cleta d'entrada a lo recinto. Puntuals. Ya i yeranos un rato antes d'as 16:00, que yera la hora oficial d'ubridura. Por cada minuto que se retardaban, me iba metendo mas niervudo. Los horarios d'o festival son a saber que estrictos y me feba miedo de fer tarde en un concierto que ya me pareixeba masiau curto pa un repertorio potencial de mas de dos decadas. A la fin, a las 16:15 quasi deixoron lo camin ubierto y, atarrantau, corrié ent'os accesos t'o recinto. Pa escusar-nos tiempo, Arale iría dreita t'a barra a pillar bell par de pozals de biera aproveitando la hora feliz, entre que yo pillaba puesto en la primer ringlera.

Quan i entremos, encara yeran prebando soniu con "Amb l'esperança entre les dents". Plegué en la cleta. Me coloqué en lo bell meyo d'o scenario. Lo viento secutiba los altavoces que penchaban d'un tarabidau de fierros, bandiando como campanas, sobre la uellada preocupada de mosicas y tecnicas. Quité la quatribarrada d'a mochila y me l'anyudé en lo maniquiello pa tener-la bien a man. A lo canto mio, una parella con una bandiera de Cantabria. La oficiosa. La buena. Por dezaga, iba apareixendo chent a embute, con mas mielsa que no yo, que no en podeba mas d'emoción.

Obrint Pas ye la colla d'a mia vida, y Xavi Sarrià me pareixe un grandismo escritor. Lo suyo primer disco ha cumpliu con tot lo que en asperaba, asinas que teneba a-saber-las ganas de poder sentir la suya mosica como cal y como se mereixe: en directo. Pa forro de bota, l'orache menazaba con plevidas chusto a ixa hora y no quereba quedar-me sin sentir ni un segundo d'o setlist previsto.

M'abracé a Arale. Companyera d'emocions y conciertos, de vida y vivencias. Brindemos con los pozals de plastico por estar astí, con todas las dificultatz que hebanos teniu. Xavi apareixió por un costau. Con ixe cenyo timidet y d'emoción que siempre fa en entrar en scena. Abaixo ovacions, punyos alto, sinyals revoliando. Alto, las primers cancions d'o nuevo disco. Nuevas caras que conoixer. Xavi refirmó la ripa de versos a l'arreu de "Amb l'esperança entre les dents" con las voces de dos companyers de banda. En pasar dos cancions, tot lo publico ya yeranos de raso embrecaus, acompanyando de chilos, cenyos y bailes las letras d'os himnos que sonaban.

Entre canción y canción, parolas emocionants, y de cabo ta quan emocionadas de Xavi, que como buen poeta, ye tamién un movilizador de sentimientos y ideyas. "Nunca no renunciaremos a las viellas asperanzas, ni a la pasión de vivir sentindo-nos ingubernables". Parolas que se i puet identificar qualsiquier persona que milite en los movimientos socials y politicos d'izquierdas. En una d'ixas pausas, dende lo publico, empecipiemos a chilar "Sempre anirem obrint pas", y pareixe que a lo cantaire le toquemos bell poquet la fibra.

En bell momento devantemos lo sinyal. L'aragonesa con la estrela en lo bell meyo, con ixa horrible pero identificativa linia negra que fa lo contorno. A lo canto nuestro, una moza dició estar uescana y nos presentemos. Dende dezaga, poco tiempo dimpués, apareixió un mozo choven y grandaz, que nos aduyó a puyar lo sinyal, y que s'encertó que yera de Alquezra. Tot quedaba en casa. La mesacha pilló lo sinyal. Lo mesache se la puyó a corderetas. Y la quatribarrada puyó bell metro mas pa saludar a publico y mosicas, y avisar de que astí baixo bi heba aragonesas. Que no todas somos Lambán u Rudi.

Las letras de Xaxi animan a seguir luitando pase lo que pase. A no reblar. "Y sobre las cenisas de tantas redotas, continaremos devantando-nos una, dos, mil vegadas. La nuestra victoria serán las risetas que han de venir". Charran d'os nuestros referents politicos y culturals. Charran d'a chirmandat entre los pueblos, d'o respeto a la pluralidat cultural y lingüistica. Dedicó cancions a Aragón y a atros d'os pueblos que i yeranos presents, prou que sí. A los chovens d'Altsasu, a las victimas d'a violencia masclista, a los presos politicos, a los raperos engarcholaus por cantar. A la nuestra chent.

A metat concierto, plegó la plevida. Espurniando en primeras, y metendo-se fura por cada momento. Las pipas habioron de forrar, a tot meter, los trastes con plasticos. Las mosicas fuyindo como podeban. La ixufrina que feba fació que se chipiase lo scenario bien chipiau. Bien se vale que duró poco, y la colla adubió a tornar. Tornó la mosica, tornó l'alegria, y bell temazo d'o concierto. Con las d'o nuevo disco, se barrachó beluna d'Obrint Pas y mesmo una versión d'o Sarri sarri. Pero como he dito antes, los tiempos d'o Viña son estrictos a-saber-lo y encara que facioron la prebatina y dende abaixo chilabanos aquello de "Una cançoneta y mo n'anem", no les debioron de deixar.

Dende lo scenario empecipió lo reparto de recuerdos. Lo batería aventó una baqueta. Yo yera bien a la tisva, y.... ¡chusto en la mia man!. La pillé a l'aire, bien agazapiada, quan un segundo dimpués unatra man l'agazapió tamién. Yera la d'o mozo d'Alquezra que acababanos de conoixer. Nos miremos con ixa uellada de ¿y agora qué? "¿Qué femos?" nos preguntemos. Los dos decibanos haber-la pillau antes. Soi seguro de que yo la pillé antes, pero hebanos feito pacha y me pareixeba absurdo tricolotiar-nos por ixo. Si hese estau de qualsiquier atro grupo, le'n hese dau sin dubdar, pero yera de Xavi Sarrià. No yera disposau a renunciar-ie de qualsiquier manera. Arredol de nusatras s'heba feito un rolde de chent curiosa por cómo solucionarianos ixe contornillo. "Chugatz-tos-lo a los chinos!" se sintió. "Piedra, papel, estixeras" dició unatro. Son chuegos d'azar. Odio los chuegos d'azar y me pareixen inchustos. Caleba solucionar-lo de bella atra manera, chusta pa los dos.

"¿Sabes chugar a morra" - le pregunté-. "Prou que sí". No calió mas. A tres chuegos. Cada vegada nos rodiaba mas chent. Dimpués, quan lo conté, un amigo m'escribió "No sé qué me sorprende mas, que plegasetz en una solución tant civilizada, u que trobases garra atra persona que sabese chugar a morra en lo Viña". Afortunadament gané. No soi guaire bueno, asinas que me la heba chugau de tot, ya que lo mio rival podeba haber estau un grandismo chugador de morra. La baqueta yera mia, y totz tres, Arale, lo mozo d'Alquezra y yo, marchemos a fer un hordio pa celebrar-lo.

Recuerdos, d'os conciertos de Obrint Pas y Xavi Sarrià, me'n he levau siempre buen trapacil. D'iste, antimás, me'n levo uno fisico, y con historieta. La d'un zaragozano y un semontanés que se chugoron a morra la baqueta d'un mosico valenciano en un festival manchego.

domingo, 6 de mayo de 2018

Abril en aragonés 2018 y lei de luengas. Tierra de barrenaus 4x09

Grabación d'o debat.
(Foto: Cherardo Callejón)
Encara que iste anyo Nogara no fació servir lo lema de Abril en aragonés, la verdat ye que quedó un mes rebutient d'actividatz arredol d'a nuestra luenga. L'aragonés contina vivo, y la chent que amamos y desfendemos ista luenga, no reblamos nunca. Lo programa preba de resumir bell poquet de tot lo viviu en istos diyas.



Empecipio, prou que sí, con las XXV Chornadas d'as luengas d'Aragón, organizadas por Nogara y an que teniemos actividatz bien diferents. Amás d'as charradas (1), una cursa, un recital de poesía, un taste de quesos, una exposición, y un concierto, implioron lo programa d'estianyo. Entrevisté a Dabi Lahiguera, autor de "A fabla de Moncayo", qui nos charró d'o libro suyo con toda la pasión que tenió tamién en la charrada.

Quasi sin tiempo pa alentar, plegó lo Diya d'a Cultura Aragonesa, que se celebró en la Plaza d'o Pilar de Zaragoza. Un diya pleno de bailes, tallers, mosica, .... y an que participé fendo un programa con publico. En ixe programa debatié, con Rubén Ramos y Juan Pablo Martínez, sobre l'aragonés en los diferents estatutos d'autonomía que hemos sufriu, y sobre las tres leis de luengas que s'han feito en Aragón: l'anteprochecto de 2001, que nunca no plegó a estar vichent, y las leis de 2009 y 2013, ista zaguera actualment en vigor. Ixe mesmo maitin, Silvia Cebolla fació un taller de cocina en aragonés, que recuenta en lo programa, dando-me antimás la primicia d'o diya que se presentará lo suyo libro. Si quiers saber-lo, ya sabes qué has de fer.

A l'atro diya se celebraba Sant Chorche, Diya oficial d'Aragón. Un anyo mas lo Paseyo Independencia y la Plaza Aragón acullioron en lo Diya d'o Libro, las paradetas de editorials y librerías presentando-ie las suyas novedatz. Beluna d'ellas en aragonés, prou que sí. Silvia y Dabi charran tamién d'a suya experiencia en la de Transiberiano. Entrevisto tamién a Chuse Raul Usón, editor de Xordica, qui presienta las zaguers novedatz en aragonés d'a suya editorial: Chen de Chistén y Tío Chuaquín.

Asinas que, pocas pero bien movidas, las activistas de l'aragonés hemos teniu un mes con tot fueras d'aburrimiento. Que tot sirva pa continar dando-le aliento a ista luenga!

(1) Sobre dos d'as charradas escribié post: L'asturiano y la finestra d'oportunidat y L'aragonés en Moncayo, y por totz los cabos.



miércoles, 25 de abril de 2018

Valencia, Aragón y los nuestros diyas nacionals

Quan escribo isto se fa 311 anyos d’a redota austracista en la Batalla d’Almansa. Con aquella redota empecipiemos a perder la nuestra independencia. La guerra continaría bell tiempo mas, pero con poco ya a fer. Lo 25 d’abril, aniversario d’ixa redota, las valencianas celebran oficiosament lo suyo diya, recordando ixa calendata. Manimenos, la suya fiesta oficial, lo diya de Valencia, ye lo 9 d’octubre. Valencianas y aragonesas compartimos muita historia, muita identidat y tamién lo mal de tener un diya nacional oficial con significau muit diferent de l’oficioso.

Acabamos en Aragón de celebrar Sant Chorche, lo nuestro "diya nacional oficial". Por tot lo alto. Con un acto en las nuestras Cortes d’alto standing, an que se chunta toda la chent "important" d’o país. En ista ocasión pa ascuitar como lo nuestro vergonyoso president Lambán presumiba de patriotismo espanyol una vegada mas. Con lo socio “aragonesista” mirando-se t’o ciel y chiflando como si la cosa no ise con ells. En las carreras aragonesas, las ciudadanas con lo periodico baixo lo brazo, leyendo las enqüestas que nos dicen lo que cal votar. Ixe diya recordamos las glorias pasadas, ixa aluenyada Edat Media tant convenient pa l’espanyolismo. Tant comoda, en no tener conseqüencias tant claras en lo nuestro present. Tant romantica y heroica, con ixos almugavars portiando las nuestras quatre barras por toda la Mediterrania. Mercamos la zaguer novedat de Corral Lafuente, "que fa libros que de vez que aprendes, pasas un buen rato". Por la tele nomas charran de Sant Jordi y lo diya d’o libro, y lo baturrismo s’encarranya porque Espanya, una vegada mas, no nos fa caso.

Celebramos en Sant Chorche, que a un rei aragonés se le apareixió un martir cristiano que vivió entre los sieglos III y IV. Ista pantasma diz que aduyó a l’exercito de Pedro I a conquerir Uesca a los musulmans. La Reconquista, una vegada mas, como atro d’os mitos espanyols. Lo cristianismo enradigau en la identidat aragonesa.


En lo País Valenciano, lo diya oficial ye lo 9 d’octubre, diya d’a entrada de Chaime I en la ciudat de Valencia. Unatra vegada lo mito d’a Reconquista. En ista ocasión, a lo menos, celebrando bella cosa que sí que pasó. ¿Urbanocentrista? Pues tamién.


L’atro país chirman, lo tercer territorio con que nos chuguemos lo futuro en lo Compromís de Casp, tien lo suyo diya en una calendata bien diferent. L’once de setiembre remeran una redota militar y las suyas conseqüencias. En 1714, fa mas de tres sieglos, las tropas borbonicas entraban en Barcelona dimpués de meses de sitio, y acababan con los zaguers repuis d’a resistencia austracista. Siet anyos antes aragonesas y valencianas hebanos empecipiau a sufrir los Decretos de Conquista (conoixius tamién como Decretos de Nueva Planta). Las catalanas no tardarían guaire a sufrir-los tamién.

Ixa guerra estió probablement la mas important pa los tres territorios. Dimpués d’a Guerra de Sucesión, Aragón, Valencia y Catalunya perdioron la suya independencia y leis “por dreito de conquista”. Iste feito se remera muit bien en Catalunya, con libros, exposicions, etc. por tot, y con lo suyo diya nacional. Una sobrebuena manera de no olvidar la historia ye fer-ne alcordanza por cada anyo.

Valencia y Aragón, tamién perdiemos aquella guerra. Tamién nos quedemos sin fueros. Manimenos los nuestros diyas nacionals no son festivos. Garra institución no celebra cosa ixe diya. Lo 29 de chunyo, diya que se promulgó lo Decreto de Conquista d’Aragón, nomás da nombre a una fundación de CHA, y no se le dedica ni una ringlera en la prensa local. En ixas calendatas las aragonesas somos contando los diyas que falta pa marchar ta Salou.

Las valencianas sí que trigoron lo 25 d’abril, diya d’a Batalla d’Almasa, pa recordar la suya identidat historica y reivindicar-la. Millars de valencianas salen t’a carrera ixe diya en manifestacions que implen las carreras de quatribarradas.

L’equivalent nuestro, sería lo d’atra redota. La de Chuan V de Lanuza, Chusticia d’Aragón, contra l’exercito de Felipe II de Castiella, que tenió como conseqüencia lo suyo asesinato y l’empecipiadura d’a nuestra perdua d’independencia, que remataría en 1707. Lo 20 d’aviento, las soberanistas aragonesas salimos t’as carreras (u no), femos charradas, nos enzorriamos a viyer si conseguimos olvidar tanta redota, … y aguantamos la relativización contina d’a importancia d’o que pasó en aquella rebelión aragonesa.

Los diyas nacionals han de servir pa remerar la nuestra historia, analisar-la, viyer qué conseqüencias tien en lo present, reivindicar-la, y reivindicar-nos como pueblo con una personalidat propia que sobrevive (en parte, lo menos) a pesar de Lambans, Rudis y los suyos complices.

En la mia opinión Sant Chorche no vale pa ixo. Ye un diya esbafau, vuedo de tot, folklorico estando chenerosas. ¿Qué remeramos ixe diya? Como muito, las Cortes de 1461 que decidioron de trigar-lo pa patrón d’Aragón, con garra conseqüencia sobre la población u lo futuro nuestro. Celebrar lo 29 de chunyo, u lo 20 d’aviento ye remerar la nuestra historia. ¿Una historia de redotas? Pues sí. Porque somos un país redotau. Y continaremos estando-ne si desconoixemos la nuestra historia y si seguimos mercando ixe relato que leva a Aragón dende “l’almugavarismo” dica la transición en un peten, sin que pasase cosa en tot ixe tiempo.


Sería tamién bueno, que antimás de recordar la historia d'Aragón, lo fesenos de conchunta con qui nos acompanyó en ixa redota. Conoixendo mas d'a historia de Catalunya y Valencia, nos conoixeremos millor. Trobaremos, paisanos a los tres cantos d'a muga, totz ixos vinclos historicos y culturals que nos unen y achirmanan, y que tanto intrés tienen dende bell sector en trencar terne que terne. 

viernes, 20 de abril de 2018

En leyendo... "Bolivia, desde las voces del pueblo"

"Bolivia, desde las voces del pueblo", de Diego Marín Roig, ye un libro d'entrevistas con diferents personas en Bolivia, an que alportan la suya envista sobre tot lo proceso politico que ha viviu y contina vivindo ixe país. Quan nos miramos enta Latinoamerica y los suyos procesos revolucionarios, a soben surte la pregunta de si ye aplicable parcialment u total a las nuestras realidatz. Katu Arkonada, vasco de naiximiento, boliviano d'adopción, s'explica asinas de bien, en ixe libro, reflexionando sobre la plurinacionalidat d'os estaus, a los dos costaus de l'Atlantico. La entrevista ye de 2015, si fa u no fa, quan lo proceso independentista de Catalunya no yera tant abanzau.

DMR: ¿Creyes que ista concepción d'Estau Plurinacional puet aplicar-se en Europa, y en concreto, en l'Estau espanyol?

KA: Si me preguntas por l'Estau espanyol, te diré que no. No bi ha garra mena de posibilidat de creyar un Estau Plurinacional. Ixe momento historico ya pasó, si ye que existió nunca, pero en qualsiquier caso, dimpués d'os momentos historicos d'imposición que se han viviu sobre las diferents nacions de l'Estau yo, como vasco independentista, la sola cosa que quiero ye independizar-me d'Espanya. No tiengo garra mena d'intención de cosntruyir un prochecto compartiu. Creigo que aquí en Bolivia l'Estau Plurinacional precisament ye la condensación d'o reconoiximiento a las 36 nacions y luengas, pero que sí han construiyiu un prochecto de país. Aqui ye la nación quechua, la nación aimara, la nación guaraní, pero de vez totz se sienten bolivianos. Bi ha una construcción d'una nación boliviana. Yo, que no me siento espanyol, y que la mia identidat ye una posición politica, nunca no voi a poder contruyir un prochecto espanyol. Para cuenta, yo, que me considero militant internacionalista d'izquierdas, considero, como Argala, que los vascos, lo pueblo mas antigo d'Europa, somos nomas vascos y que lo que nos une a los espanyols no ye perteneixer a una mesma nación, sino a una mesma clase. Prou que yo quiero construyir bella mena de prochecto común con los treballadors espanyols, griegos, italianos, alemans, etc. Pero dende la mia propia forma d'Estau, porque practicament la sola manera que tiengo de construyir una sociedat con un horizont socialista ye tener un Estau vasco propio, con soberanía politica y economica. Ya viyemos que hue ni sisquiera la soberanía d'un Estau ye absoluta, pero ye condición sine quan non, ta poder transformar la sociedat. No considero que la qüestión de l'Estau Plurinacional, como estructura, siga posible de trasladar-la ta Europa, u en iste caso ta l'Estau espanyol, no creigo que siga posible, lo que sí ye que tenemos licions arrienda que aprender de lo que ye pasando aquí politicament, primer porque se ye vivindo una etapa d'espulle neoliberal, acumulación por desposesión, que aqui ya la han vivida, alavez, sí tenemos la posibilidat d'aprender, primero como s'han concarau con lo neoliberalismo y, segundo, midas a embute que se son fendo baixo un horizont alternativo a ixa Europa que s'ha feito. Por suerte, aqui nunca no se construyó una socialdemocracia como se construyó en Europa, que vendió Europa. Aqui si tiens la posibilidat de construyir un horizont de zurdas, an que bi ha a saber que elementos, empecipiando por lo debat sobre lo modelo de desembolique, pero continando por viyer atras formas d'un modelo economico plural, pero por atras expresions talment mas chiquetas, pero que tamién se son desembolicando aqui, como pueden estar la construcción d'a participación y lo control social, por eixemplo, an que tamién los propios movimientos, la sociedat civil en cheneral, pero mas que mas los movimientos socials son los que son fiscalizando l'acción d'as institucions, las politicas publicas, etc. Alavez, creigo que realment bi ha muitos elementos an que lo Norte, y en iste caso l'Estau espanyol, y los partius y organizacions tanto espanyolas como vascas que tienen un prochecto d'izquierdas tienen muitismo a aprender y replegar d'o que ye pasando aquí, en Bolivia, y en los procesos de cambio en cheneral.

lunes, 16 de abril de 2018

L'aragonés en Moncayo, y por totz los cabos

Ascuitar a Dabi Lahiguera siempre ye intresant. Si antimás presienta un d'os treballos d'a suya vida, y lo fa con la suya cutiana pasión, no saldrás d'a cambra sin cosas pa pensar-ie. La charrada sobre lo suyo libro "A fabla de Moncayo. Estudio comparativo con a lengua aragonesa", adintro d'as XXV Chornadas d'as luengas d'Aragón, organizadas por Nogara, me deixó qualques reflexions que siempre son de buen fer y que habrían d'estar en los debatz cutianos de qualsiquier aragonés.

Lo radiu conoiximiento popular d'as luengas, ya no nomas de l'aragonés, ye una d'as qüestions que estió present en la charrada en qualques momentos. D'una man, qui s'intresa por l'aragonés no gosa de tener guaires conoiximientos sobre la propia luenga en conchunto. Pa entender la nuestra luenga cal tener una envista bien ampla y no mirar-nos nomas lo momento actual y las variedatz referencials, sino tirar enta zaga historicament y ixamplar lo mapa dica lo sur y mesmo dillá d'as nuestras buegas actuals. S'estudea poco, y yo en soi buen eixemplo, l'aragonés historico y de vez, se desprecia qualsiquier parola u expresión replegada a lo sur d'a buega que cada estudioso u asociación proposa como la "pura".

D'atra man, los conceptos que la mayoría d'a chent tien sobre la esencia y lo funcionamiento d'una luenga son reflexo d'una educación mal chestionada. Bien sia por ignorancia, bien por nacionalismo lingüistico. Lo propio castellano, como bien desfendió Dabi, no s'amuestra con toda la variedat que tien. De feito s'amuestra mirando de correchir qualsiquier forma esbarrada d'a regla fixada. Accentos, lexicos, expresions, chiros, .... d'una parte importantisma d'a comunidat de fablants d'o castellano son refusaus sistematicament. Y, prou que sí, en ixo se incluye las peculiaridatz d'o castellano charrau en Aragón.

Ye curioso, pensando-ie, con que naturalidat asumimos que lo bueno pa una cria ye que aprenda la norma castellana estandar, encara que dimpués charre la suya variedat (lochicament), y cómo nos la pillamos dimpués con papel de fumar si en Echo amostramos una forma propia d'Ansó, u que se perdió fa trenta anyos. Qüestions de prestichio y autoridat d'as luengas, entre atras cosas.

La educación en lo tocant a las luengas, a todas, habría de fer un chiro de tot. No sé cómo serán las cosas agora. Por lo que tiengo entendiu continan si fa u no fa como quan yo yera mocet. Y en aquellas envueltas, de tot isto que veigo, leigo y ascuito agora, brenca.

Una d'as orichinalidatz d'o libro ye l'uso de metodos matematicos y estadisticos pa refirmar las suyas aseveracions. Lo que s'agradeixe. No ye una cosa realment orichinal, pues ye aplicada de cutio en atras obras lingüisticas. Manimenos creigo que ye un d'os primers (sino lo primer) treballo sobre l'aragonés an que se fa servir istas ferramientas. A lo menos de manera tant funda. Una vegada mas, Dabi creba ista buega, tant horrible como imachinaria, entre sciencias y letras. Una separación que nos fican en lo tozuelo dende chiquetas y que a muitas nos privoron de poder estudiar seguntes qué cosas en seguntes qué etapas d'a nuestra educación. La ultraespecialización nos leva a un analfabetismo practico en la mayoria de materias y habría de refusar-se por qualsiquier sociedat que quiera abanzar tecnolochicament y social.

Las personas que hue charramos aragonés, lo haigamos aprendiu de casa u d'adultas, femos parte d'una comunidat lingüistica con una historia y un territorio. Responsabilidat nuestra ye conoixer todas dos lo millor posible pa poder tener una envista de tot lo conchunto que formamos. Obras como "A fabla de Moncayo" y charradas como la que fació Dabi en istas chornadas aduyan, y muito, a fer ixo posible.

Si i faltetz, podetz sentir la charrada mas abaixo, y mercar lo libro en iste vinclo.



miércoles, 11 de abril de 2018

L'asturiano y la finestra d'oportunidat

"¡Cómo somos las aragonesas! ¡Siempre tricolotiando-nos! No femos aprecio a lo nuestro y lo deixamos perder. ¿Y fablilandia? ¿Qué me'n decitz? Siempre desunius, pleitiando por fateras. ¡Ai, que desgracia nos ha traito la historia!"

Tot iste penar tant cutiano, sin deixar d'estar verdat, ye común a muitos d'os pueblos colonizaus y a las comunidatz lingüistica minorizadas como podemos estar l'aragonesa y l'asturiana. Cada vegada que leigo bell texto u siento bella charrada sobre los procesos de redignificación, normalización, normativización, etc... d'una luenga minorizada, me trobo con exactament los mesmos problemas que tenemos en l'aragonés. Punto por agulla. Los argumentos contra las nuestras luengas son los mesmos: que son inventos u conchuntos de dialectos sin unidat lingüistica, que no sirven pa lo mundo moderno, que dividen a la sociedat, que "aquí nunca no s'ha charrau asinas", que se quier crebar Espanya, etc. 

Cada chiqueta conquista cuesta arrienda, y cada chiquet logro ye celebrau por los movimientos en desfensa d'as luengas como una gran victoria sin parar cuenta a soben d'o facil recular que tien qualsiquier paso entabant que faigamos.

La oficialidat ye una d'as reivindicacions d'os movimientos en desfensa d'as luengas. Una d'as mas basicas, ya que suposa lo simple reconoiximiento d'a realidat lingüistica y d'os suyos usuarios como personas con dreitos plenos. En Asturias ista oficialidat podría plegar antes de no acabar la lechislatura y por ixo, l'Asociación Cultural Nogara convidó a la Xunta pola defensa de la llingua asturiana a las suyas XXV Chornadas d'as luengas d'Aragón. En la charrada, Xulian explicó como heba estau lo camín dica plegar en ixa posibilidat que s'ubre en lo suyo país pa conseguir la oficialidat.

Una d'as cosas que repitió qualques vegadas estió que caleba aprofitar la oportunidat que teneban. Gracias a un chiro en la opinión d'o PSOE, iste partiu heba decidiu desfender la oficialidat de l'asturiano. Dende ixe cambio, la suma con Podemos y IU en lo suyo parlamento daba pa aprebar un cambio lechislativo que reconoixese la oficialidat d'a luenga. Encara ye muit dificil, ya que s'acercan eleccions y ya sabemos que dengún no quiere meter en marcha midas polemicas. Y muito menos un PSOE que siempre s'ha amostrau a saber que cagoso quanto a los temas lingüisticos. Antimás, y como bien sabemos por lo nuestro país, lo facherío aproveita qualsiquier abance en toponimia, u en politicas lingüisticas municipals, pa fer paralelismos absurdos con la situación en Catalunya, y clamar de tot a la chent que desfiende los dreitos lingüisticos.

Si a cada cosa que contaba Xulian, pensaba en lo paralelismo con la nuestra luenga y la situación politica, no podeba estar menos cada vegada que charraba d'aproveitar la oportunidat. Explicó, con muita razón en la mia opinión, que en la siguient lechislatura yera mas que probable que l'aritmetica parlamentaria no permitise fer oficial l'asturiano. En qualsiquier caso, si lo permitiba, lo treballo ya sería feito. Asinas que no bi heba garra enchaquia pa no fer ixe debat ya, y aprebar-lo antes con antes.

En Aragón, los partius que se presentoron con la derogación d'a lei d'o LAPAPYP en lo suyo programa electoral (PSOE, Podemos, CHA y IU) suman mayoría. La suman dende lo primer diya de lechislatura y han aprebau arrienda leis de conchunta sin garra problema. Manimenos, en lo tocant a la politica lingüistica, PSOE ha decidiu dar-le-ne de tot a CHA, con l'aprebación de facto de Podemos y IU, que no s'amuestran guaire intresaus en iste tema. S'han feito abances en educación u toponimia, por eixemplo. Tamién mas d'una zancochada como lo d'a prebatina de grafía. Pero probablement lo pior que s'ha feito, u millor dito, que no s'ha feito, en istos mas de dos anyos, ye no derogar la lei d'o LAPAPYP y mesmo empecipiar a desarrollar-la, en puntos tant importants como l'autoridat lingüistica. En un fallo que, en la mia opinión, nos podemos planyer durant decadas. Sisquiá m'entivoque, que lo foi a ormino.

Cal que no, pero talment que la siguient lechislatura tornemos a tener prous diputadas a favor de derogar la lei de luengas. Mesmo talment d'abanzar ent'a oficialidat. Lo que no podemos permitir, gubierne qui gubierne y tiengamos la composición parlamentaria que tiengamos, ye que lo debat recule y nos aconhortemos con las micazas d'os nuestros dreitos lingüisticos. Ya hemos malfurriau un tiempo precioso. Que no torne a pasar.

Los problemas d'as luengas minorizadas son los mesmos en quasi todas las comunidatz lingüisticas. Aprendamos d'as vecinas, d'os suyos exitos y fracasos, y apliquemos las solucions a la nuestra luenga y lo nuestro país.

La charrada la puetz sentir aqui: