A zaguer renuncia a o Trono de Fierro

AVISO: SPOILERS DE TODA LA SAGA DE CANTA DE CHELO Y FUEGO Y D'A SERIE CHUEGO DE TRONOS. LEYE BAIXO A TUYA RESPONSABILIDAT

Iste post surtió, como podretz esmaixinar, d'a noticia de l'abdicación de Chuan Carlos I. Prencipié a pensar si conoixeba bell caso parellano en a historia recient de Ponient y no me'n salió garra. Pero sí un personache que heba renunciau a la corona (que no abdicau) y que antimás saliba en a serie. Ta forro de bota, ye un personache muito vinclau a unatro bien important en o pasau, present y futuro d'a saga. Soi charrando de Aemon Targaryen y lo suyo chirman Aegon Targaryen, cinqueno rei d'ixe nombre.

Antes de prencipiar con os Targaryen, por Facebook belun me sinyaló a Robert y Ned como as zaguers personas en haber renunciau a lo trono, asinas que talment calga fer bellas apreciacions. Efectivament Ned tenió lo trono bien amán dimpués d'a Rebelión de Robert, pero nian estió proposau ta ocupar-lo, ni teneba garra dreito de sangre. Con o funcionamiento d'os Siet reinos y estando d'o Norte lo teneba malament ta reinar. Robert, manimenos, ye bisnieto de Aegon V Targaryen por lo que, encara que prou amerada, teneba sangre reyal y dreito d'herencio. Quan muere Robert no nombra sucesor a Ned, como muitos erroniament piensan. Lo nombra rechent d'o reino porque Joffrey, l'hereu "oficial" ye encara menor d'edat. Alavez Ned no renuncia a lo trono, porque nunca no ye nombrau rei, ni sisquiá le'n proposan. Nomás rechent. Ta establir una contimparación: Tywin no ye rei mientres a primer parte d'o reinau de Tommen, encara que exerce como tal. O testamento de Robert alzaba ixe mesmo rol ta Ned.

Aemon Targaryen sí que renunció a lo trono. Ye, que yo sepa, l'unico personache d'os zaguers sieglos d'historia que renunció voluntariament a lo trono de fierro. Beluns como Aerys I, deixoron en a practica reinar a atros (Brynden Ríos en iste caso), pero no renuncioron a la dignidat reyal.

Aemon Targaryen naixió tercer fillo de Maekar I. Quan prencipia Chuego de tronos tien, si fa u no fa, 100 anyadas. En estar tercer fillo y improbable sucesor a lo trono, estudió en a Ciudadela ta Mayestre, conseguindo a cadena. Quan su pai morió, un Consello Reyal se reunió ta esleixir sucesor, ya que os candidatos pareixeban prou penibles. Os dos chirmans de Aemon ya yeran muertos en ixas envueltas. Uno por una malotia de transmisión sexual y l'atro por beber fuego valyrio. Ya podetz preixinar que mena de Targaryen yeran, no?. A suya cachimalla tampoco no yeran buenas opcions t'a uellada d'o debantdito consello, en no estar que borches. Asinas que decidioron d'ufrir-le o trono a Aemon a tamás d'estar un mayestre y, alavez, haber feito voto de no tener tierras ni titols.

Aemon renunció a lo trono, fendo que o Consello chirase os uellos ent'o suyo chirmán chicot, Aegon, qui sí que lo acceptó, y reinó como Aegon V Targaryen, sinyor d'os Siet Reinos, rei d'os andalos y os primers hombres, .... ya sabetz. Por si no'n estase prou, Aemon, que talment teneba un punto masoca, decidió d'unir-se a la Guardia d'a Nueit ta privar de que dengún no lo fese servir a ell contra o dreito d'o suyo chirmán a o trono. Aemon pasó la resta d'os suyos diyas en o Muro, dica que Jon Nieu, 998eno Comandant d'a Guardia d'a nueit lo ninvió t'a Ciudadela en un barco a on que morió.

Aegon V Targaryen estió rei gracias a la renuncia de Aemon. D'o suyo reinau no bi ha guaire escrito, pero no pareixe que estase especialment malo ni bueno. Sí que s'ha escrito bella cosa más sobre a profecía que le facioron y que ye arredol d'o que chira buena parte d'a saga y, sobre tot, d'as teorías d'os fans de Canta de Chelo y Fuego. A ell ye a qui Jenny d'as Piedras Viellas le fació la profecía de que, d'a suya sangre, naixería Azor Ahai, o Principe que estió prometiu. Dimpués d'ista profecía, que Aegon creyió punto por agulla, fació casar-se a los suyos nietos Aerys y Rhaella ta asegurar-se de que se fese realidat. Aerys, a qui se le conoixió como o Rei barrenau, y Rhaella, antimás de chirmans, son o pai y a mai de Rhaegar, Daenerys y Viserys Targaryen. Istos ya nos suenan más, ¿verdat?

Totz os descendients de Aegon V son potencials Azor Ahai's. Ye una d'as razons d'a suya importancia. Tanto os bisnietos suyos, Rhaegar y Daenerys, como o bisnieto Aegon, si ye que de verdat ye ell, podrían estar o Principe prometiu. Por ixo tamién ye important a paternidat de Jon Nieu. Porque de confimar-se a teoría R+L=J tendría sangre d'Aegon V y sería unatro candidato.

Por si ni bi ha prou empandullo,a sangre d'Aegon V plega dillá d'a propia casa Targaryen. Por eixemplo t'a familia Baratheon. A filla de Aegon V, Rhaelle, ye a lola de Robert, Stannis y Renly, en haber-se casau con o sinyor d'a casa Baratheon d'ixas envueltas. Por lo que tamién Stannis ye descendient de Aegon V y, alavez, candidato a Azor Ahai. Igual como a filla suya Shireen u os milenta fillos bordes de Robert.

Ta forro de bota, atra familia tamién podría tener o suyo porcentache de sangre de Aegon V: os Lannister. A famosa frase d'as "libertatz" (cap. 8 de Daenerys en Danza de Dragons) que se prenió Aerys II (nieto de Aegon V) con Joanna Lannister, muller de Tywin y mai de Jaime, Cersei y Tyrion, ubre a puerta ta que belun d'os suyos tres fillos u os suyos tres nietos (Joffrey, Tommen y Myrcella) sigan tamién candidatos. Qui me leyetz, ya sabetz que ista ye una d'as mías opcions favoritas...

Encara que en os libros (y en a serie) apareixe poco, os zaguers diyas d'a vida de Aemon tienen bella importancia. En ells, ya con visions y delirios, remera la profecía. En sentir charrar d'os dragons de Daenerys, Aemon prencipia a creyer que ye ella la Princesa Prometida, ya que a parola "principe" en valyrio no tien chenero, por lo que no cal que siga un hombre, como dica alavez heba pensau. Por primer vegada, s'ubre patalera la opción de que Azor Ahai siga muller y de que siga Daenerys.

En o trestallo ya d'a fabulación, Aemon s'escribió con Rhaegar, mientres a suya vida, por lo que talment sí que tenese bell rol en hipoteticos plans ta salvar a linia Targaryen, quan prencipió a Rebelión de Robert. Ell mesmo le reconoixe a Jon Nieu que tenió a tentación de deixar o negro y intervenir en a guerra. Talment lo fese sin mover-se d'o Muro.

En o suyo viache t'o Muro, l'acompanyó un d'os personaches ta yo más misteriosos y apasionants: Brynden Ríos, de qui caldría charrar, y muito. Os dos compartioron destino mientres muitas anyadas. ¿Qui sabe qué charrarían u qué plans ferían? Tot lo que ye arredol de Brynden Ríos siempre me ha pareixiu que será de prou relevancia t'o cabo d'a saga.

AVISO: DENDE AQUÍ SPOILERS TAMIÉN D'OS CUENTOS DE DUNK Y EGG. SI NO HAS LEYIU THE HEDGE KNIGHT (EL CABALLERO ERRANTE, EN CASTELLANO) LEYE BAIXO A TUYA RESPONSABILIDAT

Diz que una d'as caracteristicas de Martin y de Canta de chelo y fuego ye que os personaches no son ni buenos ni malos, que tienen toda la gama de grisos, y ye verdat quasi siempre. Manimenos, en os Cuentos de Dunk y Egg, os dos protagonistas son buenos-buenos. U a lo menos no son malos. Dunk ye l'eixemplo de caballero feito a si mesmo, con un gran sentiu d'a honor y firmes prencipios eticos. Egg ye un zagalet que, a tamás d'o suyo orichen reyal, aprende de Dunk precisament de la honor y a etica. Y como sabretz totz los que haigatz leyiu os cuentos de Dunk y Egg, Egg, no ye que a embotada de qui esdevendría Aegon V Targaryen, Sinyor d'os Siet Reinos, rei d'os andalos y blablabla...

Un inte.... un Targaryen, fillo de rei, que dende chicot se fa pasar por una persona "normal" y que ye educau con serios prencipios eticos y morals, mezclotiando-se con o pueblo, aprendendo humildat, etc...? A qué me recorda isto? Efectivament. A qui, de conquerir Ponient, podría estar o venient rei: Aegon VI. Siga u no Aegon qui diz que ye, os dos tienen vidas con firmes similitutz.

Aegon V ye un personache prou prou especial ta George Martin. Antimás d'adedicar-le os cuentos, a condición basica ta esdevenir Azor Ahai ye estar d'a sangre suya, que no ye poco. Por ixo, creigo que se ye infravalorando a importancia de Aegon VI. Aegon VI no nomás ye d'a sangre de Aegon V sino que a os dos se les entrenó ta estar "reis buenos". Muitas fans creyen que morirá a escape, que le redotarán u que ye un FuegoFosco (branca borde d'os Targaryen) y que, en descubrir-se perderá la suya lechitimidat reyal. Talment. Talment no.

Tamién tien bella similitut con atro personache bien important como ye Varys. Aegon V, de nino, se rasuraba o tozuel ta que dengún no podese viyer o caracteristico pel Targaryen. Si viyetz os debuixos de Egg u as portaladas d'as edicions en anglés, a escape nos trayen t'a memoria la imachen d'una versión infantil de Varys. Un personache que pareixe que tien tot un plan de futuro t'o reino y que muitas piensan que podría tener sangre Targaryen dreitament u perteneixer a los FuegoFosco.

Mesmo ta despedir-se, Aegon V, lo fació de traza spectacular y con misterio adhibiu. Bellas quaranta anyadas antes d'o prencipio de Chuego de Tronos, Aegon V, o principe y hereu suyo Duncan Targaryen, y o Comandant d'a Guardia Reyal Duncan (sí, o d'os cuentos) marchoron ta Cubillar Estiver, bella mena de residencia de verano d'os Targaryen. Nunca no en tornoron, en pretar-se fuego o castiello dimpués d'una gran esclatada. Ixe mesmo diya naixió Rhaegar Targaryen. Bi ha pocas mencions en Canta de chelo y fuego a la conoixida como Trachedia de Cubillar Estiver, pero soi seguro que ye un evento de importancia t'a fin d'a serie. Bell cosa i pasó, ye de dar, y bell diya lo conoixeremos.

A zaguer vegada que belun en Ponient renunció a lo trono de fierro, o rei resultó tant important que buena parte d'os afers más importants d'a saga tienen bella relación con ell.

Por un regular no meto fuents en istos posts, pero como en iste he consultau arrienda cosas, tos pencho bell vinclo, prou recomendable antimás:

Wiki de Chelo y fuego

Los siete reinos

El trono de hierro