Final d'incertidumbre en Biscarrués

Habe a-saber-los anyos, la primer vegada que estié en Santa Llestra, charremos con una d'as yayas d'o lugar sobre lo pantano que se i prochectaba. La muller, en aragonés, nos deciba que yera farta d'aguardar a que se decidise qualcosa sobre la obra. Antes mas, argumentaba, se viviba muit malament, pero quan deciba que se feba una cosa, se feba y prou. Y no te teneban asperando a que los tribunals resolvesen sobre la impugnación d'a impugnación. Sin entrar a debatir sobre l'argumento suyo, expresaba de pistón un d'os sentimientos que mas nos angunia: la incertidumbre.

I hai qui lo leva millor y pior. Yo soi d'os segundos. Prebo d'aprender a vivir con ella, pero me sigue costando a-saber-lo. Tot y que en la mía vida, afortunadament, tiengo quantas cosas que sí que son alto u baixo estables, la crisi sanitaria nos n'ha provocau arrienda, de nuevas incertidumbres: ¿quán podremos tornar t'a nuestra vida "normal"? ¿qué será d'os nuestros treballos? ¿cómo s'atenderá a las personas dependients?

A masa personas en Aragón, ixo se les ha uniu a la incertidumbre d'anyos y anyos menazaus por obras hidraulicas. Pasó en Chanovas, que los suyos vecins china-chana van reconquerindo lo lugar. Pasó en Santa Llestra, que a la fin alentó tranquila dimpués d'a-saber-los anyos. Fa pocos dias ha plegau la noticia de que en Biscarrués, dimpués de mas de tres decadas d'incertidumbres, se vulca lo plan pa fer l'entivo. Todas las habitants d'os lugars pueden fer-se argüellosas d'a victoria. Todas las interpresas que apostoron por lo riu y lo paisache sospiran aliviadas. Buena cosa de prochectos vitals podrán a la fin desarrollar-se sin estar de contino pensando en que la espada de Damocles pueda cayer bell dia.

¿Pero de verdat cal trenta anyos pa resolver si una obra ye menester, chusta, legal, etc? Diz que si la chusticia ye lenta, deixa d'estar chusticia. ¿Qui les torna a toda la chent que ha viviu ixa situación toda l'ansiedat, todas las cosas que no s'han puesto fer por culpa d'o pantano? ¿Cómo se paga toda inchusticia que han patiu en istas decadas? Lo cacicato aragonés sigue encerrinau en fer la obra a tot trance. Les tien igual tot lo sufrimiento que han causau y que nian los tribunals, poco sospeitosos de ecosocialistas, les haigan negau la legalidat. No veyen que negocio u, pior encara, venganza. Talment, como en tantas atras cosas, a la qüestión economica calga anyadir un component testoteronico.

En Mularroya, ni los chueces les salvoron. En la redolada de Yesa, continan entabant unas obras con toneladas d'argumentos en contra. Siguen las incertidumbres. Siguen sin poder vivir tranquilas en lo suyo lugar. Habendo de luitar por cada dia, contra un estau y un sistema que s'amuestra bien cruel con la chent d'ixos lugars de vez que s'acocha debant d'os intreses economicos d'o modelo desarrollistico formigoner.

En pareixer-me las mias chiquetas incertidumbres un turmento, admiro de tot la rasmia de todas las personas que han aguantau y aguantan en los lugars menazaus por los pantanos. Plegan buenas noticias pa Biscarrués y redolada y sisquiá n'arriben luego t'atros lugars. La luita funciona, ye cabolioso. Pero no dubdaría en calificar de tortura la cantidat d'anyos y enerchias invertidas y la incertidumbre vivida en tot ixe tiempo.