Callar debant d'as ababoladas

Un diya quedas con una persona pa fer cosas d'as que femos los activistas. No fetz pacha, pero ye lo que toca. A la fin d'a conversa, como un simple comentario, diz una ababolada. Ye un simple slogan, sin guaire conteniu, y no le das mica importancia. "¡Qué simpleza s'ha fotiu!", te piensas, y continas con las tuyas historias, como si no heses sentiu cosa. Bell tiempo dimpués, tos escunzatz unatra vegada, en atro contexto. Fa un comentario que complementa la primer ababolada. Que le anyade argumentación. "¡Bem! Nian ell puet creyer-se de verdat ixa ixautada", te piensas. Y te callas porque bi ha fayena que acabar. "Ya se le pasará..."

Poco tiempo dimpués veyes que ixe slogan s'ha reproduciu, y agora prene diversas formas. Tres u quatre gracietas por aquí y por allá, comentarios por los retz, por los grupos de whatsapp... La ideya simpla y de buen vulcar que hebas sentiu bell mes antes ha iu fendo-se un feble tarabidau. Encara se puet vulcar facilment, pero piensas que ye imposible que garra ser intelichent se minche argumentacions tant fatas. Que se escupa en la cara. Que se faiga un hara-kiri. Pero veteme que sí. Que i hai chent que pareixe lemmings, tot caminando enta fuesa y fendo que la resta de simpaticos rosigadors le i sigan. Belún ye un carnuz que nunca no tenió guaires luces. No se te fa raro que se minche ixa buenya, u qualsiquier atra que le sirvan. Belatro sí que te fa burro falso. Le creyebas con mas criterio. U simplament con criterio propio.

A la fin, ixa fatera que sintiés un diya qualsiquier s'ha tornau un problema y piensas en todas las vegadas que te callés. Que no respondiés, que no contraargumentés, que subestimés lo poder d'os slogans u sobrestimés la intelichencia d'a chent. "Si le hese dito..., si hese escrito..., si hese avisau...". Piensas en todas las personas que, como tu mesmo, calloron. Que no actuoron quan yera muito mas facil por ixe temor - innato u aprendiu, ixo no lo sé - que tenemos a la confrontación d'ideyas. Piensas tamién en si belún empioró la situación con contraargumentacions zaborreras, feitas en mals momentos, en medios inadequaus, u con malos modos.

No podemos estar alerta 24/7. No podemos responder toda la ripa de fateras que sentimos cada diya porque ye de tot acotolador. Talment, pa optimizar la nuestra eficiencia, habríanos d'aprender a veyer en qué ocasions hemos de contestar, en qué momentos ye menester una respuesta a l'inte y en quals ye millor una razonada y argumentada tiempo dimpués. Barrunto que la clau ye mas en saber quán, cómo y a quí responder -por un regular bi ha un nuclio que piensa y una clica que no fa que repetir lo que piensa ixe nuclio - que en fer-lo a tot trance y en tot contexto.