Plataforma en esfensa de l'aragonés (PEA)

Como en tantos atros blogs, creigo que cal fer-se eco d'a nueba proposa en esfensa de l'aragonés. Asinas que contino tos apego o manifiesto fundazional de PEA. En o canto dreito y a la fin d'o manifiesto tenez un binclo a la paxina web suya. De todas trazas soi seguro que en bels pocos diyas darán muito ta charrar.

A siguién plataforma que aquí presentamos ye creyada por una colla de personas de diferens sensibilidaz y asoziazions embrecadas con a esfensa de l’aragonés. Sin garra afán de personalismo ni protaganismo por parti d’a suya asoziazión ni d’el mesmo. A la fin un mobimiento apolitico y a-ideolochico con l’unico ochetibo de rebindicar a ofizialidat de l’aragonés, a sozializazión y a normalizazión d’o suyo emplego en cualsiquier puesto d’Aragón.
Somos asistindo a la zinquena prebatina por parti d’o Gubierno d’Aragón de redautar y aprebar una lei de luengas que dignifique y faiga tener o dreito d’emplego ta la nuestra luenga, l’Aragonés, y o catalán. Ta nusatros ye o zinqueno intento d’engañar-nos y mantener-nos callaus tanimientres se muere a luenga aragonesa.

Debán d’istas perspeutibas y d’una manca de respuesta sozial, que muitas begadas ye a desincusa d’os politicos aragoneses, creyemos menister formar ista plataforma. Una plataforma ta mirar de fer autos de presenzia dentro d’a soziedat aragonesa, aizions dreitas, espeutaclos, autibidaz… en cheneral aizions bisteras que remeren a la soziedá aragonesa que les son engañando, que les son amagando a reyalidá sozial d’Aragón y que os politicos aragoneses quieren que muera a luenga aragonesa. Muitos exemplos tenemos ta contrimostrar-lo, pero más en zagueras, sabemos que os politicos son en contra de l’aragonés; y no ye pasibidá sacar cartels bilingües ta meter-los monolingües, nian menzionar o nombre d’as dos luengas minoritarias en o nuebo Estatuto d’Aragón, amagar istas dos luengas en a rezién creyada “Televisión Aragonesa” mesmo plegando a aplazar documentals por considerar-los de politicos,…

Si quiers rezibir más información u meter-te en contauto con nusatros fer-nos plegar un e-mail en:
esfensadelaragones@gmail.com,

Tamién puez besitar a nuestra pachina web:

http://pea.blogdns.net/.