De vacanzas IV: Madalena, Mayestrato y Matarranya

De tornada t'Aragón, pasemos un diya en Zaragoza, aprofeitando que yeran as fiestas d'o nuestro vico, A Madalena, y que yera o diya central, o d'a chera de Sant Chuan. Cuento que iste vico estió un d'os primers en fer cheras de Sant Chuan en Zaragoza y soi prou seguro de que probablement siga un d'os que más chent i arrocle. 

Millars de personas se chuntan en un evento que imple o Parque Bruil anyada par d'atra y que a suya organización ye autochestionaria de tot, por un regular por l'Asociación de Vecins y as buenas chents de Radio Topo. Por si belún no i ye estau, a tardi prencipia con un pasavillas con diaples por as carreras d'o vico, que remata en o Parque Bruil. Astí se preta fuego a la chera, a on que bi ha diferents rituals machicos, como os de aventar-ie os mals deseyos u no tan machicos como los de blincar parti d'a chera u fer-ie bells mondongos ta cenar.

De tardis tamién gosa d'haber-ie mosica entre que os vecins van montando a chera, pero dimpués d'enchegar-la ye quan prencipia o concierto gran. Por un regular d'una colla aragonesa. Por astí, en as zaguers anyadas pasoron China chana, Dadá, Irregular Roots u una colla de versions de Kiko Veneno que no remero o nombre suyo. Todas sobrebuenas collas.

En ista edición se quedó una mica esbafada porque l'orache que feba no permitió de fer guaire gran a chera y nos cheló un poco a totz. Más que más a qui venibanos d'a placha en espardenyas y nos habiemos de meter a chaquetica. Con tot y con ixo, a zorrera no i faltó, ni os capazos con vecinas, companyeras y amigas.

Toda la siguient semana estiemos en Andorra, fendo-la servir como base ta fer cursas por a redolada. A primera estió t'o naixedero d'o Río Pitarc. Por o camín t'allá se pueden viyer os Organos de Montoro, entre os terminos municipals de Villar Luengo y Exulv, un poliu paisache y un increyible patrimonio cheolochico que, como tantas atras cosas, resulta prou esconoixiu t'os zaragocetas como yo. Toda la redolada ye, en cheneral, de muit buen viyer. Y millor que'n sería si no por l'incendio que fa bellas anyadas cremó buena parti d'as selvas. Ta conoixer ixa historia y l'albandono que les tienen os gubiernos a istos lugars, tos recomiendo de visitar o blog de "Nuestros montes no se olvidan", plataforma que luita ta actuar y reflexionar sobre a problematica d'os incendios en Teruel.

A cursa t'o naixedero d'o río Pitarc ye prou facileta. Prencipia en o lugar de Pitarc, un lugar prou chicorrón amán de Villar Luengo. Dende astí surte o camín que leva t'o naixedero. Ye muito bien sinyalau y imposible de cacegar-se-ie. Mientres quasi tot lo camín, que tasament tien costeras, se va por una selveta no guaire funda, pero prou como ta estar-se fresquet y con bien de goi. Bi ha bell churret d'augua, u a lo menos bi'n ha quan ha pleviu tanto como en ista anyada, bien pincho por o camín. A metat camín si fa u no fa bi ha una chiqueta ermita y un panel explicativo sobre a clasificación d'as especies que fació en a redolada Ignacio Jordan de Asso, un d'os personaches más importants y de vez esconoixius d'a sciencia y a historia aragonesa. A la fin se plega en una foz prou polida a on que se viye o naixedero. Tot lo camín tien tamién muitos puntos intresants dende l'anvista cheolochica. D'animals no'n viyemos guaires, pero diz que bi ha mesmo loiras. Tot lo recorriu se fa en bellas tres horetas y no tien mica dificultat. A la fin, en o bar de Pitarc, pillemos un capacet con uns ciclistas catalans que i yeran fendo BTT y con os cambrers d'o bar que son bien mahos y que tos recomiendo que visitetz ta fer-tos-ie a "biera de dimpués".

A tardi la pasemos en Villar Luengo y Cantaviella, dos polius lugars d'o Mayestrato que, sin destacar guaire tienen bells cantons pinchos. En Cantaviella, por qüestión d'horarios, nos quedemos sin visitar o museu d'o carlismo, a on que se interpreta a importancia d'o lugar y toda la redolada en as Guerras Carlistas. A l'atro'l diya estiemos visitando, quasi de conchunta con un autobús de chubilaus Mirambel y La Iglesuela, dos d'os lugars más polius que he visto en tot Aragón (y ya me'n he recorriu prou). Os dos tienen muito bien conservau buena parti d'o suyo patrimonio arquitectonico y fer una gambadeta por as carreras suyas ye revivir un poquet tot lo pasau que tienen, que no'n ye poco. Tanto o medieval, como toda la importancia en as debantditas guerras carlistas u en a guerra civil espanyola y en a posguerra con prou actividat d'o maquis. Si lo unes a lo paisache a on que son mesos, tot de mont, tiens un sobrebuen scenario ta recontar libros y cintas. Sisquiá se animase belún... De feito, Ken Loach gravó en Mirambel parti de "Tierra y libertat".

Dimpués d'un diya de "no fer cosa" en Andorra, que tamién cal de cabo ta quan, tornemos a fer un miniviache t'o Matarranya. Ya i yeranos estaus fa anyadas visitando toda la redolada, que ye muito recomendable. En aquella anyada bi heba sequera y nos recomendoron de no visitar El Salt, un churro d'augua que fa o Tastavins, porque yera ixuto de tot. Nos quedemos con as ganas y, en viyer as plevias d'ista anyada, no podebanos quedar-nos sin visitar-lo. Heba visto fotos y me'n heban charrau prous vegadas, pero viyer El Salt "en vivo" ye impresionant. Probablement, un d'os puestos más pinchos d'Aragón. Ya me flore haber tardau trenta y quatre anyadas en descubrir-lo!

El Salt ye en o cauz d'o río Tastavins, en o termino municipal de La Portellada. Se puede plegar-ie en auto u deixar-lo en a carretera y fer una chiqueta gambada dica astí. O churro se puet viyer dende alto, en una formación rocosa prou curiosa, y dende abaixo con una anvista espectacular de l'augua cayendo, con a formación cheolochica que ha creyau y a vechetación que i creixe. Y prou que ye un puesto sobrebueno ta fer-te un banyo, más que más en istos diyas de tanta calor.

A cursa por totz istos lugars la rematemos viyendo Calazeit y pasando-nos por Val d'Algorfa ta mercar-ie aceite d'a cooperativa y carquinyols, nyudos, tortas d'alma, almendraus y atras laminerías en o furno d'o lugar que i fan cosas rebuenas.

Aquí remato o recontamiento egolatra d'as mias vacanzas. Aspero no haber resultau prou canso y que hayatz trobau información ta visitar puestos pinchos, que yera lo que prebaba de fer.

De vacanzas III: Tarragona y Les Barraques de Reus

Dimpués d'o nuestro paso por o Tamborilé y Deltebre, marchemos a visitar a ciudat de Tarragona, que encara que teneba casa en Cambrils dende que naixié, nunca no i yera estau. A ciudat m'impresionó en un primer inte por a grandaria suya, que creyeba que yera más chicota, y por lo poliu de tot lo casco viello.

Una d'as cosas que me trucó lo ficacio estió a cantidat de turismo que tien a ciudat. Terne que terne viyebanos collas de turistas guidadas por tot. Cosa que prou que aprofeitabanos en que podebanos ta amanar-nos-ie y prebar d'ascuitar de baldes as explicacions que feban os guidas turisticos.

A catedral, prou gran y polida, más que más parando cuenta d'a grandaria d'a ciudat, ye en un sobrebuen puesto. En l'alto d'una costera, a la fin d'unas grans escaleras, que la fan encara más imponent. A visita mereix prou la pena. Tot lo redol en mereix, de feito.

En a parti antiga, bi yeran muito presents bellas quantas d'as tradicions d'a ciudat como os diaples u os castellers. Gracias a un d'os debantditos guidas, nos enteremos d'as barbaridatz que fan. En a plaza d'a seu, que ya ye en costera, ta Santa Tecla fan os castells, lo que me pareixió prou perigloso. Pero como no be de pareixer-les-ne prou, tot feito lo castell, o pilar, que le dicen, puya as escaleras que van t'a seu y dimpués preta a baixar costera t'abaixo, como podetz viyer en o video de 2011 que pencho contino. Tamién i yeran por tot os sinyals de Catalunya, indepes y no, y o d'a ciudat, que nos remeraba a lo que fa servir a D.Ch.A. y que se viyen en o video en prous balconadas.



Pero si bi ha qualcosa que caracteriza a la ciudat y que la fa mesmo más intresant son tamién as construccions romanas que i remanen en prous buenas condicions. D'o circo se conseva, a ran de carrera nomás que una curva, que ya en ye prou. Pero a parti más intresant ye a que s'ha de visitar y que va baixo tierra, a on que antimás podemos viyer bellas piezas que i troboron en as excavacions. Viyendo a enrona que i queda y habendo pasau antis por a maqueta d'a ciudat romana que se puet visitar de baldes en atro edificio, un se puet fer una chiqueta ideya de cómo yeran ixas corridas de cuadrigas. 

Millor conservau y mesmo más pincho ye l'anfiteatro d'a ciudat. A conservación ye prou buena y, si no por a ilesia visigotica que facioron dimpués, sería quasi entero. Teniemos a suerte de trobar-nos de nuevas con o guida que nos heba recontau lo d'os castellers y que yera menando a una colla d'escolars valencianos. Recontó como yeran de verdat os espectaclos que se i feban enterando-me de prous cosas intresants.

De maitins i feban as execucions publicas. Un d'os escolars preguntó que como yera que a chent iba a viyer-las, a lo que o guida respondió con un dato que yo no conoixeba: agora mesmo, en totz os países a on que bi ha pena de muerte, en totz, puetz ir a viyer-las. Con más u menos burocracia, pero todas as execucions son publicas. Cuento que ixo estió prou didactico t'a zaragalla que bi heba. De tardis ya yeran as representacions de batallas, con os gladiadors y tot l'aparato de scenografía que meteban. Encara que isto sí que lo conoixeba, coincidié con o guida que ye una pena que en as pelis de romanos nunca no reproduzcan ixas decoracions y nomás metan a los gladiadors en l'arena, "a pelo". Creigo que sería prou más intresant si las reproducisen más parellanas a la realidat.   Tamién charró sobre a peli de Gladiator, o papel d'a muller en l'imperio, os sinyals ta demandar vita u yugula (vida u muerte), u as mitificacions d'os martirios d'os cristians. Muito intresant, y ¡qué important ye tener un buen guida ta conoixer a historia!

Entre que escribiba isto me trobe con iste articlo que charra d'os gladiadors amplament.

En esvoldregar-se o imperio romano, os visigodos i facioron una capilleta, que esdevenió dimpués en ilesia, y que'n queda prous repuis. Se puet viyer de traza prou esclatera as trazas d'a cruz principal y bells arcos. En a visita se puet baixar ta l'arena y sentir-te en bella mida como si estases un d'os gladiadors, esmaixinando lo que veyerían dende astí y como be d'acollonar viyer-ie a tanta chent asperando que mueras u mates u, a lo menos, te chugues a vida.

O vermú lo faciemos, como no, en a Casa d'o Vermú. Ye un bar, en tot lo centro de Tarragona, especializau en Vermú. Por 5 euros te dan a botella de vermú, sifón y una tapica, y ya tú te chitas lo que quieras. Ixo sí, no demandetz garra atra cosa, porque te clavan. (3 € una lata de Heineken y 3,5 € una tapa d'olivas). Tamién se i puede mercar o vermú ta levar, a un pre de 20 € a garrafa de 5 litros. En Cambrils tamién tienen siede, indo enta o parque que bi ha a o sur, amán d'a on que antismás se feban as ferias.

A l'atro'l diya marchemos t'a ciudat rival suya: Reus. No sabeba que bi heba entre istas dos ciudatz un pique como tantos que bi'n ha en Aragón. A lo visto, Reus estió en bell inte a segunda ciudat en habitadors de Catalunya, y por debant, prou que sí de Tarragona. Hue tien bells 110.000 habitadors, por debaixo d'os 130.000 de Tarragona. Una atra vegada, me trucó lo ficacio lo suyo sinyal, una flor parellana a la de los Tyrell de Canta de chelo y fuego, que a soben meteban adintro d'una quatribarrada.

A ciudat no ye guaire pincha, encara que tien bella placeta polida y ye de buen gambadiar. Pero tampoco no ibanos a fer-ie turismo, asinas que no la visitemos con ixos uellos. Fuemos ta Reus t'o festival de Les barraques, porque de nueitz i actuaban Els Catarres, colla de dificil viyer a iste canto d'a muga. De feito, si no m'entivoco, nunca no han actuau en Aragón.

O festival se fa en una plana que bi ha quasi difuera d'a ciudat, pero bien comunicau por autobús. Mientres quatre diyas se i fan conciertos de toda mena y bi meten puestos y barras asociacions d'a ciudat. Me remeró, en iste sentiu, un poquet a la cincomarzada, pero más "de base". No bi heba partius politicos ni sindicatos mayoritarios. A ran politico-sindical bi yera chent como Arran, SEPC, CGT y muitos atros con firme presencia de l'independentismo y l'antifaixismo. Tamién bi yeran los de l'Associació de jugadores y jugadors de rol de Reus, con una d'as millors barras de todas, a on que teneban bandierins de Gandalf decindo "You shall not get drunk" u de Tyrion Lannister con o suyo "Un Lannister siempre paga as suyas deudas". Tamién bi heba tabla de chupitos en dothraki y alto valyrio y atras frikadas variadas. D'a resta d'asociacions bi heba de tot: o casal Desperta Ferro (a on que millor mosica meteban), una asociación de heavys, asociacions esportivas, collas de castellers, asociacions animalistas, .... En una d'ellas se viyeba o debantdito "pique" con as tarraconeneses con un cartel a on que meteba "Mamades [una bebida]. 1'50 €. Perque els de Tarragona també son persones".

L'ambient yera bien animau, encara que yera un chueves. En primeras i tanyeban collas esconoixidas ta nusatras asinas que aprofeitemos ta viyer un poquet todas as barras y fer-les buen gasto. Els catarres plegoron en l'inte chusto, quan nos prencipiabanos a cansar. Ye una colla que me fa muito goi y que quereba viyer-la dende fa tiempo y no nos facioron burro falso. Dende a primer canta prencipiemos a blincar sin aturar dica la zaguer, aquella Jennifer que los fació famosos y que todas faciemos coro. No nos dioron ni un segundet t'alentar. Gracias, Catarres, por un concierto tan gran y aspero viyer-los antis con antis una atra vegada.

O festival continaba con atras collas como Obrint Pas, encara que decidiemos de no quedar-nos-ie más diyas, que ya somos viellas y nos cal descansar-nos bell poquet en vacanzas. Manimenos, nos apuntamos iste festival, porque ye prou posible que i tornemos, si continan con programacions tan buenas y con o mesmo buen rollo que i trobemos. 

Continará por a Madalena de Zaragoza y o sur aragonés...

Jodorowsky ye un timador, un parolero y un boque

Sintié charrar por primer vegada de Alejandro Jodorowsky como poeta a un conoixiu que tenié de Chile. No'n sabeba guaire más, dica que prencipié a intresar-me, a radiz de lo viviu en a trobada Retes en rete de Ruesta, por o sistema de creyencias new age, que se va conformando china chana como relichión organizada. Pero a verdat ye que no me'n heba intresau guaire dica que viyé que veniba ta Zaragoza, t'o Principal, y que s'autodefiniba como psicomago y tarotista.

Creyeba que sería un simple timador u un sincero creyent d'as fateras new age, u que simplament teneba muita barra y quereba fer diners. Pero lo leyiu en o suyo "Manual d'a psicomachia" m'ha feito ixorrontar-me. Lo primero por lo que i mete. Ye prou grieu, en a mia opinión, pero astí son os Sandros Reys, u a ilesia catolica que diya par d'atro dicen barbaridatz parellanas. Lo segundo, por que bi haiga tanstisma chent "alternativa" que siga a iste tipo y que pague buena cosa de diners ta viyer lo que quiera que vaiga a fer-ie. As dentradas son quasi acotoladas quan escribo iste post, en un show clamau Cabaret mistico a on que diz que fa un "taller participativo ta sanar". A diferencia entre lo que fa ell y lo que fan Anne Germain u os cristianos evanchelicos yankees ya ye nomás una qüestion de marketing

Como no sé si lo conoixeretz u si sotz conscients d'o que diz iste ababolaz, tos ne comento. En o libro "Manual de Psicomachia, da solucions en forma de rituals absurdos ta sanar malotías. Tot lo libro ye abominable. Nomás he puesto trigar bellas quantas perlas, pero qualsiquier pachina que leigatz ye igual de penible. Belunas son simplament bizarras, pero atras son verdaderas barbaridatz. Y iste ye un d'os gurús d'a nueva relichión que tanto mola en a Madalena y en atros puestos guays. Por eixemplo:

Recomienda matar animals ta salir d'a heroina:

"Recomiendo a lo consultant que merque, ta prencipiar, dotze muixons de garchola y dotze churis blancos. Cada vegada que vaiga a ficar-se heorina, antis habrá de pretar en a man dreita suya un muixón y en a cucha un churi, pretando dica crebar-les os uesos".

T'a desvalorización sexual d'as mullers, que se fiquen monedas d'oro en a vachina u que pinten corazons con sangre menstrual d'amigas suyas:

"Ye muito eficaz que a consultant fique en a suya vachina una u qualques monedas d'oro (seguntes a intensidar d'o complexo)..."

"A consultant puede pintar con a suya sangre menstrual un medallón ta portiar-lo penchau visterament en o cuello suyo. Si ya ye plegada en a menopausia, ha de conseguir que una amiga más chovena le permita ficar os didos en a suya vachina ta tintar-los en a sangre y fer o suyo autorretrato"

T'a timideza femenina, que vaiga ta "danza d'o vientre" (mica problema con ixo) y dispare armas:

"Y antimás puet conducir-se en un club de tiro ta que aprenda a disparar con pistolas, rifles y, si ye posible, con una ametralladora. Isto l'amostrará a expresar con seguridat y rasmia os suyos pensamientos y emocions".

Creye que os ninos sin pais masculinos no pueden sentir-se dimpués "virils" (y regular que en os shows bi habrá arrienda mais solteras):

"Un nino, ta sentir-se más tardi un adulto viril, cal que conte con a presencia d'un pai que pueda incorporar-lo como arquetipo".

Organiza secuestros a lo V de Vendetta, ta curar a una zagala de l'anorexia (isto no ye un delito?):

"En un caso de anorexia, y con buens resultaus, gosé consellar un acto de psicomachia de tot oposau a los metodos oficials: Sin que a malauda en parase cuenta, m'achunté con os suyos pais y los convencié d'organizar un acontecimiento teatral achustando los servicios de tres actors masculinos, de farcha lo más agresiva posible, ta fer un falso secuestro. La mai levó a la filla suya de crompas. En o preto d'a carrera, dos d'os actors baixoron d'un auto, entre que o tercer feba de chofer, y menazoron a las dos mullers con as suyas pistolas, obligoron a la filla a dentrar en l'auto, l'amordazoron, le taporon o tozuel con un saco y, dimpués de fer vueltas por as carreras d'a ciudat mientres una hora, la facioron baixar-ne ta engarcholar-la en una cambra fosca, con nomás un viello y puerco leito y un balde t'a pichar y femar. Antis de deixar-la astí tirada, la espulloron. Mientres tres diyas, en un bol ta cochos, sin tartir le ufrioron a virolla de baixas calorías que ella en yera adicta en a suya luita por achiquir o peso suyo.
En a virolla, cada vegada veniba una cucaracha muerta. En o quarteno diya, dentroron en a garchola con una camara de video y la menazoron con violar-la si no se deixaba filmar demandando a los pais suyos que pagasen o rescate que os que la heban presa exichiban. A los dos diyas, los actors, decindo-le que s'heba pagau o rescate, l'amordazoron, le taporon o tozuel con o saco y la levoron de tornada, fendo-le una cursa d'una hora ta, a la fin, deixar-la en coritatis en a puerta de casa suya".

Contra o "refús ta l'esperma" (d'os hombres):

"O consultant ha de conseguir una vela en una ilesia, regalar a suya cera (que alzará en un atro recipient), marturbar-se acompanyau d'una foto de su mai, chitar o suyo semén en o vaso d'a vela y vulcar a cera regalada sobre a materia vital, alzando a mecha".

Ta estar-se goyoso en una oficina u negocio recomienda:

"Pichar en un recipient y, con un cuentagotas, recorrer o nuevo territorio [d'a oficina] deixando tres chislas d'iste pichau en cada cantonada d'as cambras"

Creye que os eccemas son "una demanda de morisquetas no conseguidas en a nineza".

Ta una persona con colesterol altero dende que se separó d'a suya parella le recomienda que:

"merque en una carnecería un kilo de grasa de res, sin carne. Faiga-la en a parrilla y minche nomás ixo. Faiga-lo un viernes. Repeti-lo dica que complete quatre viernes (4x4=16, o numer d'anyadas que ha estau separada), dimpués nunca más no podrá minchar grasa.En que remate de minchar-se o kilo de grasa (en o desayuno, almuerzo, hora d'o té y cena) frote a suya boca con a fotografía d'a persona que se separó. Dimpués d'o quarteno viernes apedeque ixa foto y plante sobre ella una limonera."

Y asinas tot...

De totz os parolers que he leyiu y visto en as zaguers anyadas iste ye un d'os piors. Asperemos que a las suyas seguidoras no les de por fer os suyos rituals porque podemos rematar muito mal. En serio, leyetz o libro, si podetz, sin vomecar y sin levar-tos as mans t'o tozuelo en cada paragrafo.

Bells quantos articlos más, los podetz trobar en:

El retorno de los charlatanes

Jodorowsky en o programa de Magonia en Punto Radio Bizkaia

Y o libro entero lo puetz baixar en pdf aqui.

Y o video d'o taller de psicomachia que ferá en o Principal aquí

Prou de gurús y supersticions!

De vacanzas II: Cambrils y Deltebre

Creyeba que Cambrils yera tasament una anecdota en a mia vida, pero cada vegada que i voi me trai tantismas remeranzas que, a la fin, creigo que ye una parti más important d'ella que no'n pensaba. Como me dició Arale: "Iste ye quasi o tuyo lugar".

De chicorrón i leyeba todas las anyadas "Jim Botón y Lucas el maquinista" u o trapacil de Mortadelos que heba heredau. Tamién i merqué beluns d'os mios primers comics de superheroes. En un estanco vendeban cuatro comics por pocas perras, por un regular de series que no se vendeban guaire, y asinas leyé bells G.I. Joe, Los Nuevos Vengadores u Capa y Puñal. Encara i son muitos d'os chuguetes que teneba de chicot y que fuoron levando-ie en creixer. Os monyacos d'o Pressing Catch, o Scalextric u mesmo os remedos de Heroquest que surtioron como fungos quan yera nino.

Tamién i facié as mías primers cursas en bici dica Salou, por a carretera, sin casco y con o talento d'un adolescent. En fer-me más gran, tenié sobrebuenas borinazas, más que más en La Pineda, pues Cambrils ye t'as familias más que t'a chovenalla. Pillar conchetas, pescar con pai, gambadas dica o Pi rodó, chelaus en La Jijonenca, as cortezas de trigo en a churrería La Caspolina, as ferias con a escopeta d'os zuros, as nueitz sentindo a lo pianista de lo Copacabana mientres chugaba con a maquineta d'os avions, as nadadas dica casa dios ta pillar os balons de placha de Nivea que aventaban as avionetas.... Sí que ye verdat que Cambrils aculle muitas d'as mias remeranzas.

Estianyo nos i estiemos una semaneta. O lugar ya no cambea guaire. Dende que deixó d'estar lugar de pescataires y s'adedicó a lo turismo, lo unico que cambea son os nombres d'os bars y as botigas y a grandaria d'a zona azula. Lo trobé poliu, como siempre, con ixa gran placha. En chunio encara ye de buen trobar un puesto a on que deixar a tovalla. Pero basicament, lo faciemos servir como punto de surtida y plegada ta tres viaches que faciemos: Deltebre y redolada, Tarragona y Reus.

A cursa ta Deltebre yera más que más ta viyer muixons, que ye un sobrebuen puesto t'a practica d'a ornitolochía y a on que bi ha bellas quantas especies que no somos feitos a viyer a soben. O paisache ye bien pincho y curioso. Rodiaus de roz por tot, te trobas con l'Ebro, amplo y rebutient d'augua en chuntando-se con a mar Mediterrania. Os muixons i son tamién por tot. Orache calient, campos de roz, plantas por tot, insectos a trompicuesco, toda l'augua dulz que cal, ... que más pueden demandar? 

En o Ecomuseu de Deltebre nos informoron d'os puestos que bi heba ta visitar y d'as plachas publicas que podebanos banyar-nos-ie. En o mesmo centro, se pueden viyer diferents exposición sobre os ecosistemas d'os campos de roz, os costumbres d'a pesca d'a redolada y mesmo bi ha un acuario con bellas quantas especies y una gambadeta por un chiquet chardín botanico bien pincha.

Por tot lo Parque Natural bi ha diferents puestos ta poder viyer a fauna tranquilament. Como no feba guaire buen orache y antimás yeranos difuera de temporada, yeranos quasi solos por o Parque y quasi ni viyemos ixos ninos chilando que siempre te trobas en tot Parque Natural entre que os pais suyos pasan de tot...

Por os camins, pero más que más dende os "alufradors", podiemos viyer bien pinchas y comodas a toda mena de muixons que ya conoixebanos: a-saber-las garras como o garrapescaire (1) (Ardea cinerea), a garra royenca (Ardea purpurea), o pescairet blanco (Egretta garzetta), o garrapescaire blanco (Egretta alba), y o pescairet boyero (Bulbucus Ibis), patos de toda mena, volandrinas y cobalbetz (Delichón urbica) con qui compartiemos un d'os alufradors, o gracioso capucete chicot (Podiceps ruficollis), as falcetas d'augua (Sterna hirundo) que i yeran por tot, y, prou que sí os flamingos (Phoenicopterus ruber) que siempre los heba visto como una especie prou exotica y que me aganaba prou de viyer-los. Atras especies que i trobemos estioron: Bocha gran (Porphyrio porphyrio), o churrupetas (Tringa totanus), l'aneda roya (Neta rufina), o sartanero (Himantopus himantopus), cardelinas (Carduelis carduelis), a dalleta negra (Plegadis falcinellus), o cluchidor (Emberiza calandra), y muitas más que ixublido agora mesmo,... Una lista completa d'as aus que se pueden viyer astí la tenetz en iste vinclo.

D'entre os alufradors, en totz se pueden viyer cosetas. Pero bi'n habió uno dende a on quese podeba viyer practicament tot lo que hebanos visto dica alavez y muito más. De feito estió l'unico a on que viyemos flamencos y muitas atras aus. Ye a parti de Riet Vell chestionada por SEO - Birdlife. 

Iste prochecto mercó bellas tierras en o Delta ta fer-ie cautivo agroecolochico de roz, productos que venden en a suya web. Tamién i fan actividatz d'educación medioambiental de toda mena como podetz viyer en os boletins que publican en o blog suyo. Por as suyas instalacions, una mica amagadas pero facils de trobar si preguntatz en qualsiquier bar, se pueden viyer os campos de roz con as aus que trobamos de cutio y l'alufrador que tos ne charraba. Dende astí, podemos fer d'espías d'as aus y viyer os panels explicativos que i tienen. Antimás, i tienen una loseta a on que van apuntando as aus que van viyendo-se-ie, metendo lo nombre suyo en catalán, castellano y o nombre scientifico. También i tienen bells eixemplars d'una chicota guida d'os muixons d'a redolada ta fer-los servir a l'inte.

A cursa la rematemos con una chiqueta gambadeta por a Placha d'o Trabucador, una parti repincha d'o Delta que conecta por un caminet "La banya" una peninsuleta con salinas y bell par de alufradors que mereixe la pena d'ir-ie. A color d'a cayida d'o sol antimás feba uns paisaches repolius.

Remeratz que antimás d'as fotos que pencho en o blog, bi'n ha más en Flickr de Barrenaus.

Continará por Reus y Tarragona...

(1) Os nombres en aragonés d'as aus los he preso d'a Wikipedia en aragonés y d'o libro "Bocabulario aragonés d'abes d'Uropa", publicau en 1996 en a colección Puents enta ra parola de Consello d'a Fabla Aragonesa.

Vacanzas (I): Tamborilé

En bellas 10 anyadas que levaré treballando, ista ye a segunda vegada que tiengo vacanzas pagadas de verdat y, como buen egolatra que somos totz os bloggers recontaré bellas cosas intresants que he visto por si podesen fer honra y prebando de no dentrar en a mia vida personal más de lo que calga. En deciseis diyas nos ha bagau de visitar parti d'a costa dorada catalana y d'o sur aragonés. D'estar-nos en dos festivals y en bellas quantas borinas. Y de fer arrienda fotos que podetz viyer tanto aqui como en Flickr de Barrenaus.

Prencipiemos y rematemos as vacanzas en o sur d'o país. Mezquita d'Exarc estió lo nuestro primer destin, en ir t'o Tamborile, festival de mosica de carrera, que feba a suya cinquena edición, con más exito y millors collas cada anyadas. O viernes, como todas as anyadas, prencipiaba con a ceremonia d'o mayo.

Ta qui no lo conoixca, pende en que a chovenalla d'o lugar (os mozos, más que más) van t'a ribera y tallan un choplo bien gran. Dimpués han de ficar-lo quillau y bien pito en un chiquet forau en a plaza d'o lugar. Asinas contau pareix facil, pero no'n ye mica. Prencipian con l'arbol por tierra y, d'entre buena cosa de chent lo devantan metendo unas estixeras chigants feitas con dos chiquetz arbols por debaixo d'o choplo t'aparar-lo. China chana, atros mozos con cuerdas y os mozos que aparan l'arbol más amanaus t'a base van fendo fuerza ta devantar-lo a poquetz, entre que os que aparan as estixeras van puyando-lo. En ista edición teniemos susto y tot, pues en metat d'o proceso, una d'as estixeras se trencó y totz viyemos a craba roya. Con tot y con ixo, os mozos d'o lugar, que son bien peligarceros se'n apanyoron ta quillar-lo y podiemos tener o mayo presto t'o sabado.

A l'atro'l diya prencipiaba o festival que cuento que ya'n habré charrau prous vegadas. De maitins, tres vascos nos facioron un taller a on que nos recontoron a historia recient d'a txalaparta, un instrumento que no me feba guaire goi, pero que dende iste Tamborilé he aprendiu a apreciar-lo un poquet más. Esfuriatronadas y os Alarifes de Teruel metioron a nota más folkie d'o maitin. Tamién bi habió reggae, una fanfarria rumana, u una charanga andaluza ya de tardis. 

L'orache pareixeba que nos respetaba dica que, en o preto d'una actuación d'os castellers, pretó a plever a embute y mesmo a pedregar mientres bell rato, habendo-nos d'acubillar como podiemos en o parque d'o lugar. Con tot y con ixo, dimpués os Falcons de Villafranca nos facioron atro pase a on que enlucernemos con a suya actuación. ¡Qué de miedo que pasemos qui tenemos vertigo!

L'ambient, como en todas as edicions, s'iba animando dica la nueit, a on que ya se desfasaba prou. As partidas de morra, os pozals de biera y a chent bailando y cantando se viyeban por tot. Fa goi que cada anyada nos i trobemos más amigos de tot lo país y que todas las anyadas rematemos conoixendo a nueva chent y fendo-ie nuevas amistanzas. Y tamién, como todas las anyadas, nos sentiemos a-saber-los de bien acullius por as chents de Mezquita que, dende a primer anyadas, nos han ubierto as puertas d'o lugar, nos han tractau como uno más y nos han feito pasar unas nueitz imposibles d'ixublidar.

Recontaría más cosas d'a nueit, pero tampoco no'n remero guaires más. Os "diferents estaus d'euforia", como dicen dende a organización, nos levoron t'o leito de maitinada (pero encara de nueitz) entre que encara tanyeban Orkresta, qui actuoron dimpués de Wyrdemor (os Lurte murcianos). Prou que hesenos quiesto quedar-nos-ie más rato, pero ya yeranos en as tres pedretas. Y o domingo hebanos de tornar ta Zaragoza ta parar o viache enta Cambrils.... 

Continará...