Ambute combocatorias

En plegar os meses de berano toda a chen preta a fer toda mena de chornadas, autos, charradas, borinas, acampadas, festibals.... Y en bels pocos diyas bi ha asabelo combocatorias intresans. Prenzipiamos ista mesma tardi con una combocatoria de desconzentrazión contra a presión polizial que se ye fendo a os mobimientos sozials. Dende fa bels meses y como fendo un siñal de lo que será a Expo, os mobimientos sozials son acosaus por a polizía fendo identificazions en todas as mobidas que se fan en a ziudat y metendo piñoras a muitos d’os organizadors de diferens autos. Ta ixo ista combocatoria o miercols a las 20.00 en a plaza d’o Conzello de Zaragoza no será una conzentrazión. Será una desconzentrazión. Has de ir-ie con bels amigos, en collas de menos de cuatro personas y fer cualcosa (legal) como chugar a futbol, charrar, pintar. leyer... O nuestro dreito a fer serbir as carreras ta esprisar-ie as opinions nuestras ye en periglo.

Como o 29 de Chunio ya ye amanau s’han feito bels pocos autos ta remerar-lo. Prenzipian maitín chuebes de man de Rolde de Estudios Aragoneses que presentan o libro “Fueros y libertades de Aragón” de Jesús Morales en a siede d’o Chustizia d’Aragón (C / Don Juan, 7) a las 19.30. O mesmo 29 de Chunio A Enrestida prenzipia unas minichornadas con a charrada “300 años d’ocupazión española en Aragón” sobre os Decretos de Nueba Planta a las 20.00 en a suya siede.

O cabo de semana a Bal de Tena acullirá a “XIV Trobada d’escritors en o Pirineo” an que bi abrá un par de charradas en Pandicosa y un conzierto de nueis en Piedrafita de Tena con La Orquestina del Fabirol y Lurte. Ta qui remana en Zaragoza as chornadas d'A Enrestida continan o Sabado con una borina en o Fergu's (Zuma).

Tamién bi ha atros autos como un festibal de mosica o cabo de semana en Bailo an que entre atros tañerán GEN y Gena u unatra charrada, organizada por CHA, sobre os Decretos de Nueba Planta o biernes que tamién ye o cabo d’año d’iste partiu. No meto más informazión simplamen porque no la he trobada por o rete.

En zagueras, cal remerar que ista ye a zaguera semana antis que no prenzipien os cursos d'aragonés intensibos de berano de Nogara, asinas que toz qui no tos i aigaz apuntau fez-lo antis con antis.

Ya prenzipiamos a no adubir y ixo que encara no ha prenzipiau Chulio!

Tres esferras III. Os Decretos de Nueba Planta

En prenzipiar o sieglo XVIII a independenzia d’Aragón yera más nominal que reyal, pero continaba tenendo as suyas propias leis y dreitos. A situazión yera de guerra por o problema suzesorio que bi eba. Dos casas, os Borbons y os Austrias barallaban por o trono español. Os países d’a Corona Aragonesa eban refirmau a Carlos d’Austria mientres que Castiella y Nabarra refirmaban a o Borbón Felipe d’Anjou. En a baralla d’Almansa (Albazete) as tropas borbonicas benzión a l’exerzito austrazista, ganando a Guerra de Suzesión y prenzipiando a establir o nuevo sistema borbonico zentralista remedando o modelo franzés.

Felipe IV (V de Castiella) dezidió allora castigar a os territorios que eban refirmau a Carlos, con a publicazión d’os Decretos de Nueba Planta que beniban a reordenar tot lo sistema de gubierno d’os países baxo lo suyo reinau. O 29 de Chunio o primer Decreto, que feba referenzia a os reinos aragonés y balenziano, aboliba os fueros d’os dos países y as suyas instituzions (As Cortes, O Chustizia, a Diputazión…). En ixe decreto, que o testo tos copio más t’abaxo, se imposaban as leis castellanas en os reinos de Balenzia y Aragón por dreito de conquista (literal). Dimpués se publicarían os Decretos de Cataluña y Mallorca (1715), an que tamién s’estricallaban as suyas leis. En o caso catalán s’aplicó a tot lo suyo territorio fueras d’a Bal d’Arán. En o caso mallorquín o Decreto no estió tan furo por a negoziazión que bi abió. En 1711 Aragón (Balenzia no) recuperó parti d’o suyo dreito, o dreito pribau, que encara güe tenemos. Os “territorios forals” (güe Nabarra y Euskadi) no tenión iste castigo por aber refirmau a Felipe y continón tenendo os fueros suyos.

En o mesmo Decreto no solo s’imposaba o dreito y as instituzions castellanas, sino tamién os suyos “usos y costumbres” en una platera referenzia a la luenga y cultura d’os países aragoneses. En Aragón o castellano ya yera luenga de la más gran parti de l’almenistrazión (que no d’o pueblo) pero ixa luenga s’imposó tamién en os países de raso catalanoparlans.

As Cortes Aragonesas no se tornarían a achuntar dica la plegada de l’Estatuto d’Autonomía, fueras de en a Guerra d’a Independenzia contra os franzeses an que Palafox las combocó. A tamás d’aber pasau un sieglo, os aragoneses y Palafox en concreto remeraban as nuestras instituzions.

Aragón eba conserbau as suyas instituzions, dreitos y leis, fizienda, cultura… mientres sieglos y sieglos de guerras y imbasions con cuasi tos os países bezins. Aragón estió un Estau con mayor u menor (u mica) interbenzión castellana, pero un Estau. Dende 1707 Aragón se tornó un apendiz castellano. Xublidaus, pallar de l’Estau, fatos utils cuan caleba, país an que foter-se lapos entre castellans y catalans, un troz de tierra an que charrabanos raro.

Con tot y con ixo, Aragón no se xublidó. Mientres o sieglo XVIII os representans aragoneses en as Cortes castellanas prauticón bella mena de rechionalismo como o que se fa agora conseguindo formar una colla de presión importan an que yeran personaches como o Conde de Aranda (iste sí que ye o famoso). Os costumbres aragoneses no se dixón y continemos con buena parti d’a nuestra cultura. L’aragonés encara se charraba (y se charró dica o sieglo XX) en buena parti d’o territorio. Caldría asperar dica 1936 ta que os aragoneses reclamasenos un territorio nuestro de traza formal, encara que a Guerra Zibil Española crebó por bels pocos meses as nuestras aspirazions (si Franco s’ese asperau dica l’ibierno…).

Iste ye l’articlo que remata a serie d’as tres esferras contra Aragón. Bi’n ha abiu muitas más pero istas creigo que son as más importans. Güe, en Aragón, no conoxemos a historia nuestra. O diya nazional ofizial ye o 23 d’Abril, San Chorche, un santo cristiano. Ni o 20 d’Abiento ni o 29 de Chunio se fa mica acto instituzional. No sale garra notizia en os papers, TB u radio. Pasa inorau de raso por toz os aragoneses fueras d’os cuatro que conoxemos a historia y creyemos que ye importan conoxer-la, remerar-la y demandar un achute de cuentas (en o sentiu bueno d’a esprizión). Iste 29 de Chunio se fan 300 años d’o Decreto de Nueba Planta aragonés. Remeraz cuantismo mal dión en España con o 500 cabo d’año de la plegada de Colón en America, con o 30 cabo d’año d’as “primers” elezions democraticas (xublidando as d’a II Republica, por zierto), con Lorca (xublidando a Neruda) u con cualsiquier fatera? En Aragón somos terne que terne fendo “l’año de Goya”, “l’año de Ramón y Cajal” y asinas asinas. Que me parixe muito bien. Pero femos 300 años conquerius (como diz o Decreto, que no imbento cosa) y aquí dengún no diz cosa. Os mainates de turno s’enfuelgan con o nuebo estatuto de buenos y leals españols y prou. Un primer trango enta la nuestra dinidat como país y nazión sería tan fazil de dar como zilebrar y remerar toz os años ixas dos calendatas, o 20 d’Abiento y o 29 de Chunio y mesmo fer-las as fiestas nazionals d’Aragón, como muitos, de traza particlar ya femos.

Tos dixo con parti d’o testo d’o Decreto que charra por si mesmo. Prenez-tos dos menutos en leyer-lo que bien se’n bale (en castellano):

Considerando haber perdido los Reinos de Aragón y de Valencia, y todos sus habitadores por el rebelión que cometieron, faltando enteramente al juramento de fidelidad que me hicieron como a su legítimo Rey y Señor, todos sus fueros, privilegios, exenciones y libertades que gozaban y que con tan liberal mano se les habían concedido, así por mí como por los Señores Reyes mis predecesores, particularizándolos en esto de los demás Reinos de esta Corona; y tocándome el dominio absoluto de los referidos reinos de Aragón y de Valencia, pues a la circunstancia de ser comprendidos en los demás que tan legítimamente poseo en esta Monarquía, se añade ahora la del justo derecho de la conquista que de ellos han hecho últimamente mis Armas con el motivo de su rebelión; y considerando también, que uno de los principales atributos de la Soberanía es la imposición y derogación de leyes, las cuales con la variedad de los tiempos y mudanza de costumbres podría yo alterar, aun sin los graves y fundados motivos y circunstancias que hoy concurren para ello en lo tocante a los de Aragón y Valencia. He juzgado conveniente (así por esto como por mi deseo de reducir todos mis reinos de España a la uniformidad de unas mismas leyes, usos, costumbres y Tribunales, gobernándose igualmente todos por las leyes de Castilla tan loables y pausibles en todo el Universo) abolir y derogar enteramente, como desde luego doy por abolidos y derogados, todos los referidos fueros, privilegios, práctica y costumbre hasta aquí observadas en los referidos reinos de Aragón y Valencia; siendo mi voluntad, que éstos se reduzcan a las leyes de Castilla, y al uso, práctica y forma de gobierno que se tiene y ha tenido en ella y en sus Tribunales sin diferencia alguna en nada; pudiendo obtener por esta razón mis fidelísimos vasallos los Castellanos oficios y empleos en Aragón y Valencia, de la misma manera que los Aragoneses y Valencianos han de poder en adelante gozarlos en Castilla sin ninguna distinción; facilitando yo por este medio a los Castellanos motivos para que acrediten de nuevo los efectos de mi gratitud, dispensando en ellos los mayores premios, y gracias tan merecidas de su experimentada y acrisolada fidelidad, y dando a los Aragoneses y Valencianos recíproca e igualmente mayores pruebas de mi benignidad, habilitándolos para lo que no lo estaban, en medio de la gran libertad de los fueros que gozaban antes; y ahora quedan abolidos: en cuya consecuencia he resuelto, que la Audiencia de Ministros que se ha formado para Valencia, y la que he mandado se forme para Aragón, se gobiernen y manejen en todo y por todo como las dos Chancillerías de Valladolid y Granada, observando literalmente las mismas regalías, leyes, práctica, ordenanzas y costumbres que se guardan en estas, sin la menor distinción y diferencia en nada, excepto en las controversias y puntos de jurisdicción eclesiástica, y modo de tratarla, que en esto se ha de observar la práctica y estilo que hubiere habido hasta aquí, en consecuencia de las concordias ajustadas con la Sede Apostólica, en que no se debe variar: de cuya resolución he querido participar al Consejo para que lo tenga entendido.

PIR 2007

Habemus PIR! A la fin ya se conoix a programazión d’o PIR 2007. Ta qui no conoxca iste festibal se fa toz os años en bals d’a Chazetania y bi tañen collas de Folk de toz os Pirineus. Tamién se i fan esposizions, tallers, mercau, zine.... Como toz os años as collas aragonesas tañerán, más que más, de tardis, fueras de Cadiera Coixa que autuará o Sabado de nueis (bieeeeen!). Cada año se fa en uno u barios lugars diferens (Ansó, Echo y Aragües y Chasa). Iste año toca Echo os diyas 6, 7 y 8 de Chunio.

De collas aragonesas i serán Lurte, Cadiera Coixa, Os Chotos, La Ronda de Boltaña, Val d’Echo y beluna más. A la resta no les conoxco encara que aspero que sigan buenos. Igual como en as fiestas d’a Madalena as cosas que se i faigan rai, pos lo millor d’iste festibal ye l’ambién que se fa entre toda a chen que bi imos. Ye una d’ixas fitas an que nos chuntamos buena cosa de conoxius, an que beyes a chen que no tornas a beyer dica l’atro año y an que conoxes chen de toz os puestos d’o Pirineu. Entalto lo PIR!!!!

Fiestas en a Madalena

A Madalena ye en fiestas! Iste reibindicatibo bico d'a ziudat inmortal leba bente años zilebrando una semana cultural an que os coleutibos, organizazions y bezins fan una ripa cosas: conziertos, chentas populars, esposizions, zine, espeutaclos...

As fiestas prenzipión o biernes pasau con una traca y un conzierto an que, entre atros tañeban Mallacán y We and Dem (que a la fin tienen disco). Toz os diyas bel coleutibo organiza una chenta popular (con pres populars) amán d’a siede suya. Güe en a de l’Entalto bi eba bellas sisanta personas. Maitín será Nogara qui l’organize. En o cabo de semana se ferán as autibidaz an que se suposa que bi abrá más chen. Un conzierto con Manolo Kabezabolo, Angela Chanin y Repressalia en a Plaza S. Agustín y a tradizional chera de S. Chuan en o parque Bruil con orquesta y tot. Ta rematar, o domingo se ferá una gimkana que agora le dizen Umor Amariello. O programa lo podez beyer aqui. Pero lo millor d’as fiestas d’a Madalena ye l’ambien. Trobar-te con a chen de siempre pero tamién con muitisma atra chen de coleutibos u no, bezins u de difuera, jipis, punkis, jebis, comunistas, anarquistas u aragonesistas... toz de borina. Fueras d’o Sabado que plebió, l’orache s’ha feito d’a Madalena y son fendo unos diyas sobrebuenos ta estar en o parque u a carrera y fer buenos ratez con una biereta en istos diyas an que nos biedan tot y parix que l’unico ozio que nos dixan tener ye fer a tardi en o Grancasa.

Tres esferras II. 20 d'Abiento

Cuasi dos sieglos de reis castellanos prenzipiaban a esfer a cultura nuestra. L’aragonés prenzipiaba a esbafar-se y en muitos documentos escritos ya no se feba serbir a tamás de que continaba estando a luenga d’a más gran parti d’os aragoneses. Manimemos, o dreito aragonés, os nuestros fueros y instituzions y a nuestra independenzia (a lo menos teorica) encara remaniban astí.

O sieglo XVI estió pleno de problemas t’Aragón y os aragoneses y, más que más, ta o rei que compartibanos con a corona castellana y atros países y territorios. Felipe I (conoxiu como II por a numerazión castellana) se trobaba a soben con problemas por as leis aragonesas que eba churau cumplir. En una epoca meyebal an que os chuizios no yeran que obras de teyatro y con una Inquisizión con plenos poders, os fueros y leis aragonesas yeran prou fastiosos ta Felipe I. O Pribilechio de Manifestazión, entre atrás cosas, biedaba torturar a os chuzgaus y istos podeban endrezar-se t’o Chustizia d’Aragón ta que los esfendese.

En 1591, Felipe I trobó a enchaquia perfeuta ta estricallar o poder aragonés y prenzipiar a chusmeter ixe reino que tantismo mal le daba. Antonio Perez, acusau d’asesinato en Castiella, fuyó enta Aragón an que se acubilló y demandó aduya t’o Chustizia d’o Reino, querendo que l’aplicasen as leis aragonesas. Chuan V de Lanuza, conoxiu como O mozo, que tasamen lebaba tres meses en o cargo, ascuitó as suyas demandas, refirmau por Diego de Heredia, o Conde d’Aranda (o famoso no, que ixe ye d’o sieglo XVIII) y o Duque de Villahermosa. Felipe I fazió serbir l’unico tribunal que as leis aragonesas no le podeban fer cosa: A Santa Inquisizión. Os zaragozanos, de man de Diego de Heredia, consiguión quitar a Antonio Perez d’as garcholas inquisitorials (que yeran en l’Aljafería), menando una rebuelta en a ziudat. O rei, crebando o suyo churamento d’os fueros y respondendo a o pulso que le feban os zaragozanos, imbió a 12.000 ombres d’o suyo exerzito a imbadir Zaragoza ta tornar a meter “orden”. Cal remerar que, ta par d’alabez, ixo, antiparti d’estar un clarismo contrafuero y estar biedau por as leis aragonesas, yera a imbasión d’un exerzito forano como encara se remera en una placa d’o zaragozano mercau zentral (beyer foto).

Como ye platero por a nuestra situazión Felipe y as tropas castellanas ganón. Chuan de Lanuza, Chustizia d’Aragón, a instituzión más importan en Aragón dimpués d’o mesmo rei, estió decapitau publicamen sin garra mena de chuizio. Diego de Heredia estió preso en Franzia an que lo matón, Aranda y Villahermosa morión en garcholas castellanas en “condizions misteriosas”. Antonio Perez, dimpués de prebar de imbadir Aragón dende Bearn con l’aduya de Enrique de Nabarra, fuyó ta Franzia primero y t’Angalaterra dimpués.

Dimpués d’istos feitos Felipe I combocó en 1592 Cortes Aragonesas en Tarazona, dende an que eban saliu tropas ta concarar-se con os catellanos que nunca no plegón en Zaragoza. En ixas Cortes esbafó todas as leis aragonesas y os suyos fueros, dixando-las muito más controlables por o rei castellano. Qui eba esfendiu os fueros estió encorriu por a chustizia castellana y reprimiu sistematicamen. O Pribilechio de Manifestazión dixó d’esistir. Dende allora o rei podeba nombrar a un birrei no aragonés, podeba sacar a o Chustizia d’Aragón, teneba o control d’a Corte de Chustizia y atrás custions que cambión de raso tot lo sistema legal aragonés. L’exerzito castellano encara remanió en Zaragoza dica 1593, lo que nos puede dar una ideya de l’ambien que bi eba en a ziudat. Os zaragozanos trobón poquet refirme en a resta d’Aragón y denguno en a resta d’os países d’a Corona Aragonesa. Ni balenzians ni catalans nos refirmón en ista gran esferra que nos minchemos solencos.A situazión que quedó dimpués d’istos feitos yera una independenzia aragonesa más nominal que reyal. Dende alabez os reis castellanos trobón pocos problemas en as instituzions aragonesas. Felipe I churó os mesmos fueros que no cumplió dimpués. En ixe churamento, o Chustizia, cumplindo os fueros l’eba dito, como feba con toz os reis aragoneses: “Te femos Rei si cumples os Fueros nuestros y los fas cumplir. Si no, no”.

Tres esferras I. O Compromís de Caspe

Prenzipio con iste una serie d’articlos endrezaus a charrar d’os tres grans feitos istoricos que han feito que Aragón siga güe o país colonizau y/u asimilau que ye. Ista ye una faina más que más dibulgadera cara ta chen que no sepa cosa u, a lo menos, no guaire, sobre a istoria aragonesa, asinas que abré de dixar a un costau asabelo datos intresans y no podré afundar tantismo como me fería goyo. D’atra man tampoco no tiengo tiempo ta fer-lo. Cualsiquier alportazión de man d’os que leyez o blog ye, profés, biembenida.

O primer feito se conoix como o Compromís de Caspe. Os zaragozanos lo remeramos en a carrera que cuasi fa muga entre o Rabalete (u bico San Chusé) y o bico d’As Fuens. Cuan, en 1410, Martín I l’Umano muere sin fillos se creya un problema de suzesión como tantas begadas bi ha abiu en toz os paises que han teniu sistemas monarquicos. Dos años dimpués, en a concordia d’Alcañiz, y dixando dezaga un interregno con bellas tensions entre a nobleza, os parlamentarios d’a Corona se meten d’alcuerdo ta fer un Compromís an que nueu compromisarios, tres por cada país d’a Corona, eslixan a o nuebo rei d’entre bels candidatos. Os compromisarios s’achuntón en l’aragonesa billa de Caspe que yera entre os tres países (Aragón, Balenzia y Cataluña). Ta guaranziar a suya seguridat y que o prozeso no tenese menazas no se dixó que se i amanasen con más de bente ombres armaus a menos de cuatro leguas.

Encara que bi eba zinco candidatos ta ocupar o trono ascape se quedón en nomás dos: Fernando de Trastamara, infante de Castiella y Chaime II, Conde d’Urgel. A botazión, que se fazió o 24 de Chunio de 1412 trigó como rei a Fernando de Trastamara con seis botos a fabor, dos en contra y una abstenzión. D’os seis botos a fabor, tres yeran d’os aragoneses, dos d’os balenzians y uno d’os catalans. Ta estar trigau caleba, antiparti de que bi ese mayoría, que bi ese a lo menos un boto de cada país. Allora la botazión estió prou ta coronar a Fernando como Fernando I d’Aragón a tamás que nunca no se sintió aragonés por estar castellano. De man d’o Conde d’Urgell bi abió una prebatina de rebelión que no plegó en garra cabo importán. O nieto de Fernando I sería Fernando II d’Aragón qui, en casar-se con Isabel de Castiella, chunió dinasticamen (que no legalmen) as coronas aragonesa y castellana.

En primeras cal parar cuenta de que a traza de dezidir qui sería o benien rei ye un gran exemplo d’o conzepto d’a Corona Aragonesa an que os tres paises teneban toda a capazidat de dezisión sobre os territorios suyos pero sabeban prener dezisions de conchunta sin imposar-las a la resta de territorios. Fa seiszientos años, en a corona d’Aragón bi eba más sensibilidat territorial y un modelo más federal que no agora en l’Estau español.

Dizen bels istoriadors que o feito de que os representans aragoneses botasen a Fernando estió, más que más, por custions comerzials. Fernando teneba gran poder en a Mesta y Aragón amenistaba lana ta los suyos testils. Dizen tamién, y en isto soi d’alcuerdo, que muitos abión de penar dimpués por aber trigau a Fernando. Fernando nunca no querió a Aragón. Abió de churar unos fueros (en os tres países) que le feban fastio. Bibió de un costau ta l’atro por aber de besitar terne que terne os tres países y teneba arredol toda una crica de chen que no charraban castellano. Dende allora, l’aragonés y a cultura aragonesa prenzipió a esmortezer-se y os nobles, seguius d’a nobleza y sieglos dimpués de buena parti d’Aragón xublidón as radizes suyas y se fazión (fueras de bellas eszepzions que siempre bi ha abiu) de facto castellanos.Con tot y con ixo, Aragón continó esistindo. L’aragonés continó estando a luenga d’a más gran parti d’a poblazión aragonesa y os dreitos y a cultura aragonesa encara remanerían zereños mientres muitos sieglos. Beyeremos más entabán os feitos que restan ta esplicar l’autual situazión aragonesa. Iste primero ye l’unico an que podiemos eslexir y nos entiboquemos (y jibo si nos entiboquemos...)

Inoranzia

Sentiba en l’autobús iste maitin a canta ¡Sou gaitero! de Comando Cucaracha an que fan una reibindicazión d’a gaita aragonesa como parti d’a nuestra cultura y, en luengache somarda, como siempre, se’n riden de que a chen, cuan beye gaitas se creyen que son asturians, gallegos, escozeses u quemisió.

A gaita, como tantismas atrás esprisions d’a nuestra cultura no ye en l’esmo coleutibo d’a soziedat aragonesa en cheneral y d’a cheposa en particlar. En una mesa informatiba fa bels meses una muller de bels sisanta años me dizió que nunca no eba bisto una gaita aragonesa y que no sabeba que en Aragón tamién en tenesenos. Que penica de país! Por desgrazia ta muitos os siñals d’Aragón son l’Ebro, a jota, a pilarica, patrona d’a Ispanidat y poco más. Que bi aiga tot un mundo dillá d’ixos simbolos a els rai. Muita chen no sabe que esiste l’aragonés u as gaitas aragonesas. No saben mica sobre a istoria nuestra. A cualsiquier que le preguntes te dirá que o Compromís de Caspe ye una carrera, que o bente d’Abiento s'amana o nadal, y que t’o 29 de Chunio fa muita calor. Todas as esprisions de l’arte nuestro se quedan en Goya. A nuestra zienzia y tecnolochía en Ramón y Cajal y Miguel de Servet y a nuestra mosica en Heroes del Silencio.

Con tot y con ixo a chen charra y diz fateras de l’estilo de “a fabla no se charra y en cada bal charran diferen”, “en a Franja se charra chapurreau que ye un mezclallo de aragonés, catalán y castellano”, “o folklore tradizional d’Aragón ye a Jota”, "Aragón costruyó de conchunta con Castiella a Nazión Española cuan s’acomodón os Reis Catolicos” y asinas asinas. Me fa mal mesmo escribir-lo. Y istos saputos, sin estar filologos, istoriados, mosicos, etnologos, soziologos nian aber ubierto (ya no digamos leyiu) un libro sobre Aragón en a suya bida, repiten terne que terne y con toda autoridat istos topicos fendo-los parti de l’esmo coleutibo aragoneso-español.

Iste articlo lo lebaba pensando fa tiempos, y be-te-me que me trobo güe mesmo con unatro saputaz inoran d’os que soi fablando en o periodico. Iste matután se quexa de que a campaña piszinera d’o conzello d’iste año sigan unos cartels an que mete Capuzate (asinas, en aragonés). Diz l’inoran que se lo ha mirau en o dizionario d’a RAE porque esconoxeba ixa parola (prenzipiamos bien. Qui no conoix ixa parola?) y que i meteba como sinificau “meterse en el agua de cabeza” (sic). “Cagón tú, can!” que deziba una d’as lolas resitens de Chistau. Y porqué no te l’has mirau en un dizionario d’aragonés?. Talmén siga porque no sabe nian que esiste l’aragonés, u creiga que ye un imbento d’a CHA. Contina l’ombre iste dezindo (literalmen): “Me parece bien que el Ayuntamiento resucite palabras poco usadas, aunque pienso que para un anuncio son mejores los términos que conoce todo el mundo: sumérgete, lánzate, refréscate.”

Si ye forano tien escusa pos no abrá sentiu capuzar en a bida suya. Si no’n ye bi ha barias opzions: 1. Que siga en contra de l’aragonés, sepa de raso que capuzar ye aragonés u aiga escrito isto nomás que ta tocar os güegos. 2. Que no tienga amigos y que de berdat no aiga sentiu nunca dezir capuzar. Si me dezisen que o lema d’o conzello ese estau “Fe serbir as peszinas ta no cremar-te o tozuelo”, entiendo que bi aiga chen que no lo entienda, pero ¿Capuzate?... 3. Que simplamen siga un inoran con muito tiempo libre ta quexar-se por isto. Porque con os problemas que tenemos toz, malfurriar tiempo en quexar-se por ixo…

Caldría preguntar de qui ye a culpa que aigamos cazegau a nuestra identidat y a nuestra luenga dica o punto que cuan o conzello fa un chiquet zeño a l'aragonés fendo serbir una parola conoxida por o 95% d'os aragoneses (encara que no sigan aragonesofablans) bi aiga chen que no le faiga goyo y que güe contine parexindo-le una baturrada. Si continamos sin dinnificar a luenga en as escuelas, en os meyos de comunicazión y en a soziedat (toz emos de fer o nuestro poder) continaremos beyendo cartas como ixa sin que a chen se meta roya como un ababol.

Como d’inoranzia bi’n ha muita, continaré escribindo belatro diya sobre iste afer. A os clamaus “tertulianos” d’a TB y radio (rufierters en aragones?) cal adedicar-les un articlo entero sobre a inoranzia.

Imnos y atras patriotadas

Qui escribe crexió ascuitando ixo que cantaba Manolo Kabezabolo, cuan encara no eba grabau mica disco, de “un patriota, un idiota”. Años dimpués, cuan prenzié a amanar-me t’o mobimiento aragonesista me parixeba asabelo curioso como tantisma chen feba serbir a parola “patriota”. A os primers que les sentié fer-la serbir no les tiengo guaire cariño y la emplegaban con o sentiu que yo entendeba que teneba allora. Ixe matután que ye disposau a morir y matar por a patria. Como lo de morir y matar nunca no me ha feito goyo (soi un mincharflors, ya sabez) continé dispreziando ixa parola y asoziando-la a zelebros buedos y, por un regular, biolentos en as suyas trazas. Lo de as trazas ye porque me pienso que, más que más, no son que uno paroleros que se picharían denzima si les calese pillar un rifle y pretar a foter tiros, pero aspero no aber de beyer contrimostrada ixa suposizión nunca.

Dimpués, sentié tamién fer serbir ixa parola en bocas de chen que me parixeban más agudos, prestos y que a suya opinión y trazas d’estar rispetaba ambute. Paré cuenta más que d’a parola, d’o sinnificau, de a qui meteban iste achetibo. Y, en cuentas de meter-le-ne a os tozuelos buedos, le’n meteban a chen treballadora. A chen que se foteba tot lo diya treballando por o país, en o sentíu de fer imbestigazions, organizar autibidaz, conziertos u chornadas, aduyar a espardir a ideya de país que tantos tenemos u simplamen tener un fortal compromís con Aragón. Como tantas begadas as parolas pueden sinnificar cosas de raso diferens pendendo en qui las faiga serbir y ta que.

Dito isto y charrando de patriotas y patriotadas, sentiba fa bels diyas en “No somos nadie” (o programa de Pablo Motos en M80), as letras que proposaba a chen ta l’imno d’España. Penibles todas, cal dezir…. Os imnos son millors si se pueden cantar. No ye lo mesmo sentir un imno con la man en o peito y cara seriosa, como muito, que cantar-lo. En as nueis de zorrera, en os ebentos esportibos, en as manifestazions, queda muito millor una buena crica chen cantando que mirando-se t’o zielo.

Igual como l’imno d’Spain, os aragoneses tenemos un imno sin letra. Y goso dezir que mesmo no tenemos imno. Cuanta chen ha sentiu bella begada l’imno d’Aragón? Cuanta chen lo conoxe si suena? Dengún u cuasi dengún. Qui lo composese, suposo y pocos más. No se puede fer un "imno de propio". Os imnos han de tener o poder de chunir a la chen con una ideya. En Aragón, siempre se diz que l’imno ofizioso ye o Canto a la Libertad de Labordeta. Y creigo que e berdat. Nos faiga u no goyo, ye a unica mosica que, ascape, toda a poblazión aragonesa asozia con a esfensa d’o nuestro país u simplamen con o país nuestro. Bi ha cantas que creigo que serían millors ta estar imno d’Aragón. La Revolandera u La Tronada d’A Ronda de Boltaña me fan muitismo más goyo, charran d’Aragón como nazión y son de raso emozionans. A muitos os pels se nos tornan punchas cuan las sentimos. Pero de seguras que si en bella manifestazión contra o trasbase la metesen pocos más de 1/3 d’a chen que i estasenos la cantaríanos tanimientres que a canta de Labordeta la conoxemos toz de punta ta coda.

Bueno, ta aconortar-nos de iste país sin imno glorioso ofizial, a lo menos, nusatros tenemos imno(s) ofizioso(s). Y España , por muitas prebatinas que faigan, no.

Tornan os cucarachers!

A la fin en a carrera ye plegau o nuebo disco d’o Comando Cucaracha “Entre heroes y villanos”. A suya presentazión se fazió ayer en o Refugio del Crápula an que nos chuntemos asabelo chen ta sentir (y mercar) o disco nuebo y beyer o bideo de “Medias Rosas”.

Dimpués de tanto tiempo sentindo as nuebas cantas nomás que en os conziertos, a muitos ya nos aganaba de tener-lo en casa ta ascuitar-lo a monico y con tranquilidat. O Comando ha continau con o treballo feito en o primer disco y a mosica suya contina estando “mondongo”. Ta qui no los aiga sentiu nunca (que ya le bale) tienen un soniu parellano a Ixo Rai! encara que una mica autualizau y más borinero. Mientres catorze piezas nos leban de borina, pero reibindicatiba. Bi ha cantas sobre a emigrazión, os toros, Latinoamerica, Aragón, as montañas y a especulazión…

Ta qui a mosica tamién ye borina y, más que más, borina, una colla como Comando Cucaracha ye tot un luxo. Cuan bas ta bel conzierto sabes que i bas a fer un buen ratet. De feito, o más gran problema que tiengo con els ye que goso pasar-me una miqueta con l’alcol en os conziertos suyos y dimpués no los remero bien.

En o CD bi ha tamién un bideo d’una canta que estió grabada en a plaza de toros de Zuera. A canta ye Medias Rosas que aspero que ascape se torne un imno antitaurino (que'n calen más). Con o publico que gosan tener o Comando ye bien riesgoso embrecar-se en a luita antitaurina. No sé qué pensarán en más d’un lugar cuan la sientan… Pero son estaus fidels a los ideyals suyos y no solo l’han grabau sino que en han feito o bideo. Tamién se bi incluye un “como se fazió” d’o bideo con imachens sobrebuenas que nos trayen buenas remeranzas a qui estiemos. Ta qui conoxca un poquet l’ambien madalenero y más que más d’a parroquia d’o Fierro nos trobará a toz en o bideo, que siempre fa deleria. Dende iste blog animo cucarachers y continaz asinas!

Tanimientres prenzipia a chira tos dixo con o bideo de Medias Rosas. Si miraz en YouTube tamién podez trobar-ie o "como se fazió".

Cursos d'aragonés

Iste berano, l’Asoziazión Cultural Nogara ferá cursos d’aragonés intensibos en os meses de Chulio y Setiembre. En primeras se bi ufren cursos de 1er y 2º ran en orario de tardis. As clases, que se ferán de Lunes a Biernes son de tres oras y prenzipian o benién 2 de Chulio. T’apuntar-se-ie lo puez fer pasando por o local de l’asoziazión en a carrera Gabín nº 6 de 17 a 21 entre semana, clamando a o 976 39 07 08 u escribindo un correu a asoziazion@nogara-religada.org. O pre d’o curso ye de 65 euros y incluye os materials de clase y cuatro numers d’a rebista en aragonés Espiello que edita l’asoziazión.

L’Asoziazión Nogara leba más de diez años fendo cursos d’aragonés y ha amostrau ista luenga a un buen fascal d’alunnos que han pasau por as suyas aulas (un d’els soi yo). Antiparti d’os cursos han organizau mientres catorze años as Chornadas d’as Luengas d’Aragón y atrás muitas autibidaz de toda mena, estando parti importán de Chuntos por l’aragonés y de tot lo prozeso que remató (u prenzipió) con a creyazión de l’Academia de l’aragonés. Muitas d’as charradas y autibidaz que fa las puez trobar en www.charrandotb.com, como o programa que tenión en a canal 60, u bellas d’as charradas que han feito en o local suyo.

Nogara tamién ufre bels serbizios ta os suyos alunnos y sozios como una biblioteca en aragonés an que se pueden amprar y consultar libros u una botiga an que mercar libros, CD's, chambretas y toda mena d'articlos relazionaus con l'aragonés. O Espiello, a rebista que edita ye en momentos de quitar o suyo benteno numer tornando-se tot un referén d'a luenga escrita. Iste año s'ha enzetau una faina publicadera con a edizión de Ucronía, o libro de Dabi Lahiguera que ya en fablé fa tiempos.

A qui no conoxcaz mica ista luenga, la conoxcaz poco, queraz remerar-la u prauticar-la tos combido a que tos i apuntez. Una luenga sin chen que la charre s’amorta y toz sabemos que l’aragonés ye en as tres pedretas. Ya sabez: iste berano, dimpués d’a piszina, cal aprender aragonés!

Contino tos pencho un bideo d'una d'as charradas que organizó a colla de lingüistica de Nogara. O bideo ye nomás a primer parti. A segunda la puez trobar tamién en www.charrandotb.com.

Matarranya, libros y meyebals

En a puenda eleutoral bi eba bida difuera d’os colechios eleutorals, campañas, sondeus, cartels, bitorias y redotas. O 19 de Mayo se presentaba o disco Sons del Matarranya an que bentiseis collas aragonesas de mosica fan serbir o catalán en a suya mosica. A mas gran parti, como ye de dar, son d’o Matarranya u d’atrás redoladas catalanofonas d’Aragón pero tamién i partizipan collas como Mallacán, Prau u Dechusban.
En Zaragoza ya se puede mercar o disco, a lo menos en A Enrestida (que ye an que lo merqué yo) y prexino que en belatro puesto más, por un cacano pre de 10 euros (o disco ye doble). Antimás, tamién A enrestida organiza un conzierto en o suyo local de cantautors matarrañencos o Biernes a las 22:00 (puncha o binclo d’alto ta más info) en unas chornadas contra a SGAE que siña MagoFermin, entre atros.

Ta qui tienga l’achenda bueda (¡Que suerte!) que baiga emplindo-la pos, antiparti d’ixe conzierto y d’a resta d’autibidaz que nos i proposan iste cabo de semana remata a Feria d’o libro y se fa o tradizional Mercau Meyebal.

Sobre a Feria d’o libro, poco que dezir. Estoi que qui leiga alto u baxo asoben ya se’n abrá enterau y qui no, pos rai, porque no creigo que prenzipie a fer-lo. Como soi d’os primers, torno a recomendar-tos a Lorenzo Mediano. Os primers libros suyos que leyié estión Los olvidados de Filipinas y El secreto de la Diosa. O primero rezenta a istoria nobelada d’o lolo suyo en a guerra de Filipinas y o segundo ye un best-seller d’a nobela preistorica. Con os dos pasé un rato buenizo de tot. Dimpués leyié Escarcha sobre los hombros, nobela d’amor en o Pirineu d’os cuaranta. Nunca no eba leyiu mica nobela d’amor y me feba asabelo medrana leyer-la por si me feba burro falso, pero parixe que a iste ombre rai de qué escriba que tot lo fa bien. Encara que prebo de leyer tot lo que pasa por as mans mias no soi mica experto y puestar que ta qui en siga ixos libros le parixcan fiemo, pero de berdat pasé un sobrebueno ratet y aspero que qui leiga isto tamién lo pase.

Atra caseta que tos combido a que besitez ye la de Onagro, an que continan ufrindo buenos libros (los de Lorenzo, por exemplo) a buenos pres. Lo millor d’ista chen, antiparti d’os libros, son o trato que te fan. Fez-tos una charradeta con o editor y de seguras que en saldrez con bel libro.

Y ta rematar, os clasicos como Rolde d’Estudios Aragoneses, que a cualsiquier que l’intrese bella mica Aragón, i trobará bel libro que mercar, Gara d’Edizions (en o puesto de PRAMES) an que continan bendendo a colezión de AINAS, Pirineo con bels libros bien intresans u a caseta d’o Gubierno d’Aragón, an que se bende o zaguer premio Arnal Cavero que ganó Ruben Ramos.

O mercau meyebal ya ye un clasico d’as Ferias que se fan en Zaragoza de berano. Ta qui aimamos trobarnos por bels pocos diyas en os sieglos an que Aragón yera toda una potenzia europeya, an que o castellano nomás se sentiba que cuan nos besitaban os foranos, an que os almugabars feban d’as suyas por ixas mars que os suyos pexes portaban a cuatribarrada… pos ye toda una borina. Minchar y zorriar rodiau de toda mena de mosicos y chens rarizas fendo chuegos u teyatro. En as botigas te puez trobar artesanía bien pincha y buenas cosas ta minchar. En as tabiernas te i puez fartar tamién de minchar y, más que más de zorriar. No ye Teruel, pero ye lo millor que, por agora, nos puede ufrir ista ziudat. Y cara ta Chulio unatra en Daroca….

Bueno, aspero que si tenebaz l’achenda bueda, ya no la tengaz.

Asoziazionismo ta enamplar a "democrazia"

Reprengo l’afer de fa bels diyas sobre os diferens sinnificaus de democrazia, ta fer belatras reflesions dimpués d’as elezions. Encara que las podese aber feitas antis, prenen forma escrita agora. Como deziba, as democrazias ozidentals capitalistas en reyalidat son, más que más, partitocrazias, an que os ziudadans delegamos toda la nuestra capazidat de dezisión en cualques partius y, mesmo nomás en qui los menan. Fa pocos diyas emos bibiu a reyalizazión de toda a nuestra capazidat de dezisión y influyenzia en a soziedat partitocratica. Pero reyalmen ye ixa toda a capazidat que tenemos?

Os ziudadans, a tamás d’o sistema y d’os partius, sí que tenemos muitisma más capazidat d’aizión que no nos creyemos. Se charra muito en zagueras, más que más de man d’os partius de cuchas, de “democrazia partizipatiba”. A ideya ye estendillar os poders munizipals, nazionals u mesmo estatals dillá d’os conzellos y parlamentos de diferens rans. A filosofía ye buena y, an que s’esperimenta ha dau diferens pero siempre intresans resultaus.

Pero, tanimientres en as nuestras ziudaz, países y estaus no se faigan serbir ixas ideyas: somos condenaus a continar podendo exerzer a nuestra soberanía nomás que cada cuatro años? En a mía opinión, os ziudadans tenemos muitas trazas de fer-nos sentir. A primera y más esclatera, y a que más fa serbir a chen ye botar (u no fer-lo) cada cuatro años. Atra, muito más minorizada y asoben xublidada, ye l’asoziazionismo. Cuan os ziudadans, que, uno por uno, no tienen mica poder, s’achuntan, son capables de muitas cosas. Dende conseguir achiquir bellas esferras que nos ferían os gubernans si les ne dixasenos, dica fer tremolar os mesmos alazez d’o sistema.

Ye de dar que fundar una asoziazión no ye plegar-ie y conseguir o tuyo ochetibo. Ye esclatero tamién que muitas asoziazions nunca no consiguen lo que de berdat quieren. Pero, por un regular, o feito de que una asoziazión esfienda bella ideya, esparda bel mensache u faiga bella faina que l’almenistrazión no fa cambea muitas cosas que no cambiarían si no esistise. Sin o treballo d’o Consello d’a Fabla, Ligallo de Fablans, Nogara, Rolde de Estudios Aragoneses y tantismas asoziazions que de seguras xublido, an sería güe l’aragonés y buena parti d’a cultura aragonesa? En tierra plana de raso xublidau y quemisió qu’ese pasau en a resta d’Aragón (que no la conoxco prou). Iste ye l’exemplo que millor conoxco pero en muitas atras dembas, Aragón no sería güe como en ye si no esen esistiu bellas asoziazions u organizazions.

O mobimiento en esfensa de l’aragonés ha conseguiu os suyos ochetibos? L’aragonés no ye ofizial. Sisquiá lo nombran en l’Estatuto aragonés. A unibersidat se mira t’atro costau y a D.Ch.A no reconoxe a l’Academia de l’aragonés como tal... Pero fa trenta años talmén bi eba dos u tres libros sobre l’aragonés, un par d’asoziazions que feban bella cosa por esfender-lo y cuasi dengún ziudadan dillá d’Almudebar eba sentiu, leyiu u mesmo bisto mica cosa en aragonés. Güe cuasi tot lo mundo sabe qu’esiste, muitos ya no s’abergüeñan de dezir pozal, rasmia, escobar u estozolar. Cada año s’editan ambute libros en y sobre l’aragonés. Asabelas asoziazions lo esfienden y lo fan serbir de cutio. Y os puliticos, que antismas se’n arreguiban, ya no pueden fer como si no esistise.

O caso de l’aragonés ye o que millor conoxco, pero bi ha asoziazions de toda mena: sindicals, de bezins, d’estudians, unibersitarias, culturals… y todas fan onra ta que os ziudadans sigamos bella cosa más que no consumidors que se miran como nos gubiernan. Cualcosa parellana a la ideya que tiengo yo d’o que ye un ser umano.

L’asoziazionismo ye un arma que os ziudadans tenemos ta fer lo que os puliticos no fan u ta conseguir que lo faigan. Y muitos ziudadans, la más gran parti d’os ziudadans, no la fan serbir. L’asoziazionismo nos amana más t’o conzepto de democrazia que muitos tenemos. Aquí y agora ye un d’os pocos cados de poder que nos dixan. Aprofeitemos-lo!