Sindicatos

O feito de que Esperanza Aguirre y tantos atros sectors d'a dreita meyatica sigan gosando enrestir contra os sindicatos, más que más UGT y CC.OO., con buena cosa de refirme entre a ciudadanía, ye muito indicativo d'a historia y o momento sindical en l'Estau espanyol. En os veniens parrafos, quan charre de sindicatos charro nomás que d'os "grans", dimpués charraré d'atros.

Os sindicatos s'han dedicau mientres muitas anyadas a lo "mamoneo". Cobrar de l'estau ta fer cursos, ta medrar en todas as dembas d'a sociedat (en as universidatz, por eixemplo) y, ta fer proselitismo. Una vegada más trafucando l'obchetivo con a organización. En cuenta de luitar por os dreitos d'as treballadoras, han luitau por a suya propia supervivencia como organización. Por fer más afiliadas y pillar más diners. Por meter a las suyas delegadas en totz os puestos que quereban (que me pareix muito bien) ixublidando buena parti d'o mensache sindical por o camín (que me pareix muito mal). S'han convertiu china chana en un apendiz más d'o PSOE y en una fuent de nuevas afiliadas t'o partiu. En una colla de sumisas que enrestiban contra o PP quan gobernaba (y muito bien feito), pero que, malas que o suyo partiu dentró en o gubierno, acochoron o tozuel y s'adedicoron a esfender as suyas politicas antiobreras. Tardi y mal convocoron una vada cheneral que no nos queda atra que esfender y refirmar, por una qüestion de coderencia propia. Pero con una mica de vergüenya d'haber d'ir a o canto d'ixa colla de traidors.

Os sindicatos son un blanco facil, pues todas hemos visto, u conoixemos, arrienda casos d'o "mamoneo" debandito. Delagadas sindicals que fan servir as suyas horas ta tocar-se a faba. Representants universitarias de trenta y tantos que, con una clamada d'o partiu reblan en as suyas demandas. Que fan manifestacions a favor d'as medidas educativas d'o gobierno (podetz consultar as hemerotecas). Comités sindicals que negocian rebaixadas de toda mena en as interpresas, pero que as suyas companyeras d'organización se salvan misteriosament.... Y asinas asinas. Con razón muitas tenemos poca simpatía por ista chent. Prou que, mesmo en os sindicatos grans, bi ha chent muito treballadera y que sí que esfiende a las treballaderas. Que creyen en a luita sindical y que adedican as horas sindicals, y muitas más, a fer-lo. Pero en son as menos.

Como siempre, bi ha atros sindicatos ixublidaus en as noticias. Totz os que no sigan UGT y CC.OO. no i apareixen. ¿A on son as noticias sobre as luitas sindicals de SOA, CGT, CNT, Intersindial, etc...? ¿Que son menos importants que no o nino afogau en no se dó, que una cebolla chigant en un ortal, u que un auto que s'estozola y que plena de sangrientas imachens os telediarios?. Prou que tamién bi ha chentucia en ixas organizacions, pero o "mamoneo" ye muito menor. No son vinculaus a garra partiu por decisión propia u talment por indiferencia d'istos. U por medrana a que os totpoderosos "sindicatos grans" les faigan a tana. En tot caso, independientement de qui siga en a D.Ch.A. u en Moncloa, esfienden lo mesmo.

Soi a favor d'a existencia de sindicatos, prou que sí. Y soi a favor d'as horas sindicals. Y mesmo d'as liberadas sindicals. Y refirmo muito más a os sindicatos que as refusan por coderencia interna con a suya ideyolochía, encara que tamién refirmo que las faigan servir. Ye una decisión respetable, ta yo, en totz os dos casos. Pero me pienso que a más gran parti d'o publico que vei y lei as noticias, "fica a totz en o mesmo saco". Que muita chent ye pensando que os sindicatos no calen u que no fan honra. Ixo ye o pior de tot lo que ye pasando en istos diyas pre-vada. Sabe muito bien o facherío lo que ye fendo. Un desprestichio d'os sindicatos grans, con muita razón, que afecta a totz os sindicatos. Una desmovilización masiva ta que quan, en bells meses gobierne a dreita, no tiengan mica capacidat de convocatoria. Que quan o PSOE les clame a actuar contra o nuevo gobierno d'o PP, "a sociedat civil" (como odio ixa expresión) no les siga.

No sé como será a vada, pero gosaría decir que no será como caldría que estase. Muita chent no puet dreitament secundar-la por que as suyas mainates no les deixarán. A muitas atras nian preguntarán por medrana a perder o puesto de treballo que tanto nos cal agora. Muitos d'os que vaigan t'as manifestacions no tendrán treballo asinas que, encara que sigan a rebutir de chent, l'estau no se colapsará.

Ta rematar, una anecdota d'o que a mala acción sindical feba por a universidat fa no tanto. Remero que, fruito de l'actitut d'os grans sindicatos, bellas organizacions no sindicals de treballaderas d'a universidat, preboron de meter en a negociación d'os estatutos un articlo a on que a universidat reconoixeba o dreito a no estar sindicau y a no fer vada. Antismás, as representants d'estudiants hebanos prebau de meter atro articlo decindo que a Universidat de Zaragoza reconoixese os dreitos humans. Nos dición que no caleba, pues yera de dar que los reconoixeba. No conseguiemos que lo metesen. Manimenos bi heba muita chent (y de cuchas a más gran parti) que sí que refirmó que no yera de dar que se teneba dreito a no estar sindicau u a no fer vada. Impresionant. No estar sindicau yera, ta muitas, más important que o dreito a no estar discriminau por garra razón. Surrealista. (No remero si a la fin s'aprebó).

A foto de "Membrado sindical" le'n he amprau a Purnas. O suyo articlo sobre ista, y atras fotos, lo podetz leyer en: http://www.purnas.com/2010/09/10/jesus-membrado-ex-triballador/