¿Qué ye pasando? (III)

En iste articlo por entregas (1 y 2), hue toca charrar d'actitutz. As que tenemos unas y as que tienen atras. Creigo que unatra d'as razons d'estar perdendo a partida politica ye una diferencia platera en as trazas de tratar-nos cuchas, dreitas, ultracuchas y ultradreitas.

Talment ye en o mesmo esprito d'a cucha (más que más d'a "cucha hippie") o tratar con rispeto a todas as ideyas. Tot ixo que dició Voltaire de "No comparto a opinión tuya pero daría a vida mía por esfender o tuyo dreito a expresar-la" ye muito poliu, pero quan, qui expresa ixa opinión no tien mica deseyo de respetar-nos y, mesmo lo que quier ye que as nuestras trazas de pensar sigan silenciadas, encorridas, ridiculizadas, viedadas y/u acotoladas, tenemos un problema. Cuchas y dreitas no somos chugando a o mesmo chuego. A dreita "moderada" da minutos de chuego a la ultradreita. Esfiende os suyos sinyals identitarios (veiga-se a esfensa pepera d'o "franquismo arquitectonico", por eixemplo). Les monta visitas d'o Papa, plataformas ideyolochicas, AVT's, FAES, "partius blancos", retes interpresarials, meyos de comunicación,... A ultracucha ye de tot amarguinada y encorrida por a socialdemocracia, a lo menos en iste costau d'Europa (y cuento que en totz). A socialdemocracia ye, agora mesmo, sectaria de tot y no fa caso de dengún a la suya cucha. Le ye fendo una favor masiau important a la/s dreita/s.

A dreita fa servir, antimás, o suyo caballo de Troya ta esfender cosas imposibles d'esfender y t'achuntar de traza fanatica a milenta personas en toda Europa y tot lo mundo occidental: o cristianismo. O cristianamen ye radicalizando-se terne que terne. Os movimientos antiabortistas han conseguiu a pur de lemas facils, de demagochia y de mentiras cientificas, arroclar a un camatón de chents arredol d'a más periglosa dreita que bi ha habiu en muito tiempo en "occident". Homosexuals, no cristianas, mullers, socialistas, cientificas, todas ixas que no nos sentimos en a suya chicota definición de "persona normal", somos l'obchetivo d'o suyo enuello, y cal que siamos, encorridas, reeducadas y si cal, engarcholadas u asesinadas (ista ultradreita gosa esfender a pena de muerte). A cucha socialdemocrata, plena de cristianas y mesmo d'opusianas ye de tot incapable de criticar u d'actuar contra ixe poder. Zapatero y Obama rezan por as nuestras almas, entre que Belloch adedica carreras a San Escrivá de Balaguer. ¿En qué universo sería posible viyer a Aznar en o diya de l'argüello gay, por eixemplo? Pero as socialdemocratas no son solas en ixe respeto-medrana t'a ilesia. Mesmo muitos sectors d'as cuchas alternativas viyen con buenos uellos a colaboración con sectors d'a ilesia. Sectors que nunca no renuncian explicitament a condenar a las abortistas, a las homosexuals, etc... Que bailoteyan entre as dos auguas. Y un diya viyes en misa (en aragonés, pero en misa) a socialistas sentindo "a parola de Dios". ¿Quan irá o respeto en l'atra endrecera? ¿Quan a dreita catolica dixará de condenar-nos a las flamas d'o infierno que han creyau? ¿Quan dixarán de carranyar-se de tot cada vegada que se diz a escuchetes que talment puestar quizau rebaixen beluna d'os tantos y tantos privilechios que tienen y que garra atro sector d'a sociedat en tien? As ilesias cristianas no nos perdonan una. No sigamos tan fatas de perdornar-les-ne nusatras.

L'eixemplo Chavez ye un paradigma de tot isto. Un personache con muitos defectos, prou que sí, pero que ye aplicando politicas socialistas, por eixemplo en a nacionalización de as materias primas y meyos de producción d'o país suyo. ¿Qué se fa dende as socialdemocracias Europeas? Criticar-lo de tot. Quan bell partiu d'extrema dreita aparix en os Parlamentos Europeos con mensaches de tot racistas, ¿qué fan as democracias cristianas europeas?. Chustificar o suyo amaneixer por a incompetencia d'a socialdemocracia, l'empente d'os turcos u cualsiquier atra fatera. Y no aplauden porque les fa vergüenya. Y ixo que, en o segundo caso, somos charrando d'o mesmo espacio cheo-politico. En o caso de Chavez, con charrar d'a historia politica y economica de Latino America puetz chustificar cuasi cualsiquier cosa. Por no charrar que se puet chustificar nomás con o present y que no cal chustificar cosa. O caso de Venezuela y de muitos atros países ye un caso más de esconoiximiento d'a sociedat que, en a suya más gran parti, repite os topicos que recitan en as rufiertas d'a TV y radio.

Creigo que ta ista situación s'ha plegau por diferents factors. Un d'ells ye o fracaso d'a cucha y ultracucha en comunicar-se por lo barafundioso d'as suyas proposas. Por as contradiccions que asoben tenemos y tienen. Quan as socialdemocracias gobiernan muitas vegadas fan politicas de dreitas, esbafando o mensache y dixando a mesa presta ta que gubierne a dreita con tot lo dreito d'o mundo a continar ixas puliticas. Entre as ultracuchas bi ha de tot: belunas que parix que continen en o sieglo XIX, tanto por as suyas proposas como por a suya estetica (más important que no parix), y atras que vivan en Pandora, a planeta d'Avatar, minchando flors, mientres os marines les espaldan as casas-arbols.

Cal estar plateras. Cal que as cuchas tiengamos un mensache platero. Qué queremos fer, porqué queremos fer-lo, porqué ixo ye millor ta la Tierra y ta las humanas que i vivimos. Hemos d'estar esviellando-nos de contino, no podemos continar fendo gambadetas o primer de Mayo, ni tolerando que bi haiga sindicatos como UGT y CC.OO. que preben d'estar representants d'os intreseses d'as treballadoras. ¿Cómo puet estar que con cuatre millons de personas esqueferadas, millons d'os nuestros impuestos malfurriaus en salvar banqueras, y o periglo de que nos chubilemos más tardi, cobremos menos y tiengamos menos y piors treballos, no s'haiga convocau una bada cheneral a ran estatal fa tiempo? Prou de favors. A ilesia no nos querrá nunca, no le calemos y no nos cal. Podemos ganar a partida sin ella. Os sindicatos vendius son fendo más mal que no bien. Con ells ni t'a cantonada. Cal tornar a estar transgresoras. Sï, prou que tendremos enemigas. Y que en a TV nos clamarán terroristas, antisistema y todas ixas cosas. Pero ye que ya lo fan y nusatras no somos ni a mitat de furas que'n habríanos d'estar. Claridat, canya y prou de tolerancia con qui no nos la tien.