Boney M en Andorra

Ta despedir ista anyada, dende Tierra de barrenaus, tos deixo un video adedicau a Boney M, que plega de morir. Tamién adedicau t'o Baixo Aragón a on que pasaré ista zaguer nueit de l'anayada. Que tos vaiga muito bueno l'anyada venient!

2011: L'anyada de l'aragonés?

En istas calendatas de remerar l'anyada que remata y fer os buenos deseyos ta la que prencipia, creigo que han pasau a rienda cosas que ferán que a venient siga una anyada de tot decisiva ta l'aragonés.

A nueva grafía de l'aragonés (entabant G.ACAR) ye aprebada y publicada fa poquet. O suyo esdebenider penderá, en buena mida, d'o que pase en ista primer anyada de funcionamiento. En istos pocos meses dende a suya proposa y publicación ya bi ha habiu bellas publicacions que fan servir ista nueva grafía. Aspectos lingüísticos de Tella u a revista O Espiello en son eixemplos. Atros, como Fillos d'as luengas, a tamás d'estar publicaus con a grafía d'o 87 (entabant G.87) explican que hesen quiesto publicar-se con G.ACAR, pero en no estar aprebadas a l'inte d'a publicación no lo han feito. Buena cosa de blogs y publicacions dichitals tamién la van fendo servir como en ye eixemplo iste mesmo blog. Bellas organizacions d'atras dembas, como Puyalón u A Enrestida tamién la fan servir ya, por un regular.

D'atra man, encara queda muito por fer. Muitas personas, organizacions y colectivos fan servir a G.87 ya siga por galvana u convicción. Consello d'a Fabla en zagueras no fa que creticar a G.ACAR y Fablans no se prenuncia fendo servir más que más a G.87, pero tamién de cabo ta quan a G.ACAR. Personalment, creigo que, ta lo tiempo que leva publicada, o camín que ye fendo ye bueno y que cada vegada somos más qui la femos servir. Ista anyada de 2011 se viyerá quantas publicacions se fan en a G.ACAR, tanto fisicas como electronicas. Sisquiá bi haiga un campionato de publicacions y s'editen milenta libros en as dos grafías que faigan buena honra ta l'aragonés.

Cuanto a las resistencias t'a nueva grafía, a más hipocrita u fata me pareix a de "no ye a finitiva. M'aspero a que la faiga o gubieno." A d'o 87 tampoco no ye a finitiva ni ye aprebada por o gubierno. Ixa enchaquia no me vale. O movimiento en esfensa de l'aragonés leva más de 30 anyadas treballando sin asperar cosa d'o gubierno. ¿Porque agora en aspera? ¿Porque han feito una lei de luengas que a garra organización no ha satisfeito? L'aragonés, dende fa muito y agora mesmo, pende nomás d'o treballo de qui lo charra y/u esfiende y asperar a que a resta nos faigan o treballo me pareix una error muito grau. A lei de luengas ha tardau decadas. ¿Que nos fa creyer que o suyo desembolic, os nombramientos d'as academias oficials y l'aprebación d'una grafía finitiva y oficial tardarán menos u que solucionarán cosa? Sisquiá se faiga a escape, pero tanimientres hemos de continar fochando. Y más si o PP ganase en Aragón, que anularía de tot, o camín oficial de l'aragonés.

O CSLA (Consello Superior d'as Luengas d'Aragón) ya ye nombrau y mesmo s'ha chuntau ta nombrar a Bada como president temporalment. /*Pagaría buena cosa de diners por viyer por un foradet as suyas reunions. Ixo sí que be d'estar un show y no lo de Disney on ice.*/ D'o que decida istos primers meses de vida, tamién penderá o esdebenider de l'aragonés. ¿Qué academias en surtirán? Pendendo d'a suya composición se prenerá una grafía u una atra u una tercer u denguna como oficial. Y cuanto a lo catalán, ¿rispetarán a unidat lingüística d'o vecinamen u se ferá una academia a-scientifica? ¿U un tercer modelo d'academia esbafada y a-polemica que no prenga decisions y que nomás faiga estudietz de redoladas y charradetas? ¿Que politicas lingüisticas proposarán? ¿Les ferá caso o gubierno, siga qui bi siga? Una dudeta que tiengo: ¿sabetz si se puet estar de vegada academico y miembro d'o CSLA? Porque a composición puet cambiar a saber-lo...

Ta saber o qué pasará cuanto a l'amostranza, caldrá que nos asperemos a setiembre, a viyer si nos dan bella alegría y se van fendo más clases de/en aragonés siga a on que siga. Tamién penderá, en buena mida, d'as definicions territorials que faigan os d'o CSLA y, prou que d'as perras que quieran adedicar-ie a nuestra quiesta D.Ch.A.

A ran asociativo y zaragoceta, ¿que nos trayerá ista anyada en as relacions entre personas y organizacions en esfensa de l'aragonés? As bases de Nogara y Fablans femos buena pacha y cada vegada femos más cosas de conchunta. Manimenos, o movimiento, tot el, contina esmicazau y cadagún fa quasi tot sin contar con a resta d'organizacions. Dende que Chuntos por l'aragonés s'amortó (y no dentraré en as causas d'a muerte) toda prebatina de tornar a resucitar o suyo esprito ha estau un fracaso de tot. Asperemos que ista siga l'anyada a on que todas prencipiemos a treballar de conchunta una atra vegada, y superando as chicotas esferencias que, d'atra man nos fan más plurals. Todas i cullimos.

microbarrenaus: l'aragonés antigo

¿Prechuicios, ignorancia u nacionalismo lingüistico? Como no sé qui lo escribió no puedo decir-lo con seguridat. En o museu de Sos adedicau a Fernando II, o catolico, i charra breument d'as luengas, fablando d'o castellano, o catalán, o portugués l'arabe y "l'aragonés antigo" que, adhibe, quedó en os Pirineus. Primer de tot, remerar que, en empecipiando o sieglo XVI, l'aragonés se charraba muito a o Sur de Guara. Pero ye que, antimás, l'aragonés ye a unica luenga de toda a lista con adchetivo. O catalán, castellano, portugués y arabe no yeran antigos alavez. Talment charremos o mesmo castellano que en o sieglo XVI y no'n he parau cuenta. Pero l'aragonés sí que ye "antigo". Hibo! Siempre amostrando l'aragonés como qualcosa muerta, d'antismas, folclorica y toda ixa ripa de prechudicios. U simpla ignorancia.

Ampraus 052

Muitas novedatz en ista semana. Cara t'o cabo de semana Zaragoza rebute d'actos y de cosas ta fer. ¿Qui deciba que yeranos apampiroladas?

20 d'aviento: Como todas as anyadas, plega puntual o 20 d'aviento y con el, os actos que se fan remerando ixa calendata a on que os nuestros dreitos como nación estioron estricallaus. Os institucionalistas a lo suyo, con ixas flors a o canto d'a estatua t'o "chusticiazgo", que contina tenendo por dezaga o sinyalaz chigant. O BIC, d'atra man, convoca os suyos propios actos alternativos. Un acto politico de meyodiyas, chenta, audición y concierto. Tenetz toda a información en iste vinclo de güembras foscas. O concierto se ferá de nueitz en a Sala López y bi tanyerán Interlude y KOP. As dentradas se pueden mercar en Posturas, A Flama, Urban Hell y Birosta por nomás ueito euros. Ta qui no los conoixca, tos pencho un video de cadaguna d'as collas más abaixo.

La Pantera Rossa, librería asociativa, ha ubierto ya as puertas suyas. En a zaragozana carrera de Sant Vicent de Paúl, podetz trobar a rienda libros de toda mena: feminismo, anticapitalismo, narrativa, libros en aragonés, ... de tot i culle en o suyo nuevo local. A que será a librería de referencia ta muitas dende agora ufre toda mena de lamins t'os nuestros esmos. A debantadera estió tot un exito seguntes m'han dito (no podié estar-ie) y regular que les irá bien, en ufrir un producto que dengún no heba ufierto dica agora.... Libros de mal trobar en as librerías comercials y un ambient bien pincho. Mesmo te i puetz fer un café!

O despertar de l'onso: Chusto en La Pantera Rossa ye a on se presentará o viernes O despertar de l'onso, un libro en aragonés que replega tretze historias de diez autoras diferents. Todas son nuevas en isto de editar libros (creigo) y todas son bien chovens, naixidas en os uitanta. Asperemos que o libro funcione bien y que l'anyada venient tiengamos diez nuevas obras... Si queretz viyer-lo y/u mercar-lo, ya sabetz, o viernes a las 19 en La Pantera Rossa.

Salón d'o comic de Zaragoza: Como quasi no bi ha cosetas ta fer iste cabo de semana, antimás, se fa o salón d'o comic. La rematadera. Quasi no vaga ni t'alentar.... Como todas as anyadas, frikismo a embute y buenos comics y fanzines. Campeonatos de chuegos y videochuegos, chent disbrazada de movidas manga, otakus, "monigoters" y asinas asinas. A mía recomendación ta mercar ye o sobrebueno "Los mediamierdas" de l'A.C. Malavida, un sobrebueno tebeyo de ista crica de politicament incorrectos. ¡A tope! O programa d'o salón lo podetz viyer aqui.

Aragón colonial reubre. Istos meses que nos ha teniu huerfanos de colonialismo espanyol s'han rematau. A la fin podremos tornar a gronxiar-nos con l'espanyolismo aragonés. Ya ha prencipiau a puyar-ie contenius. Sisquiá no torne a deixar-nos nunca... Re-biemplegau!

Interlude

KOP

Una no nacionalista

Que articlo s'ha fotiu Pilar Cernuda fa bells pocos diyas. Ye publicau en bellas depeixas como Heraldo de Aragón, Diario de Cádiz u El correo gallego y charra sobre os nacionalismos por unas declaracions de Vargas Llosa. Tien tantos despropositos que no se guaire bien por a on prencipiar asinas que lo feré por o prencipio.

“Vargas Llosa ha vuelto a abrir la caja de los truenos con sus consideraciones sobre los nacionalismos”. Ah! Que yera zarrada? Pero si ye o tema cutiano de milenta de charradas en casas y bars. Ye a causa d'existencia de muitos partius (Ciutadans, UPyD, PP...). A verdat ye que no fa que repetir o mesmo discurso canso y simplaz de cutio.

Dimpués, en a medolla de l'articlo charra d'a reforma d'a lei electoral ta “poner a los nacionalistas en el lugar que les corresponde y no en el que les colocan los gobiernos que negocian con ellos con una generosidad inconcebible...”. Ista ye un d'os mantras espanyolistas más repetius. De reformas electorals se'n puet fer muitas. Dos proposas que se feban, de man, si no remero mal, de bell sector de IU, yeran cambiar a demba de repartir os escanyos. En cuenta de fer-lo por provincias, fer-lo en demba autonomica u estatal. Os dos cambeos no afectarían guaire a los partius “territorials”. En ixe estudio, que no yera que una aplicación d'os resultaus electorals d'anyadas anteriors, os “partius territorials” (os que nomás se presentan en una u bellas pocas comunidatz autonomas) teneban, si fa u no fa, a mesma representación y os mesmos escanyos. Lo que cambiaba, prou que sí, yera o reparto de partius estatals como IU u UPyD, que sí que puyaban, baixando nomás PP y PSOE. L'actual lei electoral (que soi d'alcuerdo que cal cambiar), nomás beneficia a dos partius: PP y PSOE. Prou que lo que quiere toda ista crica de “no nacionalistas” ye fer una lei ad hoc ta forachitar a las “nacionalistas” y que no tiengan a representación que hue tienen. Como siga. Y si cal ilegalizar, se ilegaliza.

Y plegamos en lo millor con o tercer parrafo. “Pero Vargas Llosa no entraba en el aspecto de la presencia política de los nacionalismos en España, sino en su vertiente más irritante, la excluyente, la que defiende la identidad local frente a la nacional, la que en la defensa de lo identitario abomina de lo que es de todos.”

“A que esfiende a identidat local debant d'a nacional”. Una nación, una luenga, una versión d'a historia. Y toda la resta, localismos folkloricos. ¿Qui ye a nacionalista? ¿Qui ye “excluyent”? ¿Qui excluye qualsiquier nación u sentimiento nacional que no siga lo suyo propio, en iste caso l'espanyol? “...abomina de lo que ye de totz”. ¿Qué ye de totz? ¿A luenga castellana, a versión castellanocentrita d'a historia? ¿O reciént nombrau patrimoniu d'a humanidat flamenco? ¿Por qué “lo de totz” coincide tan asoben con “lo mio”. ¿Puet haber-ie frase más nacionalista y más excluyent? Bien de nacionalismo banal...

“Cuando el escritor recuerda las guerras encarnizadas no hay que alejarse excesivamente en la historia, ahí está lo que ha ocurrido en Centroeuropa no hace ni dos décadas, con auténticos genocidios entre nacionalistas que pertenecían a la misma patria.” No cal aluenyar-se guaire ta remerar o que pueden fer as guerras nacionalistas, ye verdat. A mayor carnicería que s'ha feito en l'Estau espanyol se fació en nombre d'un nacionalismo: l'espanyol. Milenta muertos en a Guerra Civil espanyola y dimpués. Chent asesinada sin chudicios u con chudicios de risa, exiliadas, disapareixidas... tot en nombre d'a grandaria d'Espanya y a suya unidat de destino universal. Y en una atra muestra de trafucar terminos, lo fa con patria y estau, charrando de Yugoslavia como patria común. De seguras que bi habió (y regular que bi'n habrá encara) chent que sintió a Yugoslavia como patria, pero ye de dar que muitas nunca no se sintioron nacionals de Yugoslavia sino croatas, serbias, eslovenas, … Una patria ye un sentimiento que, bellas vegadas sí y atras no pas, coincide con l'estau a on que una vive. Un estau ye un entidat administrativa que, bellas vegadas sí y atras no pas, coincide con una nación y/u con una patria. Estar ciudadana d'un estau no ha d'estar lo mesmo que estar nacional d'un estau encara que tan asoben se trafuque y, más que más, dende as nacionals d'ixe estau.

Remata con una atra alfaya: “Los nacionalistas enriquecen cualquier país cuando preservan determinadas señas de identidad; lo empobrecen en cambio cuando en defensa de esas señas de identidad se margina, discrimina y ataca lo que es común.” Una atra vegada más, un poquet de nacionalismo banal. “Lo común” se fa “lo mío”. Tot lo que no siga mayoritario ye nomás que un concieto folklorico. Prou que ni ista muller, ni toda a resta d'espanyolistas “democratas” no quieren amarguinar, discriminar u enrestir os sinyals d'indentidat d'a resta. ¡Que va! Lo que quieren ye que se quede como qualcosa folklorica, ta que se vaigan amortando china chana y que a represión no faiga falta. Que l'aragonés, por eixemplo se quede en as casas, en as cantas u en os blogs d'os quatre frikis que escribimos raro. Pero que no plegue en os espacios publicos, ni en l'administración no vaiga a estar que les moleste a la vista competindo con o pobret castellano, en esclater periglo de disapareixer....

Tot un eixemplo de texto – tipo de l'espanyolismo banal. ¿En qué sieglo vivimos...? ¿Qué concepto de estau, nación, patria, luenga, cultura, historia... tien toda ista chent? Ai mama!

Exercendo lo pasquinismo 002

Una d'as cosas más repetidas y que más mal me fan en os oyius, ye os comentarios sobre as actuacions policials en os meyos de masas. Fa bell tiempo leyié en o Heraldo d'Aragón (Espanya), una noticia sobre a polemica por un video que se grabó en as fiestas de San Lorient de Uesca l'anyada pasada. I amaneixeban dos policials nacionals d'Espanya-Espanya (no yeran os autonomicos) prebando de detener a una muller, debant d'as protestas d'a chent que bi yera. En a noticia escrita i meteba que, como se podeba viyer en o video, os policials no solo no enristión a la chent sino que habioron d'aguantar faltadas, chifladas y de tot, tenendo muita paciencia. A noticia, afortunadament, ye disapareixida d'o Heraldo, asinas que no tos puedo meter o vinclo. Habretz d'aceptar a mía parola. Digo afortunadament porque o video no yera lo que se diz de buen viyer. Plegaban a decir que no heban quitau a porra en garra inte. Bueno, pues u han visto un atro video u yo tiengo una esmaixinación maravillosa. A policía, s'encerrina en detener a una muller aventando-la por totz os cabos, deixando-la meyo en coritatis y, sí, quitando a porra quan un par d'espectadors prebaban de charrutiar con ells ta que reblasen en levar-se a la muller. O Heraldo feba a interpretación d'un video que todas podebanos viyer, por si nos feba galvana de viyer os poco más de cinco minutos que duraba (a porra la quitaba en o minuto 4 u 5).

Iste ye un caso particlar, pero bi ha una frase que se repite terne que terne en telediarios, periodicos y mass-media de toda mena. "A policía habió d'enrestir" u "a policía habió de fer tal u qual cosa". As pasquinistas interpretan que no le'n quedaba atra, quan, qui hemos estau en manifestacions, sabemos que, asoben, enristen porque les agana, porque van drogadas, u simplament porque bell alto cargo les n'ha dito que lo faigan, pase lo que pase.

Pero a noticia que le plega a la ciudadana meya, fendo servir ixa mena de frases d'obligación (haber de), ye que a policía no podeba fer atra cosa debant d'a violencia d'as manifestants. En bells poquetz casos, quan l'actuación d'a policía ye masiau evident, u quan bella periodista ye enrestida, qüestionan ixas trazas d'actuar, pero siempre dando a versión policial. Ta quan a versión d'as manifestants, en todas y cadaguna d'as enrestidas policials?

Quarteno cabo d'anyo

Ahiere se feban quatre anaydas dende que prencipié con ista historieta de Tierra de barrenaus (y barrenadas). T'a part d'alavez prencipio mas como un chuego, una traza de pasar o mio tiempo libre, que en ixas envueltas en teneba más. China chana ha iu esdebenindo un fillet mio. Quatre anyadas ya, en istos tiempos a on que tot dura poco, a on que Facebook, Twitter y demás han acotolau quasi os blogs, Tierra de barrenaus i contina, en a blogosfera, y en aragonés. Muitos atros blogs remanen inactivos de tot u son ¿ta cutio? en o fosal (Aragón colonial, O chemeco d'as parolas, Estricalla, ....). En ha surtiu arrienda de cosas dende ixos primers posts que no feban que remerar convocatorias. As seccions: microbarrenaus, o millor d'a semana, Ampraus, En leyendo, Exerciendo lo pasquinismo... He penchau mosica y videos de toda mena: dende Comando Cucaracha dica David Bowie con Nine Inch Nails. Pulp, Franco Battiato, Los enemigos, Reincidentes, S.A., Azero, que me se yo.... He charrau d'Aragón, Catalunya, Escocia, Euskal Herria, Palestina, Chiapas, de todas as cantonadas d'a planeta. He visto morir locals (Dispierta Fierro, siempre te remeraré) y naixer atros (como A Flama, ixe gran puesto de compleganza d'as indepes y atros movimientos socials). He visto naves en flamas dillá d'Orión. Ui, no, ixo no lo he visto.

Tierra de barrenaus mesmo tenió un fillo (ya soi güelo) que se diz Aragón ateo y a on voi penchando noticias y articlos sobre l'ateismo y as relichions y atras supersticions. Me he feito facebook, que dicié que nunca no me'n fería. He charrau tamién de milenta cosas que han pasau politicament istas anyadas: o tozolón electoral y social de CHA, eleccions de toda mena, a catalanofobia, a vada cheneral d'o 29-S, a manifestación por un Aragón trilingüe, as chornadas por as libertatz nacionals, as anfifaixistas, ... Tamién bi ha habiu articlos sobre cultura, sciencia, television... Y Magic, que dende que cerroron Freakland lo he iu deixando a moniquet.

Diz que cal contar as anyadas d'os mixins multiplicando por siet ta transformar-las en anyadas humanas. No sé qual será a vida meya d'un blog, y que edat tendría alavez si estase una humana, pero aspero que iste se faiga bien viello y veiga a rienda de cosas pasar.

Bueno, o caso ye que ta celebrar-lo con todas vusatras, tos convido a una biera. Ista tardi de 18 a 20.30 seré en A Flama ta convidar-tos a un botellín d'Ambar (u refresco). Nomás cal que me digatz una d'as frases que siempre pencho debaixo d'o titol d'o blog. No vale a que agora ye penchada, no tos creigatz que tos lo meteré tan facil. Astí tos aspero...

Novedatz en aragonés

Quan feba clases d'aragonés, asoben prebaba d'explicar a l'almunalla as razons ta aprender aragonés. Entre muitas atrás, una d'ellas, chicota pero important, ye poder leyer a literatura que se fa en ista luenga. Y que, por un regular, no se traduz enta atras luengas. En zagueras he puesto leyer bellas cosetas en aragonés que me han feito bien de goi, y que querría recomendar-tos de leyer. En a venient Feria d'o Libro Aragonés de seguras que podretz mercar-los y sino i puyatz, en Nogara las tienen.

Charrando d'a Feria d'o Libro Aragonés, tos remero que se fa iste cabo de semana (4, 5 y 6) en Monzón y que bi serán todas as editorials principals de l'aragonés y d'Aragón. Nogara, Fablans, Xordica, Gara d'edizions, Consello d'a Fabla (carranyaus), REA y asinas asinas. Torna a puyar-ie o tren d'a cultura, o diya cinco, y tornan a fer-se os conciertos as nueitz d'o sabado y o domingo. O programa lo podetz consultar en a suya web.

Alas de papel. Gernika 1937. De Fernando Romanos. Estió o ganador d'o seiseno premio “Ziudá de Balbastro”. Un libro sobre o bombardeyo de Gernika en a Guerra Civil espanyola, dende l'anvista d'un mocet chicorrón a qui le fan a saber-lo de goi os avions. I describe a vida cutiana d'o mocet y de toda a comunidat en ixas envueltas. Tamién charra prou de muitos detalles historicos y tecnicos d'a guerra y d'o papel que i tenió l'aviación y a participación d'os faixistas alemans y italianos. O vocabulario y o modelo que fa servir d'aragonés fa que s'haiga de tener bell diccionario amán (a lo menos a yo me calió) pero ye sobrebuen t'aprender nuevas parolas y exprisions. O libro tien un chiquet apartau ta vocabulario, masiau curtet en a mía opinión, ta fer más facil a lectura. Un libro que se lei en un petén y que fa buena honra t'a literatura en aragonés. Fetz-le una uellada aqui.

Fillos d'as luengas. Misión multilingüismo. Santi Paricio. Ganador d'o premio Arnal Cavero de literatura en aragonés. Una aventureta prou intresant sobre o multilingüismo. O libro te fa viachar por Estaus Unius, Bruselas, Chapón, … describindo-ie prou os ambients de cadagún d'os puestos que te fa visitar. Os personaches son a saber-lo de bien feitos y pensaus ta enreligar-te en una trama de suspense y aventuras, digna de una cinta de Hollywood (ta quan en os cines?). Igual como l'anterior, se lei en un petén, pues a cada pachina quiers saber o qué pasará en a venient. Aspero que l'autor ya sía treballando en una continación pues o libro lo ye demandando tot chilando.

Espiello numer 33. Un nuevo numer d'O Espiello ya ye publicau. O segundo con a grafía d'ACAR. En iste numer d'agüerro contina con contenius de toda mena. A las seccions cutianas (sciencia y tecnolochía, a chugar a leyer, libros, discos, breus d'a luenga, noticias d'Aragón...) se suman dos entrevistas: la una a Santi Paricio, ganador de l'Arnal Cavero, y l'atra sobre as nuevas iniciativas interpresarials que fan servir l'aragonés: A Flama, Ara Cultural y Troballa. Y prou que articlos de toda mena: un sobre o festival Burning Man, atro sobre a psicolochía d'o coleccionismo y bella falordieta. Dende iste numer, tamién lo podetz mercar en A Flama que'n tienen ta vender.

Y con isto ya tenetz ta leyer bells diyas... Nos viyemos en Monzón y en a celebración d'o quarteno cabo d'anyo de Tierra de barrenaus.

(Post editau de raso en A Flama gracias a la suya Wi-Fi)

Kraftwerk y os fillos suyos

Hue he penchau en o Facebook Louie Louie de Iggy Pop en versión en directo. Muito buena, cal decir. Me pensaba, porque me lo dició no se quí, que yera una d'as cantas más versionadas d'a historia. Dimpués, alparciando por Youtube y mirando de trobar un video pincho de Kraftwerk, he parau cuenta d'a milenta versions que han feito de Das Modell. De toda mena. Asinas que contino pencho as versions de Kraftwerk en 1980, Rammstein, The Cardigans, Triology (un terceto de cuerda), MD Man (a istos no lo conoixeba) y prou que Aviador DRO. Ista zaguera, en tienen un versión prou millor grabada pero no la he trobada en Youtube....

Kraftwerk

Rammstein

The Cardigans

Triology

MD Man

El aviador DRO y sus obreros especializados

Ampraus 051

Ubro iste nuevo Ampraus con a tira, bien somarda, que publicó Cano en Heraldo de Aragón o diya d'a manifestación catalanofoba por a tornada d'os biens d'a Franja. (aclaración no necesaria: soi a favor de que tornen, pero o discurso d'a mani y d'a más gran parti d'as que la refirmoron yera ta vomecar). Dito isto, empecimiemos:

O noviembre antifaixista contina. Iste sabado ye a manifestación. Os nazis ya van anunciando as suyas movilizacions y cal dar una respuesta platera y contundent. Cal que, como tantos atras anyadas a manifestacion siga a rebutir de toda a chent que refusamos ixas fastiosas "ideyas". Tanimientres, antis y dimpués continan os actos de toda mena contra o faixismo

L'aragonés pareix que va a empentons. Bi ha meses que no pasa cosa y atros que no s'adube a tot. Iste ye un d'os zaguers. Se presentoron Alas de papel. Gernika 1937 de Fernando Romanos y Aspectos lingüísticos de Tella de Chabier Lozano. Os dos los podetz mercar en Nogara, por eixemplo... O 18 de tardis se presentará tamién a nueva grafía, en a versión ya esmiendada, en o IES Jerónimo Zurita de Zaragoza. Cuento que darán eixemplars a qui se i amane y ta todas as que no la conoixcatz encara ye un sobrebuen inte ta amanar-tos-ie y viyer as razons que tien l'Academia ta fer ista proposa. Tamién Aladrada pareix que rebilca dimpués de bell tiempo aturada y publica Textos sobre las lenguas de Aragón, de Joaquín Costa. Muitos libros y muito poco tiempo ta leyer-los totz....

Fendo Orella: Y más sobre l'aragonés! O pasau 15 de noviembre tornó a fer-se Fendo Orella, o programa de Radio Topo de raso en aragonés. O nuevo horario ye os lunes de 18 a 19. Qui no pueda ascuitar-lo en ixe ratet, puet baixar-se os programas en a web suya. Muito recomendable tamién ta qui siga aprendendo aragonés ista anyada.

Un poquet de mosica ta rematar: O domingo 21 a las 12.00 tenemos audición con DJ Roka y DJ Moon Stomper en A Flama. Ta pasar-ie un buen ratet de socalce con buena mosica, birolla y vermut. ¿Qué bi ha millor que fer o domingo de meyodiyas? O sabado venient, o 27, en o Centro Civico Delicias torna ¡Qué demasiao! A colla tributo a Joaquín Sabina que torna ta Zaragoza dimpués d'o suyo paso por Uesqueta. Ta sabinofilos como yo, toda una alfaya y una oportunidat de sentir as suyas cantas en vivo sin bosar más de vint euros...

Y como siempre, u quasi, cal zarrar l'Ampraus con un video y charrando de mosica, meteré un d'una colla de modernazos que, sí, lo siento, me fan goi. Tamién tiengo o mio costau fosco, ye de dar. Se dicen Delafe y Las flores azules y tanyen o 26 en la sala Oasis de Zaragoza. Asinas que con o mio boicott cutiano a la Oasis no bi iré, pero ya me flore. Prou que tamién influi o feito de que no tiengo con qui ir-ie... Ista ye una versión que graboron d'o video orichinal que me invio Arale. Muitas gracias!

Delafé y Las Flores Azules | Espiritu Santo | A 'BlackXs Live Sound' Take Away Show from La Blogotheque on Vimeo.

Ampraus 050

Noviembre plega plen de actividatz, manis y cosas bien intresants. Asinas que pertoca un Ampraus quasi de tot de convocatorias.

Yesa: fa pocos diyas estié en Yesa (o lugar) viyendo o monasterio de Leyre y, ya que i yera, a paret de l'entibo. Que penica! Por o camín viyemos os lugars albandonaus. Artieda s'endebinada dende a carretera y no podeba deixar de pensar en a luita de tantas y tantas anyadas contra o recreiximiento. Y astí continamos. Luitando contra ixa sinrazón. Ista vegada as nuestras quiestas companyeras se'n baixan t'A Inmortal ta convocar una manifestación que ha d'estar un exito. Ista por dignidat y chusticia d'a de verdat. Prencipiará o 14 de noviembre (domingo) dende a siede d'a CHE, en o zaragozano paseu de Sagasta. O diya d'antis Dada, Azero y La Orquestina del Fabirol amprarán o suyo talento ta ista chusta causa. Será en o Vico Oliver, en El túnel, a las 21. As dentradas se venderán nomás en ixe puesto asinas que caldrá estar-ie un ratet antis ta guaranciar-se de pillar-ne una. Un gran concierto ta una gran causa.

Noviembre Antifaixista: Deban d'as enrestidas d'a ultradreita y d'a dreita sin más, a Coordinadera Antifaixista de Zaragoza y o Bloque Independentista de Cuchas, organizan un noviembre rusient d'actividatz que ya han prencipiau. O domingo estié en a visita guidada t'a exposición sobre l'anarquismo que bi ha en o Palacio de Sastago y, si ixe contina estando o ran, as chornadas serán sobrebuenas. Charradas, tallers, procheccions, teyatro... de tot. Tenetz un calendario en a web d'A clau roya (y en muitos atros cabos) con todas as cosas que se fan. Y viyeremos o qué pasa o diya 20 en Torrero. A viyer si o delegau d'o gubierno deixa a os faixistas fer lo que les agane como siempre u ista vegada cambean as cosas (que me pienso que no).

Quanta caspa s'ha visto istos diyas entre a visita d'o Papa y a manifestación d'os biens d'a Franja. Espanyolismo, catolicismo... De verdat somos en 2010? Franco morió u estió tot un suenio?

Ta rematar, gracias a lo facebook d'o Todopoderoso, pencho un video d'un Lipdub independentista (que tien o record d'o mundo) que facioron en Vic (Catalunya) a o ritmo d'Obrint Pas y a suya Flama de tot un poble en moviment.

Exercendo lo pasquinismo 001

Prencipio con iste un alpartau nuevo d'ixos que tanto goi me fan. Igual como Lo millor d'a semana (mutau en Ampraus), microbarrenaus u En leyendo, Exerciendo o pasquinismo se plenará de contenius de cabo ta quan, quan tienga prou material. Yera una ideya que me dondiaba o tozuel dende feba tiempo.

O periodismo ye una profesión más que digna. Pensé en estudiar-lo bell tiempo, pero as cosas d'a vida y o feito de que t'a part d'alavez no se podese estudiar en Zaragoza, ni en Aragón, me levaron a no fer-lo. Con tot y con ixo, leigo asoben periodicos, veigo as noticias en TV y radio de mass-medias y prou que tamién en os meyos alternativos, contrainformativos u como les quieratz clamar. L'exercicio d'o periodismo ye en un muit mal inte, en a mía opinión. As periodistas s'han convertiu en pasquinistas (d'astí o titol d'a sección) y sirven a intreses politicos u interpresarials, si ye que bi ha esferencia... Se ha creyau una nueva profesión d'opinadora u rufiertera, mesmo pior, que no fan que bella mena de show en o ratet d'antis d'a chenta. Opinan de tot sin, por un regular, saber de cosa.

Sirva iste nuevo alpartau como una chiqueta denuncia de tot ixo. Prebaré de fer as declaracions en TV y radio lo más literals posibles, encara que, como no siempre tiengo papel y boli amán, será imposible que sían 100% literals. D'os periodicos meteré o vinclo siempre que sía disponible, prou que sí. Agora, prencipiemos...

"Hay un dato muy importante: la actuación de los piquetes, es decir, la actuación de la violencia". Sentiu en Antena 3 en o maitín d'o 29-S, bells segundos dimpués de dar a noticia de que heban atropellau a un piqueter en MercaBarna. Sinyalar a vergüenyosa identificación piquete = violencia y, pior encara, dimpués d'una noticia a on que un piqueter yera victima d'a violencia. Impresionant.

"La información la dan los medios de información. No hacen falta piquetes". Sentiu en Antena 3 en o maitín d'o 29-S. Sisquiá no'n calesen. Sisquiá as periodistas cumplisen a suya función. Pero no lo fan, y ye esclater de tot. ¿Qué concepto tien ixa (u ixe, no lo remero) periodista de información? En o Heraldo d'o 30 de setiembre tasament adedicoron un parrafo a la plataforma "Que la crisis la paguen los ricos" y dos a la CNT en toda una pachina sobre a vada en Zaragoza. ¿Ixo ye información? ¿No calen os piquetes? Por favor!

"Se llama Pepito y no es un grillo, sino todo lo contrario: un dinosaurio". Sentiu en Antena 3 en o programa de maitins, presentau por Susana Griso. Ista ye simplament comica. ¿Dende quan o contrario d'un ferfet ye un dinosaurio? Ye mas: ¿Dende quan un ferfet tien un "contrario"? O contrario de calor ye fredor, ye de dar, pero, por definición un ferfet no tien un contrario. Penible.

Con istos tres eixemplos d'Antena 3 prencipia Exerciendo o pasquinismo. Continará...

Sant Agustín de Hipona

De fa tiempos me fa goi de saber un poquet d'a historia d'as carreras de Zaragoza. Más que más, d'as d'a Madalena, o vico a on que vivo y prou que o millor de Zaragoza y d'o mundo. M'intresé por a carrera Sant Agustín y por saber qui yera ixe personache y que heba feito ta que le dasen una carrera en Zaragoza. Y be-te-me que ye tot un eixemplo de un buen cristiano. Masclista, anti-scientificos y imposador d'o cristianismo a sangre y fuego si ye menister. Gracias a Pixe, qui me pasó un vinclo a una web sobre vidas de santos, m'enteré d'a versión catolica d'a vida suya.

Un articlo que remata con a frase:
"Con él se lega a la posteridad el pensamiento filosófico-teológico más influyente de la historia. " No puedo estar más d'alcuerdo con ixa frase. Pero conoixcamos as opinions de San Agustín de Hipona (354-430 d'a era cristiana). A más gran parti son ampradas d'a web SinDioses...

"El buen cristiano debe permanecer alerta de los matemáticos y todos aquellos que realicen profecías vacías. Ya existe el peligro de que los matemáticos hayan hecho una alianza con el demonio para oscurecer el espíritu y confinar al hombre en las ataduras del Infierno."

"Las heridas de un amigo son mejores que los besos de un enemigo. Amar con dureza es mejor que engañar con delicadeza... En Lucas 14: 23 está escrito: 'Obliguen a la gente a entrar'. Con amenazas de la ira de Dios, el Padre atrae almas hacia su Hijo."

"Nada rebaja tanto a la mente varonil de su altura como acariciar mujeres y esos contactos corporales que pertenecen al estado del matrimonio."

"Es Eva, la tentadora, de quien debemos cuidarnos en toda mujer... No alcanzo a ver qué utilidad puede servir la mujer para el hombre, si se excluye la función de concebir niños."

"Las mujeres no deben ser iluminadas ni educadas en forma alguna. De hecho, deberían ser segregadas, ya que son causa de insidiosas e involuntarias erecciones en los santos varones."

"Dos clases de humanos, los cristianos y los judíos. La luz y las tinieblas. Pecadores, homicidas, basura revuelta."

Lo dito: tot un eixemplo de cristianismo.

Ampraus 049

Dimpués de pasar o reseco pilarista y de tornar t'os treballos, caldrá continar escribindo, no? Y como ya sabetz que soi muito chandro, pues torno con un ampraus. Un poquet de tot.

Quanto vale? Ye una d'as frases que más sentié decir en Pilars. Por treballar en un bar y porque en salir-ne, un par de nueitz m'amané t'o cabaret que organizaba Dada en a Plaza San Pedro Nolasco. En no estar subvencionau por o concello, ni por garra atra institución, terne que terne pasaban o chaper ta replegar as perras d'a chent que i yera a lo chilo de "¿Quanto vale?" " Vale menos un concierto que una chambreta de Zara?" Quantisma razón. O show que i facioron mientres os Pilars estió tot un eixemplo de cómo fer as cosas autochestionadas. Humor, mosica, más humor, contorsionismo, poesía... ta tot lo mundo. De baldes, u no, seguntes lo que cadagún querese y podese dar. A saber-lo de momentos ta no ixublidar como a versión reggae de "Soy el novio de la muerte", os sobrebuens conciertos de Dada y Los teloneros u o monologo sobre a perda d'a virchinidat de Juako Malavirgen. Asperemos que en os Pilars venients torne a haber-ie bella cosa parellana... ¿Quanto vale?

O movimiento okupa en Zaragoza ye bien fuerte en as zaguers anyadas y son fendo reyalidat ixo de "un desaloix, una atra okupación. Malas que son forachitaus d'un espacio liberau, en prenen un atro. Quan prencipié a escribir isto existiba encara La Vieja Escuela y en tasament tres diyas l'antiga garchola de Torrero ye estada liberada por as okupas a on que se ye fendo agora mesmo o Hackmeeting. Asperemos que dure bien de tiempo y se i puedan organizar tantas u más cosas que en os anterior C.S.O.'s que bi ha habiu en as zaguers anyadas. Suerte!

"L'aragonés ye bien vivo" torna ta La Enredadera iste mesmo domingo. Se i charrará de muitas cosas y, como ye de dar, d'o empecipiallo d'os cursos d'aragonés. ¿Cómo? ¿Que encara no te i has apuntau? ¿A que yes asperando? Por ufierta no será... Nogara fa cursos de maitins, de tardis, os cabos de semana, on line.... Fablans tamién. Y de seguras que en a tuya redolada, si yes de difuera de Zaragoza, bi ha bella asociación que'n fa. Y si no, posa-te en contacto con qualsiquier d'as debanditas asociacions que bell apanyo podrán fer. Prou que millor presencials que no pas a distancia. Que o contacto humano ye muito important, moceta!

Marcelino marcha ta Madrid. Caleba charrar-ne. Pero poco en queda por decir. Ha estau o manso d'os mansos. O president que no se movió y salió en a foto. Ya me pareixeba a yo que tornar a fer clases de esquí, como que no... Nos deixa o marrón de que a venient presidenta será u Almunia u la Rudi. Villamala y Villapior. Ai mama! Madalena independient y autochestionaria ya!

La rematadera la da o debandito video d'o cabaret, o reggae de Soy el novio de la muerte "perpetrau" por Diego Peña. Que tos faiga goi.

microbarrenaus: zarrau por Pilars

Istos Pilars me toca de treballar, como muitas sabretz, asinas que poca fiesta podré tener. Prebaré d'ir ta Comando Cucaracha o miercols y ta Barricada o viernes, pero ixo ye tot. A lo menos podré estar en os Pilars d'A Flama y en as barras d'o BIC, que estianyo se meterán en a Plaza d'a Madalena... Asinas que astí nos viyeremos. Tierra de barrenaus cuento que remanirá zarrau dica o 18 u más. Que tos faigan buen prebo as fiestas y fetz-me una visiteta!

...y o 18, baixa por borina.

En leyendo... Aqui, asti, alli (3 de 3)

.... y remataremos ista serie con o Dr. Francho Nagore y a suya Gramatica. Aspero que haiga feito honra.

Amprau de Gramática de la lengua aragonesa. Francho Nagore Laín. Mira Editores. Zaragoza, 1977.

- astí = ahí (aunque, a veces, puede traducirse por ‘aquí’ o por ‘allí’): y tó que tos digo, amigos / d’aquí y d’astí y d’allá = y todo lo que os digo, amigos / de aquí y de ahí y de allá (A. CONTE, p. 21); ¿Cómo le ha ido astí por casa? = ¿cómo le ha ido por ahí, por casa? (Danze de Sariñena; DEL ARCO, p. 200); astí ye a mía cheografía = ahí está mi geografía (E. VIDENTE DE VERA, p. 13)

En leyendo... Aqui, asti, alli (2 de 3)

Y dimpués de l'ansotano, o belsetán...

Amprau de Aspectos morfosintácticos del belsetán (aragonés del valle de Bielsa). Chabier Lozano Sierra y Ángel Luis Saludas Bernad. Gara d’Edizions. Zaragoza, 2005

Adverbios deícticos:

Los adverbios deícticos belsetanes son aquí, astí y allá / allí. Como ya se explicó al hablar de los demostrativos, en aragonés belsetán el segundo término adopta funciones del primer y tercer términos del castellano (el aquí castellano más lejano y el allí castellano más próximo). Veamos algunos ejemplos de su uso.

- aquí: cuan aquí nos afoguemos “cuando aquí nos ahoguemos”, (…), no pas aquí “en absoluto aquí”, e pa ir ta Plan tenenos que pasar per aquí enta baixo “y para ir a Plan teníamos que pasar por aquí hacia abajo”, yo no yere aquí “yo no estaba aquí”, aquí el deixo pa tú “aquí lo dejo para ti (…)

- astí: adverbio locativo típico del aragonés y del catalán noroccidental fronterizo con el aragonés: (…) astí an que ye la casa es forestals “ahí donde está la casa de los forestales”, ¿qué t’han feto astí difuera? “¿qué te han hecho ahí afuera?”, (….), bas a fer cuatro pins per astí “vas a cortar cuatro pinos por ahí”, astí fa brempa de camín “ahí da la sombra rápidamente”, (…)

- allí – allá: como ocurre en benasqués el primero es más concreto que el segundo: (…) per allí i eba un rabaño de casas “por allí había muchísimas casas” (…), me bañabe allí en’o río “me bañaba allí en el río (…) ¿e no se’n ban cara allá? “¿Y no se van hacia allá?”, d’agüerro marchaban t’allá “en otoño se marchaban hacia allá”

- dillá / dellá: adverbio que expresa la máxima lejanía, suele combinarse con el adverbio astí: astí dillá en’a codera la Pina ye l’alatre “ahí lejos en el fondo de la Plana está el arado”(…) Cuando va solo su significado más preciso es “al otro lado”. Frente a este adverbio nos encontramos su opuesto decá “el lado de aquí” (…)

En leyendo... Aqui, asti, alli (1 de 3)

A viyer si ya aprendemos a fer-los servir bien...

Amprau de El aragonés ansontano: Estudio lingüístico de Ansó y Fago. Miguel Ángel Barcos. Gara d’edizions. Zaragoza, 2007.

Adverbios deícticos:

También llamados demostrativos, son en ansotano aquí, astí y allí / allá.

- Aquí. Denota cercanía extrema, aunque está muy confundido con el adverbio astí, que en buena parte de realizaciones ocupa el espacio completo de aquí. De tal forma es así que las locuciones biene t’aquí o biene t’astí “ven aquí” tienen el mismo valor.

- Astí. Denota cercanía. Todo aquello que se encuentre a la vista. Como ya se ha comentado, astí ocupa buena parte de las denotaciones del “aquí” y del “allí” castellanos. Ejemplos: Astí en ixas peñas “ahí / allí en aquellas piedras”, astí mesmo tiengo os trucos “aquí / ahí mismo tengo los cencerros”

- Allí / allá. Denota lejanía extrema, prácticamente lo que ya no se alcanza con la vista. Allí tiene un sentido de más concreción que allá. Ejemplos: En Aguatuerta, allí sí que se’n fa “en Aguatuerta, allí si que crecen (hongos)”, estió soldau t’allá t’Africa “fue soldado allá en África”.

Estos adverbios pueden ir precedidos de preposición y combinarse con otros adverbios. Ejemplos: aquí baxo “aquí debajo”, t’allá “para allá”

(…)”

De manifestacions y sinyals

Bi ha muitas valuracions que fer d'a manifestación d'a plataforma "Que a crisi la bosen os ricos" y se son fendo por totz os cabos. Muita chent, muito esferent, una alternativa, una gran compleganza de movimientos socials "d'abaixo y a la cucha" que dicen as zapatistas y asinas asinas. Podetz leyer-las en blogs, webs, "feisbus" y tot ixo que se'n ye charrando muito. O mío analís no cambiaría guaire d'o que se i ye fendo, en totz ixos puestos, asinas que poco a adibir en tiengo. Manimenos sí que bi ha un aspecto que me'n fería goi de charrar, pues quereba escribir bella cosa sobre isto dende feba muito y no sabeba guaire bien cómo. No ye que a "simbolochía" que se i fació servir.

Dende que prencipiaba a dentrar en os movimientos politicos y en a cucha alternativa, por clamar-la de bella traza, bi ha habiu debatz perens. Que si violencia sí u no pas y en que grau, que qui apareix en as cabeceras, que si deixamos a los tal u qual organización dentrar en tal u qual plataforma, que si legalizamos a manifestación.... y prou que si en a manifestación que pertocase se podeban levar sinyals y quals.

De chicorrón gosaban as anarquistas queixar-se por os sinyals nacionals d'Aragón en as manifestacions. Os suyos sinyals, os anarquistas, pareixeba que no yeran "trapos de colors", que nomás en yeran os nuestros. Dimpués muita chent se queixaba d'os sinyals de partius u d'organizacions, por un regular más grans que no la que perteneixeba a persona que se queixaba. En as manis d'a segunda guerra Iraq-USA, o lema oficial yera que dengún no i levase garra identificación de garra mena.

Ye una opción respectable y, prou que si una asambleya u plataforma que organiza una manifestación diz de no levar-ne lo respectaré, como facié en a mani d'as luengas, y no i portaré cosa. Pero no ye una decisión que me faiga goi. Por un regular me fa muito más goi de viyer qui va ta una manifestación. Me fa goi de viyer todas as colors politicas refleixadas. Que siga platero qui bi ye y qui no pas. No veigo porqué una persona ha d'amagar a suya opción politica y expresar-la visualment en una manifestación. Y más si ye una manifestación convocada por organizacions tan diferents como en as debanditas u en a vada d'o 29-S. Que OSTA quieren ir todas chuntas en plan lechión romana, en formación, con chalecos y sinyals ta todas? Pues bien, que faigan lo que les pete. Que a resta hemos iu en colletas mezcloteyadas a on que se viyeban en poquetz metros sinyals anarquistas, comunistas y independentistas? Pues ye a nuestra opción igual de respectable. Y en a mía opinión prou polida. Que se i viyesen pegallos de todas as organizacions, sinyals de todas as opcions politicas. Que tanyesen quasi de conchunta batucadas y donzainas. Tot ixo ta yo no ye oportunismo politico u proselitismo, que tamién puet estar seguntes cómo se faiga. Ta yo ye muito enriquidor. Ye un sinyal de que somos plurals, de que tenendo esferents ideyas y motivacions podemos meter-nos d'alcuerdo, en bells minimos a lo menos. De que todas, de conchunta, y repectando as nuestras esferencias, podemos prencipiar a construyir un mundo esferent. No portar garra sinyal nos fa a todas iguals y ixo no ye necesariament bueno.

Muitas dicen que bi ha organizacions que no van t'as manifestacions que ta fer nuevas socias, afiliadas, militants u lo que sía. Lo primer, yo no sé qué piensan en as organizacions que no i soi, asinas que habríanos de estar prudents en fer seguntes que valuracions. Segundo, si una organización X crei en una luita, ha de fer tot lo posible por arroclar a más chent en ixa luita. Y dentrar en ixa organización X ye una traza de fer-lo. Ta qui ye en X, de seguras que ye a millor traza de luitar, asinas que ¿por qué no ha de convidar a fulana u mengana a que luite y a que luite en a suya organización?. Una afiliada, socia, militant... más ye una persona más que va a tener información, que va a estar organizada, que va a ir t'as manifestacions y convocatorias de X y de todas as plataformas y asambleyas a on que sía X. Que va a conoixer a chent d'atras organizacions y de tot lo teixiu social zaragozano y aragonés. En a mía opinión, hemos de sacar-nos os complexos y hemos de fer vistero a que organización u movimiento social perteneixemos todas (si queremos, prou que sí, que bi ha chent que simplament no quier que a resta lo sepa).

Antimás, l'actitut d'una organización en una manifestación ye sinyalera d'a organización en si mesma. Si son disciplinadas u no pas, horizontals u verticals, combativas u sozmesas, ubiertas a las resta d'ideyas u zarradas a toda influyencia exterior y prou que si a luita les importa más u menos que a organización, tot ixo se vei platero en as manifestacions. Y cal que se veiga.

Tamién siempre bi ha habiu chent queixando-se de que s'esparda información d'atras qüestions en as manifestacions. En ista d'a vada, me plegoron pasquins de as organizacions en esfensa d'o Sahara, de una convocatoria de manifestación que fa MHUEL por un estau laico o venient 23 d'octobre, d'as actividatz en o C.S.O. "La vieja escuela"... Por qué no s'ha d'aprofeitar una manifestación por os dreitos laborals ta fer plegar atros mensaches que pueden estar intresants ta qui bi ye? Muitas d'as que i yeranos somos intresadas por todas ixas causas tamién. Qual ye o problema?

A manifestación d'o 29-S, y tot lo que se fació de maitins tamién, estió, ta yo, eixemplar de muitas cosas. Una d'ellas ixas. Que de goi que me fació viyer-ie toda ixa ripa de siglas, sinyals, chapas, chambretas... se esferents sensibilidatz, de conchunta por una mesma causa. Si todas estasen asinas, millor iríanos... Gracias a todas qui hetz feito posible ista compleganza d'organizacions, movimientos socials y chent de toda mena.

Vada, desinformación y (des)informativos

Mientres istos diyas pre-vada cheneral he charrau con muita chent. D'os treballos míos, clients, amigas, parentalla, de tot... M'he sorprendiu a saber-lo d'a desinformación cheneralizada que bi ha. Muitisma chent no sabeba nian que no cobraba ixe diya si feba vada. Chent con as suyas carreras universitarias y belunas mesmo con "puestos de responsabilidat". Chent ixorrontada por a posibilidat de quedar-se sin treballo si iban t'a vada y chent que s'ha trusquiu toda a vasuera (des)informativa d'os telediarios.

Hue he visto un poquet d'un informativo d'Antena 3. I apareixeba toda a información sobre os servicios minimos, quantas gasolineras bi habrá ubiertas, quantos cercanías, quantos aves y asinas asinas. Tamién cómo paraban CC.OO. Y UGT o diya d'a vada y prou que muitisma demagochia sobre os piquetes informativos d'os sindicatos (nomás que d'istas dos organizacions, prou que sí).

Manimenos d'información trascendental en he vista poca. No soi periodista ni prebo d'estar-ne, pero viyendo lo que bi ha arredol de yo, me pareix que podrían haber charrau d'atras cosas, que sí que cal informar-ne a la chent. Podrían haber charrau d'os efectos legals que puet tener fer vada. De que no se cobra ixe diya. De qué fer si te sientes menazada en o tuyo puesto de treballo. D'a presión interpresarial ta que no faigan vadas. Y asinas asinas, replenar tot l'espacio que han empliu de demagochia y de desinformación con información de verdat util t'a chent. Una atra prebatina de desmovilizar a las "vaderas" y de chitar fiemo sobre una vada que no solo ferán UGTCCOO. Que ferán as obreras independients d'ixos sindicatos, que feremos todas as que pensamos que cal fer-la, independientement d'o que pensemos sobre ixas organizacions.

No sé si se conseguirá cosa. Prou que ista vada s'hese d'habiu de convocar muito antis. Pero con tot y con ixo, fer vada maitín contina estando un exercicio de coderencia de todas as que no somos d'alcuerdo con a endrecera que se ye prenendo en lo laboral.Ta qui tenemos esmo ye a traza de poder dormir tranquilas a nuei d'o 29-S. Porque habremos feito lo que ha caliu.

(Vinyeta amprada d'o blog Territorio Vergara)