Secretos de confesión: Historias d'un cole de mosens III

Sisquiá recuerdo quan estió a primer vegada que me confesoron. Pero sí que recuerdo perfectament fer-lo una arrienda vegadas, esdevenindo-se rutina quan encara yera bien chiquet. A confesión, igual como as misas u as oracions de maitins, feba parte d'a nuestra vida de borches, igual como podeba fer-lo lo futbol u Espinete.

Nunca no he entendiu que a sociedat permita que a personas tant chiquetas se les fique en toda ista ripa de rituals absurdos y tant ideyolochizaus, y muito menos que lo faiga con tanta naturalidat, como si fuese normal. Entiendo perfectament que lo faiga a ilesia, pues a suya falta absoluta de argumentos lochicos fa que haigan de tirar d'os recuerdos más emocionals y ilochicos, producius más que más en as vivencias d'a nineza. Normalizar ritos y practicas sin sentiu ye de millor fer entre ninos que no pas entre adultos. Sino, preba a decir-le a un adulto que no lo ha feito nunca que vaiga a soben a contar-le a un mosen lo que "ha feito mal".

Estié en Coras entre os 6 y os 14 anyos. Qué de malo puet fer un zagal en ixos anyos? Qué le podebanos contar a o mosen de turno? A confesar-nos nos baixaban en clases enteras. Tot un curso, bell ciento de ninos, empliba a ilesia que tenebanos en o cobaixo d'un d'os edificios. Bells quantos mosens se posaban en uns chiquetz confesionarios ubiertos, sin ixa separación que sale en as pelis yankis y ibanos pasando-ie a daria. Como aquello gosaba de tener un tiempo determinau ta confesar-nos totz, belun galvaniabanos a viyer si nos tocaba de puyar antes de no pasar por o mosen. Atros "chirmans" s'adedicaban a cusirar-nos, bien a la tisva de que totz pasasenos por as orellas d'aquells mosens tant chafarders.

Nos posabanos en as cadieras. Os menos resistents a aquello, a escape se devantaban y iban t'a confesión. Nos achenullabanos en frent d'o mosen y santiguando-nos decibanos as parolas machicas "Ave María purísima". "Sin pecado concebida" respondeba. Y prencipiabanos o relato os probes zagalotz que, recordemos, febanos menos de catorce anyadas.

- Pueeeees,..... m'he tricoloticau con o mio chirmán
- Ai fillo no t'has de tricolotiar con o tuyo chirmán. Qué más?
- Pueeeees, ..... no sé....
- Bella cosa más tendrás.
- De cabo ta quan digo bell "taco".
- No has de decir tacos. Qué más?
- Pueeeees, .... no sé .... cosa
- Te portas bien con tu mai y con tu pai?
- Sí, prou que sí.
- Pues vienga. Tres painuestros, quatre avemarias y no te baralles con o chirmán tuyo, eh? Ego te absolvo patatin patatan.

Asperabanos a que rematase a retolica, te tornabas a santiguar, y te'n ibas t'as cadieras an que, achenullau atra vegada, mormostiabas o tiempo que calese dica que "o mosen cusirador" t'hese visto rezando y ya no tenese dubda que hebas pasau por tot lo proceso. Ya en ixas envueltas, quan muitos encara tenebanos a fé imposada por as nuestras familias, prebabanos de fer fuchina d'aquell catenazo. No por rebeldía u ateismo, que ixo tardaría a plegar, sino por puro aburrimiento. Tot aquello d'a confesión yera un rato d'estar-te callau, sin fer atra cosas que viyer a los tuyos companyers achenullar-se a daria y preixinar qué ostias contar-le a lo confesor.

A la hora, t'heses confesau u no, tornabanos t'a clase. Asinas que muitos prebabanos de confesar-nos os zaguers, a vier si entre unas cosas y atras, pasaban aquells sisanta minutos, y no nos caleba aguantar o ferrete aquell. Con o pasar d'os anyos, ibanos perfeccionando as estratechias ta escusar-nos a confesión, u fer-la más amena. Si o "mosen cusirador" s'espisguardaba, u yera de charreta con belatro, prebabanos a achenullar-nos en a mesma cadiera, y fer como si ya hesenos pasau por o confesor y estasenos ya recitando la penitencia que nos ubriría temporalment as puertas d'o ciel. Con ixo me libré de más d'una.

Ta no aburrir-nos tanto, y como no se nos permitiba charrar, hebanos ideyau tot un sistema de cenyos ta que, qui se confesase antes de nusatros, nos marcase seguntes qué cosas. A qué le feba pudor l'aliento a o mosen, quantos painuestros l'heba encargau, ... Si o confesau se tocaba la orella, o confesor feba pudor a vin, si cucaba un uello, o "chirman" yera sondormiu y podebas hopar a escape,... y asinas prebabanos de fer más curto totz aquells minutos cacegaus en as nuestras encara curtas vidas.

Ya de más mayors, prencipiabanos a tener más astrucias y a esmaliciar-nos. Un diya, con bell companyer más, entre que baixabanos en ringlera t'a confesión, nos esbarremos por un pasillo sin que en parase cuenta o mosen. Pero quan ya yeranos celebrando a nuestra victoria, atro mosen nos pilló y nos preguntó que i febanos. Dimpués de bella prebatina fracasada de inventar una historia, le diciemos a verdat: que no querebanos confesar-nos, que no nos feba goyo y que no tenebanos garra pecau que confesar. Ell nos prencipió a charrar d'a importancia d'a confesión, de Chesucrito, os anchels, os santos y o copetin bendito.

Encara me foi cruces d'o resultau d'aquello. Quan asperabanos lo menos bell castigo de copiar licions u qualcosa parellana, o mosen nos dició que podebanos no ir t'a confesión pero que hebanos de quedar-nos en clase. Que no yera obligatorio. D'una man, celebremos aquello como una victoria. Nunca más habríanos de confesar-nos. Nos librabanos de toda ixa mierda que tanto nos aburriba y que tanto tiempo nos sacaba en una edat que una hora suposa meya vida. D'atra man, nos preguntabanos por qué no nos heban dito antes dengún, que existiba a posibilidat de no fer confesión. Encara que lo sabebanos perfectament. Si nos hese dau a opción, os confesionarios se vuedarían de camín. Belun habió de tornar a confesar-se, porque os pais suyos l'encarranyoron. Pero tanto yo, como belatro companyer d'a "resistencia", dende alavez pasabanos as horas de confesión leyendo u fendo os quefers de clase. Cosas muito más utils que chafardiar con mosens u charrar con sers imachinarios, ye claro.

Agora, con os uellos d'un adulto, contino sin trobar-le sentiu. A confesión cuento que ye bella mena de terapia u de consellería, t'o cristianamen, y ixo lo puedo entender. A qui no tienga garra atra persona con qui charrar, y creiga en tot ixe sistema de sers machicos alaus, puede fer-le honra recontar os suyos problemas. No creigo que siga la forma más adeqüada, pero cadagún fa lo que quiere con a suya vida.

Pero ninos de 10 u 12 anyos, ¿qué pecaus van a fer? ¿qué necesidat tienen de recontar-le a un viello meyo capin que se tricolotean con o chirman suyo, u que l'han furtau un monyaco a lo companyer de mesa? ¿Por qué transmitir a la catrinalla toda ixa culpabilidat perén y sadomasoquista d'o catolicismo? ¿Por qué a sociedat lo permite y mesmo vei con buenos uellos?

No m'alcuerdo que libros leyié en ixas horas que no habié de confesar-me. Ni qué licions aprendié, en fer aquells quefers. Ni qué facié en as horas de chuego que, gracias a haber-los feitos, podié disfrutar. Pero m'alcuerdo perfectament d'o sentimiento de libertat que tenié en librar-me d'a confesión, y de poder aprofitar o tiempo. Qualsiquier cosas que fese, por fata que fuese, a fé que me fació más honra t'a vida mia, que achenullar-me ta satisfer a insana alparcería d'un mosén.

Festivaleando o verano de 2016

Azero en o I Salvem lo riu

Ya somos a pocas de prencipiar a temporada de festivals y voi emplindo l'achenda estivera de cabos de semana de viaches, mosica, badinas y borina. De festivals, n'i hai a patacadas. De grans y de chiquetz, de toda mena de mosica y d'ambients. Regular que muitas trigariatz atras opcions, pero ista ye la mia ruta t'os meses de chunyo y chulio.

Salvem lo riu. Auguaviva, 4 de chunyo.
Tercer edición d'o festival reivindicativo contra la barbaridat que quieren fer en o rio Alcherez (Bergantes en catalán). O prochecto, que arramplaría con una parte repolida d'o rio, tien una graniza respuesta social de Aiguaviva y de toda la redolada. Fa tres anyos prencipioron a fer iste festival con muit buens criterios: gran presencia d'as collas locals, buena zona d'acampada y borina ta toda la nueit. Un festival muit casero y acullidor, pero no por ixo menos furo. Iste anyo tienen cartelazo con 13Krauss y Azero, antimás de atras collas que no conoixco, pero que por lo que he visto en internet prometen muito.

Tamborilé. Mezquita d'Exarc. 11 de chunyo
Chunto con Esfendemos a Tierra o festival más divertiu d'Aragón. Tamborilé ye guarencia de pasar un diya sobrebueno, de bailar dica que te sangren os pietz, de alcordanzas ta cutio y d'un publico con un buen rollo extremo. O festival chunta mosica balcanica, batucadas, pasavilla de dulzainers, electrocharangas, ... tot de collas por un regular desconoixidas t'a mayoría d'a chent, pero de gran calidat.

Entre os extras, un horario pleno d'actividatz, una zona d'acampada con uembra, puestos d'artesanía, una organización que cudia cada detalle y una chenta popular que siempre fa una cocina sobrebuena. Que paellas nos i hemos pretau!!! De maitins, antimás, bi ha actividatz más endrezadas ta que pueda estar-se-ie as familias que tienen ninas, asinas que sisquiá la tuya cachimalla te vale d'enchaquia ta no ir-ie.

Poborina Folk. Lo Pobo, 24-26 de chunyo
Festival chirmán d'o Tamborilé. Referencia imprescindible d'o folk en Aragón. Y o nuestro festival maldito. Encara que todas as anyadas hemos prebau d'ir-ie, siempre hemos teniu bell compromís, actividat, examen, treballo u bella cosa que nos ha privau de fer-lo. A fama lo precede y tot lo que he sentiu charrar d'iste festival ye bueno. Estianyo contarán entre atros, con Vegetal Jam y Ebri Knight asinas que, atra vegada, a borina y os bailes serán obligatorios.

PIR y FranjaRock. Echo / Penyarroya de Tastavins. 4 chulio
Torna a encertar-se que o PIR y atro festival son en a mesma calendata y torna a dividir-se-me o corazón. Dos puestos repolius, Echo y Penyarroya de Tastavins. A tradición de puyar t'o PIR, como levo fendo bells quince anyos contra as ganas de conoixer un festival nuevo como o Franja Rock, an que nunca no i soi estau y no por falta de ganas. O folk contra o rock. Practicar y sentir l'aragonés cheso, u practicar y sentir o catalán d'o Matarranya. Un cartel que conoixeré tres diyas antes (como muito!) contra unatro que conoixco dende fa semanas y an que nomás por Los Draps y Azero ya mereixe la pena. Ixa semana prencipian as vacanzas, asinas que cuento que t'a on vaigamos tamién condicionará o festival esleixiu, pero a fe que será de mal trigar.

D'o PIR ya en he charrau quantas vegadas en iste blog. Ye un festival an que trobar-te con muita chent que comparte toda ixa pasión por a cultura y a mosica aragonesa. Antimás en unas vals privilechiadas, en unas semanas con buen orache quasi seguro. As badinas, a gastronomía, o paisache, ... o PIR lo tien tot a favor, pero tamién leva una serie de mancanzas organizativas que, en tenendo competencia festivalera, chugan en contra suya.

D'atra man, a Franja siempre ye un puesto intresant y fa muito que no voi por o Matarranya. D'o festival tampoco no he sentiu garra cosa en contra y o cartel promete muito y dar-me a oportunidat de practicar bell poco lo catalán. A decisión final, probablement o diya d'antes...

Esfendemos a tierra. Artieda 15-17 de chulio
Poco más que decir que no haiga dito un ciento de vegadas. Esfendemos a tierra ye l'extasi de o movimiento soberanista aragonés. Dos diyas vivindo en aragonés, compartindo borina y luita. Capazos eternos dica l'amaneixer apanyando totz os problemas d'Aragón, y d'o mundo si cal. Trobar-te con as soberanistas de tot lo territorio y con companyeras de muitas luitas de muitos puestos. Ecolochismo, internacionalismo, as luitas por a diversidat lingüistica y culturals, soberanismo, .... totz os pueblos y todas as luitas se chuntan en Artieda, o lugar an que vive a dignidat. Si no i yes ida, ya tardas!

O cartel d'iste anyo encara no se conoixe, ni a lista d'actividatz, pero por lo que m'he puesto enterar marca muit bien, asinas que estatz-tos a la tisva. Antimás en iste anyo celebraremos l'absolución d'as 8 personas imputadas por esfender a tierra, asinas que tendremos unatro motivo ta brindar.

Aplec dels ports. Villores 29-31 de chulio.
O zaguer festival que tiengo, por agora, en l'achenda mia. Bi fuemos quasi de casualidat, fa dos anyos, asperando trobar-nos-ie un festival chicot. Quan pleguemos en Sorita, o lugar an que se feba ixe anyos, faciemos uellos de caparra. Aquello yera como si se fese o Viña en un lugarón de montanya. Una acampada chigant, bells scenarios diferents, chent a brozuecos, ... y un ambient festivaler de los millors. 

O festival se leva fendo por quasi quaranta edicions ya. Chunta as reivindicacions d'a comarca de Els Ports, con a mosica en catalán y con muitas atras expresions culturals d'alli. De diyas, charradas, chiquetz conciertos más tranquilos, actividatz, tallers, ... Y de nueitz, as millors mosicas. Por agora i son confirmaus Zoo, Los Draps, Pirat's sound sistema y Pepet i Marieta. Y encara falta chent por confirmar. Te cal saber-ne más? 

Iste anyo toca en Villores. O lugar lo trigan a daria entre totz os d'a comarca. Ye una traza sobrebuena tamién de ir conoixendo totz aquells puestos. Encara que siga en o País Valenciano, lo tenemos bien cerqueta, tocando con a muga aragonesa y con a posibilidat d'ir-te-ne de badinas ta las d'Aiguaviva. 

Regular que me'n he deixau belun. No tiengo info, por eixemplo, d'o Carrasca Rock. Encara tenemos bell cabo de semana libre que, malas que chafardeemos bell rato por o rete, trobaremos qualcosa. Queda tamién as fiestas d'os lugars y as borinas improvisadas. Queda, en resumen, tot un verano ta vivir, viachar, bailar, reivindicar, charrar, conoixer, soniar y fer borina.

A canya Paca. Historias d'un cole de mosens II

En 4º d'EChB, en Corazonistas, nos trobemos con a mayor innovación pedagochica que nunca he conoixiu. Probablement, mayestras y mayestros de tot lo mundo hesen d'haber aprendiu d'istas tecnicas pero, igual como en Blade Runner, tot ixo se perderá como glarimas en a plevia. Si o mosen que nos las aplicaba contina vivo, dubdo que faiga clase. Y si en fa, aspero que bella mai u pai se'n haiga queixau y l'haigan feito cambiar o metodo conoixiu como "a canya Paca".

No m'alcuerdo si en ixe anyo ya tenebanos más d'un mayestro, pero si yera asinas, nomás lo recuerdo a ell. Yera choven, t'a media d'edat que bi heba en Coras. Regular que nos daba cheografía, y no sé si garra asignatura más. A mia memoria ye a saber que mala y pior encara t'as alcordanzas de fa muito tiempo. En ixas envueltas yeranos aprendendo-nos de corazón as capitals d'o mundo, as provincias d'Espanya, y atros listaus de nombres que dimpués no sabebanos relacionar con cosa.

"As provincias de Andalucía, Arrufat!" Y Arrufat prencipiaba a recitar como una oración "Cordoba, Jaen, Sevilla, ...". Bien. "As provincias d'o País Vasco, Deiguesca!" (En Corazonistas tenebanos apellius, no pas nombres) Y Deiguesca deciba "Vizcaya, Guipuzcoa y Alava". Bien!. "As provincias de Castilla y León,  Benito!" Pero Benito no se sabeba las nueu y prencipiaba a farfallar y a tremolar-le as garras. "Palencia, Avila, Burgos, Leon, eeehhh, Segovia, Soria, eeeeeh, Zamora, eeeeh, Toledo?" O cenyo d'o mayestro, entre carranyau y divertiu, yera a primer evidencia de que Toledo no yera en Castiella y Leyón. A segunda yera un trucazo con a canya Paca. Aquell anyo, aprendiemos a cubrir-nos a escape quan dices bella cosa que a os mosens no les feba goyo. Ixe conoiximiento lo continemos aplicando prou a soben mientres os anyos que nos quedaba d'estar-ie, pero t'a part d'alavez encara no lo sabebanos.

O metodo d'ensinyanza pendeba en que os quaranta ninos que ibanos ta clase nos metebanos de piet arredol d'a clase. O primer diya yeranos en orden de lista de clase. Yo yera o 36, asinas que prencipié muit dezaga. O mosen iba preguntando a daria y, qui fallaba teneba un dople castigo. O primer, que reculaba un puesto en a ringlera que febanos arredol de l'aula. O segundo que se levaba un trucazo con "a canya Paca". "A canya Paca" yera un canyizo que me pareixeba bien largo. No sé si en seria, porque como ye lochico, yo yera bien chiquet, pero l'alcordanza que tiengo ye como la d'a vara de Son Goku. Mesmo la remero como si podese creixer. Os trucazos no yeran guaire furos. No tornabanos ta casa marcaus. Nunca no me traumatizó. Pero ixe yera o nivel.

Aprender a pur de trucazos con a canya, lechitimando a violencia. Fer vistera d'una traza tant clara como una ringlera, a "escala social" adintro d'una colla zarrada como ye a clase. Toda una metodolochía propia d'os anyos 20, pero que s'emplegaba a finals d'os 80. Yo yera buen alumno y a escape plegué en os primers puestos. Atros fueron baixando-ne dica quedar en aquells zaguers diez u dotze que yeran os piors alumnos y que mesmo lo mosen se'n feba la mofla.

L'arbitrariedat yera total. Dengún no fallaba as provincias de Valencia, u a capital de Francia. Asinas que si o mosen quereba hoder a belun, yera tant facil como preguntar-le por Andalucía u Castiella y Leyón, u por a capital de Malta, u de belatro país d'ixos que siempre ixublidabas. Pero ixa arbitrariedat no quedaba en ixo. 

O mosen yera de Alcoleya de Cinca y en yera prou argüelloso. Nos daba firme ferrete con o suyo lugar. O primer diya que preguntó as provincias d'Aragón, l'alumno que respondeba se levó una sorpresa.

"Fulanico, as provincias d'Aragón". Y Fulanico, tot seguro y bien garufo, respondió "Zaragoza, Huesca y Teruel!". Ni heba rematau a zaguer silaba y Paca ya yera traviesando l'aire, pillando-le espisguardau y sin cubrir-se. O tochazo, antimás de firme, teneba menos sentiu que no nunca. Totz conoixebanos as provincias d'Aragón y sabebanos que heba respondiu bien. A on yera o problema?. Nos ne febanos cruces. O mosén nos explicó que caleba responder siempre con Uesca en o primer puesto, porque ell yera d'un lugar d'ixa provincia. Y prou. Dende chicorrons nos amostraban a que as cosas yera por que sí. Por a "ley de mis cojones al viento" que diría Loulogio. Asinas que mica qüestionamiento d'aquello.

A monico, entre que aprendebanos a cubrir-nos d'os trucazos y que nos la prencipiaba a bufar quantos nos ne levasenos, a pregunta d'Aragón se tornó un desafío. Ta os rebeldes, que belun en aquells tiempos ya escomencipiabanos a estar respuliers, quan nos tocaba Aragón, siempre decibanos, ya asperando o canyazo, "Zaragoza, Huesca y Teruel!!!". Y ZAS!, prou que sí. Un diya mesmo gosé retar-le con un "Zaragoza, Teruel y Huesca!!!" ZAS, ZAS! Dos que me'n levé.

Cuento que debeba tener-ne bellas quantas en bell almario, porque a pur de trucazos, a canya s'iba crebando. Pero no nos librabanos d'ella. A una Paca, le'n seguiba unatra, dica la fin d'o curso.

Diz que aquell mosen nos quereba muito. Tanto que nos levó de viache de cabo de curso t'o lugar suyo: Alcoleya. Os mosens y mayestros d'o cole se'n fueron a chentar ta unas mesas deixando a la cachimalla sin cusirar. Bi heba una mena de casetas en un terreno que yera plen de piedras. Con aquells nueu anyos que tenebanos, sin cusirar, luen d'a familia y asalvachaus como yeranos, no se nos ocurrió atra que fer dos equipos y limpio barallar-nos a zaborrazos. Mesmo faciemos una esfensas con uns palés que trobemos por astí deixaus a la bimbola. Yo me'n libré, pero más d'uno tornó bien morau ta casa suya. A un de clase, yo mesmo m'encargué de deixar-le una buena marca en a esquena que le facié con un troz de tubería que pillé de bell cabo.

Ya en 4º d'EChB hebanos normalizau a violencia. D'os mosens enta nusatros, y tamién entre nusatros. Hebanos normalizau as cherarquias. A parola d'o mosen no se qüestionaba, por absurdas u inexistents que fuesen as chustificacions. Entre l'alumnau tamién s'iba establindo ixa cherarquía, ixas colletas que irían marcando-nos l'esdevenidero y que tant dificil yera de fuyir-ne. 4º d'EChB, yera nomás l'empecipiallo.

Coras: The Beginning. Historias d'un cole de mosens I

Foto: Rose

De bien chicorrón, mis pais decidioron de levar-me a fer natación. No sé guaire bien por qué lo facioron, pero siempre les n'he agradeixiu. Aquellas clases y os veranos en Cambrils facioron que no me faiga mica miedo l'augua y que, de feito, malas que en veiga dos pietz de fundo me i capuce. As clases, las feba en o colechio de Corazonistas, un privau concertau en o centro de Zaragoza, muito cerqueta d'an que vivibanos. Un colechio menau por mosens, y firme esfensor d'os sinyals d'identidat más rancios d'a escuela catolica: segregación por chenero, rezo diyario, internau, ... Pero en ixas envueltas yo teneba menos de seis anyos. ¿Qué podría importar-me tot ixo?

As clases de natación m'encantaban. Bi iba con una riseta en a cara. Me cambiaba, me capuzaba, chugaba, nadaba, .... feliz como un tocin en un barducal, que dicen Els Catarres. Quan en saliba, un largo pasillo nos levaba ent'a salida. A la nuestra dreita unas cristaleras daban t'o patio gran de Corazonistas, an que un ciento de ninos gosaban d'estar-ie correndo atarrantaus. Como si os ninos podesen correr d'atra traza. Yo acucutaba por aquellas finestras que me pareixeban chigants, y viyeba un mundo de potencials companyers de chuegos y trazonadas. Remero perfectament como le daba ferrete a mi mai, entre que tirabanos ta casa, preguntando-le por si bell diya podría estar-me en aquell patio plen de canastas y porterías de futbol, de cachimalla goyosa, de chilos y rasmia infantil. Y mi mai me deciba que aguardase, que en que tenese edat ta ir-ie, ixe sería o mio patio, y que i chugaría y chilaría, y correría y tot dica escamallar-me.

Ai, pobret de yo! Encara yera sin esmaliciar y me pensaba que ixe patio con sulero de pedretas d'as que se te clavan en o chenullo quan t'estozolas, sería bella mena de paradiso. Mientres ueito anyos, u lo menos dende que prencipié a tener conciencia de que bi heba cosas que no me cuacaban, Corazonistas (Coras, t'os colegas) esdevenió un simbolo d'opresión, de tot lo que odiaba, de supervivencia, .... 

¿Tenió buenas cosas? Prou que sí. Fote, yera nino! Ye imposible no vivir ratos felices de nino. Corazonistas no yera a escuela franquista, prou que no. Os mosens no abusoron de yo, y encara que bell lapo me levé, no en estioron guaires. Son atras cosas as que, en un rechimen suposadament democratico, me trucoron, me facioron odiar-les y me fan continar luitando contra que ixo se financie con os diners de todas y totz.

Ya fa anyos que pentino canas y, encara que choven de corazón, prencipio a estar d'ixos cansos que charran más d'o pasau que d'o futuro. Iste blog ye terapia, y vusatras sotz muito millor que un psicologo, y sobre tot, más barato. Asinas que dende hue, compartiré de cabo ta quan, beluna d'as historietas que me i pasoron, en totz aquells anyos que m'estié, asperando que tos faigan goyo y que nunca no levetz a os vuestros borches ta una escuela de mosens, ni particularment, ta Corazonistas. Encara que tienga piscina.

Yo no i estié. O 15M, cinco anyos dimpués

O 15M me pilló espisguardau de tot. Bella semana antes hebanos visto bell panfleto en A Flama. Nos preguntabanos qui convocaba aquello que iba sin firmar y sin un mensache guaire claro. Ixe maitin a Coordinadera de Movimientos Socials de Zaragoza feba una manifestación que se suposaba que sería historica y que fería visteras muitas reivindicacions d'os suyos components, que yera buena parte d'o teixiu social de Zaragoza. A manifestación fue bien, sin más. Nos i trobemos as de siempre, fendo lo de siempre. Chilos, pancartas, vermu.

De tardes, me feba una gambadeta con a mia parella. Yeranos cansos d'o cabo de semana y d'a mani d'o maitin y no nos aganaba d'ir ta una manifestación tant vueda de conteniu y sin saber qui yera dezaga. En fendo-nos una biera, viyemos a belun que tornaba ya d'a mani d'o 15M con bell cartelet feito a man y chilando beluna d'as suyas consignas. Nos ne faciemos una mica la mofla y continemos pensando en que lo important d'ixe diya heba estau la manifestación d'o maitin an que una ripa de colectivos hebanos contrimostrau a unidat d'acción d'os movimientos socials zaragozanos.

Quan o pasar d'as horas y d'os acontecimientos levó t'as pantallas d'as televisions y os mobils tot lo que yera pasando en a Plaza d'o Pilar y en atras plazas de l'estau, nos fuemos quedando sin sangre en a pocha. No sabeba guaire bien qué pasaba. Continaba pensando que bi heba belún dezaga organizando aquello. Me'n feba cruces. Pero todas ixas reticencias no m'empachoron d'acercar-me-ie a vier que yera pasando. Me trobé con una inquietut extrema, unas grandismas ganas de cambiar as cosas que, encara que talment no heban trobau o suyo camin, barruntaban enta do caleba tirar.

No. Yo no i estié. No estié en a mani. Tarde en ir ta l'acampada bell diya. Quan i fué paré más cuenta de toda la clica "biodanzera" que de qui de verdat yera fendo y proposando cosas intresants. Me costó prou d'asumir y entender o potencial que bi heba astí y, con tot y con ixo estié (y soi) muito critico con muitas d'as cosas que se deciban y feban. No voi a acumular-me meritos que no son mios. O 15M lo fación atros y a mia participación se quedó en asistir a bellas quantas asambleyas sin participar-ie guaire.

Totz os diyas he de traviesar dos vegadas a Plaza d'o Pilar ta ir t'o treballo. Mientres aquells diyas, todas as tardes, en tornar enta casa, me i quedaba bell ratet alparciando, de capazo con belun, mirando-me as convocatorias, u fendo-me una biereta aprofitando lo buen orache. Sisquiá hese teniu más tiempo, u hese barruntau millor a suya importancia, ta vivir-lo d'una forma más intensa. M'alcuerdo d'os sobos que se foteban muitas d'as organizadoras de l'acampada que, en plegar a nueit, ya iban que no adubiban, y encara les quedaba por debant aquellas asembleyas eternas, plenas de debatz esterils ta qui ya los hebanos teniu feba una decada. M'alcuerdo perfectament d'un diya, charrando-ne en a puerta d'A Flama con un compa, como le deciba yo que lo d'o 15M no iban a aconseguir cosa important y como ell se me miró y me preguntó que "qué hebanos conseguiu d'important la resta dica alavez".

"O 15M lo cambió tot". No por más vegadas que se diga, u porque haiga esdeveniu una mena de mantra, deixa d'estar verdat. En a Plaza d'o Pilar, se i trobaba parte d'a viella militancia zaragozana con una patacada de zagalas que no s'heban preocupau nunca por a politica. Atra parte d'os movimientos socials se miraba tot aquello con refús y con una arrogancia propia de qui le preocupaba más estar protagonistas d'os cambios, que no los cambios mesmos. Ye verdat que en ixos primers diyas o 15M teneba foraus discursivos muito grans. Les costó a-saber-lo de fer suyas luitas como lo feminismo. Mesmo cuento que encara no acaban de asumir as luitas por a diversidat lingüistica, nacional y cultural. Con tot y con ixo, rematoron ubrindo-se a ascuitar a os movimientos socials que levabanos anyos de faina. Ellas habioron d'aprender en semanas lo que a nusatras nos heba costau anyos. Nusatras aprendiemos que talment yeranos fendo mal muitas cosas. Que tot lo treballo nuestro no hebanos conseguiu que plegase t'a mayoría d'a chent. Que toda aquella bamba y pureza ideyolochica fan poca honra si se queda en teorías con que emplir libros t'a una elite cultural y politica. Caleba ixamplar o discurso, fer plegar as nuestras ideyas a "o común" y as 15emeras facioron que ixo fuese posible. U lo menos, de millor fer.

Agora, cinco anyos dimpués, qui nos manifestemos de maitins y qui lo facioron de tardes recorremos o mesmo camin. U uno muito parellano. Cadagún con as suyas particularidatz, prou que sí, y con as suyas organizacions. Venibanos de culturas asociativas y organizativas muito diferents y continamos funcionando de trazas bien poco pareixidas, pero cuento que todas hemos aprendiu y cambiau en istos cinco anyos.

Prou que no cal ideyalizar-lo tot. O 15M fació, fa y ferá muitas errors. Os movimientos socials "tradicionals" faciemos, femos y feremos muitas errors. Cal saber viyer y reconoixer as bondatz, as contradiccions y as feblezas. Talment calga esborrar ya ixa muga, por cada diya más difusa, entre tot lo que naixio lo 15M y qui ya venibanos treballando antes en a movilización y reivindicación social, politica y/u cultural.

De tornada por l'IES Andalan

Fa bella semana me convidoron a charrar en l'Instituto d'Educación Secundaria Andalán sobre o periodismo en aragonés. Ixe instituto de l'Almozara m'acullió en dos d'os anyos que remero con más carinyo d'a mia vida: os que estudié FP.

Yo veniba de fer Bachillerato en l'IES Medina Albaida. I colaboré con a revista de l'instituto, estié de representant estudiantil y participé como podié en tot lo que se proposaba. En Andalán, m'embrequé menos, pues las de FP febanos poca "vida d'instituto", pero con tot y con ixo sí que participé en bella coseta. Ya me tocó d'experimentar con a LOGSE, estando un d'os primers que feba ESO y Bachillerato. En a FP me pasó lo mesmo. O nuestro grau levaba nomás un anyo implantau y nusatras estiemos a segunda fornada en rematar-lo. En ixos anyos aprendié quasi tot lo que sé de Electronica que dimpués ixublidé mientres a carrera universitaria y conoixié a belun d'os millors profesors que nunca no he teniu. Talment siga por recosiro u por as borinas que nos febanos dimpués de clase. U porque en ixas envueltas yo yera tot un gigoló. Pero regular que tiengo un recuerdo d'aquells anyos imborrable de tot.

Tornar-ie me trayó un fascal d'alcordanzas. Pareixe mentira como puetz ixublidar seguntes qué cosas, que te tornan ta l'esmo quan viyes qualcosa tant simpla como una recholeta. Dondiando por os pasillos de l'instituto recordaba os capazos en os descansos entre clases, fer fuina ta marchar t'as fiestas universitarias, as resistencias cremadas en o laboratorio, os amigos y compas, a sola moza que tenebanos en clase, os sobos de seis horas de contino debant d'o monitor programando en C, o mio companyer cremando-se con o soldador, os "fumarros" en o recreu, as brendas en l'Alameda, ... D'os profesors que tenié, belun encara i contina. D'os alumnos que compartiban aula con yo, no contino en contacto con garra.

En plegar-ie, antimás de con todas ixas remeranzas, me trobé con un zuro bien gran sobre l'aragonés. I yera penchau bell articlo d'Arredol, poesías, convocatorias, ... y sobre tot, a revista que fa a zaragalla d'o centro, coordinada por o profesor que me convidó y que podetz leyer en o suyo blog. A charrada les ne facié a zagalas de 4º d'ESO que se me miraban con diferents actitutz. Belun, cuento que repasaba mentalment l'alineación d'o Real Madrid d'ixe cabo de semana. Atras, me facioron más caso y, lo menos, s'estioron mientres quasi una hora sentindo a un tipo charrar en aragonés. Ya no pueden decir que nunca no lo han ascuitau. En a charrada facié referencia a diferents medios. No asperaba, lochicament, que conoixesen Vilaweb u Argia, pero que quedé percutiu de que nian hesen sentiu charrar de Eldiario.es. Una vegada más, salir d'o mio chiquet mundo, me fació estozolar-me contra a realidat. A información contina consumindo-se masivament por a televisión y os mass media. Antimás de d'a luenga charré, aprofitando que teneba a parola, de atros conceptos como o Creative Commons, o conoiximiento libre, a soberanía d'a información u a etica periodistica.

Por o feedback que'n recibié, quiero creyer que a beluna d'as presents le fació goyo lo que i reconté y que en salioron habendo recibiu unatra anvista sobre o periodismo, as luengas y a comunicación. Como siempre, lo important ye fer que tiengan inquietutz.

Tamién me'n levé, d'a mia tornada ta Andalán, a luita d'iste profesor por fer plegar l'aragonés en as suyas alumnas y alumnos. Como de cutio, con poco u mica refirme de man de companyeras y d'o centro. Me charró d'a revista que i fan y d'o debantdito panel an que va penchando cosas sobre l'aragonés. Ye un eixemplo d'as chiquetas cosas que se pueden fer en qualsiquier centro d'estudio y que, encara que chicotas, pueden tener una gran trascendencia ta personetas en unas edatz que son formando as suyas ideyas y valors. Fer present l'aragonés en o centros d'amostranza ye a saber que important y cada espacio conqueriu ye una pedreta más en o muro que ha d'aparar a luenga.

Aspero que toda ixas ganas y ixa rasmia continen fendo fruitos y que l'eixemplo s'ixemene y en cada IES d'Aragón se faiga qualcosa por l'aragonés. Por muito menos, me prencipié a intresar por a luenga y aqui soi bell par de decadas dimpués dando ferrete en aragonés.

Sobre as amistatz en os retz socials

Foto de fastcompany.com

O cambio en as relacions humanas que han trayiu os retz socials ye radical y innegable.Tamién ye a saber que criticau por muitas personas con o canso ferrete d'a deshumanización y a soben con una parrafiquera de topicos más u menos cunyaus. Como toda tecnolochía, se puet fer servir muit malament, y de feito, se fa. Pero ixo no ha de amagar todas las avantallas y virtutz que ha permitiu a plegada y cheneralización d'istas ya-no-tant-nuevas tecnolochías.

Una d'as cosas que más me fa anguniar en zaguerías ye a sensación de que no tiengo tiempo ta leyer, viyer, viachar, ... tot lo que quiero, ni ta pasar prou tiempo con as personas que me fan goyo y que me pareixe que tienen cosas que alportar-me.

Antes mas, conoixer a una persona yera un proceso alto u baixo largo. No totz os temas de conversa salen en o primer diya. Una napa de intelichencia, u mesmo d'intelectualidat podeban trafucar-te y creyer que conoixer a belun yera una buena inversión de tiempo. Mesmo con a chent que conoixco dende fa anyos, me trobo con sorpresas. Bella vegada agradables, belatras no pas tanto. Agora, Facebook y atros retes nos lo meten bien facil. Una chiqueta uellada a lo timelime de cadagún diz muito sobre ixa persona. Quan belun me demanda amistat, goso de mirar-me o suyo facebook, encara que no siga que un ratet. En viyer as suyas publicacions y as cosas que comparte, ye de buen fer un perfil d'ixa persona. En que me trobo con mensaches masclistas, catalanofobos, cazurros, etc.. ya me foi una ideya de con qui soi charrando. Puet estar que en atras arias tiengan bella cosa intresant que alportar-me? Puet estar, pero regular que ixo tamién me lo puede dar qualsiquier atra persona d'as que sí que me pareixen intresants.

A chent que l'intresa l'aragonés, afortunadament, ye bien variada. Ixa variedat nos cal como le cal a qualsiquier luenga en periglo. Pero tien a vesant fosca de que te demanda amistat cada carnuz que ta qué. L'aragonés no ye libre, ni muito menos, de chentucia de toda mena. Lo que nunca no he entendiu guaire bien ye como me demandan amistatz seguntes qué personas que, ta forro de bota, s'encarranyan dimpués quan pencho seguntes que cosas.

Amás de fer triga con "indeseyables", os retz socials permiten conectar-te con muita chent que, d'atra traza no tendrías mica contacto. En o caso mio, he feito colaboracions bien intresants, m'he fotiu firmes charrazos, y mesmo he feito amistatz por istas vías. Amistatz que dimpués s'han levau t'o mundo fisico. U no pas, ixo rai. Lo important ye que ixas personas con qui de verdat tiengo afinidatz intelectuals u simplament nos fan goyo cosas pareixidas han dentrau a fer parte d'o mio mundo y d'a mia experiencia vital gracias a istos medios.

Ni Facebook, ni Twitter, ni garra ret social virtual puede sustituyir a os retz socials fisicos. Os bars, locals, centros socials, parques, ... son menister. Muito más en una sociedat que fa que as suyas miembras se pasen meya vida treballando u con un ocio endrezau t'o consumo, tenendo tant poco tiempo libre t'a interacción humana y l'intercambio d'ideyas. Pero creigo que, bien emplegaus os retz socials informaticos complementan perfectament a los atros y mesmo los pueden potenciar en muitos sentius, ixamplando roldes d'afinidat. Especialment en un país como Aragón, an que a población ye chicota y ixos roldes d'afinidat a soben se troban aluenyaus fisicament. ¿Quantas posibilidatz tendrían de relacionar-se entre sí, fa 15 u 20 anyos, personas con as mesmas inquietutz, que vivisen en Albarrazín y Benás? ¿Que relación tenebanos fa no tanto con toda la emigración aragonesa?

Os retz socials tienen una parte fosca, ye claro. Pero creigo que ye compensada con muito por todas as posibilidatz que nos han ubierto.

O soberanismo (2/2). Tierra de barrenaus radio 2x08

Una d’as cosas más dificils d’o mundo ye desaprender lo aprendiu de chiquet. Lo que te tatuan en o celebro. Ye por ixo que, por muitos poders que faigamos, ye cutiano esbarizar y trobar-te decindo bella cunyadada u, como me pasó a yo, trobar-te con un masclismo tant interiorizau que has de pensar-ie dos vegadas ta parar-ne cuenta.

Quan decidié de fer un programa sobre soberanismo, como de cutio, prencipié a fer a lista de posibles convidaus. Un, dos, tres,... dica o seiseno nombre, garra muller. Estió chusto quan pensé en ixa muller quan paré cuenta de que a resta yeran tot hombres. As mullers que yera pensando de convidar-ie valeban, prou que sí, tanto como os suyos companyers. Teneban atras trachectorias vitals y politicas y trazas diferents de viyer o soberanismo como ye natural. Por o simple feito d’estar personas diferents y tamién por sufrir en carne propia atra opresión como ye la de l’heteropatriarcau.

Caleba poder ascuitar a las aragonesas soberanistas. Pensé en bella alternativa ta fer-lo posible y a la fin me decidié por fer un programa con nomás ellas. O resultau lo hetz de chuzgar todas vusatras y vusatros. Os dos programas fan conchunto y, encara que son intresants por si mesmos, en son muito más si s’ascuitan os dos, parando cuenta antimás d’as semellanzas y as diferencias.

Talment no caldría que comentase isto. Ya claro que no caldría chustificar que en un programa de #TdBradio bi hese nomás hombres u nomás mullers. Pero como he dito bella vez, iste blog tamién ye una mena de terapia t’a suya autora. D’atra man, creigo que o proceso de creyación ye intresant y puede aduyar a que atros se planteyen porque quan piensan en tal u qual cosa, piensan nomás (u en un primer puesto) en hombres u mullers. Porque, por muit feministas que nos creigamos, continamos tenendo l’heteropatriarcau gravau en a parte más funda d’a nuestra educación y cultura.

Personalment, estió muit enriquidor, intresant y mesmo emocionant en bell inte. Un gran programa an que conté con a companyía de quatre grans luitadoras, que son construyindo ixe Aragón que tanto nos cal. Aspero que tos faiga tanto goyo como a yo.