Trache #Inktober 02

Diz que pa miraglos, ta Lorda. Pero como a yo me queda masa luent, me’n soi veniu ta Xaraba, t’o balneario, que diz que te i curan tot. Yo quereba curar-me las penas, pero no i hai garra augua que te cure ixo. Ni la bebida, prou que no, que ye lo que preban de fer a-saber-los. Cuento que pa ixo, pa curar-te las penas, te caldrá Lorda. Pero me queda masa luent. Y masa caro. Encara que hese feito pocha toda la mía vida, no creigo que me l’hese puesto permitir. Lo de Xaraba, sí, porque me tocó bella perreta en una quiniela de dotze. No guaires. Lo chusto pa pagar una semaneta d’aloix. Con la edat que tiengo talment no me quede guaires semanetas. Aquí no curarán las penas, pero si me curasen la esquena ya me faría contento. Con ixo ya tiengo prou. Que me fa mal quan cambeo de postura. Y quan me quedo por muito tiempo en la mesma postura. La realidat ye que me fa mal terne que terne. No deixa de fer-me mal nunca. Tanto anyo treballando, acochando-me y devantando-me, carriando cosas d’un puesto t’atro... ¡como un somero que he fochau yo!. Y en chubilar-me m’empecipian a dar totz los mals que nunca no heba patiu. Que de baixas yo, pocas n’he disfrutau. Los mas chovens ya veniban sabendo-se los dreitos, y fendo lo que hese d’haber feito yo. Que si les feba mal qualcosa, se quedaban en casa dica que se trobasen millor. U clamaban a lo medico d’a interpresa, que yo no sabeba ni lo telefono suyo. A yo me feba vergüenya. Y una mica de miedo, tot cal decir-lo. A seguntes que edatz ya no te pillan pa treballar en garra cabo, asinas que t’has d’estar a on que sigas y prou. Ixo ye como una condena. Bella mena de secuestro d’amagatons. Como los presos que van nomás t’a garchola a dormir, pero de revés. Yo saliba d’a mía garchola personal pa dormir.

Lo caso ye que me’n venié t’aquí, ta Xaraba, t’o balneario, que diz que te i curan tot. Me calé lo trache bueno, que siempre que voi a conoixer a chent nueva me fa goyo d’estar presentable, elegant. Implié la maleta con lo chusto. Una muda, un par de libros, cauquerré y lo neceser. Pillé l’auto, que encara puedo guiar. Diz lo fillo mio que no, que los d’a revisión medica cobran precisament pa pasar-te-lo tot encara que sigas en las tres pedretas. Pero yo la he pasada. Veyeba las letras que me dició la zagalica con la bata, y lo catatico d’os rudios, ixe que ye como los videochuegos, no me chufló guaire. Asinas que soi en condicions de guiar. Si lo dicen los medicos, ells sabrán mas que no lo mio fillo, que no ha feito que una efepé de soldador. Que de soldar sabrá, pero no pas d’as cosas d’a medicina. Pillé l’auto, como te deciba, y me’n venié t’aquí. Camín-camín y chino-chano. Y si chuflan por la carretera, que mas d’un me chufló porque, en estar viello, voi a monico, a la marcheta, pues que chuflen. Como deciba la historieta ixa d’o burro y lo tren: “chufla, chufla, que como no t’apartes tu”.

No heba estau nunca en un balneario y me l’asperaba d’atra manera. Mas como un hespital, como si venise un exercito de enfermeras y te fotesen con chorros d’augua. Y te levasen d’un cabo t’atro fendo-te prebas. Pero no. Quan plegué ya me quedé bien enarcau. En ye de bonico tot isto. M’enamoré de camín d’o riu, con la mormor ixa que fa tant agradable, y ixe camín, que va seguindo-lo, tot rodiau d’arbols y paixariquetz que piulan en veyer-te arribar. U no, talment sigan piulando de contino y lo que pasa ye que no los sientes dica que pasas por debaixo. Y en los puents, si te miras t’abaixo, i hai un puntal de peixes limpio minchurriar los trocetz de pan que les chita la chent. Mas que mas la cachimalla. Y bell lolo, como yo, que guaires atras cosas a fer, no’n tenemos ya. Fa goyo de veyer-los astí, indo varrenaus, con la boca patalera, a trusquir-se tot lo que caiga. Fa goyo veyer ixa simpleza. No tienen maldat. No fan que minchar y nadar y a dengún no fan mal. Ya que bi hese mas personas como peixes, que n’i hai que no fan bondat en la suya vida entera. Y por lo que siga Dios, a ixos, les ne da una de bien larga. Yo no sé qué criterios tien, Dios, porque yo, que creigo que he estau bueno totz los anyos que levo sobre ista tierra, no m’ha dau que lo mal d’esquena iste que me viengo a curar. La paga, la chiqueta paga de chubilación, diz que me la da l’estau, pero no pas. Que ixa me la he ganada yo cada vegada que m’acochaba, cada una que me devantaba y cada peso que carriaba. ¿U que quieren que faiga agora, con la mia edat y firme chaquiento? ¿Que me pudreixca por astí? ¿Que se me minche bell vueitre? U me dan bella perra, que ya me la he ganada, u me deixan morir, no i hai alternativa.

Pues ixo, que con la paga chiqueta, me da chusto pa vivir, pero como gané la quiniela de dotze, que guaires perras no son, pero pa una semana aquí, en tiengo prous, me’n vinié ta Xaraba. Que Lorda me queda masa luent y se m’iba de presupuesto. Y aquí soi en banyador, quasi en coritatis porque se m’ha quedau chiquet, en ista badineta que tienen aquí montada. Con l’augua asinas, calenteta, yo creigo que se m’amillorará la esquena. Las penas no sé. Cuento que pa ixo talment calga Lorda. Por agora me voi a quedar aquí un rato mas y dimpués, de tardes, me faré una gambadeta por lo riu. Antes pasaré por lo furno, a veyer si me dan bell coscurro que les haiga sobrau, y asinas, a esmodregón, les ne voi chitando a los peixes quan pase por lo puent y aproveito pa contar-les las penas mías que, quan se recuentan, pareixe que se comparta lo suyo peso y con tanto peix que n’i hai, a poca pena que se leven, d’una parte ya me’n libraré.