jueves, 15 de septiembre de 2011

Ampraus 059

Dimpués de bells diyas de vacanzas, unas quiestas y que me caleban, atrás forzadas y que me son tornando barrenau, torno t’o blog. T’o treballo, t’os quefers, ta casa y ta totz os empandullos a on que me quieran embolicar... y me dixe, prou que sí.

Arredol: Una depeixa dichital en aragonés. No me pensaba que ise a viyer isto en muitas anyadas y menos con o pozal de augua freda que o PP y a Vadillada nos chitoron en istos meses. O caso ye que o lunes ye a suya debantadera, y ya ha saliu en bell meyo de comunicación. Forano, prou que sí. D’aquí, por agora, ni brenca ni meya. Una atra alportación ta qui queremos vivir en aragonés.

Aragonés: y más y más buenas noticias. Prencipian os cursos, como todas as anyadas. Fablans ya ha publicau a suya ufierta. Nogara cuento que lo ferá ista semana. En A flama podetz apuntar-tos-ie. As dos asociacions cada vegada son fendo cursos por más lugars d’o país, asinas que china chana, se va salindo d’os ghettos pirinencos, y de Zaragoza y Uesca. D’atra man, a la fin a Filolochía Aragonesa ha conseguiu o minimo d’alumnalla que le caleba ta que se podese fer. Que no ye poco. Agora nomás cal asperar a los resultaus. Pareix que l’aragonés no ye tan malament como a más d’una le fería goi.

Escépticos ye un programa que ferá a ETB. En fació un episodio piloto sobre a plegada d’a humanidat en a Luna y as teorías conspirativas. Pareix que fació goi a la chent – a yo muitismo – porque agora en setiembre ETB ferá a resta d’episodios. O primer se puet viyer on line. Cuento que a resta taimen los puyarán t’o rete. Iste segundo charrará sobre a homeopatía y atras “medicinas alternativas”, asinas que promete. O trailer ya ye bueno de tot:



L’himno oficial d’Aragón continará sin estar conoixiu que por os quatre frikis de siempre. Continará sin representar a dengún. Ya he dito bella vegada que me fería mas goi La Revolandera u atras cantas como himno d’Aragón. Y o 20 d’aviento como diya nacional. Y que as fiestas mayors de Zaragoza estasen en mayo u setiembre ta que fese millor orache... bueno que se me va.... O caso ye que PAR y PP han viedau que as aragonesas tiengamos un himno que si que fa que todas, u a lo menos muitismas sintamos bella cosa u mesmo nos emocionemos. Sisquiá se plegará a debatir, que ye lo pior. No quieren ni sentir charrar-ne. Penica de país.

Iste sabado en A Flama bi habrá un socalce con audición de mosica en catalán de collas aragonesas, catalanas y valencianas. Prencipiará a ixo d’as 12:30 con vermutico, biera, bella cosa de minchar y tot ixo bueno que i fan. Sobrebuena traza de prencipiar (u continar) o cabo de semana. Asinas que tos deixo con o video d’una d’as cantas que m’ha dito un muixonet que i sonarán...


4 comentarios:

otubre17 dijo...

que casualidad el video es de VIc y mañana vuelven a tocar gratuitamente en la plaza (nosaltres hi serem)
te paso la programación del mercado de la musica en vivo de Vic:
http://www.mmvv.net/arxius/programacio-mmvv-2011-g.pdf

Anónimo dijo...

"bueno que se me'n va...", u millor encara "bueno que me se'n va..."
(ya bies, terne que terne :)

Barrenau dijo...

otubre, que suerte tiens, so boque... pasatz-lo bien.
"Anonimo": en estar una expresión (y antimás castellana) y no haber-ie un movimiento esclatero, no sé yo si cal ixe "en". Cuanto a l'orden d'os pronombres atonos, as dos posibilidatz existen en aragonés (y en castellano charrau). Personalment me fa mas goi a de "se me", asinas que ista vegada no reblo...

Anónimo dijo...

Agora sí t'he pillau!
reblar bien de "revirare" en latín, asina que abrías d'escribir-lo con v