Conchelar #Inktober 4

Jordi ya no se moveba. Yera definitivament muerto por conchelación. Seguntes le dase la radida luz de sol que traviesaba las boiras sobre aquella montanya de l’Himalaya, lo suyo cenyo cambiaba de tot. En uns momentos yera d’infinita paz, como si en deixar de tremolar s’hese feito un con la nieu y lo mont. En atros, puro espanto d’haber de concarar la muerte, de descubrir a la fin si lo dios en que tanto creyeba sería aguardando-le a l’atro canto d’a vida terrena.

Xavi sabeba que dimpués le tocaba a ell. ¡S’heban quedau tant cerca d’a tuca! Debaixo d’a gran roca que les heba serviu pa acubillar-se d’a tronada remandría lo suyo calavre pa cutio. Servindo de marca pa los siguients escaladors. “Quan arribes a los catalans conchelaus, no te quedará que tres horas de puyada” esmachinó que dirían las siguients expedicions. Lo sinyal que portiaban ta fer-se fotos chaceba largo chunto a ell.

Decidió adedicar ixas zaguers horas de vida a remerar a los suyos sers querius. La suya parella, que tanta alegría le heba aportau. Pai y mai, que tanto se preocupaban cada vegada que marchaba t’a montanya. Toda la clica d’o barrio, los companyers d’a universidat… Se despidió mentalment de totz, deseyando que bella mena de machia nepalí les transmitise totz ixos pensamientos.

La muerte no arribaba y lo suyo tozuel esbarró enta atros camins mas banals. Nunca no sabría como acababa la suya serie favorita, ni tornaría a ir t’o festival de teatro que feban en lo lugar d’a o canto. Lo puzzle d’o Guernica se quedaría a metat, con mas de cincocientas piezas sin colocar. ¿Qué pasaría con las suyas cuentas d’os retz socials?

Zarró los uellos. No en podeba mas. Rebló. Sobre un fundo negro, imachens de sers mitolochicos pasaban por la suya capeza. Debuixos sin sentiu. Formas cheometricament imposibles. Y a la fin una voz. “Creigo que iste ye vivo. Sí, tien lo pulso feble, pero ye vivo. Dispierta, dispierta”. Una man le trucaba lo caixo. Ubrió los uellos. De nuevas la luz. Le costaba mesmo alentar. A l’endrecho un montanyer que dende la suya envista pareixeba un mallo.

“¿Asinas que catalans, eh?” estioron las zaguers parolas que sintió.

Iste relato fa parte de l'Inktober literario en aragonés de 2019. 

Cibo #Inktober 3

Trentaidos pecadors heba ninviau ta l’infierno en ixa semana especialment productiva. L’anchel lo teneba bien facil en zagueras. Una zagaleta chovena le cucaba lo uello a ixe hombraz, quarentón y fracasau, y en un petén lo teneba prebando de cometer adulterio. Una cartera se quedaba en una mesa d’un bar, con un billet de doscientos acucutando y siempre amaneixeba belun con las mans largas, prestas pa furtar uns diners que no s’heba ganau. Bells quantos problemas de salut que pasasen de vez en la familia d’a persona mas cristiana, yeran prou pa que dubdase d’a suya fé. Los cibos yeran tant evidents que no entendeba como los humanos se los minchaban con tanta facilidat. Cómo no sospeitaban que ixe lamín que se les meteba a man yera una preba divina, una tentación como las que heba resistiu lo suyo propio chefe en pasar por la Tierra.

Con un mas arribaría a los trentaitres. L’obchectivo fixau por la circular Triginta tres peccatores que le faría puyar un puesto en la escala d’os anchels. Ya se podeba esmachinar, muito mas cerca de Dios Pai, con una nueva aureola dencima d’os suyos encaragolaus y royos pels, y una nueva ringlera de plumas que fesen mas amplas y magnificas las suyas alas.

Quan fació que lo chefe dase palleta a ixe desesperau piquero, pleno de deudas, recient esburciau y con la escopeta en l’auto ya que pensaba marchar a cazar perdiganas dimpués d’o treballo, sabeba que acabaría fotendo-le buen tiro. La basa de sangre d’empresario s’iba esparraficando en lo solero de l’estudiat entre que l’anchel anotaba lo nombre d’o pecador en lo suyo formulario. Con un riso en la cara pretó lo botón d’o boligrafo recullindo la carga de tinta y dició: “con iste, ya en son trentaitres, Sinyor. Obchectivo cumpliu. Quan quieras.”

Dios s’heba estau la zaguer hora alufrando-lo por lo ret interno. Minchando ganchitos y crispetas entre que veyeba a l’anchel, a ixe previsible anchel, minchar-se lo cibo d’a circular Triginta tres peccatores. Cinquantaiseis anchels ninviaus ta l’infierno por angluiciosos que levaba en aquella semana especialment productiva .

Iste relato fa parte de l'Inktober literario en aragonés de 2019. 

Carnuz #Inktober 2

Aquell día los carnuces voloron, y como ell heba sospeitau que pasaría, no se veyeba lo sol. Tot un clis de carnucería heba enfoscau l’astro rei. Los suyos companyers de treballo s’heban iu puyando ent’o ciel. China-chana en primeras y mas aprisa dimpués. Quan topetaban en lo teito d’a oficina, bella corrient d’aire los menaba ent’as finestras por a on que saliban pa unir-se con los suyos camaradas de radiu cocient intelectual. Dende la siella d’o suyo puesto veyeba pasar chent de contino: lo botiguer, que siempre que le daba un billet gran, farfallaba: “¿No podría haber-lo cambiau en lo bar? - Sienta, que si no quier, ya me mercaré la depeixa en atro cabo - No, hombre, no. Le’n cambeo, pero…”; lo suyo primo, que en todas las chentas familiars heba de parlar d’o tema tabú que pertocase ixe día. Que si lo procés, que si la manada, que si lo casoplón d’o codetas; la vecina, la d’o cocho que no deixaba d’escanyutar, fendo la ploramica por horas cada vegada que saliba de casa.

Totz flotaban sobre la ciudat. Como quan en fiestas la policía encorre a lo chitán que vende los globos de personaches de televisión y, en aventar-los pa poder fuyir, imple lo ciel de coloretas. En primeras se sentiba chilos d’espanto. “¿Qué me pasa? ¿Por qué floto?”. Belún, de fundas creyencias relichiosas, pensaba que se reuniba con lo suyo creyador: “¡Voi t’allá, Chesús. A la fin has feito caso d’as mías rogativas!”. Dimpués, tot silencio. Si belún tartiba astí alto, abaixo no arribaba lo soniu d’as suyas parolas.

Se’n baixó t’a carrera salindo d’a oficina. Astí yera la crèm de la crèm. Los saputaces, los listos, la elite. Los que sabeban realment cómo funcionaban las cosas. Mirando-se ent’o ciel, sabedors de que en un plazo breu de tiempo trobarían explicación a lo fenomeno d’os “carnuces voladors”, como ya lo heban baltizau. Un riso en todas las suyas caras feba d’ells una alegre comunidat.

Miranda yera a l’atro canto d’a carrera. Agora tendrían tiempo pa charrar sin tanto sorol molestando-les. Fació un paso pa ir a trobar-la y paró cuenta de que garra d’os suyos dos peus yera ya tocando tierra. Caminaba a un palmo d’o gudrón que bi heba entre ixas dos ceras. Prebó de fer peso con lo cuerpo, de que la baixada d’o peu dreito arrocegase la resta d’os suyos ueitanta kilogramos. S’elevó unatro palmo y lo suyo riso empecipió a cayer. La boca pasó de fer una “u” a una “n”. Miranda, con un suau movimiento d’o cuello, se chiró ignorando-lo entre que puyaba y puyaba.

Pero si ell no yera un carnuz, ¿por qué volaba? Seguiba sin veyer lo sol que la primer furnada de carnuces heba tapau feba rato ya, pero barruntaba que luego sentiría unatra vegada la suya calor.

Iste relato fa parte de l'Inktober literario en aragonés de 2019. 

Aniello #Inktober 1

No me l’explico. Siempre he tractau bien a totz los mios tigres, pero sobre tot a ell. Dende que yera chiquet, quan chugaba con ixe gran chubillo de lana roya que le chitaba pa que ise aprendendo los primers trucos. De minchanga, nunca no le’n ha faltau. Pareixeba tant contento siempre. Puyando las escaleras, blincando por dencima d’a paret de fusta, y mesmo pasando a traviés de l’aniello de fuego. ¡Con tot lo miedo que le feba en primeras y lo que me costó que lo conseguise!

Le cambiaba l’augua totz los días. De todas las gavias d’o circo, a fe que la suya yera la mas escoscada. Nian lo capé. Mesmo le deixe gatir con la tigresa aquella d’o zoo. ¡Buenas perras me costó sobornar a lo guardia!

Pero be d’estar que los tigres son uns desagradeixius. Astí lo tiens, con una garra pisando-me la man d’a zurriaga entre que se mincha los mios bodiellos. Siento cada lapada d’ixa aspra luenga por totz los mios organos, agora a l’aire, y me pregunto porque no he perdiu l’esmo fa rato.

Iste relato fa parte de l'Inktober literario en aragonés de 2019. 

Cursos d'aragonés y Pilars. Tierra de barrenaus 6x02

En Zaragoza, en lo mes de setiembre, va tot a monico. Sí, ha empecipiau lo curso. Pero no, no ha empecipiau de verdat. Cal aguardar a Pilars. Tot ye "pa dimpués de fiestas". Las clases serias en totz los nivels educativos empecipian a metat d'octubre, las grans produccions, la fayena asociativa, lo curso politico...

Asinas que en iste cambio de mes toca charrar d'o futuro mas inmediato. Empecipiamos con los Cursos d'aragonés de l'Asociación Cultural Nogara, que iste anyo prencipiarán chusto dimpués d'os Pilars, una miqueta antes d'o que teneban costumbre. Mario y Paula nos acercarán toda la suya propuesta educativa dende l'anvista d'un mayestro y una alumna.

No cal que explique en iste blog lo important que ye la Fiesta Mayor de Zaragoza pa yo. En iste anyo, he quiesto que me recontasetz las vuestras ideyas pa fiestas, asinas que facié un clamamiento en forma d'o video que tiens penchau contino. Replegué las vuestras respuestas, una d'ellas en lo video que puetz veyer mas abaixo, y han quedau bellas quantas propuestas bien intresants y, sobre tot, maneras diferents de concarar istos diyas. 

Y como siempre, mas mosica, mas aragonés y mas loquerías. Aspero que tos faiga muito goyo y que continetz ninviando las vuestras opinions, propuestas y aportacions!

Naixiu d'Aragón (Cantando No puc deixar-te, de Auxili)

"Ací no em pariren, però ací estic, ací visc orgullós i agraït de que em volgueres acollir". (No puc deixar-te. Auxili)

I hai, en l'imachinario colectivo, bella mena d'autoridat que te da naixer d'un puesto. Pareixe como si ixos primers dias d'a vida tuya marcasen pa cutio la tuya existencia. Como si imprentasen en lo tuyo ADN una serie de caracteristicas imborrables y inmutables que definirán la tuya identidat la resta d'a tuya existencia. Pa estar "d'un puesto", no ye prou con haber viviu astí, con desfender-lo u con pagar-ie impuestos. S'aprecisa ixe certificau de naiximiento, u mesmo que los tuyos antepasaus tamién sigan d'o lugar, barrio u ciudat. Los famosos ueito apellius acumulaus a lo nacionalismo vasco.

D'eixemplos en tenemos a pirol en lo país nuestro cada vegada que se parla de Catalunya. ¿Quantas vegadas habremos sentiu desacreditar a Carod Rovira u a muitos atros politicos independentistas por tener orichens en Aragón? Las radices d'una tienen la importancia que cada ún les quiera dar. Y la identidat no ha d'estar vinclada necesariament a lo puesto d'a on que se naixió. Ni sisquiá a on que se creixió.

Tornando ta l'eixemplo catalán, tenemos toda una cheneración d'independentistas con una graniza variedat de circumstancias personals. Fillas y nietas de chent venida d'atras partes de l'estau y d'o mundo, comparten militancia con milenta personas que pareixen descendients d'o mesmo Rafael Casanova. Muitas d'ixas migradas troboron en Catalunya un puesto que las acubilló, con una cultura que talment no tetasen en casa, pero que acarrazoron con rasmia. A sobén, con muito mas carinyo que las propias d'o lugar.

En Aragón, ixe fenomeno tien atras coordenadas. Dos d'as personas que conoixco que mas han treballau por lo país, no tienen las suyas radices familiars aqui. Por las aulas de Nogara, i ha pasau chent de procedencias bien diversas, con a-saber-las ganas d'aprender aragonés y de chupir-se d'a nuestra cultura tradicional.  Bien a ormino son la chent "de difuera" las que mas s'intresan por tot lo nuestro y lo fan suyo tamién.

Un compa de l'instituto se casó t'Andalucía. La suya parella vinió a visitar Albarrazín. Embacilada por la polideza d'o lugar, le'n comentó a la suya suegra, qui respondió con un breu: "Bueno, sí, ye mahico". La zagala se feba cruces por lo poco que valuramos lo nuestro patrimonio. Talment si se'n venise a vivir t'aquí, se tornaría una d'ixas defensoras de l'aragonés que, arribadas dende difuera, aprecian lo que nusatras tant a sobén veyemos como poco important.

Talment lo nuestro saldo migratorio negativo ye un mas d'os tantos entrepuces que hemos teniu pa la construcción d'una identidat aragonesa que valure lo suyo patrimonio historico, cultural y lingüistico. Talment las personas que han habiu d'ixopar son fendo ixe treballo difuera, y no en tenemos prou de difuera que viengan a trucar-nos y avisar-nos d'as cosas tant repolidas que tenemos aquí.

Pa forro de bota, muitas siguen tenendo ixa envista tant negativa de que si no yes de bell puesto pareixes tener menos dreito - u mesmo no tener-ne - a desfender la suya cultura, patrimonio u tradicions. ¡Guarda si nos femos la bamba las aragonesas d'estar acullidoras! Pero encara en 2019 i hai qui demanda lo libro de familia a la hora de considerar-te "autentica" de tal u qual causa.

Soi naixiu d'aqui, igual como pai, mai, y totz los yayos mios. No conoixco garra ascendent mio naixiu de difuera d'o país, y mesmo muit pocos de difuera de Zaragoza. Y no por ixo tiengo mas u menos dreito que garra atra persona a lo nuestro patrimonio, luenga, identidat, cultura y historia. Sisquiá bi hese mas "recient arribaus" como belún d'os que conoixco, y menos "argüellosos d'estar aragoneses" de culicaiga.

Empecipia la temporada! Tierra de barrenaus 6x01

Levamos mas d'un mes sin Tierra de barrenaus radio y ya trobaba a faltar recontar-tos las mias cosetas a traviés d'as ondas. Empecipia una nueva temporada. Todas han sufierto cambios en los contenius y en lo planteamiento, pero en iste curso foi un punto d'inflexión con un formato nuevo y con ganas de dar-le un chiro a lo programa que aspero que tos faiga firme goyo.



Empecipiamos temporada con una entrevista a una d'ixas personas que no deixa de mover-se ni un segundo. Chorche Paniello visita Tierra de barrenaus radio pa charrar d'a Feria de coleccionismo Replega que se celebró lo 31 d'agosto y 1 de setiembre en Monzón. Un evento que fa la suya 16ena edición bien consolidau y con a-saber-lo futuro.

Antimás, en iste nuevo formato d'una hora, leigo un relato y tos presiento bell par de cancions. Una d'ellas adintro d'una nueva sección que se prolargará toda la temporada. La mosica en iste curso prene mas importancia adintro d'o programa.

Siempre aspero las vuestras opinions y aportacions, pero mesmo mas en ista nueva temporada a on que i hai tantos cambios. Ya puetz sentir Tierra de barrenaus radio los lunes de 19:00 a 20:00 en Radio Topo y quan quieras en lo blog, en la mia cuenta de Ivoox, u en la web de Radio Topo.