Festivaleando o verano de 2016

Azero en o I Salvem lo riu

Ya somos a pocas de prencipiar a temporada de festivals y voi emplindo l'achenda estivera de cabos de semana de viaches, mosica, badinas y borina. De festivals, n'i hai a patacadas. De grans y de chiquetz, de toda mena de mosica y d'ambients. Regular que muitas trigariatz atras opcions, pero ista ye la mia ruta t'os meses de chunyo y chulio.

Salvem lo riu. Auguaviva, 4 de chunyo.
Tercer edición d'o festival reivindicativo contra la barbaridat que quieren fer en o rio Alcherez (Bergantes en catalán). O prochecto, que arramplaría con una parte repolida d'o rio, tien una graniza respuesta social de Aiguaviva y de toda la redolada. Fa tres anyos prencipioron a fer iste festival con muit buens criterios: gran presencia d'as collas locals, buena zona d'acampada y borina ta toda la nueit. Un festival muit casero y acullidor, pero no por ixo menos furo. Iste anyo tienen cartelazo con 13Krauss y Azero, antimás de atras collas que no conoixco, pero que por lo que he visto en internet prometen muito.

Tamborilé. Mezquita d'Exarc. 11 de chunyo
Chunto con Esfendemos a Tierra o festival más divertiu d'Aragón. Tamborilé ye guarencia de pasar un diya sobrebueno, de bailar dica que te sangren os pietz, de alcordanzas ta cutio y d'un publico con un buen rollo extremo. O festival chunta mosica balcanica, batucadas, pasavilla de dulzainers, electrocharangas, ... tot de collas por un regular desconoixidas t'a mayoría d'a chent, pero de gran calidat.

Entre os extras, un horario pleno d'actividatz, una zona d'acampada con uembra, puestos d'artesanía, una organización que cudia cada detalle y una chenta popular que siempre fa una cocina sobrebuena. Que paellas nos i hemos pretau!!! De maitins, antimás, bi ha actividatz más endrezadas ta que pueda estar-se-ie as familias que tienen ninas, asinas que sisquiá la tuya cachimalla te vale d'enchaquia ta no ir-ie.

Poborina Folk. Lo Pobo, 24-26 de chunyo
Festival chirmán d'o Tamborilé. Referencia imprescindible d'o folk en Aragón. Y o nuestro festival maldito. Encara que todas as anyadas hemos prebau d'ir-ie, siempre hemos teniu bell compromís, actividat, examen, treballo u bella cosa que nos ha privau de fer-lo. A fama lo precede y tot lo que he sentiu charrar d'iste festival ye bueno. Estianyo contarán entre atros, con Vegetal Jam y Ebri Knight asinas que, atra vegada, a borina y os bailes serán obligatorios.

PIR y FranjaRock. Echo / Penyarroya de Tastavins. 4 chulio
Torna a encertar-se que o PIR y atro festival son en a mesma calendata y torna a dividir-se-me o corazón. Dos puestos repolius, Echo y Penyarroya de Tastavins. A tradición de puyar t'o PIR, como levo fendo bells quince anyos contra as ganas de conoixer un festival nuevo como o Franja Rock, an que nunca no i soi estau y no por falta de ganas. O folk contra o rock. Practicar y sentir l'aragonés cheso, u practicar y sentir o catalán d'o Matarranya. Un cartel que conoixeré tres diyas antes (como muito!) contra unatro que conoixco dende fa semanas y an que nomás por Los Draps y Azero ya mereixe la pena. Ixa semana prencipian as vacanzas, asinas que cuento que t'a on vaigamos tamién condicionará o festival esleixiu, pero a fe que será de mal trigar.

D'o PIR ya en he charrau quantas vegadas en iste blog. Ye un festival an que trobar-te con muita chent que comparte toda ixa pasión por a cultura y a mosica aragonesa. Antimás en unas vals privilechiadas, en unas semanas con buen orache quasi seguro. As badinas, a gastronomía, o paisache, ... o PIR lo tien tot a favor, pero tamién leva una serie de mancanzas organizativas que, en tenendo competencia festivalera, chugan en contra suya.

D'atra man, a Franja siempre ye un puesto intresant y fa muito que no voi por o Matarranya. D'o festival tampoco no he sentiu garra cosa en contra y o cartel promete muito y dar-me a oportunidat de practicar bell poco lo catalán. A decisión final, probablement o diya d'antes...

Esfendemos a tierra. Artieda 15-17 de chulio
Poco más que decir que no haiga dito un ciento de vegadas. Esfendemos a tierra ye l'extasi de o movimiento soberanista aragonés. Dos diyas vivindo en aragonés, compartindo borina y luita. Capazos eternos dica l'amaneixer apanyando totz os problemas d'Aragón, y d'o mundo si cal. Trobar-te con as soberanistas de tot lo territorio y con companyeras de muitas luitas de muitos puestos. Ecolochismo, internacionalismo, as luitas por a diversidat lingüistica y culturals, soberanismo, .... totz os pueblos y todas as luitas se chuntan en Artieda, o lugar an que vive a dignidat. Si no i yes ida, ya tardas!

O cartel d'iste anyo encara no se conoixe, ni a lista d'actividatz, pero por lo que m'he puesto enterar marca muit bien, asinas que estatz-tos a la tisva. Antimás en iste anyo celebraremos l'absolución d'as 8 personas imputadas por esfender a tierra, asinas que tendremos unatro motivo ta brindar.

Aplec dels ports. Villores 29-31 de chulio.
O zaguer festival que tiengo, por agora, en l'achenda mia. Bi fuemos quasi de casualidat, fa dos anyos, asperando trobar-nos-ie un festival chicot. Quan pleguemos en Sorita, o lugar an que se feba ixe anyos, faciemos uellos de caparra. Aquello yera como si se fese o Viña en un lugarón de montanya. Una acampada chigant, bells scenarios diferents, chent a brozuecos, ... y un ambient festivaler de los millors. 

O festival se leva fendo por quasi quaranta edicions ya. Chunta as reivindicacions d'a comarca de Els Ports, con a mosica en catalán y con muitas atras expresions culturals d'alli. De diyas, charradas, chiquetz conciertos más tranquilos, actividatz, tallers, ... Y de nueitz, as millors mosicas. Por agora i son confirmaus Zoo, Los Draps, Pirat's sound sistema y Pepet i Marieta. Y encara falta chent por confirmar. Te cal saber-ne más? 

Iste anyo toca en Villores. O lugar lo trigan a daria entre totz os d'a comarca. Ye una traza sobrebuena tamién de ir conoixendo totz aquells puestos. Encara que siga en o País Valenciano, lo tenemos bien cerqueta, tocando con a muga aragonesa y con a posibilidat d'ir-te-ne de badinas ta las d'Aiguaviva. 

Regular que me'n he deixau belun. No tiengo info, por eixemplo, d'o Carrasca Rock. Encara tenemos bell cabo de semana libre que, malas que chafardeemos bell rato por o rete, trobaremos qualcosa. Queda tamién as fiestas d'os lugars y as borinas improvisadas. Queda, en resumen, tot un verano ta vivir, viachar, bailar, reivindicar, charrar, conoixer, soniar y fer borina.

Dica luego, PIR

Se veniba barruntando d'entre o mio entorno, que cada vegada irianos menos t'o PIR. A la fin, iste anyo, dimpués de dotze edicions seguidas indo-ie, será o primer que no puye t'Ansó ta iste historico festival que ha iu amortando-se poquet a poquet.

O PIR yera, y encara ye, un d'os millors festivals d'Aragón. Ta yo yera cita ineludible todas as anyadas. Por a mosica, prou que sí, y tamién por o puesto a on que se feba. Si bella lectora no lo conoixe, o PIR ye un festival de mosica pirinenca que se fa o primer cabo de semana de chulio rotando o puesto entre Ansó, Echo y Aragües u Chasa (a istos les pertoca una vegada cada seis anyadas). Por astí han pasau collas sobrebuena y verdaders catenazos, se i han feito actividatz divertidismas, y he puesto conoixer muitas mosicas y mosicos d'os paises pirinencos, y mesmo d'atros.

Quan prencipié a ir-ie o PIR duraba dos nueitz y tres diyas. Bi heba mosica tot lo diya y atras actividatz. Un anyo bi habió, por eixemplo, una exhibición de cans pastors repincha. Muitas anyadas levaban unos chuegos feitos artesanos que siempre nos i fotebanos buen rato. Se feban tallers d'instrumentos, se prochectaban documentals, ... un poquet de tot. No s'adubiba. Mesmo bi heba actividatz que se coincidiban y a programación s'ixemenaba por os lugars d'a redolada. Remero un anyo que facioron pasavillas os Chotos por Embún que nos lo pasemos como enanos.

Teneba, con tot y con ixo, bells defectos en a mia opinión, que comparto con muitos d'os mios amigos. De cutio, as collas d'a tarde yeran más borineras que las d'a nueit. Pero lo pior ye que as collas que más goyo nos feban (La Ronda de Boltaña, la Val d'Echo, La Orquestina del Fabirol, etc...) actuaban o domingo de tardes, quan totz nos hebanos de tornar t'as nuestras ciudatz u lugars y no podebanos quedar-nos ni zorriar. Nunca no entendié porque totz os anyos feban ixo. Por qué lo tornan a fer estianyo. Si o sabado tocase Val d'Echo y La Orquestina, bien me repensaría de no puyar-ie.

O PIR, dende fa un tiempo, fue amortando-se. S'iba sacando actos, se cobraba por o concierto de nueitz (cal decir que tampoco no gosabe d'estar caro), ... pero la rematadera plegó en sacar as actividatz d'o viernes. O PIR ya no teneba que una nueit. O primer anyo que lo sufriemos, encara s'apanyó con bells mosicos que pilloron os trastes y improvisoron una sesión en o bar d'a plaza d'Ansó. Pero ni a l'atro anyo en Chasa, ni o pasau en Echo, bi habió cosa parellana.

Particularment penible estió o zaguer anyo de Chasa. Quan le pertoca a Chasa-Aragües, se gosaba dormir en as piscinas d'Aragües. Ye un puesto repoliu, con arbols, un río amán, piscina quan la ubren, una fuent, mesas de fusta, ... Fa dos anyos pleguemos en Chasa y preguntemos a on se podeba acampar, ninviando-nos ta un espacio a bells kilometros d'o lugar, por una pista de tierra, sin augua ni yerba. Prou que no i dormiemos y nos apanyemos atro puesto a on que pasar a nueit.

A verdat ye que muitas vegadas tenebas o barrunto de que no quereban que ise dengún que no fuese d'a val. A publicidat en tierra plana yera quasi nula. Os millors conciertos los deixaban t'o domingo. A la chent que bi ibanos, a soben nos feban cosas como lo debantdito de Chasa. Mesmo un gaiter plegó a decir un anyo en o scenario que no yeranos bienvenidas. Cal decir que en Aragüés, as vegadas que i soi estau, nos hemos sentiu como en casa.

Ya en atro plano, a quasi nula presencia de l'aragonés en una tierra a on que encara ye tant vivo, pareixeba fruito d'una politica lingüicida y d'autoodio más que d'un pretendiu u malentendiu cosmopolitismo.

As amigas ya no puyaban ni tantas ni tant a soben t'o PIR. Muitas ya deciban que i puyaban porque yera o millor que bi heba ixe cabo de semana. En o folk, o PIR no tiene competencia por agora. Pero a qui nos fan goyo atras mosicas, igual nos tiene que ixe cabo de semana bailemos folk, rock u ska y iste anyo, sí que les ha saliu competencia.

Estianyo, o mesmo cabo de semana que o PIR, se fa o Salvem lo riu Bergantes festival. Con una programación sobrebuena: charradas, documental, pasavillas, conciertos,... y por una buena causa. A la chent d'a organización les cal aduya moral y economica en una luita que pareixe que será larga. Ta forro de bota, o catalán ye present en o propio nombre d'o festival.

Trobaré a faltar Ansó, Borda Chiquín, o bar d'a plaza, as pozas, l'ambient d'o camping, ... trobaré a faltar muitas cosas d'o PIR. Pero a fe a fe que'n trobaré muitas atras en o Salvem lo riu que me ferán tanto u más goyo. U simplament atra mena de goyo.

O PIR ye una ideya sobrebuena, con un potencial granizo ta fer plegar a la chent, d'a montanya y d'o plano, a valura d'a mosica y a cultura pirinenca. Ta que conoixcamos, antimás, as culturas de totz os países d'as dos vesants pirinencas y de toda la cordillera. Pero ye un festival que no pareixe que tienga mica gana de sobrevivir. No digamos ya de creixer. Lo siento PIR, pero nos viyeremos l'anyo venient... si no bi ha cosa millor.

Si no i sotz idas nunca y tos fa goyo lo folk, ya tardatz. Tos lo pasaretz muito bien, y regular que repetiretz.

Tos deixo penchaus bell video d'o zaguer anyo. Antimás en Flickr de barrenaus tenetz arrienda fotos que he iu fendo mientres istas anyadas.