Conziertos, agua y istorias...

Como siempre, qui tien ganas de fer cosas no s'aburre ni en Zaragoza en o berano d'a Expo. Malas que remató as fiesta d'a Madalena, se fazió o Zaragoza Ciudad, Festibal que no podié ir-ie y ya me florió.... porque teneba asabelas ganas de beyer a Jash'ta con o nuebo disco suyo. Cal dezir que qui no lo aiga ascuitau que lo faiga de camín, que ye buenizo de tot.

Pues agora, ta no ir t'o treballo descansau garra diya, arrienda asoziazions han organizau una semana conziertos y charradas que se diz "Foro mundial de las luchas del agua". I son muitas d'as asoziazions que leban años luitando por a nueba cultura de l'augua y contra a especulazión. Encara que bi ha cosas que se podrían fer d'atra traza y tot ixo - que ya me sé a charrada que me foterá más d'un - a cosa ye que mientres una semana bi abrá charradetas en a Casa d'a muller y conziertos en a Plaza San Bruno. Rebell Spell, Lurte u los Bufacalibos por exemplo, ta rematar con a Ronda de Boltaña. Istos zaguers tamién serán en o PIR. Uffffff! Cuantas cosas, que poco tiempo y cuantismo reseco que aguantar...

T'o PIR, prebaremos d'ir-ie, pos parix que ye un d'os millors en bels años. A lo menos a primeras. Y tot ixo a tamás d'o catenazo de meter a Labordeta a la una d'o maitín. Xublidando o folki u no que pueda estar Labordeta, a suya calidat mosical u atras istorias, chico, a la una d'o maitín... como que no...

Como, con tot y con ixo, en o PIR, lo que menos importa son as collas de mosica, de seguras que i pasaremos un buen ratet.

The Sisters

Remerando biellos tiempos fa poco, remeré a ista colla, The Sisters of Mercy, que tantismos buenos ratez me fazió pasar. Como Youtube ye más gran que a Enciclopedia Britanica ta muitismas cosa, prou que bi he trobau buena cosa de bideos d'els. Asinas que pencharé uno d'os millors bideos "This corrosion" y una d'as millors cantas "1959". Si no los conoxez, paraz cuenta, porque son d'ixas collas que no s'abrían d'aber deseparau nunca...

This Corrosion

1959

Fiestas en o bico

En bellas pocas oras seremos de fiestas en o bico. A la fin, dimpués de cuasi un año, ya son plegadas as fiestas d'o bico. Y como, por agora, no tiengo treballo, caldrá borinear bella mica, u qué?, que de tiempo bi'n abrá ta no poder fer-lo. O programa repite muitas d'as actibidaz d'atros años, como a corrida lenta de bizis, o cabaret u as rancheras y corridos (mejicans) de K-Pintas. Se i adiben atras nuebas como as que organiza Nogara, que antimás d'a tradizional chenta popular d'o miercols, ferá una obra de teyatro en a Plaza San Agustín. Se diz "O yayo bolador" y, qui l'ha bista, diz que ye asabelo dibertida. Tamién se ferá a presentazión d'o libro, escrito en catalán, ‘Em dic Mireia i el meu cony es diu Carlitos’, de Manel Riu. Encara que no aparix en o programa ofizial por custions de tiempo, ye aintro d'a programazión y se ferá o diya 27 de chunio a las 20:00. Tamién ye una sobrebuena enchaquia ta achuntar-nos os aragonesofablans y platiquiar bel poquet. Y si dimpués cal marchar de zorrera, pos bienga!

Ista nuei, podremos prenzipiar bien fuerte as fiestas con o cross, a traca y a "berbena en lata" que Komando Güebo organiza en o Parque Bruil. Y con o diya que ye fendo, parix que a nuei será larga... O programa lo podez pillar en muitos d'os locals y bars de a Madalena y en ista web.

Cabo de semana

Iste ye un d'ixos cabos de semana que no son ta escansar. Boriner, como os buenos cabos de semana de berano, prenzipia con un conzierto en contra d'a Expo. A tamás de que as collas no me faigan masiau goyo, más que más porque a la metat nian las conoxco, a enchaquia d'o conzierto ye prou ta ir-ie. O conzierto, antimás y como os buenos conziertos de berano, será a l'aire libre, en a Plaza Asso, d'o zaragozano bico-lugar d'a Madalena.

Caldrá alzar bella cosa de rasmia ta lo sabado, que en o Zentro Zibico Unibersidat ye o conzierto presentazión d'os nuebos discos de Draps y Prau, que de seguras que serán tan buenos u mesmo millor que os zagueros. Y ya que escribo sobre os Draps aprofeito ta remerar-le a uno que sé que de cabo ta cuan me leye que tien o disco mio d'os Draps, so boque!. Asperemos que nos trobemos en o conzierto... Pencho os cartels, que ya sabez que no adubo ta guaire más....

Gambadiando

Cuan o tiempo libre ye más que un luxo, una simpla gambada en bizi por as riberas zaragozanas d'a Uerba y l'Ebro, parix (y en ye) millor que un biache ta Paris. Y asinas pasó fa bels diyas, un poquet antis d'a crexida gran que tenió l'Ebro, pero cuan ya se uloraba. Parix que a Pai (Ebro) isto d'a Expo y d'os trabases enta Barcelona no l'han feito mica goyo y preba d'imbiar-los a muyir fardachos. Con bella cosa d'esito, cal dizir... Pos ya ha conseguiu que no bi aiga minitrasbase y que no se faiga a cosa ixa que quereban fer ta enguerar a Expo.

Encara que isto no ye un fotolog, ni preba d'estar-ne, ni yo soi fotografo, ni prebo d'estar-ne, contino pencho bellas fotos, que tiré ixe diya y que me parixen, a lo menos, curiosas. (Si bi punchaz, se fan más grans)

Baxo lo sol... sisquiá

Cuan se prenzipia un nuebo treballo y, más que más, cuan ye muito diferén d'o que s'ha feito dica alabez, te trobas con muitas sorpresas. En o caso mio o cambios son estaus muitos y grans. M'he trobau de bote y boleyo treballando as güeito oras de contino, que nunca no lo eba feito y, antimás, cuasi todas baxo tierra. A cuasi tot ya me i he feito, pero nunca no pensé que ise a trobar tantismo a faltar lo sol y l'aire. Y no ye por estar un jipi, que sé que belún que me lei de cabo ta cuan ya será gomecando de fastio. Charrando con otris, tamién m'han charrau d'a mesma sensazión. Más que más, cuan les han cambiau de puesto de treballo y antis yeran en bel edifizio con finestras.

Cuan salimos d'o cobaxo an que treballamos gosamos mirar-nos con sorpresa pos, con l'orache que ye fendo, asoben te trobas con que ha plebiu arrienda, ha saliu lo sol u bes-te-ne tú a saber en ixas oras que "has faltau d'o mundo". Siempre dezimos que puestar que bel diya marchemos d'o treballo y en salir ta l'esterior nos trobemos con que o mundo ha plegau en a suya fin y no bi ha que zombies mincha zerebros por as carreras. (U talmén ya siga asinas....).

Me parix a yo que, con iste treballo m'han cambiau güellos por coda, en toz os sentius, pos mesmo me siento igual como un top.

Ocupatos

Por si no ye prou con beyer toz os diyas ent'o nuestro arredol ta para cuenta d'a colonizazión y ocupazión cultural que tenemos, mientres quemisió cuantos diyas la fan bistera con isto d'os trastes de matar por Independenzia y lo Parque Gran. En pocos diyas se chunta tot lo pior: lo militar, lo españolazo, a monarquía... y ye que a la fin tot ye parti d'a mesma maquinaria. He sentiu, y me pienso que con lo fato que somos será berdat, que quieren meter un siñal d'ixos chigans d'Espanja a o canto d'o chustizia. Si ye por incultura u por endizcar-nos, ni lo sé ni lo quiero saber y no en escribiré guaire por si m'acusan de bel delito, que en istos diyas pre expo bes-te-ne tu a saber...

De lo d'o siñal encara no sé si bel coleutibo ferá cosa. Sobre l'afer d'os militars, a tamás d'estar espenchau de tot lo que pasa en ista Inmortal Ziudat (de la Paz, ta más INRI), se han montau bellas cosetas ta que sepan que no remaniremos quedos. O binclo lo tenez, por exemplo, aqui:

Dende A Enrestida han feito un bideo - manifiesto tamién prou majo y, cal dezir, que muito bien feito, que a suyas oras l'abrá costau a qui seiga. Tos lo pencho abaxo tamién: