viernes, 19 de octubre de 2018

Chicotén y la memoria mosical de l'aragonesismo. Cronicas pilaristas 18 II

Pasavilla en lo PIR 2015
Encara que no yera en la mia achenda pilarista, u precisament por ixo, lo concierto de Chicotén d'istas fiestas grans de Zaragoza estió toda una sopresa y fuent de bella reflexión. Iste colectivo mosical feba quaranta anyos y lo celebró con un concierto a on que participó buena parte d'a scena mosical pasada y present d'Aragón: Maria José Hernández y diversos integrants d'Ixo Rai, La Ronda de Boltaña, La Orquestina del Fabirol u Biella Nuei, entre atros, pasoron por lo scenario en una nueit plena d'emocions.

En lo suyo recorriu mosical repasoron muitos temas emblematicos, pero estió quan empecipioron con Ixo Rai quan los recuerdos y la emoción me plegoron en lo corazonet. Con Carta d'amor, ixe himno a los insumisos que estioron engarcholaus por tantos anyos, Ixo Rai me fació revivir los anyos de luita contra la mili y toda la ripa de conciertos que facioron parte d'a nuestra banda sonora d'aquellas envueltas. Lo 15 d'agosto no podeba faltar, y menos pa fiestas. Dimpués i arribó Roberto, de La Orquestina pa fer lo Pasodoble Maziello, y siguioron sonando temas como Ver para creer de La Bullonera, Mermelada de moras de La Ronda de Boltaña u bell par d'himnos de Labordeta: Quien te cerrará los ojos y, prou que sí, lo Canto a la Libertad, que zarró lo concierto a falta d'un zaguer bis.

No ye chusto la mosica que goso de sentir agora, pero sí la que implió casetes, CDs y MP3s por muitos anyos y que de cabo ta quan revisito. La triga estió tot un relato de la banda sonora de l'aragonesismo durant decadas. De cómo la mosica popular teneba ixa sensibilidat por lo territorio que tanta falta le fa a lo nuestro país. Sin ixa tradición mosical, probablement no hesen existiu Mallacán, Prau u Dechusban. Y sin ells, cal que no tenesenos hue  a Fongo Royo, Ni Zorra, Gaire u mesmo Krevi. Ixas cancions y ixas mosicas que tanto aprecisamos las que nos estimamos la tierra.

Aragón ye un país bien mosical. La cultura politica aragonesa y aragonesista va acompanyada d'una cultura mosical tamién. Tot ixo fa que tiengamos un contino, un relato completo, con tramas enreligadas, a on que podemos cambiar radicalment d'estilos mosicals con bells pocos pasos intermeyos, vinclando grupos. Las letras y mosicas de todas las collas aquí nombradas, y de tantas atras regular que ixuplido - ya lo siento -, recuentan la historia recient d'un país y d'as que luitan por cada diya por que la suya cultura contine viva.

Me pienso que lo folk nuestro no pasa hue por lo suyo millor momento, con claras excepcions como puedan estar Bosnerau u Vegetal Jam. Atros estilos sí que sobreviven de millors maneras. En tot caso, la mosica aragonesa y la cultura mosical aragonesista, ha viviu millors tiempos, tot y que siempre ha estau en una situación de febleza. Me fa miedo que ixe relato, constriyiu a traviés de decadas, bell diya se trenque. Por ixo no hemos de baixar la guardia y recordar que, igual como l'aragonés u qualsiquier atro patrimonio, si nusatras no lo protechemos dengún no lo fará. Asinas que continemos y milloremos la difusión d'as nuestras mosicas en las nuestras punchadas, en los nuestros conciertos y en la nuestra programación radiofonica. Asinas faremos chusticia a toda la nuestra chent que treballa por cada diya en que disfrutemos de cultura feita en lo país, y conseguiremos que en lo futuro, nuevas mosicas se barrachen y se chupeixcan d'o legau mosical aragonés.

martes, 16 de octubre de 2018

Chelo negro regalau. Cronicas pilaristas 2018 I

No soi guaire amigo d'os tributos, ni d'os AC/DC, pero de Black Ice (tributo a AC/DC) m'heban charrau tanto y tant bien, que lo martes de Pilars va decidir d'ir a veyer-los t'a carpa d'os Food Trucks. Antiparte, ixe dia no i heba cosa mas que fer adintro d'a mia achenda pilarista, asinas que a priori, yera un buen plan. L'ambient entre lo publico yera variau. Heavies de todas las edatz, prou que sí, pero tamién muita chent "sin pintas".

De tributos, por si nunca no hetz estau en garra evento d'ista mena, n'i hai que simplament fan la mosica d'o grupo que pertoque, y n'i hai que preban de pareixer-se-ie tamién en lo vestuache, la forma de mover-se por lo scenario u cosas asinas. Black Ice son d'os segundos. Los mosicos, mas que mas lo cantaire y lo guitarrista que feba d'Angus Young imitaban a los suyos alter egos australianos, con ixas maneras d'estar sobre las tablas tant caracteristicas. Lo vocalista mesmo se va marcar una gambadeta por dencima d'as barras animando a un publico que en primeras pareixeba una mica fredo. 

Pero entre canción y canción, se colaban falcas publicitarias mica afortunadas. Va acumular las primers fateras que va decir lo cantaire a un remedo d'una hipotetica actitut de farute de l'orichinal d'AC/DC. No los conoixco tanto como ta saber si l'orichinal ye asinas, por lo que va decidir suposar ixo. Un d'os primers "chistes" va arribar a cuenta de que l'equipo de futbol masculino de Uesca, diz que iba zaguero en la liga. "Futbol, localismo, .... bueno, rai. Cosas d'os futbolers que no adubo a entender..." me va pensar. Ya dimpués en van arribar de mas grieus.

Un d'os temas cunyaus d'istos Pilars va estar lo d'os lazos amarillos que se van colocar en Zaragoza y Fraga recordando a los presos politicos catalans en l'aniversario d'o suyo engarcholamiento, y la coincidencia d'iste feito con que belun va pintar d'amarillo un simbolo cristiano que i hai en l'Aneto. En una d'as pausas entre canción y canción, se va tractar como chent de radida intelichencia a los autors d'istos feitos, sin mica critica, prou que no, a que un anyo dimpués la democracia espanyola contine tenendo presas u obligadas a l'exilio a una serie de politicos y activistas por haber posibilitau que la chent podese opinar sobre lo suyo futuro. Un afer que poco u mica tien relación con AC/DC. Manimenos no va sentir garra parola sobre los suyos companyers de profesión Valtonyc, Pablo Hasél u Strawberry, por eixemplo.

La zaguera que va sentir, porque va marchar-ne poco dimpués, va estar la pior. Va empecipiar lo suyo innecesario speech con una critica a lo reggaeton. Ya va comentar en un post anterior, que la mayoria de criticas d'a chent enta ixa mosica, amás de fer evident que qui las fa no la conoixe mica, nos aviella anyos a embute. Soi seguro que si qui la deciba fuese naixiu d'os anyos trenta u quaranta, hese teniu la mesma actitut ent'o rock duro y los AC/DC. Lo speech remataba la suya critica a tot un chenero mosical con que "teneban unas letras que les feban muito goyo a las feminazis". I hai parolas y expresions que son sinyaleras y que nomas con decir-las contrimuestras toda una ideyolochía: Vascongadas, progremitas, l'anterior chefe de l'estau, lazi, farmafia, rechión, .... y prou que sí, feminazi. (Si queretz saber mas sobre l'orichen d'ista parola, aqui tenetz un buen video).

Ye la rematadera que lo faiga dende un chenero tant masclista como lo heavy a on que nos trobamos letras en toda la suya historia, que fan que Maluma pareixca d'o 8M. Regular que como son en anglés, y lo conoiximiento meyo d'a luenga ye tant radiu, talment no n'hesenos parau cuenta. Pero quan fas un tributo a AC/DC puet estar que haigas de leyer un poquet las suya letras, por si i hese qualcosa que no en podeses presumir guaire.

Va marchar ta casa sin que hese rematau lo concierto, comentando con las mias amigas la pena que yera que un grupo tant potent mosicalment, deixase que se malmetese un show prou bueno, por tener un cantaire tant cazurro y bocatoba. Prou que la colla tien dreito a decir lo que quiera aproveitando lo suyo microfono. Y yo a criticar los suyos mensaches baturristas y de tot gratuitos en un homenache a AC/DC.

martes, 9 de octubre de 2018

Nogara, O zaguer chilo 2, Krevi y Las Almunias. Tierra de barrenaus 5x01

Cinquena temporada! Unatro agüerro, torna Tierra de barrenaus radio y lo foi con muitas ganas de seguir fendo radio en aragonés, y de que vusatras lo ascuitetz. Empecipia lo curso y lo empecipiamos con muitas propuestas.



La primera, prou que sí, que la chent aprenda tot l'aragonés que pueda. Pa ixo, entrevisto a Mario, de l'Asociación Cultural Nogara, que nos presienta los cursos d'aragonés que i fan. Una asociación que, antimás d'amostrar las ferramientas basicas pa aprender la luenga, organiza toda mena d'actividatz pa poder fer-la servir de contino.

Entre ixas actividatz que organiza, i ye lo concierto previsto pa l'onze d'octubre en la Plaza Sant Bruno, a on que se presentará O zaguer chilo 2. Ye ista la segunda edición d'un prochecto que mira de que los grupos de mosica aragoneses tiengan mayor sensibilidat por lo nuestro patrimonio lingüistico, fendo una d'as suyas cancions en aragonés.  Cherardo nos charrará d'istas vinte nuevas collas con vinte nuevas cancions que amanixen en iste disco que torna a fer historia en lo panorama mosical aragonés. Si encara no has sentiu lo primer O zaguer chilo, recuerda que lo tiens en Youtube.

Una d'as personas que participó en lo primer "O zaguer chilo" ye Krevi solenco, rapero aragonés y aragonesofablant que i publicó "No ye que rap", tot un temazo. Agora presienta lo suyo nuevo disco "Varios años después", a on que se incluye unatra canción en aragonés "No cal". Como en la suya anterior visita t'o programa, antimás se marcó dos temas en directo.

Lo programa remata con Tamara, la nuestra educadora medioambiental, que a la fin i torna pa charrar-nos d'o Barranco d'As Almunias. Una propuesta pa visitar bien cerqueta de Zaragoza, con un paisache unico y un patrimonio medioambiental tant rico como poco valurau.

Lo programa estió promocionau con una videofatera, que tamién yera qualcosa que teneba una mica deixada y que aspero reprener con bella continidat.





jueves, 27 de septiembre de 2018

L'aviador DRO aterriza en Zaragoza

De bien criet, lo mio chirman me meteba los discos d'Aviador DRO. Como buen friki, yo flipaba con Aelita, La televisión es nutritiva, Himno Aéreo y todas aquellas cancions que charraban de robots, viaches espacials y una nueva sociedat computerizada. El Aviador DRO y sus obreros especializados estió una d'as primers bandas que recuerdo haber estau fan. Pero quan empecipié a estar-ne conscient, quasi ya no feban ni discos ni conciertos. Dende fa bell anyo, prencipié a leyer que yeran de chira de nuevas y, gracias a isto d'os retes socials he estau un poquet mas a la tisva de lo que iban fendo dica que, a la fin, trenta y nueu anyos dimpués de que ells naixesen como grupo y yo como humano, tornoron ta Zaragoza, ta La Casa del Loco.

Aviador DRO fació historia en la mosica. Estioron los abanderaus d'o tecno en l'Estau espanyol, marcando una tendencia mosical y mesmo estetica y experimentando con una tecnolochía de soniu que en aquellas envueltas yera de tot nueva. Creyoron tamién lo sello discografico DRO (Discos Radiactivos Organizados) a on que editoron los suyos propios discos, pero tamién los de chent como Glutamato Ye-Ye, Parálisis Permanente, Siniestro total u Decibelios.

Bell rato antes d'o concierto una buena ringlera de chent aguardaba ya en la puerta. Por una vegada, no yera yo lo mayor. Tot de revés, yera un d'os mas chiquetz. La mesma chent que yeranos en la puerta, bien podríanos haber veniu d'una reunión de l'AMPA de bell colechio. Teneba las mias dubdas quanto a ir ta iste concierto. Aviador DRO yeran pa yo tot un simbolo d'una serie de vivencias muit polidas y no quereba emporquiar-las si lo concierto resultaba estar un catén.

Las puertas s'ubrioron y bi entremos. Sobre lo scenario los sintetizadors y toda la "maquinalla" que farían servir. Prochectau, una serie de videos y de montaches visuals con fotos d'a colla d'antes mas y bell cartel. Entre que aguardabanos a los nuestros idolos, quasi 45 minutos, lo dj nos ufrió una sobrebuena triga de cancions de soniu tecno uitantero como What happens now, d'os zaragozanos Vocoder u Aquella canción de Roxy de La Mode. Ixos ratos d'aspera valen la pena si la mosica ye tant buena. Lo mesmo Biovac N, cantaire d'Aviador DRO, diría dimpués sobre lo scenario que yera "la millor presentación que les heban feito nunca". Entre lo publico, me sentiba una mica raro. De toda la sala nomas conoixeba a lo gran Yosi, d'Elektrocracia, quan por un regular trobo a-saber-las amigas y compas.

Con tot y con ixo, lo que querebanos yera veyer a los mosicos en directo. Dezaga d'ells apanyaban una pancarta que meteba "Anarquía científica", y los tecnicos feban los zaguers achustes. Y a la fin salioron t'o scenario. Con achustadors de colors metalicas sobre camisetas con lo simbolo d'a radiactividat. Y mayors d'edat, sí, pero conservando toda la rasmia d'a choventut d'esprito. Dimpués D'una arrisgada Rosemary pa empecipiar, arribó lo primer himno: Néstor el cyborg. CTA 102, responsable de "Estética informativa" seguntes ells mesmos, se metió en lo papel de Néstor y con una careta y clau anglesa en man, nos animó a bailar. A partir d'astí, himnos a l'arreu: Selector de frecuencias, La televisión es nutritiva, Ucrania en llamas, Programa en espiral...

Por la mia capeza pasoron alcordanzas de tantas y tantas vegadas que he sentiu ixas cancions. Aviador DRO no sonaba en directo como yo me pensaba ni lo show yera como heba esmachinau. Yera tot muitismo millor. Totz cinco components d'a banda se les veyeba disfrutar sobre lo scenario. Abaixo, nos deixemos de bailar ni cantar dengún de totz los temas que nos proposoron. CTA 102 se'n baixó bell par de vegadas como parte d'as performances que iba fendo a cada canción. Preboron d'acabar con Trance, en ixa parte d'o concierto que tot sabe que no será la final. Que tendremos bises.

Asinas arribó El retorno de Godzilla, una d'as que mas m'aganaba de veyer, encara que nomas fuese por poder alufrar un kaiju sobre un scenario. ¿Quantas bandas te fan ixo? Encara que con ixo se despidioron, consiguiemos, limpio chilar, que se'n fesen unatra. Cuento que no la teneban prevista, como creigo que confirmó un canso Biovac N, en decir "bueno, pero una, que ya tenemos una edad". Con Vortex, agora sí, despidioron lo concierto, recordando que en 2019 fa quaranta anyos d'a formación d'a banda, y que lo celebrarían con un show mas gran. 

Feba muito tiempo que m'heba despediu d'a posibilidat de veyer a Aviador DRO en directo. Como con tantas atras collas d'a mia nineza y choventut. Afortunadament a l'Aviador le queda vida pa muitos anyos encara, y aspero poder tornar a sentir-lo a-saber-las vegadas mas.

lunes, 24 de septiembre de 2018

L'amigo rico. Historias d'un cole de mosens XIII

Corazonistas, como quasi totz los colechios privaus pagaus por todas y totz, yera un cole pa chent con diners. Como tantos atras, feban servir toda mena de trucos pa que ixo no fuese evident ya que, en teoría, no pueden trigar a l'alumnau por lo suyo poder adquisitivo. La realidat yera que lo nivel economico d'a chent que bi estudiabanos yeran meyo-alto como poco.

Con tot y con ixo, bell "pobre" se les colaba. Recuerdo que tenebanos en clase un mozo que la suya familia no yera "de perras". No portiaba las zaguers maripis modernas de moda que bi hese, gosaba d'heredar ropa d'os chirmans y cosas asinas que en lo cole s'acumulaban a chent sin recursos. Estió tamién un d'os primers que empecipió a furtar en El Corte Inglés y en atras botigas mas como esporte que como nesecidat. Y qui les amostró como fer-lo a muitos atros. A soben se le clamaba "chitano" como faltada, asinas que quan leyiemos un diya en clase "Muerte de Antoñito el Camborio", un poema de Lorca que charraba de l'asesinato d'un chitán, a ixe mozo le cayió la embotada de "Camborio" pa la resta d'anyos que pasó en Coras.

En l'atro costau d'o nivel economico de clase mía yera Paco (nombre falso), lo mio "amigo rico". La mia familia teneba bell vinclo con la suya, no sé encara quál, y lo caso ye que empecipiemos a quedar chuntos. Ell viviba en un callizo d'Independencia, en un pisazo gran de tot. Le feban goyo las mesmas cosas que yo, asinas que a escape faciemos pacha. Yo coleccionaba G.I.Joes, uns monyacos de soldadetz que yeran bien de moda en ixos anyos. Cada monyaco costaba bellas 400 pezetas, si no me'n alcuerdo mal. Pero teneban tamién avions, autos y vehiclos hiperbizarros de toda mena, que valeban diners a embute. Yo en teneba belun, d'os chiquetz. Iste mozo los teneba quasi totz, incluyidas no una sino DOS Rolling Thunder, que yera como la mega ultra super nau d'os GIJoes. Un  zarrio a on que podebas calar soldadetz a trompicuesco. Me lo pasaba de bitibomba en casa suya, ya que en tener-ne dos, siempre me deixaba levar-ne una en las batalletas que febanos.

Dimpués empecipié con los tebeos. Yo me feba bell par de coleccions. Ell, todas. Gracias a ixo me podié leyer coleccions enteras, y entender muito millor un universo Marvel que en los ueitanta encara se podeba adubir a comprender de tot. Quan arriboron las consolas t'o nuestro universo ludico, prou que la cosa continó igual. Dimpués de buen ferrete, consiguié en unos reis que me mercasen la Game Boy. La viella, sin colors, y con lo chuego d'o Tetris que durant muito tiempo estió lo unico que tenié. Pacó la tenió malas que salió. Igual como la NES, la Master System, la MegaDrive, ... y mesmo la NeoGeo, la sola que arribé a tocar en la mia vida. Su pai guiaba un Toyota Supra, que a yo me pareixeba millor que Kitt, l'auto de "El coche fantástico".

Quan salibanos t'os recreativos, conoixié con ell por primer vegada lo concepto de "convidar" entre personas d'a mesma edat. Dengún no m'heba convidau nunca a cosa, y tardaría muito en tornar a fer-lo. Paco siempre me pagaba bella partida a dobles en las maquinetas quan yo ya heba acotolau feba tiempo los diners que me daban en casa. Y mesmo bella vegada dimpués nos febanos un refresco y bella laminería a o suyo cargo. A yo no me feba guaire goyo aquello, me pareixeba una mica humillant, pero con ixa edat ¿qui le diz que no a unatra partida y bell par de regalicias?

En casa mia nunca no me faltó de cosa. Quan dimpués ixamplé en l'instituto lo mio universo personal, paré cuenta que, de feito, yo veniba d'una familia "afortunada" en lo plano economico. Pero en lo cole, yo teneba "lo normal" de chuguetes y, pa forro de bota, compartiba amistat con uno que teneba un nivel economico a anyos luz d'o mio. No entendeba como aquell zagal podeba permitir-se totz aquellos chuguetes, comics, consolas y videochuegos, y a yo se me negaba l'acceso a tot aquello. Ni por qué mi pai heba trigau tener un R-19 en cuentas d'ixe Toyota tant pincho. Con las explicacions que me daban, me pasaba como con las que me daban sobre la relichión, que no les veyeba mica sentiu. 

En pasar ta l'instituto, me trobé con la realidat. Astí convivié con chent con muitismos menos recursos que la familia mia, y con beluno que mesmo teneba muitas mas perras que Paco, pero de familia de royos que heban decidiu que estudiase en la publica. Tamién tenié profesoras y profesors que me dioron las ferramientas pa poder deducir por qué unas personas tienen uns nivels economicos y de vida y atras, atros. Probablement si hese acabau BUP y COU en Coras, hese tardau muito mas a tener ixa envista, a conoixer ixa atra parte d'a realidat. U mesmo talment no la hese conoixida nunca. 

Coras, como totz los coles privaus, trigaba y triga a los alumnos por nivel economico familiar. Ixo, antimás de inchusto, niega a lo suyo alumnau lo contacto con toda una realidat socioeconomica en una etapa de l'aprendizache a on que la empatía con atras personas menos favorecidas habría d'estar fundamental. Pior educación, y financiada por todas.

viernes, 21 de septiembre de 2018

'Vosotros', 'ustedes', 'sopars' y 'cenes'. Por Carles Terès

En Facebook, charrando sobre temas de standards y amostrar-los en la educación publica, empecipió un chiquet debat. Un d'os debatients estió Carles Terès, autor de Licantropia, libro ganador d'o Guillem Nicolau de 2011, y d'o blog L'esmolet, toda una referencia en la blogosfera aragonesa. L'articlo orichinal, titulau 'Vosotros', 'ustedes', 'sopars' y 'cenes", lo podetz leyer en lo suyo blog, y contino tos pencho la versión en aragonés.

Iste Cabo d'anyo s'han anyadiu a la colla de Torredarques los amigos Rosana y Marcelo con los suyos fillos Tigist y Mulatu. Son archentinos y fa mas de deciueito anyos que viven en Espanya, concretament en Madrit. Nos conoixiemos en Addis Abeba, quan i fuemos a buscar a los nuestros fillos respectivos. Les amostremos lo lugar, una mica Morella y mesmo lo centro de salut de Vall-de-roures - cosa important, tranquilos.

Como en la chiqueta colla de Torredarques bi ha catalans, estió inevitable que en la cena de despedida d'o 2017 surtise lo tema d'a situación. Que se le va a fer. Pero a yo lo que m'intresó estioron las conversas sobre los nuestros respectivos dialectos. L'archentino en ye un de bien rico, con fama (talment mereixida) de estar seductor por la suya mosicalidat dulza y lo suyo lexico peculiar. L'amigo Marcelo nos recontó que quan ell estudiaba en Buenos Aires le ensenyaban lo mesmo espanyol que en las escuelas d'os suyos fillos en Madrit. A pesar d'ixo, y como tot lo mundo puet comprebar, la modalidat archentina pervive cerenya y sin rastro d'iberización. "Yo estudiaba 'tú' y 'vosotros', pero siempre digo 'vos' y 'ustedes'". L'expliquemos que por ista parte beluns s'alticaman si en la escuela s'amuestra 'sopar' u 'doncs' en cuenta de 'cena' u 'pues'. "No lo entiendo" dició Marcelo. Yo tampoco.



martes, 18 de septiembre de 2018

Tierra de barrenaus: Quarta temporada

Acaba un curso intenset. Muitisma actualidat politica, lingüistica, mosical y de toda mena. Un anyo radiofonico a on que prebé de cambiar lo formato de nomás un tema por programa, y fer-ne uno de seccions. Con tot y con ixo, no deixé de fer monotematicos.

D'as quatre temporadas, probablement ista siga la que mas convidadas ha recibiu. Con temas tamién bien variaus, reflexo d'iste blog a on que tot i culle: mosica, politica, sociolochía, medio ambient, historia, luengas, ... De tot en catorce programas, a on que se incluye l'especial que facié pa la vaca de mullers d'o 8 de marzo y l'especial d'Estrela a estrela. En lo listau d'abaixo tamién calo lo programa especial sobre lo proceso independentista de Catalunya, que grabé "entre temporadas" y que por ixo no arribó a incluyir-se en lo resumen d'a tercer temporada.

En iste anyo, bien duro en ocasions por qüestions personals, la radio s'ha convertiu en un cubillar a on que paso sobrebuenos ratos con las convidadas. Creigo que ha estau una gran temporada con temas bien intresants y programas que vale la pena repasar-se de cabo ta quan. Aspero, como siempre, que tot isto faiga honra pa que l'aragonés tienga una mica mas de presencia en la esfera publica aragonesa y pa toda la chent que lo ye aprendendo.

La cinquena temporada ya se ye cocinando en ixe furno varreau que tiengo en la capeza. Tiengo muitos temas y convidadas ya pensaus. Pero soi mas que ubierto a tot lo que me proposetz, asinas que aspero las vuestras alportacions sobre lo que tos ha feito goyo, lo que no, y lo que tos faría goyo de sentir en istos dotze meses y ¿tretze? programas que nos aguardan pa lo curso 2018/2019.


Y prou que sí, tot isto no hese estau posible sin l'aduya de todas las colaboradoras: Lorient, Chorche R., Tamara, Mario, Cherardo, Krevi, Diego M., Susana, Pati, Chuserra, Fer E., David P., Miguel M., Diego C., Chabi T., Lucía, Chabi Prau, Dabi A., Chorche P., Alfredo, Anchel, Armando, Mario, Elena, Laura C., Silvia C., Ruben S., Ruben R., Dani L., Dabi F., Chuse Raul, Juan Pablo, Dabi L., Txema, Guillén G., Guillén T

Temazos 3. Tierra de barrenaus 4x13

sábado, 8 de septiembre de 2018

Platero y tu, y yo

Yo nunca nunca... soi estau en un concierto de Platero y tú. A qualsiquier que siga d'a mia cheneración le pareixerá raro, en estar una d'as collas mas famosas en lo panorama rockero d'os novanta y que antimás visitoron Zaragoza un ciento de vegadas. No estió por que no me fesen goyo, que me'n feban, ni por un tema de postureo, que en isto d'a mosica nunca no n'he teniu guaire, sino por toda una serie de coincidencias que facioron que nunca no podese veyer-los en directo.

A los Platero, los va conoixer en Charava, en un d'os pipetes que teniemos. Beluna d'a penya se fació con una cinta a on que le heban grabau las cancions que mas goyo le feban. Todas las malas, en la mia opinión. La variedat mosical no i yera guaire valurada, asinas que cada verano sonaban tres, quatre u cinco casetes, como muito. Ixe anyo le tocó a Platero. Juliette, Déjame en paz, Mari Madalenas, Si tú te vas... Lo pior d'a colla sonando a l'arreu durant totz los diyas de fiesta. Lochicament, a escape les pillé buena quimera. Como siempre en lo lugar, toda la mosica d'o mundo,  se dividiba en "mosica", que yera lo que sonaba en los 40 aquell anyo, y "heavy" que yera qualsiquier cosa a on que bi hese un solo de guitarra. Cada verano tenebanos pleitinas por qué porcentache de cada cosa heba de sonar. Ye cabolioso que yo prebaba de que sonase mas "heavy". Aquell anyo, "la cinta de heavy" yera ixa de Platero, asinas que no podié sentir ni una canción decent en lo nuestro pipete.

A partir d'aquell anyo, con a-saber-la reticencias, empecipié a ascuitar atras cancions suyas. Las mias amigas de l'instituto me'n pasoron y en l'Atro, afortunadament sonaban a ormino. A la fin, como quasi todas en la mia cheneración m'acaboron fendo goyo.

Pa Pilars, como me fa goyo tantas cosas, gosaba de trobar-me con a-saber-las dubdas en fer-se publico lo programa. Muitos diyas s'encertaba que quereba ir ta dos u mesmo tres d'os conciertos que se feban en la ciudat. Asinas que heba de trigar. Totz los anyos, un d'ixos conciertos yera Platero y tú, asinas que, como siempre tornaban t'aqui, me pensaba que ya los veyería belatro anyo. Consello: si tos fa goyo un grupo de mosica, itz a veyer-lo antes con antes. Nunca no se sabe quánto pueden durar chuntos.

La relación con Extremoduro yera mas que evident. Compartiban scenarios y mosicos, y mesmo arriboron a grabar aquell marabilloso "Extrechinato y tú", a on que Robe, Uoho y Fito meteban mosica a los poemas de Manolo Chinato. La fin d'os novanta y lo prencipio d'os 2000 estioron la fuga d'ixe microverso mosical, sonando en totz los bars y fiestas d'os lugars, y fendo conciertos a trompicuesco. Quan amaneixió lo primer disco de Fito & Fittipaldis, dengun no creyiemos que Platero ise a dispareixer. Lo veyebanos como bella mena de spin off pa grabar atras cosetas que le aganaban a Fito.

Ironicament, unas d'as primers vegadas que vinió Fito con la suya nueva banda, sí que lo va poder veyer. Estió en lo mitico guariche Canal 44. Una d'as salas mas zaborreras a on que soi estau nunca. En noviembre de 2002 acullió un concierto suyo, recient publicau lo segundo disco y encara con asperanzas de que Platero y tú no se separasen. Chunto con ell, tocaba en ixe concierto Azero, que empecipiaban a fer-se nombre en la scena aragonesa. Fito encara teneba bella miqueta de rasmia, pero ya iba sonando esbafau. Y mas a lo canto d'Azero que yeran en un d'os suyos millors momentos. 

Poquet a poquet Fito fue ixamplando lo suyo fandom. A pur de sonar en las radioformulas y de fer esbarrar la suya mosica enta un pop-rock suau, libre de qualsiquier mensache politico y de buen minchar pa lo publico cheneral. Con tot y con ixo, le die una zaguer oportunidat en una chira que le trayió ta Zaragoza, t'o Pabellón Jose Luis Abós, que en aquellas envueltas se deciba Principe Felipe. De teloneros, la Cabra Mecanica que, igual como heba pasau en lo concierto de 2002, me facioron muito mas goyo que no Fito.  Lo pabellón, a rebutir, ixo sí, d'a-saber-la chent que no pisaría l'Atrio ni que i regalasen forfaits. Nos estiemos tot lo concierto en candeletas, aguardando que en bell momento empecipiase a fer bella canción una mica mas fura. Nos quedemos con las ganas. A la fin, la mia quiesta Arale, preguntada por lo concierto por una periodista de TVE, respulió que no le heba pareixiu mal pero que "ixo yera pop, no pas rock". Y ye una buena definición. Fito ye un buen mosico, que fa cancions que lo petan, pero que a yo me deixó de transmitir cosa fa muitismo tiempo.

Por cada vegada que suena en la radio, y no en son pocas, trobo a faltar a los Platero. Me foi cruces de que qui cantaba Rompe los cristales, No hierve tu sangre, Lo que os merecéis, ... s'adedique agora a fer cancions d'amor no aptas pa diabeticas entre que se fa fotos con Albert Rivera u policias espanyols. Astí sí que me bulle la sangre

Pero sobre tot, me repenedeixco de no haber iu ta garra d'os conciertos de Platero y tú quan va poder. En ixe mesmo listau, de collas que me fan goyo pero que nunca no he visto en directo, en tiengo mas como Betagarri, Xeic u Fongo Royo. Aspero que no me torne a pasar.

martes, 4 de septiembre de 2018

Sagas X-Men: Los Nuevos Mutantes. Tercer Chenesi

Gracias a un amigo con perricas que tenié de crio, podié leyer-me a-saber-las d'as coleccions que s'editaban en los anyos ueitanta y novanta. La mia paga me daba pa seguir Uncanny X-Men, Avengers y poco mas, asinas que heba de tirar d'amigos, bibliotecas y lo que iba furtando d'a on que podeba. En ixos anyos encara yera posible seguir toda l'actualidat mutante, y con la falaguera que teneba - y tiengo - con ixe universo, por las mias mans pasó quasi tot lo material que se publicó alavez. Quasi tot, y no pas tot, porque una d'as coleccions que no se feba lo mio compa rico, ni furté d'o Corte Inglés, ni consiguié en garra biblioteca, estió Los Nuevos Mutantes. Tot lo que en conoixeba yera por la suya presencia en crossovers como Inferno, u por los suyos zaguers numeros, ya lideraus por Cable. Asinas que quan salió a la venta lo tomo que replegaba las suyas primers aventuras, me lo pillé de camín.

Lo tomo replega comics editaus entre 1980 y 1984. Concretament un Marvel Team-Up, con la primer aparición de Karma, y la presencia d'os Quatre Fantasticos y Spiderman, la primer novela grafica, a on que se presienta la primer alineación d'os Nuevos Mutantes, la mini-serie Magik y, prou que sí, los primers 17 numeros de The New Mutants. Antimás bi ha bell articlo de Raimon Fonseca, explicando a-saber-los detalles, que aduyan a contextualizar los anyos que se escribioron ixos comics.

Entre los autors, la mayoría d'o volumen ye guionizau por lo chenial Chris Claremont, encara que tamién i colaboran Frank Miller y Bill Mantlo. Quanto a los dibuixos, conta con las mans de gran como Sal y John Buscema, Paul Smith, Frank Miller, Bob McLeod y Ron Frenz, en un tiempo anterior a l'arribada de Bill Sienkiewicz, que estió un d'os motivos pa no acercar-me a ixa serie en los mios tiempos.

En ista primer etapa d'a colección podemos leyer sobre los orichens d'o primer equipo de Los Nuevos Mutantes, integrau por Karma, Cannonball, Wolfsbane, Psyche y Sunspot. La novela grafica ye un tipico comic d'orichens, con personaches con unas personalidatz muit marcadas y bien diferents que, antimás, tienen procedencias tant distintas como Vietnam, Brasil u Escocia. A partir d'a primer trobada entre totz ells, se va teixindo tot un rete de relacions personals. Ye tot un goyo veyer como en aquellas envueltas no bi heba tanta prisa por que los protagonistas se barallasen con bell enemigo, y se preneba todas las pachinas que calese pa recontar como interactuaban entre ells. En estar adolescents, antimás, tienen toda ixa ripa de complexos y miedos propios d'a suya edat.

Tamién como ye tipico d'ixa epoca, las alumnas d'a Escuela de Charles Xavier van conoixendo china-chana los suyos poders y entrenando-los. Dende un prencipio que no los dominan ni brenca ni meya, dica que empecipian a fer-los servir con bella estrucia. Por las suyas pachinas pasan enemigos de peso como lo Nido, los centinelas u lo Club Hellfire, que esdevendría a escape en la suya nemesi con la formación d'os Infernals. Como buen comic Marvel, tamién i amaneixe, prou que sí, los X-Men y atros superherois como Spiderman u Cloak y Dagger, tant de moda alavez. En lo mas puro estilo Chris Claremont, l'equipo va cambiando. A la formación orichinal se le anyaden Magma y Magik y la presencia contina de Kitty Pride, fendo un equipo muit mayoritariament formau por zagalas. A primers d'os 80 y continando con lo costumbre tant claremontiana d'equipos con gran presencia femenina. No cal ixuplidat que los X-Men d'alavez tamién gosaban de tener mayoría femenina. 

Probablement lo millor d'o tomo, antiparte d'ixa primer novela grafica a on que conoixemos los orichens de l'equipo, ye la miniserie de Magik. Una autentica choya que explica qué pasó en los anyos que pasó la chirmana de Colossus en lo Limbo y como empecipió a aprender artes machicas. Una aventura de quatre numeros con la presencia d'una Storm viella y bruixa y una Kitty Pride felinizada a on que podemos veyer por primera vegada a personaches que dimpués serán tant importants como Belasco u S'ym.

Entre lo pior, que de cosas malas tamién n'i hai, la tant absurda como innesezaria aventura de l'Equipo America, unos motoristas (penibles) que les acompanya lo misterioso (y penible) "motorista fosco". Antiparte de no tener mica sentiu, lo que en los comics pasa con relativa freqüencia, ixos numeros se fan bola y cuestan d'acabar. Afortunadament, en acabar-se, ya va tot de puyada y no t'aburres ni una pachina.

Sin estar yo guaire de recosiro, y muito menos quanto a los comics, m'ha feito a saber qué goyo tornar a trobar-me con ixa sabor ueitantera de tebeo "culebron" que a soben yera mas important las relacions entre Cannonball y Magma, u la envista que teneba d'o mundo una nina criada en un cristianismo radical como Wolfsbane, que a qui le daban lo sobo que tocase. Las personalidatz yeran coherents, teneban un sentiu y evolucionaban d'una manera lochica. Probablement porque teneban lo mesmo autor durant anyos arrienda. La mecanica actual d'o comiqueo superheroico, cambiando de guionistas cada poco tiempo, con poca letra y muito dibuixo, y con personaches que a ormino s'han d'adaptar a los concietos d'os guionistas d'as suyas versions cinematograficas, fan que ixo siga de bien dificil conseguir. Lo comic actual tien muitas atras virtutz, ye verdat, pero fueras de bella excepción, trobo a faltar mas "medolla" y mas humanidat en lo tractamiento d'os personaches. Qualcosa que ye bien present en iste tomo.

La siguient etapa d'o grupo empecipia con la incorporación d'o debantdito Bill Sienkiewicz a l'equipo creyativo. Antes mas le teneba firme quimera, en tener un estilo que nunca no me fació goyo y que mesmo se me feba de mal leyer. Con lo tiempo, los gustos me han cambiau, asinas que talment lo siguient tomo acabe fendo parte d'a mia biblioteca. A fe que iste m'ha deixau con ganas de mas.

domingo, 2 de septiembre de 2018

Temazos 4. Tierra de barrenaus 4x13

Como en cada temporada, Dabi, Ruben y yo nos chuntemos pa pensar en lo programa que zarra iste curso radiofonico. Tenebanos bella ideya que hebanos iu desarrollando durant muito tiempo y que a escape refusemos porque significaba masiada fayena. Lo resultau: iste programa de temazos. Lo mas largo dica agora y, en la mia opinión, lo mas divertiu.

 
Por quasi tres horas, hemos trigau dotze temas dividius en decadas: 80, 90, 2000 y 2010. Cadaún seguntes lo suyo criterio. Como digo siempre en la entrada d'o programa, "bueno u malo, tu decides". Rap, flamenco, ska, heavy, tecno, punk, reggaeton,... no tenemos problema en ascuitar mosicas de toda mena, si son buenas, como pensamos que en son totz los temas que tos proposamos.

Si yes nuevo, puetz sentir-te tamién Temazos, Temazos 2 y Temazos 3, pero no ascuites totz a l'arreu que te puet dar un mal. Aspero que tos faiga goyo y, si lo pasatz la quarta parte de bien que nusatros grabando-lo, a fe que tos ne fará.

miércoles, 29 de agosto de 2018

Historias d'un chobenallo (1): Planta Baja, Resistencia y antifaixismo

Chobenalla Aragonesista estió la primer organización a on que milité de verdat. Pero d’organizacions en tenié una antes. Efimera de tot. Nian lo suyo nombre recuerdo con seguridat, pero creigo que se dició Resistencia. Debió d'estar en bell momento entre lo 95 y lo 98. L’ambient politico mio yera alavez basicament l’antifaixismo. L’arribada en l’instituto me fació trobar-me con una colleta de nazis que tenebanos en lo Medina Albaida. Yeran pocos y poco importants, pero daban muito mal. Y lo que ye pior, de cabo ta quan, se sorteyaba bell sobo. Yo me iba librando - d’uno por muit poco- pero sabeba que me podeba tocar qualsiquier dia.


Difuera de l’instituto, me pasaba la vida en lo Planta Baja, mitico bar d’a carrera Vasconia, que yera tocando con atro mitico: l’Ifi. Astí nos chuntabanos buena parte d’a mainada antifaixista. Y digo mainada, porque d’a colleta mia bien pocos yeran mayors d’edat. Gosabanos de quedar sobre las cinco, febanos botellada por astí cerca, y a ixo d’as 19 que s’ubriba lo “Planta”, ya yeranos en la puerta, prestas a aduyar a escobar si caleba, por tal de que ubrisen bell rato antes, y porque bella vez, lo cambrero nos convidaba a un pozalico de tinticola. Astí sentibanos DEF CON DOS, La Polla, Reincidentes, y lo que yera de moda alavez. Y charrabanos. Charrabanos muito. D’o que charran los adolescents y sobre tot de politica. Astí fue aprendendo lo que yera, u lo que creyebanos que yera, l’anarquismo, lo comunismo, y la izquierda en tot lo suyo amplo espectro.


En la mesma carrera, a bella ventena de metros como muito, yera El Rollo. Un guariche que teneba un publico composau por militars, faixistas y militars faixistas. Quasi cada nueit acababa en bell empandullo con ixa chentucia. Mas d’una vegada habiemos de baixar la persiana d’o Planta pa acubillar-nos-ie. Cuento que tamién les faríanos bell zancocho, pero no me’n alcuerdo de garra. Tamién son anyos que, por efecto de l’alcohol, he perdiu a saber qué detalles y recuerdos.


En ixe ambient, bells quantos d’os que nos i chuntabanos tenebanos ganas de militar en bella cosa, pero tampoco no sabebanos guaire bien cómo fer-lo ni a ón. Belún yera d’o SEI (Sindicato de Estudiantes de Izquierdas) que t’a part d’alavez yera bien fuerte en los institutos y entre la choventut en cheneral. Tampoco no conoixebanos guaire lo teixiu social y politico d’a ciudat ni d’o país. Y antimás, cadaún yera d’una coda diferent. I yeranos anarquistas, comunistas de diferents corrients y belun que no s’adscribía ni a uns ni a atros. Yeranos tot lo anarquistas y comunistas que se puet estar con la formación que tenebanos que, en muitos casos, como lo mio, tendeba a zero.


A la fin, tres u quatre zagals, que yeran un poquet mas mayors que no yo, decidioron de fer un colectivo antifaixista. Creigo que le clamemos “Resistencia”. La primer reunión la faciemos en Liberagoza, un local que zarró fa no guaires anyos, que yera en la carrera Palafox. Yera un d’ixos locals que feba servir colectivos politicos y socials a embute pa reunions, elaboración de materials y cosas asinas. Teneba un chiquet bar que se petaba pa Pilars, y bella sala de reunión adintro. En ixa primer reunión, i estiemos bella quincena de personas. Charremos bien de rato, de las nuestras diferencias, pero sobre tot, de lo que nos uniba que yera basicament l’antifaixismo. Y decidiemos d’empecipiar una campanya de cartels. Sé que yera contra los nazis, pero no recuerdo que i meteba exactament. Si belun lo tenese por casa le’n agradeixería de tot que me lo fese arribar.


La campanya estió bien pincha y apeguemos buena cosa de cartels, que estioron los primers cartels que apegué yo en la mia vida. Cada vegada que iba por la carrera y me trobaba con belun, me feba bien argüelloso. La segunda reunión la faciemos con atros colectivos. No recuerdo quals, pero la sensación que me levé yera de que no alportabanos cosa nueva a la luita antifaixista y que faríanos mas honra integrando-nos en belún d’os colectivos que existiban en Zaragoza que no pas fendo-ne uno nuevo..


En aquell momento no entendeba que la nuestra existencia como colectivo tampoco no teneba sentiu y que, efectivament, hese estau prou mas util que entrasenos en qualsiquier d’as organizacions chovens antifaixistas que yeran luitando en la ciudat y en lo país. Me quedé prou chafau. Creyeba que lo mio colectivo yera lo millor y que ibanos a petar-lo y que la resta d’organizacions reconoixerían a escape la nuestra chenialidat y me trobé con que lo mesmo que querebanos fer, ya lo feban atros. Que no hebanos inventau la rueda precisament. Alavez no lo entendié.


En la tercer reunión ya no i estiemos que dos d’os que heban teniu la ideya, un compa de clase que me i levé, y yo. Meyo deprimius, estiemos charrando de tot una miqueta. Recuerdo que un d’ells nos estió charrando d’a historia real d’a bruixería y de como s’untaban drogas en l’escopallo pa surber-las por la totera y colocar-se. Nos faciemos bell hordio, y nos ne fuemos de borina por astí.


Ixa estió la mia primer militancia “real”. En l’instituto, de vez, la clica que ibanos chuntas ta las manifestacions, siempre nos metebanos bell nombre de colectivo gracioso, remedando lo que feba DEF CON DOS en los suyos discos. Asinas naixioron lo Komando Jokoso Festivo, u la Asociación Kuidadico Konmigo Ke Soy De Aragón que nunca no pasoron d’una groma u bell pegallo handmade de Pilars.


En tiempo d’adolescent tardaría muito a tornar a sentir-me parte d’una organización. En Resistencia vivié las mias primers reunions, los mios primers cartels y panfletos, y la mia primer militancia. En lo Planta Baja, la vida siguió igual dimpués d’aquell colectivo. Las mesmas zorreras, la mesma mosica y las mesmas pleitinas con los nazis de El Rollo y de dillá. De toda aquella chent, muita acabó en organizacions de toda mena. Atros deixoron la militancia poco dimpués. A belun me lo contino trobando por las luitas y de muitos no n’he tornau a saber cosa.


ACTUALIZACIÓN: Dimpués d’escribir la primer versión d’isto, quedé con un d’os miembros de Resistencia que me confirmó lo nombre d’o colectivo y corrichió bell dato erronio que he sacau d’o texto orichinal. Lo cartel efectivament yera d’una campanya antifaixista pero, por agora, no n’hemos trobau copia.

martes, 28 de agosto de 2018

Historias d'un activista (0). Presentación

Teneba dondiando por la mia capeza dende fa tiempo empecipiar a recontar la mias experiencias en l’activismo, tanto politico, basicament en l’aragonesismo, como cultural, en la defensa de l’aragonés. Me faltaba un chiquet empentón, y una nueit de Pottokeo Aragonando me lo va dar. Asinas que dende agora, a las “Historias d’un cole de mosens” y las “Historias d’un IES publico”, se suman dos nuevas coleccions d’historias: Historias d’un chobenallo y historias d’un estudiant d’aragonés. Iré china-chana calando posts sobre tot lo que me ha iu pasando en totz istos anyos, sobre tot de lo más aluenyau en lo tiempo, que cuento que ye mas intresant y fará mas honra.


Todas dos experiencias empecipioron en calendatas pareixidas. Finals d’os novanta - primers d’os 2000. Estié d’ixos que mercoron tot lo pack: aragonesismo politico, luenga aragonesa, mosica folk, … Tot lo que levaba asociau la Chobenalla d’aquellas envueltas. Agora me pareixe toda una vida, pero en realidat nomas pasé en Chobenalla bell poco mas de quatre anyos. Dimpués sí que continé mas tiempo en Universidat - Colectivo Aragonesista, la organización estudiantil que tenebanos alavez.


Quanto a l’activismo cultural, estié bell tiempo prebando d’aprender aragonés de manera autodidacta, con materials que m’heban deixau y bell libro. Reblé a escape y decidié d’apuntar-me a clases. Acabé en Nogara, a on que cursé los dos cursos que s’ufriban y me’n facié socio malas que los rematé. Afortunadament, Nogara no tenió la mesma suerte que Chobenalla y hue contina estando la mia asociación.


La mia memoria ye horrible. Antimás, diz que lo cerebro humano preba d’amagar las experiencias dolorosas y, beluna d’as cosas que i vivié no estioron precisament dulzas. Prebaré de documentar-me en lo posible, pero la mayoría d’o treballo lo faré con los mios recuerdos, asinas que ye mas que prebable que m’entivoque u dé bell dato malament. Si ye asinas, comentatz-me-lo y prebaré de correchir-lo.

viernes, 24 de agosto de 2018

Modos exquisitos

Mire-se, en ista casa siempre hemos teniu unos modos exquisitos. Quan vienen visitas a cenar, metemos cadaúna d’as piezas d’a cubertería en lo suyo orden. Las forquetas y los cutiellos van perfectament arringleraus y brilan como si fuesen estrelas. Siempre femos servir las formulas de cortesía. “Por favor” y “gracias” son parolas que han d’estar presents de cutio en lo nuestro parlar. Nunca no se puya, en ista casa, la voz por dencima d’o nivel que s’aprecisa pa poder mantener una conversa educada y convenient. ¿Lo vestuache? Siempre elegant, poliu, sin una sola taca y bien planchau. S’ha de notar lo respecto por la persona que tiens debant. Pero sobre tot, lo que nunca, nunca, nunca, s’ha permitiu en ista casa ye que un faixista pase d’o branquil. Asinas que, si me permite, habré de puyar un momentet t’alto a por la escopeta pa coser-le a tiros. Cuento que lo comprenderá. ¿No ye asinas?

Prou que sí. No le importe a vusté fer-me asperar. Tiengo tiempo.

Agora mesmo torno. Prebaré de no fer-le asperar. Muitas gracias por la suya comprensión.

(...)
Disculpe que haiga tardau. Feba tiempo que no la cargaba y heba perdiu lo costumbre. Bueno, pues no sé cómo querrá vusté que faigamos isto. ¿Prefiere correr bell poco? Si le agana, puet suplicar por la suya vida, encara que entenderá que bell tiro le habré de foter.

No sé cómo lo habrán feito atras vegadas. Levo poco tiempo vivindo aquí y encara desconoixco los costumbres locals.

La verdat ye que no bi ha guaire ceremonial. Por aquí, de faixistas, feba tiempo que no en veniba. Puet fer lo que quiera que faigan en la suya tierra.

Alavez creigo que correré bell poco. Deixe-me uns metros, si no le importa. En zagueras me he enreciau y no soi guaire en forma. La vida d’un faixista no deixa tiempo pa ir t’o chimnasio tot lo que me caldría.

Por favor. ¡Faltaría! Ixo sí, si podese no pisar-me las flors en la suya fuyida, le’n agradeixería prou.

Ni se me ocurriría pisar-las, caballero.

Muit bien. No se charre mas alavez. Corra, por favor.

PUM! PUM!

martes, 14 de agosto de 2018

L'alegría de l'activismo

A tu que te fa goyo isto”. Asinas empecipian conversas arrienda con las amistatz que no fan parte de l’activismo politico, social u cultural, quan se refieren a ixos activimos a on que milito. U mesmo a atros que no, pero que fican en ixa mesma taleca “hippie”. Contina la conversa, por un regular, con una demanda d’información u d’aclaración d’o que han leyiu por prensa u les ha arribau por retes, pa que les de unatra envista diferent que no conseguirían por garra atra d’as suyas vías d’información cutianas. Agradeixiu porque me consideren un referent de cosas que no en soi, prebo d’alportar-les la mia opinión u los conoiximientos que pueda ufrir-les. Siempre sin correchir-les ixe “a tu que te fa goyo isto” y preguntando-me si de verdat creyen que m'estimo mas de baixar t'a manifestación que siga a fer una gambada sinsentiu por las carreras zaragozanas, que d'estar-me de charradeta en un bar, leyendo un buen libro u veyendo una buena cinta.

Ye evident que me fan goyo las luengas, y en concreto l’aragonesa. Tamién la historia y la politica prou que sí. Pero no pas l’activismo. Chunto a lo treballo, que me furta ueito horas (¡y gracias!) d’a mia vida, la resta d’o tiempo l’adedico en un porcentache altismo a las asociacions que en foi - u n’he feito - parte y a l'activismo politico, social u cultural. Bellas vegadas pa fer cosas que m’encantan y que faría de toda manera si no i militase, pero muitas atras de pur “mantenimiento”. Reunions eternas, locals que mantener, diners invertius, plataformas por la causa que siga, … Lo voluntariau ye pleno de fayenas incomodas, rutinarias, aburridas y, a soben, improductivas.

Personalment vivo en una contina angunia por no tener tiempo pa fer tot lo que quiero fer. Leyer tot lo que querría leyer, viyer tot lo que querría leyer, aprender mas luengas, viachar ta mas puestos. Agosto ye un d’os meses a on que, en suspender-se lo curso politico, vivo bella semana de mirache a on que tiengo tiempo pa yo mesmo. Pa ixe libro u serie que teneba pendient u pa ixa cursa que nunca no se troba un ratet pa fer-la. Me pregunto si no deixar-lo tot. No voi a tener mainada a qui deixar-les un hipotetico mundo millor. No tiengo una fuerte identidat “d’especie” que me leve a deseyar una vida millor a la futura humanidat. No tiengo un especial sentiu de trascendencia vital ni mica espritualidat. Podría deixar d’encarranyar-me terne que terne por las inchusticias que veigo, asumir que lo mundo ye de mal apanyar, y adedicar-me tot lo tiempo que me queda libre a chupir-me de toda ixa maravillosa cultura que atras van creyar pa que podese disfrutar-la.

Creigo que a soben las que perdemos siempre - no he teniu una victoria politica duradera en dos decadas d’activismo - nos construyimos un relato epico d’as nuestras luitas, porque nos fa falta. “La bellesa de viure la vida sense claudicar” que diz Xavi Sarrià en la suya canción Renaixem. Pa poder vivir en un estau permanent d’accions que nunca no tienen recompensas hemos de convencer-nos de que la propia luita ye una recompensa. Y prou que bi ha momentos maravillosos. Ye cabolioso que tenemos a muita d’a millor chent d’o mundo. Encara que dimpués nos tornen a redotar, u nos traicionen, cada victoria temporal tien una component emocional brutal que remeramos en los momentos a on que dubdamos d’o nuestro compromís. Fendo un simil futbolistico, somos un equipo de segunda que, de cabo ta quan, gana la Champions, pero dimpués le’n furtan y la venden en un azoque.

“A yo no me fa goyo isto”. A yo lo que me fa goyo ye leyer, lo cine, las luengas, los chuegos frikis, lo mont, pasar tiempo con la parella, las amigas, ... cosas asinas. Lo que no puedo ye quedar-me quieto veyendo como se le preta fuego a tantas cosas que amo. Quiero vivir lo que me queda de vida en un mundo con diferents luengas, con diferents paisaches, culturas y mosicas, … Un mundo que no te lo acabes nunca, variau, diverso, creativo, chusto. En unas condicions de vida decents. Sin necesidatz, sin miedos. Si lo mundo fuese como cal, las personas que saben de tot lo que m’importa tendrían tiempo y ganas d’amostrar-me sobre ixo. Y yo tendría tiempo pa aprender con ellas, y no habría d’estar luitando simplament por la nuestra existencia. Por lo dreito a disfrutar d’a diversidat. Si lo mundo fuese como cal, no caldría que pasasenos tantas y tantas horas d'o nuestro tiempo libre luitando por la nuestra calidat de vida y la de tanta chent que sisquiera puet permitir-se "lo luxo" de tener tiempo libre pa luitar por cosa.

Asinas que, escrito isto, desafogau ya, tornaré a escribir-me ixe recontamiento a on que bell diya vencemos a lo capitalismo-heteropatriarcal-acotolador-de-luengas-y-pueblos. Ubriré l’achenda, que ya tenemos setiembre a tocar, y iré marcando los diyas: “asembleya”, “chornada de limpieza”, “vermu solidario”, …. y tornar a empecipiar. Pero iste anyo sí. Iste anyo empecipiarán a cambiar las cosas.

lunes, 6 de agosto de 2018

Johan Ferrandez d'Heredia, Os paisaches de y recomendacions de verano. Tierra de barrenaus 4x12

L'estudio d'a historia d'Aragón en la secundaria ye, en la mia opinión, prou radiu. Pasé por colechio y instituto sin saber que las quatre cosetas prou basicas. Ni me nombroron en totz aquells anyos l'aragonés, ni prou que a Johan Ferrandez d'Heredia, una d'as personas mas importants y influyents d'o sieglo XIV en Aragón. Mesmo ya d'adulto m'ha costau una mica trobar-ne información. Asinas que bien se vale que conoixeba a Guillén Tomás qui conoixe muit bien iste personache y tot lo medievo. Nos explica toda la suya figura y por qué ye tant important pa la chent que amamos y estudiamos l'aragonés.



En la segunda entrevista, Chuserra Barrios nos parla d'o suyo blog "Os paisaches de", un d'os pocos supervivients que continan, terne que terne, escribindo en aragonés. Nos i trobamos con viaches por tot lo mundo, y por luengas arrienda que tienen los suyo propios problemas. Beluns compartius con l'aragonés, belatros bien diferents. Tot ixo, complementau con fotos bien pinchas d'os puestos por a on que viacha.

En acabando lo programa, me permito la bamba de recomendar-tos que fer con lo vuestro tiempo libre d'iste verano. Series, libros, comics, ... entretenimiento de toda mena por si tos aburritz. Y antimás, la nueva sección de "Cancions blasfemas", lo resumen d'o blog y bella mica de mosica.

La temporada ya ye a pocas d'acabar-se, asinas que torno a animar-tos a que m'escribatz contando qué tos ha pareixiu, qué tos ha feito mas goyo y qué no pas y sobre tot, que queretz que faiga en la cinquena temporada que, si no cambio d'horario ni garra atra cosa rara, s'estrenará lo venient 7 d'octubre. Pero antes de tot ixo, lo programa de setiembre, con Ruben, Dabi y totz los TEMAZOS.