Goyoso anyo nuevo

Ya queda poco ta rematar l’anyada y ARA cultural nos ha quiesto felicitar a nueva anyada con un video repincho que podetz viyer más t’abaixo u visitando o blog suyo. Tamién ARA, ha quiesto que pasemos unas fiestas d’ivierno bien calients, leyendo as marranadas que nos rezenta Lola Dolç en o libro de relatos eroticos en aragonés “Luengas enreligatas”. Ye una sobrebuena altertativa ta fuyir d’a programación de TV nadalenca, tan rebutient d’horteradas, ninas, debuixos y zintas repetidas por quincena anyada seguida.

Por si no torno a escribir, que sirva iste video como felicitación de cabo d’anyo de Tierra de Barrenaus.

Lotería de Purnas

Cuento que muitas, por no decir todas, as lectoras de Tierra de Barrenaus conoixeretz Purnas. Por si no ye asinas, tos comento que totz os años comparte con as lectoras suyas un numero de lotería, o 420, con a unica condición de que escribamos cualcosa en o blog suyo. O resultau ye bien majo. Arrienda de chent escribindo-ie de tot en diferents luengas. A mía chicota alportación la pencho tamién aqui, encara que tos animo a que leigatz todas as falorietas penchadas en Purnas:

Levaba 20 minutos treballando y ya yera canso de tot. Farto d'a chentucia que no feba so que consumir, sin nian parar cuenta d'a existencia suya. Cuatre personas puyaban por a escalereta mecanica. Yera a familia tipo. Pai, mai, nino y ninona. Os dos catrins feban ixe estrapaluzio que tantismo mal le feba en os oyius suyos. Con tot y con ixo heba de ganar-se o chornal asinas que s'endrezó enta els. Sin tiempo ni ta tartir, o pai le fotió un: “¿Sincusa, sabes aón pegan os muebles de cocina?
Alavez esclató y chilando “No soi d'información!!!!” blincó dencima de l'ombre y pretó a foter-le punyadas. Diz que calió tres personas de seguridat ta rancar-lo d'astí dencima. Diz que años dimpués, en o psiquiatrico repetiba terne que terne “no soi d'información, no soi d'información....”

2 fotos chenials

Un chiquet post nomás ta penchar-tos dos fotos chenials. Prou que no por a calidat suya, que ya sabetz os míos nulos conoiximientos sobre fotografía. Ye por a chenialidat de dos personas. A primer, a que fació a pancarta que trobé en Pont de Montanyana. Ye un lugarón repoliu d'a Ribagorza que tos recomiendo que visitetz. (cuan tienga bel ratet pencharé fotos en Flickr de Barrenaus). Os vecins i son fendo una campaña contra que s'esboldreguen as escuelas u bella cosa parellana y una d'as muitas pancartas que teneban penchadas en as balconadas deciba "Queremos respuestas fehacientes". Pocas vegadas he visto fer servir ixa parola en una pancarta. Me remeró a lo lugar de "Amanece que no es poco". De seguras que en Pont de Montanyana han copiau a Faulkner....

L'atra chenialidat ya ye en plan somarda, pos cal estar capín u muito fato (u boque) ta fer un carril bici como iste que trobé en a marguin cucha, muito amán d'an que se fació lo concierto d'o 20 d'aviento. A luz no yera guaire buena, pero cuento que se vei bien, mesmo l'arbol en metat d'o carril.

Cabo de semana nacional

Nomás cuatro ringleretas ta convocar toda a cantidat de cosas que bi ha iste cabo de semana. A yo me toca de treballar y no podré ir ta tot, asinas que habretz de lebar-ie un monchón ta que chile por yo.

O sabado de maitins toca a -ya tradicional- manifestación contra o sinyal español a las 12 en a plaza S. Miguel. O manifiesto lo pencharé contino. De meyodiyas podetz chentar en A Enrestida con ixe lema de “dengún plato ta zaga” (que m'esmeliqué en leyer-lo). Cal chentar firme, que de tardis se torna t'a carrera a manifestar-se en solidaridat con Egunkaria y a libertat d'expresión y de prensa. Ya de nueis, prencipia la borina en un conciertazo que tamién organiza A Enrestida. Los Draps, os antigos Inadaptats, Magnetophones... O puesto no ye guaire bueno, pero l'ambient regular que'n será!. Chobens y UCA continan tamién organizando as Chornadas por os dreitos y libertatz (¿nacionals?) d'Aragón, que, encara que en ista edición no bi ha que una charrada, parix prou intresant.

Con tot isto y, habendo de treballar, no sé si conseguiré sacar bel ratet ta visitar o Salón d'o comic que tamién se fa mientres o cabo de semana.....

MANIFIESTO
En 1591, o Chustizia d´Aragón Chuan de Lanuza V, fendo serbir os Fuers d´Aragón, y dimpués d´un luengo prozeso chudizial, falló de traza contraria a os intreses d´o rei Felipe II de Castiella y I d´Aragón. O prozeso y as reazions d´o rei prebocón l´enoyo de muitos aragonese que leboron a una botinada ziudadana. Carranyoso, inbadió y ocupó melitarment o Reino d´Aragón. Efeutibament, Chuan de Lanuza estió executau y decapitau per oposar-se a que os exerzitos extranchers de Felipe II de Castiella dentrasen en o nuestro país. A suya cabeza tallada estió amostrada a o publico mientres más de cuatre anyos, y os cuerpos decapitaus d´os prenzipals mainates abotinaus, penchaus sin tozuelo en as murallas d´a ziudat per espazio de más de 20 anyadas. A razón siempre i estió, per tanto, de parti d´Aragón.

Contamos que, en razón d´o debandito, l´izau d´o granizo sinyal espanyol ye una manca de rispeto a iste pueblo per diferents razons:

1.- En primer puesto, per lo que suposa ficar-ie una bandiera d´os asesinos d´o Chustizia d´Aragón cara ta él. Tos prexinatz meter una gran bandiera franzesa bofetiando a Agustina d´Aragón? De seguras que no pas. Pos nusatrxs tampoco no queremos que´n suzeda en Zaragoza. O molimento a o Chustiziazgo ya en tien prou con estomacar en un costau l´edifizio d´a Capitanía General, l´exerzito, siempre garant d´a unidat indibisible d´a suya quiesta Espanya.

2.- Perque a ziudadanía aragonesa no ha estau consultada sobre a colocazión d´ista. Plantar o sinyal en a plaza d´Aragón ye una dezisión caziquil y coautiba d´o nuestro alcalde, a tamás d´as queixas que n´han surtiu. En a mesma clau de carenzias democraticas, cal dezir esclatero tamién que a bandiera que s´ha penchada no ha estau esleixida per dengún de nusatrxs como ziudadanxs; ye un sinyal imposau en o tristament zelebre golpe d´estau faixista de 1936. Dengún no s´esmaxina meter en Alemania u Italia un sinyal d´as suyas dictaduras correspondients. Pero aquí en bale tot.

3.- Debant d´un molimento zebil a l´esfensa d´a legalidat y as libertatz, o PSOE nos ha traita una bandiera melitarista, de man de melitars, ta fer omenache a las “bertutz” melitars. A plaza d´Aragón ha deixau de fer omenache a qui s´estimó más, a costa d´a suya bida, de disolber un exerzito, l´aragonés, antis que no ocasionar una esferra, ta estar l´epizentro d´os ereus d´os abotinaus d´o 18 de chulio de 1936.

O “present” que queremos d´o Ministerio de Defensa no ye o suyo sinyal; queremos a rebersión de totz os espazios que tien en o suyo poder l´exerzito. Queremos dentrada de totz y todas os ziudadanxs de Zaragoza a las piscinas melitars d´o Soto de L´Almozara, queremos que nos retornen o control zebil de l´aeropuerto de Zaragoza, queremos que deixen d´abentar bombas en o poligono d´As Bardenas y queremos que nos rebiertan o poligono de tiro de San Gregorio que ocupa más d´un terzio d´o termino monezipal de Zaragoza, y ta que a situazión siga encara más sangrant en rezients calendadas emos sufriu un inzendio en a zona melitar anteriorment dita y s´ha comprobau o talant dictatorial y faixistoide de l´exerzito espanyol, trespasando a güega d´o poligono de tiro y fendo perdidas per balura de 7,5 millons d´euros que como gosa de pasar-ie y estando un afer d´esfensa “nacional” no podemos dezir-ne ni brenca ni meya. Colonialismo en estau puro.

Tamién desichimos que l´autual Chustizia d´Aragón, Fernando García Vicente, ubra expedient ta sacar-ie ta cutio o sinyal colonial espanyol, más que más cuan en istos intes o Conzello de Zaragoza ye incumplindo de traza esclatera a lei de bandieras que en teoría abría de rispetar, en aber retirau d´o suyo costau as que bi n´eba d´Aragón y Zaragoza, pero como ya emos dito, aquí en bale tot.

Por más que le faiga duelo a l´alcalde, Sr. Belloch, Zaragoza ye a capital d´Aragón, y ni negando a existenzia d´a Comarca de Zaragoza, ni sacando a cuatribarrada d´os taxis u d´a Expo, ni ficando sinyalotas frent a o Chustiziazgo, Zaragoza deixará d´estar Aragón.

MOBILIZA-TE CONTRA LA SUYA BANDIERA
ESPAÑOLA AU D´ASTÍ!
DIFUERA O SINYAL ESPANYOL D´A PLAZA D´ARAGÓNConboca: COORDINADERA CONTRA O SINYAL ESPANYOL

L'enemigo catalán

En zaguerías, y más que más, dende a trobada d'o fosal de Pietro III d'Aragón me son plegando arrienda correus y mensaches catalanofobos dende muitos cabos que no m'asperaba. Siempre me plegan mensaches d'ixa coda y me floren muito. Bellas vegadas mesmo tienen razón en parti u tot lo conteniu suyo, pero sé que se fan dende a ignorancia, os topicos y, masiau asovent, ixe espanyolismo vanal que tanto mal nos fa.

A historia ye una disciplina prou rebordenca. Ta prencipiar ye una ciencia social y, alavez, se puede interpretar (que no ye lo mesmo que falseyar). No ye la mesma ta todas. Ta continar cal estudiar-la muito ta saber-ne bel poco. A chent gosa d'estar conscient de que no sabe mica sobre fisica y no presume de saber-ne. Manimenos, a pur de repetir topicos estendillaus a bando por bellas intresadas, muita chent crei que sabe d'historia.

Asinas que prebaré de dar a mía modesta ambiesta sobre bellas custions d'a politica y d'a historia aragonesa, catalana y espanyola.

O enemigo no ye Catalunya. Catalunya, a más gran parti d'o tiempo nian sabe que existimos. A Catalunya, Aragón rai. L'enemigo d'Aragón no ye Catalunya, pero a l'españolismo y a o baturrismo (que no ye que espanyolismo con cachirulo) le fa muita honra que as aragonesas continemos pensando ixo. D'eixemplos bi'n ha un trapazil.

O zaguer trasvase, enemigo reyal que consiguió que as aragonesas salisenos ent'a carrera un diya par d'atro, que nos tornasenos a sentir identificadas con o sinyal nuestro, no estió una demanda de Catalunya. Encara que sí que bi iban bels hectometros, as cansas que dión mal, y que continan dando-ne estión as valencianas y as murcianas. Agora que ya no ye de moda, Valencia y Murcia tornan a estar amiguicas nuestras y tornamos a mirar-nos enta Catalunya mirando l'enemigo. Ixublidando, antimás que, estió gracias a ellas y, más que más, a ERC que no bi ha trasvase. Aragón no pinta cosa en Madrid pero, t'a part d'alavez, ERC, qui s'oposaba a ixe travase i pintaba. Y muito. Ye Valencia l'enemigo oficial d'Aragón? No. Ye Catalunya. As que nos salvoron.

En Salamanca bi ha documentos furtaus por as nacionalistas espanyolas en a Guerra Civil. Furtaus de todas as cantonadas de l'Estau espanyol. Tamién d'Aragón. Cuan a Generalitat catalana, los demanda, be-te-me que, en Aragón, en cuenta de demandar a nuestra parti, nos metemos de parti de as ladronas y, sale un camatón de chent contimparando-lo con os biens d'a Franja. O qué pasa alavez? Que nos quedamos sin biens y sin papels. Y a mala oficial contina estando Catalunya, a tamás d'estar o Estau espanyol qui contina furtando-nos parti d'a nuestra historia, y a D.Ch.A. qui no fa mica poder por conseguir que torne a documentación furtada.

Cuan, en 1707, Felipe IV d'Aragón decretó a suya conquista d'o nuestro país (viyer documento aquí) y nos furtó a nuestra independencia (encara que t'a part d'alavez yera más administrativa que no reyal) no sabeba o bien que lo eba feito. Nian podeba preixinar que en 300 anyos ixublidaríanos de tot qui nos furtó o país. Qué tratamiento le damos en Aragón a ixa parti d'a historia? A la parti más important d'a historia aragonesa?. Penible! En a exposición que bi habió l'anyo pasau en a Lonja zaragozana, cuasi ni se'n charraba. De bote y boleyo, Aragón deixaba d'estar independient. Por arte de machia. Abracadabra. Sin muertos ni cosa parellana. En Aragón Radio fan una seczión sobre os reis d'Aragón. L'atro diya tenié a suerte de ascuitar chusto o capitol adedicau a Felipe IV (V de Castilla). D'el deciban asabelas cosas. Un camatón de datos. Y d'entre totz ixos, que fació unas reformetas que rematoron con os fueros aragoneses. Ixo sí, respetando o nuestro dreito privau. Ixublidoron tot lo dreito de conquista y que en un primer inte, tamién estricallaba o dreito privau. Siempre que se'n charra parix que sacar os fueros sía cualsiquier cosa fateta. Como qui fa una visita a Zaragoza y se'n leva un recuerdo. Que son os fueros, que no ye un alzaclaus de Flufi! En o 300 cabo d'año no se fa mica acto oficial. Manimenos en o 200 cabo d'año d'o naiximiento de l'Estau espanyol moderno y, en buena mida, d'o nacionalismo español moderno, se fan actos por tot lo país. Dica gomecar. No querebas historia? Pos tiene-ne, pero de la que queramos nusatras... Enemigos a monarquía borbonica, u os castellanos por furtarnos a independencia? No pas! Metamos un sinyal chigant suyo en o monumento a qui esfendió os dreitos nuestros y morió por ixo. L'enemigo reyal, l'enemigo oficial ye Catalunya, que tamién se quedó sin independencia en ixa mesma guerra.....

En o trestallo de mentiras historicas, en fan todas. Catalunya fa una interpretación da historia dende o sieglo XIX que ye una mica etnocentrista, ye verdat. Pero no ye tan aluenyada d'a reyalidat como atras que fan por aquí. Asovent siento en as clases mías u como topicos en a carrera, ixo de que “Cuan Catalunya yera d'Aragón”, “Catalunya yera un camatón de condadetz” u mesmo, la millor de todas, “cuan Aragón invadió Catalunya”. Ista chent son los que se suposa que saben d'historia y los que critican cuan charran d'a corona catalanoaragonesa. Lo d'a corona catalanoaragonesa, ye una interpretación d'a historia y dengún no diz que ixe termino haiga existiu antis d'o sieglo XIX. (Y si lo diz ye un carnuz, que en Catalunya bi'n ha tantos como en atros puestos). Pero lo de invadir Catalunya ye una barbaridat historica tan gran, que habría de meter roya como un ababol a qui lo dezise. Aragón y Catalunya se chuntón como iguals. A dignidat reyal pasaba por a branca aragonesa, ixo ye verdat. Ramón Berenguer IV nunca no estió rei. Pero Catalunya no yera d'Aragón. Yeranos iguals. Y Catalunya no yera un camatón de condadetz a l'ora de funcionar como unidat. Eixemplo bien platero ye o Compromís de Caspe, t'an que fuoron como uno y an que os tres territorios (Aragón, Valencia y Catalunya) teneban o mismo ran. Iguals os tres.

O Vidal Mayor, que tamién estió en a devandita exposición d'a Lonja, ye o documento más important d'Aragón. D'a historia aragonesa. Una replega d'as nuestras leis, escrita en aragonés y una alfaya en tantos y tantos sentius. Bella cosa parellana a la Bill of Rights estadounidense, pero muito más antiga. Que aón ye? No pas en Aragón. Ni en Catalunya. As catalanas no nos lo furtoron. Ye en California. Ye o nuestro enemigo o fato que lo vendió? No. Ye l'enemigo California u USA? No, por favor, que tienen bases aquí! Ye l'enemigo a D.Ch.A. que nian lo demanda? No pas, mozet. L'enemigo ye Catalunya que pilló los biens d'a Franja. (Que tamién cal charrar-ne y bel día lo feré).

O estatuto que tenemos pude. Os estatutos que hemos teniu pudiban. Os estatutos que tendremos pudirán. Porqué? Yo creigo que puede influyir o feito de que os diputaus que pactoron con l'Estau o primer estatuto nos metesen por a clamada vía lenta. Un d'ixos yera Biel, por cierto. Un d'ixos que tien como enemigo a Catalunya y a cualsiquier cosa que parixca catalana. Un d'os mayors y piors catalanofobos. Tamién puede influyir o feito de que os politicos d'o PSOE y o PP lo que quieren ye medrar en o partiu y ta ixo no cal endizcar a o PSOE y o PP espanyol. Si yes callau y no das guaire mal puetz rematar en Madrid. Y si no que pregunten a Rudi, Lanzuela, u Eva Almunia. Puede influyir o feito de que, cuan os catalans fan un estatuto an que demandan una serie de cosas, en cuenta de copiar-lo punto por agulla, lo denunciamos y aquí en femos uno que no demanda ni chisla. Qui ye l'enemigo d'Aragón? Os que pactoron os diferents estatutos? No! L'enemigo oficial ye Catalunya por esfender os suyos dreitos y intreses.

Y la rematadera. Historicament en Aragón bi ha habiu dos luengas. Aragonés y catalán. En o reino y en a Corona. Documentos ta probar-lo bi'n ha arrienda. Os filologos de tot lo mundo reconoixen a l'aragonés como luenga y dicen, sin mica duda, que lo charrau en a parti oriental d'Aragón, a clamada Franja, ye lo mismo que se charra en Catalunya, Valencia, Mallorca... Pero aquí, en Aragón, tenemos a las más saputas de todas. Y mesmo as zapateras han feito filolochía. Y surte como fongos chentota demandando que no s'impose o catalán. En una d'as más grands mentiras que nunca no s'ha feito en Aragón. O prochecto actual de lei de luengas, fa pena d'o feble que ye, y mesmo puestar que la rebaixen, si ixo ye posible. A unica luenga que bella vez s'ha imposau en Aragón ye o castellano, fendo retacular a aragonés y catalán dica que o primer ye en as tres pedretas y o segundo ye amarguinau socialment en muitos puestos. Dica o punto que nian muitas que lo fablan gosan de decir-lo, no sía que creigan que son d'ERC. Ye l'enemigo o castellano, verdugo d'as luengas aragonesas? Son enemigos d'Aragón qui nos niegan o dreito d'aprender y expresar-nos en as nuestras luengas? No. L'enemigo oficial ye Catalunya porque.... Isto ya ni sé porque ye.

No. En a mía opinión l'enemigo no ye Catalunya. Ye más, a yo no me cal un enemigo. A o Gran Chirmán sí que le caleba. Y le'n cal. Enemigos míos son l'imperialismo economico y cultural. O d'Estaus Unius, o espanyol y tantos atros. Enemigos míos son os que niegan as reyalidatz cientificas y historicas. Os que dicen que Aragón invadió Catalunya, que a Guerra Civil prencipió en 1934, que lo que se charra en Fraga no ye catalán, que a teoría d'a evolución ye mentira u que no se matoron chodigos mientres a II guerra mundial, por eixemplo. Enemigos míos son los que nos niegan dreitos individuals y colectivos, y Catalunya no me'n ha negau mica.

Aprendamos todas de todas. Ni a las catalanas ni a las aragonesas nos cal inventar mica historia. En tenemos una bien polida, plena de aciertos y errors, de glorias y penas y, en a suya parti más gran, feita de conchunta. Conoixcamonos y treballemos chuntos, que muita más honra nos ferá que no ista absurda situación d'agora.

Ampraus 035

Un d'os primers articlos d'iste blog estió sobre a XII FLA. Quí m'iba a decir t'a part d'alavez que tres años dimpués continaría vivo o blog ta poder charrar d'a quincena edición.

XV FLA: Creigo que ye una d'as millors ferias que se fan en tot lo país y que siempre cal ir-ie. Con tot y con ixo, tamién tiengo cuasi siempre bella queixa. Cuasi totz os años i aparix a chentucia d'os FACAOS. Bi'n ha habiu d'años an que os conciertos yeran prou penibles u an que sacoron o tren d'a cultura. Estiaño a unica queixa, por agora ye por o cartel. Sino veigo mal (si ye asinas correchiz-me) en o cartel i sale bien d'aragonesas ilustres: Goya, Ramón y Cajal, Joaquín Costa, Agustina d'Aragón... y a o canto d'ellas Escrivá de Balaguer. Un personache que no alportó cosa t'a cultura y que estió o ideyologo y creyador d'una d'as sectas fanaticas más periglosas d'o cristianismo. Secta que refirmó y s'arpofitó d'o franquismo y que contina fendo-lo güe. Tos convido a ir t'a Feria, viyer os conciertos, mercar bel buen libro ta ixublidar o Nadal y queixar-tos a la organización d'o cartel. En esfensa d'a FLA cal decir que tornan a fer o tren d'a cultura y que os conciertos d'ista edición son buenismos.

A SGAE torna a perder un chuicio. Unatro. Y van quemisió yo cuantos... Suerte que a muitos chueces parix que no les fa goi a SGAE, (porque en a chusticia no confío mica) y de cabo ta cuan les foten una d'istas. Publico, ves-te-ne tú a saber porqué, siempre da treslau d'istas noticias. Ye un d'os pocos meyos an que nos podemos enterar d'istas cosetas. Un d'os pocos que no be d'estar pleno de clients agradeixius d'os inquisidors istos.

UPyD: Publico ye tamién ye un d'os pocos meyos que critica ubiertament a UPyD. Mesmo ye un d'os pocos meyos espanyols que charran nunca d'espanyolismo. Afortunadament, parix que a UPyD, como totz os partius ya l'han creixiu de criticos (cuento que a la dreita de Rosa Díez). ¿Podrá continar vivo un partiu choven (en tiempo de vida) que ya rebute de criticos y arribistas? Asperemos que no.

Zeus no existe. Ni Dios ni garra d'as invencions d'as falsas. En ixo somos d'alcuerdo l'autor d'o blog homonimo y yo. Charrando d'o tema, tos remero que MHUEL, contina vivo y que podetz trovar cómo apostatar en a suya web.

Tres videos ta rematar: O primer, inviau por Bercimuelles, sobre a tourné de Lurte por tierras d'Oc u Oil (no sé aón exactament). O segundo una canta heavy de Stravaganza, una colla que me recomendó un compañer de treballo. Cuento que a letra tos sonará. O tercer, un rapero friki que consigue rimar condensador de fluzo. Muito gran.

Lurte en l'Estau francés:

Stravaganzza:

Shogun XL:

Malfurriar diners II, en Nadal

No que charraba fa bels pocos diyas sobre malfurriar diners y me trobo en o 20 minutos con un articlo an que fablaban d'as perras que todas imos a dixar-nos en tener un fascal de lucetas malfurriando diners y enerchía por toda a nuestra quiesta ciudat. Bieeeeen! Inde en charra en o blog suyo, en un articlo bien intresant an que tamién i culle Barcelona que, a tamás d'estar catalanas no s'eslampan d'as fateras nadalencas. Leyetz-lo que ye buenizo de tot.

Nadal y malfurriar diners son sinonimos. O nadal, antimás de muitas atras cosas ye una orchía de tot lo pior d'o capitalismo. Tot o proceso d'os presents obligatorios chenera una cantidat de basuera inchustificable de tot. A más gran parti d'os presents rematan amagaus en un calaixo (u aventaus dreitament) y totz os papers emplegaus ta envolver-los emplindo, con bel poquet de suerte, os contenedors azuls. O belén d'a Plaza d'o Pilar ye una faltada t'a intelichencia. D'una man contina representando nomás que a una parti d'a población, as catolicas. Fendo, antimás, parti de toda a maquinaria catolica ta atrayer a la catrinalla t'a suya secta-mafia-relichión. D'atra representa Palestina muito millor agora, cuan lo son fendo y ye a rebutir de maquinas, que no dimpués con os pacificos partorcetz y una crica reis portiando presents. Finalment costa buena cosa de diners. Con una chiqueta parti de tot ixo podrían apañar os foraus en o nuevo carril bici de o Coso, escoscar un poquet os poligonos d'a marguin cucha, fer conciertos ta replegar diners ta países empobrecius, dar de minchar a toda a chent que ye indo t'o minchadors socials.... tantas y tantas cosas...

Con tot y con ixo, en tiempos de crisis, de leis de economía sostenible, de retallar os presupuestos t'a universidatz, de campañas t'amortar os standbys d'os electrodomesticos, ye una faltada t'a intelichencia lo d'as lucetas. Malfurrian diners y enerchía sin sacar-ne mica treslada. Y antimás preban de vender-lo como que son cabidando diners porque l'año pasau en malfurrioron más. Brut!

Antismás, o mío refús t'o Nadal yera más que más, por o mío ateísmo. O nadal, por muito que bi haiga chent que prebe de bender-lo como atra cosa, no tien sentiu sin o catolicismo. Güe ixe mesmo refús contina, pero ye más grau o refús que me produix o malfurriar, o timo capitalista, an que se consigue que tot lo mundo gaste más diners que no puede y aplauda un malfurriar de diners publicos de todas, en lucetas, monchons de chodigos y romanos y escandinavos obesos.

De cazurros y dinamita preventiva

En istos diyas soi tenendo un déjà vu como pocos en eba teniu dende fa tiempos. Aragón ye un país lento y os problemas suyos, que en atros puestos se solucionan de camín, aquí hemos de fochar firme ta mirar de prencipiar a apañar-los bel poquet. En leyer os periodicos veigo como cambean bels detalles, pero os debatz y as fateras que se dicen son as mesmas que cuan prencipié a mía vida politica. Y agora son charrando unatra vegada de trascolar augua...

A lei de luengas, a eterna promesa d'a lei de luengas, contina estando una pantasma. Talment ista vegada sí. Dicen, igual como deciban en 2001. Pero os argumentos en contra continan estando igual de penibles que en ixas embueltas. As cazurradas que somos sentindo en istos diyas son ta pretar a plorar. Entre que o gubierno retalla os diners t'a universidat, más educación les caldría a muitos diputaus. IU, Anchel Conte mediante, se mete a la fin d'o canto d'os que esfendemos a reyalidat y que no nos inventamos nombres nuevos ta cosas que ya en tienen.

L'atro debat perén en Aragón ye l'augua. En leyendo as noticias sobre Mularroya veniban t'a ment mía as dinamitas en as casas de Chanovas u l'estricallo que fación con o Camín de San Chaime t'a part d'Artieda con l'entibo de Yesa. Dinamita preventiva y dimpués ya viyeremos. Agora o zancocho ya ye feito, pero a dignidat no la han mercada ni dinamitada.

Intresant ye tamién o silenzio de bel partiu que, d'antismás, feba sinyal de totz istos afers y que, hue, ye quedo en un cantonet, mientres se (re-)descubre a sí mesmo.
Con istos debatz foi alcondanza d'a canta aquella de Héroes del Silencio “siempre es la misma función, el mismo espectador, el mismo teatro en el que tantas veces actuó...” Como se nota que son d'aquí.

Sobre o “debat” d'a lei de luengas:

A opinión de IU

PSOE y PAR se quieren muito

L'articlo 2, carabirubi

Manifiesto de asociacions culturals d'a Franja (en Purnas)

O manifiesto en o Periodico

Sobre Mularroya:
Os chuicios de Mularroya

A web de Jalón Vivo

Pedro Arrojo sobre Mularroya

La Sexta sobre Mularroya (vía Desde Banarús)

Ecologistas contra l'entibo

Happy Time

Deciba a muller en yerbas de Florencio que yera un mal sinyal cuan se charra d'a interpresa an que treballa una en primera persona d'o plural. Cuento que muitas begadas se fa / lo foi por economía lingüistica. Ye más breu “a mía interpresa” que no pas “a interpresa an que yo treballo” u “nusatras” en cuenta de “as mías companyeras, a mía mainate y yo”. Con tot y con ixo tien muita razón en fer ixa reflexión, pues ye verdat de tot que as interpresas, u a lo menos buena parti d'ellas, preban d'estas parti d'a vida tuya, y mesmo d'a identidat tuya.

Belunas talmén haigatz visto una serie que se diz “Dead like me”, traducida t'o castellano como “Tan muertos como yo”. Ye una serie d'umor negra con muita más medolla que no parix. I charran de muitas cosas, pero bi ha un afer siempre present, que ye o treballo d'a protagonista. Ista zagaleta treballa en a interpresa Happy Time. O nombre ya ye bien somarda. A suya chefa ye una muller perén feliz y ristolera que a suya vida ye a interpresa y que no dixa de prebar que'n sía la d'a mesacha prota. Prou que en ixa interpresa son terne que terne con as fateras d'as cenas, as reunions ta compartir experiencias y asinas asinas. Ixa deleria de trafucar companyeras con amigas. En a serie se'n fan a mofla, pero a trista reyalidat ye que ixas cosas pasan en tot lo mundo capitalista y en muitismas interpresas.

De todas as cosas que fan parti d'a indetidat mía, a mía nacionalidat aragonesa, o mío ateismo, a mía sexualidat, a mía luenga, …, me niego a dixar ni un sacre a la interpresa. Por supervivencia prou que cal fer-se a rialleta y, mientres as horas de treballo fer que un ye chupiu d'esprito interpresarial y que se i siente asaber-lo d'identificau. Pero dillá d'as 14:00, a mía vida torna a estar mía y no pas de Happy Time.

Belatras, manimenos, i son bien contentas con ixa situación. He conoixiu milenta de casos an que, as treballadoras d'a interpresa fan d'ista cuasi toda a suya identidat. Cuasi toda a suya vida. Muita chent que no vive dillá d'a chornada laboral. O pior ye que, en estar asinas, antis u dimpués gosan puyar en a interpresa y quieren que todas síamos igual como ellas. Vivir por y t'a interpresa, sentir-la como si estase d'una. Ir contenta t'o treballo no porque te faiga goi, sino porque ye a vida tuya.

Huellas de barro, una colla zaragozana de rap que muitas conoixeretz, tien una canta en o disco anti-Expo an que charra d'istos (y atros) afers. Ye buenisma y tos recomiendo que l'ascuitetz. I diz a frase ixa de “tu jefe se hace el majo, sí, pero el arriba y tu abajo” (Si fa u no fa). Pues ixo. Entre que la conseguitz u la remeratz habré de jopar t'o treballo, que se me fa tardi.

Bendita ignorancia

D’una charrada reyal. No calen comentarios, no?

- Iste Zelaya ye un boque y tien a culpa de lo d’Honduras. Que quereba perpetuar-se en o gubierno!
- Bueno, lo que quereba yera reformar a constitución ta poder estar esleixiu unatro mandato.
- Pues ixo! Perpetuar-se en o poder!
- Nomás si o pueblo le botaba y antimás lo de nomás dos mandatos no se fa que en bels pocos países d’o mundo. En Espanya estió Felipe González catorce años y no pasó cosa....
- Como va a estar Felipe González catorce años!
- Catorce que se’n fotió....
- Si?
- Sí
- Bueno, pero iste quereba perpetuar-se en o poder, que la democracia en ixos países ya se sabe como va.
- Te remero que Hugo Chavez perdió un referendum.
- Prou que sí, pero dimpués lo tornó a fer dica que ganó. Ixo no ye una democracia.
- Quiers dezir como Irlanda, con o referendum d’a constitución europea?
- O qué?
- Irlanda que i votorón o tratau de contitución europea y salió que no y fa bels pocos diyas lo han tornau a fer dica que ha saliu que sí. Irlanda ye democratica u no?
- Bueno, sí, pero...
- Lo mesmo ye, no?
- Pero Zelaya ye un boque!
- ....

2 frikadas 2

Dos frikadetas que pertocan güe. En cuenta d'imbiar-las a tot lo mundo y emplir-tos os correus con as barucas mías, tos las pencho aquí ta cuan tiengatz bel ratet. La primer, puestar que sía que sía un Flashforward de lo que lebemos todas penchau d'o cuello en bels pocos años. Me la imbió Arale y, como friki y electronico, me fazió firme goi, encara que as posibilidaz de fer-lo serbir malament son muito grans, como cuasi toda a tecnolochía...

A segunda le'n agradixco a Nafarroako. Ye una canta feita por una crica d'incheniers que estudian en Madrid. Grandisma. Paraz cuenta porque ye apegallosa y en que la sintatz tos foteretz tot lo diya cantando-la.

Dispositibo d’o seiseno sentiu:



Fe-te industrial:

Ampraus 034

L’agüerro ya ye plegau y con qué trazas! Que’n fa de fredor...! Ixo sí, nos dixa paisaches repinchos como o d’a foto penchada, feita en Bezas, redolada d’a Sierra d’Albarrazín. Podetz biyer-ne más en Flickr de Barrenaus.

Torturas taurinas: As torturadoras ya no saben ni qué nuebas trazas de torturar creyar. Seguntes informaba Publico, en Galapagos (Castiella) fan bella mena de safari con autos encorrendo toros dica que se cansan (as umanas) y lo matan fotendo-le un tiro. Como cuasi siempre ista colla de salbaches tamién son biolentas con as umanas y a las periodistas y actibistas las menazaron, mesmo plegando a cremar l’auto d’un mozo d’o lugar que, seguntes ellas, estió qui informó a PACMA y a las TB’s. Prou que con a pasibidat d’a resta d’o lugar y d’a guardia zibil. Penible. En ista web tenetz más info sobre o caso de Galapagos que se suma a tantas y tantas atrás barbaridatz feitas a os animals y consentidas y mesmo subenzionadas por l’Estau espanyol.

O PAR ye una mafia. Ixo ye vox populi dende fa muitos y muitos años. Ya cuasi ye parti d’o imachinario colectibo aragonés. Ixa mena de Status Quo no gosa d’estar denunziau, pero leyié (en l’Eraldo!) que PP y CHA demandaban esplicazions por a chestión d’Ordesa. Podrían demandar-las por tantas y tantas cosas... pero a lo menos ye un primer trango. Cuento que no irá guaire dillá, porque totz os partius quieren fer lo mesmo cuan tiengan o poder, pero que a lo menos aigan de disimular bel poquet. Bergüeña de país...!

D’Estrasburgo plegan buenas notizias t’a libertat de todas. A lo menos as instituzions europeas tienen un poquet más platero ixo d’as libertatz relichiosas, porque aquí continan los cruzifixos por totz os cabos. En istos diyas de fundamentalismo catolico, siempre nos quedará Estrasburgo. Y MHUEL, que organiza, de cabo ta cuan, apostasías masibas. A pachina web suya feba tiempos que no me la miraba y ban adibindo-ie arrienda contenius repinchos. Un d’els, un Howto de l’apostasía. Por lo que charré con ellas, por ista bía no te dan guaire mal y en poco tiempo se consigue apostatar. Grazias, MHUEL, por empentar istas iniziatibas que tanto calen.

Ta rematar un zaguer binclo a un articlo que penchó Florencio en Desde Banarús sobre l’Alakrana. O caso iste ye tot un eixemplo de l’ipocresía y l’esconoiximiento d’o mundo que tien a más grand parti d’a chent. De bideos, tos ne pencho un de recosiros. As que tiengatz si fa u no fa a edat mía ista canta tos ne trayerá ambute, de recosiros.

Malfurriar diners

O PP, muito alticamau por ista crisis que, seguntes ellas bosa a clase meya, ha calculau que a lei de luengas costaría quemisió que cantidat de diners. Con ixos millons a las mayestras d'aragonés nos da ta chubilar-nos en un mes, lo que me fería bien de goi, pero me pienso que somos debant d'atra fatera d'ixas que, desgraziadament, tantos y tantos creyerán y repetirán como loretz. "Qué de perras nos costará l'aragonés! Que malfurriar! Con la de cosas importants que se podría fer con ixo..." Cosas importants como, por eixemplo, financiar a l'Instituto Cervantes, encargau de proteixer una luenga que no le cal estar proteixida. Importants como continar dando de minchar, zorriar, buquir y toda mena de bizios y biaches a una familia nomás porque un dictador dezidió que estase asinas y porque os meyos de comunicazión y os partius espanjols son enzerrinaus con que son bien majos y nos salbón en a transizión. Encara que no teneba que dos anyos cuan o Tejerazo, tamién soi muito majo y m'apanyo con a metat d'o presupuesto de Doña Leonor. Importants como subenzionar a tortura d'animals simplament ta que una colla de salbaches d'aintro y difuera de l'estau faigan un buen ratet, en un negozio que nian ye rendible economicament...

Podría continar con muitas más menas de malfurriar diners, como as losetas dichitals u as exposizions unibersals, internazionals u lo que sían. Pero me fería goi de charrar d'una que no gosa dizir-se. A duplizidat en as administrazions.

As nazionalistas espanyolas gosan queixar-se d'o gasto que suposa l'Estau autonomico y, por una begada soi de raso d'alcuerdo con ellas, encara que, como ye de dar, por diferents motibos. En teoría, l'amostranza u a sanidat son competenzias transferidas t'as comunidatz autonomas. Con tot y con ixo esisten consellerías de sanidat y amostranza de bez que ministerios espanyols de sanidat y amostranza. Alabez bi ha una duplizidat de funzions y de almenistrazions que eixerzen ixas funzions. Asobent d'ixe caos en surten toda mena de conflictos, como ye lochico. En ixe ambient guai de espanyolidat compatible con o "sano rechionalismo" dengún no custiona que l'amostranza u a sanidat sían competenzias autonomicas. Y de bez, como as lechisladoras son nazionalistas espanyolas, siempre guardan ixe chiquet cado de competenzias ta l'estau. Ixa pichadica arredol d'a lei en plan "tos lo dixamos ta que chuguetz, pero sentiretz a nuestra ulor, que como nos carranyetz nos lo trayemos de tornada". UPyD ya proposa una rezentralizazión de bellas competenzias como l'amostranza. Ta que no s'espliquen 17 istorias diferents, dizen. Medrana me fa que no s'esplique que una y que antimás ellas en eslixan cual. Pero a lo menos ye una postura lochica y platera. Tot lo poder ta l'Estau. Po fale, que diría Maquinavaja.

En a mía opinión, as aragonesas son as que deben dezidir sobre a chestión d'a suya amostranza y d'a suya sanidat. Y d'o suyo "tot" que, a la fin, ixo ye a independenzia. Si as espanyolas de berdat creyen en l'estau autonomico y de berdat se creyen ixo de l'estau cuasi federal, abrían de eliminar toda interbenzión de l'estau en competenzias transferidas. Ixo prenzipiaría a estar cualcosa parellana a bella mena de confitanza entre l'estau y os países y territorios que lo composan (bolutariament u no pas). Manimenos cuento que ixo no pasará nunca. Si Espanya prenzipiase a fer cosas como ixas dixaría d'estar Espanya, pues no ye a suya traza d'actuar. Una de tantas y tantas cosas que definen Espanya y, en cheneral toz os estaus imperialistas ye dixar siempre un troz de poder ta els, mesmo en os puestos an que se suposa que ya no lo tienen.

microbarrenaus, fendo pellas

Güe cuasi charran en aragonés en Aragón Radio. Han dau una notizia dezindo que os ninos de "Slumdog millionaire" feban pellas. Pero be-te-me que no yeran charrando d'ortals!. O que pasaba yera que os ninos no iban t'a clase, ye dizir que feban fuina...Fa tiempos que nian aspero sentir cosas en aragonés en os meyos que as aragonesas bosamos. Pero ye que agora mesmo se pasan t'o castellano de Madrid. Primer estió botellón en cuenta de botellada. Dimpués os ninos fan pellas, en cuenta de pirola u fuina (parola que ye biba mesmo en Andorra, an que se diz fuchina). Que será dimpués? "La dije?" Aragón enta l'asimilazión total....

Ampraus 033

Dimpuesas de Pilars cal tornar t’a bida cutiana y en os ratetz que tiengo libres escribir bel poquet por aquí. Como biyeretz he cambiau a frase d’o cartelón d’alto. L’alemán mío no ye mica bueno, asinas que a frase la he traduziu con un programa. Si beluna charra alemán de berdat que imbíe a frase a tierradebarrenaus@gmail.com.

Lei de luengas: Ya se fazió o ¿debat? sobre si de podría charrar u no pas sobre a Lei de luengas en as Cortes aragonesas. Continan os mesmos ¿argumentos?, as mesmas fateras, belunas continan enzerrinadas con que PI ye tres y asinas asinas. O debat ya m’aburre tanto... O PAR contina estando o canzer d’Aragón a tantos y tantos rans... Agora nomás han dezidiu que ban a charrar-ne. Cuan charren no sabremos sobre qué charrarán ni que chandrío nos ferán a la fin. Tenemos a suerte de bibir en un país de más d’un millón de filologos. Menos mal que a fisica u as matematicas les ne dixan a las zientificas, que sino no abríanos imbentau a rueda.

As mullers chitanas han zelebrau un congreso en Balenzia mientres o cabo de semana. Ista cultura ye asobent ixuplidada por todas. Mesmo por ellas mesmas. A suya luenga ye en serio periglo encara que bi ha muitismo lexico d’o caló que femos serbir asobent sin nian saber-lo. A situazión d’a chitanalla en cheneral a ran sozial ye mala, pero a d’as mullers ye difizil de tot. Asinas que iniziatibas como istas an que se puedan achuntar y charrar d’as suyas situazions y reyalidatz me parixen tot un trango entabán. Aspero que faiga buena onra .

Conziertazo o que organiza Caracol Zaragoza en solidaridat con Chiapas. Azero y Comando Cucaracha, dos d’as collas con millor directo d’Aragón, y con conziertos bien boriners. Asinas que a borina ye asegurada de tot. Antimás l’esquilmén irá tot dreito ent’os prochectos que se son fendo en Chiapas. Qué asperatz ta marcar ixe diya en l’achenda buestra?

Blogosfera: Feba tiempos que me’n yera fendo por o queda que yera a blogosfera. No feban que zarrar blogs u dixar-los amortar-se. Son os casos de blogs que gosaban estar sobrebuenos como Estricalla, O chemeco d’as parolas u Sozialista. Manimenos y afortunadament, atros i tornan, como o buenizo Labrándonos en la sombra que tantas aragonesistas trobabanos a faltar asabelo. Más personal, pero en un buenismo aragonés naixió fa poco Os repuis, o blog d’un emigrant aragonés en Euskal Herria a qui doi una buena abrazada. Antimás i podretz biyer bellas fotos y notizias sobre o Nafarroa Oinez an que l’aragonés estió present y bien representau.Ta despedir-me no he trobau un bideo de lemurs que me fese goi, pero he trobau o que pencho contino de un par de bebés sloths (chandros?). Aspero que tos faiga goi.

microbarrenaus microprogramaus

Como lo Pilar ofizial pude asabelo, sisquiá foi un poder por fer un post normal. Ye que tot se puede meter en un microbarrenau. D'a programazión, lo millor ye a Carpa d'o ternasco, que ya ye penible, porque tampoco no ye ta tirar codetes. Con tot y con ixo, bi abrá conziertos de chent que ye prenzipiando, de China Chana, Lurte y Gandules, orquestas, chuegos tradizionals, campionato de Morra, cosas ta ninas y no tan ninas y asinas asinas. D'atra man os Pilars disidents nos ufren l'alternatiba que nos cal. Asinas que ya sabez. Iz fendo eixerzizios con l'ancón ta ficar-lo bien en a barra d'o BIC, que no'n saldremos en bels diyas! Goyosas zorreras!

microbarrenaus... y agora las olimpiadas

Zaragoza tremola con cada zorrera de Belloch. Exponabo, Zaragoza capital de quemisió, olimpiadas... Pero que ha feito ista ziudat ta merixer isto? Ah, sí, botar-le.... :-( China chana Zaragoza se combertirá en a ziudat d'as paridas. Faiga aqui a suya orterada, empresario! Le daremos de tot, estricallaremos lo río, l'ortal, lo bico, lo que calga ta que bustet y os suyos compañers d'orterada se farten de ternasco y de buquir en os nuestros prestichiosos otels! Qué razón tenió Cano con a biñeta que pencho contino...

Dende Cambrils

Cambrils ye diferent con trenta años. M’esplico: cuan yo plegaba de naixer mis pais mercoron un piso en Cambrils, una d’ixas plachas plenas de cheposos que, t’a part d’alabez, prenzipiaba a plenar-se de turistas. De ninon feba buenizos ratos astí. Iba t’as rocas d’a placha a mirar cangreixos, a pescar, t’as ferias u me feba unos churros en a churrería que menaban uns caspolinos a o canto d’a placha. Chugaba en l’arena a futbol con cualsiquier que me chuntase u, un poquet más gran iba t’as maquinetas a dixar-me buena palada de monedas de zinco duros.

Creixié y prenzipié a odiar Cambrils. Yera l’adosleszenzia. No quereba que enzorriar-me y biyer zagalas chobenas. Y d’ixo en Cambrils poco bi’n ha. Cambrils ye como un Salou de reseco. Con a chent como sondormida y a rebutir de chubiladas. Alabez, qué feba yo con toda ixa rasmia y a furor sexual que ardeba aintro de yo?. Malas que trobaba bella enchaquia marchaba ta Salou u La Pineda t’as casas de amigas mías u i feba mallata y tornaba de maitinada ta Cambrils. A tamás de que i pasé buens ratos, continaba odiando-lo, pues no bi eba cosa que m’atraye-se.

Dimpués de bels años ya, as zircunstanzias m’han lebau de tornada ta Cambrils. No tenebanos diners ta pagar-nos sisquiá un camping asinas que i fuemos ta cabidar-nos a lo menos, l’aloix. He trobau Cambrils bien cambiau. No porque aigan rematau muitas obras, en a Plaza d’a Concordia u en o puerto, por eixemplo. No pas por as botigas que han cambiau de negozio, ni por os cambios que a familia mía ha feito en o piso. Ye por yo. Me caleba, nos caleba, descansar un poquet. Simplament fer bella gambadeta, dormir muito, no fer-nos-ne por cosa... y ixo ye lo que somos conseguindo. En bel poco más de dos diyas no emos feito cuasi cosa. Gambadas, biyer a mar, bañar-nos-ie y fer-nos una biereta en un banco. Ixe ye o resumen. Agora entiendo porque a pai y mai les feba tanto goi de benir t’aquí. Agora entiendo, de berdat, a qué iba pai a pescar mientres oras, si nunca no pillaba mica peix. Agora entiendo todas ixas begadas que, en aquella adoleszenzia mía, me repetiban, terne que terne, “ya lo entenderás cuan sías mayor”. Agora, que en escribir isto, me siento asabelo de biello, entiendo qué tiene Cambrils....

Ampraus 032

Fa tiempos que no feba un “ampraus” y se me ban chuntando cosas, antimás muito diferents, asinas que astí tos ne ban arrienda, y bien mezcloteyadas. Prenzipiemos con proselitismo:

Caracol Zaragoza organiza unas chornadas que prenzipian güe mesmo con un “festibal de narrantes” en o Z.Z. Gara d’o Norte (biyer cartel penchau y más info en Salud, amor y rebeldía). Continará con cualques charradas achuntadas baixo lo titol “autonomía aquí y allá: ¿Podemos vivir sin capitalismo?” Tamién se podría fer l’atra pregunta de ¿podremos continar guaire tiempo bibindo con capitalismo?.... Buenizas charradas. Si tenetz un ratet itz-ie y, sino, conseguitz ixe tiempo que de seguras que será bien emplegau.

Nogará y Fablans ya han ubierto as matriclas. Ya podetz apuntar-tos t’os cursos d’aragonés que fan totz os años y que, si leyetz iste blog, cuento que no tos calen guaire, pero bueno... Aprofeito ta animar a las lectoras a que, antiparti de fer os cursos, dimpués continen en fablilandia, en cualsiquier d’as asoziazions que bi ha güe, que nos cal muita chent ta esfender l’aragonés. Por experienzia tos guaranzia que se puede partizipar-ie, tener parella, salir de borina y fer un blog y encara tener tiempo ta chugar a Magic u a Guitar Hero de cabo ta cuan.

O diaple d’o gadget me ye ganando en frikismo, en zagueras. Me caldrá contraatacar. Iré pensando-ie. Tanimientres he de reblar debant d’a entrada que fazió sobre o Guitar Hero ta PC. Impresionant. Tamién m’enfolgó un maitín biyendo os bideos que penchó en o blog suyo, ampraus de bez de Oregón TV, sobre a Wii peñista. Que faigan ixe bideochuego ya!!! Que yo soi naixiu de Zaragoza, y me costó asabelo d’adaptar-me a las zorreras y borinas rural. (Bueno, en reyalidat, tampoco no guaire, que con o goi que me fan....)

Maltrato animal: Iste berano se’n ha charrau muito sobre os toros. Ye de dar que porque han muerto muitas personas y ixo parix que sí que importa. No tanto como si las ese muerto a gripe A u ETA, porque ni bi ha lutos estatals ni fan leis ta biedar ixa mena d’actos ni engarcholan a qui los organiza. En o país nuestro, en Billarquemado, concretament, morió una d’ixas personas. O diario de Teruel publicó una carta d’un ziudadano d’ixe lugar prou bien escrita. Atros, con menos sensibilidat, u con mica, se adedican a matar mixins y qui les chuzga ye tan borde como él. A istos dos (torturador y chuez), caldría foter-les un buen perdigonazo a biyer si sufren u no pas. Leyetz l’articlo de Publico. Tamién en Publico, escribió Ignacio Escolar una reflexión sobre as coinzidenzias de boto de PSOE y PP en zagueras sobre bels afers. Muito bueno l’articlo y o periodico que ye d’o millor que bi ha agora en meyos de masas. Prou que con o ran tan baixo que bi ha, ixo tampoco no ye guaire...

Bideo JERC: No sé porqué, pero l’atro diya remeré o bideo que pencho contino. Cuan se fazió m’esmelique de tot, porque antimás yera a puenda aquella que no dixaban de dar mal en a TB con ERC. Cuan teneban güeito diputaus. O bideo ye feito a modo de reportache de Telemadrid sobre l’Acampada Jove. Atenzión a o catalán d’o mozo que charra ent’a fin d’o bideo. Buenismo, y sincusaz-me si ya lo penché en 2007, pero me foi biello y he muerto muitas neuronas.

Tomás D.E.P.

Bi ha mayestros que t'amuestran muitismo más que no l'asignatura suya. Mayestros que dan liczions de dignidat, d'umildat, de saber estar y de que siempre se puede y se debe continar luitando. Mayestros que lo dan tot por esfender os prinzipios suyos y a la suya alumnalla. Ista semana un d'ixos mayestros nos deixó ta cutio. Tomás, muitas grazias por amostrar-me tot lo que m'amostrés.

Escolonizaus (una miquirrina)

Por bellas oras parix que Aragón recupera bel poquet d'a suya dignidat. Grazias a Operación Triunfo, creigo, que fan quemisió en o paseu Independenzia, o siñalaz espanjol ha estau baixau. Qué goyo en plegar iste maitín t'o treballo y no i biyer-lo como totz os maitins!. Sé que ascape i tornará. Sé que mesmo en a foto encara se bei en o fundo o siñal de capitanía. Pero por bellas oras, Zaragoza y Aragón ye una mica menos colonizau....

Skabeche en SLQH

Sin sangre en a pocha que me he quedé! Fa uns diyas, en "Sé lo que hicisteis", se fazió un sketch an que uns payasos de zirco feban de periodistas de l’alparzeyo. En rematar o sketch se sintió Circus mundi de Skabeche Riber Band. Contino pencho lo bideo. O sketch prenzipia en o minuto 6:30 y a canta sona en o 7:45 (alto u baixo). Abrán cobrau os dreitos os de Skabeche?

Combocatorias frikis

En septiembre, tornamos todas t’as fainas nuestras. Prou que as frikis tamién. En tasament un mes imos a tener dos zitas ta frikis bien majas. A primer me la imbio Noelia (muitas grazias) t’o correu d’o blog (tierradebarrenaus@gmail.com). Ye una trobada de clubs de rol que fan cada año. Se diz IV Quedada interclubes y estiaño se fa en o Zentro Zibico d’a Gara d’o Norte os diyas 17 y 18 d’Octobre. Ye o segundo cabo de semana de Pilars, asinas que as partidas pueden estar bien curiosas pendendo si se ye de reseco u capina (que son os dos posibles estaus fesicos en Pilars).

L’atra, un poquet antis, son as Jornaicas, ya combertidas en un clasico. En leban treze edizions, que no ye poco y estiaño las fan en o Zentro d’istoria de Zaragoza, asinas que biyeremos as carreras d’o bico nuestro plenas de Sailor moons y Narutos. BIEEEEEEN!

China chana, as frikis dominaremos o mundo, asinas que pretatz a tremolar u chunitz-tos a nusatras. Ja ja ja (Risa de malo)

microbarrenaus: no puedo aturar

- Sincusa, ¿tiens un inte?

- No puedo aturar-me - me respondió - y me la esmaixiné andando y andando, terne que terne, sin dreito a aturar-se. Con os pietz fendo fumo y a luenga penchada d'a boca igual como una cocha de berano. Pobrichona! No podeba aturar-se...

Cursos d'aragonés

En plegar septiembre ya sabetz que os cursos d'aragonés surten como fungos por totz os cabos. Estiaño, Nogara ya ha ubierto a matricla. Antimás ta las que quieran prenzipiar antis con antis, ya pueden fer-lo con un breu seminario d'introduczión a l'aragonés que ufren como nobedat. A info la tenetz en a web de Nogara y contino tos la pencho por si sotz tan chandras que nian i punchatz...

Seminario de introducción a la lengua aragonesa

Duración: entre 12 y 15 horas.

Contenidos:
- Historia de la lengua aragonesa.
- Pervivencia del aragonés en el castellano hablado en Aragón.
- Literatura en aragonés.
- El aragonés digital: audiovisuales e internet en aragonés
- La música en aragonés
- El aragonés y el medio natural
- El aragonés: primeros pasos.

Plazo de inscripción: Hasta el 20 de Septiembre
El curso se desarrollará entre el 15 de Septiembre y el 30 de Octubre.
Horario y precios a convenir depediendo del número de alumnos/as.
Inscripciones y más información en asoziazion@nogara-religada.org

microbarrenaus: qué difizil ye estar espanjol

O DNI m'ha caducau. Almenistratibament soi una mica menos espanjol. Pero guarda si ye difizil tornar a fer-se-ne! Dica Nobiembre no he conseguiu calendata. Dica ixe diya a cartera me pesará un poquet menos. O DNI aragonés s'imprentaba en 2 minutos en a HP y au. Ai, istos espanjols.... Y dimpués se'n queixan...

Ampraus 031

Ya biyetz que cada diya soi más chandro. Agora he librau ixo de microbarrenaus, una traza de penchar microposts con fateretas que baiga escribindo en os pocos ratetz libres que tiengo.

Sindicalismo: U uchetismo, millor dito. As trazas que fa serbir, a lo menos en Aragón UGT, ya las conoixemos todas. En o blog de Salud, Rebeldía y Cerveza fría, han trigau con muita razón una sobrebuena biñeta de Vergara y una canta de Transfer sobre o tema.

Catalanofobia: Purnas contina con o suyo treballo periodistico (d’o bueno) y alporta datos y documentos (ixo que se suposa que han de fer as periodistas) sobre El Torricó, lugar catalanofablan d’Aragón. As esbergoñadas d’o PAR continan espardindo as suyas mentiras y paranoias que, a pur de repetir-las, muita chent las crei sin mica cretica.

Más paranoicos: Entre os que biyen a ERC por tots os cabos y os d’o sexo, bi ha muitos paranoicos por o mundo. Seguntes informa Publico, bi ha polemica en a perfida Albión por as fruitetas ixas d’o dibuxo d’alto. Son de uns lamins ta ninos, y bel ment-puerca diz que son buquindo como crapas y mesmo fendo trios. Sin parolas. Ye berdat que, en dezir-lo ya no puetz que biyer-les dando-le, pero y si ye asinas, que?. As pobras ninetas podrían prenzipiar a chuntar mazanas y peras y... (Jibo! Ixo me remera a bellas declarazions de una conzellera de Madrit...). Cuanto tiempo libre tienen belunas...

Espiello: Habemus nuebo numer d’Espiello, a millor rebista en aragonés que diz Bubón. Y en ye. En iste numer i aparix, entre atros muitos buenos contenius, una entrebista con Ruben Ramos, sobrebuen escritor y ganador dos begadas d’o Arnal Cavero. Asinas que, si encara no la tenetz ya sotz pasando-tos por Nogara a mercar-la. Antimás tos i podretz informar sobre os curso en bels diyas que ya se prenzipiarán a parar.

Bideos: Ta rematar pencho contino dos bideos. La un, me lo imbió Arale y cuento que lo abretz bisto ya muitas pos ye espardindo-se por o rete asabelo y mesmo lo han penchau en bels blogs aragoneses, como Tiempo de Desidias. Se diz Operación Pandemia y ye una d’ixas teorías conspiratorias que, ta yo, tienen muitisma credibilidat. L’atro ye menos traszendent. Ta qui tenemos mixín, de seguras que tos ferá muitismo goi. Poca chent a sabiu parar cuenta y dibuixar tan bien as fateretas que fan os mixins de cutio, como o tal Simon. Ye o zaguer bideo de Simon’s cat y si no etz bisto os anteriors tos recomiendo asabelo de biyer-los antis con antis

Conozes a Marzelo?

Con isto d'a ipotetica puyada d'impuestos, o PP ha tornau (si ye que nunca lo eba dixau) t'o discurso d'a esfensa d'as "clases meyas". Que bes-te-ne tú a saber o qué ye ixo ta ellas! En ixe discurso bi ha una d'ixas fateras que, en estar tantas begadas repetidas suenan a berdatz absolutas pero, a lo menos ta yo, no'n son. Ye ixa de que as clases meyas son as piors tratadas, por que no son ricas y, antimás, no reziben as aduyas que se suposa dan a las clases baixas. Asinas les he sentiu dezir a muitismas burguesetas. "A las pobras les aduya lo estau (u as ong's u qui sía), pero a yo qui m'aduya?" repiten terne que terne queixando-se d'a mala suerte d'estar "clase meya". "Tiens razón, mozeta" -m'agana de responder-les- "fe-te pobra y podrás rezibir aduyas ta gronxiar-te tot lo que quieras". Dentrar en a clase alta ye difizil, pero no pas en a baixa.

Me remera tamién a todas ixas que charran d'a suerte d'os profesors y mayestros y que dizen que tienen muita barra por tener as bacanzas que tienen. "Pos para-te una oposizión, apreba-la y tendrás ixe chornal y ixas bacanzas..." Ixo ya no gosa fer-les tanto goi. Entiendo que muita chent nian tien a oportunidat de parar una oposizión por aber de treballar ta sobrebibir, pero a más gran parti que se queixa d'as condizions laboral d'os profesors y mayestros no son d'ixos.

Asinas que, como bien diz a mazada aragonesa: Conozes a Marzelo?, pues fe-lo!

microbarrenaus: rebistas zientificas

Miro una rebista zientifica. La teneba la chirmana mía pero se la lebó y m'aganaba de leyer un d'os articlos. Manimenos no la trobo en a papelería. Bi ha dos rebistas sobrer torturar toros, una sobre components electronicos, cualques repalmars adedicaus a alparzeyos u bideochuegos, milenta de superstizions, pero de zienzia ni brenca ni meya...

microbarrenaus: periodistas chandros

Qué chandros son bels periodistas! Ayere de tardis estié sentindo a SER en o treballo igual como güe de maitins. As notizias son as mesmas parola por parola. O Gran Chirmán me dicta a berdat.