Bellas parolas sobre as eleczions

A la fin plegó lo diya d’as botazions. Por primer bez en bels años lo asperaba con bella miqueta d’asperanza y de deleria. Talmén m’ese ilusionau masiau porque dimpués os resultaus son estaus los que totz conoixemos. Daré a mía ambiesta por partis:

- Españols: PP, PSOE y IU encantaus de conoixer-se. Os dos primers continan alto u baixo con a mesma cantidat de botos y de porzentaches. Ye berdat que o PP puya bel poquet y o PSOE baixa lo mesmo, pero rai. O boto zombi ye muito fidel. IU, con tasamen 1500 botos más, s’ha quedau en o terzer puesto. Grazias a o PAR que no se presentó y a CHA, que s’esboldrega de tot. Asinas que gana, pero solament por os zancochos d’otri. UPyD, o PP 2.0, pilla ixe cuarto puesto que me pienso que le dará representazión en as Cortes aragonesas en as autonomicas, si bi plegan. Si o partiu consigue superar o personalismo de Rosa Díez, ye una gran menaza t’os dreitos indibiduals y colectibos de totz, asinas que caldrá estar a la tisba. O discurso d’a Ejpaña friendly ba chupindo a muitos chobens. Y cal remerar que en Aragón, lo que millor funziona en as urnas ye l’anticatalanismo.

- CHA: D’escusas, ya no les ne queda. O partiu s’esboldrega y prou. A carrera la eban perdida fa tiempo. No ir t’os debatz que t’ufren, como o de l’Arrebato u lo d’a Enredadera, no aduya a recuperar-la. Fer anunzios electorals igual como si bendeses un champú tampoco no lo fa. A la fin, estar un PSOE cachirulero, no funziona. Si a chent querese botar a lo PSOE u a lo PAR, botará a lo PSOE u a lo PAR y no a un mezclallo rarizo, que antimás se chunta con radicals independentistas un diya y forachita independentistas d’o partiu unatro. A consecuenzia de tot isto: a metat de botos. A terzer fuerza agora ye a zinquena. A tamás de tot, me fa pena. CHA estió una bez l’asperanza d’iste país. Agora no tien rasmia ni o mensache, ni a organizazión y s’han cazegau en un laberinto que no saben guaire bien por do salir-ne. Y de dimisions, prou que ni fablar-ne!

- IISP: Bien y mal. A berdat ye que en Aragón m’asperaba más botos. A lo menos ixos 3000 soniaus, ixos 3000 independentistas que se suposa que bi ha. Talmén m’ese feito masiadas sobatidas mentals u isto de bibir entre fablilandia y lo país d’os indepes m’alueña masiau d’o penible mundo reyal. A parti buena ye que ye naixiu y ha prenzipiau a treballar un prochecto que aspero que baiga muito más allá que istas eleczions. Por lo que he sentiu ye asinas. IISP no remata aquí. Cal aprender d’as errors que s’han feito en iste país antismas y costruyir un d’entre todas ixe nuevo prochecto que tanto nos cal.

- Atros: M’enfuelgo d’os botos que ha conseguiu PACMA. Encara que no creigo guaire en os partius monotematicos (nomás feministas u nomas animalistas, por eixemplo) siempre ye millor, en a mía opinión que no botar. Ixos más de mil botos podesen aber iu t’atros partius que refirman a tortura.

A dreita no disimulada (DN, AES, Falanges...) creixen masiau. Y ixo que son trestallaus de tot, que si s’arroclasen arredol d’una sola lista... Encara no ye ta tener medrana, pero cal continar a la tisba.

En resumen, Aragón contina estando un país d’españols, como bien dizen por atros cabos. Continaremos treballando.

+info: tierradebarrenaus@gmail.com