IV Conzierto por Bolibia

Unatro año más, Tinkukanama organiza, con l'aduya d'UCA, o Conzierto por Bolibia. Ye una iniziatiba que surtió dende ixa asoziazión ta imbiar diners enta Cochabamba, ta prebar d'amillorar un poquet as condizions de bida que i tienen. Toz os años, os conziertos han estau bien majos y emos feito un sobrebueno ratet. Estiaño se ferá en o Z.Z. Laín Entralgo (Paseu La Mina) o sabado 5 a las 20:30. As collas que i tañerán son Mc Mariposa, Alejandro Ibáñez, China chana y Comando Cucaracha. Antimas, tamién se i ferá o tradizional bingo-sorteu, a esposizión de fotos y a benda de materials d'artesanía... Bueno, que no podez dixar d'ir-ie y colaborar con os buestros diners ta ista causa. Podez leyer a cronica de l'año pasau aquí.

TimOrange

Escribiba fa bels pocos diyas, sobre os fillos de **** de Timofonica (que continan estando-ne). Agora charraré d’atros “fillosde”, que dica fa poco no me’n eban feito denguna. A historia prenzipia un 18 de chinero cuan achusté una ADSL+llamadas+TV y tot ixo con Orange. Me dizión que en 30 u 40 diyas bendrían ta casa a instalar-la. Me parixió una barbaridat que tarden entre 30 u 40 diyas a fer-lo. Que han de fer en 30 u 40 diyas? O router lo fan artesanalmen u que?

Bueno, "cosas d’o capitalismo y d’a mafia d’as telecomunicazions.... Asperaré 30 u 40 diyas mientres Timofonica me ba cobrando..." pensé. Ai! Mísero de mí! Ai! Infelice! A los 30 diyas, por si un caso, y “ulorando o pirin” les pregunté que cuan beniban. Ascape, me dizión. Diez diyas dimpués, cuan remataba o amplo, granizo plazo, torné a preguntar. Ascape, me dizión. Bels pocos diyas dimpués, clamé a Orange. En 48 oras tos clamará un tecnico ta quedar con busatros y instalar-tos tot. En isto nos plegó o router, como una mena de “indireuta” querendo dizir “más tos bale que tos lo instalez busatros”, cosa que, siñors d’orange, no pienso fer, que he pagau lo técnico....

Y asinas han pasau más de 60 diyas. Toz os maitins, dimpués de fer-me o café clamo a orange y les torno a contar a mia historia. Dende fa dos maitins ya no me dizen que me clamarán en 48 oras, ya me dizen que me clamarán de camín. No sé que concepto tienen de “48 oras” u de “de camín”. Ye de dar que no ye lo mesmo que tiengo yo.

Continaremos informando, que agora he de clamar a orange ta remerar-les que ha de benir un tecnico....

Dixando-lo

Lo he dixau. U a lo menos, soi dixando-lo. Cuan escribo isto lebo más de zincuanta oras sin fumar. Ye más: soi escribindo isto sin fumar, cosa que nunca no eba feito, porque malas que me poso debán de l’ordinador m’enchegaba un fumarret.

O primer diya, como ye de dar, estió o pior. Teneba ixa turruntela contina de “me manca cualcosa”. Nierbudo, espisguardau, no podeba conzentrar-me ni en o prochecto ni en o treballo. China chana, fue amillorando. Ya de nueis, a fartar-me de minchar. A zaguer begada que dixé de fumar, m’enrezié treze quilos que, como t’a par d’alabez, yera arguellau de tot, me fazión buen prebo. A l’atro’l día eba dormiu millor. Me rebellé sin tusir y podendo alentar d’una traza normal. Ya no remeraba lo que yera. Pillé a bici, pos eba de fer unos mandaus y, jibo, que diferenzia! Dimpués puyé as escaleras de casa mía sin que me calese fer mica poder y asinas asinas.

Igual como prenzipiar a fumar se nota ascape en a salut, dixar-lo tamién. Tamién lo notaré en a pocha. Fumando más d’un paquet diario, como feba yo, cada diya m’escuso más de dos euros. Fendo cuentetas, fan un fascal de sobres de Magic, comics de X-Men, bieras, libros u lo que m’agane. Aspero poder resistir o cabo de semana, que a soben ye lo pior...

Zincomarzada... u no

Zincomarzada ye una d’ixas borinas populars que nos fan buena onra a qui treballamos en asoziazions y/u mobimientos ziudadans y sozials. Pero tamién ye un diya an que cal treballar firme. Debantar-te bien de maitins, montar o puesto, atender-lo tot o diya, desmontar o puesto, alzar-lo tot bien... y si en baga y quedan ganas, marchar de borineta.

Con tot y con ixo, ye una borina que me fa asabelo de goyo. Asinas que, como toz os años, quedemos a las 9 ta montar o puesto. Por si un caso, enchegué a tele en a nuestra ta bier que orache feba y por si deziban cualcosa sobre a posibilidat de que se suspendese, que ya’n eban charrau o diya d’antis en os papers. No. Parix que tot iba bien. Soflaba l’aire con rasmia, pero en as imachens que meteban en a TB as asoziazions que teneban barras las teneban montadas. Imos ent’allá!

Pleguemos, montemos, encorriemos os papers que, a cada chuflada d’o rasmiudo aire marchaban por tot lo parque, tornemos a montar, unatro ruello de zelo nos ba a caler, mete zaborros denzima d’ixas rebistas, marcha a escar más zaborros que con istos no bi’n ha prous, mete astí un cartel que quedará bien pincho, pilla os papels que se les han bolau a los d’a Plataforma d’as Montañas, a bier si rematamos luego y marcho a desayunar-me.... y asinas asinas, mientres una oreta y meya. A la fin, o resultau bien majo. Una mesa bien mesa. Pincha, con tot lo material bien bistero. ¡Que pena que con iste orache no baiga a benir guaire chen, e?. Mira-te ya bien uno d’azul.

Y yo que creyeba que nos iba a demandar os papels d’o puesto, pos no. Nos diz que a zincomarzada ye suspendida. Bels minutos antis d’as onze. Cuan lo tenebanos tot presto y marchabanos a desayunar-nos.... Asperemos un ratet a bier si replegaban os partius puliticos. Dende an que yeranos beyebanos a CHA y a PSOE. Prenzipión a replegar y alabez dezidiemos de replegar tamién nusatros. Si os partius replegan, aquí no i queda dengún en dos oras....

Nusatros perdiemos bella cosa más de tres oras montando, desmontando y encorrendo papels. Muitas más parando o puesto y as darias t’atender-lo os diyas d’antis. Pero ye a nuestra faina voluntaria y rai. Atros perdión diners. Barrils rezién punchaus que abión de zorriar-se de camín. Birolla que se iba a malmeter a puyals en muitos puestos.

Lo que sabión a las onze, no lo sabeban a las nueu? U mesmo a las siete? La Zaragozana si que fazió buen negozio, que bendió un camatón de barrils. A la resta no nos fazión que a tana. Y, de rematadera, a Zincomarzada bis se ferá o 23 d’Abril... Ta que qui treballamos ixe diya no podamos visitar a Feria d’o Libro y os ziudadans aigan de eslexir u prebar d’ir de bella traza a las dos cosas. Y si ixe diya fa airera u plebe, aspero que, a lo menos, nos lo digan antis de fer o fato en o parque....

A pedaleta d'Alonso

De chicorrón remero que beyeba asobén en a TB as corridas de Formula 1 con a mía chirmana. Yeran os tiempos de barallas entre Coulthard y Damon Hill. Dimpués dixé de beyer-lo porque sisquiá lo feban u talmén a mía chirmana perdió intrés por ixe esporte. Cuan Telecinco prenzipió a fer as corridas con a plegada de Alonso, m’enfolgué asabelo, pos ye uno d’os pocos esportes que me fa goyo de beyer. En primeras no conoxeba a Alonso, ni cuasi a dengún d’os que i correban. Coulthard encara i continaba, pero no yera que a güembra d’o que plegó a estar.

Prenzipié a beyer as corridas que se iban fendo y me trobé con un Alonso que saliba a tot estrús dende an que podeba y, en a primer curba, ya eba adebantau a dos u tres autos d’otris. Dimpués plegón os tiempos gloriosos ta el, an que ganaba sin fer guaires poders. Más aburriu, pero siempre bi yera Montoya ta animar a cosa, acompañau por Kartikeyan (u como s’escriba) y Takuma Sato, que con a L mesa, s’estozolaban con toz.

Montoya, o mio piloto favorito marchó y me quedé nomás que con Alonso. L’año pasau estió un buenizo año ta la Formula 1. Dimpués de dos años de Alonso ganando-lo tot, iste tornaba a aber de luitar contra toz ta poder puyar t’o podio. Y asinas plegamos en iste año.

Alonso tien una pedaleta d’ixas d’a placha. O mio biello SEAT Ibiza (20 años ferá en agosto) tira más. Pero be-te-me que plega a primer corrida, en Australia, y Alonso fa una Alonsada. Y ye por ixo, y nomás por ixo, que me fa goyo iste mozet. Como en atrás muitas dembas, a mosica, por exemplo, qué opine u dixe d’opinar una persona m’importa bien poco. Si ye majo u no, rai. Lo que sé ye que ye un piloto capable de fer-nos pasar ratos como o que pasé o domingo de meyodiyas. Una corrida bien emocionan an que a pedaleta consiguió remanir aintro d’a pista y, mesmo fazió que dos torpedos como en son o Ferrari de Raikonnen y o McLaren de Kovalainen beyesen o Renault dende dezaga. A mía apuesta en iste inte d’o mundial: 1º Raikonen, 2º Kovalainen 3º Hamilton. Degún d’os tres me parixen tan buenos pilotos como Alonso, u como Heidfield u Kubica, qui aspero que faigan cualcosa buena, pero en isto d’a Formula 1 ya se sabe que cuenta más l’auto que o piloto. Y con pedaletas no se ganan mundials....

Elezions, como no...

Ya pasón as elezions. A la fin! Creyeba que nunca no rematarían... Como toz os años, toz han ganau y os analís, por un regular, son penibles. Asinas que feré o mio (tamién penible) analís.

España: ZP ha ganau. Y prou. Cuan, como ha feito o PP, te planteyas cuatro años a tot estrús ta conseguir ganar y no lo fas, pos... mozet, has perdiu. Pueden aconortar-se con ixa puyada y con que an que gubiernan han ganau, pero en España han perdiu y prou. Por custions d’o sistema eleutoral, IU, s’ha estozolau de raso. A tamás de tener buena cosa de botos –con tot y con ixo, menos que fa cuatro años- se quedan con tres cacanos diputaus que no les fan mica onra. Disparixerán d’aquí a cuatro años?

O nazionalismo burgués alto u baxo remane. En o caso de CiU, mesmo creix un poquet. Isto, de berdat, no sé como leyer-lo pos no lo entiendo guaire. No sé como ye o perfil d’os que botan a CiU, PNV u CC encara que cuento que alazetan o suyo poder d’a mesma traza que o PAR: o clientelismo y o baturrismo, en as suyas propias bersions catalanas, bascas u canarias...

D’os nazionalismos de cuchas poco en queda. A dinnidat de NaBai y BNG que, continan en o Congreso español. Tanimientres CHA y EA disaparixen y ERC s’estozola de tot, y Puigcercos torna t’o partiu. En IU y ERC, bi ha bella chicorrona mida por os resultaus. Llamazares s’inmola y la berdat ye que no lo trobaré a faltar. Y ta rematar,por si d’españols ni bi’n ese prous, aparix Rosita con a suya UpyD, que bes-te-ne tú a saber por an alentará mientres istos cuatro años. Unidat d’España y tot ixo, ye de dar, pero cuento que abrá de botar a más gran parti de cosas con o PSOE en estar –en teoría- de zentro-cucheta sozial-democrata-pero-no-guaire...

Dizen os saputos y rufierters que o PSOE ha preso os botos d’a cucha radical. Se nota que ixos no conoxen guaire a os radicals de cuchas que, pocos u dengún abrán botau t’o PSOE. Puestar que bel sozialdemócrata cachiruler u barrufeter botase fa cuatro años a ERC u CHA, pero dezir que ixos son radicals nazionalistas de cuchas.... Ixos que botón fa cuatro años, en tot caso, lo fazión por estar fartos d’o PP, por o trasbase, por a guerra u por cualsiquier atra cosa, pero tot ixe trapazil de botos estión bella mena de boto protesta y no pas un boto conzienziau.

Aragón, que mola más: PSOE, PP y PAR puyan. IU remane. CHA contina esboldregando-se. O tsunami bipartidista –que mal charras, Llamazares!- no ha puesto abentar a PAR u IU en Aragón. Porqué a CHA sí? Pos porque no ha estau ixa a enchaquia d’o suyo segundo tozolón. Cazegar quinzemil botos en un año ye difizil pero ye de dar que posible. No se puede ir charrando d’un partiu diferén y continar con ixa mesma imachen de PSOE con cachirulo. No se puede charrar d’esbiellar o partiu y lebar a Fuster y Labordeta como siñal de CHA. Qué han bisto os aragoneses en CHA en istas eleczions? Más d’o mesmo.

Tanimientres M&B continan encantaus d’aber-se conoxiu. Les ba bien. Les ba millor. Y blincarán mientres beyen como CHA ba fendo-se a suya propia fuesa. Aragón se queda amarguinau en o suyo cadet. Ya no quitaremos mica perra d’os españols y por primer begada os aragoneses disaparixemos d’o Congreso. Diz a CHA que continarán con o prozeso d’esbielle. Primer caldrá fer-ne uno, pienso yo.

Tierra Aragonesa pilla más de güeitozientos botos ampraus de CHA baxo o lema Identidat y Soberanía. PACMA más de mil en Aragón. D’EA y o BIC no podemos decir cosa pos no se i presentaban. BIC, de feito, nian ye un partiu, encara beluns piensen que’n ye.

Unatro año de dezepzions. Y, como deziban os Sex Pistols, No Future. Por agora no bi ha asperanzas t’os aragonesistas. A curto-meyo plazo, a lo menos. Caldrá continar luitando y asperando ta que iste país s’apañe de bella traza. Ista tierra ye Oregón......

Stop censura

Lo que troba uno por istos mundos d'o YouTube.... Cuasi ya no remeraba ista canta. Sale en bel disco de Boikot encara que i colaboran buena cosa de collas de toda mena. Reincidentes, Narco, SA, Berri Txarrak y mesmo Las Niñas u Willy Toledo. Se podría fer mesmo un concurso. Que tos faiga buen prebo...

X Borina por l'aragonés

Un clasico torna como toz os años. A X Borina por l’aragonés se ferá o benién 8 de Marzo. Ta qui pentinamos bella caneta, talmén con un poquet de reseco, encara, d’a quiesta zincomarzada, pero s’abrá de fer un poder...

Ista dezena edizión torna a estar organizada por Nogara y o Ligallo de Fablans de l’Aragonés. A las siete un pasabillas saldrá dende a Plaza Asso y ferá una gambada por as carreras d’a Madalena. Dimpués bi abrá mesas informatibas dende las güeito en a Carrera Mayor, a o canto d’o Crápula. Ta rematar, como no, borina en o Dispierta Fierro. Astí se ferá un sorteu de cursos d’aragonés de baldes, chambretas, libros y material en aragonés....

A borina por l’aragonés chunta toz os años a buena cosa de fablans y neofablans ta pasar un buen ratet y poder charrutiar a nuestra luenga en o millor ambién: a borina. Deziba o mio mayestro d’aragonés que a luenga moriría, pero de zirrosis. Y ye bella cosa que he puesto beyer mientres muitos años. Cuantisma chen, que por un regular no charra guaire, en encapinar-se bella mica, parix que dixa a medrana en bel puesto y preta a charrar. Millor u pior, rai. A seguntes qué oras y en seguntes que condizions dengún charra bien mica luenga.

Bels diyas antis, en a Zincomarzada d’o Parque d’Oriente, podremos besitar tamién os puestos de LFA y Nogara. Dende a organizazión s’ha achustau a Los Dulzaineros del Bajo Aragón y a Timbalao t’animar o diya. Parix que a la fin, ferá más fredor que no nos creyebanos, pero con buen bin y entropans resistiremos lo que calga. Asinas que paraz os figaus que los amenistarez.... A! Y tamién bi abrá atros puestos intresans que caldrá ir-ie como o d’o BIC u los Anti-especulazión (Gran Scala, Expo y asinas asinas...)

Cthulhu presidén

Ya se me feba raro que con l'arribada d'os frikis en os meyos de comunicazión de masas no bi ese garra partiu friki en istas eleczions. En zagueras somos ganando menutos y menutos de telebisión y zine. Mesmo parix que bel diya baigamos a estar rispetaus y tot... Tanimientres, he trobau un bideo d'un partiu que no conoixeba y que cuento que se presenta t'a eleczions. Talmén no siga que una pachuchada que bel abentau ha penchau en Youtube... A tamás d'a mosica y o siñal beyez-tos-lo que ye una d'as más grans frikadas que he bisto en muito tiempo. Y que remeranzas m'ha trayiu d'o biello club de rol Excalibur (que dimpués se reclamó Darkhold) an que chugué tantas y tantas partidas a "La llamada de Cthulhu". Ta frikis de ran 2....