9x6=54

Beyer a TB asoben ye una tortura, pero muitas begadas me fa goyo amortar l’esmo, dixar-lo esenchegau y babear y estormacar lo que a TB m’esgargalle. Fa poco yera beyendo o programa nuevo de Ramonchu an que un adulto ha de responder preguntas de ninos de Primaria. Que a más gran parti d’os que i salen no sepan contestar a muitas preguntas de seguras ye un siñal de cuanto utils ta la bida adulta son as cosas que nos amostran en a escuela primaria pero ye de dar que bi ha cosas que os ninos han d’aprender y que en a bida cutiana son alazetals. U ixo creyeba yo….

A custión ye que un ombre de bels trenta años que ye estudiando filolochía abió de concarar una pregunta de zinqueno de primaria sobre matematicas. A pregunta yera, alto u baxo: Fulanito y Menganito tienen 54 mazanas. Fulanito en pilla 2/6 d’as mazanas y Menganito 3/6. Cuantas mazanas tien cadagún?

No ye como atras preguntas que i salión como “cuantos güesos bi ha en un umano?” un en que año puyó t’o trono nosequí?. Ixas cosas, se xublidan ascape en no emplegar-se de contino y podemos saber-las alto u baxo… Sé que bi ha bels 200 güesos en o cuerpo umano u que Felipe I (II de Castiella) yera Rei en 1591, pero no sé esautamen cuantos güesos tenemos ni cuan puyó t’o trono Felipe I. Pero sé, y se suposa que toda a chen que aiga pasau por a escuela u mesmo aiga estau bel diya en un bar d’os que bi ha a o canto de todas as escuelas sabe sumar, restar, multiplicar y dibidir numero simples sin fer serbir a calculadora.

Pos l’ombre iste abió de fer serbir un comodín y nian gosó dar una rispuesta amanada. Nos trobamos con ixe gran problema de un numero dibisible por 6 que antimas da de coziente unatro numero d’una zifra. Alabez l’ombre iste no sabe ni a tabla d’o 6 ni a d’o 9. No sabe qué sinnifica un “crebau” . No sabe dibibir ni multiplicar. Tien trentaidos años, ye fendo una carrera unibersitaria, ha pasau por a escuela (por ixa d’antismas que diz que se i amostraban millor as cosas y no agora, con istos royos) y NO SABE MULTIPLICAR NI DIBIDIR.

Iste ye o conoxiu “fracaso escolar”. Que una persona “educada” no sepa multiplicar ni dibidir numers d’una zifra. Pero a razons d’a fracaso escolar ta muitos son os emigrans, l’amostranza ta la ziudadanía y atrás fateras asinas….

Por zierto, si no ese sabiu qui escribió o Quixote, ye prebable que ese aparexiu en toz os zappings d’as TB’s, pero como “as matematicas son muito difizils”, ixo rai!. Creigo que cal saber qui escribió o Quixote y que cal tener una ambiesta y unos conoximientos chenerals d’Istoria, Luenga, Literatura y todas as “Zienzias Sozials”, pero parix que poca chen beye menister que a chen sepa multiplicar y dibidir. Y isto, encara que pueda parixer una chanzeta u bella cosa t’arreguir-se-ne, creigo que ye un granizo problema de toz. Que iste ombre podría aber estau mainate d’a Expo y, quemisió…, encargar-se de mercar os barcos ta esnabesar l’Ebro, por exemplo…