viernes, 3 de marzo de 2017

Diya d'a luenga materna 2017. Tierra de barrenaus radio 3x06

L'actualidat manda, de cabo ta quan. Mesmo en un programa como Tierra de barrenaus radio, que prebo que siga lo mas atemporal posible. Iste ye un programa diferent por muitas razons, pero sobre tot por o formato. En cuenta d'un tema central, con pocas convidadas como ye normal, iste prene una mica formato magazine y tocamos bells quantos temas con muitas convidadas.

A nueva propuesta grafica yera tema obligau. Mas, estando arredol d'o diya d'a luenga materna, que tamién en charro en o primer bloque. En o segundo, Marco y David nos charran d'una actividat feita en un IES de Carinyena y d'o programa Nieus Luzia Dueso. T'o tercer bloque, contamos con Cherardo, un d'os actors d'a companyía de teatro Fosca Delera. En ista zaguer edición d'as Vodas de Isabel, representoron a suya nueva obra "Con piedra u barro fagan algo", escrita en aragonés. Con ell y Tamara, charramos tamién d'as Vodas, convidando a tot qui no las haiga viviu a que lo faiga. Y rematamos con o chueves lardero, de man de Edu y Mario, que nos presientan ista fiesta y a suya versión nogarera.

Un formato que ya viengo prebando en programas como o primer d'a temporada, Sé lo que facietz iste verano, y que talment siga o formato principal en a temporada siguient. Ya me diretz que tos pareixe y, como siempre tos digo, ta qualsiquier tema que queratz proposar, tiengo as puertas d'o programa pataleras ta todas vusatras.

1 comentario:

Miguel Ángel Pérez Sánchez dijo...

Me fa muito goyo o tuyo programa y encara que no charro aragonés asabelos anyos ye poliu ascuitar a luenga d'a mia choventú, cuan viviba en Zaragoza. Comparto l'interés por a nuestra fabla, pero no pas a ideolochía dende a que'n fas, anque prou que siempre esfenderé o tuyo dreito a pensar como quieras.Una critica seria sí que, sin dembargo, te faré. Beigo que por razons, entiendo, idiolochicas, emplegas u emplegaz o chenero femenino, que ye o chenero marcau, en cuentas d'o masculino ta pronombres y adchetivos. Iste uso ye agramatical en todas as luengas romances. Amuestra una confusión entre chenero gramatical y sexo y no aporta guaire u cosa a la esfensa d'a situazión d'a muyer en a sociedá. Mezclar ciencia -filolochica, gramatical-con ideolochía no ye de recibo. Por o demás felicitacions por o tuyo treballo y sincusa a intromisión y o mio pobre aragonés.