Politizar l'aragonés

Bi ha debaz que parixen eternos. A fin chustifica os meyos, qué ye biolenzia, a interpretazión d’o dreito d’autodeterminazión .... y cuento que a politizazión de l’aragonés ye un d’ixos debaz.

Dende fa tiempos, l’aragonés se ha binculau politicamén a l’aragonesismo y, más que más, a la suya organizazión politica más gran, CHA. Ista situazión, en a mía opinión estió creyada de bella traza, tanto por CHA como por os meyos de comunicazión. En os primers tiempos “democraticos” CHA miraba luitas sozials que prener como siñal y a más gran parti d’a chen que l’importaba bel poquet l’aragonés yera en CHA u, a lo menos, amanada ideyolochicamen. Os meyos de comunicazión trobón en l’aragonés cualcosa ta fer-se a mofla y, dende ixa ambiesta, creticar a CHA por esfender fateras como ixa de “la fabla”.

Dende fa menos tiempo, bi ha una corrién mayoritaria en as asoziazions que luitamos por l’aragonés, de desbincular l’aragonés de CHA y de tot l’aragonesismo, mesmo plegando a situazions una mica surrealistas u, en a mía opinión inchustas. Muita chen, tanto de CHA, como de l’aragonesismo politico –prou que d’o cultural tamién- son os alazez de o mobimiento de recuperazión y esfensa de l’aragonés. Creigo que no cal demandar sincusas por esfender l’aragonés y estar independentista u aragonesista. Y me parix que tiengo / tenemos o dreito a fer-nos biyer simbolicamen igual como toda a resta d’a ziudadanía.

Un d’os piors enemigos de l’aragonés ye politico y se diz españolismo. Un españolismo que amarguina l’aragonés y dreitamén se’n arrigue. Un españolismo que no duda mica en fer serbir o castellano y as suyas abantallas y birtuz ta enrestir l’aragonés. Os aragonesistas tenemos o dreito de fer serbir politicamen l’aragonés ta enrestir l’españolismo? Yo creigo que sí.

As mías opinios politicas son conoixidas por os que alto u baixo leyez iste blog de cabo ta cuan. Creigo que l’aragonés ye un d’os tantos siñals d’indetidat aragonesa. Creigo que, de feito ye un d’os más importans. Tamién ye una traza de sumar chen ta l’aragonesismo politico, pues muitos d’os que prenzipian a intresar-se por a cultura aragonesa rematan esfendendo-la politicamen.

Antimás d’a suya balura cultural, l’aragonés me parix l’eixemplo más platero de l’acultuazión sufrida por o pueblo aragonés. Muitas atras partis d’a cultura nuestra son u son estadas en ixas tres pedretas an que siempre parix estar l’aragonés. Pero creigo que a situazión d’a nuestra luenga ye a más difizil de todas y a de pior soluzión. Encara que si s’ha puesto clonar bucardos, isto abría d’estar más fázil, que encara no ye muerto.

Dito tot isto, l’aragonés ye muito más que una luenga y muito más que un siñal cultural y politico. L’aragonés cal. Lo primer de tot ye que sobrebiba y ta que sobrebiba cal, en cada inte, saber remar toz en a mesma endrezera. Ta ixo muitos, d’una y atra marguin cheografica u politica, abremos de renunziar a cosas. Os que quieren tener-lo luen d’os partius u a politica han de reblar de cabo ta cuan y achuntar-nos u a lo menos no mirar-se-nos con a ideya de que nomás queremos a l’aragonés como ferramienta politica. Prou que lo quiero como ferramienta politica, pero tamién como alfaya cultural y lingüística que cal que contine biba. D’atra man, os que tamién lo esfendemos como parti d’a nuestra ideyolochía sabremos, si cal, xublidar-la u no fer-la guaire bistera bel diya ta que l’aragonés contine bibo que, a la fin, ye lo importán. Si a l’aragonés le sacamos l’aragonesismo será mesmo más en periglo. Si a l’aragonesismo le sacamos l’aragonés se quedará sin una d’as suyas millors partis.