Pudor a testosterona

Qui me conoix u qui lei iste blog, que cuasi ya ye lo mesmo, sabe que he teniu arrienda treballos, toz bien esferens. En beluns no yera que l’unico treballador y en atros treballaba de conchunta con asabelo de chen. Como se suposa que soi tecnico electronico, tanto en os mios estudeos como cuan he treballau d’ixo, gosa pasar que no i somos que ombres. En ixos casos a ormino se fa en poquez diyas ixa mena de morfuga de masclos que tanto pude a testosterona.

Soi umano, ombre y eterosecsual, asinas que de cabo ta cuan me fa goyo de charrar sobre como ye de polida Fulanica u Menganica. “Um, ye pien pincha ixa moza!” y au!. Se contina treballando u galbaniando, lo que pertoque. U charrando de cualsiquier atra cosa. Manimenos en istos treballos de masclos, as mullers son asoben l’unico afer que se’n charra. Contra más se’n charra, antimás, más aparixen custions masclistas, omofobas, razistas y asinas asinas, tornando-se en una “espiral enta abaixo” (downward spiral) que nunca no plega en garra cabo buen. Mesmo por o camín de cabo ta cuan aparixen os toros, o futbol y España. Ixa morfuga me fa asabelo de fastio. Un compañer mío siempre me fa remerar una eszena d’Idiocrazia. Qui no la aiga bista, que la baixe de l’Emule, la beiga y torne a leyer l’articlo. Ye ixa eszena an que Frito ha d’ir t’os campos a grabar os chitos ta salbar a bida d’o prota. Por o camín troban un puticlub, xublidan de raso o que eban de fer y bi dentran a buquir un ratet. Soi combenziu que o mozo que tos ne charro fería esactamen ixo, pos as suyas neuronas son de tot incapables de fer-se serbir ta cualsiquier atra cosa. Bueno, no. Tamién chita escupitos ta tierra terne que terne, cosa que tamién m’amuela asabelo.

En un d’os treballos pasó que, en una semana, s’enampló a chen que i treballabanos y prenzipiemos a tener bellas zagalotas por a "base". Os matutans d’os compañers míos continaban estando tan fatos como en yeran antismas, pero a lo menos no tartiban u lo deziban a escuchetas. Como yo tampoco no les seguiba lo chuego d’antis, con yo nian a escuchetas. Y jibo si alenté de tranquilet! Por un regular, en toz os treballos an que bi ha a lo menos una muller, as cosas cambean asabelo, asinas que m’estimo muitismo de treballar con mullers. No porque sían millors ni piors que no os ombres sino porque son cuasi a unica traza d’acotolar de camín ixa pudor a testosterona que tantismo fastio me fa...