domingo, 26 de noviembre de 2017

Un futuro grafico pa l'aragones?

Ya ha pasau nueu meses dende que se presentase en la Biblioteca d'Aragón de Zaragoza un documento clamau "Una grafía común para el aragonés y sus variedades". La historia de como se plegó en ixe documento ye larga y tenetz documentación arrienda, pero cal recordar que se prenió como partes d'o "conflicto", con buen criterio en la mia opinión, a las tres asociacions con propuesta grafica propia. Ye decir, Consello d'a Fabla Aragonesa (CFA), Estudio de Filología Aragonesa (EFA) y Sociedad de Lingüística Aragonesa (SLA).

Lo debantdito documento pretendeba estar una grafía de consenso que fese toda la comunidat de fablants d'ista polida y maltractada luenga. Poco tiempo dimpués d'a suya presentación, tanto EFA como SLA anuncioron que no la farían servir. Por lo que sé, CFA tamién ha decidiu no fer-la servir como organización. De las grans asociacions adedicadas en exclusiva a l'aragonés, nomas Fablans, s'ha amostrau a favor d'ixa grafia. D'a chent que gosabanos (y gosamos) d'escribir en aragonés, una parte muit chiqueta la ha presa como propia. Lo mesmo Director Cheneral, "quitaba fierro" a la prebatina de grafía, aclarindo, en siede parlamentaria, que se tractaba nomas d'un "informe d'unos expertos". Asinas que ixe fullo y meyo publicau en lo BOA, con la suya corrección posterior, a la fin ni ye grafía, ni ye de consenso.

Ye una graniza pena que s'haiga deixau pasar unatra oportunidat de plegar en un alcuerdo grafico. Ye una d'as cosas mas urchents en la normalización d'a nuestra luenga. Pero pareixe que habremos d'asperar bell anyo mas. Tot lo que ha pasau en iste tiempo, creigo que mereixe bella reflexión.

La primera ye que cal aprender d'as errors. La ideya de prener a tres expertos independients pa que decidisen sobre l'afer grafico, a priori, yera buena. Lo desarrollo no pas tanto. Ye evident que no bi ha habiu comunicación, u a lo menos no prou, con las organizacions. Por lo que sabemos, ni entre lo expertos. La ideya d'a mediación externa yera innovadera y con gran potencial, pero pa mediar cal que i sigan presents las partes.

Tenemos atros temas rusients con envistas muit diferents entre las sensibilidatz presents en lo mundo de l'aragonés: autoridat lingüistica, marco europeu, ... La oportunidat de resolver lo conflicto grafico en ista lechislatura ya ha pasau, pero encara somos a tiempo de trobar solucions pa la resta. Si se torna a prener solucions sin contar con todas las sensibilidatz, tornaremos a trobar-nos con unatro fracaso. Qualsiquier mida que se prenga asinas tendrá de durada lo que la lechislatura, u nian ixo. Una autoridat lingüistica no reconoixida, tendrá la mesma utilidat que una grafia que no fa servir dengún. Se podrá vender como logro politico, y prou que tendrá la suya clica d'aplaudidors, pero honra, no le'n fará a l'aragonés.

D'a derogación d'a lei de no-luengas d'o LAPAPYP, ya no en charro mas. Una pena que, tot y tenendo mayoría parlamentaria los partius que levaban en lo programa fer-ne una nueva (PSOE, Podemos, CHA y IU), y fendo ixa reforma parte d'o programa de gubierno PSOE - CHA (punto 22), haigan decidiu continar con la discriminación lingüistica en iste país nuestro. Habrán d'explicar quan y por qué decidioron no cumplir con ixe punto d'o programa.

L'atra reflexión que cal fer, ye arredol de trobar una solución a lo conflicto grafico, que contina pendient. Si pa bella cosa ha serviu iste proceso empentau por la DGPL ye pa fixar bella posición y pa que la chent se significase publicament. ¿Queda espacio pa una futura negociación? Amplos sectors de EFA y SLA han amostrau que entre las dos grafías se puet trobar puents. Pero, ¿qué espacio ha deixau CFA? La grafía DGPL, como lo propio president de CFA reconoixió, ye basicament, la d'o 87 con v. (5) Manimenos, ixa organización no la ha presa como propia y contina fendo servir la d'o 87, ya quasi en solitario. Alavez, ¿en qué exactament yera disposau a reblar? U 87 u cosa? Qué ye negociable graficament pa CFA? No son preguntas retoricas, que conste.

Me niego a reblar y creyer que no bi ha solución, u que a sola solución ye la obediencia ciega y acritica a unas politicas que muitas entendemos que no resuelven, u mesmo agravan los problemas que ya tien a luenga. Somos a tiempo de aturar, reflexionar y empecipiar a trobar solucions de verdat, acceptadas por todas, u lo menos por una ampla mayoría. U, en iste tema, habremos perdiu unatra lechislatura.

2 comentarios:

Alparzero dijo...

Quiesto compañer:

Bi ha cosas que no m’acaban de cuadrar. Por un costau, entiendo que todas as partis tienen intrés en que l’aragonés tienga o peso que se merexe. Por atro, trobamos personas/entidaz que no reblan mica.

Pensar que una lengua tan minoritaria, minorizada y que ye en as tres piedretas puede tener mas d’una grafía ye mirar-se o melico mientres un tierratremo nos apedeca. Á pocas, una parti no tiene intinzión de rebiscolar lo nuestro, asinas que no cuente con yo.

Buscar fallas en o prozeso pa plegar en ixa “grafía común” sigue estando una (mala) desincusa pa no dar-se. Á yo tampoco no me cuaca y soi cretico, pero entiendo que no fer-la servir ye alimentar á una de as dos partis y torno á dizir que á pocas, una d’ellas no tiene intinzión de rebiscolar lo nuestro.

A soziedat aragonesa no ha siu capable de resolver iste problema y como parti que i soi, m’apena. No nos queda atra que azeptar a soluzión instituzional como mal menor.

Mientres que á pocas, una parti no tienga intinzión d’azeptar que no tiene toda la razón, ya podemos fer cualcosa la resta de a soziedat u o gubierno, que será treballar de baldes.


.--

Barrenau dijo...

No entiendo guaire bien lo que dices. Fas una separación entre dos partis (una que "no tien intención de reviscolar lo nuestro") y atra, que cuento que será la DGPL (que be de tener-lo.
Como m'entrefilo que sabrás, isto no ye una cosa entre dos bandos, sino entre muitos. Sisquiá no bi hese que dos partes! Precisament creigo que ixo ye una d'as cosas que hemos de tener en cuenta. Ta bien y ta mal, lo movimiento en desfensa de l'aragonés ye bien diverso y tien muitas sensibilidatz. No nomas dos. Y qualsiquier cosa que se faiga sin contar con todas u lo menos la mayoría d'ixas sensibilidatz ye condenada a fracasar. Como han fracasau en mayor u menor mida todas as prebatinas que no han contau con un refirme masivo.
Y bueno, cuanto a lo de que una parte no tienga intención de "reviscolar lo nuestro", creigo que ye un chuicio de valor muit inchusto. Por muito que yo creiga que la estratechia d'a DGPL u de l'asociación X, Y u Z son entivocadas, no voi a meter en dubda lo suyo compromís con la desfensa d'a luenga. Si yo mesmo no foi servir la propuesta grafica DGPL ye porque creigo que ye una error, y que ye negativa pa l'aragonés (los motivos los he contau un ciento de vegadas) no porque lo mio compromis con la luita por los dreitos lingüisticos siga menor que la d'atros.