O programa, que lo puetz sentir en MP3 u OGG, u descargar-te-lo dende iste vinclo (botón dreito en o formato que quieras y alzar vinclo como...), repasa o gran movimiento de creyación de blogs en aragonés que bi habió fa una decada y a on que naixió, entre muitos atros, iste blog que leyes agora. Hue, muitos d'ixos blogs han desapareixiu "como glarimas en a plevia", pero muitas encara nos alcordamos con firme carinyo d'aquella etapa y de toda la chent que nos conoixiemos.
He teniu a suerte de compartir iste primer programa de radio con tres grans personas como son Marco Joven, autor de Estricalla, Roberto Mensachero, autor de As tierras olbidatas y organizador d'as dos trobadas de fabloggers, y Santi Paricio, autor de O chemeco d'as parolas. Totz quatre estiemos charrando d'os blogs nuestros, d'atros, d'as ferramientas informaticas, d'aprender aragonés, .... una mica de tot en dos horas que cundioron muito, pero que se nos quedoron curtas.
Tamién bi estió present por telefono, o gran Chorche Romance, autor, entre atras cosas de Purnas, blog d'obligada lectura ta muitas de nusatras y que dio tamién a suya anvista.
Aspero que tos faiga tanto goyo ascuitar-lo como a yo me fació gravar-lo. T'ambientar-tos un poquet, tos recomiendo de visitar os blogs d'os convidaus, que vinclo abaixo, y fer-le una uellada a o video que nos recordó Mensachero y que yera una replega d'as cosas que febanos en aragonés en internet quan os fablogs y os fabloggers lo petabanos.
Entra en os blogs:
As Tierras olbidatas
O chemeco d'as parolas
Purnas
Hola!, soy Dani, yera l'autor d'o blog Cordón Trenzau, a verdat ye que m'ha feito asaber-lo de goyo remerar ixos anyos sentindo lo podcast, tenetz razón de que agora tiengo a sensación de que faciemos un treballo por empentar l'aragonés, muitas vegadas sin en estar conscients.
ResponderEliminarComo decitz, agora ha cambeau a traza de creyar contenius, me cuaca saber que estiemos un alazet ta os prochectos que se fan agora, por a mia parti agora foi parti d'a asociación Softaragonés, localizando tecnolochia y software a l'aragonés. Ista asociación naixeba alto u baxo por ixas calendatas, y por evolucion d'unos comentarios en un post de cordon trenzau y una entrevista que me fación en El Periódico de Aragón arredol d'o blog, de feito a presentación publica estió a II trobada, an compartiemos mesa y parola con Chorche Romance, de Purnas.